ᓯᕗᓪᓕᕐᐹᑦ ᓄᕙᒡᔪᐊᕐᓇᖅ-19-ᒧᑦ ᑲᐴᑎᒃᓴᑦ ᓄᓇᕗᒧᑦ ᑎᑭᑉᐳᑦ
ᒪᑑᓇ ᑲᐲᑎᒃᓴᑦ ᑎᑭᓐᓂᖓ “ᐱᒋᐊᕈᑎᒻᒪᕆᐅᕗᖅ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖅᑖᖅᑕᐃᓕᓂᕐᒧᑦ,” ᓯᕗᓕᐅᕐᑎ ᐅᖃᖅᑐᖅ.
ᓄᓇᕗᒧᑦ ᓯᕗᓕᐅᕐᑎ ᔫ ᓴᕕᑲᑖᖅ, ᓴᐅᒥᐊᓃᑦᑐᖅ, ᐊᒻᒪ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᓘᒃᑖᖅ ᒪᐃᑯᓪ ᐹᑐᓴᓐ ᑕᐅᑐᒃᐳᑦ ᓯᕗᓪᓕᕐᐹ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖅᑖᖅᑕᐃᓕᓂᕐᒧᑦ ᑲᐴᑎᒃᓴᑦ ᒪᑑᓇ (Moderna) ᐅᓯᖏᖅᑕᐅᕙᓪᓕᐊᑎᓪᓗᒋᑦ ᐃᖃᓗᐃᑦ ᒥᑦᑕᕐᕕᖓᓂᒃ ᑎᓯᐱᕆ 30-ᒥᑦ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)
For an English version of this story, see First batch of COVID-19 vaccines land in Nunavut
3,000 ᑲᐴᑎᒃᓴᑦ ᐃᓂᖃᕐᑎᑕᐅᓂᐊᕐᑐᑦ ᖁᐊᒃᑯᕕᖕᓂᒃ ᐃᖃᓗᐃᑦ ᕿᑭᖅᑕᓂ ᐋᓐᓂᐊᕕᐊᓗᖓᓂᒃ, ᐊᒻᒪ 3,000 ᑲᖏᖅᖠᓂᕐᒧᐊᕐᓂᐊᖅᖢᑎᒃ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)
6,000 ᑲᐴᑎᒃᓴᑦ ᓄᕙᒡᔪᐊᕐᓇᖅ-19-ᒧᑦ ᑎᑭᑉᐳᑦ ᓄᓇᕗᒧᑦ ᑎᓯᐱᕆ 30-ᒥᑦ, ᑭᖑᓪᓕᕐᓕ ᐱᓕᕆᐊᒃᓴᐅᓂᐊᓕᕐᑐᖅ ᑲᐱᓯᑲᑕᖕᓂᕐᒧᑦ ᖃᓄᐃᓕᐅᕐᓂᐊᕐᓂᖏᓐᓂᒃ 75 ᐳᓴᓐᑎᖏᓐᓂᒃ ᐃᓐᓇᕐᓂ ᓄᓇᕗᒥᐅᑕᓂᒃ ᒫᔅᓯ ᓄᖑᓚᐅᕐᑎᓐᓇᒍ.
ᓄᓇᕗᒧᑦ ᓯᕗᓕᐅᕐᑎ ᔫ ᓴᕕᑲᑖᖅ ᐊᒻᒪ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᓘᒃᑖᖅ ᒪᐃᑯᓪ ᐹᑐᓴᓐ ᐃᖃᓗᐃᑦ ᒥᑦᑕᕐᕕᖓᓄᐊᓚᐅᕐᑐᑦ ᐱᖓᔪᐊᑦ ᐅᓪᓛᖓᓂ ᑎᓯᐱᕆ 30-ᐅᑎᓪᓗᒋ ᑕᐅᑐᒋᐊᕐᑐᖅᖢᑎᒃ ᓯᕗᓪᓕᖅᐹᓂᒃ ᑲᐴᑎᒃᓴᓂᒃ ᐴᕐᓯᒪᔪᓂᒃ ᑲᓃᑎᐊᓐ ᓄᐊᑦᑯᑦ ᐱᖁᑎᓕᕆᕝᕕᐊᓂ.
ᑖᒃᑯᐊ ᑲᐴᑎᒃᓴᑦ ᓇᑉᐸᖏᑦ ᐃᖃᓗᐃᑦ ᕿᑭᖅᑕᓂ ᐋᓐᓂᐊᕕᐊᓗᖓᓃᓐᓂᐊᕐᑐᑦ, ᐊᒻᒪ 3,000 ᑲᖏᖅᖠᓂᕐᒧᙵᐅᓂᐊᖅᖢᑎᒃ.
“ᑲᐴᑎᒃᓴᑦ ᑎᑭᒻᒪᑕ ᐊᒻᒪ ᖁᕕᐊᓱᒍᑎᕙᒃᑲ ᓄᓇᕗᒻᒥᐅᑕᑦ,” ᓴᕕᑲᑖᖅ ᐅᖃᓚᐅᕐᑐᖅ ᑐᓴᒐᒃᓴᓕᐅᕐᑎᓄᑦ ᒥᑦᑕᕐᒥᒃᕕᑦ ᑎᓯᐱᕆ 30-ᐅᑎᓪᓗᒍ.
“ᐅᓇ … ᓄᕙᒡᔪᐊᕐᓇᖅ-19 ᐋᓐᓂᐊᕐᓇᒥᑦ ᐱᑖᖅᑎᑦᑎᑦᑕᐃᓕᓂᕐᒧᑦ ᐱᒋᐊᕈᑎᐅᔪᒥᓇᕐᑐᖅ. ᐅᓪᓗᒥ ᐅᓪᓗᑦᑎᐊᕚᓗᒃ.”
ᓄᓇᕗᒥᑦ ᑲᐱᓯᑲᑕᓕᕐᓂ ᐱᒋᐊᓕᕐᓂᐊᓚᐅᕐᑐᖅ ᔭᓄᐊᕆᐅᑉ ᓯᕗᓪᓕᕐᐹᖅ ᐱᓇᓱᐊᕈᓯᐊᓂᒃ ᐅᑯᐊ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᐱᓕᕆᔨᒻᒪᕆᐅᔪᑦ ᓯᕗᓪᓕᐅᔾᔨᔪᒪᑎᓪᓗᒋᑦ ᐱᓕᕆᐊᖃᓕᖅᑳᙳᕙᒃᑐᓂᒃ ᐊᒻᒪ ᐃᓐᓇᑐᖃᕐᓂᒃ.
ᓄᓇᕗᒧᐊᖅᑐᑦ ᐅᓄᕐᓯᕙᓪᓕᐊᓕᕐᐸᑕ ᓄᑖᒥ ᐊᕐᕌᒍᒥᑦ, ᑲᐴᑎᒃᓴᖅ ᐊᑐᐃᓐᓇᐅᓕᕐᓂᐊᕐᑐᖅ ᓄᓇᕗᒥᐅᑕᑦ ᐃᓐᓇᖏᓐᓄᑦ ᑕᒪᐃᓐᓂ ᓄᓇᓕᓕᒫᓂᒃ.
ᐹᑐᓴᓐ ᐅᖃᓚᐅᕐᑐᖅ ᓄᓇᕗᑦ ᓂᕆᐅᖕᓂᕋᖅᖢᓂᐅᒃ ᓄᑖᓂᒃ ᑎᑭᕝᕕᐅᑲᑕᖕᓂᐊᕐᓂᖏᓐᓂᒃ ᐱᓇᓱᐊᕈᓯᑦ ᐱᖓᓱᒃ ᐊᓂᕈᕐᐸᑕ — ᓈᒻᒪᒐᔭᕐᑐᓂᒃ 75 ᐳᓴᓐᑎᖏᓐᓂ ᓄᓇᕗᒻᒥᐅᑦ ᐃᓐᓇᖏᓐᓂᒃ ᑕᖅᑭᓂᒃ ᐱᖓᓱᓂᒃ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᓇᑕᒥ ᐊᒻᒪ ᒪᑑᓇ (Moderna) ᐃᓱᒪᓕᐅᕆᓯᒪᖕᒪᑕ ᐃᓐᓇᖅ ᒪᕐᕈᐃᕐᓗᓂ ᑲᐱᔭᐅᕙᒡᓗᓂ, ᑖᒃᑯᐊᓗ ᐱᓇᓱᐊᕈᓯᕐᓂ ᑎᓴᒪᓂ ᐅᖓᓯᒌᓈᕐᓯᒪᓗᑎᒃ ᑲᐱᔭᐅᓂᕆᔭᐅᔪᑦ. ᑭᓯᐊᓂᓕ ᓘᒃᑖᖅ ᐹᑐᓴᓐ ᐅᖃᓚᐅᕐᑐᖅ ᖃᓄᖅ ᑕᒪᓐᓇ ᑲᐱᓯᑲᑕᖕᓂᐊᕐᓂᖅ ᐱᒋᐊᖅᑕᐅᓂᐊᕐᓂᖓᓂᒃ ᒫᓐᓇ — ᑕᒪᓐᓇᓕ ᒪᓕᒐᔭᖅᖢᓂ ᐱᑕᖃᕐᓂᖓᓂᒃ ᐊᒻᒪ ᐃᓂᖃᕈᓐᓇᕐᓂᖏᓐᓄᑦ.
ᑎᓯᐱᕆ ᐱᒋᐊᕐᓯᒪᓕᕐᑎᓪᓗᒍ, ᐊᖑᑏᖕᓂ ᒪᕐᕉᖕᓂ ᐃᓅᔪᓐᓃᕐᓂᕋᐃᓯᒪᓚᐅᕐᑐᑦ ᓄᕙᒡᔪᐊᕐᓇᖅ-10-ᒧᑦ ᑎᓯᐱᕆ 19-ᖑᑎᓪᓗᒍ — ᐊᑕᐅᓯᖅ ᐊᕐᕕᐊᕐᒥᐅᑕᖅ ᐊᒻᒪ ᐊᑕᐅᓯᖅ ᑲᖏᖅᖠᓂᕐᒥᐅᑕᖅ. ᑭᓯᐊᓂᓕ ᐱᓇᓱᐊᕈᓯᐅᓚᐅᕐᑐᒥ ᒐᕙᒪᒃᑯ ᐊᓯᙳᖅᑎᑦᑎᓚᐅᕐᒪᑕ ᓇᐃᓴᐅᑎᓂᒃ ᓲᖃᐃᒻᒪ ᓇᓗᓇᐃᕐᓯᔭᕆᐊᖃᕐᒪᑕ ᓇᓕᐊᑦ ᐃᓅᔪᓐᓃᕐᑐᕕᓂᖅ ᓇᐅᒃᑯᑦ ᓇᓗᓇᐃᖅᑕᐅᔭᕆᐊᖃᕐᓂᖓᓄᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᕐᑎᖓ ᐅᖃᓚᐅᕐᑐᖅ.
(0) Comments