ᓄᓇᕗᒥᑦ ᓄᑖᖅ ᐃᓕᓐᓂᐊᕐᓂᕐᒧᑦ ᐅᖃᐅᓯᖅ ᐱᖁᔭᖅᔪᐊᖅ ᓴᕿᑎᑦᑎᓯᒪᙱᑦᑐᖅ ᐃᓄᐃᑦ ᐱᔭᕆᐊᖃᖅᑕᖏᓐᓂᒃ: ᓄᓇᕗᑦ ᑐᙵᕕᒃ

ᓄᓇᕗᑦ ᑐᙵᕕᒃᑯᑦ ᐅᖃᖅᑐᑦ ᓄᓇᕗᑦ ᒐᕙᒪᒃᑯᑦ ᐸᕐᓇᐅᑎᒋᓚᐅᕐᑕᖏᑦ ᐋᕿᒃᓯᒋᐊᕈᑎᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᕐᔪᐊᕐᒥᑦ ᐊᒻᒪᓗ ᐃᓄᐃᑦ ᐅᖃᐅᓯᖏᓐᓂᒃ ᓴᐳᔾᔨᓯᒪᓂᕐᒧᑦ ᐱᖁᔭᖅᔪᐊᖅ ᑐᙵᐅᑦᑎᓯᒪᓂᕋᖅᖢᒍ ᐃᓄᐃᑦ ᐱᔪᒪᓚᐅᖅᑕᖏᓐᓂᒃ.

ᐱᖁᔭᖅᔪᐊᖅ 25, “ᐱᖁᔭᖅᔪᐊᖅ ᐋᕿᒋᐊᖅᑎᑦᑎᓂᕐᒥᒃ ᐃᓕᓐᓂᐊᕐᓂᓕᕆᓂᕐᒥᒃ ᐱᖁᔭᕐᔪᐊᕐᒥᒃ ᐊᒻᒪᓗ ᐃᓄᐃᑦ ᐅᖃᐅᓯᖏᓐᓂᒃ ᓴᐳᔾᔨᓯᒪᓂᕐᒧᑦ ᐱᖁᔭᕐᔪᐊᕐᒥᒃ,” ᓴᕿᑕᐅᓚᐅᕐᑐᖅ ᓄᓇᕗᑦ ᒪᓕᒐᓕᕆᕕᒡᔪᓂᒃ ᔫᓂ 5-ᖑᑎᓪᓗᒍ.

ᓄᓇᕗᑦ ᒐᕙᒪᒃᑯᑦ ᐊᑑᑎᓕᒃᑯᑦ ᐱᓕᕆᖃᑎᖃᓚᐅᙱᒻᒪᑕ ᓄᓇᕗᑦ ᑐᙵᕕᒃᑯᓐᓂᒃ ᐋᕿᒃᓱᐃᕙᓪᓕᐊᑎᓪᓗᒋᑦ ᑖᒃᑯᓂᖓ ᓄᑖᓂᒃ ᐋᕿᒋᐊᕈᑎᒃᓴᓂᒃ, ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᑐᑦ, ᑕᐃᒪᐃᓐᓂᖓᓄᓪᓗ ᐃᓄᐃᑦ ᐱᔪᒪᔭᖏᓐᓂᒃ ᓴᕿᔮᖅᑐᖃᙱᖢᓂ.

ᑖᓐᓇ ᒪᓕᒐᖅ ᓴᕿᑎᑦᑎᓯᒪᒐᓗᐊᖅᖢᓂ “ᒪᕐᕈᓪᓗᐊᖕᓂᒃ ᐱᐅᓯᕚᓪᓕᕈᑎᐅᓇᔭᖅᑐᓂᒃ” ᐅᕘᓇ ᑭᖑᓪᓕᖅᐹᒥᒃ ᓄᓇᕗᑦ ᒐᕙᒪᒃᑯᑦ ᐋᕿᒋᐊᖅᑎᑦᑎᓇᓱᒃᓯᒪᔭᖏᓐᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖅᔪᐊᕐᒥᑦ—ᑲᑕᒃᓯᒪᔪᖅ ᐱᖁᔭᖅᔪᐊᖅ 37—“ᐱᐅᓯᕚᓪᓕᕈᑎᒻᒪᕆᐅᙱᒻᒪᑦ,” ᓄᓇᕗᑦ ᑐᙵᕕᒃᑯᑦ ᐅᖃᓚᐅᕐᑐᑦ ᔫᓂ 5-ᒥᑦ ᑐᓴᒐᒃᓴᖏᓐᓂᒃ.

ᐱᖁᔭᖅᔪᐊᖅ 37, ᑖᓐᓇ ᓴᕿᑕᐅᓚᐅᕐᓯᒪᔪᖅ ᑭᓪᓕᕐᓂᒃ ᓄᓇᕗᑦ ᒐᕙᒪᒋᓚᐅᕐᑕᖏᓐᓂᒃ, ᑭᖑᕙᕆᐊᖅᑎᑦᑎᓯᒪᓇᔭᓚᐅᕐᒪᑦ ᐊᑐᓕᖅᑎᑦᑎᓂᕐᒥᒃ ᐃᓄᒃᑐᑦ ᐃᓕᓐᓂᐊᖅᑎᑦᑎᒍᑎᒃᓴᓂᒃ ᒍᕇᑦ 4-ᒥᑦ ᒍᕇᑦ 9-ᒧ ᐋᕿᒃᑕᐅᓯᒪᓂᕆᓚᐅᕐᑕᖓᓂᒃ ᐃᓱᖃᕐᕕᐊᓂᒃ 2020-ᒥ 2030-ᒧ.

ᑖᓐᓇ ᓄᑖᖅ ᑐᒃᓯᕋᐅᑎᐅᓕᕐᑐᖅ ᐱᖁᔭᖅᔪᐊᖅ 25 ᑭᖑᕙᕆᐊᖅᑎᑦᑎᓇᔭᕐᒪᑦ ᐊᑐᓕᖅᑎᑦᑎᓂᕐᒥᒃ ᐃᓄᒃᑯᑦ ᐅᖓᓯᒃᑲᓐᓂᕐᑐᒥᓐ, 2039 ᑎᑭᓪᓗᒍ, ᐃᓱᒪᒋᓪᓗᒍ ᐃᓕᓴᐃᔨᑕᖃᙱᓗᐊᕐᓂᖓ ᐊᒻᒪᓗ ᐃᓕᓐᓂᐊᕈᑎᒃᓴᖃᐅᙱᓗᐊᕐᓂᖓ.

“ᓄᓇᕗᑦ ᒐᕙᒪᒃᑯᑦ ᐸᓯᔭᒃᓴᐅᔭᕆᐊᖃᖅᑐᑦ ᑲᑕᖕᓂᑰᓂᖓᓂᒃ ᐱᖁᔭᖅᔪᐊᖅ 25-ᒧ ᐅᖃᐅᓯᖃᕐᓯᒪᙱᓐᓂᖏᓐᓂᒃ ᓄᓇᕗᑦ ᑐᙵᕕᒃᑯᑦ ᑐᒃᓯᕋᐅᑎᕕᓂᖏᓐᓂᒃ ᑭᒡᒐᖅᑐᐃᓂᒃᑯᑦ ᓄᓇᕗᑦ ᐃᓄᖏᓐᓂᒃ ᐊᑑᑎᖃᖅᑐᒃᑯᑦ,” ᐅᖃᖅᑐᖅ ᓄᓇᕗᑦ ᑐᙵᕕᒃ ᐊᖓᔪᖅᑳᖓ ᐊᓗᑭ ᑰᑦᑎᖅ ᑐᓴᒐᒃᓴᓕᐊᑎᒍᑦ.

“ᐅᕘᓇᓕ ᐊᑐᒐᒃᓴᓕᐊᑎᒍᑦ, ᓱᕈᓯᖅ ᐃᓅᔪᖅ ᐅᓪᓗᒥ—20-ᖑᓛᕐᓗᓂ 2039-ᒥ—ᐃᓕᓐᓂᐊᕋᔭᙱᑦᑐᖅ ᐃᓄᒃᑐᑦ ᒍᕇᑦ 9-ᒥ 12-ᒧ.”

ᑕᐃᒪᙵᓪᓕ ᓄᓇᕗᑦ ᒐᕙᒪᒃᑯᑦ ᐱᓕᕆᐊᖃᖅᐸᓪᓕᐊᓕᖅᑎᓪᓗᒋᑦ ᐋᕿᒋᐊᕈᑎᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᐊᒻᒪ ᐅᖃᐅᓯᕐᒧᑦ ᒪᓕᒐᕐᒥᒃ, ᓄᓇᕗᑦ ᑐᙵᕕᒃᑯᑦ ᐱᖁᔨᓯᒪᓯᒪᔪᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᐸᕐᓇᐅᑎᒃᓴᓂᒃ ᐃᓕᓐᓂᐊᖅᑎᓄᑦ, ᑖᓐᓇᓗ ᐃᖅᑲᓇᐃᔭᓯᓐᓈᖅ ᐃᓕᓐᓂᐊᖅᑎᑦᑎᓂᐅᓇᔭᖅᖢᑎᒃ ᐃᓄᒃᑐᑦ ᐅᖃᕈᓐᓇᖅᑐᓄᑦ ᐃᓕᓴᐃᔨᓄᑦ.

ᓄᓇᕗᑦ ᑐᙵᕕᒃᑯᑦ ᐅᖃᕐᑐᑦ ᐃᓄᐃᑦ ᑕᑯᔪᒪᓂᕋᖅᖢᒋᑦ ᐃᓄᒃᑐᑦ ᐃᓕᓐᓂᐊᕈᑎᐅᕙᒡᓗᓂ ᐸᐃᕆᕝᕕᒃᓂᒃ ᐊᒻᒪ ᐃᓕᓐᓂᐊᕐᕕᖕᓂᒃ ᐊᒻᒪ ᖁᕝᕙᓯᖕᓂᕐᓴᓂᒃ ᐃᓕᓐᓂᐊᕐᕕᖕᓂᒃ ᓄᓇᕗᒥᑦ, ᐃᓚᖃᕐᓗᒍ ᑕᐅᑐᖕᓂᕐᓴᐅᓯᒪᓗᓂ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ.

ᓄᓇᕗᑦ ᑲᑐᔾᔨᖃᑎᒌᖓ ᓈᒻᒪᒃᓴᓚᐅᙱᒻᒥᔪᑦ ᓄᑖᒥᑦ ᒪᓕᒐᙳᖅᑐᒥ ᐆᒥᖓ ᒥᒃᖠᕚᓪᓕᖅᑎᑦᑎᓂᕐᒥᒃ ᐃᓕᓐᓂᐊᖅᑐᓕᕆᔨᐅᔪᑦ ᓄᓇᕗᒥᑦ.

ᑰᑦᑎᖅ ᐅᖃᓚᐅᕐᑐᖅ ᓄᓇᕗᑦ ᑐᙵᕕᒃᑯ ᑕᑯᓚᐅᕐᓂᕋᖅᖢᓂᒋᑦ ᑭᖑᓕᖅᐹᕆᔭᐅᔪᒥ ᐋᕿᒋᐊᖅᑕᐅᔪᒥ ᓴᕿᑕᐅᑎᓪᓗᒍ ᑭᓯᐊᓂ.

“ᓄᓇᕗᒥ ᐃᓄᐃᑦ ᓱᖅᑯᐃᓇᑦᑎᐊᕆᐊᖃᕐᒪᑕ ᓂᕆᐅᒋᔭᖏᑦᑎᒍᑦ ᐅᕘᓇ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖅᔪᐊᕐᒥ,” ᐅᖃᖅᑐᖅ.

“ᐊᕐᕌᒍᒐᓴᖕᓂ ᐃᑲᔫᑎᐅᔪᓐᓇᖅᑐᓂᒃ ᑐᓂᔭᐅᓯᒪᓪᓗᑎᒃ ᓄᓇᕗᑦ ᑐᙵᕕᒃᑯᓐᓂᒃ ᐊᒻᒪ ᐊᓯᖏᓐᓂᒃ ᓄᓇᕗᒻᒥᐅᓂᒃ, ᓄᓇᕗᑦ ᒐᕙᒪᒃᑯᑦ ᓱᓕ ᒪᓂᒻᒪᐃᑐᐃᓐᓇᖅᑰᔨᔪᑦ ᐊᔾᔨᑐᐃᓐᓇᖏᓐᓂᒃ ᐋᕿᒃᓯᒪᒃᑲᓐᓂᑐᐃᓐᓇᖅᑐᓂᒃ ᐋᕿᒋᐊᕈᑎᓂᒃ.”

ᖃᖓᑦᑎᐊᓵᖅ ᐅᓂᒃᑳᓕᐊᕆᔭᐅᔪᑦ ᓄᓇᕗᑦ ᑐᙵᕕᒃᑯᓐᓂᒃ ᐅᖃᕐᓯᒪᒻᒪᕆᓚᐅᕐᑐᑦ ᐅᑯᐊ ᓄᓇᕗᑦ ᐃᓕᓐᓂᐊᖅᑐᓕᕆᓂᖓ, ᐊᒻᒪ ᐃᓄᒃᑐᑦ ᐅᖃᐅᓯᖃᑐᓂᒃ ᐃᓕᓐᓂᐊᕈᑎᖃᙱᓗᐊᕐᓂᖓ, ᐃᒪᐃᑐᐃᓐᓇᕆᐊᖃᕐᓂᖓᓂᒃ “ᓈᒻᒪᙱᓕᐅᕈᑎᒻᒪᕆᐅᓂᖓᓂ” ᐊᒻᒪᓗ “ᐃᓚᖓᒍᑦ ᐃᓕᖁᓯᑐᖃᕐᒥᑦ ᐊᓯᐅᑎᑦᑎᓯᒪᓂᕐᒥᒃ.”

ᐅᑯᑎᒎᓇᕐᓕ, ᓄᓇᕗᑦ ᒐᕙᒪᒃᑯᑦ ᐅᖃᓚᐅᕐᑐᑦ ᑭᖑᓕᖅᐹᑦ ᐋᕿᒋᐊᕈᑎᐅᔪᑦ ᑐᙵᕕᖃᓚᐅᕐᓂᖏᓐᓂᒃ ᐅᖃᓪᓚᖃᑎᖃᖃᑦᑕᕐᓂᕐᒥᒃ ᐅᓄᒻᒪᕆᒃᑐᓂᒃ ᓄᓇᕗᒥᐅᓂᒃ, ᐅᑯᐊ ᐃᓚᐅᓪᓗᑎᒃ, ᓄᓇᕗᑦ ᑐᙵᕕᒃᑯᑦ, ᐃᓕᓐᓂᐊᖅᑐᓕᕆᔨᒃᑯᑦ ᓄᓇᕗᒥᑦ ᑲᑐᔾᔨᖃᑎᒌᑦ, ᓄᓇᕗᒥᑦ ᐃᓕᓴᐃᔩᑦ ᑲᑐᔾᔨᖃᑎᒌᖏᑦ, ᐅᖃᐅᓯᕐᓄᑦ ᑲᒥᓯᓇᐅᑉ ᑎᑎᕋᕐᕕᖓᓂᒃ ᐊᒻᒪᓗ ᑎᓴᒪᓂᒃ ᐊᕕᒃᑐᕐᓯᒪᔪᓂᒃ ᐃᓕᓐᓂᐊᖅᑎᓄᑦ ᐱᓕᕆᖃᑎᒌᓂᒃ.

ᐱᖁᔭᖅᔪᐊᖅ 25 ᐊᐃᑉᐸᖓᓂᒃ ᐅᖃᓕᒫᖅᑕᐅᓚᐅᕐᑐᖅ ᒪᓕᒐᓕᕆᕕᒡᔪᐊᕐᒥᒃ ᐱᖓᑦᓯᕐᒥᑦ, ᔫᓂ 5, ᑲᑎᒪᔨᕋᓛᓅᖅᑕᐅᓚᐅᖅᑎᓐᓇᒍ ᒪᓕᒐᓕᕆᔨᓄᑦ.

ᒪᓕᒐᓕᕆᕕᒡᔪᐊᖅ ᐃᓱᓕᑎᓪᓗᒍ ᐅᐱᕐᙶᖅᒥ ᕿᑲᕐᓇᒧᑦ ᑎᓴᒻᒥᖅ, ᔫᓂ 6-ᒥ, ᐅᖃᐅᓯᖃᒃᑲᓐᓂᕐᓂᐊᖅᑐᑦ ᐅᑭᐊᒃᓵᖅ ᒪᓕᒐᓕᕆᔨᒃᑯᑦ ᑲᑎᒪᔨᕋᓛᖏᑦ, ᑕᒪᓐᓇᓗ ᐱᒋᐊᕋᔭᖅᖢᓂ ᐅᒃᑑᐱᕆ 17-ᒥᑦ