ᓄᔭᐃᔭᐃᔩᑦ ᐱᓕᕆᐊᒥᓄᑦ ᐅᑎᖅᐳᑦ ᐃᖃᓗᐃᑦ ᒪᑐᐃᖅᐸᓪᓕᐊᓕᖅᑎᓪᓗᒍ
ᕼᐊᐃᓗ ᕼᐊᓐᑎ ᓯᕗᓪᓕᖅᒥ ᒪᑐᐃᖅᑎᓪᓗᒍ ᐱᔭᒃᓴᖃᕈᓘᔭᓚᐅᖅᑐᖅ ᐅᕙᓂ ᑭᖕᔅ ᑲᑦ ᑕᖅᑮᖕᓂᒃ ᒪᕐᕉᖕᓂᒃ ᑮᓇᐅᔭᓕᐅᑦᑎᐊᙱᒻᒪᕆᓚᐅᖅᑎᓪᓗᒋᑦ
ᑭᖕᔅ ᑲᑦᒥ ᓇᖕᒥᓂᖃᖅᑎᐅᔪᖅ ᕼᐊᐃᓗ ᕼᐊᓐᑎ, ᓴᐅᒥᐊᓂ, ᐊᒻᒪ ᐃᑲᔪᖅᑎᖓ ᓄᔭᐃᔭᐃᔨ ᓱᕋᕕ ᐊᔅᕆᔅ ᐱᓕᕆᐊᖏᓐᓄᑦ ᐅᑎᖅᐳᒃ ᓄᔭᐃᔭᐃᑲᑕᒃᖢᑎᒃ ᑕᓪᓕᕐᒥᐅᑎᓪᓗᒍ. ᓄᓇᕗᒥᑦ ᒐᕙᒪᒃᑯᑦ ᐱᓇᓱᐊᕈᓯᐅᓚᐅᖅᑐᒥ ᐱᔨᑦᑎᕋᐅᑎᓂᒃ ᒪᑐᐃᖅᓯᑎᑦᑎᒃᑲᓐᓂᖅᑎᓪᓗᒋᑦ ᑕᖅᑭᕐᒥ ᐃᓚᓪᓗᒍ ᒪᑐᓯᒪᑎᑦᑎᐊᓪᓚᓚᐅᖅᑎᓪᓗᒋᑦ ᐃᖃᓗᖕᓂᑦ. ᑭᓯᐊᓂᓕ ᑎᓴᒪᓂᒃ ᓄᑖᓂᒃ ᐋᓐᓂᐊᖃᖅᑐᓂᒃ ᑐᓴᖅᑎᑕᐅᓚᐅᖅᑎᓪᓗᒋᑦ ᔫᓂ 11-ᖑᑎᓪᓗᒍ, ᕼᐊᓐᑎ ᐃᓱᒫᓘᑎᖃᖅᑐᖅ ᒐᕙᒪᒃᑯᑦ ᒪᑐᓯᒃᑲᓐᓂᕐᓂᐊᕆᐊᒃᓴᖏᓐᓂᒃ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)
For an English version of this story, see Barbers back to work as Iqaluit starts to reopen
ᑕᓪᓕᕐᒥᐅᔪᖅ ᐃᖃᓗᖕᓂᑦ ᐊᒻᒪᓗ ᓯᕗᓪᓕᖅᐹᒥᒃ ᑕᖅᑮᖕᓂᒃ ᒫᕐᕉᖕᓂᒃ, ᕼᐊᐃᓗ ᕼᐊᓐᑎ, ᓇᖕᒥᓂᖃᖅᑎᐅᔪᖅ ᑭᖕᔅ ᑲᑦ ᓄᔭᐃᔭᐃᕝᕕᒃᒥᓐ, ᑮᓇᐅᔭᓂ ᐃᓕᓯᔭᖅᑐᖅᐳᖅ ᑮᓇᐅᔭᖃᕐᕕᖓᓄᑦ.
“ᐃᓚᙱᓐᓂ ᖃᐃᑦᑎᓚᐅᒐ,” ᐅᖃᙳᐊᖅᑐᖅ ᐃᓚᖓ ᓄᔭᐃᔭᖅᑕᐅᔭᖅᑐᖅᑐᖅ ᐃᓴᒃᓯᒪᓪᓗᓂ.
ᕼᐊᓐᑎᐅᑉ ᖁᖓᑦᑐᑦ ᓇᓗᓇᙱᑦᑐᖅ ᐃᔨᖏᓐᓄ ᑮᓇᑉᐸᒃᓯᒪᒐᓗᐊᖅᑎᓪᓗ.
“ᐊᑯᓂᓗᐊᕌᓗᒃ ᑮᓇᐅᔭᓂ ᑕᑯᙱᓐᓇᒪ,” ᐅᖃᖅᑐᖅ, ᑮᓇᐅᔭᖃᕐᕕᒧᐊᖅᖢᓂᒋᑦ ᐊᒻᒪ ᐱᓕᕆᕝᕕᐊᓄᙵᐅᓕᕆᓪᓗᓂ ᑭᖑᓪᓕᖅᐹᖅ ᓄᔭᐃᔭᖅᑕᖓᑕ ᓄᔭᖏᓐᓂᒃ ᓴᓂᕋᓱᓕᖅᖢᓂ.
ᓇᖕᒥᓂᖅ ᑲᒪᒋᔭᐅᓂᖅᒧᑦ ᐱᔨᑦᑎᕋᐅᑏᑦ ᒪᑯᑎᑐᓇᖅ ᓄᔭᐃᔭᐃᕝᕕᒃᑎᑐᑦ, ᓄᔭᓕᕆᕝᕕᒃᑎᑐᑦ ᐊᒻᒪᓗ ᐱᐅᓇᓱᒍᒪᓂᖅᒧᑦ ᑲᒪᒋᔭᐅᕝᕖᑦ ᒪᑐᐃᕈᓐᓇᖅᓯᑎᑕᐅᓚᐅᖅᑐᑦ ᔫᓂ 11-ᒥᑦ ᒪᑐᓯᒪᑎᑕᐅᓚᐅᖅᖢᑎ ᐄᐳᕉ ᕿᑎᐊᓂ ᐃᖃᓗᖕᓂ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᕕᒡᔪᐊᕐᓇᖅᒥᒃ ᐱᑕᖃᓕᖅᑎᓪᓗᒍ. ᓄᓇᕗᒥᑦ ᒐᕙᒪᒃᑯᑦ ᑕᒪᑐᒥᖓ ᑐᓴᖅᑎᑦᑎᓚᐅᖅᓯᒪᔪ ᔫᓂ 7-ᐅᑎᓪᓗᒍ ᐊᒻᒪᓗ ᑕᐃᒪᙵ ᕼᐊᓐᑎ ᐅᖄᓚᕝᕕᐅᖃᑦᑕᐃᓐᓇᕐᓂᕋᖅᑐᖅ.
ᑖᓐᓇ ᐊᒻᒪ ᓄᔭᐃᔭᐃᔨᐅᖃᑕᐅᔪᖅ ᐃᑲᔪᖅᑎᖓ, ᓱᕋᕕᐅᓪ ᐊᔅᓱᔅ ᓄᔭᓕᕆᓂᐊᖅᑕᖏᓐᓂᒃ ᐅᐸᒃᑕᐅᕘᒃ — ᐊᑖᑕᐅᔪᖅ, ᔫᒥ ᒋᑎᐅᓂ ᐊᒻᒪ ᐃᕐᓂᖓ.
ᒋᑎᐅᓂ ᒪᓐᑐᕆᐊᓪ ᑲᓃᑎᐊᓐᓂᒃ ᐃᑲᔪᖅᑎᐅᔪᖅ ᐊᒻᒪᓗ ᑭᐱᔭᐅᔭᕆᐊᖃᖅᖢᓂ.
“ᐊᖏᕐᕋᖅᓯᒪᔭᕆᐊᖃᕐᓇᖅ ᖁᕕᐊᒋᓚᐅᖅᐱᐅ?” ᑮᑎᐅᓂ ᐊᐱᕆᔪᖅ ᕼᐊᓐᑎ ᓄᔭᖓᓂᒃ ᐱᓕᕆᐊᖃᖅᐸᓪᓕᐊᓕᖅᑎᓪᓗᒍ. “ᐋᒃᑲ, ᖁᕕᐊᒋᓚᐅᙱᑕᕋ,” ᕼᐊᓐᑎ ᐅᖃᖅᑐᖅ. “ᐊᖏᕐᕋᖅᓯᒪᓚᐅᖅᑐᖓ, ᐅᑕᕿᑐᐃᓐᓇᖅᖢᖓ ᑐᓴᕐᓂᖅᑐᒥ ᑐᓴᒐᒃᓴᒥ.”
ᑭᖕᔅ ᑲᑦ ᒪᑐᐃᖓᓕᕐᑐᖅ ᐊᕐᕌᒎᓕᖅᑐᓂᒃ 7-ᓂ ᐃᖃᓗᖕᓂ, ᑭᓯᐊᓂᓕ ᑕᖅᑭᐅᓵᖅᑑᒃ ᒪᕐᕉᒃ ᐊᒃᓱᕈᕐᓇᓛᖑᓐᓇᕆᔭᖏᑦ ᐱᓕᕆᐊᖓᓄᑦ.
2008-ᒥ, ᕼᐊᓐᑎ ᓄᔭᐃᔭᐃᔨᐅᓚᐅᖅᓯᒪᖅ ᑳᒍᕆᒥ ᑮᓇᐅᔭᓕᐅᕐᓇᓗᐊᖅᑎᓐᓇᒍ. ᐅᖃᓚᐅᖅᑐᖅ ᑕᐃᓐᓇ ᐊᒃᑐᐃᙱᓐᓂᖅᓴᐅᓚᐅᙱᓐᓂᕋᖅᑕᖓᓕ ᐆᑐᓇᖅ ᐋᓐᓂᐊᕕᒡᔪᐊᕐᓇᖅᑐᑎᑐᑦ.
““ᐅᓇ ᓄᔭᐃᔭᐃᕝᕕᒃ ᓄᖅᑲᖓᓚᐅᑲᖕᓂᐊᕐᓗᓂ ᖃᓄᐃᙱᑦᑐᖅ,” ᕼᐊᓐᑎ ᐅᖃᖅᑐᖅ. “ ᐋᓐᓂᐊᕕᒡᔪᐊᕐᓇᕐᒨᙱᑦᑐᖅᓕ.”
ᐅᖃᓚᐅᖅᑐᖅ ᑮᓇᐅᔭᓕᐅᕈᑎᖃᑦᑎᐊᓚᐅᙱᓐᕋᖅᑐᖅ ᑕᐃᒪᙵ ᐄᐳᕉᑉ ᕿᑎᐊᓂ ᐊᖏᕐᕋᖅᓯᒪᑲᑕᖁᔭᐅᓕᖅᑎᓪᓗᒋᑦ.
“ᑐᒃᓯᐊᖃᑦᑕᑐᐃᓐᓇᓚᐅᖅᑐᖓ ᑕᒪᓐᓇ ᐊᓂᒍᐊᓂᖁᓪᓗᒍ,” ᐅᖃᖅᑐᖅ ᑭᖑᓂᐊᒍᑦ, ᓄᖃᖓᓚᐅᑲᒃᖢᓂ ᑭᐱᕙᓪᓕᐊᔭᖏᑦᑕ ᐊᑯᓐᓂᐊᒍᑦ. “ᑕᒪᓐᓇ ᖃᓄᐃᓕᐅᕈᑎᒋᓗᐊᕈᓐᓇᙱᒻᒥᒐᒃᑯ.”
ᔨᕌᑦ ᒋᐸᓐᔅ, ᐊᒥᐊᖅᑎ ᓄᐊᑦᕕᐅᑯᓐᓄᑦ, ᐃᒃᓯᕚᖅᑐᖅ ᑐᓵᖅᓈᖅᑎᑕᐅᓪᓗᑎᒃ ᓂᐱᑎᑦᑐᒥ ᐅᓇ ᔮᑭ ᕗᐃᐊᓴᓐ ᐃᙱᖅᖢᓂ ᕼᐊᐃᐅ ᐊᓐ ᕼᐊᐃᐅ.
ᒋᐸᓐᔅ ᑭᖑᓪᓕᖅᐹᖅ ᑭᐱᔭᐅᔾᔪᓯᖓᓂᒃ ᑭᐱᔭᐅᔪᒪᔪᖅ ᕼᐊᓐᑎᒧ ᐅᖃᖅᖢᓂ.
“ᑕᐃᓐᓇᓕ ᑕᑯᖅᑲᐅᙱᒃᑯᕕᐅ ᖃᓄᖅ ᑭᐱᓯᒪᓂᖓᓂᒃ ᖃᓄᕐᓕ ᑭᐱᔭᐅᔪᒪᓇᔭᖅᑲᐅᕕ?” ᕼᐊᓐᑎ ᐊᐱᕆᔪᖅ.
“ᐃᓛᓐᓂ ᑭᐱᔭᐅᔭᕌᖓᒪ ᓄᔭᖃᕈᓐᓃᖅᑎᑕᐅᖃᑦᑕᕋᒪ,” ᐅᖃᖅᑐᖅ, ᑖᒃᑯᐊᒡᓗ ᐃᒡᓚᖅᓯᓪᓗᑎᒃ. ᕼᐊᓐᑎ ᐱᐊᓂᒃᑲᒥ ᐅᖃᓕᖅᑐᖅ ᒋᐸᓐᔅᒧᑦ ᑭᖑᓪᓕᖅᒥᒃ ᖁᓛᓂ ᐲᕐᓯᕕᐅᓗᓂ 2 ᐃᓐᓯᔅᓂᒃ 3ᐃᓐᓯᔅᓄᑦ ᐊᒻᒪᓗ ᓴᓂᕋᖏ ᓄᔭᐃᔭᐅᑎᒧᓐ.
ᑮᓇᐅᔭᓕᐅᕈᑎᖓᓕ ᐅᑎᕋᓗᐊᖅᑎᓪᓗᒍ ᑖᒃᑯᐊᒡᓕ ᕼᐊᓐᓂ ᐊᒻᒪ ᐊᔅᓱᔅ, ᐱᒋᐊᓕᓵᓚᐅᖅᓯᒪᔫᑉ ᒪᑐᔭᐅᓯᒪᓂᐅᑉ ᓯᕗᓂᐊᒍᑦ ᖁᕕᐊᓱᖕᓂᕋᖅᑑᑦ ᐅᑎᕈᓐᓇᕐᓂᖏᓐᓂᒃ ᖁᕕᐊᒋᔭᖏᓐᓂᒃ ᐱᓕᕆᐊᖏᓐᓄᑦ.
“ᐅᓇ ᐃᖅᑲᓇᐃᔮᖑᖕᒪ ᖁᕕᐊᒋᓪᓗᒍ —” ᕼᐊᓐᑎ ᐅᖃᖅᑐᖅ, ᑭᓯᐊᓂᓕ ᐅᖃᒃᑲᓐᓂᑲᐅᖅᑐᖅᖢᓂ “— ᐊᓕᐊᓇᐃᒋᒻᒪᕆᒃᖢᒍ.”
“ᖁᕕᐊᓇᕐᒪᑦ ᓄᔭᓕᕆᔭᕗᑦ ᖁᕕᐊᓱᓕᕌᖓᑕ,” ᐅᖃᖅᑐᖅ ᐊᔅᓱᔅ.
ᐃᖅᑲᓇᐃᔮᖏᓐᓄᑦ ᐅᑎᖅᑎᓪᓗᒋ ᐊᒃᓱᐊᓗᒃ ᐱᔭᒃᓴᖃᕈᓘᔭᖅᑐᑦ, ᑖᓐᓇᓗ ᑭᖕᔅ ᑲᑦ ᐱᓇᓱᐊᕈᓯᓕᒫᒥ ᐃᓂᒃᓴᓕᐅᕌᓂᒃᓯᒪᓪᓗᓂ. ᐃᓛᓐᓂ ᐃᓄᐃᑦ ᑕᑯᒋᐊᓚᐅᖅᐸᒃᑐᑦ ᕼᐊᓐᑎ ᓴᓇᑎᓪᓗᒍ ᐊᒻᒪᓗ ᐃᓂᓕᐅᓕᖅᐸᒃᖢᓂᒋᑦ. ᐊᑕᐅᓰᖅᖢᓂᓘᓐᓃᑦ ᐃᒡᓗᒃᑐᑦ ᑎᒍᒥᐊᕆᐊᖃᓕᓚᐅᖅᑐᖅ ᐅᖄᓚᐅᑏᖕᓂᒃ, ᐱᖃᑖ ᐅᑕᕿᖁᓪᓗᓂᐅᒃ ᐱᖃᑖᓂᒃ ᐅᖃᖃᑎᖃᕐᓂᖓᓂᒃ, ᑕᒪᕐᒥᒡᓗ ᐃᓂᒃᓴᓕᐅᓕᖅᖢᓂᒋᒃ.
ᐅᓇ ᖁᕕᐊᓇᖅᑐᖅ ᖃᐅᑕᒫᑦ ᐊᑐᑲᑕᓵᖅᑐᒥᓐ, ᕼᐊᓐᑎ ᐅᖃᖅᑐᖅ, ᑭᓯᐊᓂᓕ ᑎᓴᒪᓂᒃ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᖃᓕᕐᒪᑦ ᐃᖃᓗᖕᓂ ᔫᓂ 11-ᐅᑎᓪᓗᒍ, ᐊᒻᒪᓗ ᐃᓱᒪᙱᑦᑕᕆᐊᒃᓴ ᐃᒪᓐᓇ ᐅᓄᖅᓯᒃᑲᓐᓂᖅᐸᑕ ᖃᓄᐃᓐᓇᔭᕆᐊᒃᓴᖏᓐᓂᒃ.
“ᐅᑎᖅᑐᒍᑦ ᐊᒻᒪ ᐅᑎᖅᓯᒪᐃᓐᓇᕐᓂᐊᓕᖅᖢᑕ,” ᕼᐊᓐᑎ ᐅᖃᖅᑐᖅ ᐅᖄᓚᐅᑎᒃᑯᑦ. “ᑭᓯᐊᓂᓕ ᖃᐅᔨᒪᙱᑦᑐᒍᑦ ᖃᓄᖅ ᐊᑯᓂᐅᑎᒋᓂᐊᕐᒪᖔᑦ.”
(0) Comments