ᓘᑎ ᐸᓪᓗᖅ, 76, ᐃᓅᔪᓐᓃᖅᐳᖅ ᑲᓇᑕᐅᑉ ᐅᓪᓗᖓᓂ

ᐃᓐᓇᑐᖃᖅ ᒪᓕᒐᓕᐅᕐᑎ ᐃᖅᑲᐅᒪᔭᐅᕗᖅ ᐃᒪᓐᓇ “ᐃᓚᒋᔭᐅᓂᑯ ᐱᓇᓱᒻᒪᕆᒃᑐᓂᑦ ᓄᓇᕗᑦ ᐱᒋᐊᖅᑎᒐᓱᒃᖢᒍ”

ᓘᑎ ᐸᓪᓗᖅ 2016-ᖑᑎᓪᓗᒍ. ᐃᓐᓇᑐᖃᖅ ᖁᑦᑎᒃᑐᒥ ᒪᓕᒐᓕᐅᕐᑎ ᐊᒻᒪ ᒪᐃᔭ ᐃᓅᔪᓐᓃᓚᐅᕐᐳᖅ ᔪᓚᐃ 1-ᒥᑦ ᐅᑭᐅᖃᓕᖅᖢᓂ 76-ᓂᒃ. (ᐊᔾᔨᙳᐊᖁᑎᒋᔭᐅᔪᖅ)

By ᔨᒻ ᐱᐅᓪ

For an English version of this story, see Ludy Pudluk, 76, dies on Canada Day

ᓄᓇᕗᑦ ᐊᒻᒪ ᓄᓇᑦᓯᐊᑉ ᓯᕗᓕᐅᕐᑎᖏᑦ ᐃᖅᑲᐅᒪᓂᖃᓚᐅᕐᐳᑦ ᓄᓇᕗᒥᑦ ᐃᓚᒋᔭᐅᔪᖅ ᓂᕈᐊᖅᑕᐅᓯᒪᓂᒃᑯᑦ ᓯᕗᓕᐅᖅᑎᐅᓯᒪᔪᒥᑦ ᐊᑯᓂᐅᓛᒥᑦ, ᓘᑎ ᐸᓪᓗᖅ, ᑖᓐᓇ ᐃᓅᔪᓐᓃᓚᐅᕐᒪᑦ ᔪᓚᐃ   1-ᒥ ᐅᑭᐅᖃᓕᖅᖢᓂ 76-ᓂᒃ, ᐊᑯᓂᕈᓗ ᖃᓂᒪᓪᓗᓂ.

ᐸᓪᓗᖅ ᐃᓅᓚᐅᕐᓯᒪᔪᖅ ᔭᓄᐊᕆ 31, 1943-ᒥ, ᓄᓇᓕᕋᓛᒥᑦ ᑕᐃᔭᐅᔪᖅ ᖃᐅᒫᕐᔪᐃᑦ ᐅᕙᓂ ᓇᐃᕕ ᐳᐊᑦ ᐃᓐᓚᑦᒥᑦ, ᒥᑦᑎᒪᑕᓕᐅᑉ ᖃᓂᒋᔭᖓᓂ.

1958-ᒥ, ᓄᒃᑎᓚᐅᕐᓯᒪᔪᖅ ᐊᑖᑕᖓᑕ ᐃᓚᖏᓐᓄᑦ ᖃᐅᓱᐃᑦᑐᒧᑦ, ᑕᐃᑲᓂᓗ ᓄᓇᖃᐃᓐᓇᐅᔭᓕᖅᖢᓂ.

ᐅᖃᓚᐅᕐᓯᒪᔪᖅ ᕿᑭᖅᑕᓂ ᓱᓕᔪᓄᑦ ᑲᒥᓴᒥ ᐅᑭᐅᖃᖅᖢᓂ 16-ᓂᒃ 17-ᓂᓪᓗᑭᐊᖅ ᐃᓕᓐᓂᐊᕆᐊᓚᐅᕐᓯᒪᓂᖓᓂ ᐊᕐᕌᒍᓂ ᒪᕐᕉᖕᓂ ᐱᖓᓱᓂᓪᓗᑭᐊᖅ ᖃᐅᓱᐃᑦᑐᒥᑦ ᐊᒻᒪᓗ ᖃᓪᓗᓇᐅᔭᕈᓐᓇᕐᓯᓪᓗᓂ ᐃᖅᑲᓇᐃᔭᖃᖅᑕᖅᖢᓂ ᓄᓇᖃᖅᑐᒃᓴᖃᕐᕕᒃᒥᑦ.

ᐸᓪᓗᖅ, ᖃᓪᓗᓈᑐᑦ ᐊᑎᕈᓯᖓ ᐃᒪᓐᓇ ᑎᑎᕋᖅᑕᐅᕙᖕᒥᔪᖅ “Padluk,” ᐅᖃᓪᓚᓚᐅᕐᓯᒪᔪᖅ ᓱᓕᔪᓄᑦ ᑲᒥᓴᑯᓐᓄᑦ 2008-ᖑᑎᓪᓗᒍ.

1975-ᒥ 1991-ᒧ, ᓂᕈᐊᖅᑕᐅᓚᐅᕐᓯᒪᔪᖅ ᑎᓴᒪᐃᖅᑕᐅᓪᓗᓂ ᒪᓕᒐᓕᕆᔨᐅᓂᕐᒧᑦ ᓄᓇᑦᓯᐊᕐᒥᑦ, ᑭᒡᒐᖅᑐᐃᓪᓗᓂ ᖁᑦᑎᒃᑐᕐᒥᐅᓂᒃ.

ᓂᕈᐊᕐᕕᐅᔪᓐᓇᖅᑐᖅ ᐊᕕᒃᑐᕐᓯᒪᓂᒃᑯᑦ ᐊᓯᙳᓚᐅᕐᓯᒪᑎᓪᓗᒍ ᖁᑦᑎᒃᑐᖅᒧᑦ, ᓂᕈᐊᖅᑕᐅᒃᑲᓐᓂᓚᐅᕐᓯᒪᔪᖅ 1991-ᒥ ᒪᓕᒐᓕᐅᖅᑎᐅᓪᓗᓂ 1995 ᑎᑭᖢᒍ.

ᒥᓂᔅᑕᐅᓚᐅᕐᓯᒪᓪᓗᓂ ᒐᕙᒪᒃᑯᑦ ᐱᔨᑦᑎᕋᐅᑎᖏᓐᓄᑦ ᓄᓇᑦᓯᐊᕐᒥ, ᔮᓐ ᑯᐊᒃ, ᒫᓐᓇ ᓄᓇᕗᒥᑦ ᒪᓕᒐᓕᕆᕕᒃᒥᑦ ᑎᑎᖃᖅᑎᐅᔪᖅ, ᐸᓪᓗᕐᒧᑦ ᑐᒡᓕᕆᔭᐅᓚᐅᕐᓯᒪᔪᖅ ᑕᐃᔅᓱᒪᓂ.

ᐊᕐᕌᒍᓂ ᐊᕙᑎᓂ ᒪᓕᒐᓕᐅᕐᑎᐅᓯᒫᓪᓚᓚᐅᖅᖢᓂ, ᐸᓪᓗᖅ ᒪᐃᔭᐅᓚᐅᕐᓯᒪᔪᖅ ᖃᐅᓱᐃᑦᑐᕐᒧᑦ ᐊᒻᒪᓗ ᐃᓚᒋᔭᐅᑲᑕᒃᖢᓂ ᐊᓯᖏᓐᓄᑦ ᓄᓇᓕᖕᓂ ᑲᑐᔾᔨᖃᑎᒌᒐᓚᖕᓂ.

“ᓄᒫᓱᒍᑎᒋᓚᐅᕐᐸᕋ ᑐᓴᕋᒪ ᓘᑎ ᐸᓪᓗᖅ ᐃᓅᔪᓐᓃᕐᓂᖓᓂᒃ, ᐃᓚᖏᔭᐅᔪᖅ ᓄᓇᕗᒥᑦ ᐃᓕᓴᕆᔭᐅᔾᔪᑎᒧ (Order of Nunavut) ᐊᒻᒪ ᒪᓕᒐᓕᐅᕐᑎᐅᓪᓗᓂ ᖁᑦᑎᒃᑐᒧᑦ ᓄᓇᑦᓯᐊᕐᒧᑦ 1975-ᒥᑦ 1995-ᒧᑦ,” ᓄᓇᕗᑦ ᓯᕗᓕᐅᕐᑎᖓ ᔫ ᓴᕕᑲᑖᖅ ᐅᖃᓚᐅᕐᑐᖅ ᕙᐃᔅᐳᒃᑯᑦ ᓴᕿᔮᖅᑐᒃᑯᑦ.

“ᐃᓚᑯᓗᖏ ᖃᓄᐃᖁᙱᓚᒃᑲ ᐊᒻᒪ ᐃᖅᑲᐅᒪᕙᒃᑲ ᐃᑲᔫᑎᒋᓯᒪᔭᖏᑦ ᓄᓇᕗᒧᑦ ᐅᓪᓗᒥ,” ᓴᕕᑲᑖᖅ ᐅᖃᖅᑐᖅ.

ᐅᖃᓪᓚᖃᑎᒌᒃᖢᑎᒃ, ᐅᖃᖅᑎᐅᔪᑦ ᓄᓇᕗᒧᑦ ᐊᒻᒪ ᓄᓇᑦᓯᐊᕐᒧᑦ ᒪᓕᒐᓕᕆᕕᒡᔪᐊᒥ ᐅᖃᓚᐅᕐᒥᔫᑦ ᐃᓱᒪᒋᔭᖃᕐᓂᖏᓐᓂᒃ ᐃᓅᔪᓐᓃᕐᑐᒥ ᐸᓪᓗᕐᒥ.

“ᒥᔅᑕ ᐸᓪᓗᖅ ᐱᓇᓱᒻᒪᕆᓚᐅᕐᐳᖅ ᐅᖃᖅᑎᐅᓂᕐᒥᒃ ᐅᑭᐅᕐᑕᖅᑐᕐᒧᑦ, ᓴᙱᔪᒥᑦ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐱᓕᕆᐊᖃᖅᖢᓂ, ᐊᒻᒪᓗ ᐃᑲᔪᕐᓯᒪᒻᒪᕆᒃᖢᓂ ᓄᓇᕗᑦ ᐱᒋᐊᖅᓕᕐᓂᖓᓄᑦ,” ᔮᒃᓴᓐ ᓛᕗᑎ, ᓄᓇᑦᓯᐊᕐᒥ ᐅᖃᕐᑎᐅᔪᖅ ᒪᓕᒐᓕᕆᕝᕕᐊᓂᒃ, ᐅᖃᓪᓚᒃᑎᓪᓗᒍ.

ᓄᓇᕗᒧᑦ ᐅᖃᖅᑎ, ᓯᒥᐅᓐ ᒥᑭᙳᐊᒃ, ᑕᐃᒪᓐᓇᑦᑕᐃᓐᓇᐸᓗᒃ ᐅᖃᓚᐅᕆᕗᖅ.

“ᓘᑎ ᐸᓪᓗᖅ ᓄᓇᕗᒥᑦ ᐃᓕᓴᕆᔭᐅᔾᔪᑎᑖᓚᐅᕐᓯᒪᔪᖅ ᐊᕐᕌᓂ ᐃᓕᓴᕆᔭᐅᓯᒪᓂᖓᓄᑦ ᐃᓅᓯᖓᓂ ᑭᒃᑯᓕᒫᓅᖓᔪᓂᒃ ᐱᔨᑦᑎᕋᐅᑎᓕᕆᓂᕐᒧᑦ. ᐱᓕᕆᖃᑎᒋᔭᒃᑲ ᐅᕙᖓᓗ ᐃᓚᖏᓐᓂ ᐃᓚᐅᕗᒍ,” ᒥᑭᙳᐊᒃ ᐅᖃᖅᑐᖅ.

ᓄᓇᕗᒧᑦ ᓴᓂᑐ ᑕᓂᔅ ᐹᑐᓴᓐ, ᐃᓚᖃᖅᖢᓂ ᐊᓯᖏᓐᓂ ᓄᓇᕗᑦ ᒪᓕᒐᓕᐅᕐᑎᖏᓐᓂᒃ ᓄᓇᑦᓯᐊᕐᒥ ᒐᕙᒪᒃᑯᓐᓄᑦ ᐃᒃᓯᕚᖃᑦᑕᓚᐅᖅᑐᓂᒃ, ᐆᑐᓇᖅ ᐃᓅᔪᓐᓃᕐᓯᒪᔪᖅ ᒫᒃ ᐃᕙᓗᐊᕐᔪᒃ, ᐊᐃᐱᓕ ᕿᓚᐸᒃ ᐊᒻᒪ ᔫ ᐋᕐᓗᒃᑐ ᐱᓕᕆᖃᑎᖃᓚᐅᕐᓯᒪᕗᑦ ᐸᓪᓗᕐᒥ ᐊᕐᕌᒍᒐᓴᒻᒪᕆᖕᓂᒃ.

“ᐅᓪᓗᒥ ᐃᓱᒪᒋᕙᕗᑦ ᐃᓅᔪᓐᓃᕐᓂᖓ ᓄᓇᕗᒥᑦ ᓯᕗᓕᐅᕐᑎᐅᖃᑕᐅᓯᒪᒻᒪᕆᒃᑐᖅ, ᖃᐅᔨᒪᔭᐅᓚᐅᕐᑐᖅ ᑲᒪᔨᒻᒪᕆᐅᓂᖓᓂᒃ ᒪᓕᒐᓕᕆᕕᒃᒥᑦ ᓄᖃᖅᑎᓪᓗᒍ 1995-ᒥᑦ, ᑕᓪᓕᒪᐃᖅᑕᐅᓪᓗᓂ ᓂᕈᐊᖅᑕᐅᓯᒪᓪᓗᓂ ᑭᒡᒐᖅᑐᐃᔨᐅᓪᓗᓂ ᖁᑦᑎᒃᑐᕐᒥᐅᓂᒃ ᓄᓇᑦᓯᐊᕐᒥᑦ,” ᐹᑐᓴᓐ ᐅᖃᓚᐅᕐᑐᖅ.

“ᓘᑎ ᐃᓱᒪᒋᔭᐅᑦᑎᐊᓚᐅᕐᑐᖅ ᑕᒪᐃᓐᓄᓕᒫᖅ ᐱᓕᕆᖃᑎᒋᕙᒃᑕᖏᓐᓂᒃ ᐃᓱᒪᑦᑎᐊᖅᐸᖕᓂᖓᓄᑦ, ᐃᓄᑐᐃᓐᓇᐅᓂᖓᓄᑦ ᓴᙱᔪᒥᒃ ᑕᐅᑐᙳᐊᒐᖃᖅᖢᓂ ᓄᓇᕗᒧᑦ ᐊᒻᒪᓗ ᑎᔅᓯᓇᕐᓴᕋᐃᖏᓐᓇᐅᔭᖅᖢᓂ,” ᐹᑐᓴᓐ ᐅᖃᖅᑐᖅ.

ᐊᕐᕌᓂ, ᓄᓇᕗᒥᑦ ᒪᓕᒐᓕᕆᔨᕐᔪᐊᑦ ᐸᓪᓗᕐᒥ ᐃᓕᓴᕐᓯᓯᒪᓚᐅᕐᓯᒪᕗᑦ ᓄᓇᕗᒥᑦ ᐃᓕᓴᕆᔭᐅᔾᔪᑎᒥᑦ ᐱᑖᕐᑎᑕᐅᓪᓗᓂ.

ᐅᖃᓪᓚᒃᑎᓪᓗᒍ ᐊᕐᕌᓂ ᐸᓪᓘᑉ ᐃᓕᓴᕆᔭᐅᔾᔪᑎᖓᓄᑦ ᖁᕕᐊᓲᑎᖃᕐᓂᕐᒥᓐ, ᐹᑐᓴᓐ ᐸᓪᓘᑉ ᐱᓕᕆᐊᖏᓐᓂ ᐱᒃᑯᒋᔭᖃᒻᒪᕆᓚᐅᕐᓯᒪᕗᖅ ᐊᒻᒪᓗ ᐊᓯᖏᑦᑕ ᓄᓇᕗᒧᑦ ᑲᑎᒪᔨᐅᔪᑦ ᓄᓇᑦᓯᐊᕐᒥᑦ.

“ᐅᕙᑦᑎᓐᓄᓪᓕ ᓄᓇᑦᓯᐊᕐᒥ ᒪᓕᒐᓕᕆᕕᒃᒦᓚᐅᕐᓯᒪᔪᑎᒍ ᐊᒃᓱᕈᕈᓘᔭᑲᑕᖕᓇᖅᑎᓪᓗᒍ ᐃᑲᔪᖅᑕᐅᙱᒃᑯᑎᒃ ᓄᓇᑦᓯᐊᕐᒧᑦ ᒪᓕᒐᓕᕆᔨᕐᔪᐊᓄᑦ, ᓄᓇᕗᑦ ᐱᒋᐊᕈᓐᓇᕋᔭᓚᐅᕐᓯᒪᙱᑦᑐᖅ.

“ᑲᑐᑎᑦᑎᓂᒃᑯᑦ ᐅᑯᓇᙵᑦ ᑐᙵᕕᒃᑯᓐᓂᑦ ᐊᒻᒪᓗ ᓂᕈᐊᖅᑕᐅᓯᒪᔪᓂᒃ ᒪᓕᒐᓕᕆᔨᓂᒃ ᑕᐃᔅᓱᒪᓂ, ᑖᒃᑯᐊ ᐋᑐᕚᒥ ᑎᓕᐅᕆᓯᒪᒻᒪᕆᓚᐅᕐᓯᒪᖕᒪᑕ ᓄᓇᑦᓯᐊᖅ ᐊᕕᖁᔭᐅᓪᓗᓂ 1993ᔾᒥᑦ,” ᐹᑐᓴᓐ ᐅᖃᖅᑐᖅ.

“ᓘᑎ ᐸᓪᓗᖅ, ᓯᕗᓕᐅᖅᑎᐅᓚᐅᕐᓃᑦ ᐅᐱᒋᑦᑎᐊᒻᒪᕆᒃᐸᕋ ᐊᒻᒪ ᐱᓇᓱᐊᒻᒪᕆᖕᓃᑦ ᐱᒋᐊᕈᑎᐅᖃᑕᐅᓚᐅᕐᓂᖓᓂᒃ ᓄᓇᕗᑦ ᐱᒋᐊᕐᓂᖓᓄᑦ.”

Share This Story

(0) Comments

Join the Conversation

Your email address will not be published. Required fields are marked *

*