ᕉᒥᐅ ᓵᒐᓈᔅᒥ ᐸᓯᔭᒃᓴᐅᑎᑦᑎᔪᖅ ᐅᖃᐅᓯᖃᖅᑐᖅ ‘ᓈᒻᒪᙱᓗᐊᖅᑐᐊᓗᖕᒥ ᖃᓄᐃᓕᐅᕈᑎᕕᓂᖏᓐᓂᒃ’

For English version, see Romeo Saganash accuser speaks out about ‘traumatic experience’

ᐊᕐᓇᖅ ᐸᓯᔭᒃᓴᐅᑎᑦᑎᔪᖅ ᒪᓕᒐᓕᐅᖅᑎᕕᓂᖅ ᕉᒥᐅ ᓵᒐᓈᒧ ᖁᓄᔪᕐᓂᐊᖅᑕᐅᓂᕕᓂᕐᒥᒃ ᐅᖃᐅᓯᖃᖅᐳᖅ ᖃᓄᐃᓕᐅᕈᑎᕕᓂᕐᓂᒃ ᐊᒻᒪᓗ ᒪᓕᒐᓕᕆᓂᒃᑯᑦ ᐱᓕᕆᐊᖃᒃᑲᓐᓂᕈᒪᓂᕐᒥᒃ.

“ᖁᔭᓕᔪᒪᔪᖓ ᑕᒪᐃᓐᓂ ᐃᓄᖕᓂ ᐅᕙᓐᓂ ᐃᑲᔪᖅᑐᐃᓯᒪᔪᓂᒃ ᐅᓇ ᖁᕕᐊᓇᙱᓗᐊᖅᑐᖅ ᐊᑐᕐᓯᒪᓂᕐᓄᑦ,” ᑳᒪᓐ ᕈᐊᐃ ᐅᖃᓚᐅᕐᑐᖅ ᒪᓕᒐᓕᕆᔨᖓᒍᑦ ᑳᑐᕆᓐ ᒫᓱᓪ.

“ᓂᐱᖃᙱᑦᑐᒪᙱᓐᓇᒪ, ᐊᒻᒪᓗ ᐱᒻᒪᕆᐊᓘᓪᓗᓂ ᓂᐱᒐ ᐊᑐᕐᓗᒍ ᐃᑲᔪᖅᕈᓐᓇᕐᓂᓐᓂ ᐊᓯᓐᓂ ᐱᑦᑎᐊᖅᑕᐅᓯᒪᙱᑦᑐᓂᒃ ᖁᓄᔪᕐᓂᐊᕐᓂᕐᒧᑦ.”

ᐃᒪᓐᓇᐅᕙᒃᖢᓂᓕ, ᑲᓇᑕᒥ ᐃᖅᑲᖅᑐᐃᔩᑦ ᑎᑎᕋᐅᓯᖃᖁᔨᕙᙱᖢᑎᒃ ᓴᐳᔾᔨᓯᒪᓂᕐᒥᒃ ᐸᓯᔭᒃᓴᐅᑎᑦᑎᓯᒪᔪᓂᒃ ᐊᒻᒪ ᐱᑦᑎᐊᖅᑕᐅᓯᒪᙱᑦᑐᓂᒃ ᖁᓄᔪᕐᓂᐊᖅᑕᐅᓂᕐᒧᑦ.

ᕈᐊᐃ ᐱᖁᔨᓯᒪᓂᖓᓄᑦ ᑕᒪᓐᓇ ᓄᖅᑲᖅᑎᑕᐅᓯᒪᙱᑦᑐᖅ ᖃᓄᐃᓕᐅᕈᑎᑦ ᑐᓴᖅᑕᐅᔪᓐᓇᖅᖢᑎᒃ, ᑎᑎᕋᓚᐅᕐᑐᖅ ᒫᓱᒡ ᐋᒐᓯ 31-ᒥ ᐅᑯᓄᖓ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᕈᐊᐃ ᐅᖃᓚᐅᕐᑐᖅ ᖃᐅᔨᓇᓱᖕᓂᕋᖅᖢᓂ ᐊᓯᐊᒎᕈᑎᒃᓴᓂᒃ ᐊᒻᒪᓗ ᓂᕆᐅᖕᓂᕋᖅᖢᓂ “ᒪᓕᒐᓕᕆᓂᒃᑯ ᐃᑲᔪᖅᑕᐅᓂᐊᕐᓂᕐᒥᒃ ᐊᒻᒪ ᓇᓗᓇᐃᕐᓯᓂᕐᒥᒃ.”

ᓵᒐᓈᔅ, ᐊᓐᑏᐲᒃᑯᓐᓄ ᒪᓕᒐᓕᐅᖅᑎᐅᓂᑯᑦ ᐅᑯᓄᖓ ᐊᑎᐱ—ᔭᐃᒻᔅ ᐸᐃ—ᓄᓇᕕᒃ—ᐄᔭᐅᒧᓪᓗ 2011-ᒥ 2019-ᒧ,  ᐸᓯᔭᒃᓴᙳᖅᑎᑕᐅᓚᐅᕐᑐᖅ ᐊᐅᔭᖅ ᖁᓄᔪᕐᓂᐊᖅᓂᕐᒥᒃ ᐅᐃᐱᒡᒥ.

ᐅᓇ ᒪᒐᓕᕆᒡᕕᓂᖅ ᑎᒍᔭᐅᓚᐅᕐᓯᒪᔪᖅ ᔫᓂ 27-ᒥ ᖃᓄᐃᓕᐅᕈᑎᕕᓂᕐᓂᒃ ᒪᐃ 1-ᖑᑎᓪᓗᒍ, ᐸᓖᓯ ᐅᐃᓂᐱᒡᒥ ᐅᖃᖅᒋᔭᐅᔪᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐅᓇ ᐸᓯᔭᒃᓴᐅᔾᔪᑎ ᓵᒐᓈᒥ ᓱᓕ ᐃᖅᑲᖅᑐᐃᕕᒃᒥ ᐱᓕᕆᐊᖑᙱᑦᑐᖅ.

ᕈᐊᐃ ᑭᓇᐅᖕᒪᖔᑦ ᐅᖃᐅᓯᐅᓚᐅᕐᓯᒪᔪᖅ ᐋᒐᓯ 31ᔾᒥ ᑲᓃᑎᐊᓐ ᐳᕋᔅᑯᓐᓄᑦ (ᑐᓴᒐᒃᓴᓕᐅᖅᑎᑦ Canadian Press).

ᓵᒐᓈᔅ ᓗᐊᐃᔭᖓ, ᐄᑕᓐ ᐳᓛᒃ, ᐅᖃᕐᕕᐅᔪᓐᓇᓚᐅᙱᒻᒪ ᐅᓇ ᐅᓂᒃᑳᓕᐊᖑᑎᓪᓗᒍ.

ᐳᓛᒃ ᐅᖃᓚᐅᕐᑐᖅ ᑲᓃᑎᐊᓐ ᐳᕋᔅᑯᓐᓄ ᐃᖅᑲᖅᑐᐃᕕᒃᑯᑦ ᐱᓕᕆᐊᖑᕙᓪᓕᐊᓕᕐᓂᖓᓂᒃ ᐊᒻᒪᓗ ᓵᒐᓈᔅ ᓈᒻᒪᙱᓕᐅᕈᑎᖃᕐᓯᒪᓪᓗᓂ ᐃᓕᓐᓂᐊᕆᐊᕐᕕᒋᕙᒃᓚᐅᖅᑕᖏᓐᓂᒃ.