ᓴᓂᑭᓗᐊᖅᒥ ᓂᕈᐊᕈᓐᓇᖅᑐᑦ ᓂᕈᐊᓚᐅᕐᑐᑦ ᐃᓅᓱᒃᑐᒥ ᒪᐃᔭᒃᓴᒥᒃ

For the English version of this story, please see Sanikiluaq voters choose teenager as new mayor.

ᓄᓇᕗᒥᑦ ᓄᑖᖑᓛᖅ ᒪᐃᔭᐅᓕᕐᑐᖅ ᓄᑲᖅᖠᖅᐹᖑᔪᒃᓴᐅᔪᖅ ᒪᐃᔭᙳᖅᑐᓂᒃ ᓴᓂᑭᓗᐊᖅᒥᐅᑦ ᓂᕈᐊᓚᐅᖅᑎᓪᓗᒋᑦ ᐃᓅᓱᒃᑐᒥᒃ ᑲᑎᒪᔨᓂᒃ ᐊᐅᓚᑦᑎᓂᐊᖅᑐᒥᒃ.

ᒪᕐᕉᖕᓂ ᓂᕈᐊᒐᒃᓴᖅᑕᖃᖅᑎᓪᓗᒍ, ᐅᓇ ᒪᓴᑯ ᑭᑐᓱᒃ, 18, ᓵᓚᒃᓴᓚᐅᕐᑐᖅ ᕼᐋᒻᒪᓚᒃᑯᓐᓄᑦ ᓂᕈᐊᖅᑕᐅᓂᕐᒧᑦ, 81-ᓂ ᓂᕈᐊᖅᑕᐅᓪᓗᓂ ᐱᖃᑎᖓ ᓂᕈᐊᒐᒃᓴᖅ ᐋᓚᓯ ᒥᑭᔪᒃ 39-ᓂ ᓂᕈᐊᖅᑕᐅᑎᓪᓗᒍ ᐅᖃᓚᐅᕐᑐᑦ ᓂᕈᐊᖅᑐᓕᕆᔨᑦ ᓄᓇᕗᒥᑦ.

ᓄᓇᕗᒥᑦ ᓄᓇᓕᖕᓄᑦ ᓂᕈᐊᖅᑎᓪᓗᒋᑦ ᐅᒃᑑᐱᕆ 23-ᖑᑎᓪᓗᒍ, ᒪᐃᔭᐅᓂᕐᒧᑦ ᓂᕈᐊᕐᓂᖅ ᐋᖅᑭᒋᐊᖅᑕᐅᓚᐅᕐᓯᒪᖕᒪᑦ ᐅᒃᑑᐱᕆ 30-ᒧᑦ ᓂᕈᐊᒐᒃᓴᑕᖃᓚᐅᙱᓐᓂᖓᓄᑦ.

ᓇᓕᐊᓪᓘᓐᓃᑦ ᑭᑐᓱᒃ ᐅᓇᓗ ᒥᑭᔪᒃ ᑲᑎᒪᔨᐅᓂᕐᒧᑦ ᐱᓇᓱᓚᐅᕐᓯᒪᙱᑦᑑᒃ, ᑭᓯᐊᓂᓕ ᓂᕈᐊᓚᐅᕐᑎᓪᓗᒋᑦ ᑕᒪᕐᒥᒃ ᐅᖃᓚᐅᖅᑑᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓄᓇᖃᐃᓐᓇᐅᔭᕐᓂᖏᓐᓂᒃ ᐊᒻᒪᓗ ᐱᐅᓂᕐᓴᒥ ᐱᓇᓱᒍᒪᔪᐃᓐᓇᐅᓪᓗᑎᒃ.

ᑭᑐᓱᒃ ᐃᓕᓐᓂᐊᕌᓂᓵᓚᐅᕐᑐᖅ ᐊᒻᒪᓗ ᓂᐅᕕᕐᕕᒃᒥ ᓄᐊᑦᒫᑦᒥ ᐃᖅᑲᓇᐃᔭᖅᖢᓂ ᐊᒻᒪ ᐃᑲᔪᖅᑎᐅᖃᑕᐅᓪᓗᓂ ᓄᓇᓕᖕᓂ ᓂᕿᖃᖅᑎᑦᑎᓇᓱᖕᓂᕐᒥᒃ.

ᐊᒻᒪᓗ ᐅᒃᑑᐱᕆ 30-ᒥ ᓂᕈᐊᕈᓐᓇᖅᑐᑦ ᑭᙵᓂᑦ ᓂᕈᐊᓚᐅᕐᒪᑕ 7-ᓂ ᐃᓕᓐᓂᐊᖅᑐᓕᕆᔨᒃᓴᓂᒃ, ᐅᑯᐊ ᓂᕈᐊᖅᑕᐅᓚᐅᖅᑐᑦ ᐅᓘᓯ ᐳᑐᒍᖅ, ᓵᒋᐊᒃ ᐳᑦᓚᑦ, ᑯᕆᔅ ᐳᓪᓚᑦ, ᓯᒥᒐ ᓱᕖᒐ, ᒫᑕ ᐸᓪᓗ ᓴᐃᒪᔪᐊᓕᒃ, ᓵᓚᒨᓂ ᐊᓲᓇ ᐊᒻᒪ ᐃᔨᑦᓯᐊᒃ ᔩ. ᐃᔨᑦᓯᐊᒃ, ᐅᖃᖅᓯᒪᓚᐅᕐᑐᑦ ᓂᕈᐊᖅᑐᓕᕆᔨᒃᑯᑦ ᓄᓇᕗᒥᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ.

ᓂᕈᐊᕐᕕᒃᓴᖃᓚᐅᕐᓯᒪᔫᒐᓗᐊᑦ ᐅᒃᑑᐱᕆ 23-ᒥ ᑭᓯᐊᓂᓕ ᓂᕈᐊᖅᑐᓕᕆᔨᒃᑯᑦ ᓄᓇᕗᒥᑦ ᓈᒻᒪᙱᓕᐅᕈᑎᓂᒃ ᓇᓂᓯᓕᓚᐅᕐᓯᒪᖕᒪᑕ ᓂᕈᐊᕈᑎᒃᓴᓂ ᐋᖅᑭᒋᐊᕆᐊᓕᖕᓂᒃ.

ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᓄᓇᕗᒥᑦ ᓂᕈᐊᖅᑐᓕᕆᔨᒃᑯᑦ ᐊᖓᔪᖅᑳᖓ ᑕᔅᑎᓐ ᕗᕋᑦᓚᓐ ᐅᖃᓚᐅᕐᓯᒪᔪᖅ ᓂᕈᐊᕐᓇᖅ ᐅᖓᕙᕆᐊᖅᑕᐅᖁᓪᓗᓂᐅᒃ ᐅᒃᑑᐱᕆ 30-ᒧᑦ “ᓂᕈᐊᖅᑐᓕᕆᓂᖅ ᐱᓕᕆᐊᖑᑦᑎᐊᖁᓪᓗᒍ ᓂᕈᐊᕈᓐᓇᖅᑐᑦ ᑭᙵᓂᒃ ᑕᒻᒪᕐᓯᒪᙱᑦᑐᓂᒃ ᓂᕈᐊᕐᕕᖃᕈᓐᓇᕐᓗᑎᒃ.”

ᑭᓯᐊᓂᓕ ᐊᑕᐅᓯᖅ ᓂᕈᐊᕈᑎᐅᔪᖅ ᓄᓇᕗᒥᑦ ᓱᓕ ᐋᖅᑭᒍᑎᐅᕌᓂᙱᒻᒪᑦ.

ᐅᖅᓱᖅᑑᖅᒥ ᓄᓇᓕᖕᓄᑦ ᑲᑎᒪᔨᒃᓴᓂᒃ ᓂᕈᐊᕐᓂᖅ ᐅᖓᕙᕆᐊᖅᑕᐅᓚᕐᑐᖅ ᓄᕕᐱᕆ 20-ᒧᑦ ᐃᓅᔪᓐᓃᖅᑐᖃᓚᐅᖅᑎᓪᓗᒍ ᓂᕈᐊᒐᒃᓴᐅᖃᑕᐅᔪᒥᒃ ᓂᕈᐊᓚᐅᖅᑎᓐᓇᒋᑦ ᐅᒃᑑᐱᕆ 23-ᒥ.