ᓛᕐᒐ ᐹᕕᓐ ᐊᖏᒡᓕᒋᐊᖅᑕᐅᔪᒪᓂᖓ ᐸᕐᓇᐅᑎᓕᐅᕐᓂᕐᒧᑦ ᑲᑎᒪᔨᕋᓛᓂᑦ ᐃᑲᔪᖅᑐᒐᐅᓯᒪᔪᖅ

For English version, see Larga Baffin expansion gets planning committee backing

ᓛᕐᒐ ᐹᕕᓐ, ᑐᔪᕐᒥᕝᕕᐅᕙᒃᑐᑦ ᐃᒧᖕᒧᑦ ᐋᑐᕙᓕᐊᖅᓯᒪᔪᓄᑦ ᐋᓐᓂᐊᖅᓯᐅᕐᑎᓕᕆᔨᓂᑦ ᑕᑯᔭᐅᔭᖅᑐᕐᓯᒪᓪᓗᑎᒃ, ᖃᓂᓐᓂᖅᓴᐅᓕᖅᐳᑦ ᑎᑭᓯᒪᓕᕈᒪᓂᕐᒥᓐᓂᑦ ᓄᑖᒥᒃ, ᐊᖏᓂᖅᓴᐅᓗᓂ ᑐᔪᕐᒥᕝᕕᓕᐅᕈᓐᓇᓕᖅᑎᑕᐅᓂᕐᒥᓐᓄᑦ.

ᔫᓂ 23-ᒥ, ᐋᑐᕙ ᓄᓇᓕᐸᐅᔭᖓᑦᑕ ᐸᕐᓇᐅᑎᓕᐅᕐᓂᕐᒧᑦ ᑲᑎᒪᔨᕋᓛᖏᑦ ᓈᒻᒪᒃᓴᐃᓯᒪᓕᓚᐅᖅᐳᑦ ᐊᑐᓕᖅᑎᑕᐅᖁᓪᓗᒍ ᐃᓱᒪᓕᐅᕈᑎᓕᐊᖑᓯᒪᔪᓄᑦ ᒪᑐᐃᖅᓯᓯᒪᓕᕆᐊᖓᑦ 350-ᓂᒃ ᐃᒡᓕᖃᖅᑐᒧᑦ ᐃᒡᓗᕐᔪᐊᕐᒧᑦ ᐊᖅᑯᑎᖏᓐᓃᑦᑐᒥ Hunt Club Road (ᕼᐊᓐᑦ ᑲᓚᑉ ᕉᑦ ᐊᒻᒪᓗ Sieveright Avenue (ᓰᕝᕋᐃᑦ ᐋᕙᓅ).

ᓛᕐᒐ ᐹᕕᓐ ᒫᓐᓇᐅᔪᖅ ᐃᒡᓗᖁᑎᒋᔭᐅᔪᖅ ᑐᔪᕐᒥᕝᕕᒃ ᕆᑦᔅᒪᓐ ᕉᑦ ᐊᖅᑯᑎᖓᓂ (Richmond Road) ᐃᓂᒋᔭᐅᔪᓐᓇᕐᒪᑦ 195-ᓂᑦ ᐃᓄᖕᓂᑦ ᑭᓯᐊᓂᓗ ᐅᖓᑎᓗᐊᖓᓄᑦ ᐃᓄᖃᓕᖅᐸᒃᓱᓂ.

ᐃᑲᕐᕋᓂᒃ ᓯᑕᒪᓂᒃ (4) ᖃᕆᑕᐅᔭᑎᒍᑦ ᑲᑎᒪᓂᖃᖅᑎᓪᓗᒋᑦ, ᐃᓱᒫᓗᒍᑎᒋᔭᐅᓪᓗᑎᒃ ᑐᔪᕐᒥᕝᕕᒻᒦᑦᑐᓂᑦ ᓴᖅᑭᑕᐅᔪᓄᑦ ᐃᓚᒋᔭᐅᖃᑕᐅᓚᐅᕐᒪᑦ ᑐᕌᖓᓂᖃᓚᐅᕐᐳᖅ ᐊᒥᓲᓂᖅᓴᐅᔪᓂᑦ ᓄᓇᓯᐅᑎᓂᑦ ᐊᑐᖅᑕᐅᕙᓕᕐᓂᐊᕐᓂᖓᑕ ᐊᖏᕐᕋᕆᔭᐅᓪᓗᑎᒃ ᐃᒡᓗᖃᖅᑐᑦ ᐊᑯᓐᓂᖏᑎᒎᖅᐸᒃᑐᓂᑦ.

ᕚᕋ ᐊᒥᓂ, ᐱᓕᕆᐊᖃᖅᑎᓄᑦ ᐃᓚᒋᔭᐅᖃᑕᐅᔪᖅ ᓱᓕᐊᕋ ᐊᖏᕐᕋᖃᖅᑐᓂᑦ ᐃᓚᖃᖅᓱᑎᒃ 125-ᖑᔪᓂᒃ ᐃᒡᓗᖁᑎᒋᔭᐅᔪᓂᑦ ᐃᓚᒌᖑᔪᓂᑦ, ᐅᖃᓚᐅᕐᐳᖅ ᒫᓐᓇᐅᔪᒥ ᐃᓱᒪᓕᐅᕈᑎᐅᓯᒪᔪᖅ “ᑐᒃᓯᕋᐅᑎᐅᒻᒪᑦ ᐊᖏᔪᐊᓘᓪᓗᓂ ᐃᒡᓗᕐᔪᐊᓕᐅᖅᓯᒪᓕᕈᒪᓂᕐᒧᑦ ᒪᕐᕈᐃᖑᔪᓐᓂᑦ ᐃᒡᓗᕐᔪᐊᓕᐊᖑᔪᓂᑦ… ᐊᒥᓱᑲᓪᓚᓐᓂᑦ ᐱᓕᕆᓂᖃᕐᕕᐅᕙᒃᑐᓂ ᐊᑐᖅᑕᐅᕙᒃᑐᒃᑯᑦ ᕼᐊᑦ ᑲᓚᑉ ᕉᑦ (Hunt Club Road) ᐊᑐᕆᐊᖓᓂ ᐊᒻᒪᓗ ᐸᐃᖕᒃ ᓯᑐᕇᑦ (Bank Street) ᐊᑐᕆᐊᖓᓂ ᓴᓇᔭᐅᓯᒪᓕᐊᓂᖕᓂᖓ ᓇᓗᓇᖖᒋᑦᑑᓪᓗᓂ ᓴᓇᓕᕐᕕᐅᓂᒃᓴᖓᓄᑦ ᓄᓇᐅᑉ ᓈᒻᒪᒐᔭᖖᒋᒻᒪᑕ [ᐊᒻᒪᓗ] ᐱᕙᓪᓕᐊᑎᑕᐅᓯᒪᓕᕋᔭᕐᓂᖓᑕ ᐊᖏᓗᐊᒻᒪᕆᒃᑐᒥᒃ ᐊᑯᓂᐅᓗᐊᕋᔭᖅᑐᒥᒃᓗ.”

ᓄᑖᖑᓪᓗᓂ ᐃᒡᓗᕐᔪᐊᓕᐅᒐᐅᓯᒪᓕᕋᔭᖅᑐᑉ ᐋᓐᓂᐊᕐᕕᓕᐊᖅᑐᓄᑐᐊᖅ ᓇᔪᖅᑕᐅᕙᒐᔭᖖᒋᒻᒪᑦ, ᑭᓯᐊᓂᓕ ᓄᓇᓕᐅᔪᒥ ᐱᔨᑦᓯᕋᖅᑎᓄᑦ ᐊᒻᒪᓗ ᐱᐅᓯᑐᖃᓕᕆᓂᕐᒥ ᐃᖅᑲᓇᐃᔭᕐᕕᐅᔫᓇᔭᕐᒥᔪᖅ ᑐᔪᕐᒥᕝᕕᒻᒦᖃᑦᑕᖖᒋᑦᑐᓂᑦ, ᓄᓇᓯᐅᑎᓂᑦ ᐊᑐᖅᑕᐅᓗᐊᓕᕋᔭᕐᓂᖓᑦᑕᐅᖅ ᐃᓱᒪᒋᔭᐅᔭᕆᐊᖃᕋᔭᕐᒥᒻᒪᑦ, ᐊᒥᓂ ᐅᖃᖅᓱᓂ.

“ᑕᒪᒃᑯᐊ ᓈᒻᒪᒃᓴᖖᒋᔾᔪᑎᐅᓯᒪᔪᓄᑦ ᓄᓇᖅᑲᑎᒌᒃᑐᓂ ᓴᖅᑭᑕᐅᓯᒪᔪᓂᑦ ᐆᒃᑐᕋᐅᑎᐅᓪᓗᑎᒃ ᓴᖅᑭᑕᐅᓯᒪᒻᒪᑕ.”

ᓄᓇᓯᐅᑎᓂᑦ ᐊᒥᓱᓗᐊᓂᑦ ᐊᑐᖅᑕᐅᓕᕋᔭᕐᓂᖓᑕ ᐅᖃᖅᓯᒪᔭᖏᑦ ᐅᖃᖅᑕᐅᒃᑲᓐᓂᓚᐅᖅᐳᑦ ᑲᑎᒪᔨ ᑕᐃᐋᓐ ᑏᓐᔅᒥᑦ, ᐸᕐᓇᐅᑎᓕᐅᖅᑎᑦ ᑲᑎᒪᔨᕋᓛᖏᓐᓄᑦ ᐃᓚᒋᔭᐅᖃᑕᐅᖖᒋᒃᑲᓗᐊᖅᓱᓂ ᑭᓯᐊᓂᓕ ᐱᔾᔪᑎᖃᖅᑎᒋᔭᐅᒻᒪᑦ ᓄᓇᓕᖃᖅᑐᓄᑦ ᓄᑖᒥᒃ ᐃᒡᓗᕐᔪᐊᓕᐅᕐᕕᐅᓇᔭᖅᑐᑉ ᐃᓗᐊᓃᑦᑐᒥ.

ᐃᓱᒫᓗᒍᑎᖃᕐᒪᑕ ᓄᑖᖑᓪᓗᓂ ᐃᒡᓗᕐᔪᐊᓕᐊᖑᓯᒪᔪᖅ – ᐊᒻᒪᓗ ᐱᓗᐊᖅᑐᒥᒃ ᐃᓱᒪᓕᐅᕈᑎᐅᓯᒪᓂᖓ ᓇᐅᒃᑰᕐᓗᓂ ᐅᒃᑯᐊᖓᓄᑦ ᐊᑐᕆᐊᓕᐅᕈᒪᓂᕐᒥᒃ ᓰᕝᕋᐃᑦ ᐋᕙᓅ ᐊᖅᑯᑎᐊᓂ – ᐃᖅᑲᓇᐃᔭᕐᕕᓕᐊᖅᑐᓄᑦ ᓄᓇᓯᐅᑎᓂᑦ ᐊᑐᖅᑕᐅᖃᑦᑕᓕᑐᐃᓐᓇᕆᐊᖃᕐᒪᑦ, ᐅᕝᕙᓘᓐᓃᑦ ᓄᓇᓯᐅᑎᓂᑦ ᐊᑐᖅᑕᐅᕙᒃᓗᓂ ᐃᒡᓗᕐᔪᐊᒧᑦ ᑐᕌᖅᐸᒃᑐᓂᑦ, ᐊᖏᕐᕋᕆᔭᐅᓪᓗᑎᒃ ᐃᒡᓗᖁᑎᒋᔭᐅᔪᑎᒎᖃᑦᑕᓕᕐᓗᑎᒃ.

ᓈᒻᒪᒋᔭᐅᓯᒪᓕᕐᓂᖓᑕ ᐃᓱᒪᑕᒻᒪᕆᐅᔪᓂᑦ ᐸᕐᓇᐅᑎᓕᐊᖑᓯᒪᔪᑦ ᐊᒻᒪᓗ ᓇᓃᓐᓇᔭᕐᓂᖓᓄᑦ ᒪᓕᒐᕋᓛᖁᑎᐅᔪᑦ ᐋᖅᑭᒋᐊᖅᑕᐅᓯᒪᓕᕆᐊᖃᕐᓂᐊᕐᓂᖏᑦ ᓛᕐᒐ ᐹᕕᓐ ᑐᔪᕐᒥᕕᓕᐅᕐᓂᕐᒥᑦ ᓄᑖᒥᒃ ᐃᒡᓗᕐᔪᐊᒥᒃ, ᑲᑎᒪᔨᕋᓛᑦ ᓇᖕᒥᓂᖅ ᐋᖅᑭᒋᐊᕈᑎᐅᓯᒪᔪᓂᒃ ᐃᓕᓯᓯᒪᓕᓚᐅᖅᑐᑦ ᐃᖅᑲᓇᐃᔭᖅᑎᓄᑦ ᐅᓂᒃᑳᓕᐊᖑᓯᒪᔪᓄᑦ

ᑎᓕᐅᕆᓯᒪᓕᖅᑐᑦ ᐊᒥᓱᕐᓚᐅᓪᓗᑎᒃ ᐊᐅᓚᑦᓯᓂᐅᓕᒃᑲᓐᓂᕋᔭᖅᑐᓂᒃ, ᐃᓚᖃᖅᓱᒋᑦ ᖃᐅᔨᓴᖅᑕᐅᓯᒪᓕᖁᔨᓪᓗᑎᒃ ᓄᓇᓯᐅᑎᓂᑦ ᐊᑐᕆᐊᒃᑰᖃᑦᑕᖅᑐᑦ ᐊᒃᑐᐃᓯᒪᓂᖃᓕᕋᔭᕐᓂᖏᑕ.

ᖃᐅᔨᓴᐃᓂᐅᔪᑦ ᐱᑕᖃᓕᖅᑎᑦᓯᓇᔭᕐᒪᑕ ᓯᕗᕐᖓᓂ ᓴᓇᔭᐅᓚᐅᖅᑳᕐᑎᓐᓇᒍ ᐃᒡᓗᕐᔪᐊᖅ ᐊᒻᒪᓗ ᑭᖑᓂᐊᓂ ᓄᓇᓯᐅᑎᓂᑦ ᖃᔅᓯᐅᔪᓂᑦ ᐊᑐᖅᑕᐅᖃᑦᑕᕐᓂᖓᑕ ᓈᓴᐃᓯᒪᓂᕐᒥᒃ ᖃᐅᔨᓴᐃᓪᓗᑎᒃ ᐃᓱᒪᓕᐅᕈᑎᐅᓯᒪᔪᖅ ᓴᓇᓯᒪᓕᕈᒪᓂᕐᒥᑦ ᐊᒥᓱᖖᒍᕆᐊᖅᑎᑦᑎᓇᔭᕐᒪᖔᑦ ᓄᓇᓯᐅᑎᓂᑦ ᐊᑐᖅᑕᐅᕙᖕᓂᖓᑕ ᐊᖅᑯᓵᕐᕕᒋᕙᒃᓱᒍ ᓄᓇᖅᑲᑎᒌᖑᔪᑦ ᐃᓗᐊᒎᖅᐸᒃᑐᓂᑦ, ᐊᒻᒪᓗ ᓇᓗᓇᐃᖅᓯᔾᔪᑎᐅᓯᒪᓕᕋᔭᖅᓱᓂ ᐱᓗᐊᕈᖕᓃᖅᑎᑦᑎᓯᒪᓕᕆᐊᕈᑎᐅᓗᑎᒃ ᐱᓕᕆᓂᐅᓕᕋᔭᖅᑐᓂᑦ ᐱᓕᕆᓂᖃᕆᐊᖃᕐᓂᖅᐸᑕ.

ᓯᕗᓪᓕᖅᐹᖅᓯᐅᑎᐅᓪᓗᓂ ᓄᓇᓯᐅᑎᓂᑦ ᐊᑐᕆᐊᑉ ᐊᑐᖅᑕᐅᕙᓐᓂᖓᓄᑦ ᓈᓴᐃᓂᖃᕈᒫᖅᑐᑦ ᐃᒡᓗᕐᔪᐊᓕᐅᓕᓚᐅᖅᑳᕐᑎᓐᓇᒋᑦ, ᐊᒻᒪᓗ ᑐᒡᓕᕆᔭᖓᓂᒃ ᓈᓴᐃᓂᖃᓕᕐᒥᓗᑎᒃ ᐅᑭᐅᑦ ᐱᖓᓱᑦ ᓈᓯᒪᓕᖅᐸᑕ ᓇᔪᖅᑕᐅᓕᓚᐅᖅᑳᕐᑎᓪᓗᒍ ᐋᓐᓂᐊᕐᕕᓕᐊᖅᑐᓂᑦ ᓛᕐᒐ ᐹᕕᓐ, ᑲᑎᒪᔩᑦ ᓈᒻᒪᒃᓴᐃᓯᒪᓕᕋᔭᖅᐸᑕ ᐱᓕᕆᐊᖑᓕᕈᒪᔪᒥᒃ.

ᐊᓯᐊᑦᑕᐅᖅ ᐃᓱᒫᓗᒍᑎᖃᕐᕕᐅᒻᒥᔪᖅ ᐅᖃᖅᑕᐅᓪᓗᓂ ᑏᓐᔅᒥᑦ ᐊᒻᒪᓗ ᓄᓇᖅᑲᑎᒌᖑᔪᓄᑦ ᐃᓚᒋᔭᐅᔪᓂᑦ ᐱᔾᔪᑎᖃᕐᒪᑦ ᓄᑖᖑᓪᓗᓂ ᐃᒡᓗᕐᔪᐊᑉ ᐊᖏᓂᕆᔭᖓᓄᑦ, ᓛᕐᒐ ᐹᕕᓐ ᐃᒡᓗᕐᔪᐊᖅ ᐃᓱᒪᓕᐅᕈᑎᐅᓯᒪᒻᒪᑦ 6-ᓂᒃ ᓇᑎᖃᕋᔭᕐᓂᖓᓄᑦ, ᐅᕝᕙᓘᓐᓃᑦ 22 ᒦᑕᓂᒃ ᖁᑦᑎᖕᓂᖃᕋᔭᕐᓂᖓᓄᑦ.

ᓯᐅᓪᕕ ᓖ, ᐊᖏᔪᖅᑳᕆᔭᐅᔪᖅ ᐊᑉᐳᕐ ᕼᐊᓐᑦ ᑲᓚᑉ ᓄᓇᖅᑲᑎᒌᑦ ᑲᑐᔾᔨᖃᑎᒌᖏᓐᓂ, ᓴᖅᑮᓚᐅᕐᐳᖅ ᑕᐅᑦᑐᕆᔭᐅᓇᔭᖅᑐᒥᒃ ᐅᖃᐅᓯᕆᓪᓗᓂᐅᒃ ᖃᓄᑎᒋᓪᓚᑦᑖᖅ ᓴᓇᔭᐅᕙᓪᓕᐊᓇᔭᕐᓂᖓ ᐃᒡᓗᕐᔪᐊᑉ ᐊᖏᓂᖅᓴᐅᑐᐃᓐᓇᕆᐊᖃᕐᒪᑦ ᑕᑯᒃᓴᐅᑎᑕᐅᓯᒪᔪᒥᑦ ᑐᓂᔭᐅᓯᒪᓪᓗᓂ ᐃᓚᐅᖃᑕᐅᓪᓗᓂ ᓛᕐᒐ ᐹᕕᓐᒧᑦ ᑐᒃᓯᕋᐅᑎᒋᔭᐅᓯᒪᔪᒧᑦ.

“ᐅᒃᐱᕈᓱᒃᑲᑦᑕ ᓴᖅᑭᑕᐅᓯᒪᓕᖅᑐᑦ ᐊᒥᖅᑲᕈᑎᐅᓪᓗᑎᒃ ᐱᓕᕆᐊᖃᖅᑎᓂᑦ ᐱᓕᕆᐊᖑᓯᒪᓕᓚᐅᕐᓂᖏᑕ ᒥᑭᓂᖅᓴᐅᔫᔭᓕᖅᑎᒋᐊᖅᑕᐅᓯᒪᖕᒪᑕ ᐊᒻᒪᓗ ᐃᓱᒻᒥᖅᓯᒪᓕᖅᑎᑦᓯᒋᐊᕐᓯᒪᓂᖏᑕ ᐃᒡᓗᕐᔪᐊᓕᐊᖑᔪᒪᔪᖅ ᐊᖏᔪᐊᓘᓂᐊᖖᒋᒻᒪᑦ,” ᓖ ᐅᖃᖅᓱᓂ.

“ᐃᒪᓐᓇᐃᓪᓚᑦᑖᖅᑎᓪᓗᒍᓕ, ᐱᓱᕋᔭᒃᑲᑦᑕ ᓴᓇᕝᕕᐅᓯᒪᓕᕈᒪᔪᒃᑯᑦ, ᑕᑯᔪᓐᓇᓚᐅᕋᖃᑦᑎᒍ … ᑕᒪᒃᑯᐊ ᓴᖅᑭᑕᐅᓯᒪᓂᖏᑦ ᓱᓕᓪᓚᑦᑖᕋᔭᕐᓂᖏᑕ ᐊᔾᔨᓕᐅᖅᑕᐅᓯᒪᔪᑦ ᓴᓂᓕᕇᒐᔭᖅᐸᑕ ᖃᐅᔨᒋᐊᓕᕋᑦᑎᒍ.”

ᑕᐅᑦᑐᕆᓇᔭᖅᑕᖏᓄᑦ ᐊᒥᖅᑲᕈᑎᐅᓯᒪᔪᑦ ᓖᒥᑦ ᐋᖅᑭᒃᓱᐊᖑᓚᐅᕐᒪᑕ ᓄᓇᖅᑲᑎᒌᒃᑐᓄᑦ ᐃᓚᒋᔭᐅᔪᒥ ᐱᓕᕆᔾᔪᑎᖃᖅᐸᒃᑐᒥᑦ ᖃᕆᑕᐅᔭᑎᒎᖅᑐᓄᑦ ᓱᓇᕐᕈᑎᓄᑦ ᓲᕐᓗ Google Earth-ᒥᑦ, ᐊᑐᖅᓱᒋᑦ ᖃᓄᖅ ᐊᖏᑎᒋᓇᔭᕐᓂᖓᓄᑦ ᑎᑎᕋᖅᑕᐅᓯᒪᔪᑦ ᑐᒃᓯᕋᐅᑎᐅᓯᒪᔪᓂ ᐃᒡᓗᕐᔪᐊᓕᐅᕈᒪᓂᕐᒧᑦ.

ᓕᓕ ᔫ, ᐃᒡᓗᕐᔪᐊᒃᓴᓕᐅᑎᐅᓪᓗᓂ ᑎᑎᕋᐅᔭᖅᑎᐅᔪᖅ ᐊᒻᒪᓗ ᐃᓄᒋᐊᒃᑐᓂᕐᒥᐅᓄᑦ ᐸᕐᓇᐅᑎᓕᐅᖅᑎᐅᔪᖅ ᓄᓇᓕᐸᐅᔭᒥ, ᐅᖃᓚᐅᕐᐳᖅ ᑕᐅᑦᑐᕆᔭᐅᓇᔭᖅᑐᓄᑦ ᑐᓂᔭᐅᓯᒪᔪᑦ ᓖᒥᑦ ᐋᖅᑭᒃᓱᐊᖑᓯᒪᓂᖏᓐᓄᑦ ᐊᑐᖅᓱᑎᒃ ᓴᓇᕐᕈᑎᓂᒃ ᑕᒻᒫᔭᖅᓯᒪᓂᖃᖖᒋᑦᑐᓂᒃ.

ᑏᓐᔅ ᐅᖃᓚᐅᓵᕐᒪᑦ ᐋᖅᑭᒃᓯᒪᓕᕈᒪᒐᒥᐅᒃ ᓴᓇᓂᐅᓂᐊᖅᑐᖅ 18 ᒦᑐᕐᔅᓂᒃ ᐊᖏᓂᖃᓕᖁᓪᓗᒍ ᐊᒻᒪᓗ ᓯᑕᒪᓂᒃ (4) ᓇᕿᖃᖅᑑᓗᓂ ᐃᒡᓗᕐᔪᐊᖅ. ᑲᑎᒪᑎᓪᓗᒋᑦ, ᐃᓱᒪᓕᐅᕈᑎᖃᓚᐅᕐᒪᑦ ᑭᒡᓕᖃᓕᖅᑎᑕᐅᖁᓪᒍ ᖁᑦᑎᖕᓂᖃᕐᓂᕆᓇᔭᖅᑕᖓᑕ ᐃᒡᓗᕐᔪᐊᑉ ᐅᖓᑖᓂ 14 ᒦᑐᕐᓂᒃ, ᐅᖃᖅᓱᓂ ᐱᐅᓂᖅᓴᑎᒍᑦ ᐊᓯᔾᔨᖅᐸᓪᓕᐊᓂᖃᓕᕋᔭᕐᒪᑦ ᐊᖏᕋᕆᔭᐅᓪᓗᑎᒃ ᐃᒡᓗᒋᔭᐅᔪᓄᑦ, 6-ᓂᒃ ᓇᑎᖃᖅᑐᐃᓐᓇᕋᓗᐊᖅᑎᓪᓗᒍ ᐊᒻᒪᓗ 22 ᒦᑐᕐᔅᓂᒃ ᖁᑦᑎᖕᓂᖃᖅᑐᐃᓐᓇᕐᓗᓂ ᓯᕗᓂᐊᓂ.

ᓅᑦᓯᒋᐊᕈᑎᐅᔪᖅ ᐊᑭᕋᖅᑐᒐᐅᓚᐅᕐᒪᑦ ᑲᑎᒪᔨᕋᓛᖑᔪᓂᑦ, ᑭᓯᐊᓂᓗ ᐊᓯᐊᒍᑦ ᐋᖅᑭᒋᐊᖅᑕᐅᓯᒪᓕᖅᑐᖅ ᑲᔪᓯᑎᑕᐅᔪᖅ ᓛᕐᒐ ᐹᕕᓐ ᐃᒡᓗᕐᔪᐊᑉ ᖁᑦᑎᖕᓂᕆᔭᖓ ᒥᑭᓂᖅᓴᐅᓕᕋᔭᕐᒪᑦ ᖁᓛᖓᓂ ᐃᓚᒋᔭᐅᖃᑕᐅᓪᓗᓂ ᐃᒡᓗᕐᔪᐊᒧᑦ ᐊᑕᔪᖅ ᐊᒻᒪᓗ ᐃᓚᒋᐊᒃᑲᓐᓂᖅᓯᒪᓪᓗᓂ 6 ᒦᑕᒃᑲᓐᓂᕐᓂᒃ ᑲᑎᓪᓗᒋᑦ ᖁᑦᑎᖕᓂᕆᓇᔭᖅᑕᖓᓄᑦ ᐃᒡᓗᕐᔪᐊᑉ.

ᑕᐃᒪᓕ ᐃᓱᒪᓕᐅᕈᑎᓕᐊᖑᓯᒪᔪᑦ ᑲᔪᓯᑎᑕᐅᓯᒪᓕᕐᒪᑕ ᑲᑎᒪᔨᕋᓛᓂᑦ ᐱᓕᕆᐊᖑᓂᕐᒥᓐᓂ, ᓱᓕ ᖃᐅᔨᒪᔭᐅᖖᖏᒻᒪᑦ ᖃᖓ ᐱᓕᕆᐊᖑᓕᕈᒪᔪᖅ ᓴᖅᑭᑕᐅᓯᒪᓕᕐᓂᐊᕐᒪᖔᑦ ᐋᑐᕙ ᓄᓇᓕᐸᐅᔭᒥ ᑲᑎᒪᔨᓄᑦ ᑭᖑᓪᓕᕐᒥᒃ ᓈᒻᒪᒋᔭᐅᓯᒪᓕᖁᓪᓗᒍ.