ᓄᓇᕗᒥᑦ ᒥᐊᓐ ᓯᑯᑐᖃᖓ ᓱᕋᒃᑎᖅᐳᖅ

For an English version of this story, see Nunavut’s Milne Ice Shelf collapses

ᐅᓇ ᐄᑐᕆᐊᓐ ᕗᐊᐃᑦ, ᓯᑯᒥ ᖃᐅᔨᓴᖅᑎ ᐅᕙᓂ ᑲᓇᑕᒥ ᓯᑯᓕᕆᔨᒃᑯᓐᓂᒃ, ᓴᓇᕝᕕᐊᓄᑦ ᐃᖏᖢᓂ ᐅᓪᓛᒃᑯᑦ ᐋᒐᓯ 1 ᐱᓇᓱᐊᕈᓯᐅᑉ ᓄᙳᐊᓂ ᕿᑲᕐᓇᒥᒃ, ᓯᕗᓪᓕᖅᐹᒥᑦ ᖃᐅᔨᒋᐊᓚᐅᕐᑕᖓ ᐅᓇ ᓄᓇᕗᒥᑦ ᒥᐊᓐ ᓯᑯᑐᖃᖓ, ᒫᓃᑦᑐᖅ ᐅᒥᖕᒪᒃᑕᓕᐅᑉ ᐅᐊᖕᓇᖅᐸᓯᐊᑕ ᑲᓇᖕᓇᖅᑕᓯᐊᓂ.

ᐅᓇ ᖁᒻᒧᒃᑎᑕᐅᓯᒪᔪᒃᑯᑦ ᐊᔾᔨᓕᐅᕐᓯᒪᔪᖅ ᓄᕗᔭᒐᓗᐊᖅᑎᓪᓗᒍ, ᕗᐊᐃᑦ ᑕᑯᔪᓐᓇᓚᐅᕐᑐᖅ ᕿᕐᓈᖓᔪᒥᒃ ᑕᕐᓴᒥᑦ.

“ᐃᓱᒪᔪᖓ, ᐆᑮ, ᐅᓇ ᓈᒻᒪᖅᑰᔨᙱᑦᑐᖅ. ᑖᔅᓱᒥᖓ ᓯᑯᑐᖃᕐᒥ ᑕᐅᑐᒃᓯᒪᒐᒪ ᐊᕐᕌᒍᒐᓴᒻᒪᕆᖕᓂᒃ ᐊᒻᒪᓗ ᑖᓐᓇ ᐃᓕᖁᓯᕆᖅᑰᔨᙱᖢᓂᐅᒃ,” ᐅᖃᖅᑐᖅ.

ᐊᔾᔨᓕᐅᕐᓯᒪᔪᖅ ᓴᖅᑭᑎᓪᓗᒍ, ᓇᓗᓇᕈᓐᓃᑦᑎᐊᓚᐅᕐᐳᖅ. ᐅᕙᓂ ᔪᓚᐃ 29-ᓗ 31-ᓗ ᐊᑯᓐᓂᖓᓂᒃ, ᓇᑉᐸᑲᓴᓪᓗᐊᖓ ᐆᒪ 4,000-ᓂ ᐅᑭᐅᓕᒃ ᒥᐊᓐ ᓯᑯᑐᖃᖅ ᐲᓚᐅᕐᐳᖅ.

ᖃᓄᐃᓕᒍᑎᖓ: 79 ᑭᑉᐹᕆᒃᑎᓯᒪᔪᑦ ᑭᓛᒥᑕ ᓯᑯ ᕿᑭᖅᑕᖅ 50 ᐳᓴᓐᑎᒥ ᐊᖏᓂᕐᓴᐅᓪᓗᐊᖅᑐᖅ ᒫᓐᕼᐊᑕᓐᒥ ᐅᕝᕙᓘᓐᓃᑦ ᐃᖃᓗᐃᑦ ᐊᕙᓗᓕᒫᖓᓂᒃ ᐊᒻᒪᓗ ᖁᑦᑎᖕᓂᖃᖅᖢᓂ 70-ᓂ 80-ᓄ ᒦᑕᓂᒃ, ᓲᕐᓗ 25 ᐳᓴᓐᑎᒥ ᑲᓇᑕᒥ ᕗᑦᐹᕐᕕᓴᓂᒨᖓᓂᖓᓂᒃ ᖁᑦᑎᖕᓂᕐᓴᖅ.

“ᑲᒪᒋᒻᒪᕆᓚᐅᕐᐸᕋ ᓱᕋᒃᑐᖅ ᑕᑯᒐᒃᑯ,” ᐅᖃᖅᑐᖅ ᕗᐊᐃᑦ. “ᑭᓯᐊᓂᓕ ᑕᒪᐅᓇᑦᑕᐃᓐᓇᖅ ᓯᓚᐅᑉ ᖃᓄᐃᓐᓂᖓ ᓈᒻᒪᑦᑎᐊᓚᐅᕐᑐᖅ.”

ᐊᕕᖕᓂᖃᓚᐅᖅᑎᓐᓇᒍ, ᕗᐊᐃ ᐅᔾᔨᕆᓚᐅᕐᑐᖅ ᑖᔅᓱᒪ ᓯᑰᑉ ᖄᖓ ᓱᕉᖅᑰᔨᓂᖓᓂᒃ, ᑖᓐᓇᓗ ᓇᓗᓇᐃᒃᑯᑎᐅᓪᓗᓂ ᖄᖓᒍᑦ ᐊᐅᖕᓂᖃᓚᐅᕐᓂᖓᓂᒃ.

ᐱᓇᓱᐊᕈᓯᕐᓂ ᓯᕗᓂᐊᓂ, ᐅᔾᔨᕈᓱᓚᐅᕐᓯᒪᔪᖅ ᐃᒪᖅᑕᖃᕈᓘᔭᕐᓂᖓᓂᒃ ᐅᒥᖕᒪᒃᑕᓕᐅᕐ ᐅᐊᖕᓇᖓᑕ ᓯᒡᔭᖓᓂᒃ.

“ᖃᖓᒃᑲᓐᓂᕐᓕ ᑕᒪᓐᓇ ᓯᑯᖃᐃᓐᓇᖃᑦᑕᓚᐅᕐᓯᒪᔪᖅ ᐅᑭᐅᒃᑯᑦ,” ᐅᖃᖅᑐᖅ.

“ᐊᕐᕌᒎᓕᖅᑐᓂᒃ ᖁᓕᓂᒃ, ᑕᑯᖃᑦᑕᕐᓯᒪᓕᕋᑦᑕ ᐃᒪᕐᓂ ᓴᕿᖃᑦᑕᖅᑐᓂᒃ ᐊᐅᔭᒃᑯᑦ ᐊᒻᒪᓗ ᑕᐃᒪᐃᓐᓂᖓᓄᑦ ᐊᖏᔪᕈᓗᖕᓂ ᓯᑯᐃᖅᐸᓪᓕᐊᓂᐅᔪᓂᒃ.”

ᐅᒥᖕᒪᒃᑕᓕᒃ ᑕᑯᖃᑦᑕᕐᓯᒪᔪᖅ ᐊᖏᔪᐊᓗᖕᓂ ᓯᑯᐃᖅᐸᓪᓕᐊᓂᐅᔪᓂᒃ ᐅᑯᓇᓂ ᐊᕐᕌᒍᓂᒃ 2003, 2005, 2008, 2011 ᐊᒻᒪ 2012.

2010-ᒥ, ᐊᖏᔪᒻᒪᕆᐊᓗᖕᒥᑦ ᓯᑯᒥᑦ ᐊᖏᓂᖃᓪᓗᐊᕐᑐᒥᑦ ᐳᒨᑕᒥ ᐲᓕᒑᔪᖃᓕᓚᐅᕐᓯᒪᔪᖅ ᕗᐊᑦ ᕼᐊᓐᑦ ᓯᑯᑐᖃᕐᒥᑦ, ᑕᕝᕙᓃᒻᒥᔪᖅ ᐅᒥᖕᒪᒃᑕᓕᒃᒥᑦ.

ᒥᐊᓐ ᓯᑯᑐᖃᖅ ᐃᓱᒪᒋᔭᐅᓚᐅᕐᓯᒪᔪᖅ ᓱᕋᑕᐅᖅᑐᔾᔮᙱᑦᑕᕆᐊᒃᓴᖓᓂᒃ ᓲᖃᐃᒻᒪ ᐃᔾᔪᓂᕐᓵᓘᖕᒪ ᐊᓯᖏᓐᓂᒃ ᓯᑯᑐᖃᕐᓂᒃ ᐊᒻᒪᓗ ᓴᐳᔾᔭᐅᓯᒪᑦᑎᐊᖅᖢᓂ ᐅᕙᓂ ᒥᐊᓐ ᕕᐅᑦᒥᑦ.

“ᐅᓇ ᓯᓚᐅᑉ ᐊᓯᙳᖅᐸᓪᓕᐊᓂᖓᓅᓪᓚᕆᒃᑐᖅ,” ᐅᖃᖅᑐᖅ ᕗᐊᐃᑦ.

ᐊᕕᒃᐸᓪᓕᐊᓂᐅᔪᖅ ᒥᐊᓐ ᓯᑰᓂᕐᒥ (Milne Ice Sheet) ᐅᒥᖕᒪᓕᐅᑉ ᐅᐊᖕᓇᖓᑕ ᓯᒡᔭᖓᓂᒃ ᓯᑯᒥ ᕿᑭᖅᑕᖑᕐᑎᑦᑎᓚᐅᕐᐳᖅ ᐃᒻᒪᖄᑦ 50 ᐳᓴᓐᑎᒥ ᐊᖏᓂᕐᓴᒥᒃ ᒫᓐᕼᑕᓐᒥᑦ. “ᐃᓱᒪᒋᔭᐅᒡᒍᖕᒪᑦ ᐃᓄᐃᑦ ᐱᖃᓗᔭᕐᓂᒃ ᐃᓱᒪᓕᕌᖓᒥᒃ ᐃᒪᐃᓕᖓᕙᖕᓂᖏᓐᓂᒃ ᓴᖅᑭᔮᕐᓂᖓ ᓄᕗᖃᕐᓗᓂ ᐊᒻᒪ ᐊᑖᒍᑦ ᓯᓕᖕᓂᕐᓴᐅᓗᓂ, ᑭᓯᐊᓂᓕ ᐅᓇ ᑕᐃᒪᐃᙱᑦᑎᐊᕐᑐᖅ,” ᐅᖃᖅᑐᖅ ᑎᐅᕆᒃ ᒥᐅᓗ. ᑭᓯᐊᓂᓕ, ᓯᑯᐃ ᕿᑭᖅᑕᙳᕐᓯᒪᔪᑦ ᓵᑦᑐᑯᓘᖃᑦᑕᖅᑐᑦ ᐊᒻᒪ ᐊᕗᖓᑲᓪᓚᕈᓘᖓᓪᓗᑎᒃ, “ᓲᕐᓗ ᐊᐃᐹᑦᑎᑐᑦ,” ᐅᖃᖅᑐᖅ ᒥᐅᓗ. (ᐊᔾᔨᙳᐊᑦ ᐅᑯᓇᙵᑦ ᐊᕙᑎᓕᕆᔨᒃᑯᑦ ᐊᒻᒪ ᓯᓚᐅᑉ ᐊᓯᙳᖅᐸᓪᓕᐊᓂᖓ ᑲᓇᑕᒥ)

ᐊᓯᖏᓐᓄᓪᓕ ᐆᑐᓇᖅ ᑎᐅᕆᒃ ᒥᐅᓗ, ᐃᓕᓴᐃᔨ ᓄᓇᓕᕆᓂᕐᒥᒃ ᐊᒻᒪ ᐊᕙᑎᓕᕆᓂᕐᒥᒃ ᐃᓕᓐᓂᐊᒐᒃᓴᓂᒃ ᑳᑕᓐ ᔫᓂᕘᓯᑎᒥᒃ, ᐅᓇ ᓯᑯ ᓱᕋᒃᓂᖓ ᑲᒪᓇᙱᓐᓂᕋᖅᑕᖓ.

“ᑕᑯᓂᑰᔪᒃᓴᐅᕗᓯ ᐅᓃᒃᑳᓕᐊᑦ ᑕᐃᒎᓯᖏᓐᓂᒃ ᐃᒪᓐᓇ ‘ᑭᖑᓪᓕᖅᐹᖅ ᐊᑕᔪᖅ ᓯᑯᑎᖃᖅ—ᑕᒪᓐᓇᓕ ᓱᓕᓗᐊᕋᓱᒋᙱᑕᕋ ᓲᖃᐃᒻᒪ ᓱᕋᒃᐸᓪᓕᐊᖏᓐᓇᕐᐸᑦ ᐊᕐᕌᒍᑦ ᖁᓕᐅᓕᕐᑐᑦ,” ᐅᖃᖅᑐᖅ.

“ᑕᐃᒪᙵᑦ ᑕᒪᐅᖓᕌᖓᑦᑕ, ᑕᑯᖃᑦᑕᖅᑐᒍᑦ ᖁᑉᐸᑯᑲᓐᓂᐅᕙᒃᑐᓂᒃ.”

ᐅᓇ ᓯᕗᓪᓕᖅᐹᖑᙱᑦᑐᖅ ᒥᐅᓗ ᑕᑯᓪᓗᓂ ᓯᑯᑐᖃᕐᒥ ᓱᕋᒃᑐᒥᓐ. ᓴᓇᓯᒪᖕᒪᑦ ᐅᑭᐅᕐᑕᖅᑐᕐᒥᑦ ᐃᓕᓐᓂᐊᑲᓐᓂᓕᕐᑎᓪᓗᒍ 1996-ᒥᑦ, ᐊᒻᒪᓗ ᐅᐸᒃᓯᒪᓪᓗᓂᐅᒃ ᒥᐊᓐ ᓯᑯᑐᖃᖅ 11-ᖏᕐᓱᖅᖢᓂ ᑕᐃᒪᙵᑦ 2004-ᒥ ᐱᒋᐊᖅᖢᓂ.

ᑖᔅᓱᒧᖓᓕ, ᑲᒪᓗᐊᕐᑐᕐᓕ ᓱᕋᒃᐸᓪᓕᐊᓂᖃᕐᓂᖓ ᓄᑖᓂᒃ ᖁᑉᐸᑯᖃᕐᓂᐅᔪᓂᒃ.

“ᑕᕝᕙᓂ ᓯᑯᑐᖃᕐᒥ ᑕᒻᒫᕐᓯᒪᓯᒪᒐᑦᑕ, ᐅᕙᓃᓐᓇᓱᓚᐅᕐᑐᒍ ᓱᕋᒡᕕᒋᓇᔭᖅᑕᖓᓂᒃ,” ᐅᖃᖅᑐᖅ ᒥᐅᓗ.

“ᑭᓯᐊᓂᓕ ᑕᐃᑲᓂ ᓱᕋᓚᐅᙱᑦᑐᖅ.”

ᐋᖅᑭᒃᓯᒪᓚᐅᕐᑑᒐᓗᐊᓪᓕ ᐅᑯᐊ ᒥᐅᓗ ᐊᒻᒪ ᓴᓇᖃᑎᖏᑦ ᑕᕝᕗᖓ ᓯᑯᑐᖃᕐᒧᐊᕐᓂᐊᕐᓗᑎᒃ ᔪᓚᐃᒥ, ᑭᓯᐊᓂᓕ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒧᑦ ᑕᒪᒃᑯᐊ ᐸᕐᓇᐅᑎᖏᑦ ᖁᐊᖅᑎᑕᐅᑐᐃᓐᓇᓚᐅᕐᑐᑦ.

“ᐃᓱᒪᔪᖓᓕ ᐊᕐᕌᒍ ᑕᕝᕗᖓ ᓯᑯᑐᖃᕐᒧᐊᕈᒪᓪᓗᖓ ᖃᓄᐃᓕᓯᒪᔭᕆᐊᒃᓴᖓᓂᒃ,” ᐅᖃᖅᑐᖅ ᒥᐅᓗ.

“ᐊᐃᑦᑖᖑᒐᓗᐊᖅ ᑕᑯᓪᓗᒍ ᓯᑯ ᓱᕋᖕᓂᖓ.”

ᒥᐅᓗᒧᓪᓕ, ᓯᑯᑐᖃᐅᑉ ᓱᕋᖕᓂᖓ ᐊᓯᐅᔨᒍᑎᐅᓂᖓᓂᒃ.

ᐅᓇ ᒥᐊᓐ ᓯᑯᑐᖃᖅ ᓲᕐᓗ ᓴᐳᓕᑕᐅᓚᐅᕐᑐᖅ. ᐊᐅᒃᐸᓪᓕᐊᔪᓂᒃ ᑲᖏᖅᖢᖕᒦᑎᑦᑎᓪᓗᑎ ᐊᒻᒪᓗ ᑕᑯᓕᒪᓇᙱᑦᑐᒥᒃ ᑕᓯᖃᓕᕐᓯᒪᓪᓗᓂ (Epishelf Lake)—ᖁᓛᒍᑦ ᑕᕆᐅᖑᙱᖢᓂ ᐃᒪᖅ ᐳᒃᑕᓛᑐᐃᓐᓇᖅᖢᓂ ᑕᕆᐅᑉ ᖄᖓᓂ.

“ᒪᕐᕉᓪᓗᑎᒃ ᐃᒪᐃᓐᓇᒃ ᑭᓯᐊᓂ ᐊᔾᔨᒌᙱᓗᐊᒧᑦ ᐃᔾᔪᖅᑎᕐᓯᒪᓂᖓ ᑲᑎᖃᑎᒌᒍᓐᓇᙱᑦᑐᒃ,” ᐅᖃᖅᑐᖅ ᒥᐅᓗ. “ᓲᕐᓗ ᐅᕐᓱᐊᓗᒡᓗ ᐊᒻᒪ ᐃᒪᕐᑎᑐᑦ.”

ᑕᐃᑲᙵ ᑖᓐᓇ ᑕᓯᖅ ᐃᒪᐃᔭᖃᑦᑕᖅᑐᖅ ᐊᖅᑯᑎᖃᖅᑰᔨᓪᓗᓂ ᐋᖅᑭᒃᓯᒪᓕᕐᓯᒪᔪᒥ ᓯᑯᑐᖃᐅᑉ ᐊᑖᒍᑦ.

“ᐊᕐᕌᒍᓂ ᐊᓂᒍᖅᑐᓂᒃ ᒫᓂ ᖁᓕᑲᓴᐅᓕᖅᑐᓂᒃ, ᐱᓕᕆᐊᖃᕐᓯᒪᒐᑦᑕ ᑖᔅᓱᒥᖓ ᐊᒻᒪᓗ ᐋᖅᑭᒃᓯᓯᒪᓪᓗᑕ ᐱᐅᓪᓚᕆᒃᑐᒥ ᑎᑎᕋᐅᓯᖃᖅᐸᓪᓕᐊᓪᓗᓂ ᑕᐅᑐᒍᓐᓇᖅᖢᑕ (ᐊᐅᒃᐸᓪᓕᐊᔫᑉ ᐆᓇᕐᓂᖓᓂᒃ ᐊᒻᒪᓗ ᖁᕝᕙᖅᐹᓪᓕᖃᑦᑕᖅᖢᑎᒃ ᐊᒃᓱᐊᓗᒃ ᐊᐅᔭᙳᕌᖓᑦ.”

ᑖᓐᓇ ᐆᓇᔪᖕᓂᐅᔪᖅ ᐃᒪᖅ ᓯᑯᒃᑰᓕᕌᖓᑦ, ᑰᓕᐅᓕᖃᑦᑕᕐᒪᑕ ᐅᒻᒪᓗ ᒥᐅᓗ ᓴᓇᖃᑎᖏᓪᓗ ᖃᐅᔨᓕᑕᐃᓐᓇᓚᐅᖅᖢᑎᒃ ᐆᒪᔪᖅᑕᖃᕐᓂᖏᓐᓂᒃ, “ᓂᕆᑲᑕᒃᑐᑦ ᓱᕈᕐᓂ ᑲᖏᖅᖢᖕᒥᙶᖅᐸᓪᓕᐊᔪᓂᒃ ᐊᒻᒪ ᑰᒃᑕᐅᕙᓪᓕᐊᓪᓗᑎᒃ ᐃᖏᕐᕋᓂᕐᒧᑦ,” ᐅᖃᖅᑐᖅ.

ᐃᒪᐃᑦᑐᖅᑕᖃᕐᒪᓐ “ᐊᔾᔨᐅᙱᑦᑐᓂᒃ ᐆᒪᒍᑎᓂ ᑕᕆᐅᑉ ᐊᑖᓃᑉᐸᒃᑐᓄᑦ—ᓯᑳᓚᑉᔅ (scallops), ᑕᕆᐅᕐᒥᐅᑕ ᐱᕈᖅᑐᑦ (sea anemones) ᐊᒻᒪᓗ ᐊᓯᒃᑲᓐᓂᖏᓐᓂᒃ—ᐆᒪᔪᑦ ᑲᖏᖅᖢᖕᒥᑦ,” ᐅᖃᖅᑐᖅ.

ᑕᐃᒪᙵᓂᑦ ᐊᕕᒃᑐᕐᓂᖅᑕᖃᓚᐅᕐᑎᓪᓗᒍ, ᐊᑕᐅᓯᖅ ᓯᑯ ᕿᑭᖅᑕᙳᕐᓯᒪᔪᖅ ᓱᕋᓚᐅᕐᒥᔪᖅ ᒪᕐᕈᐃᓕᖓᓕᖅᖢᓂ ᐊᒻᒪ ᐱᖃᓗᔭᙳᖄᑎᒋᓪᓗᑎᒃ ᐃᓚᖏᑦ.

ᒫᓐᓇ ᓴᕐᕙᐅᔪᓐᓇᖅᖢᑎᒃ ᑕᒪᕐᒥᒃ, ᐃᖏᕐᕋᔪᓐᓇᖅᖢᑎᒃ ᐊᒻᒪ ᓯᒡᔭᐅᑉ ᖃᓂᒋᔭᖓᓃᖄᑎᒋᑎᓪᓗᒋᑦ, ᕗᐊᐃᑦ ᐅᖃᖅᑐᖅ ᐃᓚᖏᑦ ᐅᓄᕐᓂᕐᓴᐃᑦ ᐃᒃᑲᑦᑐᒨᓗᐊᕌᖓᑕ ᐊᔪᓕᖅᐸᒃᖢᑎ ᐊᒻᒪ ᐊᐅᑐᐃᓐᓇᓕᖅᐸᒃᖢᑎᒃ.

ᐊᐅᔭᒃᑯᑦ ᐃᖏᕐᕋᐅᔭᖃᑦᑕᖅᑐᑦ ᐊᒻᒪᓗ ᓄᖅᑲᓕᖅᐸᒃᖢᑎᒃ ᑲᓇᑕᐅᑉ ᐅᑭᐅᕐᑕᖅᑐᖓᑕ ᕿᑭᖅᑕᒐᓚᖏᓐᓂᒃ, ᐊᔾᔨᐸᓗᖏᓐᓂᒃ ᐆᒪ ᐃᐅᓪ ᓯᑯᑐᖃᖅᑎᑐ (Ayles Ice Shelf) 2005-ᖑᑎᓪᓗᒍ.

ᕗᐊᐃᑦ, ᓴᓇᖃᑎᖏᓪᓗ ᑲᓇᑕᒥ ᓯᑯᓕᕆᔨᒃᑯᓐᓂᒃ, ᑲᔪᓯᓂᐊᖅᑐᑦ ᐃᖏᕐᕋᕙᓪᓕᐊᔪᓂᒃ ᕿᑭᖅᑕᙳᕐᓯᒪᔪᓂ ᓯᑯᓂᒃ, ᑖᒃᑯᐊᓗ ᑕᐃᒪᐃᑦᑐᓐᓇᖢᑎᒃ ᖁᓕᓂᒃ ᐅᑭᐅᓂᒃ.

“ᐊᖏᔪᐊᓗᐃᑦ ᓯᑯᐃᑦ ᕿᑭᖅᑕᙳᕐᓯᒪᔪᑦ ᐊᔪᕐᓇᙱᒻᒪᑕ ᖃᐅᔨᒪᔭᕆᐊᒃᓴᖅ ᓇᓃᓐᓂᖏᑦ,” ᕗᐊᐃᑦ ᐅᖃᖅᑐᖅ.

“ᑭᓯᐊᓂᓕ ᐅᓇ ᕿᑭᖅᑕᖅ ᓱᕋᒐᔭᕐᓂᕈᓂ ᐅᓄᖅᑐᐊᓘᓕᕐᓗᓂ, ᑕᐃᒪᓗ ᐱᑕᖃᓕᑳᓪᓚᒃᑲᔭᖅᑐᖅ ᐱᖃᓗᔭᕐᓂᒃ ᒫᓂ ᐃᔾᔪᓂᖃᖅᑳᑎᒋᔪᓂ 80 ᒦᑕᓂᒃ, ᑕᒪᓐᓇᓗ ᖁᐊᕐᓵᓇᕈᑎᐅᓕᕋᔭᖅᖢᓂ ᐅᒥᐊᕐᔪᐊᓕᕆᓂᕐᒧᑦ.”

ᑕᒪᐃᓐᓄᓪᓕ ᕗᐊᐃᑦ ᐊᒻᒪ ᒥᐅᓗ, ᐅᓇ ᒥᐊᓐ ᓯᑯᑐᖃᐅᑉ ᓱᕋᖕᓂᖓ ᓇᓗᓇᙱᑦᑐᒥ ᖃᐅᔨᒍᑎᐅᕗᖅ.

“ᑕᒪᓐᓇ ᓲᕐᓗ ᑐᐸᒃᓯᒍᑎᐅᔪᖅ,” ᐅᖃᖅᑐᖅ ᒥᐅᓗ.

1900-ᖏᑦ ᐱᒋᐊᖅᐸᓪᓕᐊᓕᖅᑎᓪᓗᒋᑦ ᐊᑕᐅᓯᐊᓗᖕᒥ ᓯᑯᑐᖃᖃᓚᐅᕐᓯᒪᔪᖅ ᐅᒥᖕᒪᒃᑕᓕᐅᑉ ᐅᐊᖕᓇᖓᑕ ᓯᒡᔭᓕᒫᖓᓂᒃ.

ᐊᕐᕌᒍ 2000 ᑎᑭᑎᓪᓗᒍ, ᐊᕕᒃᓯᒪᓚᐅᕐᓯᒪᔪᖅ 6-ᖑᓕᕐᓯᒪᓪᓗᓂ ᓯᑯᑐᖃᓪᓗᐊᑕᓂᒃ ᐊᒻᒪᓗ ᒥᒃᖠᕚᓪᓕᖅᖢᓂ 90 ᐳᓴᓐᑎᑲᓴᓪᓗᐊᒥᒃ.

ᑕᐃᒪᙵᓪᓕ, ᑕᕆᐊᑉ ᓯᑯᖏᑦᑕ ᐊᖏᑎᒋᓂᖏᑦ ᒥᒃᖠᕚᓪᓕᕐᔪᐊᖅᐳᑦ, ᐊᑦᑎᓛᒦᓯᒪᓪᓗᑎᒃ 2012-ᒥᓐ.

ᔪᓚᐃᖑᕋᑖᓚᐅᕐᑐᖅ ᐊᔾᔨᐅᙱᑦᑑᓚᐅᙱᓚᖅ, ᑎᑎᕋᐅᓯᐅᖃᑦᑕᕐᓯᒪᓂᒃᑯᑦ ᒥᑭᓛᖑᓯᒪᓪᓗᓂ ᑕᖅᑭᒧᑦ, ᑕᒪᓐᓇ ᑕᐃᒪᐃᔾᔪᑎᖃᖅᖢᓂ ᓱᕋᒃᑎᕐᓂᖓᓄᑦ ᒥᐊᓐ ᓯᑯᑐᖃᖅ.

ᒥᐅᓗ ᐅᖃᓚᐅᕐᑐᖅ ᖃᓄᐃᓕᐅᕐᓂᐅᔪᑦ ᐅᔾᔨᕈᓱᓕᖅᐹᓪᓕᕈᑎᐅᓂᐊᕐᓗᓂ ᓯᓚᐅᑉ ᐊᓯᙳᖅᐸᓪᓕᐊᓂᖓ ᐊᒃᑐᐃᒍᑎᖏᓐᓂᒃ.

“ᑕᒪᓐᓇ ᐱᓕᕆᓕᖅᑎᑦᑎᒍᑎᐅᒍᓂ ᐱᐅᒻᒪᕆᒃᑐᐊᓘᓇᔭᖅᑐᖅ,” ᐅᖃᖅᑐᖅ ᒥᐅᓗ.

“ᓲᖃᐃᒻᒪ ᓱᓕ ᑭᖑᕙᕐᓇᓗᐊᙱᒻᒪᑦ ᐊᓯᙳᖅᑎᑦᑎᓂᖅ, ᐃᓖ? ᐱᓕᕆᐊᕆᓵᓕᓂᕐᓴᐅᒍᑦᑎᒍᑦ ᐱᐅᓂᕐᓴᐅᓇᔭᖅᑐ ᓇᐅᒃᑯᓕᒫᖅ.”