ᓵᑦ ᐳᕆᐊᓪ ᐋᖅᑭᒃᓱᐃᕙᓪᓕᐊᔪᖅ ᑎᑭᓴᖅᑕᐅᓯᒪᔪᓂᒃ ᓂᕆᔭᒃᓴᓂᒃ ᐅᕙᓂ ᓯᓛᑉ ᓵᑦ ᓂᐅᕕᕐᕕᕋᓛᒥᑦ. (ᐊᔾᔨᙳᐊᖅ ᐅᕙᙵᑦ ᓵᑦ ᐳᕆᐊᓪ)

ᓄᕙᒡᔪᐊᕐᓇᖅ-19 ᑲᖏᖅᖠᓂᕐᒧᐊᕐᐳᖅ “ᐃᒪᓐᓇᑳᓪᓛᓗᒃ,” ᐅᖃᖅᑐᖅ ᓂᐅᕕᕐᕕᕋᓛᒥ ᓇᖕᒥᓂᖃᕐᑐᖅ

ᓇᖕᒥᓂᖃᖅᑎᐅᔪᖅ ᐊᓂᒍᐃᔪᓐᓇᕐᑐᖅ ᓂᕆᔭᒃᓴᑦᑎᐊᕙᖕᓂ ᓴᓇᕙᒃᖢᓂ, ᐃᓚᖃᖅᖢᓂᒋ “ᓇᒡᓕᖕᓂᕐᒥᒃ”

By ᔭᐃᓐ ᔪᐊᔾ

For an English version of this story, see COVID-19 hit Rankin Inlet with a “bam,” says canteen owner

ᓄᕙᒡᔪᐊᕐᓇᖅ-19 ᑲᖏᖅᖠᓂᕐᒧᐊᖅᐳᑦ, ᓄᓇᕗᑦ ᓄᓇᓕᖏᓐᓂᒃ ᐊᖏᔪᓂᒃ ᑐᒡᓕᕆᔭᐅᔪᖅ, “ᐃᒪᓐᓇᑳᓪᓛᓗᒃ,” ᐆᒪ ᓯᓛᑉ ᓵᑦ ᓂᐅᕕᕐᕕᕋᓛᒥ ᓴᖕᒥᓂᖃᖅᑐᖅ ᐅᖃᖅᑕᖓᒍᑦ.

ᓄᕕᐱᕆ ᐱᒋᐊᓕᓵᕐᑎᓪᓗᒋ ᑲᖏᖅᖠᓂᕐᒥᐅᑦ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᖃᓚᐅᙱᑦᑐᖅ ᓇᓗᓇᐃᕐᑕᐅᓯᒪᔪᓂᒃ.

ᑭᓯᐊᓂᓕ ᑕᐃᒪᐃᓐᓂᖓ ᐊᓯᙳᓕᓚᐅᕐᑐᖅ ᓄᕕᐱᕆ 11-ᐅᑎᓪᓗᒍ, ᓯᕗᓪᓕᖅᐹᒥ ᐋᓐᓂᐊᖃᖅᑐᒥᒃ ᓇᓗᓇᐃᕐᓯᑎᓪᓗᒋᑦ ᑲᖏᖅᖠᓂᕐᒥᓐ. ᓈᑦᑎᖑᔭᒥ, ᓄᕕᐱᕆ 22-ᒥᑦ, ᐃᓄᖏᑦ ᒫᓃᑦᑐᑦ 3,600 ᖃᐅᔨᓕᓚᐅᕐᑐᑦ 15 ᐋᓐᓂᐊᖃᕐᓂᖏᓐᓂᑦ ᑯᕉᓇᕙᐃᕋᔅᒥ ᓄᓇᓕᖕᓂ.

“ᒫᓐᓇ ᖃᓄᐃᕈᓘᔭᕐᓇᓚᐅᑲᒃᑐᖅ,” ᐅᖃᖅᑐᖅ ᐳᕆᐸᓪ, ᐅᖃᓪᓚᒃᖢᓂ ᐃᒃᐱᒍᓱᖕᓂᖓ ᓇᓗᓇᕋᓂ ᓄᓇᑦᓯᐊᕐᒥ ᐱᕙᓪᓕᐊᔪᓂ ᐃᓱᒪᒋᔭᖓᓂᒃ ᐊᒻᒪ ᐊᓯᖏᑦᑕᑦᑕᐅᖅ ᐃᓱᒪᒋᔭᖓᓂᒃ.

“ᑕᑯᔪᓐᓇᕋᒃᑯ,” ᐅᖃᖅᑐᖅ. “ᑕᑯᔭᕋ ᑭᒃᑯᓕᒫᑦ ᑮᓇᖓᓂ—ᑮᓇᑉᐸᒃᓯᒪᒐᓗᐊᖅᖢᑎᒃ.”

ᐳᕆᐊᓪ ᓯᓛᑉ ᓵᑦ ᓂᐅᕕᕐᕕᕋᓚᖅ ᒪᑐᖓᓕᓚᐅᕐᓯᒪᔪᖅ ᑕᖅᑭᓂᒃ ᐱᖓᓱᓂᒃ ᐋᓐᓂᐊᕕᒡᔪᐊᕐᓇᖅ ᐱᒋᐊᓕᕐᑎᓪᓗᒍ ᒫᔅᓯᒥ, ᐊᒻᒪᓗ ᑐᓂᓯᓚᐅᕐᐸᒃᖢᓂ ᐲᑦᓴᒥ ᑳᒃᑐᓄᑦ ᓄᓇᓕᖕᓂ ᒪᑭᒪᓇᓱᒃᖢᓂᓗ.

ᑲᖏᖅᖠᓂᐅᑉ ᓯᐊᕐᕆᔮᕐᕕᖓᓃᓗᓂ ᓄᑖᒥ, ᓂᐅᕕᕐᕕᕋᓛᖓ ᓂᕆᐅᒍᑎᒋᓚᐅᕐᑕᖓ ᓂᐅᕕᕈᒪᖃᑦᑕᕐᓂᐊᕐᑐᓂᒃ ᓯᐊᕐᕆᔮᕐᕕᖕᒥᓐ, ᑖᓐᓇᓗ ᐊᐅᔭᒃᑯᑦ ᐃᕕᙳᐊᒥᓐ ᐃᓕᓯᒪᕝᕕᐅᕙᒃᖢᓂ ᐊᒻᒪ ᓯᑯᖃᓕᕐᐸᒃᖢᓂ ᐊᕐᕌᒎᑉ ᐃᓚᖓᒍᑦ.

ᓯᐊᕐᕆᔮᕐᕕᒃ ᐱᙳᐊᕐᐸᒃᑐᓄᑦ ᐅᐸᒃᑕᐅᖃᑦᑕᒻᒪᕆᒃᑐᖅ ᑲᖏᖅᖠᓂᕐᒥᒃ, ᑕᕝᕙᓂᓗ ᓈᓴᓄᓪ ᕼᐋᑭ ᓖᒃᑯᓐᓄᑦ ᐃᓚᐅᓯᒪᔪᖅ ᔪᐊᑕᓐ ᑐᑐ ᐱᒋᐊᓕᕐᓂᑰᓪᓗᓂ.

ᐳᕆᐊᓪ ᓂᕆᐅᓚᐅᕐᓯᒪᔪᖅ ᐱᓕᕆᕈᓘᔭᕐᓂᐊᕋᓱᒋᓪᓗᓂ, ᑭᓯᐊᓂᓕ ᒫᔅᓯᒥ ᑕᒪᕐᒥᓕᒫᖅ ᐅᕙᓃ $26 ᒥᓕᐊᓐ ᑖᓚᑐᖅᑐᒥ ᓯᐊᕐᕆᔮᕐᕕᖕᒥ ᓄᖅᑲᖅᑎᑕᐅᓚᐅᕐᓯᒪᖕᒪᑕ ᐊᒻᒪᓗ ᐸᕐᓇᒃᑕᐅᓕᕐᖢᓂ ᑐᐊᕕᕐᓇᖅᑐᓄᑦ ᐋᓐᓂᐊᕕᙳᕐᓗᓂ, ᑕᐃᒪᐃᑦᑕᕆᐊᖃᖅᐸᑕ. ᑭᓯᐊᓂᓕ ᐸᕐᓇᒃᑕᐅᓯᒪᔪᑦ ᐊᑐᖅᑕᐅᔭᕆᐊᖃᓚᐅᙱᑦᑐᑦ ᐅᐱᙶᖅ ᐊᒻᒪ ᐊᐅᔭᐅᓚᐅᕐᑐᖅ, ᓄᕙᒡᔪᐊᕐᓇ-19-ᒥᑦ ᐋᓐᓇᐊᖃᖅᑐᖃᙱᑎᓪᓗᒍ ᖃᐅᔨᒪᔭᐅᔪᒥ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᖁᔨᑲᑕᙱᓐᓂᖏᑦ ᖃᓱᔾᔫᒥᓚᐅᕐᑐᑦ ᐊᐅᔭᐅᑎᓪᓗᒍ ᐊᒻᒪ ᑖᓐᓇ ᓂᐅᕕᕐᕕᕋᓛᖅ ᐱᔭᒃᓴᖃᕐᓂᕐᓴᐅᓕᕐᖢᓂ.

“ᐊᐅᔭᖅ ᖃᓄᐃᓗᐊᓚᐅᙱᑦᑐᖅ. ᐋᓐᓂᐊᖅᑖᖅᑐᖃᓚᐅᙱᒻᒪᑦ, ᑕᐃᒪᓕ ᐊᐅᓚᒍᓐᓇᕈᓘᔭᓚᐅᕐᑐᒍᑦ ᐊᒻᒪᓗ ᖃᓄᐃᑦᑐᖃᙲᓐᓇᖅᖢᓂ,” ᐳᕆᐊᓪ ᐅᖃᖅᑐᖅ.

“ᐱᓕᕆᐊᕆᕙᒃᑕᑦᑎᓐᓄᑦ ᐅᑎᑐᐃᓐᓇᓕᓚᐅᕐᑐᒍᑦ. ᐃᖅᑲᓇᐃᔭᖅᑎᕗᑦ ᐅᑎᖅᖢᑎᒃ ᐊᒻᒪ ᓄᑖᒥ ᐃᖅᑲᓇᐃᔭᖅᑎᑖᖅᖢᖓ. ᓯᐊᕐᕆᔮᕐᕕᒃ ᒪᑐᐃᖓᑲᑕᓕᓚᐅᕐᑐᖅ ᐃᓕᖁᓯᐊᓄᑦ, ᐊᒻᒪᓗ ᓯᑯᓕᐅᕐᐸᓪᓕᐊᓕᕐᖢᑎᒃ.”

ᑭᓯᐊᓂᓕ ᓄᕕᐱᕆ 11-ᒥᑦ ᑭᓱᓕᒫᑦ ᓄᖅᑲᖅᑎᑕᐅᒃᑲᓐᓂᓕᓚᐅᕐᑐᑦ ᑐᓴᖅᑎᑕᐅᓪᓗᑎᒃ ᓯᕗᓪᓕᖅᐹᒥᑦ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᒥ ᑲᖏᖅᖠᓂᕐᒥ.

ᕼᐊᑭᕐᓇᐅᓂᐊᕐᑐᖅ ᐅᓇ ᑎᐅᕋᓐᔅ ᑐᑐ ᒪᒧᕆᐅᓪ ᕼᐋᑭᒥ ᐱᒡᒍᓴᐅᑎᒍᑎ, ᐃᓱᒪᒋᓪᓗᒍ ᔪᐊᑕᓐ ᐊᖓᔪᒋᓚᐅᕐᓯᒪᔭᖓ, ᐅᖓᕙᕆᐊᕐᑕᐅᓚᐅᕐᓯᒪᖕᒪᑦ ᒫᔅᓯᒥ ᓄᖅᑲᖅᑎᑕᐅᑦᑎᐊᒻᒪᕆᓚᐅᕐᑐᖅ ᑭᓯᐊᓂ 2021-ᖑᓕᕐᐸᑦ.

ᑕᐃᒪᓕ, ᐳᕆᐊᓪ ᐅᖃᓚᐅᕐᑐᖅ ᓂᐅᕕᕐᕕᕋᓛᖓ ᐊᓯᐊᓄᑦ ᐋᖅᑭᖔᕈᒪᓪᓗᓂᐅᒃ.

“ᐃᓱᒪᔭᕆᐊᖃᕋᒪ ᓯᓚᑎᒃᑲᓐᓂᐊᒍᑦ,” ᐅᖃᖅᑐᖅ.

ᐳᕆᐊᓪ ᐃᖅᑲᓇᐃᔭᕐᑎᖏᓐᓂᒃ ᓄᖅᑲᖅᑎᑦᑎᑲᑕᓯᒋᐊᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥ.

ᐅᖃᖅᖢᓂ ᑖᒃᑯᓄᖓ, “ᖃᐅᔨᒪᔪᓯ, ᐅᕙᓃᑦᑕᕆᐊᖃᕈᓐᓃᕋᔅᓯ. ᐋᓐᓂᐊᖅᑖᖅᑐᖃᕐᓯᒪᓕᕐᒪᑦ. ᐃᓕᔅᓯᓐᓂ ᐅᓗᕆᐊᓇᖅᑎᒦᑎᑦᑎᔪᒪᙱᓐᓇᒪ.”

ᓂᕿᓕᐅᕐᕕᖓᓗ ᒥᑭᓗᐊᖅᖢᓂ ᒪᕐᕉᖕᓄ ᐅᖓᓯᒌᑲᑕᒋᐊᖃᕐᓂᐊᖅᑑᖕᓄᒃ ᐱᓕᕆᑎᓪᓗᒋᑦ.

“ᐅᓇ ᓇᖕᒥᓂᕆᒐᒃᑯ. ᐅᕙᖓᐅᖕᒪᓐ,” ᐳᕆᐊᓪ ᐅᖃᖅᑐᖅ. ᐃᓚᖏᓐᓂ ᑮᓇᐅᔭᓕᐅᕐᑎᑐᐊᖑᓪᓗᓂ ᐅᖃᖅᑐᖅ ᐱᓕᕆᔪᓐᓇᕐᓂᐊᕐᓂᖓᓂ ᐅᓗᕆᐊᓇᕐᑐᒦᓐᓇᕋᓗᐊᕐᑎᓪᓗᒍ.

ᐳᕆᐊᓪ ᐋᖅᑭᒃᓯᓯᒪᓕᕐᑐᖅ ᓂᐅᕕᕐᐸᒃᑐᑦ ᐊᑭᓖᔪᓐᓇᕐᓯᓪᓗᑎᒃ ᓇᒡᓯᐅᔾᔨᓗᑎᒃ ᖃᕋᓴᐅᔭᒃᑯᑦ ᑮᓇᐅᔭᓂᒃ ᐃᓯᓚᐅᙲᓐᓇᕐᓗᑎᒃ.

ᐊᒻᒪᓗ ᐊᑕᐅᓯᕐᒥ ᐅᓪᓗᕐᒥ ᐱᓇᓱᐊᕈᓯᐅᓚᐅᕐᑐᒥ ᑖᓐᓇ ᓂᕿᓕᐅᕐᕕᖓ ᓴᓗᒻᒪᖅᓴᑦᑎᐊᖅᖢᓂᐅᒃ ᑕᒪᐃᓐᓂᓕᒫᖅ ᖁᓛᓂᑦ ᐊᑖᓄᑦ.

“ᐊᒃᓱᐊᓗᒃ ᓴᓗᒪᓕᕐᑐᖅ ᓂᕿᓕᐅᕐᕕᒃᐳᑦ. ᓴᓗᒪᑦᑎᐊᖅᖢᓂ ᑭᓯᐊᓂᓕ ᑭᓱᓕᒫᑦ ᓄᓱᒋᐊᖃᓚᐅᕐᑕᕗᑦ,” ᐅᖃᖅᑐᖅ.

ᒫᓐᓇᓗ ᐳᕆᐊᓪ ᓂᕿᓕᐅᓕᕌᖓ ᑮᓇᑉᐸᒃᓯᒪᖃᑦᑕᖅᑐᖅ.

ᑭᓯᐊᓂᓕ ᐊᔪᕐᓇᕈᓘᔭᓕᒑᔪᖅ ᐃᓄᑑᓗᓂ ᓴᓇᔭᕆᐊᒃᓴᖅ.

ᐅᖄᓚᐅᑎᑐᐊᖓ ᓯᕙᓂᕌᖓᑦ ᐊᒻᒪᓗ ᕼᐋᒻᐳᒍᓕᐅᖅᖢᓂ ᐊᓯᐊᓂᓪᓘᓐᓃᑦ ᓂᕿᓕᐅᖅᖢᓂ, ᑭᐅᓂᓐᓇᕈᓐᓇᙱᒻᒪ ᐅᖄᓚᐅᑎᒥ. ᐃᒪᖏ ᐅᖄᓚᒃᑲᓐᓂᖃᑦᑕᖅᑐᑦ, ᐅᖃᖅᑐᖅ.

“ᑭᓱᓕᒫᓂ ᐱᓕᕆᔪᑑᓪᓗᓂ ᐊᑯᓂᐅᓂᕐᓴᐅᓐᓇᕐᒪᓐ. ᐊᒻᒪᓗ ᐋᖅᑭᒃᓱᐃᕙᒌᓗᐊᕈᒪᓐᓇᙱᖢᓂ ᐃᒋᑐᐃᓐᓇᕆᐊᖃᖤᕐᓂᐊᕐᒪᑕ, ᐊᒻᒪᓗ ᓴᓗᒪᔪᒪᔭᕆᐊᖃᖅᖢᓂ,” ᐅᖃᖅᑐᖅ.

ᑭᓯᐊᓂᓕ ᓂᕿᓕᐊᖏᑦ ᐱᐅᓂᕐᓴᐅᑎᓐᓂᕐᓴᐅᔪᒪᔭᖏᑦ, ᐅᖃᖅᑐᖅ.

“ᓇᒡᓕᖕᓂᕐᒥ ᐃᓚᓯᒃᑲᓐᓂᖃᑦᑕᖅᑐᖓ ᓲᖃᐃᒻᒪ ᐊᐃᒃᖠᖔᖃᑦᑕᕐᒪᑕ,” ᐅᖃᖅᑐᖅ.

ᑕᕝᕗᙵᖅᑐᑦᑕᐅᖅ ᐊᒡᒐᖏᓐᓂᒃ ᓴᓗᒻᒪᕐᓴᐃᔭᕆᐊᖃᖅᑐᑦ, ᐅᖓᓯᒌᒃᑑᑎᐅᓗᑎᒃ ᐊᒻᒪ ᑮᓇᒃᐸᒃᓯᒪᓗᑎᒃ ᐊᐃᒃᖠᓕᕌᖓᑕ ᑎᑭᓴᕐᓯᒪᔭᖏᓐᓂᒃ.

“ᖁᕕᐊᒋᑦᑎᐊᒻᒪᕆᖃᑦᑕᕋᒃᑯ ᐃᓄᐃᑦ ᖃᐃᑦᑎᐊᒻᒪᕆᒃᖢᑎᒃ ᐊᒻᒪ ᐃᑲᔪᕈᒪᓂᕋᖅᖢᑎᒃ ᓂᐅᕕᕐᕕᕋᓛᓐᓂᒃ,” ᐅᖃᖅᑐᖅ.

ᒫᓐᓇᓕ, ᓄᓇᕗᓕᒫᖅ ᒪᑐᓯᒪᑎᑕᐅᔪᖅ ᑎᓯᐱᕆ 2 ᑎᑭᓪᓗᒍ.

ᑭᓯᐊᓂᓕ ᓄᕙᒡᔪᐊᕐᓇᖅ-19 ᐱᒋᐊᖅᑎᓪᓗᒍ ᐊᒻᒪ ᐅᓄᕐᓯᑲᐅᖅᑐᖅᖢᑎᒃ ᑲᖏᖅᖠᓂᕐᒥᒃ ᐋᓐᓂᐊᖃᖅᑐᑦ, ᐊᒻᒪᓗ ᖃᓂᒋᔭᖓᓂ ᓄᓇᓕᖕᓂ ᐊᕐᕕᐊᓂᒃ ᐊᒻᒪ ᑎᑭᕋᕐᔪᐊᕐᒥ, ᑕᐃᒪᓕ ᑲᖏᖅᖠᓂᕐᒥ ᒪᑐᔭᐅᓯᒪᓂᕐᓴᓂ ᑕᑯᑐᐃᓐᓇᕆᐊᖃᕐᑐᑦ.

ᐊᒻᒪᓗ, ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᖅᑐᑦ ᐅᓄᕐᓯᕙᓪᓕᐊᓪᓗᑎᒃ ᒫᓂᑑᐸᓂ, ᑖᓐᓇ ᑲᖏᖅᖠᓂᕐᒧᑦ ᖃᓂᓛᖑᒧᖅ ᐳᕌᕕᓐᓯᓂᒃ.

ᐅᐃᓂᐱᒡᒥ ᑕᒪᓐᓇ ᐱᒋᐊᕐᕕᖃᕋᓱᒋᔭᐅᔪᖅ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖅᑖᕈᑎᐅᓕᖅᖢᓂ ᓄᓇᕗᒥᑦ: ᓄᕕᐱᕆ 22-ᒥᑦ, ᒫᓂᑑᐸᒥ ᐋᓐᓂᐊᖃᖅᑐᑦ ᓄᕙᒡᔪᐊᕐᓇᖅ-19-ᒥᒃ ᒫᓃᓐᓂᕋᖅᑕᐅᓚᐅᕐᑐᑦ 13,544 ᐊᒻᒪᓗ ᓴᓇᑦᑕᐃᓕᒥ 243-ᓂ ᓄᑖᓂ ᐋᓐᓂᐊᖃᖅᑐᖃᓕᓚᐅᕐᖢᓂ, ᐅᓄᕐᓂᖅᐹᖑᔪᑦ ᐅᓪᓗᕐᒥ ᐋᓐᓂᐊᖅᑖᖅᑐᓂᒃ ᒫᓐᓇᒧᑦ.

Share This Story

(0) Comments