ᓄᓇᖃᖅᑳᖅᓯᒪᔪᐃᑦ ᐱᓕᕆᖃᑎᒌᒃᑎᖏᑦ ᑎᓕᐅᕆᖕᒪᑕ ᐋᑐᕙᐅᑉ ᓄᓇᓕᐸᐅᔭᖓᓂᒃ ᐃᓱᒪᒃᓴᖅᓯᐅᕈᑎᖃᒃᑲᓐᓂᖁᓪᓗᒋᑦ ᓄᑖᒥᒃ ᐋᓐᓂᐊᕐᕕᓕᐅᕐᕕᒋᓂᐊᖅᑕᒥᖕᓂᒃ ᓄᓇᒥ

For an English version of this story, please see Indigenous coalition calls on Ottawa to reconsider site for new hospital.

ᐋᑐᕙᒥ ᓄᓇᖃᖅᑳᖅᓯᒪᔪᐃᑦ ᐱᓕᕆᖃᑎᒌᒃᑎᖏᑦ ᓄᓇᓕᐸᐅᔭᒥᒃ ᐃᓱᒪᒃᓴᖅᓯᐅᕈᑎᖃᒃᑲᓐᓂᖁᔨᕗᑦ ᓈᒻᒪᒃᓴᐃᓯᒪᓂᕆᓕᓚᐅᖅᑕᒥᓐᓂᒃ ᐸᕐᓇᐅᑎᓂᒃ ᓇᖕᒥᓂᖁᑎᒋᔭᐅᔪᑉ ᓄᓇᐅᑉ 750-ᓂᒃ ᓇᐹᖅᑐᐃᑦ ᐃᓗᐊᓃᑦᑐᑦ ᓇᑲᑎᖅᑕᐅᓯᒪᓕᖁᓪᓗᒋᑦ ᓄᑖᖑᓪᓗᓂ ᐋᑐᕙ ᐋᓐᓂᐊᕐᕕᖁᑎᖏᑦ ᓯᕕᒃ ᐋᓐᓂᐊᕐᕕᓕᐅᕐᕕᒋᓂᐊᕐᖢᒍ.

ᐃᒪᓐᓇᐃᓕᐅᖔᖁᔨᓪᓗᑎᒃ, ᐱᓕᕆᖃᑎᒌᒃᑎᑦ ᓄᓇᒥᒃ ᓴᐃᒻᒪᖃᑎᒌᖕᓂᓕᕆᓂᕐᒧᑦ ᐃᓄᒋᐊᒃᑐᓂᕐᒥᐅᑦ ᓄᓇᖃᖅᑳᕐᓯᒪᔪᓂᑦ ᐊᒻᒪ ᑲᓇᑕᒥᐅᓕᒫᓂᑦ ᓄᓇᖃᖅᑐᓂᑦ ᐋᑐᕙᒥ ᐊᑐᖅᑕᐅᖔᓕᕐᓂᐊᓪᓗᓂ.

ᕕᑉᕈᐊᕆ 2018-ᒥ, ᒐᕙᒪᑐᖃᒃᑯᑦ ᑐᓴᖅᑎᑦᓯᓯᒪᓕᓚᐅᕐᒪᑕ ᐸᕐᓇᐅᑎᓂᒃ ᐊᑐᖅᑐᐊᖅᑎᑦᓯᓂᐊᕐᓂᕐᒧᑦ 50 ᐄᑯᕐᔅᓂᒃ ᐋᑕᕙ ᐋᓐᓂᐊᕐᕕᖁᑎᖏᓐᓄᑦ ᓄᑖᒥᒃ ᐋᓐᓂᐊᕐᕕᓕᐅᕐᕕᒋᓂᐊᕐᓗᓂᔾᔪᒃ. ᒫᓐᓇᐅᔪᖅ ᑭᒃᑯᑐᐃᓐᓇᓄᑦ ᓴᓇᕝᕕᐅᔭᕆᐊᖃᖖᒋᓐᓂᐅᒻᒪᑦ ᓄᓇ, ᑕᐃᒪᖖᒐᓂᑐᖃᒥᑦ ᓇᐹᖅᑐᖃᕐᕕᐅᓪᓗᓂ ᐊᒻᒪ ᑕᑯᕋᓐᓂᖅᓴᐅᑎᐅᔪᓄᑦ ᓄᓇᒥ ᐃᓚᐅᖃᑕᐅᓪᓗᓂ.

ᑕᕝᕙᓂ ᐅᑭᐅᕆᔭᑦᑎᓐᓂ ᕕᑉᕈᐊᕆᐅᑎᓪᓗᒍ, ᐋᑐᕙ ᓄᓇᓕᐸᐅᔭᒥ ᑲᑎᒪᔨᒃᑯᑦ ᐸᕐᓇᐅᑎᓕᐅᕐᓂᕐᒧᑦ ᑲᑎᒪᔨᕋᓛᖏᑦ ᓈᒻᒪᒃᓴᐃᓯᒪᓕᓚᐅᕐᒪᑕ ᓴᓇᕝᕕᐅᓂᐊᕐᓂᖓᓄᑦ ᐸᕐᓇᐅᑎᓂᒃ ᐱᓕᕆᓂᖃᕐᕕᐅᔪᒪᔪᒧᑦ.

ᒫᓐᓇᒧᑦ ᑎᑭᑦᖢᒍ, 159-ᓂᒃ ᓇᐹᖅᑐᓂᒃ ᓇᑲᑎᕆᓯᒪᓕᖅᐳᑦ, ᐊᒥᐊᒃᑯᖏᑦ ᓇᑲᖅᑎᑕᐅᔪᒫᕐᓂᐊᖅᖢᑎᒃ ᑭᖑᓂᐊᓂ.

“ᐃᓱᒪᒋᒐᑦᑎᒍ ᐋᓐᓂᐊᕐᕕᒃ ᑐᕌᖓᑎᑕᐅᓂᐊᕐᓗᓂ ᐋᓐᓂᐊᖃᕈᖕᓃᖅᑎᑦᓯᓂᕐᒧᑦ ᐱᓕᕆᓂᖃᕐᓂᐊᕐᓂᕐᒧᑦ ᐃᓚᒋᔭᐅᔭᕆᐊᖃᕋᓱᒋᖖᒋᓪᖢᒍ ᐱᓕᕆᓂᐅᔪᓄᑦ ᐊᓯᕈᖅᑎᕆᓂᐊᖅᑐᓄᑦ ᓱᓇᖁᑎᐅᔪᓂᒃ ᐋᓐᓂᐊᖃᕈᖕᓃᕈᑎᒋᕙᒃᑕᑦᑎᓐᓄᑦ ᐃᑲᔪᕈᑎᐅᕙᒃᑐᓂᒃ,” ᐅᖃᖅᖢᓂ ᐱᓕᕆᖃᑎᒌᒃᑎᒃᑯᓐᓄᑦ ᐃᒃᓯᕙᐅᑕᕆᔭᐅᖃᑕᐅᔪᖅ ᓯᑎᕙᓂ ᒥᑭ ᐋᑕᒻᔅ, ᐊᓪᓚᕝᕕᖕᒥ ᐃᓱᒪᑕᕆᔭᐅᓪᓗᓂᓗ ᐃᓅᖃᑎᒌᒃ ᐃᖅᑲᓇᐃᔭᕐᕕᖓᓂ ᐃᓄᐃᑦ ᓱᕈᓯᓕᕆᔨᖏᓂ, ᒪᒃᑯᒃᑐᓕᕆᔨᖏᓂ ᐊᒻᒪ

“ᓇᐹᖅᑐᐃᑦ ᐊᒻᒪ ᓄᓇ, ᖃᐅᒪᔪᓗᒃᑖᖑᒐᑦᑕ, ᑕᐃᒪᐅᔭᕆᐊᖃᖅᑑᓪᓗᑎᒃ ᑭᒃᑯᑐᐃᓐᓇᓄᑦ ᐱᒋᔭᐅᓂᖏᑕ ᐋᖅᑭᐅᒪᑦᓯᐊᖅᑎᑕᐅᕆᐊᖃᖅᖢᓂ ᐃᑲᔪᕈᑎᐅᖁᓪᓗᒍ ᐋᓐᓂᐊᖃᓕᖅᑕᐃᓕᒪᓂᕐᒧᑦ ᐊᒻᒪ ᖃᓄᐃᖖᒋᑦᓯᐊᕈᑎᒃᓴᖏᓄᑦ ᓄᓇᖅᑲᑎᒋᔭᑦᑎᓐᓄᑦ ᐊᒻᒪ ᓄᓇᕐᔪᐊᑦᑎᓐᓄᑦ.”

ᐱᓕᕆᖃᑎᒌᒃᑎᐅᓪᓗᑎᒃ ᐃᑲᔪᖅᑎᒌᖑᔪᑦ 10-ᓄᑦ ᓄᓇᖃᖅᑳᖅᓯᒪᔪᓄᑦ ᐱᔨᑦᓯᕋᖅᑎᐅᓪᓗᑎᒃ ᑲᑐᔾᔨᖃᑎᒌᖑᔪᓄᑦ ᐃᓚᒋᓪᓗᒋᑦ ᑐᖖᒐᓱᕝᕕᖓᑦ ᐃᓄᐃᑦ ᐊᒻᒪ ᐃᓅᖃᑎᒌᑦ ᐃᖅᑲᓇᐃᔭᕐᕕᖓᑦ, ᐋᑐᕙᒥ ᓄᓇᖃᖅᑳᖅᓯᒪᔪᐃᑦ ᐱᓕᕆᖃᑎᒌᒃᑎᖏᑦ ᐱᑕᖃᖅᑎᑦᓯᔨᐅᕙᒃᑐᑦ ᐱᓕᕆᐊᖃᖅᑎᒻᒪᕆᐅᓪᓗᑎᒃ ᐱᓕᕆᐊᓂᒃ ᐊᒻᒪ ᐱᔨᑦᓯᕋᕈᑎᓂᒃ ᐃᖅᑭᓕᖕᓄᑦ, ᐃᓄᖕᓄᑦ ᐊᒻᒪ ᐊᓪᓚᖓᔪᓄᑦ ᓄᓇᓕᖃᖅᑐᓄᑦ ᑲᓇᑕᓕᒫᒥ ᓄᓇᓕᐸᐅᔭᕆᔭᐅᔪᑉ ᐊᕙᑎᖓᓂ.

ᐃᓚᖃᕆᓪᓗᑎᒃ ᐱᓕᕆᓂᖃᕐᓂᕐᒥᒃ ᐱᐅᓯᒋᐊᖅᑎᑕᐅᓯᒪᓕᖁᓪᓗᒋᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᐅᔪᑦ ᐃᓄᒋᐊᖅᑐᓂᕐᒥᐅᑕᐅᔪᑦ ᓄᓇᖃᖅᑳᕐᓯᒪᔪᓂ – ᐱᖃᓯᐅᑎᓪᓗᒋᑦ ᑕᐅᓴᓐᑎᖏᓐᓃᑦᑐᑦ ᐃᓄᐃᑦ ᐃᓄᒋᐊᒃᑐᓂᕐᒥᐅᑕᐅᓪᓗᑎᒃ ᐋᑐᕙᒥ – ᐊᒻᒪ ᐊᑐᓕᖅᑎᑕᐅᖁᓪᓗᒋᑦ ᓴᐃᒻᒪᖃᑎᒌᖕᓂᓕᕆᓂᕐᓄᑦ ᐱᓕᕆᓂᐅᔪᑦ ᓄᓇᓕᐸᐅᔭᒥ.

ᐃᓱᒪᓕᐅᖅᓯᒪᓂᐅᓕᓚᐅᕐᑐᖅ ᓄᓇ ᓇᐹᖅᑐᐃᔭᖅᑕᐅᓯᒪᓕᖁᓪᓗᒍ ᐋᓐᓂᐊᕐᕕᖕᒥᒃ ᓴᓇᕝᕕᐅᓕᕐᓂᐊᕐᓗᓂ ᑕᐃᑲᓂ ᓈᒻᒪᖖᒋᑦᑐᑎᒍᑦ ᐊᒃᑐᐃᓯᒪᓂᖃᓕᕐᓂᐊᕐᒪᑦ ᑕᒪᒃᑯᓄᖓ ᐱᓕᕆᐊᖑᓕᖅᓯᒪᔪᓄᑦ, ᐅᖃᖅᖢᓂ ᐋᑕᒻᔅ.

ᐋᑐᕙ ᐋᓐᓂᐊᕐᕕᖁᑎᖏᑕ ᓄᑖᖑᓪᓗᓂ ᐋᓐᓂᐊᕐᕕᓕᐅᕋᔭᕐᒪᑕ  ᑳᕐᓕᖕ ᐋᕕᓐᓅ ᐊᖅᑯᑎᖓᓂ ᓴᓂᒋᑦᓯᐊᖅᑕᖓᓂ ᑕᐅᔅ ᓖᒃ ᑕᓯᐊᑕ. ᓄᑖᖑᓪᓗᓂ ᐋᓐᓂᐊᕐᕕᒃ ᐊᖏᔫᓗᓂ ᖃᐅᔨᓴᕐᕕᐅᖃᑦᑕᓕᕐᓂᐊᕐᒪᑕ ᑲᓇᖕᓇᖅᐸᓯᐊᓂᕐᒥᐅᓄᑦ ᐋᓐᑎᐅᕆᐅᒥ, ᑯᐃᐸᒃ ᐅᐊᖕᓇᖅᐸᓯᐊᓂᕐᒥᐅᓄᑦ ᐊᒻᒪ ᓄᓇᕗᒻᒥᐅᓄᑦ, ᐃᓚᖃᕐᒥᓗᓂ ᐋᓐᑎᐊᕆᐅ ᑲᓇᖕᓇᖅᐸᓯᐊᓂ ᐊᒃᓱᕈᕐᓇᖅᑐᒃᑰᕐᓯᒪᔪᓕᕆᕝᕕᖕᒥᒃ.

ᑖᓐᓇ ᐱᓕᕆᐊᖑᔪᖅ ᐊᑭᑐᓂᖃᕋᔭᕐᑐᖅ $2.8-ᐱᓕᕆᐊᓐᑖᓚᓂᒃ ᐱᓕᕆᐊᖑᓕᕐᕕᒃᓴᖃᖅᑎᑕᐅᕗᖅ 2028 ᐅᑭᐅᖓ ᐊᑐᓕᖅᐸᑦ.

ᔫᓐ ᕆᒡᔅ, ᐱᓕᕆᖃᑎᒌᒃᑎᓄᑦ ᑐᑭᒧᐊᒃᑎᑦᓯᔨᐅᔪᖅ, ᐅᖃᓚᐅᕐᐳᖅ ᓄᓇᓕᐸᐅᔭᖅ ᖃᐅᔨᒋᐊᕐᕕᖃᓚᐅᖖᒋᒻᒪᑕ ᓄᓇᖃᖅᑳᖅᓯᒪᔪᐃᑦ ᓄᓇᓕᒋᔭᖏᓐᓂᑦ ᐊᒻᒪ ᑲᑐᔾᔨᖃᑎᒌᒋᔭᐅᔪᓂ ᐃᓱᒪᓕᐅᕈᑎᒋᓯᒪᓕᖅᑕᒥᓐᓄᑦ ᐱᔾᔪᑎᒋᓪᓗᒍ ᓇᐹᖅᑐᓂᒃ ᓇᑲᑎᕆᓂᐊᕐᓂᕐᒧᑦ.

ᐅᖃᖅᖢᓂ ᐱᓕᕆᖃᑎᒌᒃᑎᒃᑯᑦ ᓄᓇᒥ ᐊᑐᓕᖁᔨᖕᒪᑕ ᐱᕙᓪᓕᐊᑎᑕᐅᔪᒪᔪᒧᑦ ᓄᖅᑲᖅᑎᑦᓯᓯᒪᔾᔪᑎᓂᒃ, ᓄᑖᖑᓪᓗᓂ ᐋᓐᓂᐊᕐᕕᐅᓕᕋᔭᕐᑐᖅ ᓴᓇᔭᐅᖔᕐᓂᐊᕐᓗᓂ ᐊᓯᐊᓂ ᐊᒻᒪ ᑖᓐᓇ ᓄᓇ ᐊᑐᖅᑕᐅᖔᓕᕐᓂᐊᖅᑎᓪᓗᒍ ᓴᐃᒻᒪᖃᑎᒌᖕᓂᓕᕆᓂᖏᓐᓄᑦ ᐃᓄᒋᐊᒃᑐᓂᕐᒥᐅᑕᐅᓪᓗᑎᒃ ᓄᓇᖃᖅᑳᖅᓯᒪᔪᓂᑦ ᐊᒻᒪ ᑲᓇᑕᒥᐅᓕᒫᓂ ᓄᓇᖃᖅᑐᓂᑦ ᐋᑐᕙᒥ.

“ᐊᒥᓱᑦ ᐃᓄᑐᖃᕆᔭᐅᔪᐃᑦ ᑕᐃᒪᓐᓇ ᐅᖃᖃᑦᑕᖅᓯᒪᔪᑦ, ᐃᒪᓐᓇ, ‘ᖃᐅᔨᒪᓚᐅᕐᓂᕈᒪ ᐱᓪᓚᕆᒃᑑᓪᓗᑎᒃ ᖃᐅᔨᒋᐊᕐᕕᖃᕐᓂᐅᔪᓄᑦ, ᐅᐸᒍᑎᓯᒪᓇᔭᓚᐅᖅᑐᖓ ᑕᒪᓐᓇ ᓂᓪᓕᐊᔾᔪᑎᒋᓗᒍ.’ ᐃᓱᒪᓇᓕᕐᒪᑦ ᐃᔨᕋᖅᑐᖅᓯᒪᖅᑰᔨᓂᖓᓐᓂᒃ.” ᐅᖃᖅᖢᓂ.

“[ᓄᓇᓕᐸᐅᔭᖅ] ᓱᓕᓪᓚᕆᒃᖢᑎᒃ ᓴᐃᒻᒪᖃᑎᒌᒃᓯᒪᓕᕆᐊᖃᕐᓂᕐᒥ ᐱᓕᕆᓂᖃᕈᒪᒃᐸᑕ, ᐱᕕᒃᓴᖅᑕᖃᖅᑎᑕᐅᔭᕆᐊᖃᕐᒪᑕ ᐃᓚᐅᖃᑕᐅᑎᑕᐅᓂᐊᖅᑎᓪᓗᒋᑦ ᐃᓄᒋᐊᒃᑐᓂᕐᒥᐅᖑᓪᓗᑎᒃ ᓄᓇᖃᖅᑳᖅᓯᒪᔪᐃᑦ. ᐃᓄᒋᐊᒃᑐᓂᕐᒥᐅᑦ ᓄᓇᖃᖅᑳᖅᓯᒪᔪᐃᑦ ᓱᓕ ᓄᓇᖃᖅᑳᖅᓯᒪᔫᖕᒪᑕ, ᑕᐃᒪᓕ ᐱᔪᖕᓇᐅᑎᖃᕐᒪᑕ ᖃᐅᔨᒋᐊᕐᕕᐅᕙᒋᐊᖃᕐᓂᕐᒥᓐᓂᒃ ᓱᓇᑐᐃᓐᓇᓄᑦ ᐱᔾᔪᑎᖃᖅᑐᓂᒃ ᐊᒃᑐᒐᐅᓯᒪᕝᕕᒋᓕᕐᓂᐊᖅᑕᒥᖕᓄᑦ.”

ᖃᕆᑕᐅᔭᑎᒍᑦ ᑎᑎᕋᖅᖢᑎᒃ ᑭᐅᔾᔪᑎᒥᖕᓂ ᑕᒪᑐᒧᖓ, ᐋᑐᕙ ᐋᓐᓂᐊᕐᕕᖁᑎᖏᑦ ᑐᓴᒐᒃᓴᓕᕆᔨᖓᑦ ᕆᐱᑲ ᐄᐳᓪᓴᓐ ᐅᖃᓚᐅᕐᑐᖅ ᐋᓐᓂᐊᕐᕕᒃ “ᐱᓕᕆᖃᑎᖃᓪᓚᑦᑖᕐᒪᑕ ᓄᓇᓕᐅᔪᒥ ᐱᓕᕆᐊᖃᖃᑎᒌᒃᑐᓂᒃ ᐃᓚᒋᓪᓗᒋᑦ ᐊᕕᒃᑐᖅᓯᒪᓂᕐᒥ ᐋᓐᓂᐊᕐᕕᐅᔪᑦ, ᐋᓐᓂᐊᕐᕕᖕᒦᑦᑐᓕᕆᓂᕐᒥ ᐅᖃᐅᔾᔪᐃᒋᐊᖅᑎᐅᔪᑦ, ᑕᒪᐃᓐᓂ ᖁᑦᑎᖕᓂᕆᔭᐅᔪᓂ ᒐᕙᒪᒃᑯᓐᓂᑦ, ᐊᒻᒪ ᓄᓇᖃᖅᑳᕐᓯᒪᔪᓂ ᐃᓅᖃᑎᒌᒃᑐᓂᑦ ᐃᓕᕆᓂᖃᖅᐸᓪᓕᐊᓪᓗᑎᒃ ᐸᕐᓇᐅᑎᓕᐅᕐᓂᕐᒧᑦ ᓄᑖᒥᒃ ᐋᓐᓂᐊᕐᕕᒃᑖᕐᓯᒪᓕᕐᓂᒃᓴᒧᑦ.”

ᐋᓐᓂᐊᕐᕕᒃ ᐱᓕᕆᖃᑎᖃᕐᓯᒪᖕᒥᔪᑦ ᓇᖕᒥᓂᖅ ᓄᓇᖃᖅᑳᕐᓯᒪᔪᑦ ᐅᖃᐅᔾᔪᐃᒋᐊᖅᑎᖏᓂᒃ, ᑲᑎᓐᓂᖃᖅᑑᓪᓗᑎᒃ ᑲᑐᔾᔨᖃᑎᒌᖑᔪᓂᑦ ᐱᔾᔪᑎᖃᖅᑎᒋᔭᐅᓪᓗᑎᒃ ᐅᕝᕙᓘᓐᓃᑦ ᐱᔨᑦᓯᕋᖅᑎᐅᔪᓂᒃ ᐱᔭᐅᓯᒪᓕᕆᐊᖃᖅᑐᓄᑦ ᐃᓄᒋᐊᒃᑐᓂᕐᒥᐅᑕᐅᓪᓗᑎᒃ ᓄᓇᖃᖅᑳᕐᓯᒪᔪᓂᑦ, ᐄᐳᓪᓴᓐ ᐅᖃᖅᖢᓂ.

ᕆᒡᔅ ᐅᖃᓚᐅᕐᑐᖅ ᐱᔨᑦᓯᕋᖅᑎᐅᓪᓗᑎᒃ ᑲᑐᔾᔨᖃᑎᒌᖑᔪᑦ ᐃᓚᒋᔭᐅᓪᓗᑎᒃ ᐱᓕᕆᐊᖃᖅᑎᒌᓄᑦ ᑲᔪᓯᑎᑦᑎᓯᒪᓂᐊᕐᒪᑕ ᓄᓇ ᐊᑐᖅᑕᐅᓕᖁᓪᓗᒍ ᐃᓂᒋᔭᐅᕙᓐᓂᐊᕐᓗᓂ ᓴᐃᒻᒪᖃᑎᒌᖕᓂᓕᕆᓂᕐᓄᑦ.

ᐅᖃᖅᖢᓂ ᐊᖏᔪᐊᓗᖕᒥᒃ ᐊᔾᔨᒌᖖᒋᓐᓂᖅᑕᖃᕐᒪᑎᒃ ᐃᒡᓗᑉ ᐃᓗᐊᓃᑦᑐᓄᑦ ᐊᒻᒪ ᓯᓚᒦᑦᑐᓄᑦ. ᓄᓇᒦᓪᓗᑎᒃ ᐱᓕᕆᓂᐅᔪᑦ ᓲᕐᓗ ᐊᒡᒍᐃᖃᑎᒌᒃᐸᖕᓂᐅᔪᑦ ᐃᓄᐃᑦ ᓂᕿᒋᕙᒃᑕᖏᓂᒃ, ᓯᓚᒦᓪᖢᑎᒃ ᓄᓇᒥ ᐱᓕᕆᓂᐅᕙᒃᑐᑦ, ᐃᑲᔪᕈᑎᐅᕙᖕᒪᑕ “ᐊᑦᑕᑕᖅᓯᒪᓕᒃᑲᓐᓂᕐᓂᕐᓄᑦ ᑭᓇᐅᓂᕐᒥᓐᓄᑦ, ᐱᐅᓯᑐᖃᕆᔭᒥᖕᓄᑦ ᐊᒻᒪ ᐊᑕᕝᕕᖃᕐᓂᕆᔭᑦᑎᓐᓄᑦ ᓄᓇᒧᑦ” ᐃᑲᔪᕐᓂᖃᕐᓂᖅᓴᐅᓕᖅᑎᑕᐅᕙᒃᑐᓄᑦ.

ᐃᓚᓗ ᓄᓇ ᑕᐃᒪᖖᒐᓂᑦ ᐃᓚᖓᒍᑦ ᓇᐹᖅᑐᐃᔭᖅᑕᐅᓯᒪᓕᕋᓗᐊᖅᑎᓪᓗᒍ, ᕆᒡᔅ ᐅᖃᒃᑲᓐᓂᓚᐅᕐᑐᖅ ᑲᔪᓯᑎᑦᑎᓯᒪᓂᖅ ᓴᐳᔾᔨᒋᐊᕈᑎᖃᕐᓂᐅᔪᒧᑦ ᓄᓇ ᐊᑐᖅᑕᐅᖃᑦᑕᓕᖁᓗᒍ ᓴᐃᒻᒪᖃᑎᒌᖕᓂᓕᕆᓂᕐᓄᑦ ᑕᐃᒪᐅᔭᕆᐊᖃᓪᓚᕆᖕᒪᑦ ᒪᒥᓴᖅᐸᓪᓕᐊᓂᕐᓂ ᐃᓱᒪᒋᓗᒋᑦ ᐱᔭᕆᑐᔫᓯᒪᓂᐅᓂᖏᑕ ᐱᓕᕆᓂᐅᓯᒪᓕᖅᑐᑦ ᐅᑭᐅᑦ ᐊᑐᖅᐸᓪᓕᐊᓯᒪᓕᖅᑐᓂ.

ᑖᒃᑯᐊ ᐃᓚᖃᖅᐳᑦ ᐃᓄᑑᔭᕆᐊᖃᖅᑎᑕᐅᓯᒪᓂᐅᔪᓂᒃ ᑕᐃᒪᓐᓇᐃᓚᕿᑎᑕᐅᓪᓗᑎᒃ ᓄᕙᒡᔪᐊᕐᓇᖅ-19ᒥᑦ, ᓇᓂᔭᐅᓯᒪᓕᓚᐅᖅᑐᓂᑦ ᐃᓗᕕᖅᑕᐅᓯᒪᔪᑦ ᓄᓇᖃᖅᑳᕐᓯᒪᔪᐃᑦ ᓄᑕᕋᖏᓂᒃ ᐃᓕᓐᓂᐊᕐᕕᐅᕙᓚᐅᖅᑐᓂ ᑲᓇᑕᓕᒫᒥ, ᐊᒻᒪ ᒫᓐᓇᓵᖑᓂᖅᓴᒥ ᓇᔪᖅᑕᐅᓯᒪᓕᕐᓂᐅᓚᐅᖅᑐᓂᑦ ᐋᑐᕙᐅᑉ ᑕᐅᓐᑕᐅᓐᖓᓂ ᕗᕇᑕᒻ ᑳᓐᕗᐃᓂᒃ ᑕᐃᔭᐅᓪᓗᑎᒃ ᓈᒻᒪᒃᓴᖖᒋᔾᔪᑎᖃᖅᑐᓂᑦ.

“ᐊᒃᓱᕈᕐᓇᓪᓚᕆᓚᐅᕐᒪᑦ. ᑲᑎᓐᓂᖃᖅᓯᒪᓗᑕ ᖁᕕᐊᓱᒍᑎᖃᕆᐊᖃᓕᓚᐅᕋᑦᑕ, ᓄᓇᒦᑦᓴᕆᐊᖃᓕᓚᐅᕋᑦᑕ, ᐃᓕᑕᕐᓇᒻᒪᕆᒃᑑᓪᓗᓂ ᐃᑯᐊᓛᖅᑎᑕᐅᖏᓐᓇᕐᑐᖅ ᑲᔪᓯᑎᓯᒪᔭᕆᐊᖃᓚᐅᕋᑦᑎᒍ,” ᕆᒡᔅ ᐅᖃᖅᖢᓂ.

“ᐅᑭᐅᒃ ᒪᕐᕉᒃ ᐊᑐᖅᐸᓪᓕᐊᓯᒪᑎᓪᓗᒋᑦ, ᐅᖃᖅᑕᐅᓯᒪᔪᑐᖃᕐᓂᒃ ᓇᔪᖅᑎᖃᐃᓐᓇᖅᓯᒪᕗᒍᑦ ᑕᐃᒪᓐᓇᑦᓯᐊᖅᑕᐅᖅ ᓄᓇᓕᐸᐅᔭᒧᑦ. ᐃᑲᔪᓚᐅᖅᑎᒍᑦ ᓄᓇᒥ ᐱᓯᒪᓕᖁᓪᓗᑕ ᓴᑐᖅᓯᒪᓕᕈᑎᒋᓂᐊᖅᑕᑦᑎᓐᓂᒃ ᓇᓕᖅᑲᕇᑦᓯᐊᓕᕈᑎᒃᓴᓂᒃ ᐃᓅᓯᑦᑎᓐᓄᑦ.”