ᓄᓇᕗᒧᑦ ᒪᓕᒐᓕᐅᕐᑎᐅᓚᐅᕐᑐᖅ ᐲᑕ ᑲᑐᒃ ᐃᓅᔪᓐᓃᖅᐳᖅ ᐋᓐᓂᐊᑯᑖᒃᖢᓂ

ᑲᑐᒃ, 69, ᐃᓱᒪᒋᔭᐅᓯᒪᑦᑎᐊᖅᑐᖅ ᒪᓕᒐᓕᐅᕐᑎ, ᒪᐅᔭ ᐊᒻᒪ ᓄᓇᓕᖕᓄᑦ ᓯᕗᓕᐅᕐᑎ ᐊᖏᕐᕋᖓᓂᒃ, ᐃᓚᒋᔭᐅᓕᓚᐅᕐᓯᒪᕗᖅ ᓄᓇᕗᑦ ᐱᒋᐊᓕᓵᖅᑎᓪᓗᒍ ᕕᕝᕗᐊᕆ 15, 1999-ᒥ, ᓂᕈᐊᕈᓐᓇᖅᑐᑦ ᑕᓯᐅᔭᕐᔪᐊᕐᒥᑦ ᓂᕈᐊᖅᑎᓪᓗᒋᑦ ᑖᔅᓱᒥᖓ ᓯᕗᓪᓕᖅᐹᒥᑦ ᓄᓇᕗᑦ ᒪᓕᒐᓕᐅᕐᕕᒋᓂᐊᖅᑕᖓᓂᑦ ᐊᒻᒪᓗ ᑖᒃᑯᐊ ᓯᕗᓪᓕᖅᐹᒥᑦ ᑲᑎᒪᓕᓚᐅᕐᓯᒪᓪᓗᑎᒃ ᐃᐱᕈᓪ 1-ᒥᑦ ᑕᕝᕙᓂᑦᑕᐃᓐᓇᖅ ᐅᑭᐅᕐᒥ.

ᐲᑕ ᑲᑑᓚᐅᕐᑐᖅ (ᓴᐅᒥᐊᓂᒃ) ᐱᖃᑎᖃᖅᖢᓂ ᓄᓇᕗᑦ ᑲᒥᓯᓇᕆᓚᐅᕐᓯᒪᔭᖓᓂᒃ ᐲᑕ ᐃᕐᓂᖅ ᐄᐳᕈᓪ 12, 2000-ᖑᑎᓪᓗᒍ, ᑲᑐᒃ ᐊᖏᖅᑎᑕᐅᑎᓪᓗᒍ ᓄᓇᕗᒧᑦ ᒥᓂᔅᑕᐅᓂᕐᒧᑦ. (ᐊᔾᔨᙳᐊᖁᑎᒋᔭᐅᔪᖅ)

ᒪᓕᒐᓕᐅᕐᕕᒃ ᐱᒋᐊᓕᓵᖅᑎᓪᓗᒍ, ᑲᑐᒃ ᐃᓕᖁᓯᓕᕆᓂᕐᒧᑦ, ᐅᖃᐅᓯᕐᓄᑦ, ᐃᓐᓇᑐᖃᕐᓄᑦ ᐊᒻᒪ ᐃᓅᓱᒃᑐᓄᑦ ᒥᓂᔅᑕᙳᕐᑎᑕᐅᓚᐅᕐᓯᒪᔪᖅ ᐄᐳᕈᓪ 12, 2000-ᒥ ᐃᓇᖏᕐᓯᓪᓗᓂ ᒪᓕᒐᓕᐅᕐᑎ ᑖᓄᑦ ᕼᐊᕕᐅᔭᒃᒥᑦ, ᑖᓐᓇ ᓄᖃᓚᐅᕐᓯᒪᖕᒪᑦ ᐱᓕᕆᐊᒥᓂᒃ.

ᑎᓯᐱᕆ 17, 2001-ᒥᑦ, ᑲᑐᒃ ᐱᓕᕆᐊᒥᓂᒃ ᐊᓯᐊᓅᖅᑕᐅᓚᐅᕐᓯᒪᔪᖅ ᒥᓂᔅᑕᙳᖅᖢᓂ ᒐᕙᒪᓕᕆᔨᒃᑯᓐᓄᑦ ᐊᒻᒪ ᐱᔨᑦᑎᕋᐅᑎᒍᑎᓄᑦ, ᑖᔅᓱᒥᖓᓗ ᐱᓕᕆᐊᖃᖅᖢᓂ 2004 ᑎᑭᖢᒍ.

ᐊᒻᒪᓗ 2004-ᒥᑦ, ᓴᓂᑭᓗᐊᕐᒥᑦ ᓂᕈᐊᕈᓐᓇᖅᑐᑦ ᓂᕈᐊᒃᑲᓐᓂᓚᐅᕐᓯᒪᕗᑦ ᑲᑐᒃᒥᑦ ᑕᓯᐅᔭᕐᔪᐊᕐᒧᑦ, ᒪᓕᒐᓕᐅᖅᑎᐅᓪᓗᓂ 2008 ᑎᑭᖢᒍ.

“ᐲᑕ ᑭᒡᒐᖅᑐᐃᔨᐅᓚᐅᕐᑐᖅ ᑕᓯᐅᔭᕐᔪᐊᕐᒥ ᐊᕐᕌᒍᓂ 8-ᓂ ᒪᕐᕈᐃᖅᑕᐅᓪᓗᓂ ᓂᕈᐊᕐᑕᐅᓂᕐᒧᑦ ᐊᒻᒪ ᐃᓚᖏᑦ ᐃᓱᒪᒋᕙᒃᑲ,” ᓄᓇᕗᒧᑦ ᐅᖃᖅᑎ ᓯᒥᐅᓐ ᒥᒃᑯᙳᐊᒃ ᐅᖃᓚᐅᕐᑐᖅ ᑐᓴᒐᒃᓴᒃᑯᑦ.

ᐃᓅᓂᑰᓪᓗᓂ ᔫᓂ 2, 1950-ᒥ, ᑲᑐᒃ ᐊᕐᕋᒍᒐᓴᖕᓂ ᓴᓂᑭᓗᐊᕐᒥ ᐊᕙᑎᓕᕆᓂᕐᒥᒃ ᐱᓕᕆᐊᖃᓚᐅᕐᓯᒪᔪᖅ, ᒪᐃᔭᐅᓪᓗᓂᓗ ᐊᒻᒪ ᓄᓇᓕᖕᓄᑦ ᓯᕗᓕᐅᕐᑎᐅᓪᓗᓂ.

1990-ᖏᑦ ᐱᒋᐊᓕᓵᕐᓯᒪᑎᓪᓗᒋᑦ, ᐃᓚᒋᔭᐅᓚᐅᕐᓯᒪᔪᖅ ᓴᓂᑭᓗᐊᕐᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᓄᑦ, ᑖᒃᑯᐊ ᓄᓇᓕᖕᓂ ᑲᑎᕐᓱᐃᕙᒃᖢᑎᒃ ᖃᐅᔨᒪᔭᐅᔪᓂᒃ ᐊᒃᑐᐃᒍᑎᓂᒃ ᐊᖏᔪᒻᒪᕆᐊᓗᖕᒥᑦ ᐆᒻᒪᖁᑎᓕᕆᓂᕐᒧᑦ ᐃᒪᕐᒥᒃ ᐊᐅᓚᒍᑎᓂᒃ ᓴᓇᔭᐅᓂᑯᓂᒃ ᖃᓂᒋᔭᖓᓂ ᑯᐸᐃᒃ ᑕᕐᕋᖓᓂ ᑕᒪᓐᓇ ᐊᒃᑐᐃᓯᒪᓂᖓᓄᑦ ᓯᑯᕙᒃᑐᒥᑦ ᐊᒻᒪ ᑕᕆᐅᕐᒥᐅᑕᓂᒃ ᓴᓂᑭᓗᐊᑉ ᒥᒃᓵᓃᑦᑐᓂ ᕿᑭᖅᑕᓂᒃ.

ᑕᐃᒪᐃᓕᕐᓂᖓᑦ ᐅᓂᒃᑳᓕᐊᖑᓕᓚᐅᕐᓯᒪᔪᖅ ᑕᐃᔭᐅᔪᖅ “ᑕᓯᐅᔭᕐᔪᐊᒥᑦ ᓂᐲᑦ: ᐃᓕᖁᓯᒃᑯᑦ ᖃᐅᔨᒪᔭᐅᔪᑦ ᐃᓄᖕᓄᑦ ᐊᒻᒪ ᐊᓪᓚᓄᑦ ᑕᓯᐅᔭᕐᔪᐊᕐᒥᐅᑕᓂᒃ.”

ᒪᐃᔭᒋᔭᐅᓪᓗᓂ ᓴᓂᑭᓗᐊᕐᒧᑦ, ᑲᑐᒃ ᐅᖃᓪᓚᖃᑦᑕᓚᐅᕐᓯᒪᖕᒥᔪᖅ ᓈᒻᒪᒃᓴᙱᖢᓂ ᒫᓐᓇ ᐊᑐᕈᓐᓃᕐᑐᒥᑦ ᑰᔾᔪᐊᕌᐱᒃᒥᑦ ᐆᒻᒪᖁᑎᖃᕐᕕᖕᒧᑦ ᐃᒪᕐᒥᒃ ᓄᖃᖓᒍᑎᒃᓴᐅᓇᔭᖅᑐᒧᑦ ᑐᒃᓯᕋᐅᑎᓂᒃ.

ᑭᖑᓂᐊᒍᓪᓕ ᑲᑐᒃ ᐃᓚᒋᔭᐅᓚᐅᕐᓯᒪᔪᖅ ᓄᓇᕗᒥᑦ ᑕᓯᐅᔭᕐᔪᐊᕐᓗ ᐱᓕᕆᖃᑎᒌᓄᑦ, ᑕᐃᔭᐅᓯᒪᓂᑯ ᓄᓇᕗᒻᒥ ᑕᓯᐅᔭᕐᒧᐊᕐᒥᐅᙳᖃᑎᒌᑦ ᑲᑎᔾᔨᖃᑎᒌᖏᑦ.

ᑖᒃᑯᐊ ᑲᑐᔾᔨᖃᑎᒌᖑᔪᑦ, ᐋᖅᑭᒃᑕᐅᓂᑯᑦ ᓄᓇᕗᑦ ᒐᕙᒪᑯᓐᓄᑦ, ᓄᓇᕗᑦ ᓄᙵᕕᒃᑯᓐᓂᒃ ᐊᒻᒪᓗ ᕼᐋᒻᒪᓚᒃᑯᓐᓂᑦ ᓴᓂᑭᓗᐊᕐᒥᑦ, ᖃᐅᔨᓴᖅᑎᐅᓪᓗᑎᒃ ᖃᓄᐃᑉᐸᓪᓕᐊᓂᐅᔪᓂᒃ ᓴᓂᑭᓗᐊᑉ ᖃᓂᒋᔭᖏᓐᓂᒃ ᐆᒧᖓ ᐊᐃᑉᐸᖓᓂᒃ ᐆᒻᒪᖁᑎᓕᕆᓂᕐᒧᑦ ᐃᒪᕐᒥ ᓄᖃᖓᔾᔪᑎᐅᔪᒪᔪᒧᑦ ᑐᒃᓯᕋᐅᑎᓄᑦ, ᑖᓐᓇᑦᑕᐅᖅ ᓄᖃᖅᑎᑕᐅᓯᒪᑐᐃᓐᓇᖅᑐᖅ ᑕᐃᒪᙵᓂᑦ, ᐅᑯᐅ ᑰᖑᔪᑦ Eastmain ᐊᒻᒪ Rupert ᑰᖕᓂᑦ.

ᐊᒻᒪᓗ 1996-ᒥ, ᑲᑐᒃ ᓄᓇᕗᒥᑦ ᐃᓚᓕᕆᔨᒃᑯᑦ ᑲᑎᒪᔨᓄᑦ ᐃᓚᒋᔭᐅᓚᐅᕐᓯᒪᓪᓗᓂ, ᑎᒥᐅᔪᖅ ᐋᕿᒃᑕᐅᓂᑯ 1993-ᒥᑦ ᓄᓇᕗᒥᑦ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ.

ᐲᑕ ᑲᑑᓚᐅᕐᑐᖅ ᐅᖃᓪᓚᒃᑐᖅ ᓄᓇᕗᑦ ᒪᓕᒐᓕᐅᕐᕕᖓᓂᒃ ᕕᕝᕗᐊᕆ 19, 2008-ᒥᑦ, ᐊᐃᑉᐸᖓᓂᒃ ᒪᓕᒐᓕᐅᕐᑎᐅᓂᖓ ᐃᓱᓕᓕᖅᑎᓪᓗᒍ ᑕᓯᐅᔭᕐᔪᐊᕐᒧᑦ. (ᐊᔾᔨᙳᐊᖁᑎᒋᔭᐅᔪᖅ)

ᑯᓄ ᑕᑦᑐᐃᓂ, ᐊᖓᔪᖅᑳᖅ ᐃᓚᒌᓴᒃᑯᓐᓄᑦ, ᐃᖃᐅᒪᔪᖅ ᑲᑐᒃ “ᖃᓄᐃᕈᓘᔭᖃᑦᑕᓚᐅᕐᑐᖅ,” ᑖᔅᓱᒥᖓᓗ ᑕᕆᐅᕐᒥᐅᑕᓂᒃ ᐱᔭᕆᐅᖅᑎᖢᓂᐅᒃ sea urchins ᓴᓂᑭᓗᐊᕐᒥᐅᑦ ᓂᕿᓐᓇᕆᔭᖓᓂᒃ.

ᐅᓇ ᐹᓪ ᐅᑲᓕᖅ, ᑕᐃᔅᓱᒪᓂ ᓄᓇᕗᒧᑦ ᓯᕗᓕᐅᕐᑎᐅᑎᓪᓗᒍ, ᑎᒃᑯᐊᕐᓯᓚᐅᕐᓯᒪᔪᖅ ᑲᑐᒃ ᒥᓂᔅᑕᐅᓂᐊᕐᓗᓂ ᐃᓕᖁᓯᓕᓂᕐᒥᑦ, ᐅᖃᐅᓯᕐᓄᑦ, ᐃᓐᓇᑐᖃᕐᓄᑦ ᐊᒻᒪ ᐃᓅᓱᒃᑐᓄᑦ ᐄᐳᕈᓪ 2000-ᒥ, ᐅᖃᖅᖢᓂ ᑲᑐᒃ ᓴᕿᑎᑦᑎᓚᐅᕐᓯᒪᓂᖓᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑖᓐᓇ ᑐᓴᐅᒪᓇᓗᐊᓚᐅᖅᑎᓐᓇᒍ.

“ᐲᑕ ᐃᓚᐅᓚᐅᕐᓯᒪᔪᖅ ᖃᐅᔨᓴᕐᓂᕐᒥᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᓯᕗᓂᑲᓪᓚᖓᒍᑦ ᑖᓐᓇ ᑐᓴᐅᒪᓇᓗᐊᖅᑎᓐᓇᒍ,” ᐅᑲᓕᖅ ᐅᖃᓚᐅᕐᓯᒪᔪᖅ ᑐᓴᒐᒃᓴᓕᐊᒃᑯᑦ ᐄᐳᕈᓪ 2000-ᒥᑦ.

ᐃᖅᑲᓇᐃᔮᓄᑦ ᒥᓂᔅᑕᐅᓚᐅᑯᖅᑎᓐᓇᒍᑦ 2001-ᒥᑦ, ᑲᑐᖅ ᑲᒪᒋᔭᖃᕆᐊᖃᓚᐅᕐᓯᒪᔪᖅ “ᒪᒪᙱᑦᑐᐊᓗᖕᒧᑦ” ᐃᒡᓚᕈᑎᕕᓂᐊᓗᖕᒥᑦ.

ᑕᐃᒪᐃᓚᐅᕐᓯᒪᔪᑦ ᐅᑭᐅᕐᑕᖅᑐᕐᒥ ᐃᖏᕐᕋᔾᔪᑎᓕᕆᔨᒃᑯᑦ ᐅᒥᐊᕐᔪᐊᒃᑯᑦ ᒑᓴᓖᓂ ᓄᓇᕗᒧᙵᐅᔾᔨᓪᓗᑎᒃ ᐊᒻᒪ ᓱᕋᐃᑎᑦᑎᓪᓗᒍ ᖃᒧᑕᐅᔭᐃᑦ ᐊᐅᓚᐅᑎᖏᓐᓂᒃ ᕿᑭᖅᑖᓗᒥᑦ ᐊᒻᒪ ᑭᕙᓪᓕᕐᒥᐅᓂᑦ.

ᑲᒪᒋᔭᖃᖅᑎᓪᓗᒍ,, ᑲᑐᒃ ᐊᓯᖔᖓᓂᒃ ᐱᓕᕆᐊᖃᓚᐅᕐᓯᒪᖕᒥᔪᖅ: ᓄᓇᕗᑦ ᒐᕙᒪᒃᑯᑦ ᐃᓱᒪᓕᐊᕆᔭᖓᓄᑦ NTCL-ᑯᓐᓂ ᐊᑐᕈᒪᙱᑎᓪᓗᒋ ᐊᒻᒪ ᐊᓯᐊᓄᖔᖅ ᑐᓂᓯᓪᓗᑎᒃ ᐅᕐᓱᐊᓗᒃᑖᖅᑎᑦᑎᔨᒃᓴᓂᒃ ᐅᑯᓂᖓ ᕗᑦᕗᐊᑦ ᐱᓕᕆᖃᑎᒌᑦ ᓛᐸᑐᐊᒥ.

ᓂᕈᐊᖅᑕᐅᒃᑲᓐᓂᕋᓱᓚᐅᕐᓯᒪᔪᖅ ᐅᒃᑑᐱᕆ 2017-ᒥ, ᑭᓯᐊᓂᓕ ᐱᖓᔪᒋᔭᐅᓚᐅᕐᓯᒪᔪᖅ ᐋᓚᓐ ᐅᕋᒻᐳᑦ ᑭᖑᓂᑦᑎᐊᖓᓂᒃ.

“ᐲᑕ ᐃᓱᒪᒋᔭᐅᑦᑎᐊᓚᐅᕐᑐᖅ ᐱᓇᓱᐊᒻᒪᕆᖕᓂᖓᓂᒃ ᐃᖅᑲᓇᐃᔮᓕᕆᓂᕐᒥᑦ ᐱᔨᑦᑎᕋᐅᑎᓂᒃ ᐊᒻᒪᓗ ᐊᕙᑎᓕᕆᓂᕐᒧᑦ ᐱᓇᓱᐊᖅᐸᒃᑕᖏᓐᓄᑦ,” ᒥᒃᑯᖑᐊᑦ ᐅᖃᓚᐅᕐᑐᖅ ᐅᖃᐅᓯᒃᓴᖏᑦᑎᒍᑦ.