ᓇᓚᐅᑦᑖᕈᑎᑎᒍᑦ ᐊᐅᐸᓗᒃᒥ ᑲᑎᒪᔨᙳᖅᑎᑦᑎᓚᐅᕐᑐᑦ ᓄᓇᕕᒻᒥ ᓄᓇᓕᖕᓄᑦ ᑲᑎᒪᔨᒃᓴᓂᒃ ᓂᕈᐊᓇᐅᑎᓪᓗᒍ

For an English version of this story, please see Luck of the draw in Aupaluk gives candidate a council seat as Nunavik holds municipal elections.

ᓂᕈᐊᕈᓐᓇᖅᑐᑦ ᐊᐅᐸᓗᒃᒥᑦ ᐅᐸᓚᐅᕐᑐᑦ ᐅᓄᕈᓘᔭᖅᖢᑎᒃ ᓄᕕᐱᕆ 3ᒥ ᐊᒻᒪᓗ ᑲᑎᒪᔨᓄᑦ ᐃᓂᒃᓴᖅ ᐊᒧᔭᐅᓂᒃᑯᑦ ᐃᓂᑖᕆᔭᐅᓕᓚᐅᖅᖢᓂ, ᓄᓇᕕᒻᒥ ᓇᑉᐸᓪᓗᐊᖏᑦ ᓄᓇᓖᑦ ᓂᕈᐊᕆᐊᖅᑐᖅᑎᓪᓗᒋᑦ ᓄᓇᓕᖕᓄᑦ ᑲᑎᒪᔨᒃᓴᓂᒃ. ᐅᑯᓇᓂ ᓂᕈᐊᓚᐅᕐᒥᔪᑦ ᐊᑯᓕᕕᒃᒥᑦ, ᐃᓄᒃᔪᐊᒃ, ᑰᔾᔪᐊᕌᐱᒃ, ᖁᐊᖅᑕᖅ ᐊᒻᒪᓗ ᑕᓯᐅᔭᖅᒥ.

ᓄᕙᒡᔪᐊᕐᓇᖅ-19 ᐋᓐᓂᐊᖅᑖᕆᔭᐅᑲᑕᖕᓂᖓᓄᑦ ᓂᕈᐊᕈᓐᓇᖅᑐᑦ ᐅᑯᓇᓂ ᑲᖏᕐᓱᒃ, ᓴᓪᓗᐃᑦ, ᐃᕗᔨᕕᒃ, ᑰᔾᔪᐊᖅ ᐊᒻᒪ ᑲᖏᖅᓱᐊᓗᔾᔪᐊᕐᒥ ᐊᖏᕐᕋᕐᓯᒪᔾᔪᑎᐅᓚᐅᕐᑐᑦ.

ᐊᐅᐸᓗᒃ ᐅᓄᓛᓂᒃ ᓂᕈᐊᕆᐊᖅᑐᕐᕕᐅᒪᐅᕐᑐᖅ, 80 ᐳᓴᓐᑎᖏ ᓂᕈᐊᕈᓐᓇᖅᑐᑦ ᓂᕈᐊᕆᐊᖅᑐᖅᖢᑎᒃ. ᑲᑎᒪᔨᓄᑦ ᓂᕈᐊᒐᒃᓴᐅᔫᒃ ᒫᒋ ᑲᐃᓐ ᐊᒻᒪ ᐋᓇ ᒍᕇ-ᓴᓗᕗᐊᑦᓯᐊᒃ ᑕᒪᕐᒥᒃ 57-ᓄᑦ ᓂᕈᐊᖅᑕᐅᓚᐅᕐᑐᑦ, ᐊᒻᒪᓗ ᐅᓇ ᑲᐃᓐ ᓵᓚᒃᓴᓕᓚᐅᖅᖢᓂ ᐊᑎᖓ ᐊᒧᔭᐅᓂᖓᒍᑦ. ᓄᓇ ᐊᐸᕼᐊᑕᒃ, ᔪᐊᔾ ᐃᑐᒃ, ᔫᓕᐊ ᓘᑲᓯ, ᐄᑐᐊ ᓴᓗᕗᐊᑦᓯᐊᒃ ᐊᒻᒪ ᐋᓚᓯ ᑐᒪᓯᐊ ᓂᕈᐊᕆᔭᐅᓚᐅᕐᒥᔪᑦ ᑲᑎᒪᔨᓄᑦ. ᑕᐃᕕᑦ ᐊᖑᑎᙳᐊᒃ ᓵᓚᒃᓴᓚᐅᖅᑐᖅ ᒪᐃᔭᒧ ᐊᐅᐸᓗᒃᒥᑦ ᓂᕈᐊᕆᔭᐅᓪᓗᓂ 60ᓄ, ᐅᓇ ᒪᐃᔭᒧᑦ ᓂᕈᐊᕆᔭᐅᓇᓱᒃᑐᖅ ᓂᕈᐊᕆᔭᐅᓪᓗᓂ 54ᓄᑦ.

ᐊᑯᓕᕕᒃᒥ ᐅᓇ ᐃᓚᐃ ᐊᖏᔪ ᔭᐃᔭᐅᓂᕐᒧᑦ ᐃᓕᔭᐅᓚᐅᕐᑐᖅ. ᐋᑕᒥ ᐊᓕᑯ, ᔭᐃᓴᓐ ᐊᓕᖁ, ᔪᐊᓇᓯ ᐊᓕᖁ, ᓕᐅᕆ ᕼᐃᐅᐳᑦ, ᐃᓕᓴᐱ ᐃᖁᒥᐊ ᐊᒻᒪᓗ ᓇᐅᔭ ᖁᐃᓴ ᓂᕈᐊᕆᔭᐅᓚᐅᕐᑐᑦ ᑲᑎᒪᔨᐅᓂᕐᒧᑦ. ᐊᑯᓕᕕᒃᒥᑦ ᓂᕈᐊᕆᐊᖅᑐᑦ 41.26 ᐳᓴᓐᑎᖏᑦ ᓂᕈᐊᕆᐊᓚᐅᕐᑐᑦ.

ᐃᓄᒃᔪᐊᒃᒥ ᓂᕈᐊᕆᐊᖅᑐᑦ ᓂᕈᐊᓚᐅᕐᑐᑦ ᐸᐅᓗᓯ ᑲᓱᓪᓗᐊᒃᒥ ᒪᐃᔭᐅᓂᕐᒧᑦ ᓵᓚᖃᖅᖢᓂ ᑕᐃᕕᓂ ᐃᓄᒃᐸᒃᒥ ᐊᒻᒪ ᔫᐱ ᐃᐳᒥ ᑖᒃᑯᓂᖓ ᓂᕈᐊᕆᐊᖅᑐᑦ 49 ᐳᓴᓐᑎᖏᓐᓃᖢᑎᒃ. ᐅᑯᐊ ᓘᑲᓯ ᐃᖃᓗᒃ, ᐋᓐᑎ ᒨᕼᐊᐅᔅ, ᐅᕆᑦᓱᑦ ᒨᕼᐊᐅᔅ, ᓄᐊ ᐳᕝ, ᓯᑕᕙᓂ ᐳᕝ, ᐊᒻᒪ ᓴᕈᓕ ᐅᐃᑖᓗᒃᑐᖅ ᓂᕈᐊᖅᑕᐅᓚᐅᕐᑐᑦ ᑲᑎᒪᔨᒃᓴᓄᑦ.

ᑰᔾᔪᐊᕌᐱᒃᒥ ᐋᓐᑕᓂ ᐃᑦᑐᓴᑦ ᓵᓚᖃᓚᐅᕐᑐᖅ ᐅᕋᐃᒪᓐ ᒥᒃᐱᒐᒃᒥ ᒪᐃᔭᐅᓂᕐᒧᑦ, 131ᓄ ᓂᕈᐊᖅᑕᐅᓪᓗᓂ ᐊᐃᑉᐸᖓ 119ᓄᑦ. 50 ᐳᓴᓐᑎᐅᑉ ᐅᖓᑎᑦᑎᐊᖓᓂ ᓂᕈᐊᕆᐊᖅᑐᓚᐅᕐᑐᑦ ᓂᕈᐊᖅᖢᑎᒃ ᑲᑎᒪᔨᒃᓴᓂᒃ ᐅᑯᓂᖓ ᒥᐊᓕ ᕼᐋᓇ ᐊᖓᑐᑲᓗᒃ, ᓵᓕ ᔮᓐ ᑳᕕᓐ, ᔭᓂᕗ ᕼᐊᓐᑐ, ᓘᑲᓯ ᐃᓄᒃᐸᒃ, ᐹᓴ ᑭᑎᓯᒥᒃ ᐊᒻᒪ ᒥᐊᓕ ᓯᓚᕿ ᓴᓚ.

ᖁᐊᕐᑕᖅᒥ ᐅᓇ ᔫᓯᐱ ᑯᓗᓚ ᒪᐃᔭᒧ ᓂᕈᐊᕆᔭᐅᓚᐅᕐᑐᖅ ᓵᓚᖃᖅᖢᓂ ᒫᑎᐅ ᓂᖏᐅᕈᕕᒃ, 106ᓄᑦ ᓂᕈᐊᖅᑕᐅᓪᓗᓂ ᐊᐃᑉᐸᖓ 22ᓄᑦ. ᑲᑎᒪᔨᓄᑦ ᓂᕈᐊᒐᒃᓴᐃᑦ ᓂᕈᐊᕆᔭᐅᓚᐅᖅᑐ ᐊᑕᐅᓯᖅ ᓂᕈᐊᖅᑕᐅᙱᓗᓂ, ᓂᕈᐊᕆᐊᖅᑐᑦ 51.2 ᐳᓴᓐᑎᐅᓪᓗᓂ. ᓂᕈᐊᕆᔭᐅᔪᑦ ᐅᑯᐊᖑᓚᐅᕐᑐᑦ ᑕᐃᓯ ᐊᕐᓇᑐᒃ, ᓖᓇ ᐃᔨᑭᐅᓪ, ᓯᕕᒻ ᐃᒍᓐ, ᓗᐃᓴ ᑯᒪᕐᓗᒃ ᐆᕙᐅᑦ, ᓵᓕ ᐅᒃᐱᒃ ᐊᒻᒪ ᓵᓕ ᑕᒃᑭᐊᐱᒃ.

ᑕᓯᐅᔭᖅᒥ ᓂᕈᐊᒐᒃᓴᖅ ᐅᑎᖅᑎᑕᐅᑐᐃᓐᓇᓚᐅᕐᑐᖅ ᒪᐃᔭᐅᓂᕐᒧᑦ ᐱᐊᓕ ᑲᐃᓐ. ᓂᕈᐊᕆᐊᖅᑐᓚᐅᕐᑐᓪᓗ 46.26 ᐳᓴᓐᑎᖏᑦ. ᐲᑕ ᐊᓇᑐᒃ, ᕗᐃᓕ ᑖᒥ ᐊᖕᓇᑐᒃ, ᑖᒥ ᐊᓐᓇᓇᒃ, ᔩᓂ ᑲᐃᓐ ᓵᓐᑐᔅ, ᖁᓪᓕᒃ ᑲᐃᓐ ᐊᒻᒪ ᑖᒥ ᓇᔪᒥ ᓂᕈᐊᕆᔭᐅᓚᐅᕐᑐᑦ ᑲᑎᒪᔨᓄᑦ.

ᑕᓪᓕᒪᑦ ᓄᓇᕕᒃᒥ ᓄᓇᓖᑦ ᓇᒧᙵᑲᑕᒋᐊᖃᙱᓐᓂᖏᓐᓄᑦ ᓂᕈᐊᕐᓇᖅ ᐅᖓᕙᕆᐊᖅᑕᐅᓚᐅᕐᑐᖅ ᑖᓐᓇᓗ ᓱᓕ ᐅᖃᐅᓯᐅᓚᐅᙱᖢᓂ ᖃᑯᒎᓛᕐᒪᖔᑦ.