ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᖃᖅᑐᖅ ᓄᕙᒡᔪᐊᕐᓇᖅ-19 ᐱᑕᖃᐃᓐᓇᕐᓂᐊᕐᓂᕋᖅᖢᓂᐅᒃ
ᓘᒃᑖᖅ ᒪᐃᑯᓪ ᐹᑐᓴᓐ ᐅᖃᖅᑐᖅ ᐅᓇ ᐊᒥᑯᕌᓐ (Omicron) ᐋᓐᓂᐊᕕᒡᔪᐊᕐᓇᖅ ᐱᑕᖃᖅᑎᓗᐊᕐᓂᕋᖅᑕᖓ
ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓘᒃᑖᖅ ᒪᐃᑯᓪ ᐹᑐᓴᓐ, ᐅᕙᓂ ᐊᔾᔨᙳᐊᒥ, ᐅᖃᓚᐅᕐᑐᖅ ᓄᕙᒡᔪᐊᕐᓇᖅ-19 ᐱᑕᖃᐃᓐᓇᓕᕐᓂᖓᓂᒃ. (ᐊᔾᔨᙳᐊᖁᑎᖓ ᑕᔅᑎᓐ ᐸᑖᕐ)
For an English version of this story, see Nunavut’s chief public health officer says COVID-19 is here to stay
ᐅᓇ ᓄᕙᒡᔪᐊᕐᓇᖅ-19 19-ᓄᑦ ᓄᓇᕗᒥᑦ ᓄᓇᓕᖕᓄᐊᖅᓯᒪᓕᕐᑎᓪᓗᒍ, ᓄᓇᕗᒥᑦ ᐊᖓᔪᖅᑳ ᐋᓐᓂᐊᖃᕐᓇᙱᑦᑐᓕᕆᓂᕐᒧ ᐅᖃᖅᑐᖅ ᐋᓐᓂᐊᕐᓇᖅ ᑕᒫᓃᖏᓐᓇᕐᓂᐊᕐᓂᖓᓂᒃ.
“ᐱᑕᖃᐃᓐᓇᐅᔭᕐᓂᐊᓕᖅᑐᑦ ᑕᐃᒪᙵᓕᒫᖅ,” ᓘᒃᑖᖅ ᒪᐃᑯᓪ ᐹᑐᓴᓐ ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᑐᓴᒐᒃᓴᓕᕆᑎᓪᓗᒋᑦ ᔭᓄᐊᕆ 20-ᒥ.
“ᐱᑕᖃᕈᓐᓃᖅᑎᑦᑐᓐᓇᔾᔮᙱᑕᕗᑦ.”
ᐹᑐᓴᓐ ᑕᐃᒪᐃᓕᓚᐅᕐᑐᖅ ᐅᓇ ᑲᓇᑕᒥ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓘᒃᑖᖅ ᑐᕇᓴ ᑖᒻ, ᐅᖃᓚᐅᕐᑎᓪᓗᒍ ᐅᓪᓘᖕᓂ ᒪᕐᕉᒃ ᓯᕗᓂᐊᓂ ᐊᐃᑦᑐᖅᓯᓴᕋᐃᓐᓇᖅᑐᖅ ᐊᒥᑯᕌᓐ ᐋᓐᓂᐊᕐᓇᐅᑉ ᐃᓚᖓ ᐋᓐᓂᐊᕕᒡᔪᐊᕐᓇᒥᒃ ᐱᑕᖃᐃᓐᓇᕈᑎᐅᓕᑐᐃᓐᓇᕆᐊᓕᒃ, ᑕᒪᓐᓇ ᑐᑭᖃᖅᖢᓂ ᓄᕙᒡᔪᐊᕐᓇᖅ-19 ᐱᑕᖃᐃᓐᓇᕐᓂᐊᓕᕐᓂᖓᓂᒃ.
ᑭᓯᐊᓂᓕ ᖃᓄᐃᓕᖓᓂᕆᓇᔭᖅᑕᖓ ᐋᓐᓂᐊᖑᐃᓐᓇᓕᕋᔭᕐᑑᑦ ᓄᓇᕗᒥ ᓱᓕ ᖃᐅᔨᒪᔭᐅᙱᑦᑐᖅ, ᐅᖃᖅᑐᖅ.
ᔭᓄᐊᕆ 18-ᒥ, ᓄᓇᕗᒥᑦ ᐃᓅᔪᓐᓃᖅᑐᖃᓚᐅᕐᑐᖅ ᓯᕗᓪᓕᖅᐹᒥ ᓄᕙᒡᔪᐊᕐᓇᖅ-19-ᒧ.
ᐹᑐᓴᓐ ᑐᓴᖅᑎᑦᑎᒃᑲᓐᓂᓚᐅᕐᑐᖅ ᐃᓅᔪᓐᓃᖅᑑᑉ ᒥᒃᓵᓄᑦ ᐆᒧᖓ ᓄᕙᒡᔪᐊᕐᓇᖅ-19-ᒧᑦ ᐱᓇᓱᐊᕈᓯᐅᓚᕐᓯᒪᔪᒥᒃ. ᑖᓐᓇ ᐃᓄᒃ 70 ᐅᖓᑖᓂᒃ ᐅᑭᐅᖃᓚᐅᕐᑐᖅ ᐊᒻᒪ ᑲᐱᔭᐅᓯᒪᙱᖢᓂ.
“ᐃᓚᖏᑦ ᐃᓱᒪᒋᕙᒃᑲ ᐊᓯᐅᔨᔪᑦ ᐃᓚᖓᓂᒃ,” ᐅᖃᖅᑐᖅ.
ᑲᑎᖢᑎᒃ ᐋᓐᓂᐊᕕᖕᒧᐊᑲᑕᒃᑐᑦ ᐱᔾᔪᑎᖃᖅᖢᑎᒃ ᓄᕙᒡᔪᐊᕐᓇᖅ-19 ᐋᓐᓂᐊᑲᑕᖕᓇᒧᑦ ᓄᓇᕗᒥᑦ ᖁᓕᐅᕗᑦ (10) ᔭᓄᐊᕆ 20 ᑎᑭᑎᓪᓗᒍ ᐊᒻᒪᓗ ᐹᑐᓴᓐ ᐅᖃᓚᐅᖅᖢᓂ ᖃᐅᔨᒪᙱᓐᓂᕋᖅᖢᓂ ᓄᓇᕗᒥᐅᑕᓂᒃ ᐋᓐᓂᐊᕕᖕᒦᑦᑐᖃᕆᐊᒃᓴᖓᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᔭᐅᓪᓗᓂ.
(0) Comments