ᓄᓇᖃᖅᑳᖅᓯᒪᔪᑦ ᑎᒍᔭᐅᓯᒪᔪᑦ ᐅᓄᕐᓂᖏᑦ “ᓱᓕᙱᓗᐊᕐᑐᐊᓗᐃᑦ,” ᑲᓇᑕ ᑎᒍᔭᐅᓯᒪᕝᕕᖕᓂ ᖃᐅᔨᓴᖅᑎᐅᔪᖅ ᐅᖃᖅᑐᖅ
ᐊᕕᒃᑐᕐᓯᒪᓂᒃᑯᑦ ᓄᓇᖃᖅᑳᖅᑐᑦ ᒐᕙᒪᑐᖃᒃᑯᑦ ᐊᓄᒡᓚᒃᓰᕕᖏᓐᓃᑦᑐ ᐃᒪᐃᓕᖓᓕᒑᔪᑦ ᐱᖓᓱᓂᒃ ᑎᒍᔭᐅᔪᓂᒃ ᐊᑕᐅᓯᖅ ᓄᓇᖃᖅᑳᖅᓯᒪᔫᓗᓂ
ᐅᓇ ᓇᓗᓇᐃᒃᑯᑎ ᓴᖅᑭᑎᑦᑎᓯᒪᔪᖅ ᐳᓴᓐᑎᑎᒍᑦ ᖃᔅᓯᐅᓂᖏᓐᓂᒃ ᓄᓇᖃᖅᑳᖅᑐᑦ ᑎᒍᓯᓯᒪᔪᑦ ᐊᕐᕌᒍᒧᑦ ᐱᒋᐊᕐᓯᒪᓪᓗᓂ 2001-ᒥᑦ. ᐊᕕᒃᑐᕐᓯᒪᓂᒃᑯᑦ ᓄᓇᖃᖅᑳᖅᑐᑦ ᑎᒍᔭᐅᕙᒃᑐᑦ ᐅᓄᕐᓯᕙᓪᓕᐊᓂᖏᓐᓂᒃ ᐅᕙᙵᑦ 17.6 ᐳᓴᓐᑎᒥ 2001-ᒥᑦ ᒪᐅᖓ 30.4 ᐳᓇᓐᑎ 2020-ᒥᑦ. (ᐃᑲᔪᖅᑕᐅᕝᕕᓕᕆᔨᒃᑯᓐᓂᑦ ᖃᐅᔨᓴᖅᑎᑦ ᑲᓇᑕᒥ)
For an English version of this story, see Indigenous incarceration rate “a travesty,” Canada’s prison watchdog says
ᓇᓗᓇᐃᔭᖅᑕᐅᓯᒪᓂᒃᑯᑦ ᓄᓇᖃᖅᑳᖅᑐᑦ ᑎᒍᔭᐅᓯᒪᔪᑦ ᑲᓇᑕᐅᑉ ᐊᓄᒡᓚᒃᓰᕕᖏᓐᓂᒃ ᐅᓄᕐᓯᕙᓪᓕᐊᑐᐃᓐᓇᕐᓂᖏᓐᓄᑦ, ᐃᒪᐃᓕᑐᐃᓐᓇᕆᐊᖃᓕᕐᑐᖅ, ᐱᖓᓱᓂᒃ ᑎᒍᔭᐅᔪᓂᒃ ᐊᑕᐅᓯᖅ ᓄᓇᖃᖅᑳᖅᓯᒪᔫᓗᓂ, ᐅᓇ ᐃᑲᔪᖅᑕᐅᕝᕕᓕᕆᔨᒃᑯᓐᓂᑦ ᖃᐅᔨᓴᖅᑎ ᑲᓇᑕᒥ ᐅᖃᓚᐅᕐᑐᖅ ᔭᓄᐊᕆ 21-ᖑᑎᓪᓗᒍ ᐅᖃᐅᓯᒃᓴᑎᒍᑦ.
ᔨᖑ (Zinger), ᖃᐅᔨᓴᖅᑎᒋᔭᐅᔪᖅ ᒐᕙᒪᑐᖃᒃᑯᑦ ᐊᓄᓪᓚᒃᓰᕕᖏᓐᓄᑦ, ᐱᓕᕆᐊᖃᓕᖅᑎᑕᐅᓯᒪᓪᓗᓂ ᔭᓄᐊᕆ 2017-ᒥᑦ.
ᑕᐃᔅᓱᒪᓂ, ᓄᓇᖃᖅᑳᖅᓯᒪᔪᑦ 25 ᐳᓴᓐᑎᒋᔭᐅᓚᐅᕐᓯᒪᔪᑦ ᑲᑎᖢᑎᒃ ᐊᓄᓪᓚᒃᓰᕕᖕᒦᑦᑐᑦ ᑲᓇᑕᒥ, ᐅᖃᖅᑐᖅ.
ᑭᓯᐊᓂᓕ ᐊᕐᕌᒍᑦ ᐱᖓᓱᑦ ᐊᓂᒍᕐᑎᓪᓗᒋᑦ, ᐅᓇ ᐊᕕᒃᑐᖅᓯᒪᓂᒃᑰᖓᔪᖅ ᖁᕝᕙᖅᐹᓪᓕᓚᐅᕐᑐᖅ 30 ᐳᓴᓐᑎᒥ.
“ᑕᒪᓐᓇ ᑕᐅᑐᒃᖢᒍ, ᖃᓄᐃᑉᐸᓪᓕᐊᓂᐅᔪᖅ ᐅᑯᓇᙵ ᓄᓇᖃᖅᑳᖅᑐᓂᒃ ᐊᓄᒡᓚᒃᓰᕕᖕᒦᑦᑐᑦ 33 ᐳᓴᓐᑎᖏᓐᓃᓕᕋᔭᖅᑐᖅ ᐊᕐᕌᒍᑦ ᐱᖓᓱ ᐊᓂᒍᖅᐸᑕ,” ᔨᖑ ᐅᖃᖅᑐᖅ.
ᐅᓇ ᓇᓗᓇᐃᒃᑯᑎ ᐊᔾᔨᒌᙱᓐᓂᖏᓐᓂᒃ ᓴᖅᑭᑎᑦᑎᓯᒪᔪᖅ ᓄᓇᖃᖅᑳᖅᑐᑦ ᐊᒻᒪ ᓄᓇᖃᖅᑳᕐᓯᒪᙱᑦᑐᑦ ᑎᒍᔭᓯᒪᔪᑦ ᐅᓄᕐᓂᖏᓐᓂᒃ ᐱᒋᐊᕐᓯᒪᓪᓗᓂ 2009-ᒥᑦ. ᓇᓗᓇᐃᒃᑯᑎ ᓴᖅᑭᑎᑦᑎᓯᒪᔪᖅ ᐳᓴᓐᑎᑎᒍᑦ ᓇᓗᓇᐃᕐᑕᐅᓯᒪᔪᑦ ᓄᓇᖃᖅᑳᕐᓯᒪᔪᑦ ᐊᓯᖏᑦ ᐅᓄᕈᓐᓃᕐᐹᓪᓕᕐᓂᖏᓐᓂᒃ 79.5 ᐳᓴᓐᑎᒥᑦ 2009-ᖑᑎᓪᓗᒍ ᐅᕗᖓ 69.9 ᐳᓴᕐᑎ 2019-ᒥᑦ. ᑕᒪᐅᓇᑦᑕᐃᓐᓇᖅ, ᐳᓴᓐᑎᑎᒍᑦ ᓄᓇᖃᖅᑳᖅᓯᒪᔪᑦ ᓇᓗᓇᐃᖅᑕᐅᓯᒪᓂᒃᑯᑦ ᐅᓂᕐᓯᕚᓪᓕᕐᓯᒪᔪᑦ 20.5 ᐳᓴᓐᑎᒥᑦ 2009-ᖑᑎᓪᓗᒍ ᒪᐅᖓ 30.1 ᐳᓴᓐᑎ 2019-ᒥᑦ. (ᐃᑲᔪᖅᑕᐅᕝᕕᓕᕆᔨᒃᑯᓐᓂᑦ ᖃᐅᔨᓴᖅᑎᑦ ᑲᓇᑕᒥ)
ᐃᓱᒪᒋᓪᓗᒍ ᓄᓇᖃᖅᑳᖅᑐᑦ 5 ᐳᓴᓐᑎᒋᔭᐅᑐᐃᓐᓇᕐᓂᖏᑦ ᑲᓇᑕᒥᐅᑕᓕᒫᓂᑦ, ᓄᓇᖃᖅᑳᖅᑐᑦ ᑎᒍᔭᐅᓂᖏᑦ 30 ᐳᓴᓐᑎᐅᓕᕋᔭᕐᓂᖓ ᓈᒻᒪᙱᓗᐊᖅᑐᐊᓗᒃ.
ᓄᓇᖃᖅᑳᖅᑐᓄᓪᓕ ᐊᕐᓇᓄᑦ, ᓇᐃᓴᐅᑎᑎᒍ ᐱᐅᙱᓐᓂᕐᓴᐅᔪᖅ: ᐊᕐᓇᐃᑦ ᑲᓇᑕᒥ ᐊᓄᒡᓚᒃᓰᕕᖏᓐᓃᑦᑐᓂᒃ, 42 ᐳᓴᓐᑎᖏᑦ ᓄᓇᖃᖅᑳᕐᓯᒪᔪᑦ.
ᑕᒪᓐᓇᓗ ᑕᐃᒪᐃᑉᐸᓪᓕᐊᓪᓗᓂ ᖃᐅᔨᔭᕙᓪᓕᐊᒍᑎᓂᒃ ᐱᓕᕆᐊᖃᕋᓗᐊᖅᑎᓪᓗᒋᑦ ᒪᐅᓇ ᕈᐃᐅᓪ ᑲᒥᓴᓐᑯᑎᒍᑦ, ᑲᓇᑕᒥ ᖃᐅᔨᓇᓱᖕᓂᒃᑯᑦ, ᐃᖃᖅᑐᐃᕕᓕᕆᔨᓂᒃ ᐊᒻᒪᓗ ᑕᒪᑐᒥᖓ ᐱᓕᕆᐊᖃᕐᓂᐊᕐᓂᕋᕐᓯᒪᒐᓗᐊᖅᑎᓪᓗᒋᑦ ᒪᓕᒐᓕᕆᔨᐅᔪᑦ.
ᑭᓯᐊᓂᓕ ᐊᕐᕌᒍᓂ ᐊᓂᒍᖅᑐᓂᒃ, ᓇᓕᐊᒃ ᒐᕙᒪᓕᕆᔨᒻᒪᕆᐅᔪᖅ ᖃᓄᐃᓕᐅᕈᑎᐅᕙᓪᓕᐊᔪᓂᒃ ᐊᓯᙳᖅᑎᑦᑎᓯᒪᙱᓚᖅ.
“ᑲᓇᑕᐅᑉ ᐊᓄᓪᓚᒃᓰᕕᖏᓐᓂᒃ ᓄᓇᖃᖅᑳᖅᓯᒪᔪᖃᕐᓂᖓ ᓈᒻᒪᙱᓕᐅᕈᑎᒻᒪᕆᐅᕗᖅ ᑲᓇᑕᒥ,” ᔨᖑ ᐅᖃᖅᑐᖅ.
ᐅᖃᕋᓗᐊᖅᖢᓂ ᐊᒥᓱᑦ ᓄᓇᖃᖅᑳᖅᑐᓂᒃ ᑭᒡᒐᖅᑐᐃᓂᐅᔪᖅ ᐃᖃᖅᑐᐃᕕᓕᕆᓂᐅᑉ ᓯᓚᑖᒎᖓᓂᖓᓂᒃ, ᐊᒻᒪᓗ ᑕᐃᒪᐃᓗᐊᖅᓯᒪᓪᓗᓂ ᐅᑯᓇᙵᑦ ᐃᑲᔪᖅᑕᐅᕝᕕᓕᕆᔨᒃᑯᓐᓂᑦ ᑲᓇᑕᒥ.
“ᑲᓇᑕᒥ ᐃᑲᔪᖅᑕᐅᕝᕕᓕᕆᔨᒃᑯᑦ ᐱᓕᕆᐊᒃᓴᖏᓐᓂᒃ ᐅᔾᔨᕆᓂᕐᓴᐅᔭᕆᐊᖃᕐᒪᑕ, ᖃᐅᔨᒪᓗᑎᒃ ᐋᖅᑭᒋᐊᕈᑎᒃᓴᐅᕙᒃᑐᑦ ᓈᒻᒪᙱᓗᐊᖅᐸᖕᓂᖏᓐᓂᒃ,” ᔨᖑ ᐅᖃᖅᑐᖅ.
“ᐱᔨᑦᑎᕋᐅᑎᐅᔪᖅ ᐊᓯᙳᖅᑎᑦᑎᔭᕆᐊᖃᒻᒪᕆᖕᒪᑕ ᑎᒍᔭᐅᓯᒪᓂᑯ ᐅᑎᖅᑎᑕᐅᔪ ᐅᓄᕈᓐᓃᕐᑎᑕᐅᓂᕐᓴᐅᓗᑎᒃ, ᐱᐅᓂᕐᓴᓂᒃ ᐋᖅᑭᒃᓱᐃᓯᒪᓗᑎᒃ ᓄᓇᖃᖅᑳᖅᑐᓄᑦ ᐱᕋᔭᒃᓯᒪᔪᑦ ᐊᓂᑎᑕᐅᓵᓕᕈᑎᒋᓇᔭᖅᑕᖏᓐᓂᒃ ᐊᒻᒪᓗ ᖁᐊᕐᓵᕐᓇᙱᑦᑐᒃᑯᑦ ᓄᓇᖃᖅᑳᖅᑐᓂᒃ ᓄᓇᖏᓐᓄᑦ ᐅᑎᖅᑎᑕᐅᑎᑦᑎᕙᒡᓗᑎᒃ.”
ᑕᒪᓐᓇᓕ ᑕᐃᒪᐃᑎᑕᐅᓂᐊᕐᓗᓂ, ᒐᕙᒪᑐᖃᒃᑯᑦ ᑕᒪᑐᒥᖓ ᐱᓕᕆᓕᕆᐊᖃᖅᑐᑦ ᐊᒻᒪ ᐱᓇᓱᐊᒐᖃᒻᒪᕆᒡᓗᑎᒃ, ᔨᖑ ᐅᖃᖅᑐᖅ.
“ᓈᒻᒪᙱᓗᐊᕐᒪ ᓄᓇᖃᖅᑳᖅᑐᑦ ᑲᓇᑕᒥᐅᑕᑦ ᑎᒍᔭᐅᓯᒪᓂᕐᓴᐅᕙᖕᓂᖏᓐᓂᒃ 6-ᓂ 7-ᓄ ᐅᓄᕐᑐᐃᖅᑕᐅᓂᕐᓴᐅᓪᓗᑎᒃ ᑲᓇᑕᓕᒫᖅ ᑕᐅᑐᒃᖢᒍ ᐊᑐᕐᓂᕐᓴᐅᕙᒃᑕᖏᓐᓂᒃ. ᑕᒪᓐᓇ ᐱᓇᓱᓪᓚᕆᖕᓂᒃᑯᑦ ᐊᒻᒪ ᑐᐊᕕᕐᓇᕐᓂᒃᑯᑦ ᐱᓕᕆᐊᖑᔭᕆᐊᖃᖅᑐᖅ ᐅᓇ ᑲᓇᑕᒥ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᒃ ᓱᕋᐃᒍᑎᐅᓯᒪᖃᑦᑕᕐᓂᑯ,” ᐅᖃᖅᑐᖅ.
(0) Comments