ᓄᓇᕗᑦ ᓕᐳᕈᒃᑯᓐᓂᑦ ᐊᑐᕈᑎᖃᙱᓚᑦ

ᑕᒪᓐᓇᓕ ᓱᖁᑕᐅᙱᑦᑐᖅ, ᓲᖃᐃᒻᒪ ᐅᓄᕐᓂᕐᓴᐃᑦ ᓄᓇᕗᒥᑦ ᓂᕈᐊᕈᓐᓇᖅᑐᑦ ᓴᖅᑭᑎᑦᑎᓚᐅᕐᒪᑕ ᐅᒃᑑᐱᕆ 21-ᒥᑦ, ᑭᓱᒥᓐ ᓴᖅᑭᑎᑦᑎᓚᐅᙱᒻᒪᑕ.

2015 ᐱᒋᐊᖅᖢᓂ, ᔭᔅᑎᓐ ᑐᕉᑑ ᐊᒻᒪ ᐊᓯᖏᑦ ᓕᐳᕈ ᒐᕙᒪᐅᔪᑦ ᓄᓇᕗᒧᑦ ᑐᓴᒐᒃᓴᓕᐅᖃᑦᑕᖅᓯᒪᔪᑦ ᐊᒥᓱᓂᒃ. ᐃᓚᖏᓪᓘᓐᓃᑦ ᑐᓴᒐᒃᓴᐃᑦ ᓄᑖᓂ ᐅᖃᐅᓯᖃᕈᑎᐅᓚᐅᕐᑐᑦ.

ᑭᓯᐊᓂᓕ ᐃᓱᐊᓂ, ᐃᓄᐃᑦ ᓄᓇᕗᒥᑦ ᐃᒪᐃᓕᑐᐃᓐᓇᓚᐅᕐᑐᑦ “ᐅᓐᓃ.” ᑭᓯᐊᓂᓕ ᐃᓱᐊᓂᑦ, ᓵᓐᓂᕐᓴᐅᓚᐅᕐᑐᑦ ᐅᑯᓄᖓ ᒐᕙᒪᓕᕆᔨᓄᑦ, ᑕᐃᒪᙵᓪᓕ 1961-ᒥ ᐱᖏᐊᖅᖢᓂ, ᑲᓇᑕᒥᐅᑕ ᑖᒃᑯᓄᖓ ᓵᓐᓂᕐᓴᐅᖃᑦᑕᕐᓯᒪᖕᒪᑕ ᐊᓯᙳᖅᑎᑦᑎᔪᒪᓪᓗᑎᒃ: ᓂᐅ ᑎᒧᑯᕌᑎᒃ ᐹᑎᓄᑦ.

ᐅᓇ ᐃᓐᓇᐅᓗᐊᙱᑦᑐᖅ ᒪᒥᓛᖅ ᖃᖅᑲᐅᑉ ᓵᓚᒃᓴᕐᓂᖓ ᓴᖅᑭᑎᑦᑎᒍᑎᐅᕗᖅ ᐊᖏᙱᓐᓂᕐᒥᓐ ᑐᕉᑑᑉ ᖃᓄᐃᓕᐅᕈᑎᒋᓇᓱᒃᑕᖓᓂᒃ ᐅᑭᐅᕐᑕᖅᑐᕐᒥᑦ ᐊᒻᒪ ᑲᓇᑕᐅᑉ ᐅᐊᖕᓇᖅᐸᓯᐊᓂᒃ, ᑕᒪᓐᓇᓕ ᐃᓚᖃᖅᖢᓂ ᐊᖏᕐᓯᒪᙱᓐᓂᕐᒥᑦ ᐅᖃᐅᓯᐅᑲᑕᐃᓐᓇᕐᓯᒪᔪᓂᑦ ᐃᓄᐃ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖓᑦ.

ᑕᐃᒪᙵᓪᓕ 2015-ᒥ, ᑐᕉᑑ ᐱᓕᕆᖃᑎᖃᓕᕐᓯᒪᕗᖅ ᐊᐅᓚᑦᑎᔨᐅᕙᒃᑐᓂᒃ ᑲᑐᔾᔨᖃᑎᒌᓂᒃ ᒪᑯᑎᑐᓇᖅ ᐃᓄᐃᑦ ᑕᐱᕇᑦ ᑲᓇᑕᒥ, ᓄᓇᕗᑦ ᑐᙵᕕᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᐊᓯᖏᓐᓂ.

ᑭᓯᐊᓂᓕ ᑕᒪᑐᒪᓂ ᐱᓇᓱᐊᕈᓯᕐᒥ ᓂᕈᐊᕐᓇᐅᓚᐅᕐᑐᒥ ᓴᖅᑭᑎᑦᑎᒍᑎᐅᕗᖅ ᓄᓇᕗᒻᒥᐅᑕᓄ ᐅᓇ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖓ ᐊᑑᑎᖃᓗᐊᕆᔭᐅᙱᓐᓂᖓᓂᒃ.

ᑕᒪᓐᓇᓗ ᑲᒪᓇᓗᐊᕋᓂ, ᓲᖃᐃᒻᒪ ᐃᓱᐊᓂ ᓄᓇᕗᒻᒥᐅᑕ ᐊᐱᖅᑯᑎᓪᓗᐊᑕᖏᓐᓄᑦ ᓕᐳᕈᒃᑯ ᑭᐅᒻᒪᕆᒍᓐᓇᓚᐅᙱᒻᒪᑕ.

ᖃᐅᔨᒪᔭᐅᑦᑎᐊᕐᒪᓐ ᐅᓄᕐᓂᕐᓴᓄᑦ ᐃᓄᖕᓄ ᓄᓇᕗᒥᑦ ᒪᑯᐊ ᐃᓱᒫᓘᑎᐅᓛᖑᕙᖕᓂᖏᓐᓂᒃ ᑮᓇᐅᔭᓕᐅᕐᓂ ᐊᒻᒪ ᐃᓅᖃᑎᒌᖕᓂᕐᒨᖓᔪᑦ: ᐃᒡᓗᑭᒃᓴᕐᓂᐅᙱᓐᓇᐅᔭᖅᑐᖅ, ᓂᕿᑖᕈᑎᖃᙱᓗᐊᕐᓂᖅ, ᓂᐅᕕᕐᕕᖕᒥᑦ ᓂᖀᑦ ᐊᑭᑐᓗᐊᕐᓂᖏᑦ ᐊᒻᒪ ᖃᖓᑦᑕᐅᑎᑦ, ᐅᓇᓗ ᐱᑕᖃᐃᓐᓇᓗᐊᖅᑐᖅ ᐳᕙᒡᓗᖕᓇᖅ ᐊᒻᒪ ᐃᒻᒥᓃᖃᑦᑕᕐᓂᖅ ᑖᓐᓇᓗ ᖃᐅᑕᒫᐸᓗᒃ ᐊᑐᖅᑕᐅᔭᐃᓐᓇᖅᖢᓂ.

ᑭᓯᐊᓂᓕ ᑭᖑᓕᖅᐹᒥ ᓄᓇᕗᒻᒧᐊᖅᑎᓪᓗᒍ ᐅᒃᑑᐱᕆ 8-ᒥ, ᑐᕉᑑ ᑐᓴᕈᒥᓇᖅᑐᖃᓗᐊᓚᐅᙱᑦᑐᖅ ᑕᒪᒃᑯᓄᖓ ᐃᓱᒫᓘᑎᐅᕙᒃᑐᓄᑦ.

ᐅᖃᐅᓯᖃᓚᐅᕐᑐᖅ ᕿᑭᖅᑖᓘᑉ ᓂᒋᐊᓂᒃ ᐅᖃᐅᓯᖃᖅᖢᓂ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐊᒻᒪ ᐊᓯᐅᑎᑦᑐᐃᓕᓂᕐᒥᓐ. ᑕᒪᒃᑯᐊᓕ ᑲᓇᑕᒥᐅᑕᓕᒫᓄᑦ ᐃᓱᒫᓘᑎᐅᔪᑦ, ᑭᓯᐊᓂᓕ ᓂᕈᐊᕐᓇᐅᔪᒪ ᑕᒪᑐᒪᓂ, ᓄᓇᕗᒻᒥᐅᓪᓕ ᑐᓴᕈᒪᔪᑦ ᐃᓱᒫᓘᑎᒋᔭᖏᓐᓂᒃ ᐃᒡᓗᓕᕆᓂᕐᒥᓐ ᐊᒻᒪ ᐆᒪᓇᓱᖕᓂᕐᒧᑦ ᐊᑭᑐᓗᐊᕐᓂᐅᔪᒨᖓᔪᓂᒃ.

ᐃᒪᐃᓕᐅᖔᓚᐅᕐᑐᕐᓕ ᐅᓇ ᓯᐅᕕᐊ ᒍᕆᓄᓪ ᑰᖓᑕ ᓄᓇᖓ ᐊᔾᔨᓕᐅᕐᕕᐅᔪᒥᒋᓪᓗᓂᐅᒃ, ᓄᓇᕗᒥᑦ ᓂᕈᐊᖅᑎᓅᙱᑦᑐᖅ, ᑭᓯᐊᓂᓕ ᓂᒋᕐᒥ ᑲᓇᑕᒥᐅᑕᓄᑦ.

ᑕᐃᒪᐃᓕᐅᕐᖢᓂ, ᑭᐅᓚᐅᙱᑦᑐᖅ ᓄᓇᕗᒻᒥᐅᓄᑦ ᐊᒃᓱᕉᑎᒋᔭᐅᒻᒪᕆᒃᑐᓂᒃ ᐊᒻᒪᓗ ᓄᓇᕗᒥᑦ ᓕᐳᕈᑯᓐᓄᑦ ᓂᕈᐊᒐᒃᓴᒥᑦ ᒦᒐᓐ ᐱᔪ-ᓚᐃᐅᒥ, ᐃᑲᔪᓚᐅᙱᒻᒪᕆᒃᖢᓂ ᑖᓐᓇᓕ ᐃᑲᔪᖅᑕᐅᓂᕐᓴᐅᓪᓗᐊᓚᐅᕋᓗᐊᖅᑐᖅ ᐊᖓᔪᖅᑳᕆᔭᐅᔪᒧᑦ ᑖᒃᑯᓄᖓ ᓕᐳᕈᑯᓐᓄᑦ.

ᒪᑯᓄᖓᓕ ᓂᖅᑮᑦ ᐊᑭᖏᓐᓄᑦ ᐊᒻᒪ ᓂᕆᑦᑎᐊᖃᑦᑕᙱᓗᐊᕐᓂᕐᒧᑦ, ᓕᐳᕈᑯᑦ ᖃᓄᐃᓕᐅᕈᑎᖃᓚᐅᕐᑐᑦ, ᐋᖅᑭᒃᓯᓪᓗᑎᒃ ᖁᕝᕙᓯᖕᓂᕐᓴᒥᑦ ᐃᑲᔫᑎᒃᓴᓂᒃ ᓂᕿᑦᑎᐊᕙᓕᕆᔨᒃᑯ ᐅᑭᐅᕐᑕᖅᑐᕐᒥ ᑲᓇᑕᒥ ᐱᓕᕆᐊᒧᑦ, ᐊᒻᒪᓗ ᑮᓇᐅᔭᓂ ᑐᓂᓯᒃᑲᓐᓂᖅᖢᓂ, $12.5 ᒥᓕᐊᓐᑖᓚᓂ ᐊᕐᕌᒍᒧᑦ ᒪᑯᓄᖓ ᓄᓇᖃᖅᑳᖅᑐᓂᑦ ᐊᖑᓇᓱᒃᐸᒃᑐᓄᑦ ᓄᓇᕗᒥᑦ ᐊᒻᒪ ᐊᓯᖏᓐᓃᑦᑐᓂᒃ ᐅᐊᖕᓇᖅᐸᓯᖕᒥᓐ.

ᑭᓯᐊᓂᓕ ᐊᖑᓇᓱᖕᓂᕐᒧᑦ ᐃᑲᔫᑎᒃᓴᑦ ᓴᖅᑭᑦᑕᕆᐊᓖᑦ ᐊᒻᒪᓗ ᑭᓇᑐᐃᓐᓇᖅ ᐅᖃᕈᓐᓇᙱᖢᑎᒃ ᖃᓄᐃᒻᒪᓐ ᑕᐃᒪᐃᑦᑕᕆᐊᒃᓴᖓᓂ.

ᐋᒐᓯ 1-ᖑᓚᐅᕐᑐᒥᑦᑕᐅᖅ, ᑐᕌᑑ ᐱᓕᕆᐊᖃᕐᓂᖃᒻᒪᕆᓚᐅᕐᑐᖅ ᐃᖃᓗᖕᓂᑦ ᐊᒻᒪ ᐃᒃᐱᐊᕐᔪᒃᒥᑦ, ᐊᑎᓕᐅᖅᑎᓪᓗᒍ ᐊᖏᖃᑎᒌᒍᑎᒥ ᐱᒋᐊᖅᑎᑦᑎᒍᑎᒥᓐ ᑕᓪᓗᕈᑎᐅᑉ ᐃᒪᖓᓂ ᐃᒪᕐᒥᐅᑕᓂᒃ ᓴᐳᔾᔨᓯᒪᕝᕕᒃᓴᒥᑦ ᐊᒻᒪᓗ ᐱᓂᐊᕐᓂᕋᒻᒪᕆᒃᖢᓂ ᐱᒋᐊᖅᑎᑦᑎᓂᐊᕐᓂᕐᒥᑦ ᓄᑖᒥᑦ ᓴᐳᔾᔭᐅᓯᒪᔪᒃᓴᒥᑦ ᑕᐃᔭᐅᔪᒥᓐ ᑐᕙᐃᔪᐃᑦᑐᖅ. ᑕᐃᒪᐃᓕᐅᕐᓂᖓᓄᑦ ᐊᒥᓱᒻᒪᕆᐊᓗᖕᓂ ᑮᓇᐅᔭᑲᓪᓚᖕᓂ ᓄᓇᓕᖕᓄᑦ ᑐᓂᓯᓪᓗᓂ ᕿᑭᖅᑖᓘᑉ ᐅᐊᖕᓇᖓᓃᑦᑐᓂᒃ, ᒪᑯᓄᖓ ᒥᑭᑦᑐᓄᑦ ᑐᓚᒃᑕᕐᕕᒃᓴᓄᑦ ᐊᒻᒪᓗ ᓴᐳᔾᔨᓯᒪᓂᕐᒧᑦ ᐃᖅᑲᓇᐃᔮᒃᓴᓄᑦ. ᐅᖃᐅᓯᖃᒻᒪᕆᓚᐅᕐᒥᔪᖅ ᓴᐳᔾᔨᓯᒪᓂᕐᒥᑦ ᓲᕐᓗ ᑲᑎᖃᑎᖃᒃᑲᓐᓂᕋᓱᒃᖢᓂ ᓄᓇᖃᖅᑳᖅᑐᓂᒃ.

ᓈᒻᒪᙱᓐᓂᐅᔪᕐᓕ ᑕᐃᒪᓐᓇ ᐱᓕᕆᐊᖃᕐᓂᖅ ᐃᒪᓐᓇ: ᖁᐃᕐᓱᑲᑕᐃᓐᓇᖅᖢᓂ ᐳᕙᒡᓗᖕᓂᕐᒧᑦ ᐃᓄᒋᐊᓗᐊᖅᑐᒥᑦ ᐃᒡᓗᒥ, ᐅᓇ “ᑲᑎᖃᑎᒌᖕᓂᖅ” ᑐᑭᖃᓗᐊᙱᑦᑐᕐᓕ.

ᑕᒪᓐᓇ ᐃᓱᒪᒋᓪᓗᒍ ᓱᓕ, ᐃᖅᑲᐅᒪᕕᓯ ᓕᐳᕈᑯᑦ ᒐᕙᒪᖓᑦ ᑐᓴᕈᑎᒻᒪᕆᐊᓗᒋᓚᐅᕐᓯᒪᔭᖓᑦ ᐳᕙᒡᓗᖕᓇᐅᑉ ᒥᒃᓵᓄ? ᑕᐃᒪᐃᓕᐅᓚᐅᕐᓯᒪᔪᑦ 2018 ᐱᒋᐊᓕᓵᕐᓂᑰᑎᓪᓗᒍ, ᐅᓇ ᔭᐃᓐ ᕕᐅᐹᑦ, ᑕᐃᔅᓱᒪᓂ ᑲᓇᑕᒥᑦ ᐋᓐᓂᐊᖃᖅᑕᐃᓕᓂᕐᒧᑦ ᒥᓂᔅᑕᐅᓚᐅᕐᓯᒪᔪᖅ, ᐅᖃᖅᑎᓪᓗᒍ ᑖᓐᓇ ᐳᕙᒡᓗᖕᓇᖅ ᐋᓐᓂᐊᕆᔭᐅᔪᖅ ᐱᑕᖃᕈᓐᓃᖅᑎᑕᐅᓂᐊᕐᓂᕋᖅᑎᓪᓗᓂᐅᒃ ᐃᓄᐃᑦ ᓄᓇᖓᓂᑦ 2030 ᑎᑭᓚᐅᕐᑎᓐᓇᒍ.

ᑭᓯᐊᓂᓕ ᕕᐅᐹᑦ. ᒐᕙᒪᑐᖃᒃᑯᑦ ᒥᓂᔅᑕᖓ ᑕᒪᑐᒥᖓ ᑲᒪᒋᔭᖃᕐᓂᐊᕐᓂᕋᓚᐅᕐᑐᖅ ᐱᑕᖃᕈᓐᓃᕐᒪᑦ. ᑐᕉᑑᑉ ᖃᓄᐃᓕᐅᕈᓯᖓᓄᑦ ᔪᑎ ᕗᐃᐊᓴᓐ ᐅᕇᐴᑦᒧᑦ ᐊᒻᒪᓗ ᓈᒻᒪᙱᓕᐅᕈᑎᒃᑯᑦ ᑲᒪᒋᔭᖃᕐᓂᖓᓂᒃ ᐆᒥᖓ SNC-Lavalin-ᑯᓐᓂ, ᕕᐅᐹᑦ ᓄᖅᑲᓕᓚᐅᕐᓯᒪᔪᖅ ᑲᑎᒪᕕᒡᔪᐊᖑᓂᕐᒥᓐ.

ᑕᐃᒪᙵᓪᓕ, ᓕᐳᕈᒃᑯ ᑐᓴᕐᓇᓚᐅᕐᓯᒪᔪᓐᓃᖅᑐᑦ ᐳᕙᒡᓗᖕᓇᒥ ᐱᑕᖃᕈᓃᖅᑎᑦᑎᓇᓱᖕᓂᕐᒥᓐ. ᐆᑐᓇᖅ ᐊᖑᓇᓱᒃᑎᓄᑦ ᐃᑲᔫᑎᒃᓴᐅᓂᐊᓚᐅᖅᑐᑎᑐᑦ, ᐊᔪᕐᓯᐅᖅᑲᑐᐃᓐᓇᖂᓕᕐᒪᑦ ᐃᓄᐃᑦ-ᒐᕙᒪᑐᖃᒃᑯᓪᓗ ᐱᓕᕆᖃᑎᒌᖕᓂᖏᓐᓂ. ᑕᐃᒪᓕ ᐃᓱᒪᓇᕐᓯᕗᖅ ᐅᖃᓪᓚᐅᓯᕆᒻᒪᕆᓚᐅᕐᓯᒪᔭᖏᑦ ᐳᕙᒡᓗᖕᓇᖅ ᓄᖅᑲᖅᑎᑕᐅᓂᐊᕐᓂᖓ ᖁᐊᕐᓵᕐᓇᖅᑐᒦᑐᐃᓐᓇᓕᕐᐳᖅ.

ᐊᒻᒪᓗ ᑭᒃᑯᑐᐃᓐᓇᐃᑦ ᖃᐅᔨᒪᓪᓗᑎᒃ ᐳᕙᒡᓗᖕᓇᖅ ᐊᔪᕐᓴᓗᐊᕐᓂᕐᒨᖓᓂᖓᓂᒃ, ᓂᕆᑦᑎᐊᖃᑦᑕᙱᓗᐊᕐᓂᕐᒧᑦ ᐊᒻᒪᓗ ᐃᒡᓗᖃᑦᑎᐊᙱᓗᐊᕐᓂᕐᒧᑦ. ᑭᓯᐊᓂᓕ ᐃᒡᓗᓕᕆᓂᒃᑯᑦ, ᑐᕉᑑ ᒪᓂᓴᓚᐅᕐᒥᔪᖅ ᐅᖅᑰᓯᓯᒪᕙᒌᖅᑐᒥᓐ ᐊᒻᒪ ᐅᖃᐅᓯᒃᑲᓐᓂᑐᐃᓐᓇᖅᑐᒥᑦ ᐊᐅᔭᐅᓚᐅᕐᑐᖅ. ᐊᒻᒪᓗ ᒐᕙᒪᖏᑦᑕ ᑲᓇᑕᒥ ᐃᓄᖕᓄᑦ ᐃᒡᓗᓕᕆᓂᕐᒥ ᐱᓕᕆᐊᖓᑦ, “ᐋᖅᑭᒃᑕᐅᖃᑎᒌᒃᓯᒪᔪᖅ” ᐃᓄᐃᑦ ᑕᐱᕇᑯᓐᓂᑦ, ᓂᕆᐅᓇᓗᐊᖅᑐᒥᓐ ᖃᓄᐃᓕᐅᕐᕈᑎᐅᓯᒪᙱᓚᖅ.

ᖁᕕᐊᓲᑎᔪᒪᕙᕗᑦᑕᐅᖅ ᒪᒥᓛᖅ ᖃᖅᑲᖅ ᓵᓚᒃᓴᓚᐅᕐᓂᖓᓄᑦ. ᐃᓚᒋᔭᐅᓂᐊᓕᕐᓗᓂ ᑎᓴᒪᒋᔭᐅᔪᓂᑦ ᐊᕕᒃᓯᒪᓂᒃᑯᑦ ᒪᓕᒐᓕᕆᔨᓂᒃ ᒪᓕᒐᓕᕆᕕᒡᔪᐊᒥᓐ, ᐃᑲᔪᖅᑕᐅᖃᑦᑕᕆᐊᖃᕐᓂᐊᖅᑐᖅ ᑐᓴᖅᑕᐅᔪᓐᓇᖁᓪᓗᒍ. ᓄᓇᕗᒻᒥᐅᑦ ᐱᕕᖃᖅᑎᑦᑎᑐᐃᓐᓇᓚᐅᕐᓕ ᐊᒻᒪ ᐃᑲᔪᖅᑐᖅᑕᐅᓯᒪᓗᓂ.

ᖃᖅᑲᖅ ᒪᕐᕉᖕᓂ ᓵᓚᖃᓚᐅᕐᒪᑦ ᐱᔪᓐᓇᒻᒪᕆᒃᑑᖕᓂ, ᓕᐅᓇ ᐊᒡᓘᒃᑲᖅ ᐊᒻᒪ ᒦᒐᓐ ᐱᔪ-ᓚᐃᐅᓪ. ᑕᐃᒪᑐᖅ ᑖᒃᑯᐊᒃ ᓵᓚᐅᓂᕕᓂᖕᒥᓂᒃ ᐃᓱᒪᙱᓪᓗᑎᒃ ᑲᔪᓰᓐᓇᕐᓖᒃ ᓄᓇᕗᒥᐅᓂᒃ ᐱᔨᑦᑎᕋᐃᓂᕐᒥᑦ ᐊᒻᒪ ᐅᑭᐅᕐᑕᖅᑐᕐᒥ.