ᓄᓇᕗᒻᒥᐅᑦ ᐅᖃᖅᑐᑦ ᐅᕐᓱᐊᓗᒃᑖᕐᓂᖅ ᐅᓗᕆᐊᓇᙱᓐᓂᖓᓂ ᓄᕙᒡᔪᐊᕐᓇᖅ-19 ᐋᓐᓂᐊᕐᓇᖅᑕᖃᖅᑎᓪᓗᒍ
ᓄᓇᕗᑦ ᐅᕐᓱᐊᓗᒃ ᐊᑭᑭᓐᓂᖓᓂᒃ ᓂᐅᕕᑲᑕᒃᐳᑦ 2021 ᑎᑭᓪᓗᒍ
ᐅᒥᐊᕐᔪᐊᖅ ᐅᕐᓴᒃᓴᐅᑎ ᓄᓇᕗᒦᑦᑐ 2019 ᐊᐅᔭᖓᓂᒃ. ᓄᓇᕗᒥᑦ ᐅᕐᓱᐊᓗᓕᕆᔨᒃᑯᑦ ᑭᖑᕙᕋᔭᖅᑐᓂᒃ ᑕᐅᑐᙳᐊᙱᑦᑐᑦ ᐅᓇ ᓄᕙᒡᔪᐊᕐᓇᖅ-19 ᐋᓐᓂᐊᕐᓇᐅᑎᓪᓗᒍ. (ᐊᔾᔨᙳᐊᖅ ᐅᕐᓱᐊᓗᓕᕆᔨᒃᑯᓐᓂᑦ)
For an English version of this story, see Nunavut says its fuel supply is safe during COVID-19 pandemic
ᓄᓇᕗᒥ ᐅᕐᓱᐊᓗᓕᕆᔨᒃᑯᑦ ᓈᒻᒪᙱᓕᐅᕈᑎᖃᔾᔮᕋᓱᒋᙱᑦᑐᑦ ᐅᕐᓱᐊᓗᖕᒥ ᓄᓇᓕᓄᐊᕐᓯᑲᑕᒃᑎᓪᓗᒋᑦ ᓄᕙᒡᔪᐊᕐᓇᖅ-19 ᐋᓐᓂᐊᕐᓇᖅᑕᖃᖅᑎᓪᓗᒍ, ᐊᒻᒪᓗ ᐅᕐᓱᐊᓗᒃ ᐊᑭᒃᓕᕚᓪᓕᕐᓯᒪᓂᖓᓄᑦ ᓂᐅᕕᕋᓱᒃᖢᑎᒃ ᐊᔪᙱᓐᓂᖏᑦᑎᒍᑦ 2021-ᒧᑦ.
ᐅᕐᓱᐊᓗᓕᕆᔨᒃᑯᑦ, ᖃᐅᔨᒪᔭᐅᔪᖅ PPD, ᐅᕐᓱᐊᓗᒃᑖᕆᔭᕆᐊᖃᖅᑕᖏᓐᓂᒃ ᓂᐅᕕᐊᓂᒃᑐᑦ 2020-ᒧᑦ, 19 ᐳᓴᓐᑎᒥᑦ ᐊᑭᑭᓐᓂᕐᓴᐅᓪᓗᓂ ᐊᕐᕌᓂᐅᓚᐅᕐᑐᒥ, ᐅᖃᓚᐅᕐᑐᖅ ᑐᑭᒧᐊᖅᑎᑦᑎᔨᐅᑲᐃᓐᓇᖅᑐᖅ ᕗᐊᑦ ᕗᐃᑦᕈᐃᒡ.
ᐱᔭᕇᓚᐅᕐᒥᔪᑦ 35 ᐳᓴᓐᑎᖏᓐᓂᒃ ᐅᕐᓱᐊᓗᒃᑖᕆᔭᕆᐊᖃᖅᑕᖏᓐᓂᒃ ᑏᓱᒥ 2021-ᒧᑦ—ᑖᓐᓇᓕ 25 ᐳᓴᓐᑎᓪᓗᐊᕆᓪᓗᓂᐅᒃ ᐱᔭᕆᐊᖃᖅᑕᓕᒫᖏᓐᓄᑦ—ᐊᑭᖃᖅᖢᑎᒃ 23 ᐳᓴᓐᑎᒥ ᐊᑭᑭᓐᓂᕐᓴᓂᒃ 2019-ᖑᓚᐅᕐᑐᒥ, ᐅᖃᖅᑐᖅ ᕗᐃᑦᕈᐃᒡ.
“ᐅᕐᓱᐊᓗᒃ ᐊᑭᑭᑎᓐᓇᓱᒃᑲᑦᑎᒍᑦ ᐊᔪᙱᓐᓂᑦᑎᒍᑦ ᐊᒻᒪᓗ ᐱᑕᖃᖅᑏᓐᓇᕐᕋᓱᒃᖢᒍ,” ᐅᖃᖅᑐᖅ.
ᐅᖃᓚᐅᕐᑐᖅ ᐱᔾᔪᑎᖃᕐᓂᕋᐃᓪᓗᓂ ᒫᓐᓇ ᐊᑭᒃᖠᒋᐊᕐᓯᒪᓂᖏᓐᓄᑦ ᐅᑯᐊ ᓵᑎ ᐊᕇᐱᐊᒥ ᐊᒻᒪ ᐅᕋᓯᐊᒥ “ᐊᑭᒃᓕᒋᐊᖅᑎᑦᑎᓯᒪᓂᖏᓐᓄᑦ ᐊᒻᒪ ᐱᖁᑎᑖᖅᑎᑦᑎᓇᓱᖕᓂᕐᒧᑦ ᐊᒻᒪ ᓇᓕᐊᒃ ᓯᑯᙱᖅᑳᕐᓂᐊᕆᐊᒃᓴᖓᓄᑦ ᑕᒪᑐᒧᖓ.”
“ᑕᒪᓐᓇ ᐃᑲᔪᕈᑎᒻᒪᕆᐊᓘᖕᒪᑦ ᐅᕐᓱᐊᓘᑉ ᐊᑭᒃᖠᕚᓪᓕᕐᓯᒪᓂᖓᓄᑦ,” ᕗᐃᑦᕈᐃᒡ ᐅᖃᖅᑐᖅ. “ᐅᓇ ᐱᒻᒪᕆᐊᓘᖕᒪᑦ ᑯᕉᓇᕙᐃᕋᔅ, ᑭᓯᐊᓂᓕ ᑕᒪᑐᒪ ᐅᖓᑖᒍᑦ ᐊᑭᓕᒐᒃᓴᓕᕆᓂᒃᑯᑦ ᐱᓕᕆᕈᓘᔭᑲᑕᖕᒪᑕ.”
ᐅᕐᓱᐊᓘᑉ ᐊᑭᖓ 2021-ᒧᑦ ᐋᖅᑭᒃᑕᐅᓯᒪᔪᕐᓇᕐᒪᑦ ᒫᓐᓇᒧᑦ ᒪᑯᓄᖓ ᓄᖅᑲᖅᑎᓯᒪᑐᐃᓐᓇᖅᖢᓂ ᐃᑲᔫᓯᐊᖅᑖᕆᕙᒃᑕᖏᓐᓄᑦ $250 ᒥᓕᐊᓐ ᑖᓚᓂ. ᑖᓐᓇ ᐃᑲᔫᓯᐊᖅᑖᕆᔭᐅᕙᒃᑐᖅ ᐊᑭᓕᒃᓴᖅᑖᕈᑎᐅᔪᓐᓇᕐᒪᑦ ᓄᓇᕗᑦ ᒐᕙᒪᒃᑯᓐᓄᑦ. ᐅᕐᓱᐊᓗᓕᕆᔨᒃᑯᑦ ᐊᑭᓕᕐᓱᖅᑕᐅᕙᓪᓕᐊᕙᒃᖢᑎᒃ ᐅᕐᓱᐊᓗᓕᕆᔨᓄᑦ ᐊᒻᒪ ᐃᒡᓗᖃᖅᑐᓄᑦ.
ᐅᕐᓱᐊᓗᓕᕆᔨᒃᑯᑦ ᐊᑭᓕᒃᓴᖏᓐᓂᒃ ᓂᐅᕐᕈᑎᖃᖅᐸᓪᓕᐊᓂᒃᑯᑦ ᐊᑭᓕᕐᓱᐃᔪᓐᓇᕐᓂᐊᕈᑎᒃ, ᐊᒻᒪᓗ ᐅᕐᓱᐊᓘᑉ ᐊᑭᖓ ᐊᑦᑎᒃᑑᖏᓐᓇᖅᐸᑦ, ᕗᐃᑦᕈᐃᒡ ᐅᖃᓚᐅᕐᑐᖅ ᑕᒪᓐᓇ ᐱᔾᔪᑎᒋᓗᒍ ᐅᕐᓱᐊᓗᖕᒥ ᓂᐅᕕᕈᓐᓇᕐᓂᖏᓐᓂᒃ ᓂᐅᕕᕐᓂᐊᕐᓂᕋᖅᖢᓂᒋᑦ.
“ᐱᓕᕆᐊᖃᕋᓱᒃᑲᑦᑕ ᐊᔪᙱᓐᓂᑦᑎᒍ ᐱᔾᔪᑎᒋᔪᓐᓇᖅᑕᑦᑎᒍᑦ.”
ᐅᑯᐊ ᐅᕐᓱᐊᓗᓕᕆᔨᒃᑯᑦ ᐅᕐᓱᐊᓗᒃᑖᕐᓯᒪᓂᐊᕐᓂᖏᓐᓂᒃ 19 ᐳᓴᓐᑎᒥ ᐊᑭᑭᓐᓂᕐᓴᒥ ᐊᕐᕌᓂᐅᓚᐅᕐᑐᒥ, ᐅᕐᓱᐊᓗᓕᕆᔨᒃᑯᑦ ᖁᓪᓕᖅ ᐆᒻᒪᖁᑎᓕᕆᔨᒃᑯᓐᓄᑦ ᓂᐅᕐᕈᑎᖃᕈᓐᓇᕐᓂᐊᕐᑐᑦ ᐊᑭᑭᓐᓂᕐᓴᐅᓗᒍ. ᑕᐃᒪᐃᓐᓂᖓᓄᑦ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᖃᖓᑦᑎᐊᓵᖅ ᑐᓴᖅᑎᑦᑎᓚᐅᕐᑐᑦ ᐱᔨᑦᑎᕋᖅᑕᖏᑦ ᐅᑎᖅᑎᕕᐅᓂᐊᕐᓂᖏᓐᓂᒃ $2.76 ᐊᑕᐅᓯᕐᒧᑦ ᑭᓗᕚᑦᒧᑦ ᐊᑭᓕᒃᓴᖅᑖᕕᓂᖏᓐᓂᒃ ᐄᐳᕈᒥᑦ ᓯᑎᐱᕆᒧᑦ.
ᐃᓱᒪᒋᓗᒍ ᐊᑭᓕᒃᓴᖅ 500 ᑭᓗᕗᐊᑦ ᐃᑲᕐᕋᓅᖓᒃᐸᑦ ᑕᖅᑭᓄᑦ—ᑖᓐᓇᓗ ᐊᑭᓕᐅᑎᐅᕙᒃᑐᑦ ᑐᖏᑦᑎᐊᖓᓃᖢᓂ ᐊᑐᖅᑕᐅᓂᖏᑦᑎᒍᑦ ᓄᓇᕗᒻᒥᐅᓄᑦ—ᐅᑎᖅᑎᕕᐅᓇᔭᖅᑐᕐᓕ $14.50 ᑕᖅᑭᑕᒫᓐ.
“ᐅᓇ ᒥᑭᑦᑐᕈᓘᒐᓗᐊᖅ, ᑭᓯᐊᓂᓕ ᓈᒪᓈᕋᓱᒃᓯᒪᔪᖅ,” ᐅᖃᖅᑐᖅ ᐳᕉᓄ ᐱᕆᐅᕋ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨ ᖁᓪᓕᖅ ᐆᒻᒪᖁᑎᓕᕆᔨᒃᑯᓐᓄᑦ.
ᐅᑎᖅᑎᑕᐅᔪᒃᓴᑦ ᐊᑭᓕᒃᓴᓄᑦ ᐋᖅᑭᒃᑕᐅᓂᐊᕐᑐᑦ, ᑭᓯᐊᓂᓕ ᐅᑯᐊ ᐃᓚᐅᙱᓪᓗᑎᒃᐃᒡᓗᓕᕆᔨᒃᑯᑦ ᐃᒡᓗᖓᓃᑦᑐᑦ, ᐊᒻᒪ ᐊᑭᓕᐅᑎᒃᓴᖏᑦ ᐅᑯᑎᒎᓈᖓᓂᖏᓐᓄᑦ ᓄᓇᕗᑦᒥ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᐊᖏᓐ, ᐱᕆᐅᕋ ᐅᖃᓚᐅᕐᑐᖅ.
ᐅᓇ ᐅᑎᑦᑎᔪᒪᑎᑦᑎᒍᑎᐅᔪᖅ ᐊᖏᖅᑕᐅᓂᐊᕐᓂᖓ ᐅᑕᖅᑭᒍᑎᐅᒐᓗᐊᖅᑎᓪᓗᒍ ᐅᑯᓇᙵ ᓄᓇᕗᑦ ᐆᒻᒪᖁᑎᓄᑦ ᐊᑭᓕᐅᑎᒃᓴᓂᒃ ᑭᒥᕐᕈᐊᕐᓂᕐᒧᑦ ᑲᑎᒪᔨᓂᒃ, ᐱᕆᐅᕋ ᐅᖃᓚᐅᕐᑐᖅ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᐊᖏᖅᑕᐅᓯᒪᓕᕐᓂᖏᓐᓂᒃ ᔩᓂ ᐃᕼᐊᓗᐊᒃᒧᑦ, ᖁᓪᓕᖅ ᐆᒻᒪᖁᑎᓕᕆᔨᒃᑯᓐᓄᑦ ᑲᒪᒋᔭᓕᒃ, ᑖᓐᓇ ᐅᑎᖅᑎᑦᑎᓂᖅ ᐱᒋᐊᕐᓂᐊᕐᓗᓂ ᑕᒪᑐᒪᓂ ᑕᖅᑭᒥ.
ᒫᓐᓇ ᐅᕐᓱᐊᓘᑉ ᐊᑭᖓ ᖁᕝᕙᓯᒃᑐᑦ ᓂᐅᕕᕋᓱᒃᖢᒋ, ᕗᐃᑦᕈᐃᒡ ᐅᖃᓚᐅᕐᑐᖅ, ᓲᖃᐃᒻᒪ ᒐᕙᒪᑐᖃᒃᑯᑦ ᑳᐸᓐ ᑖᒃᓯᖓᑦ ᐊᑐᓕᖅᑎᑕᐅᓵᓚᐅᕐᒪᑦ. “ᐅᓇ ᐅᕐᓱᐊᓗᓕᕆᔨᒃᑯᓐᓄᑦ ᐱᓕᕆᐊᖑᙱᑦᑐᖅ,” ᐅᖃᖅᑐᖅ.
“ᐊᖏᒡᓕᒋᐊᕈᑎᑐᐊᕐᓕ ᐅᓱᖅᑖᕐᕕᖕᒥ ᐅᓇ 50 ᐳᓴᓐᑎᒥ ᑳᐸᓐ ᑖᒃᓯᒧᑦ ᐅᑎᖅᑎᔾᔪᑎᒃᓴᖅ,” ᕗᐃᑦᕈᐃᒡ ᐅᖃᖅᑐᖅ, “ᑕᐃᒪᐃᔾᔪᑎᖃᕐᑐᓪᓕ ᓄᓇᕗᑦ ᒐᕙᒪᒃᑯ ᐋᖅᑭᒋᐊᓚᐅᕐᑕᖓ ᐊᑭᓖᓗᐊᖃᑦᑕᖁᓇᒋᑦ ᑳᐸᓐ ᑖᒃᓯᒨᖓᔪᒧᑦ.”
ᐅᕐᓱᐊᓗᒃ 2021-ᒧᑦ ᐱᔭᐅᒐᓗᐊᕐᑎᓪᓗᒍ, ᐊᐅᔭᕐᒧᑦ ᓱᓕ ᑎᑭᑦᑐᖃᓚᐅᙱᑦᑐᖅ ᓄᓇᕗᒧᑦ.
ᕗᐃᑦᕈᐃᒡ ᐅᖃᓚᐅᕐᑐᖅ ᐅᕐᓱᐊᓗᓕᕆᔨᒃᑯᑦ ᐊᔪᕐᓴᔾᔮᕋᓱᒋᙱᖢᓂᒋᑦ ᐅᕐᓱᐊᓗᖕᒥ ᓄᓇᕗᒻᒧᙵᐅᔾᔨᔭᕆᐊᒃᓴᖅ ᐊᒻᒪ ᐅᓴᒃᓴᐃᑲᑕᖕᓂᐊᕐᓗᑎᒃ.
“ᒫᓐᓇᐅᔪᕐᓕ ᑕᒪᓐᓇ ᑲᔪᓯᓂᐊᕐᓂᖓᓂ ᖃᐅᔨᒪᔪᒍᑦ,” ᐅᖃᖅᑐᖅ. “ᑕᒪᓐᓇ ᑕᐃᒪᐃᑦᑕᕆᐊᖃᒻᒪᕆᖕᒪᑦ ᓄᓇᕗᒧᑦ.”
ᐅᖃᓚᐅᕐᑐᖅ ᐅᒥᐊᕐᔪᐊᕐᒥᐅᑕᑦ ᐃᓄᖕᓂ ᐊᐴᑎᖃᕆᐊᖃᕋᔭᙱᒻᒪᑕ ᓄᓇᕗᒻᒥᐅᓂᒃ ᐅᕐᓱᐊᓗᓕᕆᓕᕈᑎᒃ.
“ᑕᐃᒪᓕ ᐋᓐᓂᐊᕐᓇᖅᑐᖃᕋᓗᐊᕈᑦᑕ, ᐊᒃᓱᓪᓘᓐᓃ ᐃᖕᒥᖕᓂᒃ ᐱᓕᕆᐊᖃᕈᓐᓇᕐᓂᐊᕐᒪᑕ ᐊᒻᒪ ᐱᐊᓂᒃᓯᔪᓐᓇᕐᓗᑎᒃ.”
ᐱᓕᕆᐊᖃᒻᒪᕆᓕᕋᔭᕐᑐᓪᓕ ᐅᕐᓱᐊᓗᒃ ᓄᓇᕗᑦ ᓄᓇᓕᖏᓐᓄᙵᐅᔾᔭᐅᑲᑕᓕᕐᐸᑦ, ᓲᖃᐃᒻᒪ ᕗᐃᑦᕈᐃᒡ ᐅᖃᓚᐅᕐᑐᖅ ᐅᕐᓱᐊᓗᓕᕆᔨᓂᒃ ᐃᓂᖃᖅᑎᑦᑎᑲᑕᒋᐊᖃᕋᔭᕐᒪᑕ ᓄᓇᕗᒥ ᑕᒪᓐᓇ ᐋᓐᓂᐊᕐᓈᓗᖕᒧᑦ ᓄᖃᖓᑎᑕᐅᓂᖅ ᑎᑭᐅᑎᒃᐸᑦ ᔪᓚᐃᒧᑦ.
“ᐃᓱᒪᔪᖓᓕ ᐅᔾᔨᕐᓱᕆᐊᖃᕐᓂᑦᑎᓐᓂᒃ ᖃᓄᐃᑉᐸᓪᓕᐅᔪᓂᒃ ᒫᓐᓇ,” ᐅᖃᖅᑐᖅ. “ᐊᐅᓪᓚᖅᑎᑦᑎᑲᑕᖕᓂᖅᐳᑦ ᑐᓚᒃᑕᕐᕕᖃᑐᐃᓐᓇᕆᐊᖃᕐᒪᑕ…ᖃᖓᑕᓲᑦ ᐊᑐᖅᑕᐅᑲᑕᙱᓐᓂᕐᓴᐅᓂᖏᓐᓄᑦ.”
ᖃᖓᑕᓲᓕᕆᓂᕐᒧᑦ ᐱᔨᑦᑎᕋᐅᑎᑦ ᐱᑕᖃᙱᓐᓂᕐᓴᐅᓕᕐᓂᖓ ᐊᒃᑐᐃᒍᑎᐅᑐᐃᓐᓇᕆᐊᖃᕐᒪᑦ ᐅᕐᓱᐊᓗᓕᕆᓂᕐᒧᑦ, ᒪᐅᓇ ᖃᖓᑕᓲᕐᓯᐅᑎᓂᒃ ᓂᐅᕐᕈᑎᖃᕋᓱᖕᓂᒃᑯᑦ.
“ᑕᑯᓯᒪᒐᑦᑎᒍᑦ ᓄᓇᓕᖕᓅᕐᓂᕐᓴᐅᓯᒪᔪᑦ ᐃᓚᖏᓐᓄᑦ ᐊᕐᕋᒍᓂ ᐃᓚᖏᓐᓂᒃ, ᑭᓯᐊᓂᓕ ᖃᖓᑕᑲᑕᙱᑉᐸᑕ ᓂᐅᕕᖅᑐᖃᕋᔭᙱᒻᒪᑦ ᖃᖓᑕᓲᕐᓯᐅᑎᓂᒃ ᐅᕐᓱᐊᓗᖕᒥ,” ᕗᐃᑦᕈᐃᒡ ᐅᖃᖅᑐᖅ.
ᐅᕐᓱᐊᓗᓕᕆᔨᒃᑯᑦ ᒥᒃᓕᕚᓪᓕᖅᑎᑦᑎᑐᐃᓐᓇᕆᐊᖃᖅᑐᑦ ᖃᖓᑕᓲᕐᓯᐅᑎᒥ ᐱᔭᖏᓐᓂ, ᑭᓯᐊᓂᓕ ᑭᖑᕙᓗᐊᕐᐸᑕ ᑕᐃᒪᐃᓕᐅᕆᐊᒃᓴᖅ, ᕗᐃᑦᕈᐃᒡ ᐅᖃᖅᑐᖅ ᕿᓂᕆᐊᖃᕐᓂᐊᕐᓂᖏᓐᓂᒃ ᐃᓂᒃᓴᒃᑲᓐᓂᐅᔪᓐᓇᖅᑐᓂᒃ.
(0) Comments