‘ᓴᐳᑎᓯᒪᔭᕆᐊᖃᕋᑦᑎᒍᑦ ᓄᓇᖃᖅᑳᖅᑐᑦ ᐅᖃᐅᓯᖏ’: ᒥᐊᓕ ᓴᐃᒪᓐ

ᒐᕙᓇ ᔭᓄᕈᓪ ᐅᖃᓪᓚᒃᑐᖅ ᐱᒋᐊᓕᓵᖅᑎᓪᓗᒍ ᓄᓇᕐᔪᐊᕐᒥ ᖁᓕᓂᒃ ᐊᕐᕌᒍᓂ ᓄᓇᖃᖅᑳᖅᑐᑦ ᐅᖃᐅᓯᖓᓂᒃ ᐱᓕᕆᐊᖃᕐᓂᖅ ᐋᑐᕚᒥ

​​ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ ᐅᖃᓪᓚᒃᑐᖅ ᑲᓇᑕᒥ ᐱᒋᐊᖅᑎᑦᑎᓂᕐᒥᒃ ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᖁᓕᓂᒃ ᐊᕐᕌᒍᓂ ᓄᓇᖃᖅᑳᖅᑐᑦ ᐅᖃᐅᓯᖓᓂᒃ ᐱᓕᕆᐊᖃᕐᓂᕐᒥ ᐅᕙᓂ ᕈᐃᐅᓪ ᑲᓃᑎᐊᓐ ᔨᐅᒍᕌᕕᑯᓪ ᑲᑐᔾᔨᖃᑎᒌᓂᒃ ᐄᐳᕈᓪ 22-ᖑᑎᓪᓗᒍ ᐋᑐᕚᒥ. (ᐊᔾᔨᓕᐅᕆᔨ ᒫᑕᓕᓐ ᕼᐊᐅᕕᑦ)

By ᒫᑕᓕᓐ ᕼᐊᐅᕕᑦ

For English version, please see ‘We have to protect Indigenous languages’: Mary Simon

ᐅᖃᓪᓚᖃᑦᑕᐃᓐᓇᕐᓂᖅ ᓄᓇᖃᖅᑳᖅᑐᑦ ᐅᖃᐅᓯᖓᓂᒃ ᐃᑲᔫᑎᒻᒪᕆᐅᔪᖅ ᐃᓕᖅᑯᓯᒃᑯᑦ ᐱᕙᓪᓕᐊᓂᕐᒧᑦ, ᐅᖃᕐᑐᖅ ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ

“ᐊᒃᓱᐊᓗᒃ ᐃᓚᒋᔭᐅᒻᒪᕆᖕᒪᓐ ᑭᒃᑰᓂᑦᑎᓐᓄᑦ ᐊᒻᒪᓗ ᐊᑐᖃᑦᑕᕆᐊᖃᖅᖢᑕ ᖃᓄᑐᐃᓐᓇ ᐱᓕᕆᓂᒃᑯᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᓴᐳᔾᔨᓯᒪᓇᓱᖕᓂᕐᒧᑦ,” ᓴᐃᒪᓐ ᐅᖃᓚᐅᕐᑐᖅ ᐅᖃᓪᓚᒃᑎᓪᓗᒍ ᐄᐳᕈᓪ 22-ᒥ, ᐱᒋᐊᓕᕐᑎᓪᓗᒍ ᑲᓇᑕᒥ ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᖁᓕᓂᒃ ᐊᕐᕌᒍᓂ ᓄᓇᖃᖅᑳᖅᑐᑦ ᐅᖃᐅᓯᖓᓂᒃ ᐱᓕᕆᐊᖃᕐᓂᖅ.

ᑐᙵᓱᒃᑎᑦᑎᔨᐅᖃᑕᐊᓚᐅᕐᑐᖅ ᐅᕙᓂ Royal Canadian Geographical Society (ᑲᓇᑕᒥ ᓄᓇᓕᕆᓂᒃᑯᑦ ᑲᑐᔾᔨᖃᑎᒌᑦ) ᐋᑐᕚᒥ ᐅᓇᓗ ᐊᖓᔪᖅᑳᕆᔭᐅᑲᐃᓐᓇᕐᑐᖅ ᐱᐊᕆ ᐱᐊᒑᑦ, ᑲᓇᑕᒥ ᐊᓪᓚᓄᑦ ᐊᖓᔪᖅᑳᖑᓂᑯ ᓄᓇᖃᖅᑳᖅᑐᓂᒃ. ᓴᐃᒪᓐ ᐃᓚᒋᔭᐅᑎᑕᐅᓕᓚᐅᕐᒪᑦ ᑲᑐᔾᔨᖃᑎᒌᓄᑦ ᑕᒪᓐᓇ ᑕᕿᖅ ᐱᒋᐊᕐᓯᒪᓕᕐᑎᓪᓗᒍ.

ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᖁᓕᓂᒃ ᐊᕐᕌᒍᓂ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ ᐱᓕᕆᐊᖃᕐᓂᖅ ᐱᓕᕆᐊᖑᓂᐊᕐᑐᖅ ᑎᑭᓪᓗᒍ 2032, ᐱᔾᔪᑎᖃᕈᑎᐅᔪᖅ ᓄᓇᖃᖅᑳᖅᑐᑦ ᐱᔪᓐᓇᐅᑎᖃᕐᓂᖏᓐᓂᒃ ᐃᓱᒪᒋᔭᖏᓐᓂᒃ ᐅᖃᕈᓐᓇᕐᓂᕐᒥᒃ ᐊᒻᒪᓗ ᐃᓕᓐᓂᐊᖅᑎᑕᐅᔭᕆᐊᖃᕐᓂᕐᒥᒃ ᐅᖃᐅᓯᑐᖃᖏᑦᑎᒍᑦ ᑕᒪᒃᑯᐊ ᐊᓯᐅᖁᓇᒋ ᓄᓇᖃᖅᑳᖅᑐᑦ ᐅᖃᐅᓯᖏᑦ ᓄᓇᕐᔪᐊᒥ.

“ᓄᓇᖃᖅᑳᖅᑑᓪᓗᓂ ᐱᒻᒪᕆᐅᓛᖑᖃᑕᐅᔪᖅ ᐱᔪᓐᓇᐅᑎᖃᕐᓂᒃᑯ ᓇᖕᒥᓂᖅ ᐱᓇᓱᒍᓐᓇᕐᓂᕐᒥᒃ,” ᐱᐊᓪᒑᑦ ᐅᖃᕐᑐᖅ.

“ᓲᖃᐃᒻᒪ ᓇᖕᒥᓂᖅ ᐅᖃᐅᓯᖃᕐᑐᒍᑦ, ᓄᓇᖃᖅᖢᑕ, ᐱᖁᔭᖃᖅᖢᑕ, ᐃᓅᖃᑎᖃᐅᖅᖢᑕ ᐊᒻᒪᓗ ᓇᖕᒥᓂᖅ ᒐᕙᒪᖃᖅᖢᑕ. ᑕᐃᒪᓕ ᐅᖃᐅᓯᖅ ᐱᒻᒪᕆᐊᓘᕗᖅ ᐆᒪᓇᓱᖕᓂᑦᑎᓐᓄᑦ.”

ᓴᐃᒪᓐ, ᓯᕗᓪᓕᖅᐹᖅ ᓄᓇᖃᖅᑳᖅᑐᖅ ᑲᓇᑕᒧᑦ ᒐᕙᓇ ᔭᓄᕈᓪ, ᐅᖃᓚᐅᕐᑐᖅ ᐅᒃᐱᕈᓱᖕᓂᕋᖅᖢᓂ ᓄᓇᖃᖅᑳᖅᑐᑦ “ᑲᒪᒋᔭᖃᕐᒪᑕ” ᓇᖕᒥᓂᖅ ᐅᖃᐅᓯᖏᓐᓂᒃ ᐅᖃᓪᓚᖃᑦᑕᕐᓂᕐᒥᒃ ᐃᓚᖏᓐᓄᑦ ᐊᒻᒪ ᐱᖃᓐᓇᕆᔭᖏᓐᓄᑦ ᐊᔪᙱᑦᑕᕌᖓᑕ.

“ᐅᓇ ᐱᐅᓂᖅᐹᖑᔪᖅ ᐊᓯᐅᔨᑦᑕᐃᓕᓂᕐᒥᒃ ᐊᒻᒪ ᐊᑐᕐᓂᖅᓴᐅᔪᓐᓇᕐᓂᕐᒥᒃ ᐅᖃᐅᓯᕐᒥᒃ ᐊᑐᖃᑦᑕᕐᓗᒍ ᖃᓄᑐᐃᓐᓇᖅ,” ᐅᖃᕐᑐᖅ, ᐅᖃᕆᓪᓗᓂ ᐅᖃᓪᓚᓚᐅᕐᓯᒪᓂᖓᑎᑐᑦ ᐃᓄᒃᑎᑐᑦ ᑎᒃᑯᐊᖅᑕᐅᓵᖅᖢᓂ ᐅᑭᐊᒃᓵᖑᓚᐅᕐᑐᖅ ᐊᒻᒪᓗ ᐊᖏᖅᑎᑕᐅᑎᓪᓗᒍ ᒐᕙᓇ ᔭᓄᕈᒧᑦ ᔪᓚᐃᖑᑎᓪᓗᒍ

“ᐃᓱᒪᒐᒪᓕ ᐊᑐᖃᑦᑕᕐᓗᒍ ᐱᒻᒪᕆᐊᓘᖕᒪᑦ. ᐃᓱᒪᒐᒪ ᑕᐃᒪᓐᓇ ᓂᕆᐅᒍᒪᓪᓗᖓ ᐅᖃᐅᓯᖅᐳᑦ ᐊᑐᕈᓐᓇᑦᑎᐊᕐᓗᑎᒍᑦ ᖃᓄᑐᐃᓐᓇᑦᑎᐊᖅ.”

ᓴᐃᒪᓐ ᐃᖅᑲᐅᒪᔪᖅ ᐱᕈᖅᐸᓪᓕᐊᓪᓗᓂ ᐊᒻᒪᓗ ᖃᓪᓗᓈᑎᑐᑦ ᑭᓯᐊᓂ ᐅᖃᓪᓚᖃᑦᑕᖁᔭᐅᓪᓗᓂ ᐃᓕᓐᓂᐊᕆᐊᖃᑦᑕᖅᑎᓪᓗᒍ. ᐅᖃᓚᐅᕐᑐᖅ ᐃᓄᒃᑎᑐᑦ ᐅᖃᓪᓚᒃᑐᑦ ᐊᖑᔭᐅᔭᕌᖓᒥ ᐱᑲᒻᒪᒃᑕᐅᕙᓚᐅᕐᓂᖓᓂᒃ ᐃᓕᓐᓂᐊᕐᕕᖕᒥ.

“ᐅᓄᕐᑐᑦ ᓄᓇᖃᖅᑳᖅᑐᑦ ᐅᖃᐅᓯᖏᑦ ᐊᓯᐅᔨᔭᐅᓯᒪᓕᕐᑐᑦ ᐃᓕᓐᓂᐊᕆᐊᕕᖕᓄᑦ, ᐃᓄᒋᐊᒃᑐᓃᑦᑕᕆᐊᖃᕐᓂᕐᒧᑦ ᐊᒻᒪᓗ ᒪᓕᒋᐊᖃᓕᕐᓂᕐᒥᒃ ᐊᑐᐊᒐᖏᓐᓂᒃ ᒪᑯᐊ ᑐᒃᓯᐊᕐᕖᑦ ᐊᒻᒪ ᒐᕙᒪᒃᑯᑦ,” ᐅᖃᕐᑐᖅ. “ᐅᑯᐊ ᓄᓇᖃᖅᑳᖅᑐᓄᑦ ᐃᓱᒪᓕᐊᕆᔭᐅᓯᒪᙱᑦᑐᑦ ᑭᓯᐊᓂᓕ ᑎᓕᐅᖅᑕᐅᓪᓚᕆᖕᓂᒃᑯᑦ.”

ᐊᖏᕐᕋᕐᓯᒪᓕᕌᖓᒥ ᑭᓯᐊᓂ ᐃᓄᒃᑎᑐᑦ ᐅᖃᕈᓐᓇᕐᓯᑦᑎᐊᖃᑦᑕᖅᑐᖅ ᐅᖃᐅᓯᕐᖓᐅᑎᖓᓂᒃ, ᓴᐃᒪᓐ ᐅᖃᕐᑐᖅ.

“ᖃᔭᒋᔭᒃᑲ ᐃᓚᒃᑲ ᖃᐅᑕᒫᑦ ᐅᖃᐅᓯᓐᓂᒃ ᐅᖃᓪᓚᒃᑎᑕᐅᖃᑦᑕᕋᒪ ᐊᒻᒪᓗ ᑐᑭᓯᓯᒪᔪᓐᓇᖅᖢᖓ ᖃᓄᖅ ᐅᖃᐅᓯᖅ ᑐᑭᖃᕐᒪᖔᑕ ᑭᒃᑯᑐᐃᓐᓇᕐᓄᑦ,” ᐅᖃᕐᑐᖅ.

ᐅᖃᓚᐅᕐᒥᔪᖅ “ᓴᙱᓂᐊᓗᖕᒥ ᐊᒻᒪ ᐱᓇᓱᐃᓐᓇᕈᓐᓇᕐᓂᕐᒥᒃ” ᓄᓇᖃᖅᑳᖅᑐᖅ ᓴᖅᑭᑦᑎᓯᒪᔪᑦ ᐱᓯᒪᐃᓐᓇᖅᖢᒋᑦ ᐅᖃᐅᓯᖏ, ᐃᓕᖅᑯᓯᖏᑦ ᐊᒻᒪ ᑭᓇᐅᓂᖏ ᐊᕐᕌᒍᒐᓴᖕᓂᒃ ᖁᕕᐊᓇᙱᑦᑐᓂ ᐊᑐᕐᓯᒪᒐᓗᐊᖅᖢᑎᒃ ᐊᒻᒪᓗ ᐊᑐᐊᒐᑎᒍᑦ ᐋᖅᑭᒃᑕᐅᓯᒪᓇᓱᖕᓂᕐᒥᒃ.

“ᐱᒋᐊᒃᑲᓐᓂᕈᓐᓇᕐᓯᓂᖅ ᐅᓇ ᓱᕈᓯᕐᓂᒃ ᐊᔪᕈᓐᓃᕐᓴᖅᑎᑦᑎᔪᓐᓇᕐᓗᑎᒃ ᐊᒻᒪ ᐊᓂᒍᐃᔪᓐᓇᕐᓯᓗᑎᒃ ᐅᖃᐅᓯᖏᓐᓂᒃ ᐊᑐᖃᑦᑕᕐᓗᑎᒃ,” ᐅᖃᕐᑐᖅ.

“ᐃᓅᓱᒃᑐᓕᒫᓄᑦ ᐅᖃᕐᑐᖓ ᐱᓇᓱᐃᓐᓇᖃᑦᑕᕐᓗᓯ ᐅᖃᐅᓯᕐᓂ ᐊᔪᕈᓐᓃᕐᓴᕐᓂᕐᒥᒃ ᐊᒻᒪᓗ ᖃᐅᔨᒪᔪᖓ ᐃᓕᖁᓯᕗᑦ ᐊᓯᐅᙱᑦᑐᓐᓇᕐᓂᖏᓐᓂᒃ ᐃᓕᔅᓯ ᑲᒪᔨᐅᑲᑕᒡᓗᓯ.”

ᐅᓪᓗᓕᒫᖅ ᖃᓄᐃᓕᐅᕐᓇᐅᔪᖅ ᐃᓚᖃᓚᐅᕐᒥᔪᖅ ᐊᐃᒡᒐ ᐊᑕᒍᑦᓯᐊᒃ ᖁᓪᓕᕐᒥ ᐃᑯᒻᒪᒃᓯᓪᓗᓂ; ᑐᒃᓯᐊᖅᑐᖃᖅᖢᓂ ᐊᓇᐅᓪᓚᕈᑎᒧᑦ ᐅᓇ ᐅᑎᔅᑲᓐ ᑕᔅᑭ, ᐅᑯᓇᙵᑦ ᐊᓪᓚᓂᒃ ᑭᑎᒐᓐ ᔨᐱ ᐊᓂᔅᐃᓇᐸᒡᑯᓐᓂᒃ (Kitigan Zibi Anishinabeg Nation); ᐊᒻᒪᓗ ᐳᔫᖅᑎᑦᑎᓪᓗᓂ ᔮᓱᐊ ᒧᕆᓐ (ᐊᓪᓚᖓᔪᖅ) ᒪᑐᐃᖅᑕᐅᑎᓪᓗᒍ ᖁᕕᐊᓲᑎᖃᕐᓂᖅ.

ᐅᐸᒍᑎᔪᑦ ᖁᙱᐊᓚᐅᕐᒥᔪᑦ ᐃᙱᖅᑎ ᐃᓄᒃ-ᒨᕼᐋᒃ ᐱᐊᑐᕆᔅ ᑎᐅ ᓄᓇᕕᒻᒥᐅᑕᖅ, ᒥᒃᒪᒃ ᐃᙱᖅᑎ ᐊᒪ ᓯᑏᕙᓐᔅ ᐊᒻᒪ ᐊᓪᓚᖓᔪᖅ ᐊᒋᐊᒐᖅᑎ ᔮᑯᕆ ᕗᐃᓕᐅ ᑲᑎᖃᑎᒌᖕᓂᐊᓵᖅᑎᓪᓗᒋᑦ.

ᖃᓄᐃᓕᐅᕈᑎᐅᓚᐅᕐᑐᖅ ᓴᖅᑭᔮᑲᐅᑎᒋᑎᑕᐅᓚᐅᕐᑐᖅ ᕙᐃᔅᐳᒃᑯᑦ ᐊᒻᒪᓗ ᐱᓕᕆᐊᖑᔪᑦ ᐅᑯᓇᙵᑦ ᐃᑲᔪᖅᑕᐅᓚᐅᕐᖢᑎᒃ ᑲᓇᑕᒥ ᑲᒥᓴᓐᑯᓐᓄᑦ ᓄᓇᕐᔪᐊᒥ ᑲᑐᔾᔨᖃᑎᒌᓄᑦ ᐃᓕᓐᓂᐊᖅᑐᓕᕆᓂᕐᒧᑦ, ᖃᐅᔨᓴᖅᑐᓕᕆᓂᕐᒧᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᑲᑐᔾᔨᖃᑎᒌᓂᒃ (UNESCO) ᐊᒻᒪᓗ ᑲᓇᑕᒥ ᑲᑎᒪᔨᕐᔪᐊᑦ ᓴᓇᐅᒐᓕᕆᓂᕐᒧᑦ (Canada Council for the Arts).

Share This Story

(0) Comments

Join the Conversation

Your email address will not be published. Required fields are marked *

*