ᓘᕆ ᐃᓪᓚᐅᖅ ‘ᐅᐱᒍᓱᒃᑐᖅ ᐊᒻᒪ ᖁᕕᐊᓱᒻᒪᕆᒃᖢᓂ’ ᑎᒃᑯᐊᖅᑕᐅᓂᖓᓂᒃ ᐊᓐᑏᐲᑯᑦ ᒪᓕᒐᓕᕆᔨᖏᓐᓄᑦ

ᓄᓇᕗᒧᑦ ᒪᓕᒐᓕᐅᖅᑎ ᒐᕙᒪᒃᑯᑦ-ᓄᓇᖃᖅᑳᖅᑐᓕᕆᔨᒃᑯᓐᓂᒃ ᖃᓄᐃᓕᐅᖅᐸᓪᓕᐊᓂᖏᑦᑎᒍ, ᓄᓇᖃᖅᑳᑐᓄᑦ ᐱᔨᑦᑎᕋᐅᑎᓕᕆᓂᕐᒥᒃ ᐊᒻᒪ ᐅᑭᐅᕐᑕᖅᑐᓕᕆᔨᓂᒃ

ᓄᓇᕗᒧᑦ ᒪᓕᒐᓕᐅᖅᑎ ᒐᕙᒪᑐᖃᒃᑯᑎᒍᑦ ᓘᕆ ᐃᓪᓚᐅᖅ ᐅᖃᓚᐅᕐᑐᖅ ᓂᕆᐅᖕᓂᕋᖅᖢᓂ ᐱᓕᕆᐊᕆᓂᐊᕐᑕᒥᓂ ᐆᒥᖓ ᐊᓐᑏᐲᑯᓐᓄᑦ ᐅᑯᓂᖓ ᒐᕙᒪᒃᑯᑦ-ᓄᓇᖃᖅᑳᖅᑐᓕᕆᔨᒃᑯᓐᓂᒃ ᖃᓄᐃᓕᐅᖅᐸᓪᓕᐊᓂᖏᑦᑎᒍ, ᓄᓇᖃᖅᑳᑐᓄᑦ ᐱᔨᑦᑎᕋᐅᑎᓕᕆᓂᕐᒥᒃ ᐊᒻᒪ ᐅᑭᐅᕐᑕᖅᑐᓕᕆᔨᓂᒃ ᖃᐅᔨᒪᓇᓱᒃᐸᒡᓗᓂ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

By ᔨᐊᕝ ᐱᐊᓯᐃ

For an English version of this story, see Lori Idlout ‘honoured and excited’ to be appointed to NDP shadow cabinet

ᓄᓇᕗᒧᑦ ᒪᓕᒐᓕᐅᖅᑎ ᓘᕆ ᐃᓪᓚᐅᖅ ᐅᖃᓚᐅᕐᑐᖅ ᖁᕕᐊᓱᖕᓂᕋᖅᖢᓂ ᐅᓄᕈᓘᔭᖅᑐᓂᒃ ᐱᓕᕆᐊᖃᕐᓂᐊᕐᓂᖓᓂᒃ ᐅᑯᓇᓂ ᐊᓐᑏᐲᑯᓐᓂ.

ᐃᓪᓚᐅᖅ ᐱᓕᕆᐊᖃᕐᓂᐊᖅᑐᖅ ᐊᓐᑏᐲᑯᓐᓄ ᒐᕙᒪᐅᔪᑦ ᖃᓄᐃᓕᐅᕈᓯᖏᓐᓂᒃ ᖃᐅᔨᓇᓱᒃᑎᐅᕙᒡᓗᓂ ᒪᑯᓂᖓ ᒐᕙᒪᒃᑯᑦ ᓄᓇᖃᖅᑳᖅᑐᓕᕆᔨᓂᒃ, ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᒋᔭᐅᔪᓂᒃ ᐊᒻᒪᓗ ᐅᑭᐅᕐᑕᖅᑐᓕᕆᓂᕐᒧᑦ, ᑖᒃᑯᐊ ᐊᓐᑏᐲᑯᑦ ᐅᖃᓚᐅᕐᑐᑦ ᐅᒃᑑᐱᕆ 29-ᖑᑎᓪᓗᒍ.

“ᐊᒃᓱᐊᓗᒃ ᐅᐱᒍᓱᒃᑐᖓ ᐊᒻᒪ ᖁᕕᐊᓱᒻᒪᕆᒃᖢᖓ ᑖᒃᑯᓄᖓ ᐱᒻᒪᕆᐊᓗᖕᓄᑦ ᐱᓕᕆᐊᓄᑦ ᖃᐅᔨᓴᖅᑎᐅᖃᑦᑕᕐᓂᐊᕐᓂᓐᓂᒃ,” ᐅᖃᖅᑐᖅ. “ᐱᓕᕆᐊᕆᔭᓐᓂᒃ ᐱᓕᕆᐊᖃᕋᓱᑦᑎᐊᕐᓂᐊᕐᑐᖓ ᐊᒻᒪᓗ ᑖᒃᑯᓄᖓ ᒥᓂᔅᑕᕆᔭᐅᔪᓂᒃ ᐱᓕᕆᐊᒃᓴᖏᓐᓂᒃ ᐱᓕᕆᐊᖃᖅᑎᓐᓇᓱᒡᓗᒋᑦ ᐊᒻᒪ ᐊᑐᕐᓂᐊᕐᓂᕋᓚᐅᖅᑕᖏᓐᓂᒃ ᐊᑐᖅᑎᓐᓇᓱᒡᓗᒋᑦ.”

ᐃᓪᓚᐅᑉ ᐱᓕᕆᐊᒃᓴᖓ ᑐᑭᖃᖅᑐᖅ ᐅᑯᐊ ᒐᕙᒪᒃᑯᑦ-ᓄᓇᖃᖅᑳᖅᓯᒪᔪᓕᕆᔨᒃᑯᓪᓗ ᐊᒻᒪ ᐅᑭᐅᕐᑕᖅᑐᓕᕆᔨᒃᑯᑦ ᑲᓇᑕᒥ ᒥᓂᒡᑕᖓ, ᒫᒃ ᒥᐊᓗ, ᐊᒻᒪ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓄᑦ ᒥᓂᔅᑕ ᐹᑎ ᕼᐊᐃᑐ ᐊᒻᒪᓗ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕᒥ ᑖᓂᐅᓪ ᕚᓐᑐᓪ ᐱᓕᕆᐊᖏᓐᓂᒃ ᖃᐅᔨᒪᓇᓱᖃᑦᑕᕐᓂᐊᕐᓂᖓᓂᒃ.

ᐃᓪᓚᐅᖅ ᐅᖃᓚᐅᕐᑐᖅ “ᐊᐃᑦᑖᕈᓱᖕᓂᖓᓂᒃ” ᑲᓇᑕᒧᑦ ᐊᔪᖅᑳᖅ ᔭᔅᑎᓐ ᑐᕉᑑ ᓂᕈᐊᕆᓚᐅᕐᑕᖏᓐᓂᒃ ᑖᒃᑯᓂᖓ ᐱᓕᕆᐊᖃᕐᓂᐊᖅᑐᓂᒃ ᐊᒻᒪᓗ ᑖᒃᑯᐊ ᒐᕙᒪᒃᑯᑦ ᓱᓕ ᐱᓂᐊᕐᓂᕋᖅᓯᒪᔭᖏᓐᓂᒃ ᐊᑐᓚᐅᙱᓐᓂᕋᖅᖢᓂᒋᑦ ᑕᐃᒪᙵᓂᒃ 2015-ᖑᓚᐅᕐᓯᒪᖕᒪᑦ.

“ᐃᒪᐃᓕᖓᐃᓐᓇᐅᔭᕐᒪᑕ ᐊᐅᓚᑦᑎᔨᐅᓇᓱᒻᒪᕆᒃᖢᑎᒃ ᐊᒻᒪᓗ ᑕᐃᒪᓐᓇᑦᑕᐃᓐᓇ ᐱᓕᕆᐊᖃᕐᓂᐊᖅᑎᓗᒋᑦ ᓴᐱᕐᓇᕈᔪᒃᑐᕈᓘᖕᒪᑦ,” ᐅᖃᖅᑐᖅ. “ᐅᖃᖅᓯᒪᔭᖏᓐᓂᒃ ᐱᓕᕆᐊᖃᖅᑏᓇᕋᓱᖕᓂᐊᕋᑦᑎᒍᑦ.”

ᐱᓇᓱᐊᕈᓯᐅᓚᐅᕐᑐᒥ ᑐᓴᖅᑎᓪᓗᒍ ᐅᓇ ᐃᒃᓯᕋᕐᔪᐊᕌᐱᒃ ᐴᑉ ᕗᕌᓐᓯᔅ ᑲᓇᑕᒧᐊᕐᓂᐊᖅᑐᖅ ᑎᓯᐱᕆᒥ, ᐃᓪᓚᐅᖅ ᐅᖃᓚᐅᕐᑐᖅ ᑳᑐᓕᒃ ᑐᒃᓯᐊᕐᕕᒃ ᒪᒥᐊᑦᑕᕆᐊᖃᕐᓂᖓᓂᒃ ᐊᒻᒪᓗ ᐱᕋᔭᒍᑎᕕᓂᐊᓗᖕᓂ ᐃᒃᓯᕋᕐᔪᐊᓄᑦ ᐊᑐᖅᑕᐅᔪᕕᓂᕐᓂᒃ ᑕᐃᒪᐃᓂᕋᐃᓗᓂ ᐅᑯᓄᖓ ᓄᓇᖃᖅᑳᖅᑐᓄᑦ, ᐊᒻᒪᓗ ᐃᒃᓯᕋᕐᔪᐊᑦ ᐸᓯᔭᒃᓴᐅᑎᑕᐅᔭᕆᐊᖃᕐᓂᖏᓐᓂᒃ.

“ᐃᒃᓯᕋᕐᔪᐊᑦ ᓄᑕᖃᓂᒃ ᐋᓐᓂᕐᓱᐃᕆᕙᓚᐅᕐᓯᒪᔪᑦ ᐱᓕᕆᐊᖑᔭᕆᐊᖃᒻᒪᕆᖕᒪᑕ,” ᐅᖃᖅᑐᖅ. “ᐸᓯᔭᒃᓴᐅᑎᑕᐅᔭᕆᐊᖃᖅᖢᑎᒃ ᐊᒻᒪᓗ ᐱᕋᔭᐅᓂᖏᓐᓂᒃ ᖃᐅᔨᒪᔭᐅᓗᑎᒃ.”

ᐃᓪᓚᐅᖅ ᐅᖃᓚᐅᕐᑐᖅ ᐱᓇᓱᐊᒐᖃᕐᓂᖓᓂᒃ ᐊᔾᔨᒌᙱᑦᑑᑎᓂ ᖁᓕᕇᖕᓂᖏᑦᑎᒍᑦ ᐱᓕᕆᖃᑎᖃᕆᐊᖃᕐᓂᕐᒥᒃ ᓄᓇᖃᖅᑳᖅᑐᑦ ᑲᓇᑕᒥ ᐃᓅᓯᖃᑦᑎᐊᕐᓂᕐᓴᐅᖁᓪᓗᒋᑦ.

“ᐃᓱᒪᔪᖓ ᑕᒪᑦᑕ ᐱᓕᕆᖃᑎᒌᒃᑯᑦᑕ ᑕᑯᔪᓐᓇᕋᔭᕋᑦᑕ ᐱᐅᓂᕐᓴᓂᒃ ᑲᓇᑕᒥᐅᑕᓄᑦ, ᐱᓗᐊᖅᑐᓂᒃ ᓄᓇᖃᖅᑳᖅᑐᓄᑦ, ᐊᓪᓚᖓᔪᓄᑦ ᐊᒻᒪ ᐃᓄᖕᓄᑦ.” ᐅᖃᖅᑐᖅ ᓘᕆ ᐃᓪᓚᐅᖅ.

Share This Story

(0) Comments

Join the Conversation

Your email address will not be published. Required fields are marked *

*