ᓄᓇᕗᒻᒥ ᐳᓚᕋᖅᑐᓕᕆᓂᖅ $1 ᐱᓕᐊᓐᓂ ᓇᖕᒥᓂᕆᔭᐅᔪᓐᓇᖅᐳᖅ, ᐱᓕᕆᕝᕕᐅᑉ ᐱᓕᕆᔨᒻᒪᕆᐅᔪᖅ ᐅᖃᖅᐳᖅ

For English version, see Nunavut tourism could be $1B business, industry officials say

“ᐱᔪᒪᓂᖃᕐᔪᐊᖅᑐᒥ” ᑐᕌᒐᒃᓴᖓ ᓴᖑᑎᑦᑎᓂᕐᒥ ᓄᓇᕗᒻᒥ ᐊᐅᓪᓛᕐᓂᕐᒥ ᐊᒻᒪ ᐳᓚᕋᖅᑐᓕᕆᓂᕐᒥ ᐱᓕᐊᓐᑐᖅᑐᒥ ᐱᓕᕆᔨᕐᔪᐊᖑᓂᖏᓐᓂ 2030−ᒧᑦ ᑕᐅᑐᒃᑕᑐᐊᖑᑲᐃᓐᓇᓚᐅᖅᐳᖅ ᐊᐅᓪᓛᕐᓂᕐᒧᑦ ᓄᓇᕗᒻᒥ ᐊᕐᕌᒍᑕᒫᒥ ᑕᒪᐃᑎᒍᑦ ᑲᑎᒪᓂᖓᓂ ᐱᓇᓱᐊᕈᓯᐅᓚᐅᖅᑐᒥ ᐃᖃᓗᖕᓂ.

ᐱᓕᕆᕝᕕᐅᔪᖅ ᑮᓇᐅᔾᔭᒃᓴᓂᕐᒧᑦ ᐊᒃᑐᐃᓂᖃᖅᐳᖅ $400 ᒥᓕᐊᓐᓂ 2019−ᒥ — ᐊᒥᓱᓂ ᖃᓂᒪᓐᓇᐅᔪᒥ ᓯᕗᓂᐊᓂ — ᐊᒻᒪ ᐃᖅᑲᓇᐃᔭᖅᑎᑦᑎᓚᐅᖅᐳᖅ 3,000−ᓂ ᐃᓄᖕᓂ, ᐅᖃᐅᓯᐅᓪᓗᓂ ᓂᐅᕕᐊᒃᓴᖃᕆᐊᖅᑐᖅᑐᓂ ᑲᑐᔾᔨᖃᑎᒌᖑᔪᓄᑦ ᐱᓇᓱᐊᕈᑎᒃᓴᓕᕆᓂᕐᒧᑦ ᐸᕐᓇᐅᑎᖓᓂ ᒪᓕᒃᑐᓄᑦ ᐊᕐᕌᒍᓄᑦ 7−ᓄᑦ.

“ᐃᓱᒪᒋᔭᕋ ᐊᖏᔪᒻᒪᕆᐊᓗᖕᒥ ᐱᕕᒃᓴᖅᑕᖃᕐᓂᖓᓂ ᐊᒻᒪ  ᐱᔪᒪᓂᖃᕐᔪᐊᖅᑐᒥ ᐸᕐᓴᐅᑎᖃᖅᐳᑦ ᐱᕈᖅᓴᐃᓂᕐᒥ ᐱᓕᕆᔨᕐᔪᐊᖑᔪᓂ ᐅᕙᓂ,” ᐅᖃᓚᐅᖅᐳᖅ ᒐᕙᒪᑐᖃᒃᑯᑦ ᐳᓚᕋᖅᑐᓕᕆᓂᕐᒥ ᒥᓂᔅᑕᖓ ᓱᐊᕋᔭ ᒫᑎᓂᔅ ᕕᕌᑕ ᐊᐱᖅᓱᖅᑕᐅᓂᕐᒥ ᓄᕕᐱᕆ 15−ᒥ.

ᐊᐅᓪᓛᕐᓂᕐᒧᑦ ᓄᓇᕗᒻᒥ ᐃᓚᒋᔭᐅᓂᕐᒥ-ᑐᙵᕕᖃᖅᑐᒥ ᑲᑐᔾᔨᖃᑎᒌᖑᕗᖅ ᑭᒡᒐᖅᑐᐃᔪᒥ ᑐᔪᕐᒥᕕᖕᓂ, ᐊᐅᓪᓛᕈᔾᔨᔨᐅᔪᓂ, ᖃᖓᑕᓲᕐᓄᑦ ᐊᒻᒪ ᓴᓇᐅᒐᓕᕆᔨᐅᔪᓄᑦ. 147−ᖑᔪᓂ ᐃᓚᒋᔭᐅᔪᓂ, 77 ᐃᓄᖕᓄᑦ-ᓇᖕᒥᓂᕆᔭᐅᔪᓂ ᓇᖕᒥᓂᖃᖅᑎᐅᕗᑦ.

ᕕᕌᑕ ᐃᖃᓗᖕᓃᓚᐅᖅᐳᖅ ᐱᓕᕆᓂᕐᒥ ᒪᑐᐃᖓᔪᒥ ᑲᑎᒪᓂᐅᔪᒥ ᐳᓚᕋᖅᑐᓕᕆᔨᐅᔪᓄᑦ ᐃᓚᒋᔭᐅᓂᖓᓂ ᐊᐅᓪᓛᕐᓂᕐᒧᑦ ᓄᓇᕗᒻᒥ ᐅᓪᓗᓂ-ᐱᖓᓱᓂ ᑲᑎᒪᓂᐅᔪᒥ. ᑕᒪᕐᒥᒐᓚᒃ ᐅᖃᓪᓚᖕᓂᐅᔪᒥ ᐱᔾᔪᑎᖃᓚᐅᖅᐳᖅ ᐊᒃᓱᕈᕈᑕᐅᔪᓂ ᑭᐅᒪᓂᕐᒧᑦ ᐆᒥᖓ ᑐᕌᒐᒃᓴᐅᔪᒥ, ᐃᓚᖃᖅᑐᒥ ᐅᓯᑲᑦᑕᕐᓂᐅᔪᒥ ᐃᓐᓄᒍᓐᓇᕐᓂᖓᓂ.

“ᖃᓄᖅ ᐃᓄᖕᓂ ᐅᑭᐅᖅᑕᖅᑐᒧᐊᖅᑎᑦᑎᔪᓐᓇᖅᐱᑕ ᐊᒻᒪ ᐊᑭᑐᓗᐊᙱᑎᓪᓗᒍ ᑕᒪᐅᙵᕐᓂᕐᒧᑦ?” ᐊᐱᕆᓚᐅᖅᐳᖅ.

ᒥᕝᕖᑦ ᐊᒻᒪ ᑐᓚᒃᑕᕐᕖᑦ

ᕕᕌᑕ, ᑲᓇᑕᒥ ᐳᓚᕋᖅᑐᓕᕆᓂᕐᒧᑦ ᒥᓂᔅᑕᙳᓚᐅᖅᑐᖅ ᐊᐅᔭᐅᑎᓪᓗᒍ, ᓱᓕᓂᕋᐃᓚᐅᖅᐳᖅ ᐱᓂᕐᒥ ᐃᓱᒪᒋᔭᐅᓂᐅᔪᓂ ᐱᕈᖅᓴᐃᓂᕐᒥ ᓄᓇᕗᒻᒥ ᐳᓚᕋᖅᑐᓕᕆᓂᕐᒧᑦ ᐱᓕᕆᓂᕐᔪᐊᖑᔪᒥ — ᐱᓗᐊᖅᑐᒥ ᐱᐅᓯᒋᐊᖅᑎᑦᑎᓂᐅᔪᒥ ᐅᓯᑲᑦᑕᕐᓂᕐᒧᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ — ᐋᑐᕚᒧᐊᕈᑎᓗᓂᒋᑦ ᐱᓇᓱᐊᕐᓂᖓᓂ ᐊᓯᖏᓐᓂ ᒐᕙᒪᑐᖃᒃᑯᑦ ᒥᓂᔅᑕᐃᑦ ᑲᑎᒪᔨᖏᓐᓂ ᐃᑲᔪᖅᓱᐃᓂᕐᒧᑦ ᐳᓚᕋᖅᑐᓕᕆᓂᕐᒧᑦ ᐱᕈᖅᐸᓪᓕᐊᓂᖓᓂ.

ᐱᓗᐊᖅᑐᒥ, ᒥᕝᕕᖕᓂ ᐱᐅᓯᒋᐊᖅᑎᑕᐅᓂᐅᔪᓂ ᐊᒻᒪ ᐃᑲᔪᖅᓱᐃᓂᕐᒥ ᐅᑭᐅᖅᑕᖅᑐᒥ ᖃᖓᑕᓲᓄᑦ, ᐅᖃᓚᐅᖅᐳᖅ ᑕᐃᕕᑦ ᐊᕿᐊᕈᖅ, ᓄᓇᕘᑉ ᒥᓂᔅᑕᖓ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ, ᑕᐃᑲᓂ ᑲᑎᒪᓂᐅᔪᒥ.

“ᐊᑐᓲᖑᕗᒍᑦ ᒐᕙᒪᒃᑯᑦ ᑮᓇᐅᔭᖏᓐᓂ ᓴᓇᓂᕐᒧᑦ ᒥᑦᑕᕐᕕᓂ ᐊᒻᒪ ᒥᕝᕕᓂᑦ, ᐊᒻᒪᓗ ᐋᖅᑭᐅᒪᑎᑦᑎᓂᕐᒥ ᑕᒪᒃᑭᓂ 25−ᖑᔪᓂ ᓄᓇᓕᖕᓂ ᐊᒃᓱᕈᕐᓇᖅᑑᕗᖅ $16-ᒥᓕᐊᓐᓂ ᑮᓇᐅᔭᓂ ᐊᑐᖅᑐᒃᓴᖃᖅᖢᑎᑦ ᐊᒻᒪᓗ, ᖄᒃᑲᓐᓂᐊᒍᑦ, ᓴᓇᔭᕆᐊᖃᖅᐳᑎᑦ ᓄᑖᖑᔪᓂ,” ᐅᖃᓚᐅᖅᐳᖅ.

ᓇᓗᓇᐃᖅᓯᓚᐅᖅᐳᖅ ᒐᕙᒪᑐᖃᒃᑯᑦ ᐱᓕᕆᖃᑎᖃᖅᓯᒪᓂᖏᓐᓂ ᓄᓇᕗᒻᒥ ᒐᕙᒪᒃᑯᓐᓂ ᖃᔅᓯᒐᓚᖕᓂ ᒥᑦᑕᕐᕕᖕᓂ ᐃᒡᓗᖁᑎᖓᓐᓂ ᐱᐅᓯᒋᐊᖅᑎᑦᑎᓂᐅᔪᓂ ᐱᓕᕆᐊᖑᔪᓂ ᖄᖏᖅᓯᒪᓕᖅᑐᒥ ᐊᕐᕌᒍᓂ 8−ᓂ, ᑭᓯᐊᓂ ᑮᓇᐅᔭᓂᒃ ᐃᖏᕐᕋᓯᒪᓂᖃᙱᓚᑦ ᒥᕝᕕᓄᑦ ᐱᐅᓯᒋᐊᖅᑕᐅᓂᐅᔪᓄᑦ.

ᐊᖏᓂᖅᓴᐃᑦ ᖃᖓᑕᓲᑦ ᓲᕐᓗ Boeing 737−ᖑᔪᑦ ᐱᔭᕆᐊᖃᖅᐳᑦ ᕿᑯᖅᑎᕆᓯᒪᔪᒥ ᒥᕝᕕᐅᔪᒥ ᑎᑭᓐᓂᕐᒧᑦ ᐊᒻᒪ ᐊᐅᓪᓚᕆᐊᕐᓂᕐᒧᑦ.

ᒪᕐᕉᖕᓂ ᕿᑯᖅᑎᕆᓯᒪᔪᒥ ᒥᕝᕕᖃᖅᐳᖅ ᓄᓇᕗᒻᒥ — ᐊᑕᐅᓯᕐᒥ ᐃᖃᓗᖕᓂ ᐊᒻᒪ ᐊᑕᐅᓯᕐᒥ ᑲᖏᖅᖠᓂᕐᒥ. ᐅᖃᐅᓯᐅᓪᓗᓂ ᐊᕿᐊᕈᕐᒧᑦ, ᐱᓕᕆᕝᕕᖓ ᐱᓕᕆᐊᖑᔪᒧᑦ ᑐᕌᖓᔪᒥ ᓇᓗᓇᐃᖅᑕᐅᓯᒪᓪᓚᕆᒃᑐᖃᙱᓚᖅ ᒥᕝᕕᖕᓄᑦ ᕿᑯᖅᑎᕆᓂᐅᔪᒧᑦ.

“ᑮᓇᐅᔭᖅ ᐅᖃᓪᓚᓲᖑᕗᖅ,” ᐊᕿᐊᕈᖅ ᐅᖃᓚᐅᖅᐳᖅ, “ᐊᒻᒪ ᑮᓇᐅᔭᖃᙱᑉᐳᒍᑦ.”

ᐊᐅᓪᓛᕐᓂᕐᒧᑦ ᓄᓇᕗᒻᒥ ᐊᐅᓚᑦᑎᔨᒻᒪᕆᒃ ᑲᕙᓐ ᑲᓕ ᐅᖃᓚᐅᖅᐳᖅ ᑲᑐᔾᔨᖃᑎᒌᖓ ᐱᓕᕆᖃᑎᖃᕆᕗᖅ ᒐᕙᒪᑐᖃᒃᑯᓐᓂ ᐃᑲᔪᖅᓯᖅᑕᐅᓂᕐᒧᑦ ᐊᓯᖏᓐᓄᑦ ᐱᐅᓯᒋᐊᖅᑎᑕᐅᓂᐅᔪᓄᑦ, ᓲᕐᓗ ᐃᑎᔪᒥ ᑕᕆᐅᕐᒥ ᑐᓚᒃᑕᕐᕕᖕᓂ ᐊᒻᒪ ᒥᑭᑦᑐᓄᑦ ᐅᒥᐊᕐᓄᑦ ᑭᓴᕐᕕᒃᓴᓄᑦ.

ᐊᐅᓪᓛᕐᓂᕐᒧᑦ ᐱᓕᕆᓂᕐᔪᐊᖑᔪᑦ ‘ᓇᖏᕐᓂᖃᖅᐳᑦ ᖄᕐᓂᐊᕐᓂᖓᓂ’: ᐊᐅᓪᓛᕐᓂᕐᒧᑦ ᓄᓇᕗᒻᒥ ᐊᐅᓚᑦᑎᔨᒻᒪᕆᖓ

ᖄᖓᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᑲᓕ ᐅᖃᓚᐅᖅᐳᖅ ᑕᑯᔪᒪᓂᖓᓂ ᐃᑲᔪᖅᓱᐃᓂᐅᒃᑲᓐᓂᖅᑐᒥ ᐃᓄᖕᓄᑦ-ᓴᖕᒥᓂᕆᔭᐅᔪᓂ ᐊᐅᓪᓛᕐᓂᕐᒧᑦ ᓴᖕᒥᓂᕆᔭᐅᔪᓂ.

“ᑕᒪᓐᓇ ᐱᔪᒪᔭᕗᑦ, ᐱᓕᕆᓂᕐᔪᐊᖑᔪᖅ ᐅᕙᓃᖁᕙᕗᑦ ᐊᒻᒪ ᐅᓂᒃᑳᓕᐊᖑᔪᖅ ᐅᖃᐅᔾᔭᐅᖁᕙᕗᑦ ᐃᓄᖕᓂ ᐊᒻᒪ ᐅᓇ ᐊᖏᓛᖑᔪᒥ ᐱᕈᖅᓴᓂᐅᓂᖅ ᐱᔪᓐᓇᕐᓂᖓᓂ,” ᐅᖃᓚᐅᖅᐳᖅ.

ᐃᓄᐃᑦ ᐳᓚᕋᖅᑐᓕᕆᓂᕐᒧᑦ ᐱᓕᕆᓂᕐᔪᐊᖑᔪᖅ “ᓇᖏᕐᓂᖃᖅᐳᑦ ᖄᕐᓂᐊᕐᓂᖓᓂ,” ᐅᖃᓚᐅᖅᐳᖅ ᑲᓕ, ᐅᔾᔨᕆᓪᓗᓂ ᐊᒥᓱᐊᓗᖕᓂ ᐱᔪᒪᓂᖅᑕᖃᕐᓂᖓᓂ, ᐃᓚᖓᒍᑦ ᐊᐅᓪᓛᖅᑎᐅᔪᓂ ᐃᓄᓕᒫᓂᒃ ᐊᑐᕐᓂᖃᕈᒪᔪᓂ ᐃᓄᐃᑦ ᐃᓅᓯᖓ ᖃᓄᐃᑦᑑᓂᖓᓂ.

“ᓴᓇᐅᒐᓕᕆᓂᐅᒍᓂ, ᐊᖑᓇᓱᖕᓂᐅᒍᓂ, ᑐᑭᖃᖅᑐᒥ ᑭᓇᑐᐃᓐᓇᖅ ᐅᕗᙵᕈᓂ ᐊᒻᒪ ᐊᐅᓪᓛᖃᑎᖃᕐᓗᓂ ᐆᒥᖓ, ᓲᕐᓗ, ᐲᑕᒥ ᐊᒻᒪ ᓇᑦᑎᕋᓱᒋᐊᕐᓗᓂ,” ᐅᖃᓚᐅᖅᐳᖅ ᑲᓕ.

“ᐱᓕᕆᓂᕐᔪᐊᖑᔪᖅ ᐸᕐᓇᒃᓯᒪᑦᑎᐊᖅᐳᖅ ᐊᒻᒪ ᐅᑕᖅᑭᕗᖅ ᐃᓄᖕᓂ ᐱᕈᑦᑎᐊᕈᓐᓇᕐᓂᖏᓐᓂ ᐊᒻᒪ ᐊᐅᓪᓛᕐᓂᕐᒧᑦ ᓄᓇᕗᒻᒥ ᐅᕙᓃᑉᐳᖅ ᐃᑲᔪᕐᓂᕐᒧᑦ.”

ᕕᕌᑕ ᐅᖃᓚᐅᖅᐳᖅ ᐃᓕᓴᖅᓯᓯᒪᓂᖓᓂ ᐱᕕᒃᓴᖃᕐᓂᐅᔪᒥ ᐃᓚᐅᑎᑦᑎᓂᕐᒥ ᐃᓄᖕᓂ ᐳᓚᕋᖅᑐᓕᕆᓂᕐᒥ ᑭᓯᐊᓂ “ᓇᖕᒥᓂᖅ ᐅᖃᐅᓯᕆᔭᖏᓐᓂ ᐊᒻᒪ ᓇᖕᒥᓂᖅ ᐊᐅᓚᓂᖏᓐᓂ.”

ᐃᓄᐃᑦ ᐃᓚᐅᖃᑕᐅᓂᖏᓐᓂ ᐳᓚᕋᖅᑐᓕᕆᓂᕐᒥ ᑕᒪᒃᑭᐅᔪᒥ “ᑮᓇᐅᔾᔭᒃᓴᓂᕐᒧᑦ ᓴᐃᒻᒪᖃᑎᒌᖕᓂᐅᔪᒥ ᐊᐅᓚᑦᑎᔨᐅᓇᔭᖅᐳᖅ” ᑭᓯᐊᓂᑦᑕᐅᖅ “ᑭᓇᐅᓂᖓᓂ ᐃᓚᒋᔭᐅᖕᒥᓗᓂ.”

“ᐱᕕᒃᓴᖃᕐᓂᐅᕗᖅ ᐱᓕᕆᓂᐅᔪᒥ ᑲᑎᖃᑎᒌᒃᑲᓐᓂᕐᓂᐅᔪᒥ ᒪᒃᑯᒃᑐᓂᓪᓘᓐᓃᑦ ᐃᓄᐃᑦ ᐱᖅᑯᓯᑐᖃᖏᓐᓄᑦ ᐊᒻᒪ ᖃᓄᖅ ᓇᒃᓴᕈᓐᓇᕐᓂᑦᑎᓐᓂ ᐊᖅᑯᑎᐅᔪᒧᑦ ᓴᐃᒻᒪᖃᑎᒌᖕᓂᐅᔪᒥ ᐃᓗᐊᓂ ᐳᓚᕋᖅᑐᓕᕆᓂᕐᒧᑦ,” ᐅᖃᓚᐅᖅᐳᖅ.