ᓄᓇᕗᑦ ᓯᕗᓕᐅᕐᑎᖓ ᐅᖃᐅᓯᖃᖅᑐᖅ ᑲᐱᔭᐅᓯᒪᓂᕐᒧᑦ ᓇᓗᓇᐃᒃᑯᑎᒃᓴᓂᒃ

ᔫ ᓴᕕᑲᑖᖅ ᐅᖃᓚᐅᕐᑐᖅ ᐃᓱᒪᓕᐅᕈᒪᙱᓐᓂᕋᖅᖢᓂ ᑭᓯᐊᓂ ᒐᕙᒪᑐᖃᒃᑯᑦ ᐊᒻᒪᓗ ᓄᓇᕗᒥᑦ ᓂᕈᐊᕌᓂᒃᓯᒪᓕᖅᐸᑕ

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see Nunavut premier punts on vaccine passports

ᓄᓇᕗᒥᑦ ᒐᕙᒪᒃᑯᑦ ᐅᑕᖅᑭᓂᐊᖅᑐᑦ ᑭᓯᐊᓂ ᒐᕙᒪᑐᖃᒃᑯᑦ ᐊᒻᒪ ᓄᓇᕗᒧᑦ ᓂᕈᐊᕐᓇᖅ ᐊᓂᒍᖅᐸᑦ ᐃᓱᒪᓕᐅᕆᓚᐅᙱᓐᓂᖏᓐᓂᒃ ᓄᓇᕗᑦ ᓇᓗᓇᐃᒃᑯᑎᑖᕆᐊᖃᕐᒪᖔᑦ ᑲᐱᔭᐅᓯᒪᓂᕐᒧᑦ, ᐅᖃᖅᑐᖅ ᓯᕗᓕᐅᕐᑎ ᔫ ᓴᕕᑲᑖᖅ.

ᒐᕙᒪᑐᖃᒃᑯᑦ ᓂᕈᐊᖅᑎᑦᑎᓛᖅᑎᓪᓗᒋᑦ ᓯᑎᐱᕆ 20-ᒥᑦ ᐊᒻᒪᓗ ᓄᓇᕗᒥᒃ ᒐᕙᒪᒃᑯᓐᓂ ᐅᒃᑑᐱᕆ 25-ᒥ, ᐅᖃᓚᐅᕐᑐᖅ ᒫᓐᓇ ᐃᓱᒪᓕᐅᕆᔪᓐᓇᒋᓐᓂᕋᓚᐅᑲᒃᖢᓂ.

“ᑕᒪᑐᒧᖓ ᐃᓱᒪᓕᐅᕆᓂ ᐅᑯᓄᖓ ᓄᑖᓄᑦ ᒐᕙᒪᐅᓂᐊᖅᑐᓄᑦ ᐱᓕᕆᐊᖑᒍᑎ ᐱᐅᓂᕐᓴᖅ, ᑕᐃᒪᓐᓇ ᑲᒪᒋᔭᖃᕋᔭᕐᒪᑕ ᐊᑐᓕᖅᑎᑦᑎᓂᕐᒥᒃ ᐊᒻᒪ ᖃᐅᔨᓴᖅᐸᓪᓕᐊᓂᕐᒥᒃ,” ᓴᕕᑲᑖᑦᑦ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ.

ᒫᓐᓇᐅᔪᕐᓕ, ᓄᓇᕗᒻᒥᐅ ᑲᐱᔭᐅᒍᑎᒃ ᓇᓗᓇᐃᒃᑯᑎᖃᕐᑐᑦ ᑎᑎᕋᕐᕕᒃᒥ ᓯᕗᓪᓕᕐᒥ ᑲᐱᔭᐅᑎᓪᓗᒋ. ᑖᓐᓇ ᐊᓯᐅᒃᐸᑦ, ᐱᔪᒪᔪᓐᓇᖅᑐᑦ ᑕᕐᕋᓕᐊᕆᓯᒪᔪᒥᒃ ᓇᓗᓇᐃᒃᑯᑎᒥᒃ ᑲᐱᔭᐅᓯᒪᓂᖏᓐᓂᒃ ᐋᓐᓂᐊᕕᖏᓐᓂᒃ. ᑕᒪᕐᒥᒃ ᑲᐱᔭᐅᓂᑯᕕᓃᑦ ᓇᓗᓇᐃᖅᑕᐅᓯᒪᔪᐃᓐᓇᐃᑦ ᖃᕋᓴᐅᔭᒃᑯᑦ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖃᖅᑎᒋᔭᐅᔪᖅ ᑏᓇᕈᐃ ᓴᒧᕕᐊᓪ ᐅᖃᓚᐅᕐᑐᖅ ᓄᓇᕗᑦ ᕿᒥᕐᕈᐊᕐᓂᕋᖅᖢᓂᐅᒃ ᑖᔅᓱᒥᖓ ᑎᑎᕋᖅᕕᒃᒥ ᐊᖏᒡᓕᒋᐊᖅᑎᑦᑎᔪᒪᓂᕋᖅᖢᑎ ᑲᓇᑕᒧᑦ ᐊᔾᔨᒋᔭᐅᓗᓂ — ᓲᕐᓗ ᐸᐃᐹᓂ ᐊᑐᕐᓗᑎᒃ ᐊᒻᒪ ᖃᕋᓴᐅᔭᒃᑯᑦ ᓇᓗᓇᐃᔭᖅᓯᒪᔪᓂᒃ ᐊᒻᒪ ᑲᐱᔭᐅᓂᕐᒧᑦ ᓇᓗᓇᐃᔭᖅᑕᐅᓯᒪᔪᓂᒃ — ᑖᓐᓇᓗ “ᐊᔾᔨᖃᑐᐃᓐᓇᕐᓂᐊᕐᓗᓂ ᑲᓇᑕᒥ ᐊᑐᑎᖅᑕᐅᑲᑕᒃᑐᓂᒃ’ ᑎᑎᖃᓂᒃ.”

ᑖᓐᓇᓕ ᐋᖅᑭᒋᐊᖅᑕᐅᒃᑲᓐᓂᕐᓂᐊᖅᑐᒃᓴᐅᓪᓗᓂ ᐱᓕᕆᔾᔪᑎᓕᕆᓂᒃᑯᑦ ᑕᐃᔭᐃᓪᓗᓂ SMART Health Cards (ᐋᓐᓂᐊᕐᕕᓕᐊᕈᓐᓇᐅᑎᓂᒃ), ᐊᑐᓕᖅᑎᑕᐅᒃᐸᒃ, ᓴᒧᕕᐊᓪ ᐅᖃᖅᑐᖅ.

ᔮᓐ ᒪᐃᓐ, ᒪᓕᒐᓕᐅᖅᑎ ᐊᕐᕕᐊᑦ ᐅᐊᖕᓇᖓᓄᑦ-ᑎᑭᕋᕐᔪᐊᖅᒧᑦ, ᐅᖃᓚᐅᕐᑐᖅ ᑕᑯᔪᒪᓂᕋᖅᖢᓂ ᑲᐱᔭᐅᓯᒪᓂᕐᒧᑦ ᓇᓗᓇᐃᒃᑯᑎᒥ ᓄᓇᕗᒥᑦ ᓲᖃᐃᒻᒪ ᐃᑲᔪᕈᑎᐅᓇᔭᕐᒪᑦ ᓄᓇᕗᒻᒥᐅᑕᓂᒃ ᐊᐅᓪᓚᖃᑦᑕᖅᑐᓄᑦ ᐊᓯᖏᓐᓄᑦ ᐳᕌᕕᓐᓯᓄᑦ ᐊᒻᒪ ᑎᐅᕆᑑᕆᓄᑦ.

ᐊᕐᕕᐊᑦ ᓄᕙᒡᔪᐊᕐᓇᖅ-19-ᒧᑦ ᐊᒃᑐᖅᑕᐅᓯᒪᓛᖑᔪᖅ ᓄᓇᕗᒥᑦ. ᓄᕕᐱᕆ 2020-ᓗ ᐄᐳᕈᓪ 2021-ᓗ ᐊᑯᓐᓂᖓᓂᒃ, 338 ᐃᓄᐃᑦ ᐋᓐᓂᐊᖅᑖᓚᐅᕐᓯᒪᖕᒪᑕ ᐊᒻᒪ ᐊᑕᐅᓯᕐᒥᓐ ᑐᖁᔪᖃᖅᖢᓂ.

ᑎᑭᕋᕐᔪᐊᖅ, ᐃᓄᓕᒃ 435-ᓂᒃ (2016-ᒥ ᓇᐃᓴᐃᔨᒃᑯᑎᒍᑦ), ᐋᓐᓂᐊᖅᑖᖅᑐᖃᑲᑕᓚᐅᕐᒥᔪᖅ ᓄᕕᐱᕆ 2020-ᓗ ᐊᒻᒪ ᕕᕝᕗᐊᕆ 2021-ᓗ ᐊᑯᓐᓂᖓᓂᒃ 23-ᓂᒃ ᓇᓗᓇᐃᖅᑕᐅᓪᓚᕆᒃᓯᒪᔪᓂᒃ.

ᒪᐃᓐ ᐅᖃᓚᐅᕐᑐᖅ ᑭᒡᒐᖅᑐᖅᑕᖏᑦᑕ ᐃᓚᖏᓐᓂᒃ ᐊᑯᓂᕈᓗᒃ ᐅᑕᖅᑭᖃᑦᑕᕐᓂᖏᓐᓂᒃ ᐃᓄᑑᓐᓇᖅᑐᒦᓐᓂᕐᒥᒃ ᓄᓇᕗᒧᑦ ᐅᑎᕈᓐᓇᓕᕐᓂᕐᒧᑦ, ᐊᒻᒪᓗ ᑕᒪᓐᓇ ᐊᔪᕐᓇᙱᓐᓂᕐᓴᐅᑎᑕᐅᓕᕐᓗᓂ.

“ᓈᒻᒪᙱᓗᐊᕐᒪᓐ ᐃᓚᖏᓐᓄᑦ ᐃᓄᖕᓄᑦ ᑲᐱᔭᐅᓯᒪᔪᓄᑦ ᐊᒻᒪ ᐊᑐᕆᐊᓕᖕᓂ ᐊᑐᖅᓯᒪᔪᓄᑦ … ᐅᑕᕿᓪᓗᑎᒃ ᑎᑎᖃᓂᒃ,” ᐅᖃᖅᑐᖅ.

ᒐᕙᒪᑐᖃᒃᑯᑦ ᐅᖃᓚᐅᕐᑐᑦ ᑲᐱᔭᐅᓯᒪᓂᕐᒧᑦ ᓇᓗᓇᐃᒃᑯᑎᑦ ᒪᓕᑐᐃᓐᓇᕐᓂᐊᖅᑐᑦ ᐊᐅᓪᓚᖅᐸᒃᑐᑦ ᐊᑐᖃᑦᑕᖅᑕᖏᓐᓂᒃ. ᒐᕙᒪᒃᑯᑦᑕᐅᖅ ᐊᐅᓪᓚᖅᐸᒃᑐᓂᒃ ᑲᐱᔭᐅᓯᒪᓂᕐᒧᑦ ᓇᓗᓇᐃᒃᑯᑎᖃᖁᔨᖕᒥᔪᑦ ᖃᖓᑕᓲᒃᑰᕈᓐᓇᖁᓪᓗᒋᑦ, ᓄᓇᓯᐅᑎᑯᑖᒃᑯᑦ ᐊᒻᒪᓗ ᐅᒥᐊᕐᔪᐊᕐᑎᒍᑦ.

ᓴᕕᑲᑖᖅ ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ “ᐅᖃᓪᓚᖃᑎᖃᕆᐊᖃᕐᓂᖏᓐᓂᒃ ᓇᖕᒥᓂᖅ ᐱᓕᕆᐊᖃᖅᑐᓂᒃ ᐊᒻᒪ ᐃᖅᑲᓇᐃᔭᖅᑎᖏᓐᓂᒃ” ᐃᓱᒪᓕᐅᕆᓚᐅᙱᓐᓂᖏᓐᓂᒃ ᑲᐱᔭᐅᓯᒪᓂᕐᒧᑦ ᓇᓗᓇᐃᒃᑯᑎᓕᕆᓂᕐᒥᒃ ᐱᓕᕆᐊᓅᖓᔪᓄᑦ.

ᒪᐃᓐ ᐅᖃᓚᐅᕐᑐᖅ ᑕᒪᓐᓇ ᐅᖃᐅᓯᐅᒃᑲᓐᓂᕆᐊᖃᕐᓂᖓᓂᒃ ᑲᐱᔭᐅᓯᒪᓂᕐᒧᑦ ᓇᓗᓇᐃᒃᑯᑎᖃᕐᓂᖅ, ᓲᕐᓗ ᐱᙳᐊᕐᓂᕐᒧᑦ ᕼᐋᑭᕆᐊᖅᑐᕆᐊᖃᕐᓂᕐᒧᑦ ᐅᕝᕙᓘᓐᓃᑦ ᑭᐱᔭᐅᔭᖅᑐᕆᐊᖃᕐᓂᕐᒧᑦ.

ᐅᓄᕈᓘᔭᕐᑐᓪᓕ ᓂᕈᐊᕐᕕᐊᕙᖕᓂᒃᑯᑦ ᐊᕕᒃᑐᖅᓯᒪᔪᓃᑦᑐᑦ ᑲᓇᑕᒥ ᑲᐱᔭᐅᓯᒪᓂᒃᒧᑦ ᓇᓗᓇᐃᒃᑯᑎᓕᕆᓕᕐᑐᑦ.

ᑯᐸᐃᒃᒥᓪᓕ, ᐃᓚᖃᖅᖢᓂ ᓄᓇᕕᒃᒥ, ᐱᒋᐊᖅᖢᑎ ᓯᑎᐱᕆ 1-ᒥᑦ, ᐳᕆᑎᔅ ᑲᓚᒻᐱᐊ, ᒫᓂᑑᐸ ᐊᒻᒪᓗ ᖃᖓᑦᑎᐊᓵᖅ ᐋᓐᓂᐅᕆᐅᒥᐅᑕ ᐊᒻᒪ ᑲᐱᔭᐅᓯᒪᓂᕐᒧᑦ ᓇᓗᓇᐃᒃᑯᑎᓕᕆᓕᓚᐅᕐᑐᑦ.

Share This Story

(0) Comments

Join the Conversation

Your email address will not be published. Required fields are marked *

*