ᓄᓇᕗᒧᑦ ᒪᓕᒐᓕᐅᖅᑎᐅᓕᖅᑐᑦ ᐃᓐᓇᑐᖃᕐᓂᒃ ᑲᒪᒋᔭᖃᕐᓂᕐᒥᒃ ᐱᐅᓯᕚᓪᓕᖅᑎᑦᑎᖁᔭᐅᕗᑦ
‘ᑕᐃᒪᑐᖅ ᒐᕙᒪᒃᑯᑦ ᑕᒪᑐᒥᖓ ᑐᐊᕕᕐᓇᖅᑎᓪᓗᒍ ᑲᒪᒋᔭᖃᑲᐅᖅᑐᕐᓕ,’ ᐅᖃᖅᑐᖅ ᐊᑎᓕᖅᑎᑦᑎᓂᕐᒧᑦ ᐱᓕᕆᔨᐅᔪᖅ ᒪᓃᑦᑐᖅ ᑖᒻᓴᓐ
ᓴᐅᒥᐊᓂ: ᓄᓇᕗᒧᑦ ᒪᓕᒐᓕᐅᖅᑎ ᓘᕆ ᐃᓪᓚᐅᖅ, ᓗᐊᐃᔭ ᐋᓐ ᑯᕌᕗᑦ, ᒪᓕᒐᓕᐅᖅᑎᐅᓚᐅᕐᑐᖅ ᒪᓃᑦᑐᖅ ᑖᒻᓴᓐ ᐊᒻᒪᓗ ᐃᓄᐃᑦ ᑕᑯᓐᓇᒐᒃᓴᓕᕆᔨᓄᑦ ᐃᒃᓯᕙᐅᑕᖅ ᐋᑕᒥ ᐃᑦᑐᐊᑦᓯᐊᒃ ᐅᖃᓪᓚᒃᑐᑦ ᐊᑎᓕᐅᖅᑎᑦᑎᑲᑕᒍᒪᓪᓗᑎᒃ ᐃᓐᓇᑐᖃᕐᓂ ᑲᒪᒋᔭᖃᑦᑎᐊᕐᓂᖅᓴᐅᖁᔨᔪᓂᒃ ᓄᕕᐱᕆ 18-ᒥ ᐃᖃᓗᖕᓂ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)
For an English version of this story, see Nunavut’s new MLAs face calls to improve elder care
ᐱᒋᐊᖅᑎᑦᑎᔨᐅᓚᐅᕐᑐᑦ ᐊᑎᓕᐅᖅᑎᑦᑎᑲᑕᖕᓂᕐᒥᒃ ᐃᓐᓇᑐᖃᕐᓂᒃ ᑲᒪᒋᔭᐅᑦᑎᐊᒃᑲᓐᓂᖁᔨᓂᕐᒧ ᓄᓇᕗᒥ ᐅᖃᓚᐅᕐᑐᑦ ᐅᑯᐊ ᓄᑖᑦ ᒪᓕᒐᓕᐅᕐᑎᐅᓕᖅᑐᑦ ᑕᒪᑐᒥᖓ ᓯᕗᓪᓕᐅᑎᑦᑎᔭᕆᐊᖃᕐᓂᖏᓐᓂᒃ ᐱᓕᕆᐊᖃᖅᐸᓪᓕᐊᓕᕐᑎᓪᓗᒋᑦ.
“ᐃᓱᒪᔪᖓᓕ ᐅᑯᐊ ᒐᕙᒪᒃᑯᑦ ᑕᒪᑐᒥᖓ ᑐᐊᕕᕐᓇᕐᓗᒍ ᐱᓕᕆᐊᖃᕐᓵᓕᓗᑎ,” ᒪᓃᑦᑐᖅ ᑖᒻᓴᓐ ᐅᖃᓚᐅᕐᑐᖅ ᓄᕕᐱᕆ 18-ᒥ ᑐᓴᒐᒃᓴᓕᐅᕐᓇᐅᑎᓪᓗᒍ.
ᑖᒻᓴᓐ, ᓄᓇᑦᓯᐊᕐᒧᑦ ᐊᒻᒪ ᓄᓇᕗᒧᑦ ᒪᓕᒐᓕᐅᖅᑎᐅᓂᑯ ᐊᒻᒪᓗ ᒥᓂᔅᑕᐅᓂᑰᓪᓗᓂ, ᐅᖃᓚᐅᕐᑐᖅ ᐃᓐᓇᑐᖃᓕᕆᔨᐅᓂᐊᖅᑐᓂᒃ ᑲᑎᒪᔨᕋᓛᓂ ᐋᖅᑭᒃᑕᐅᖁᔨᓪᓗᓂ ᑯᕕᐊᓱᒡᕕᙳᓚᐅᙱᓐᓂᖓᓂ ᒪᓕᒐᓕᕆᕝᕕᒃᒥ.
ᐊᑐᓂ ᒪᓕᒐᓕᐅᖅᑎ ᐊᑎᓕᐅᕐᑕᐅᓯᒪᔪᓂᒃ ᑐᓂᔭᐅᓚᐅᕐᑐᑦ ᑖᒃᑯᓄᖓ ᑭᒡᒐᖅᑐᖅᑕᐅᔪᓂᒃ. ᑖᔅᓱᒥᖓ ᐋᖅᑭᒃᓱᐃᔨᐅᔪᑦ ᑖᒃᑯᓂᖓ ᐱᓕᕆᐊᖃᖁᔨᖕᒪᑕ ᒪᓕᒐᓕᕆᕝᕕᖕᒥᑦ.
ᐅᓇ ᖃᓂᐅᓕᐅᖁᔨᔾᔪᑎ ᐃᒪᐃᓕᓯᒪᔪᖅ ᐃᓐᓇᑐᖃᕐᓄᑦ ᐃᒡᓗᑕᖃᖁᔨᓪᓗᑎᒃ ᑕᒪᐃᓐᓂᓕᒫᖅ ᓄᓇᕗᒥ ᓄᓇᓕᖕᓂ, ᐊᒻᒪᓗ ᖃᓄᐃᓕᐅᕈᑎᒃᓴᓂ ᐃᓐᓇᑐᖃᕐᓂ ᖃᓪᓗᓈᓃᑎᑕᐅᔪᓂᒃ ᑕᒪᐅᖓ ᓄᒃᑎᖅᑎᑕᐅᔾᔪᑎᐅᔪᓐᓇᖅᑐᓂᒃ ᐊᒻᒪᓗ ᐊᔪᕈᓐᓃᖅᓴᖅᑎᑦᑎᓂᕐᓴᐅᓗᑎᒃ ᐊᒻᒪ ᐃᓕᓐᓂᐊᖅᑎᑦᑎᓂᕐᓴᐅᓗᑎᒃ ᑕᒪᒃᑯᐊ ᐃᓐᓇᑐᖃᐃᑦ ᐋᓐᓂᐊᖅᑐᓕᕆᓂᒃᑯᑦ ᑲᒪᒋᔭᐅᔪᓐᓇᕐᓂᕐᓴᐅᓂᐊᕐᒪᑕ ᓄᓇᖏᓐᓂ.
“ᓄᓇᓖᑦ ᐊᕐᓵᖅᑕᐅᑐᐃᓐᓇᖃᑦᑕᕐᒪᑕ ᐃᓐᓇᑐᖃᖏᑦ ᐊᐅᓪᓚᖅᑎᑕᐅᔭᕌᖓᑕ,” ᐅᖃᖅᑐᖅ ᐋᓐ ᑯᕌᕗᑦ, ᐃᖃᓗᖕᓂ ᓗᐊᐃᔭ ᐃᑲᔪᓚᐅᕐᒥᔪᖅ ᑖᔅᓱᒥᖓ ᐱᓕᕆᐊᖃᖅᑐᓂᒃ.
ᐅᓇ ᐱᓕᕆᐊᖑᓕᕆᐊᓚᐅᕐᓯᒪᔪᖅ ᐱᓇᓱᐊᕈᓯᐅᒪᐅᕐᑐᓂᒃ 6ᓂ ᐊᓂᒍᖅᑐᓂ, ᐅᑯᐊ ᐸᐃᕆᔩᑦ ᑎᒍᒥᐊᖅᑎᒃᑯᑦ ᑲᑎᒪᔨᖏ, ᐊᐅᓚᑕᐅᔪᑦ ᐃᖃᓗᖕᓂ ᐃᓐᓇᑐᖃᕐᓄᑦ, ᐅᖃᐅᔾᔨᑎᓪᓗᒋᑦ ᑯᕌᕗᑦᒥ ᑕᒪᑐᒧᖓ “ᓈᒻᒪᙱᓕᐅᕈᑎᖃᓕᖁᔭᐅᓪᓗᓂ,” ᐅᖃᖅᑐᖅ.
ᑖᒃᑯᐊ ᐃᑲᔪᖅᑎᖃᓚᐅᕐᑐᑦ ᐊᑐᓂ ᓄᓇᓕᖕᓂᙶᖅᑐᓂᒃ ᐊᒻᒪᓗ ᐋᖅᑭᒃᓱᐃᓪᓗᑎᒃ ᑖᒃᑯᐊ ᐊᑎᓕᐅᖅᑎᑦᑎᑲᑕᕝᕕᒋᓂᐊᖅᑕᖏᓐᓂᒃ, ᑯᕌᕗᑦ ᐅᖃᖅᑐᖅ.
ᑖᒃᑯᐊ ᐊᑎᓕᐅᖅᑎᑦᑎᓯᒪᓕᕐᑐᑦ 22,704-ᓂ, 3,085 ᓄᓇᕗᒥᙶᖅᑐᑦ ᐊᑎᓕᐅᕐᓯᒪᔪᑦ, 19,000 ᐊᓯᐊᓂᙶᖅᑐᑦ ᑲᓇᑕᒥ ᐊᒻᒪᓗ 600 ᑕᕆᐅᑉ ᐊᑭᐊᓂ ᐊᑎᓕᐅᕐᓯᒪᓪᓗᑎᒃ.
ᑭᙵᓂ ᓂᕈᐊᕈᓐᓇᖅᑐᓂᒃ 59 ᐳᓴᓐᑎᖏᑦ ᐊᑎᓕᐅᓚᐅᕐᑐᑦ ᐊᒻᒪᓗ ᓄᓇᕗᒥᑦ ᕼᐋᒻᒪᓚᒃᑯᑦ ᑲᑐᔾᔨᖃᑎᒌᖏᑦ ᐱᖁᔨᕗᖔᕈᑎᒥᒃ ᐊᓂᒍᖅᑎᑦᑎᓚᐅᕐᒪᑕ ᐃᑲᔪᖅᑐᐃᔾᔪᑎᓂᒃ ᐊᑎᓕᐅᖅᑎᑦᑎᔾᔪᑎᐅᔪᒥ ᖃᖓᑦᑎᐊᓵᖅ ᑲᑎᒪᑎᓪᓗᒋᑦ.
“ᐅᓇ ᓇᓗᓇᐃᕐᓯᓯᒪᔪᖅ ᓄᓇᕗᒻᒥᐅᑦ ᐃᒃᐱᒍᓱᑦᑎᐊᕐᓂᖏᓐᓂᒃ — ᐃᓐᓇᑐᖃᖏᓐᓂ ᐅᑎᖅᑎᑕᐅᖁᔨᖕᒪᑕ,” ᐅᖃᓚᐅᕐᑐᖅ ᓘᕆ ᐃᓪᓚᐅᖅ ᑐᓴᒐᒃᓴᓕᐅᖅᑎᓪᓗᒋᑦ.
ᐃᓪᓚᐅᖅ ᐅᖃᓚᐅᕐᑐᖅ ᒐᕙᒪᑐᖃᒃᑯᑦ ᐅᖃᖅᑕᖏ ᓱᓕᒃᐸᑕ ᒪᑐᒥᖓ ᓱᓕᓂᖅ ᐊᒻᒪ ᐋᖅᑭᒋᐊᒃᑲᓐᓂᕐᓂᕐᒧᑦ, ᑕᐃᒪᓕ ᐃᑲᔪᕆᐊᖃᖅᑐᑦ ᖃᓄᖅ ᐃᓐᓇᑐᖃᕐᓂ ᐸᖅᑭᔪᓐᓇᕈᓐᓇᕐᓂᕐᒥᒃ.
ᐅᖃᓚᐅᕐᑐᖅ ᐃᖅᑲᓇᐃᔭᖅᑎᖏ ᖃᐅᔨᓇᓱᖁᓪᓗᓂᒋᑦ ᖃᓄᖅ ᐃᑲᔪᖅᑕᐅᔪᓐᓇᕋᔭᕐᒪᖔᑦ ᐋᑐᕚᒥ.
ᒫᓂ 43ᓂ ᓄᓇᕗᒥᐅᑕᓂ ᐃᓐᓇᑐᖃᕐᓂ ᐱᑕᖃᕐᒪ ᐅᕙᓃᑦᑐᓂᒃ ᐊᒻᐸᓯ ᕗᐃᐊᔅᑦ, ᑲᒪᒋᔭᖃᐃᓐᓇᕐᒥᒃ ᐋᑐᕚᒥ ᐊᒻᒪᓗ ᐊᑦᒪᓐᑕᓐᒥ, ᔭᓗᓇᐃᒥ, ᐅᐃᓂᐱᒡᒥ ᐊᒻᒪᓗ ᕗᐊᑦ ᓯᒥᑦᒥ.
ᓄᓇᕗᒥ ᒐᕙᒪᒃᑯ ᐸᕐᓇᒃᓯᒪᔪᑦ ᐃᓐᓇᑐᖃᒃᑯᕕᒃᓴᓂᒃ ᑲᖏᖅᖠᓂᖅᒥᒃ, ᐃᖃᓗᒃᑑᑦᑎᐊᓂᒃ ᐊᒻᒪᓗ ᐃᖃᓗᖕᓂ ᐊᕐᕌᒍᓂ ᐊᒡᒋᖅᑐᓂ ᐊᒻᒪᓗ ᒫᓐᓇ ᐱᖓᓱᓂ ᐃᓐᓇᑐᖃᕐᕕᖃᖅᖢᑎᒃ ᐃᖃᓗᒃᑑᑦᑎᐊᓂᒃ, ᐃᒡᓗᓕᒃᒥ ᐊᒻᒪ ᐅᖅᓱᖅᑑᖅᒥ.
ᖃᒪᓂᑦᑐᐊᕐᒦᑦᑐᖅ ᒪᑐᓯᒪᓕᕐᒪ ᐊᕐᕌᒍᓂ ᐱᖓᓱᓂᒃ ᐊᒻᒪᓗ ᐃᖃᓗᖕᓃᑦᑐᖅ ᒪᐃᒥ ᒪᑐᓚᐅᕐᓯᒪᓪᓗᓂ ᐊᒻᒪᓗ ᑕᒪᕐᒥ ᐃᓐᓇᑐᖃᐃᑦ ᑖᒃᑯᓇᓃᑦᑐᑦ ᐊᓯᐊᓄᐊᖅᑕᐅᓪᓗᑎᒃ ᒐᕙᒪᒃᑯᓐᓂᒃ ᐱᔾᔪᑎᖃᕐᓂᕋᐃᓪᓗᑎᒃ ᓄᕙᒡᔪᐊᕐᓇᖅ-19ᒧ ᓈᒻᒪᙱᓕᐅᕈᑎᖃᕐᓂᕋᐃᓪᓗᑎᒃ.
ᐊᐱᕆᔭᐅᑎᓪᓗᒍ ᖃᓄᐃᒻᒪ ᓯᕗᓪᓖᑦ ᒐᕙᒪᐅᓚᐅᕐᑐᑦ ᑲᒪᒋᔭᐅᑎᑦᑎᔪᓐᓇᓚᐅᙱᓐᓂᖏᓐᓂᒃ ᐃᓐᓇᑐᖃᕐᓂᒃ, ᑖᒻᓴᓐ ᐅᖃᓚᐅᕐᑐᖅ ᒐᕙᒪᒃᑯᑦ ᑐᙵᕕᖃᙱᓗᐊᕐᓂᕋᖅᖢᓂᒋᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐅᕝᕙᓘᓐᓃᑦ ᐃᓕᖅᑯᓯᒃᑯᑦ ᖃᐅᔨᒪᔭᐅᔪᑎᒍᑦ, ᐊᒻᒪᓗ ᑕᒪᓐᓇ ᓯᕗᓪᓕᐅᑎᔭᐅᒋᐊᖃᕐᓂᕋᖅᖢᓂᐅᒃ.
“ᑐᙵᕕᐅᑕᐅᔭᕆᐊᖃᕐᒪᑕ ᐃᓅᖃᑎᒌᖕᓂᕐᒧᑦ, ᐱᓗᐊᖅᑐᒥ ᐃᓄᐃᑦ ᐃᓕᖅᑯᓯᖏᑦᑎᒍᑦ,” ᐅᖃᖅᑐᖅ.
6-ᒋᔭᐅᓕᕐᑐᖅ ᒪᓕᒐᓕᕆᔩᑦ ᓯᕗᓪᓕᖅᐹᒥ ᑲᑎᒪᓚᐅᕐᓯᒪᔪᑦ ᓄᕕᐱᕆ 19-ᒥ.
(0) Comments