ᓄᓇᕗᒥᑦ ᒪᐃᔭᐅᔪᑦ ᐃᓅᓕᕆᓂᒃᑯᑦ ᐃᑲᔪᖅᑐᖅᑕᐅᒃᑲᓐᓂᕈᒪᔪᑦ ᐃᑲᔪᕈᑎᒃᓴᓂᒃ ᐃᒥᐊᓗᖕᒥ ᐱᑕᖃᖃᑦᑕᕐᓂᖓᓄᑦ

ᖁᒡᓗᖅᑑᕐᒥᐅᑕ ᐃᒥᐊᓗᖕᒧᑦ ᓄᖃᖓᒃᑲᓐᓂᕈᑎᒃᓴᓂ ᓴᖅᑭᑦᑐᖃᒃᑲᓐᓂᑐᐃᓐᓇᕆᐊᓕᒃ ᐊᕐᕌᒍ ᓄᑖᙳᖅᐸ ᓂᕈᐊᕐᓇᐅᓛᖅᑐᖅ ᐊᓂᒍᑦᑎᐊᖅᐸᑦ.

ᐱᖓᓱᓂ ᐊᕐᕌᒍᓂ ᓂᕈᐊᙱᖢᑎᒃ ᑭᖑᓪᓕᖅᐹᖑᓚᐅᕐᑐᒥ ᓂᕈᐊᕐᓇᒥ, ᕼᐋᒻᒪᓚᒃᑯᑦ ᓂᕈᐊᖅᑎᑦᑎᒃᑲᓐᓂᕈᒪᓕᕐᑐᑦ ᓄᖃᖓᔾᔪᑎᒋᔭᐅᔪᓂᒃ ᐃᓚᖏᓐᓂᒃ ᐅᑎᖅᑎᑕᐅᖁᔨᓂᕐᒧᑦ.

ᒪᐃᔭ ᓴᐃᒪᓐ ᑯᓕᒃᑖᓇ ᐅᖃᓚᐅᕐᑐᖅ 2018-ᒥ ᓄᖃᖓᔾᔪᑎᐅᓗᐊᖅᑐᓂᒃ ᐊᓯᙳᖅᑎᑦᑎᓂᐅᓚᐅᕐᑐᖅ ᓈᒻᒪᒋᓗᐊᖅᑐᓂᒃ ᐊᒃᑐᐃᒍᑎᖃᓕᕐᓂᖓᓂᒃ ᓄᓇᖃᖅᑐᓄᑦ.

“ᓄᓇᓖᑦ ᑕᒪᓐᓇ ᐃᒃᐱᒋᖕᒪᒍ ᐊᒻᒪ ᑕᐅᑐᒃᖢᓂᔾᔪᒃ ᖃᐅᑕᒫᓐ,” ᑯᓕᑦᑖᓇ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ.

ᐅᖃᓚᐅᕐᑐᖅ ᓄᓇᓕᖕᓂ ᐸᓖᓯᒃᑯᑦ ᐅᓐᓄᑕᒫᑦ ᐅᖄᓚᕝᕕᐅᖃᑦᑕᕐᓂᕐᓴᐅᓕᕐᓂᖏᓐᓂᒃ, ᐋᖓᔮᖅᑐᓂᒃ ᓄᓇᓕᖕᓂ ᑕᑯᑲᑕᖕᓇᕐᓂᖅᓴᐅᓕᖅᖢᓂ ᐊᒻᒪᓗ ᐃᒥᐊᓗᖕᒥ ᓂᐅᕕᐊᒃᓴᖃᖅᐸᒃᑐᑦ ᐅᓄᕐᓂᕐᓴᐅᓕᖅᖢᑎᒃ.

ᑕᐃᒪᐃᒃᑲᓗᐊᖅᑎᓪᓗᒍ ᑯᓕᒃᑖᓇ ᐅᖃᓚᐅᕐᑐᖅ ᐃᓱᒪᒧᑦ ᐋᓐᓂᐊᓯᐅᖅᑎᑕᖃᙱᓗᐊᕐᓂᖓᓂᒃ ᐅᕝᕙᓘᓐᓃᑦ ᐊᑐᓗᐊᕐᓂᕐᒧᑦ ᐃᑲᔪᕈᑎᒃᓴᓂ ᓄᓇᓕᖕᓂ ᐊᒻᒪᓗ ᓄᓇᕗᒥᑦ ᒐᕙᒪᒃᑯᑦ ᑕᒪᑐᒃᑯᓂᖓ ᐱᔭᐅᔭᕆᐊᓕᖕᓂ ᖃᐅᔨᒪᓂᕐᓴᐅᓗᑎᒃ.

“ᐃᒥᐊᓗᒃ ᑕᒪᒃᑯᓂᖓ ᓈᒻᒪᙱᓕᐅᕈᑎᐊᓗᖕᓂ ᐊᒃᑐᐃᒍᑎᖃᕐᒪᓐ ᐊᒻᒪᓗ ᐃᑲᔪᖅᑐᐃᔾᔪᑎᖃᙱᖢᑕ ᐃᓱᒪᒧᑦ ᐋᓐᓂᐊᓯᐅᖅᑎᓂᒃ ᑕᒪᑐᒥᖓ ᐱᓕᕆᐊᖃᕈᓐᓇᓕᕐᓂᕐᒧᑦ.”

ᒫᓐᓇ ᐱᖓᓱᐃᖑᖕᒪᑕ ᐃᒥᐊᓗᓕᕆᓂᖅ ᓄᓇᕗᒥᑦ; ᑲᑎᒪᔩᑦ, ᐊᑐᖁᔭᐅᙱᑦᑐᑦ ᐊᒻᒪ ᐃᓱᒪᖅᓱᖅᑐᑦ.

ᖁᒡᓗᖅᑑᖅ ᒫᓐᓇ ᐃᓱᒪᖅᓱᕐᓇᕐᒪᑦ, ᑐᑭᖃᖅᖢᓂ ᖃᔅᓯᑐᐃᓐᓇᕐᓂᒃ ᑎᑭᓴᐃᔪᓐᓇᖅᖢᑎᒃ ᐊᒻᒪᓗ ᓄᓇᓕᖕᓄᑦ ᑎᑭᑎᑦᑎᔪᓐᓇᖅᖢᑎᒃ ᑭᓯᐊᓂᓕ ᐃᒥᐊᓗᖕᒧᑦ ᒪᓕᒐᖃᖅᖢᑎᒃ ᓄᓇᕗᒧᑦ ᑐᕌᖓᔪᓂᒃ.

ᕼᐋᒻᒪᓚᒃᑯᑦ ᑲᑎᒪᔨᓄᑦ ᑲᒪᒋᔭᐅᕙᓚᐅᕐᓯᒪᔪᑦ — ᑕᐃᒪᓐᓇᓗ ᐊᑐᒃᑲᓐᓂᕈᒪᓪᓗᑎᒃ — ᐃᒪᓐᓇ ᓂᕈᐊᖅᑕᐅᓯᒪᔪᑦ ᑲᑎᒪᔩᑦ ᐋᖅᑭᒃᓱᐃᔨᐅᓗᑎᒃ ᖃᓄᑎᒋ ᐃᒥᐊᓗᖕᒥ ᓄᓇᓕᖕᓄᐊᖅᑐᖃᕈᓐᓇᕐᓂᖓᓂᒃ ᐊᒻᒪᓗ ᐊᖏᕈᓐᓇᕐᓗᑎᒃ ᐋᒃᑳᕈᓐᓇᕐᓗᑎᒡᓗ ᓄᓇᓕᖕᓂ ᐱᔭᐅᔪᒪᔪᓂᒃ.

ᑯᓕᒃᑖᓇ ᐅᖃᓚᐅᕐᑐᖅ ᑲᑎᒪᔨᓄᑦ ᐱᐅᓂᖅᑕᖃᕐᓂᖓᓂᒃ ᐊᒻᒪ ᓈᒻᒪᙱᓕᐅᕈᑎᖃᕐᓂᖓᓂᒃ.

ᓲᕐᓗ, ᐃᓚᖏ ᐃᓄᐃ ᐊᖏᕐᑕᐅᓯᒪᔪᖅ ᐃᒥᐊᓗᖕᒥ ᑎᑭᑎᑦᑎᔪᕐᓇᕐᓗᑎᒃ ᓈᒻᒪᙱᓕᐅᕈᑎᖃᔭᓚᐅᕐᒪᑕ ᐸᓖᓯᓄᑦ ᑲᒪᒋᔭᐅᔭᕆᐊᖃᓕᖅᐸᒃᖢᑎᒃ.

ᐅᖃᓚᐅᕐᑐᖅ ᐊᑑᑎᖃᕐᓂᖅᐹᖑᓚᐅᕐᑐᕐᓕ ᐃᓚᖏᓐᓂᒃ ᐃᓄᖕᓂ ᐃᒥᐊᓗᒃᑖᖅᑎᑦᑎᑦᑕᐃᓕᓂᖏ ᐊᑯᓂᐅᙱᑦᑑᒐᓗᐊᖅ ᐊᒻᒪᓗ ᑭᖑᓂᐊᒍ ᑎᑭᓴᐅᔪᓐᓇᕐᓯᕙᒃᖢᑎᒃ.

ᑯᓕᒃᑖᓇ ᐅᖃᓚᐅᕐᑐᖅ ᐊᔾᔨᒌᙱᑦᑐᓂᒃ ᓂᕆᐅᒋᔭᖃᕐᓯᒪᓂᖓᓂᒃ ᐃᒥᐊᓗᓕᕆᔨᒃᑯᑦ ᑲᑎᒪᔨᖏᓐᓄᑦ.

“ᐃᓱᒪᓚᐅᕋᒪ ᐃᓕᓐᓂᐊᕐᓂᖅᑕᖃᕐᓂᕐᓴᐅᓇᔭᕆᐊᒃᓴᖓᓂᒃ, ᑭᓯᐊᓂᓕ ᐱᑕᖃᙱᑦᑐᖅ,” ᐅᖃᖅᑐᖅ.

ᑖᓐᓇ ᒪᐃᔭ ᐃᓄᑑᓚᐅᙱᑦᑐᖅ ᐃᓕᓐᓂᐊᖅᑐᓕᕆᓂᕐᒥᒃ ᐃᓱᒫᓘᑎᓕᖕᒥ ᐅᕙᓂ ᑭᖑᓪᓕᖅᐹᕆᓕᕐᑕᖓᓂ ᐅᑯᐊ ᓄᓇᕗᒥᑦ ᓄᓇᓕᖕᓄᑦ ᑲᑐᔾᔨᖃᑎᒌᑦ ᐊᕐᕌᒍᒧᑦ ᑲᑎᒪᕕᒡᔪᐊᖅᑎᓪᓗᒋᑦ ᓄᕕᐱᕆ 10-ᒥᑦ.

ᐊᐱᕐᓱᑲᑕᒃᑎᓪᓗᒋ ᐊᒻᒪ ᑭᐅᔭᐅᑲᑕᒃᖢᑎᒃ ᐅᑯᓂᖓ ᑮᓇᐅᔭᓕᕆᔨᒃᑯᓐᓂᒃ, ᓄᓇᓕᖕᓂ ᓯᕗᓕᐅᕐᑎᐅᔪᑦ ᐅᖃᓚᐅᕐᑐᑦ ᐃᓕᓐᓂᐊᖅᑐᓕᕆᓂᖅ ᐃᒥᐊᓗᓕᕆᔨᒃᑯᑎᒍ ᐱᑕᖃᙱᓐᓂᕋᖅᑕᐅᓪᓗᓂ ᐊᑎᕆᖃᓯᐅᑎᒐᓗᐊᖅᑎᓪᓗᓂᐅᒃ ᖃᓪᓗᓈᑐᑦ.

ᔪ-ᐋᓐ ᕚᑭᓄ, ᑮᓇᐅᔭᓕᕆᔨᒃᑯᓐᓄᑦ ᐃᖅᑲᓇᐃᔭᕐᕕᖕᓄᑦ ᐊᑐᐊᒐᓂᒃ ᑐᑭᒧᐊᖅᑎᑦᑎᔨ, ᐊᖏᓚᐅᕐᒥᔪᖅ ᑲᑎᒪᔩᑦ ᐊᑎᖏᑦ ᑕᒻᒪᕐᓯᒪᓂᖏᓐᓂᒃ.

ᑐᑭᓯᒋᐊᖅᑎᑦᑎᓚᐅᕐᑐᖅ ᐃᒥᐊᓗᖕᒧᑦ ᒪᓕᒐᐃᑦ ᐅᖃᕐᓯᒪᖕᒪᑕ ᐃᒥᐊᓗᖕᒥ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᐅᔪᑦ ᑲᒪᒋᔭᖃᖃᑦᑕᕐᓗᑎᒃ ᐃᒥᐊᓗᒃᑖᕈᒪᔾᔪᑎᓂᒃ ᓄᓇᓕᖕᓄᐊᕐᓂᐊᖅᑐᓂᒃ ᐊᒻᒪᓗ ᐃᓕᓐᓂᐊᖅᑎᑦᑎᔭᕆᐊᖃᖅᖢᑎᒃ, ᑭᓯᐊᓂᓕ ᑕᒪᓐᓇ ᐊᑐᕆᐊᖃᓪᓚᕆᙱᖢᓂ.

ᐊᑐᖅᑕᐅᕙᒃᑐᒃᑯᓪᓕ, ᐅᖃᓚᐅᕐᑐᖅ ᑲᑎᒪᔩᑦ ᐃᓕᓐᓂᐊᖅᑎᑦᑎᔪᓐᓇᙱᓐᓂᖏᓐᓂᒃ ᐃᒥᐊᓗᖕᒥ ᐊᑐᕐᓂᕐᒧᑦ ᓲᖃᐃᒻᒪ ᑲᑎᒪᔩᑦ ᐃᓕᓐᓂᐊᖅᑎᐅᙱᒻᒪᑕ.

ᕚᑭᓄ ᐅᖃᓚᐅᕐᑐᖅ ᑲᑎᒪᔨᐅᖃᑕᐅᓪᓗᓂ ᐊᔪᕐᓇᖃᑦᑕᕐᓂᖓᓂᒃ ᐄᓕ ᐃᒻᒥᒨᖓᔪᓄᑦ.

“ᐃᓱᒪᓕᐅᕆᖃᑦᑕᕐᒪ ᐱᖃᓐᓇᕆᔭᖏᓐᓄᑦ ᐃᓚᖏᓐᓄᑦ ᐊᒻᒪ ᓄᓇᖃᖃᑕᐅᔪᓂᒃ ᐃᒥᐊᓗᒃᑖᕈᓐᓇᙱᑎᑕᐅᔪᓂᒃ ᐃᒥᐊᓗᒃᑖᕈᓐᓇᖅᑐᓂᒡᓗ,” ᐅᖃᖅᑐᖅ.

“ᖁᕕᐊᓇᕈᓐᓃᖃᑦᑕᕐᒪᑦ.”

ᒪᐃᔭᐅᔪᑦ 16-ᓂ ᓄᓇᕗᒥᑦ ᓄᓇᓕᖕᓂ ᑲᑎᓚᐅᕐᑐᖅ ᐊᖅᓴᕐᓃᑦ ᑐᔪᕐᒥᕕᒃᒥᑦ ᐃᖃᓗᖕᓂ ᐆᒧᖓ ᓄᓇᕗᒥᑦ ᓄᓇᓖᑦ ᑲᑐᔾᔨᖃᑎᒌᖏᓐ ᐅᓪᓗᓂ ᐱᖓᓱᓂ ᐊᕐᕌᒍᒧᑦ ᑲᑎᒪᑎᓪᓗᒋᑦ ᓄᕕᐱᕆ 8-ᒥᑦ 10-ᒧᑦ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)

ᐃᓱᒫᓘᑎᒋᔭᐅᖕᒥᔪᖅ ᑲᑎᒪᑎᓪᓗᒋᑦ ᐅᓇ ᖃᖓᑕᓲᖅ ᖃᖓᑕᖃᑦᑕᕐᓂᖓᓄ ᒫᓖᓐᓇᖃᑦᑕᙱᓐᓂᖏᓐᓄᑦ ᐃᒥᐊᓗᐃᑦ ᑎᑭᓴᖅᑕᐅᔪᑦ ᐊᑕᐅᑦᑎᒃᑯᐊᓗᒃ ᑎᑭᓕᖃᑦᑕᕐᒥᖕᒪᑕ, ᐃᒻᒪᖄᓪᓘᓐᓃᑦ ᐅᓄᕐᓂᕐᓴᐅᓕᖅᖢᑎ ᐱᑕᖃᖃᑦᑕᕈᓐᓇᕐᓂᖏᓐᓂᒃ ᐊᑕᐅᑦᑎᒃᑯᑦ.

ᐃᖃᓗᒃᑑᑦᑎᐊᓂ ᒪᐃᔭ ᐊᖑᓚᓕᒃ ᐲᑐᓴᓐ ᐊᐱᕆᓚᐅᕐᓯᒪᔪᖅ ᐊᔪᕐᓇᕋᔭᙱᒪᖔᑦ ᐅᓄᕈᓐᓃᖅᑎᑕᐅᔪᓐᓇᕐᒪᖔᑦ ᐅᓪᓗᐃᑦ 14 ᑐᖔᓂ ᖃᐅᔨᒪᑎᑦᑎᔭᕆᐊᖃᕐᓂᖅ ᓄᓇᖃᖅᑐᓂᒃ ᐱᓇᓱᐊᕈᓰᖕᓂ ᒪᕐᕉᖕᓂ ᐃᒥᐊᓗᖃᖅᑎᑦᑎᑦᑕᐃᓕᓂᐊᕐᓗᑎᒃ — ᑕᐃᒪᓐᓇ ᐱᔪᓐᓇᖅᑎᑕᐅᖃᑦᑕᕐᓂᕐᖏᓐᓄᑦ ᐱᖓᓱᖅᖢᑎᒃ ᐊᕐᕌᒎᑉ ᐃᓗᐊᓂ.

“ᐅᓇ ᐅᓪᓗᓂ 14-ᓂ ᖃᐅᔨᒪᑎᑦᑎᕙᒌᖅᑎᑦᑎᓂᖅ ᖃᓄᐃᓕᐅᕈᑎᐅᓇᓱᒃᑐᒧᑦ ᓱᕙᓕᑭᐊᖑᖕᒪᑦ ᓲᖃᐃᒻᒪ ᐱᑖᑲᑕᒡᔫᒥᓕᖅᖢᑎ ᓂᐅᕕᐊᒃᓴᖃᓕᖅᐸᒃᖢᑎᒃ ᐃᒥᐊᓗᒃᑖᕐᓇᐅᙱᑎᑕᐅᔪᒥᒃ,” ᐲᑐᓴᓐ ᐅᖃᖅᑐᖅ.

ᕚᑭᓄ ᐅᖃᓚᐅᕐᑐᖅ ᐃᓱᒫᓘᑎᒋᔭᐅᔪᖅ ᐃᓱᒪᒋᔭᐅᓂᐊᕐᓂᖓᓂᒃ, ᑭᓯᐊᓂᓕ ᐅᓇ ᐅᓪᓗᓂ 14ᓂ ᑐᖔᒍᑦ ᖃᐅᔨᒪᑎᑦᑎᓂᖅᑕᖃᙱᑉᐸᑦ ᑕᐃᒪᓕ ᐃᒥᐊᓗᖕᒥ ᑎᑭᓴᐃᑲᑕᖔᓕᕋᔭᕐᒪᑕ, ᐊᒻᒪᓗ ᓱᕋᐃᒍᑎᐅᖕᒥᓗᓂ ᑖᓐᓇ ᓄᖃᖓᑎᑦᑎᓂᖅ ᖃᓂᒃᑐᒃᑰᖓᑎᑕᐅᓗᐊᖅᐸᑦ.

ᕚᑭᓄ ᐅᖃᓚᐅᕐᑐᖅ ᑖᒃᑯᓄᖓ ᐊᓯᙳᖅᑎᑦᑎᓂᐊᕆᐊᒃᓴᖅ ᓇᓗᓂᕋᖅᖢᓂ ᓲᖃᐃᒻᒪ ᓄᓇᕗᒥᑦ ᒐᕙᒪᒃᑯᑦ ᑲᒪᔨᐅᓇᓱᑐᐃᓐᓇᕐᒪᑕ ᑭᓯᐊᓂ ᑭᖑᓪᓖᑦ ᒐᕙᒪᒃᓴᐃᑦ ᓂᕈᐊᖅᑕᐅᒃᐸᑕ ᐊᒻᒪᓗ ᑮᓇᐃᔭᓕᕆᔨᒃᑯᑦ ᓄᑖᒥᒃ ᒥᓂᔅᑕᖃᓕᕈᓂ.

ᖁᒡᓗᖅᑑᖅᒧᓪᓕ, ᐅᓇ ᑐᑭᖃᖅᑐᖅ ᓂᕈᐊᖅᑎᑦᑎᔪᒪᓂᖓ ᐋᖏᖅᑕᐅᔾᔮᙱᑲᓚᐅᕐᓂᖓᓂᒃ ᑭᓯᐊᓂ ᖃᓂᓛᒃᑯᑦ ᓄᕕᐱᕆᐅᑉ ᓄᙳᐊᓂ.

ᕚᑭᓄ ᐃᓱᒪᔪᖅ ᓂᕈᐊᕈᓐᓇᓛᕆᐊᒃᓴᖏᓐᓂᒃ ᔭᓄᐊᕆᒥ ᐅᕝᕙᓘᓐᓃ ᕕᕝᕗᐊᕆᒥ ᐊᖏᖅᑕᐅᒃᐸᑦ.

ᒪᑯᓄᖓᓕ ᐊᑐᕈᔭᐅᙱᔾᔪᑎᓄᑦ ᐊᓯᙳᖅᑎᑦᑎᓇᓱᖕᓂᒃᑯᑦ, 60ᓂ ᓂᕈᐊᖅᑐᖃᕆᐊᖃᖅᑐᖅ ᐅᕘᓇ ᓂᕈᐊᖅᑐᓕᕆᔨᒃᑯᑦ ᓄᓇᕗᒥᑦ.

ᑭᖑᓪᓕᖅᐹᕐᒥ ᓂᕈᐊᖅᑎᓪᓗᒋᑦ ᖁᒡᓗᖅᑑᕐᒥ, 60.1 ᐳᓴᓐᑎᖏ ᓂᕈᐊᕈᓐᓇᖅᑐᑦ ᓄᖃᖓᔾᔪᑎᖃᙱᓐᓂᕐᓴᐅᔪᒪᓪᓗᑎᒃ.