ᓄᓇᕗᒥᑦ ᐃᓱᒪᒃᓴᖅᓯᐅᕐᑐᑦ ᖃᓄᐃᓕᐅᕈᑎᒃᓴᓂᒃ ᐋᓐᓂᐊᓯᐅᖅᑎᖃᕈᑎᒃᓴᓂᒃ ᐊᒥᒐᖅᓯᑲᑕᒃᑎᓪᓗᒋᑦ ᐊᒻᒪ ᑕᖃᓯᒪᑲᑕᓗᐊᖅᑎᓪᓗᒋᑦ

ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᐅᖃᓚᐅᕐᑐᖅ ᕿᓂᕐᓂᕋᖅᖢᓂ ᐊᔾᔨᒌᙱᑦᑑᑎᓂᒃ ᖃᓄᐃᓕᐅᕈᑎᒃᓴᓂ ᐋᓐᓂᐊᓯᐅᖅᑎᓂᒃ ᐃᖅᑲᓇᐃᔭᖅᑎᑦᑎᓇᓱᖕᓂᕐᒧᑦ ᓄᓇᕗᒥ, ᐃᖅᑲᓇᐃᔭᖅᑐᑦ ᑕᖃᖓᑲᑕᓗᐊᖅᑎᓪᓗᒋᑦ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒧ ᓈᒻᒪᙱᓕᐅᕈᑎᖃᓗᐊᖅᑎᓪᓗᒋᓪᓗ ᑲᓇᑕᓕᒫᒥᑦ.

“ᐃᖅᑲᓇᐃᔭᕈᒪᔾᔪᑎᑕᖃᕆᐊᕋᑦᑕ ᑕᒪᒃᑯᐊ ᑕᒪᐅᙵᕈᒪᓂᖅᓴᐅᖃᑦᑕᕐᓂᐊᕐᒪᑕ,” ᖁᐊᓴ ᑯᓱᒐᖅ ᐅᖃᓚᐅᕐᑐᖅ.

“ᐊᑯᓂᐊᓗᒃ ᐃᓚᖏᓐᓂᒃ ᕿᒪᐃᓯᒪᖁᖃᑦᑕᖅᑕᕗᑦ ᐱᓇᓱᐊᕈᓯᑲᓪᓚᖕᓂᒃ ᑕᕿᒐᓴᒻᒪᕆᖕᓂᓪᓘᓐᓃᑦ, ᑕᐃᒪᓐᓇᓕ ᑕᒪᓐᓇ ᐊᔪᕐᓇᕈᑎᐅᖃᑦᑕᕐᒪᓐ.”

ᑯᓱᒐ ᐅᖃᓚᐅᕐᑐᖅ ᑖᒃᑯᓂᖓ ᐊᑭᓕᖅᑕᐅᔾᔪᑎᖏᓐᓂᒃ ᖁᕝᕙᕆᐊᖅᓯᓯᒪᒐᓗᐊᖅᖢᑎᒃ ᐊᓯᐊᒎᕈᑎᐅᔪᓐᓇᕋᔭᕐᒥᖕᒪᑦ ᕿᑲᕈᓐᓇᐅᑎᖃᖅᑎᑉᐸᒡᓗᒋᑦ ᐅᕝᕙᓘᓐᓃᑦ ᐋᓐᓂᐊᓯᐅᖅᑏᑦ ᐃᓚᖏᓐᓂᒃ ᑕᒪᐅᙵᖃᑎᖃᕈᓐᓇᖅᐸᒡᓗᑎ.

“ᐃᓱᒪᔭᕆᐊᖃᕋᑦᑕ ᓯᓚᑖᓅᖓᔪᒃᑯᑦ.”

ᐋᓐᓂᐊᓯᐅᖅᑏᑦ ᐃᖅᑲᓇᐃᔭᙱᓐᓂᖏᓐᓂᒃ ᐊᓯᖏᓐᓂᒃ ᖃᓄᐃᓕᐅᕈᑎᒃᓴᖃᖅᑎᓪᓗᒋᑦ, ᓲᕐᓗ, ᐃᓅᓯᕐᒥᓪᓗ ᐃᖅᑲᓇᐃᔮᒥᓪᓗ ᐋᖅᑭᒃᓯᒪᒍᑎᓂᒃ, ᐅᖃᖅᑐᖅ.

ᓄᑖᖅ ᐋᓐᓂᐊᕕᒃ ᑭᙵᓂᒃ ᐃᖃᐃᓕᓴᕐᕕᖃᖅᑐᖅ, ᑳᕕᑐᕐᕕᖃᖅᖢᓂ ᐊᒻᒪᓗ ᐅᕕᓂᖕᓂᐊᕐᕕᖃᖅᖢᓂ ᑯᕕᑐᐃᓐᓇᖅᑐᒥᒃ ᐃᖅᑲᓇᐃᔭᖅᑎᓄᑦ ᐊᑐᖅᑕᐅᒐᒃᓴᒥᒃ.

“ᐃᓱᒪᒐᓗᐊᖅᑐᖓ ᑲᔪᓯᔪᓐᓇᕐᓗᑕ ᓴᓇᕙᓪᓕᐊᓗᑕ ᐊᖏᓂᕐᓴᓂᒃ, ᐱᐅᓂᕐᓴᓂᒃ ᐋᓐᓂᐊᕕᒃᓴᓂᒃ ᑕᐃᒪᓐᓇᓗ ᐋᓐᓂᐊᖅᓯᐅᖅᑎᓄᑦ ᑕᒫᓃᑎᑦᑎᔪᓐᓇᕐᓂᕐᓴᐅᔪᓐᓇᕐᓗᑎᒃ ᐊᒻᒪᓗ ᐋᓐᓂᐊᓯᐅᖅᑎᑖᒃᑲᓐᓂᕈᓐᓇᓕᕐᓗᑕ ᐱᓕᕆᕝᕕᖏᑦ ᐱᐅᓂᕐᓴᐅᓕᕐᓂᖏᓐᓄᑦ,” ᑯᓱᒐᖅ ᐅᖃᖅᑐᖅ.

ᒥᑭᓐᓂᕐᓴᓂᒡᓕ ᓄᓇᓕᖕᓂ ᑕᒪᒃᑯᐊ ᐋᓐᓂᐊᓯᐅᖅᑎᑦ ᐊᑐᐃᓐᓇᐅᔭᕆᐊᖃᖃᑦᑕᕐᒪᑕ ᖃᖓᓕᒫᑦᑎᐊᖅ, ᑕᐃᒪᓐᓇᓗ ᑕᑲᓗᐊᕈᑎᐅᓕᖅᐸᒃᖢᓂ.

“ᖃᓪᓗᓈᓂᓪᓕ, ᐃᖅᑲᓇᐃᔭᙱᓚᐅᑲᒍᓐᓇᖃᑦᑕᕐᒪᑕ ᐊᒻᒪ ᓴᐃᓕᔭᖅᑐᕈᓐᓇᖅᖢᑎᒃ ᐅᕝᕙᓘᓐᓃᑦ ᐃᖅᑲᐃᓕᓴᕐᕕᖕᒧᐊᕈᓐᓇᖅᖢᑎᒃ ᐊᒻᒪ ᐃᓄᖕᓂ ᐅᖃᓪᓚᖃᑎᖃᕈᓐᓇᖅᖢᑎᒃ ᖃᐅᔨᒪᙱᒃᑲᓗᐊᖅᑐᓂᒃ ᑭᓇᐅᖕᒪᖔᑦ,” ᐅᖃᖅᑐᖅ. “ᑕᒫᓂᓕ ᑕᐃᒪᐃᓕᐅᕐᓇᙱᑦᑐᐊᓘᖕᒪᑦ.”

ᐅᓄᕐᑐᑦ ᐋᓐᓂᐊᓯᐅᕐᑎ ᓄᓇᕗᒦᑦᑐᑦ ᐋᓐᓂᐊᕕᖕᓂ ᐃᖅᑲᓇᐃᔭᙱᒻᒪᑕ “ᐃᒻᒥᖕᓄᑦ ᐱᔾᔪᑎᖃᖅᖢᑎᒃ,” ᐊᒻᒪᓗ ᐊᑐᐃᓐᓇᐅᙱᓐᓇᐅᔭᕆᐊᖃᕐᓂᖅ ᓄᓇᓕᖕᓂᒃ, ᐱᓗᐊᖅᑐᒥ ᐃᓚᖏᓐᓂᒃ ᑲᒪᒋᔭᖃᕆᐊᖃᖅᑎᓪᓗᒋᑦ ᐊᒻᒪ ᓄᓇᖃᑎᖏᓐᓂᒃ, ᑯᓱᒐᖅ ᐅᖃᖅᑐᖅ.

“ᐊᒃᓱᕈᕈᓘᔭᓕᕐᓇᕐᒪ ᐅᑎᖅᑎᓐᓇᓱᒃᖢᒋᑦ ᐋᓐᓂᐊᕕᒃᒧᑦ ᐊᔪᕈᓐᓃᖅᓴᖅᓯᒪᔭᖏᓐᓄᑦ ᐃᖅᑲᓇᐃᔮᒃᓴᓄᑦ.”

ᐊᐱᕆᔭᐅᒐᒥ ᓄᓇᕗᒦᑦᑐᑦ ᐋᓐᓂᐊᓯᐅᕐᑏ ᑕᒫᓃᑦᑐᑦ ᒪᓂᒪᕝᕕᐅᖃᑦᑕᕆᐊᒃᓴᖏᓐᓂᒃ ᐃᑲᔪᕈᑎᒃᓴᓂᒃ ᒪᑯᑎᑐᓇᖅ ᖃᓪᓗᓈᓂᙶᖅᑐᓄᑦ ᐋᓐᓂᐊᓯᐅᖅᑎᓄᑦ ᒪᓂᒪᔭᐅᕙᒃᑐᓂᒃ ᐊᑎᓕᐅᕌᖓᑕ, ᑯᓱᒐᖅ ᐅᖃᓚᐅᕐᑐᖅ “ᑕᐃᒪᓐᓇᑦᑕᐃᓐᓇᖅ ᒪᓂᒪᕝᕕᒋᓯᒪᔭᕗᑦ.”

ᐅᑯᐊ ᐸᐃᓱᐊ ᐋᓐᓂᐊᖅᑐᓕᕆᓂᕐᒥᒃ ᑲᒪᔨᐅᔪᑦ (Bayshore HealthCare), ᑲᒻᐸᓃᑦ ᐋᓐᓂᐊᓯᐅᖅᑎᓂᒃ ᐃᖅᑲᓇᐃᔭᓕᖅᑎᑦᑎᔨᐅᔪᑦ ᓄᓇᕗᒥ, ᐅᖃᕈᒪᓚᐅᙱᑦᑐᑦ ᖃᔅᓯᓂ ᐊᑭᓕᖅᓱᖅᑕᐅᕙᖕᒪᖔᑕ ᐋᓐᓂᐊᓯᐅᖅᑏ ᐅᕝᕙᓘᓐᓃᑦ ᐊᑎᓕᐅᕈᑎᒃ ᖃᓄᐃᑦᑐᓂᒃ ᐃᑲᔪᕈᑎᒃᓴᓂᒃ ᒪᓂᒻᒪᐃᕝᕕᐅᓯᒪᔭᕆᐊᒃᓴᖏᓐᓂᒃ.

ᐃᖅᑲᓇᐃᔮᒃᓴᑦ ᖃᓄᐃᓕᖓᓂᖏᑦ ᓇᓗᓇᐃᔭᖅᑕᐅᓯᒪᔪᑦ ᑲᒻᐸᓂᐅᑉ ᖃᕋᓴᐅᔭᒃᑯᑦ ᓴᖅᑭᔮᒐᖓᓂᒃ ᐃᓚᖃᖅᖢᑎᒃ ᐊᐅᓪᓚᖃᑦᑕᕆᐊᖃᕐᓇᖅᑐᑦ ᐊᑭᓕᖅᓱᖅᑕᐅᓗᑎᒃ, “ᑮᓇᐅᔭᓕᐅᑦᑎᐊᕐᓇᖅᑐᓂᒃ” ᑮᓇᐅᔭᓕᐅᖅᑎᑦᑎᒍᑎᖃᖅᖢᑎᒃ, ᐱᓇᓱᐊᕈᓯᕐᓂᒃ 4-ᓂᒃ 6-ᓄᑦ ᐃᖅᑲᓇᐃᔭᖅᑎᑕᐅᓚᐅᑲᖕᓇᖅᖢᓂ, ᐃᑲᔪᕈᑎᒃᓴᖃᑦᑎᐊᖅᖢᑎᒃ ᐊᒻᒪᓗ ᐊᕐᕌᒍᒧᑦ ᐃᑲᔫᑎᒃᓴᓂᒃ.

ᐋᓐᓂᐊᓯᐅᖅᑎ ᐃᖅᑲᓇᐃᔭᓕᖅᑎᑕᐅᒃᐸᑦ ᖃᓪᓗᓈᓂᙶᕐᓗᓂ ᐊᒻᒪ ᓄᓇᕗᒧᐊᕈᒪᓗᓂ, ᐃᖅᑲᓇᐃᔭᖅᑎᓄᑦ ᐃᒡᓗᖃᙱᓗᐊᕐᓂᖅ ᐊᒻᒪ ᐊᒃᓱᕈᕈᑎᐅᓕᔭᒻᒪᑦ ᐅᓄᖅᑐᓂᒃ ᓄᓇᓕᖕᓂᒃ.

ᐋᒐᓯ 31 ᑎᑭᑎᓪᓗᒍ, ᓄᓇᕗᑦ ᐊᒥᒐᖅᓯᓂᖅᓴᐅᓚᐅᕐᑐᑦ 32-ᓂᒃ ᐋᓐᓂᐊᓯᐅᖅᑎᓂᒃ ᐊᕐᕌᓂᐅᓚᐅᖅᑐᒥᓪᓕ, ᒫᓐᓇ 164 ᐃᖅᑲᓇᐃᔮᒃᓴᑦ ᐃᓄᖃᙱᖢᑎ ᑖᓐᓇᓗ ᖁᕝᕙᖅᓯᒪᓪᓗᓂ ᐅᕙᙵᑦ 132-ᒥᒃ, ᐅᖃᓚᐅᕐᑐᖅ ᑎᓇᐅᕇ ᓴᒧᕕᐊᓪ, ᐋᓐᓂᐊᖃᕐᓇᙱᑦᑐᓕᕆᔨᓄᑦ ᐅᖃᓪᓚᒃᑎᒋᔭᐅᔪᖅ.

ᑎᑭᖢᒍᓕ ᓯᑎᐱᕆ 21, ᐱᖓᓱ ᐋᓐᓂᐊᕖᑦ, ᐅᑯᓇᓂ ᐃᒡᓗᓕᒃ, ᐅᖅᓱᖅᑑᖅ ᐊᒻᒪ ᓴᓂᑭᓗᐊᖅ ᑐᐊᕕᕐᓇᖅᑐᓂᒃ ᑭᓯᐊᓂ ᐱᓕᕆᐊᖃᑲᑕᒃᑐᑦ ᐃᖅᑲᓇᐃᔭᖅᑎᑭᒃᓴᓗᐊᒧᑦ, ᐅᖃᓚᐅᕐᑐᖅ.

ᖃᖓᑦᑎᐊᓵᖅ ᑲᑎᒪᑎᓪᓗᒋᑦ ᒪᓕᒐᓕᕆᕕᒡᔪᐊᕐᒥ, ᔮᓐ ᒪᐃᓐ, ᒪᓕᒐᓕᐅᖅᑎ ᐊᕐᕕᐊᑦ ᐅᐊᖕᓇᖓᓄᑦ-ᑎᑭᕋᕐᔪᐊᖅᒧᑦ, ᐊᐱᕆᓚᐅᕐᑐᖅ ᑕᐃᕕᑎ ᐊᕿᐊᕈᖅᒥ, ᐃᖅᑲᓇᐃᔮᒃᓴᓕᕆᓂᖅᒧᑦ ᒥᓂᔅᑕ, ᖃᔅᓯᓂᒃ ᐃᒡᓗᒃᓴᓂᒃ ᐊᒥᒐᖅᓯᒋᐊᒃᓴᖏᓐᓂᒃ ᐋᓐᓂᐊᕐᕕᒃᒧᑦ ᐃᖅᑲᓇᐃᔭᖅᑎᓄᑦ ᓄᓇᕗᒥᑦ.

ᐊᕿᐊᕈᖅ ᐅᖃᓚᐅᕐᑐᖅ ᐃᖅᑲᓇᐃᔭᖅᑎᓄᑦ ᐃᒡᓗᒃᓴᐃᑦ “ᓈᒻᒪᓗᐊᙱᒻᒪᑕ” ᑕᒪᐃᓐᓂ ᑕᐅᑐᒃᖢᒋᑦ, ᑭᓯᐊᓂᓕ ᑖᓐᓇ ᐱᓕᕆᕝᕕᒃ ᐃᓄᖃᙱᑦᑐᓂᒃ ᖃᐅᔨᒪᓇᓱᖃᑦᑕᙱᓐᓂᕋᖅᑕᖏᑦ.

ᑕᒪᑐᒧᖓᓕ ᒪᐃᓐ ᐅᖃᓕᓚᐅᕐᑐᖅ, “ᑕᒪᓐᓇ ᓈᒻᒪᓗᐊᙱᑦᑐᐊᓗᒃ ᑐᓴᖅᖢᑕ ᒐᕙᒪᕗᑦ ᐊᒃᓱᕈᕐᓂᖏᓐᓂᒃ ᑕᒪᒃᑯᐊ ᐱᒻᒪᕆᐊᓗᖕᓂᒃ ᐱᓕᕆᐊᖃᖅᑐᑦ ᐃᒡᓗᖃᖅᑎᑕᐅᔪᓐᓇᙱᓐᓂᖏᓐᓂᒃ.”

“ᐅᑯᐊᓕ ᐃᓄᐃᑦ ᐊᒃᓱᐊᓗᒃ ᐊᑐᖃᑦᑕᖅᑕᕗᑦ ᐃᓅᓯᑦᑎᓐᓄᑦ.”

ᐊᕿᐊᕈᖅ ᐅᖃᓚᐅᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᖁᓪᓕᖅᐹᒦᓐᓂᕋᖅᖢᓂᒋᑦ ᐊᒻᒪᓗ “ᓯᕗᓪᓕᐅᑎᑕᐅᒡᒍᓪᓗᑎᒃ” ᐊᑐᐃᓐᓇᖅᑕᖃᓕᕌᖓᑦ.

ᒪᐃᓐ ᐅᖃᓚᐅᕐᒥᔪᖅ ᐊᕿᐊᕈᖅᒧᑦ ᐱᓕᕆᐊᖃᖁᓪᓗᓂᐅᒃ ᐊᑭᓕᖅᓱᐃᔪᓐᓇᕈᓐᓇᕐᓂᖅᒥᒃ ᐋᓐᓂᐊᓯᐅᖅᑎᓂᒃ ᓄᓇᕗᒥᑦ ᐃᖅᑲᓇᐃᔮᖃᕈᒪᓇᖅᓯᓯᒪᓗᓂ.

ᐊᕿᐊᕈᖅ ᐅᖃᓚᐅᖅᑐᖅ ᑕᒪᓐᓇ ᐱᓕᕆᐊᖑᕙᓪᓕᐊᓂᕋᖅᖢᓂᐅᒃ, ᑭᓯᐊᓂ “ᒫᓐᓇ ᐃᖅᑲᓇᐃᔭᖅᑎᓄᑦ ᐊᖏᕈᑎᓂᒃ ᐋᔩᕈᑎᖃᑲᑕᒃᑲᑦᑕ” ᐅᑯᓂᖓ ᓄᓇᕗᒥᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓂᒃ (NEU), ᑖᒃᑯᐊ ᑭᒡᒐᖅᑐᐃᖃᑦᑕᕐᒥᖕᒪᑕ ᓄᓇᕗᒥᑦ ᐋᓐᓂᐊᕕᖕᓂᒃ ᐃᖅᑲᓇᐃᔭᖃᑦᑕᖅᑐᓂᒃ.

ᒫᓐᓇ ᐃᖅᑲᓇᐃᔭᖅᑎᓄᑦ ᐊᖏᕈᑎᒋᔭᐅᔪᖅ ᐃᓱᓕᓯᒪᓕᕐᒪᑦ ᐊᕐᕌᒍᓂᒃ ᐱᖓᓱᓂᒃ, ᓯᑎᐱᕆ 2018-ᖑᑎᓪᓗᒍ, ᑕᐃᒪᓕ ᐃᖅᑲᓇᐃᔮᓄᑦ ᑮᓇᐅᔭᓕᐊᕆᔭᐅᔪᑦ ᖁᕝᕙᕆᐊᓚᐅᕐᓯᒪᙱᑦᑐᑦ ᑕᐃᒪᙵᑦ.

ᒪᐃᓐ ᐊᐱᕆᒃᑲᓐᓂᖅᑎᓪᓗᒍ ᐊᕿᐊᕈᖅᒥᒃ ᐋᔩᖃᑎᒌᖕᓂᐅᑉ ᒥᒃᓵᓄᑦ ᓯᑎᐱᕆ 14-ᖑᑎᓪᓗᒍ, ᐊᕿᐊᕈᖅ ᐅᖃᓚᐅᕐᓯᒪᔪᖅ ᑲᑐᔾᔨᖃᑎᒌᓄᑦ “ᐅᑎᖁᔨᓚᐅᕐᓂᖓᓂᒃ ᐅᖃᖃᑎᒋᖕᓂᕐᒧᑦ.”

ᐋᔩᖃᑎᒌᑲᑕᖕᓂᖅ ᓄᖅᑲᖓᑐᐃᓐᓇᕐᒪᑦ ᑕᐃᒪᙵᑦ ᓄᓇᕗᒥᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ ᓄᓇᕗᒥᑦ ᒐᕙᒪᒃᑯᓐᓂᒃ ᐃᖅᑲᖅᑐᐃᕕᒃᑯᑦ ᐊᑭᓖᑎᑦᑎᓚᐅᕐᓯᒪᑎᓪᓗᒋᑦ 2020-ᖑᑎᓪᓗᒍ ᐱᓕᕆᐊᖃᑦᑎᐊᓚᐅᕐᓯᒪᙱᓐᓂᖏᓐᓄᑦ ᓄᓇᕗᒻᒥᔾᔪᑎᒃᓴᓄᑦ ᐊᑭᓕᐅᑎᒃᓴᐅᓪᓗᐊᖅᑐᑦ ᑕᒻᒪᖅᑕᐅᓪᓗᑎᒃ ᐱᓕᕆᐊᖑᓚᐅᖅᓯᒪᑎᓪᓗᒋᑦ.

“ᐅᕙᑦᑎᓐᓂ ᐅᖃᖃᑎᖃᕈᒪᙱᒻᒪᑕ ᑭᓯᐊᓂᓕ ᐃᖅᑲᖅᑐᐃᕕᒃᑯᑦ ᐱᓕᕆᐊᖑᔪᖅ ᐱᐊᓂᒃᐸᑦ,” ᐊᕿᐊᕈᖅ ᐅᖃᖅᑐᖅ. “ᑖᓐᓇᓗ ᐊᑯᓂᓗᐊᕌᓗᒃ ᐱᓕᕆᐊᖑᓕᖅᖢᓂ.”

ᓯᑎᐱᕆ 21-ᒥᑦ ᐊᐱᖅᓱᖅᑕᐅᑎᓪᓗᒍ, ᐱᐊᓪ ᕙᓄᓪ, ᐊᖓᔪᖅᑳᖅ ᓄᓇᕗᒥᑦ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ, ᐅᖃᓚᐅᖅᑐᖅ ᓄᓇᕗᒥᑦ ᒐᕙᒪᒃᑯᑦ ᐋᔩᖃᑎᒌᖕᓂᕐᒥᒃ ᐃᓚᐅᙱᓐᓂᕋᖅᖢᓂᒋᑦ ᐊᒻᒪᓗ ᑖᒃᑯᐊ ᐅᑎᖅᑭᖔᕐᓂᕋᖅᖢᓂᒋᑦ.

“ᐅᕙᑦᑎᓐᓄᓪᓘᓐᓃᑦ ᐅᖃᓪᓚᖃᑎᖃᕆᐊᖅᑐᕈᒪᙱᒻᒪᑕ,” ᕙᓄᓪ ᐅᖃᖅᑐᖅ.

“ᐅᓄᖅᓯᕚᓪᓕᙱᒻᒪ ᑮᓇᐅᔭᓕᐅᕈᑎᐅᔪᑦ, ᐃᖅᑲᓇᐃᔭᕐᕕᐅᔪᓪᓗ ᐱᐅᓯᕚᓪᓕᖅᑎᑕᐅᓯᒪᙱᖢᑎᒃ,” ᐅᖃᖅᑐᖅ. “ᑕᒪᓐᓇ ᐊᕐᕌᒍᓂ ᐱᖓᓱᓂᒃ ᑕᐃᒪᐃᓕᖅᑐᖅ, ᑐᑭᖃᔮᙱ.”

ᐃᓱᒫᓘᑎᐅᕙᒃᑐᕐᓕᖅ ᕙᓄᓪ ᑐᓴᖃᑦᑕᖅᓯᒪᔭᖓ ᐋᓐᓂᐊᓯᐅᖅᑎᓂᒃ ᐅᓇ ᐃᖅᑲᓇᐃᔭᖅᕕᒃᒥ ᓈᓐᒪᙱᓕᐅᕈᑎᒌᔭᙱᓐᓂ.

“ᐊᒃᓱᐊᓗᒃ ᐱᒡᒍᓴᐅᑎᓂᖅᑕᖃᖃᑦᑕᕐᒪᑦ ᐱᓕᕆᖃᑎᒌᒃᑐᓂᒃ ᐊᒻᒪᓗ ᐱᐅᙱᓗᐊᖅᑐᐊᓗᒃᓂ ᐊᐅᓚᑦᑎᔨᑕᖃᐅᖅᖢᓂ.”

ᕙᓄᓪ ᐅᖃᓚᐅᕐᑐᖅ ᐋᓐᓂᐊᓯᐅᖅᑏᑦ ᐱᔭᐅᔪᒪᓗᐊᖅᑎᓪᓗᒋᑦ ᑲᓇᑕᓕᒫᒥᑦ, ᐋᓐᓂᐊᓯᐅᖅᑎᓄᑦ ᐃᖅᑲᓇᐃᔭᖅᑎᐅᔪᑦ ᕿᓚᒥᐊᓗᒃ ᐊᓯᐊᓂᒃ ᐃᖅᑲᓇᐃᔮᖅᑖᕈᓐᓇᕐᒪᑕ ᒪᑯᓇᓂᓕ ᖁᕕᐊᓇᙱᓗᐊᖅᑐᐊᓗᖕᓂ ᐃᖅᑲᓇᐃᔭᖅᕕᒃᓂᒃ.

“ᐊᒻᒪᓗ ᐃᓅᖃᑎᒌᙱᓂᕐᒧᑦ ᐊᔾᔨᐅᙱᑎᑦᑎᓂᖅ ᐊᑐᖅᑕᐅᓗᐊᖅᑐᐊᓘᖕᒪᑦ.”