ᓴᕕᑲᑖᖅ ᐱᐅᒃᓴᙱᓚᖅ ᐸᕐᓇᐅᑎᒥᒃ ᐆᒥᖓ ᐃᓄᐃᑦ ᓂᕈᐊᕈᓐᓇᕐᓂᐊᕐᓗᑎᒃ ᓄᓇᕗᑦ ᓯᕗᓕᐅᕐᑎᖏᓐᓂᒃ

ᐸᕐᓇᐅᑎ ᐅᖃᐅᓯᐅᑲᑕᒃᓯᒪᔪᖅ ᐃᒪᓐᓇ ᓄᓇᕗᑦ ᓯᕗᓕᐅᕐᑎᖓ ᓂᕈᐊᕆᔭᐅᓗᓂ ᓂᕈᐊᕈᓐᓇᖅᑐᓄᑦ ᐃᑲᔪᖅᑐᖅᑕᐅᙱᓚᖅ ᒫᓐᓇ ᓯᕗᓕᐅᖅᑎᐅᔪᒧᑦ.

“ᐃᓱᒪᔪᖓᓕ ᒫᓐᓇ ᑭᒃᑯᓕᒫᒃᑯᑦ ᐱᓕᕆᔾᔪᓯᖃᓛᖑᓂᑦᑎᓐᓂᒃ,” ᐅᖃᖅᑐᖅ ᓄᓇᕗᑦ ᓯᕗᓕᐅᕐᑎᖓ ᔫ ᓴᕕᑲᑖᖅ.

ᓯᕗᓕᐅᕐᑎᐅᑉ ᐅᖃᐅᓯᖓ, ᐅᖃᐅᓯᐅᓚᐅᕐᑐᖅ ᐊᔾᔨᒌᙱᑦᑑᑎᓂᒃ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ, ᑭᐅᔾᔪᑎᐅᓚᐅᕐᑐᖅ ᐊᒡᒍᒧᑦ ᒪᓕᒐᓕᐅᕐᑎ ᐹᓪ ᖁᐊᓴ ᐅᖃᓚᐅᖅᑎᓪᓗᒍ ᔫᓂ 5-ᒥ, ᑭᖑᓕᖅᐹᒥᑦ ᐅᓪᓗᕐᒥᑦ ᐅᐱᕐᙶᒥᓐ ᕿᑲᕐᓂᐊᖅᑎᓪᓗᒋᑦ ᒪᓕᒐᓕᐅᕐᑎᑦ, ᐃᒪᓐᓇ ᐅᖃᖅᖢᓂ ᑭᖑᓪᓕᕐᒥ ᑲᑎᒪᓕᕈᑎᒃ ᐱᒋᐊᖅᑎᑦᑎᔪᒪᓂᕋᖅᖢᓂ ᐊᑎᓕᐅᖅᑎᑦᑎᓂᒃᑯᑦ ᖃᓄᖅ ᓄᓇᕗᑦ ᓯᕗᓕᐅᖅᑎᖓ ᓂᕈᐊᖅᑕᐅᔭᕆᐊᖃᕐᓂᖓᓂᒃ.

ᖁᐊᓴᐅᑦ ᑕᐃᒪᐃᓕᓚᐅᕐᑐᖅ ᐊᕐᕌᒍ ᐊᓂᒍᖅᑎᓪᓗᒍ ᓄᓇᕗᑦ ᒪᓕᒐᓕᐅᖅᑎᖏᓐᓂ ᓯᕗᓕᐅᖅᑎᐅᔪᓐᓃᖅᑎᑕᐅᓚᐅᖅᑎᓪᓗᒍ ᓂᕈᐊᕐᓂᒃᑯᑦ.

ᐸᕐᓇᐅᑎᖓᒍᓪᓕ ᐃᒪᐃᓕᖓᔪᖅ ᓯᕗᓕᐅᕐᑎ ᓂᕈᐊᕆᔭᐅᔪᓐᓇᕐᓗᓂ ᓂᕈᐊᕈᓐᓇᖅᑐᓄᑦ ᓄᓇᕗᒥᑦ, ᐃᒪᓐᓇᐅᙱᑦᑐᖅ ᒫᓐᓇ ᐊᑐᖅᑕᐅᔪᑎᑐᑦ, ᒪᓕᒐᓕᐅᖅᑎᓂᒃ ᓂᕈᐊᕆᔭᐅᓗᓂ ᒪᓕᒐᓕᕆᕝᕕᐅᑉ ᑲᑎᒪᕕᐊᓂᒃ.

ᑭᓯᐊᓂᓕ ᓴᕕᑲᑖᖅ ᐅᖃᖅᑐᖅ ᐊᓯᙳᖅᑎᙱᒃᑲᓗᐊᕐᓗᒍ ᒫᓐᓇ ᓯᕗᓕᐅᕐᑎᐅᔪᑦ ᓂᕈᐊᖅᑕᐊᖃᑦᑕᕐᓂᖏᑦ ᓄᓇᕗᒥᑦ.

“ᒪᓕᒐᓕᐅᕐᑎᕗᑦ ᓂᕈᐊᖃᑦᑕᖅᑐᑦ ᒥᓂᔅᑕᐅᓂᐊᕐᑐᓂᒃ, ᒪᓕᒐᓕᐅᕐᑎᕗᑦ ᓂᕈᐊᖃᑦᑕᖅᑐᑦ ᓯᕗᓕᐅᖅᑎᒃᓴᒥᓐ ᑭᒡᒐᖅᑐᐃᔭᖏᓐᓄᑦ, ᐊᒻᒪᓗ ᓯᕗᓕᐅᖅᑎ ᒪᓕᒐᓕᐅᖅᑎᓂᒃ ᑭᒡᒐᖅᑐᐃᓪᓗᓂ, ᑕᒪᓐᓇᓗ ᓴᕿᑕᐅᒻᒪᕆᓚᐅᖅᖢᓂ ᐊᕐᕌᓂ,” ᓴᕕᑲᑖᖅ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᐊᕐᕌᒍᒥᑦ ᓯᕗᓕᐅᖅᑎᐅᓯᒪᓕᖅᑎᓪᓗᒍ.

ᓄᓇᕗᓕᒫᒥᑦ ᓂᕈᐊᕆᔭᐅᔪᖅ ᓯᕗᓕᐅᕐᑎ ᒪᓕᒐᓕᐅᖅᑎᓂᒃ ᑭᒡᒐᖅᑐᐃᙱᑐᐃᓐᓇᕆᐊᖃᕐᒪᑦ, ᓴᕕᑲᑖᖅ ᐃᓱᒪᔪᖅ, ᐅᖃᕆᓪᓗᓂ ᒪᓕᒐᓕᐅᕐᑎᑦ ᐱᔪᓐᓇᕐᓂᖃᙱᑐᐃᓐᓇᕆᐊᖃᕐᓂᖏᓐᓂᒃ ᓯᕗᓕᐅᕐᑎᒥᒃ ᐲᕐᓯᔪᒪᓐᓂᕈᑎᒃ.

“ᐊᒥᓱᒃᑲᓐᓂᕐᓂᒃ ᐊᐱᖁᑎᑕᖃᕐᒥᖕᒪᑦ … ᑕᒪᓐᓇ ᐱᑐᐃᓐᓇᐅᓇᔭᙱᒻᒪᑦ ᐱᓕᕆᓂᖅ,” ᐅᖃᖅᑐᖅ ᓴᕕᑲᑖᖅ

“ᓂᕈᐊᖅᑎᑦᑎᓇᔭᕋᕖᑦ ᑖᓐᓇ ᓯᕗᓕᐅᖅᑎᐅᓂᐊᕐᑐᖅ ᓂᕈᐊᕆᔭᐅᓯᒪᓗᓂ ᓇᑉᐸᖏᓐᓂᒃ ᓂᕈᐊᕈᓐᓇᖅᑐᓃ? ᖁᓕᓂᒃ (10) ᐃᓄᖕᓂᒃ ᐱᓇᓱᒃᑐᖃᖅᐸᓐ, ᑕᐃᒪᓕ ᐊᑕᐅᓯᕐᓘᓐᓃ ᓇᑉᐸᖏᓐᓄᑦ ᓂᕈᐊᕆᔭᐅᓇᔭᕐᓂᖓ ᓇᓗᓇᕋᔭᕐᒪᓪᓘᓐᓃᑦ. ᐅᕝᕙᓘᓐᓃᑦ ᓯᕗᓕᐅᕐᑎ 4 ᐳᓴᓐᑎᒥᓪᓘᓐᓃ ᓂᕈᐊᕆᔭᐅᓇᔭᕐᒫ?”

ᐊᒻᒪᓗ, ᐊᔪᕐᓇᕋᔭᕐᒥᖕᒪᑦ ᓯᕗᓕᐅᕐᑎ ᐊᔾᔨᒋᙱᑕᖓᓂ ᐱᓇᓱᐊᒐᖃᕐᓂᕈᓂ ᒪᓕᒐᓕᐅᕐᑏᑦ ᐱᓇᓱᒃᑕᖏᓐᓂᒃ.

ᒫᓐᓇᐅᔪᕐᓕ, ᓯᕗᓕᐅᕐᑎ ᐸᕐᓇᐅᓯᐅᕐᐸᒃᑐᖅ ᒐᕙᒪᒃᑯᓐᓄᑦ ᒥᓂᔅᑕᓄᑦ ᓴᖅᑭᑕᐅᓯᒪᔪᓂᒃ. ᑖᓐᓇᓗ ᐱᔭᐅᔪᒪᔪᖅ ᐃᑲᔪᖅᑐᖅᑕᐅᓕᖅᐸᒃᖢᓂ ᑕᒪᐃᓐᓄᑦ ᒪᓕᒐᓕᐅᕐᑎᓄᑦ. ᓯᕗᓕᐅᕐᑎ ᓴᖅᑭᑎᑦᑎᔨᑐᐃᓐᓇᐅᙱᒻᒪᑦ, ᐅᖃᖅᑐᖅ.

ᐊᒻᒪᓗ ᑖᓐᓇ ᓄᓇᕗᓕᒫᒥ ᓂᕈᐊᖅᑕᐅᓯᒪᔪᖅ ᓯᕗᓕᐅᖅᑎ ᒐᕙᒪᒃᑯᑦ ᐱᓇᓱᐊᖅᑕᖓᓂᒃ ᐊᓯᙳᖅᑎᑦᑎᓇᓱᓕᖅᐸᑦ ᓂᕈᐊᖅᑕᐅᕌᓪᓚᓚᐅᖅᑎᓪᓗᒍ, ᓴᕕᑲᑖᖅ ᐊᐱᕆᔪᖅ.

“ᐃᒪᐃᓕᖓᓂᐊᖅᑐᕐᓕ ᐱᓕᕆᖃᑎᒌᕐᓂᐅᓕᕐᓗᓂ ᑕᐃᒪᓐᓇ ᑕᐃᔭᐅᙱᒃᑲᓗᐊᕐᓗᓂ,” ᐅᖃᖅᑐᖅ ᖁᐊᓴᐅᑉ ᐅᖃᐅᓯᕆᓚᐅᖅᑕᖓᓂ ᓄᓇᕗᒥᑦ ᓂᕆᐊᖅᑕᐅᓯᒪᔪᒥᒃ ᓯᕗᓕᐅᖅᑎᒃᓴᒥᑦ. “ᐅᕙᓂᓕ ᐱᓕᕆᖃᑎᒌᖃᑦᑕᖅᐳᒍᑦ. ᐊᒻᒪᓗ ᒪᓕᒐᓕᐅᕐᑎᐅᔪᑦ ᓯᕗᓕᐅᕐᑎᒥ ᐲᕐᓯᔪᓐᓇᖅᖢᑎᒃ ᐊᒻᒪ ᑕᐃᒪᓐᓇ ᐊᔪᙱᓐᓂᕐᒥᖕᓂ ᓴᕿᑎᑦᑎᓯᒪᓕᖅᖢᑎᒃ.”

ᓴᕕᑲᑖᖅ ᐅᖃᓚᐅᕐᑐᖅ ᖁᐊᓴᓗ ᐅᖃᓪᓚᖃᑎᒌᖃᑦᑕᕐᓂᖏᓐᓂᒃ.

“ᐅᖃᓪᓚᖃᑎᒋᖃᑦᑕᖅᑕᕋ. ᐅᖃᓪᓚᖃᑦᑕᖅᑐᒍᒃ,” ᓴᕕᑲᑖᖅ ᐅᖃᖅᑐᖅ. “ᑕᐃᒪᐃᕈᓘᔭᕐᓇᖅᑎᓪᓗᒍ ᐃᓛᓐᓇ ᒪᒃᐱᒐᖅ ᐊᓯᐊᓅᕆᐊᖃᖃᑦᑕᕐᒪᑦ ᐊᒻᒪ ᓯᕗᒧᑦ ᑲᔪᓯᑐᐃᓐᓇᓕᕐᓗᓂ.”

ᒐᕙᒪᑐᖃᒃᑯᓐᓂᒃ ᐃᑲᔫᑎᑦ ᐃᓄᐃᑦ ᑕᐱᕇᑯᓐᓄᑦ ᑐᓂᔭᐅᔪᑦ ᓇᓗᓈᕿᔾᔪᑎᐅᕗᑦ

ᐅᓇ ᐅᖃᐅᓯᐅᓂᐊᖅᑐᖅ ᓂᕈᐊᕐᓂᕐᒥ ᐊᓯᙳᕈᑎᐅᔪᒪᔪᖅ ᐃᓱᒫᓘᑎᒋᔭᑐᐊᕆᙱᓚᐅᒃ ᓴᕕᑲᑖᑉ ᐊᐃᑉᐸᖓᓂ ᐊᕐᕌᒍᒥ ᓯᕗᓕᐅᕐᑎᐅᓂᐊᕐᓂᖓᓂᒃ.

ᐅᓇᐅᖕᒥᖕᒪᑦ ᑕᐃᔭᖓ “ᓇᓗᓈᕿᔾᔪᑎ” ᑮᓇᐅᔭᑦ ᐅᑯᐊ ᐃᓄᐃᑦ ᑕᐱᕇᑦ ᑲᓇᑕᒥ ᐱᑖᕆᓵᓚᐅᕐᑕᖓ ᐋᑐᕚᒥ ᐱᓕᕆᐊᖏᓐᓄᑦ ᐃᓕᓐᓂᐊᕐᓂᓕᕆᓂᒃᑯᑦ ᐊᒻᒪ ᐋᓐᓂᐊᖃᖅᑕᐃᓕᓂᒃᑯᑦ—ᐳᕙᒡᓗᒃᑕᐃᓕᓂᓕᕆᓂᖅ, ᓱᕈᓯᓛᓕᕆᓂᕐᒧᑦ ᐊᒻᒪ ᐃᓕᓐᓂᐊᖅᑎᑦᑎᕙᓪᓕᐊᓂᕐᒧᑦ, ᐊᒻᒪᓗ ᓯᒡᒐᓖᖅᑐᓗᐊᖅᑕᐃᓕᑎᑦᑎᓂᕐᒧᑦ.

ᑕᒪᒃᑯᐊᓕ ᓄᓇᕗᑦ ᒐᕙᒪᒃᑯᑦ ᐱᓕᕆᐊᕆᕙᒃᑕᖓᑦ ᐱᔨᑦᑎᕋᐅᑎᑦ ᑭᒃᑯᓕᒫᓄᑦ ᒐᕙᒪᐅᓂᖏᓐᓄᑦ.

ᐃᓄᐃᑦ ᑕᐱᕇᑦ ᑲᓇᑕᒥ ᓴᕿᑎᑦᑎᓚᐅᕐᒪᑕ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐃᓄᐃᑦ ᐱᔭᕆᐊᖃᖅᑕᖏᓐᓂᒃ ᐃᒡᓗᖃᕆᐊᖃᕐᓂᒃᑯᑦ, ᑖᓐᓇᑦᑕᐅᖅ ᓄᓇᕗᑦᒥ ᐃᒡᓗᓕᕆᔨᕐᔪᐊᒃᑯᑦ ᑲᒪᒋᕙᒃᑕᖓᑦ ᒫᓐᓇ.

ᐃᓱᒫᓘᑎᐅᔪᑦ ᖃᓄᖅ ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᖃᖃᑦᑕᕐᓂᐊᕐᓂᖏᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐃᒡᓗᓕᕆᓂᒃᑯ ᒪᓕᒐᓕᕆᕕᒡᔪᐊᒥ ᓴᖅᑭᑕᐅᓚᐅᕐᑐᖅ ᔫᓂ 3-ᖑᑎᓪᓗᒍ, ᐅᓇ ᐊᕐᕕᐊᑦ ᐅᐊᖕᓇᖓᓄᑦ-ᑎᑭᕋᖅᔪᐊᖅᒧᑦ ᒪᓕᒐᓕᐊᖅᑎ ᔭᓐ ᒪᐃᓐ ᐊᐱᕆᓚᐅᕐᑐᖅ ᓄᓇᕗᑦ ᒐᕙᒪᒃᑯᑦ ᐱᓕᕆᔾᔪᓯᖃᕆᐊᒃᓴᖏᓐᓂᒃ ᓯᕗᓂᒃᓴᒥᑦ ᑖᒃᑯᓂᖓ ᐱᓕᕆᖃᑎᖃᕐᓂᒃᑯᑦ.

ᑭᓯᐊᓂᓕ ᐱᑕᖃᙱᒻᒪᑦ ᐊᒻᒪ “ᓇᓗᓇᕈᓘᔭᑲᑕᖕᓇᖅᖢᓂ. ᓲᖃᐃᒻᒪ ᖃᐅᔨᒪᙱᓐᓇᑦᑕ ᖃᓄᖅ ᑕᒪᓐᓇ ᐱᓕᕆᓂᖅ ᑲᔪᓯᓂᐊᕆᐊᒃᓴᖓᓂᒃ,” ᓴᕕᑲᑖᖅ ᐅᖃᖅᑐᖅ.

ᓴᕕᑲᑖᖅ ᐅᖃᓚᐅᕐᑐᖅ ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᓚᐅᕐᓂᕋᖅᖢᓂᒋᑦ ᑖᔅᓱᒧᖓ ᐱᔨᑦᑎᕋᖅᑎᐅᔪᒪᙱᓐᓂᕋᖅᖢᑎᒃ—ᑭᓯᐊᓂᓕ ᓴᕕᑲᑖᖅ ᐃᓱᒫᓘᑎᖃᑎᖃᕐᓂᕋᓚᐅᕐᑐᖅ ᑲᓇᑕᐅᑉ ᐊᖓᔪᖅᑳᖓᑎᑐᑦ ᐅᓇ ᑮᓇᐅᔭᖅ ᐃᓄᐃᑦ ᑕᐱᕇᑦ ᑲᓇᑕᒧᑦ ᑐᓂᔭᐅᓂᖓᓂᒃ.

ᒫᓐᓇᓕ, ᒪᓕᒐᖅᑎᒍᑦ, ᓄᓇᕗᑦ ᒐᕙᒪᒃᑯᑦ ᐱᔨᑦᑎᕋᖅᑎᐅᕗᑦ ᑭᒃᑯᓕᒫᓄᑦ ᓄᓇᕗᒥᑦ, ᐅᖃᖅᑐᖅ.

ᓄᓇᕗᑦ ᒐᕙᒪᒃᑯᑦ ᑭᒃᑯᓕᒫᓄᑦ ᒐᕙᒪᐅᔪᓐᓃᖅᐸᑕ, ᑕᐃᒪᓕ ᓄᓇᕗᒥᑦ ᓄᓇᑖᕐᓂᕐᒧᑦ ᐊᖏᕈᑏᑦ ᐅᖃᓕᒫᕆᐊᖃᓕᕋᔭᖅᐸᑎᑦ, ᐅᖃᖅᑐᖅ.

MMIWG ᐅᓂᒃᑳᑦ ᐃᑲᔪᖅᐳᑦ ᐃᒡᓗᒧᑦ ᑮᓇᐅᔭᖅᑖᕈᑎᒃᓴᒃᑲᓐᓂᕐᓂᒃ

ᐅᑯᑎᒎᓇᕐᓕ ᓄᓇᕗᑦ ᒐᕙᒪᒃᑯᑦ ᖃᓄᐃᓕᐅᕈᑎᒃᓴᕆᓂᐊᖅᑕᖏᑦ ᐃᒡᓗᓕᕆᓂᕐᒧᑦ ᐊᒻᒪᓗ ᐃᒡᓗᑖᒃᑲᓐᓂᕆᐊᖃᕐᓂᕐᒥ ᐅᕙᓂ ᐅᓂᒃᑳᓂᒃ ᑲᓇᑕᒥ ᖃᐅᔨᓇᓱᖕᓂ ᐊᓯᐅᓯᒪᔪᓂᒃ ᐊᒻᒪ ᑐᖁᑕᐅᓯᒪᔪᓂᒃ ᓄᓇᖃᖅᑳᖅᑐᑦ ᐊᕐᓇᖏᓐᓂᒃ ᐊᒻᒪ ᓂᕕᐊᕐᓵᓂᒃ, “ᑕᐃᒪᓕ ᐱᓪᓚᕆᒃᑕᖃᕆᐊᖃᕐᓂᖓᓂᒃ ᐱᑕᖃᕐᓂᕐᓴᐅᓕᕐᒪ ᒐᕙᒪᑐᖃᒃᑯᓐᓄᑦ ᐱᓕᕆᐊᖑᔭᕆᐊᖃᖅᖢᓂ,” ᓴᕕᑲᑖᖅ ᐅᖃᖅᑐᖅ.

ᐅᑯᓄᖓᓕ ᐊᓯᐅᓯᒪᔪᑦ ᐊᒻᒪ ᑐᖁᑕᐅᓯᒪᔪᑦ ᓄᓇᖃᖅᑳᖅᑐᑦ ᐊᕐᓇᐃᑦ ᓂᕕᐊᕐᓵᓪᓗ ᖃᐅᔨᓴᕈᑎᓄᑦ ᐅᓂᒃᑳᓂᒃ, ᒫᓐᓇ ᕿᒥᕐᕈᐊᖅᑕᐅᔪᑦ ᓄᓇᕗᒥᑦ ᐃᓄᓕᕆᔨᒃᑯᓐᓂᒃ, ᓴᕕᑲᑖᖅ ᐅᖃᓚᐅᕐᑐᖅ ᐊᑕᐅᓯᑐᐊᖑᓂᕋᖅᖢᓂᐅᒃ ᐃᒡᓗᑖᒃᑲᓐᓂᕆᐊᖃᕐᓂᕐᒧᑦ ᐱᔪᒪᒐᔭᕐᓂᖅ, ᐅᑯᑎᒎᓇᓕ, ᒐᕙᒪᑐᖃᒃᑯᓐᓂᑦ ᐃᑲᔫᓯᐊᖅᑖᕐᓂᒃᑯᑦ.

“3,000 ᐅᖓᑖᓂ ᐃᒡᓗᑖᕆᐊᖃᕋᑦᑕ. 2019/20-ᒧᑦ ᑮᓇᐅᔭᖃᕋᑦᑕ ᓈᒻᒪᑐᐃᓐᓇᖅᑐᓂᒃ 83-ᓂ ᐃᒡᓗᒃᓴᓄᑦ,” ᐅᖃᖅᑐᖅ. “ᓇᐃᓴᐅᑎᑦ ᑕᑯᓚᐅᕐᓯᐅ: ᓇᖕᒥᓂᖅ ᐅᕙᑦᑎᓐᓂᒃ ᐱᔪᓐᓇᙱᓐᓇᑦᑕ. ᐱᓕᕆᔾᔪᑎᖃᙱᓗᐊᕋᑦᑕ.”

ᐊᑐᓗᐊᕐᓂᕐᒧᑦ ᒪᒥᓴᐃᓂᖅ, ᐃᓐᓇᑐᖃᐃᑦ ᑲᒪᒋᔭᐅᔭᕆᐊᖃᕐᓂᖏᑦ ᓯᕗᓪᓕᐅᑎᑕᐅᔪᑦ ᓱᓕ

ᑕᐃᒪᐃᕈᓘᔭᕐᑎᓪᓗᒋᑦ, ᓴᕕᑲᑖᖅ ᐊᕐᕌᒍᒥ ᑎᑎᕋᕐᕕᐊᓃᓐᓂᐊᓕᖅᑎᓪᓗᒍ, ᐅᖃᖅᑐᖅ ᐱᒃᑯᓕᓯᒪᓂᕐᒥᓂᒃ ᓯᕗᓕᐅᖅᑎᐅᓂᖓᓂᒃ ᐊᒻᒪᓗ ᖁᕕᐊᒋᑦᑎᐊᖅᖢᓂᐅᒃ ᐱᓕᕆᐊᓂ.

ᐱᐅᒋᑦᑎᐊᖅᑕᖏᓐ ᐃᖅᑲᓇᐃᔭᖅᑎᖏᑦ, ᒥᓂᔅᑕᐅᔪᑦ ᐊᒻᒪ ᒪᓕᒐᓕᐅᖅᑎᑦ.

“ᑕᒪᕐᒥᒃ ᐱᓕᕆᖃᑎᒌᖃᑦᑕᕐᒪᑕ. ᑭᓯᐊᓂᓕ ᓱᒃᑲᐃᓐᓂᕐᓴᐅᔪᖅ ᐱᓕᕆᕙᓪᓕᐊᓂᖅ ᒪᒥᓴᕐᕕᒃᓴᓕᕆᓂᖅ ᐊᒻᒪ ᐃᓐᓇᑐᖃᐃᑦ ᓄᓇᑦᑎᓐᓄᑦ ᐅᑎᖅᑎᒐᓱᖕᓂᖏᑦ,” ᐅᖃᖅᑐᖅ.

ᒪᕐᕉᖕᒪᑎ ᓯᕗᓪᓕᖅᐹᕆᔭᐅᔪᑦ ᓯᕗᓕᐅᕐᑎᐅᑉ ᐱᓕᕆᔾᔪᑎᒋᔪᒪᔭᖏᑦ ᐊᐱᖅᓱᖅᑕᐅᑎᓪᓗᒍ ᐋᒐᓯᐅᓚᐅᕐᓯᒪᔪᒥ.

ᑭᓯᐊᓂᓕ ᒪᕕᑲᑖᖅ ᐅᖃᖅᑐᖅ ᒐᕙᒪᖏ ᐱᓇᓱᐊᒐᒃᓴᖃᕐᒪᑕ ᐱᐊᓂᒍᒪᔭᖓᓂᒃ.

“ᐱᓕᕆᑯᑖᖕᓇᕐᒪᑦ ᐱᓕᕆᐊᕆᔪᒪᔭᑦᑎᓐᓂᒃ ᓲᖃᐃᒻᒪ ᐱᓕᕆᔾᔪᑎᐅᕙᒃᑐᓄᑦ ᐊᐅᓚᒍᑎᒃᓴᓂᒃ ᐊᒻᒪ ᑮᓇᐅᔭᖃᖅᑎᑦᑎᓂᖅ,” ᐅᖃᖅᑐᖅ. “ᐱᓕᕆᔪᒍᑦ ᓱᓕ ᒪᒥᓴᕐᕕᒃᓴᓕᕆᓂᕐᒥᒃ ᐊᒻᒪᓗ ᐃᓐᓇᑐᖃᕐᓄᑦ ᐊᖏᕐᕋᕆᔭᐅᔪᒃᓴᓂᒃ ᐊᒻᒪᓗ ᖃᒡᓕᕙᓪᓕᐊᓪᓗᑎᒍᑦ ᐱᐊᓂᒃᕕᒃᓴᕗᑦ, ᑭᓯᐊᓂᓕ ᑎᑭᐅᑎᐊᓂᙱᑕᕗᑦ ᓱᓕ.”