ᓄᓇᕗᑦ ‘ᒪᕐᕉᓕᖓᔪᓂ ᖁᓕᕇᒃᑐᓂᒃ’ ᐃᓕᓐᓂᐊᖅᑐᓕᕆᓂᕐᒥ ᐱᓕᕆᔾᔪᓯᖃᕐᒪᑕ, ᐊᕐᕕᐊᑦ-ᓂᒋᐊᓄᑦ ᒪᓕᒐᓕᐅᕐᑎ ᐅᖃᕐᑐᖅ

For the English version of this story, see Nunavut has ‘two-tier’ education system, Arviat South MLA says.

ᓇᓕᒨᒋᙱᓐᓂᕐᑕᖃᓗᐊᕐᒪᑦ ᓄᓇᕗᒥᑦ ᐃᓕᓐᓂᐊᖅᑐᓕᕆᓂᕐᒧᑦ ᐱᓕᕆᔾᔪᓯᕐᓂᒃ ᐅᓇ ᐃᖃᓗᐃᑦ ᐃᑲᔫᑎᖃᓛᖑᓪᓗᓂ ᐊᓯᖏᓐᓂᓪᓕ ᓄᓇᓕᐅᔪᓂᒃ, ᐊᕐᕕᐊᑦ ᓂᒋᐊᓄᑦ ᒪᓕᒐᓕᐅᖅᑎ ᔫ ᓴᕕᑲᑖᖅ ᐅᖃᕐᑐᖅ.

“ᐅᒃᐱᕈᓱᒻᒪᕆᒃᑲᒪ ᓄᓇᕗᑦ ᒪᕐᕈᐃᓕᖓᔪᓂᒃ ᖁᓕᕇᒃᑑᖕᓂ ᐃᓕᓐᓂᐊᖅᑐᓕᕆᓂᕐᒧᑦ ᐱᓕᕆᔾᔪᓯᖃᕐᓂᖓᓂᒃ,” ᓴᕕᑲᑖᖅ ᐅᖃᓚᐅᕐᑐᖅ ᓄᕕᐱᕆ 8-ᒥ ᒪᓕᒐᓕᕆᕝᕕᒃᒥ ᑲᑎᒪᑎᓪᓗᒋᑦ.

ᐅᖃᓚᐅᕐᑐᖅ ᐃᖃᓗᖕᓂ ᐃᓕᓐᓂᐊᖅᑏᑦ ᐃᓕᓴᐃᔨᖃᕐᓂᖏᓐᓂᒃ ᑕᒪᐃᓐᓄᑦ ᐊᒻᒪ ᐃᓕᓐᓂᐊᒐᒃᓴᖃᕐᓂᖅᓴᐅᓪᓗᑎᒃ,” ᐅᖃᕐᑐᖅ. “ᐃᓕᓐᓂᐊᕐᓂᐅᔪᖅ ᖁᕝᕙᓯᖕᓂᖓ ᐊᔾᔨᒋᙱᒻᒪᒍ.”

ᓴᕕᑲᑖᖅ ᑕᐃᒪᓐᓇ ᐅᖃᓚᐅᕐᑐᖅ ᐅᖃᓪᓚᒃᖢᓂ ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕᒧᑦ ᐹᒥᓚ ᒍᕉᔅᒧᑦ ᒪᑐᒥᖓ ᐃᓕᓐᓂᐊᕐᓂᐅᑉ ᖃᓄᐃᓕᖓᓂᖓᓂᒃ ᓄᓇᕗᒥᑦ ᓄᓇᓕᖕᓂ. ᓴᕕᑲᑖᖅ ᐊᐱᖅᑯᑎᖃᓗᐊᓚᐅᕐᑐᖅ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕈᓯᕐᓂᒃ.

ᓴᕕᑲᑖᖅ ᐊᐱᕆᓚᐅᕐᑐᖅ ᒍᕉᔅᒧ ᐃᓕᓐᓂᐊᕐᕕᐊᓗᖕᓂ ᐊᓂᒍᐃᔪᓐᓇᕐᓂᕐᒧᑦ ᓇᓗᓇᐃᒃᑯᑎᐅᕙᒃᑐᓂᒃ ᐃᖃᓗᐃᑦ ᓯᓚᑖᓂ ᓄᓇᓕᖕᓃᑦᑐᓂᒃ.

ᒍᕉᔅ ᑖᔅᓱᒥᖓ ᑭᐅᔪᓐᓇᓚᐅᙱᑦᑐᖅ ᑭᓯᐊᓂᓕ ᐅᖃᓚᐅᕐᑐᖅ ᐃᓕᓐᓂᐊᕐᓂᓕᕆᔨᒃᑯᑦ ᖃᐅᔨᓇᓱᖕᓂᐊᕐᓂᕋᖅᖢᓂᒋᑦ ᑐᓴᖅᑎᑦᑎᓂᐊᕐᒪᑕ ᓴᕕᑲᑖᖅᒥ. ᐊᐱᕆᓚᐅᕐᒥᔪᖅ ᒍᕉᔅᒧ ᓇᓗᓇᐃᕐᓯᖁᓪᓗᓂᐅᒃ ᒪᑯᐊ ᖃᐅᔨᓴᕐᓂᒧᑦ, ᐆᒪᔪᓕᕆᓂᕐᒧᑦ, ᖃᐅᔨᓴᕈᑎᓕᕆᓂᕐᒧᑦ ᐊᒻᒪ ᐆᒪᔾᔪᓯᐅᕙᒃᑐᓄᑦ ᐃᓕᓐᓂᐊᕈᑎᒃᓴᐃᑦ ᐊᑐᐃᓐᓇᐅᔭᕆᐊᒃᓴᖏᓐᓂᒃ ᑕᒪᐃᓐᓂ ᓄᓇᓕᖕᓂ ᐃᓕᓐᓂᐊᕐᕕᐊᓗᖕᓂ.

ᒍᕉᔅ ᐅᖃᓚᐅᕐᑐᖅ ᐃᓕᓐᓂᐊᕈᑎᒃᓴᐃᑦ ᒪᓂᒪᔭᐅᓂᖏᓐᓂᒃ ᓄᓇᕗᒥᑦ ᐃᓕᓐᓂᐊᕐᕕᐊᓗᖕᓂᒃ ᐊᒻᒪᓗ ᐃᓕᓐᓂᐊᒐᒃᓴᓂ ᐊᑐᐃᓐᓇᖅᑕᖃᙱᑉᐸᑦ ᐃᓕᓴᐃᔨᑕᖃᙱᓐᓂᕐᒧᑦ ᑕᐃᒪᓕ ᐃᑭᐊᕿᕕᒃᑯᑦ ᐃᓕᓐᓂᐊᒐᒃᓴᐅᕙᒃᑐᑦ.

“ᑖᒃᑯᐊᓗ ᐊᑐᐃᓐᓇᐅᔪᐃᓐᓇᐅᓪᓗᑎᒃ ᐃᓕᓐᓂᐊᖅᑐᓕᒫᓄᑦ,” ᐅᖃᕐᒥᔪᖅ.

ᑭᓯᐊᓂᓕ ᓴᕕᑲᑖᖅ ᐅᖃᓚᐅᕐᑐᖅ ᑭᒡᒐᖅᑐᖅᑕᖏᑦ ᐊᓯᐊᓂ ᐅᖃᕐᓯᒪᓂᕋᖅᖢᓂᒋᑦ.

ᐅᖃᖅᖢᓂ ᐱᐅᓯᕚᓪᓕᖅᑎᑦᑎᓂᐊᕐᓗᓂ ᓈᒻᒪᙱᓕᐅᕈᑎᐅᕙᒃᑐᓂᒃ ᓄᓇᕗᒻᒥᐅᓄᑦ — ᐃᓚᐅᓪᓗᑎᒃ ᐃᓅᓱᒃᑐᑦ — ᒪᐅᓇ ᐃᖅᑲᓇᐃᔮᖅᑖᕋᓱᖕᓂᒃᑯᑦ, ᐱᒋᐊᕐᕕᖃᕐᓂᖓᓂᒃ ᓈᒻᒪᒃᑐᒥ ᐃᓕᓐᓂᐊᖅᑎᑕᐅᓯᒪᓂᕐᒥᒃ.

“ᐃᓕᓐᓂᐊᖅᑐᓕᕆᓂᕐᒧᑦ ᐱᓕᕆᔾᔪᓯᐅᔪᖅ ᐃᓕᓐᓂᐊᖅᑎᓂᒃ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕌᓂᒃᑐᓂᒃ ᒪᑯᓄᖓ ᓯᓚᑦᑐᖅᓴᕐᕕᐊᓗᖕᓂ ᐅᕝᕙᓘᓐᓃᑦ ᓯᓚᑦᑐᖅᓴᕐᕕᖕᒧᑦ ᐃᓕᓐᓂᐊᓕᕈᓐᓇᕈᑎᐅᖕᒥᑉᐸᑦ ᐅᕝᕙᓘᓐᓃᑦ ᐃᖅᑲᓇᐃᔮᒃᓴᓂᒃ ᐃᓕᓐᓂᐊᒐᒃᓴᓄᑦ ᑕᐃᒪᓕ ᑕᒪᓐᓇ ᐱᓕᕆᔾᔪᓯᖅ ᐊᑐᕈᑎᖃᙱᓚᖅ,” ᐅᖃᕐᑐᖅ.

ᓴᕕᑲᑖᖅᓗ ᒍᕉᔅᓗ ᒪᓕᒐᓕᕆᔨᒃᑯᑦ ᐊᕐᕌᒎᑉ ᕿᑎᐊᓄᑦ ᖃᐅᔨᓴᖅᑎᓪᓗᒋ, ᑖᓐᓇᓗ ᐱᒋᐊᖅᑕᐅᓚᐅᖅᖢᓂ ᓄᕕᐱᕆ 6-ᒥ.

ᑕᐃᔅᓱᒪᓂ, ᑲᑎᒪᔨᕐᔪᐊᑦ ᕿᒥᕐᕈᐊᓚᐅᕐᓯᒪᖕᒪᑕ ᒐᕙᒪᒃᑯᑦ ‘ᑲᑐᔾᔨᓗᑕ’ ᐱᓇᓱᐊᒐᒃᓴᖏᓐᓂᒃ. ᒐᕙᒪᒃᑯᑦ ᓇᓗᓇᐃᖅᑎᓪᓗᒋ 2022-ᒥ ᑯᐃᓐ ᑭᒡᒐᖅᑐᐃᔨᖓ ᐅᖃᓪᓚᒃᑎᓪᓗᒍ ᐃᒪᐃᓕᖓᓚᐅᕐᓯᒪᖕᒪᑦ “ᐱᓇᓱᐊᒐᒃᓴᖃᕐᓂᖏᓐᓂ ᑲᑐᔾᔨᖃᑎᒌᒡᓗᑎᒃ ᐱᐅᓯᕚᓪᓕᖅᑎᑦᑎᓇᓱᖕᓂᕐᒥᒃ ᐱᓇᓱᐊᖅᑕᐅᓯᒪᔪᓂᒃ.”

ᐱᓇᓱᐊᕈᓯᐅᓚᐅᕐᑐᒥ ᒪᓕᒐᓕᕆᔨᕐᔪᐊᑦ ᐊᐃᑉᐸᖓᓂ ᓇᓪᓕᐊᑎᓯᒪᓕᖕᓂᖏᓐᓂᒃ ᐊᒻᒪ ᕿᑎᐊᓃᓕᕐᓂᖓ ᒪᓕᒐᓕᕆᔨᐅᓂᖏᓐᓂ, ᒪᓕᒐᓕᐅᖅᑎᑦ ᐊᐱᕐᓱᑲᑕᓚᐅᕐᒪᑕ ᒥᓂᔅᑕᓄᑦ ᖃᓄᐃᑉᐸᓪᓕᐊᓕᕐᒪᖔᑦ ᐱᓇᓱᐊᒐᖏᑦᑎᒍᑦ.

ᐃᖃᓗᐃᑦ-ᑕᓯᕐᓗᒃᒧᑦ ᒪᓕᒐᓕᐅᕐᑎ ᔪᐊᔾ ᕼᐃᒃᔅ ᐃᓱᒪᓚᐅᕐᑐᖅ ᒥᓂᔅᑕᓄ ᐅᖃᖅᖢᓂ ᓄᕕᐱᕆ 8-ᒥ ᑭᖑᓪᓕᕐᒥ ᐱᓇᓱᐊᒐᒃᓴᖏᓐᓄᑦ ᐅᓂᒃᑳᓕᐊᖏᑦ “ᐱᒻᒪᕆᐅᓂᕐᓴᐅᓛᖁᓪᓗᓂᒋᑦ.”

ᐅᖃᒃᑲᓐᓂᖅᖢᓂ ᓴᖅᑭᑎᑦᑎᒃᑲᓐᓂᕈᑎᑦ ᐊᒻᒪ ᑎᑎᕋᖃᑦᑕᕐᓂᖅ ᐃᑲᔫᑎᓂᒃ ᐱᑕᖃᕆᐊᖃᕐᓂᖓᓂᒃ ᒥᓂᔅᑕᓂᙶᖅᑐᓂᒃ.

“ᑭᓯᐊᓂᓕ ᐃᒪᐃᔭᒻᒪᑦ ᐊᒃᓱᕈᕈᑎᑕᖃᓕᖅᐸᒃᖢᓂ,” ᐅᖃᓚᐅᕐᑐᖅ ᕼᐃᒃᔅ ᐅᓂᒃᑳᑎᒍᑦ.

“ᐱᐅᔪᐊᓘᖏᓐᓇᐅᔭᙱᒻᒪᑦ ᒪᑯᑎᑐᓇᖅ ᔫᓂᑯᐊᓐᑎᑐᑦ ᐊᒻᒪ ᑲᑕᐅᔭᑎᑐᑦ.”