ᕿᒥᕐᕈᐊᕈᓐᓇᖅᑐᑎᑦ ᐃᓄᐃᑦ ᐅᖃᐅᓯᖏᑦᑎᒍᑦ ᐃᓕᖁᓯᕐᓂᒃ ᐅᕘᓇ ᐃᓄᐃᑦ ᐅᓂᒃᑳᖏᑦᑎᒍᑦ

ᐅᓇ ᓰᐲᓰ ᐅᑭᐅᕐᑕᖅᑐᕐᒥ ᓯᕗᓪᓕᖅᐹᖓᑦ ᖃᕋᓴᐅᔭᒃᑯᑦ ᑐᓴᖅᓴᐅᔪᓐᓇᕐᓂᖓ ᑯᐊᐳᕇᓴᓐᑯᑦ ᐱᕈᖅᑎᑦᑎᒍᑎᐅᓂᐊᕐᑐᖅ ᐃᓄᒃᑎᑐᑦ ᓂᐱᓕᐅᕐᑕᐅᓯᒪᔪᓂᒃ

ᒥᐊᓕ ᐸᐅᑕ, ᓰᐲᓰᑯᓐᓄᑦ ᐋᖅᑭᒃᓱᐃᕙᓪᓕᐊᔨ ᒫᓐᓇ ᔭᓗᓚᐃᒥᐅᑕᐅᓕᕐᑐᖅ, ᑐᙵᓱᒃᑎᑦᑎᔨᐅᕗᖅ ᐊᒻᒪ ᑎᑎᕋᖅᐸᒃᖢᓂ ᓰᐲᓰ ᐅᑭᐅᕐᑕᖅᑐᕐᒥ ᓯᕗᓪᓕᖅᐹᒥᑦ ᖃᕋᓴᐅᔭᒃᑯᑦ ᑐᓴᕐᓴᐅᔪᓐᓇᖅᑐᒥᑦ: ᐃᓄᐃᑦ ᐅᓂᒃᑳᖏᑦ. (ᓰᐲᓰᑯᑦ ᐊᔾᔨᖁᑎᖓ ᐊᔾᔨᓕᐅᕐᑕᖓ ᕗᐊᑐ ᓯᑐᕌᖕ)

By ᔨᒻ ᐱᐊᓪ

For an English version of this story, see Take a digital tour through Inuit oral culture with Inuit Unikkaangit

ᖁᔭᓐᓇᒦᒃ ᒥᐊᓕ ᐸᐅᑕᒧᑦ ᐅᕙᓂ ᓰᐲᓰ ᐅᑭᐅᕐᑕᖅᑐᕐᒥ, ᐃᓄᒃᑎᑐᑦ ᐅᖃᓪᓚᒃᐸᒃᑐᑦ ᑲᓇᑕᒦᑦᑐᓕᒫᑦ ᑐᓵᑎᑕᐅᖃᑦᑕᕐᓂᐊᓕᕐᒪᑕ: ᖃᕋᓴᐅᔭᒃᑯᑦ ᕿᒥᕐᕈᐊᕈᓐᓇᕐᓂᖅ ᐃᓄᐃᑦ ᐅᖃᐅᓯᖓᓂᒃ ᐃᓕᖁᓯᓕᖕᓂᒃ.

ᐊᔪᕈᓐᓃᕐᒪᑕ ᐊᑐᐃᓐᓇᖃᑲᐅᑎᒋᔪᓐᓇᕐᓯᓪᓗᑎᒃ ᐅᑯᓂᖓ ᓰᐲᓰᑯᑦ ᓂᐱᓕᐅᖃᑦᑕᕐᓂᑯᖏᓐᓂᒃ ᐅᓄᕐᑐᒻᒪᕆᐊᓗᖕᓂ ᐃᓄᐃᑦ ᐅᖃᐅᓯᖓᒎᖓᔪᓂᒃ ᒪᐅᓇ ᓄᑖᒃᑯᑦ ᖃᕋᓴᐅᔭᒃᑯᑦ ᑐᓵᒐᒃᓴᐅᓕᕐᑐᓂᒃ ᐱᓇᓱᐊᕈᓯᐅᓵᕐᑐᒥ ᐱᒋᐊᖅᑕᐅᓚᐅᕐᑐᒥᓐ ᑕᐃᔭᐅᔪᖅ ᐃᓄᐃᑦ ᐅᓂᒃᑳᖏᑦ.

ᐃᓄᐃᑦ ᐅᓂᒃᑳᖏᑦ ᐅᑯᓇᙶᕐᓯᒪᔪᑦ ᓰᐲᓰᑯᑦ ᐃᓄᒃᑎᑑᖓᔪᑦ ᓂᐱᓕᐅᖃᑦᑕᕐᓯᒪᔭᖏᓐᓂᒃ ᐅᓂᒃᑳᓂ, ᐅᖃᓪᓚᖃᑎᒌᑐᐃᓐᓇᕐᑐᓂᒃ ᐊᒻᒪᓗ ᐊᐱᖅᓱᖅᑕᐅᖃᑦᑕᕐᓯᒪᔪᓂᒃ ᐅᑯᐊ ᓰᐲᓰᑯᑦ ᓂᐱᓕᐅᖃᑦᑕᕐᓯᒪᔭᖏᓐᓂᒃ ᐊᕐᕌᒎᓕᕐᑐᓂᒃ 60 ᐅᖓᑖᓂ, ᑭᓯᐊᓂᓕ ᐸᐸᑕᐅᓯᒪᑐᐃᓐᓇᕐᓯᒪᔪᑦ ᓰᐲᓰᒃᑯᑦ ᑲᑎᑉᐸᓪᓕᐊᔭᖏᓐᓂᒃ ᐊᕐᕋᒍᒐᓴᐅᓕᕐᑐᓂᒃ.

ᐅᑯᐊ ᐃᓚᖃᖅᑐᑦ ᐅᓄᕈᓘᔭᖅᑐᓂᒃ ᓂᐱᓕᐅᕐᓯᒪᔪᓂᒃ ᐅᕙᙵᑦ ‘ᓯᓐᓇᒃᓴᐅᑎᑦ’, ᑖᓐᓇ ᐊᑯᓂᐊᓗᒃ ᐅᓐᓄᒃᑯᑦ ᓈᓚᐅᑎᒃᑯᑦ ᑐᓴᕐᓴᐅᖃᑦᑕᖅᑐᖅ ᐃᓐᓇᑐᖃᐃᑦ ᐅᓂᒃᑳᖅᑎᓪᓗᒋᑦ ᐅᕘᓇ ᓰᐲᓰ ᓄᓇᕗᑦᑯᑦ.

ᖃᕋᓴᐅᔭᒃᑯᑦ ᓈᓚᒐᒃᓴᑦ, ᒪᑯᓄᖓᓕ ᑕᐃᒪᐃᑦᑐᓂᒃ ᖃᐅᔨᒪᓗᐊᙱᑦᑐᓄᑦ, ᐃᒪᐃᑦᑐᑦ ᐅᖃᓪᓚᖃᑦᑕᕐᓂᒃᑯᑦ ᖃᓄᐃᓕᐅᕈᑎᐅᕙᒃᑐᓂᒃ, ᑖᒃᑯᓄᖓᓗ ᐃᓚᐅᓕᕈᒪᔪᓐᓇᖅᖢᓯ ᐊᑐᕐᓗᓯ ᐅᑯᓂᖓ ᐅᖄᓚᐅᑎᕋᓛᒃᑯᑦ, ᓵᑦᑐᓂᒃ ᖃᕋᓴᐅᔭᕋᓛᒃᑯᑦ ᑎᒍᒥᐊᒐᓂᒃ ᐅᕝᕙᓘᓐᓃᑦ ᖃᕋᓴᐅᔭᑎᒍᑦ.

ᓰᐲᓰ ᓄᐊᑦ ᓯᕗᓪᓕᖅᐹᖅ ᖃᕋᓴᐅᔭᒃᑯᑦ ᓈᓚᒐᒃᓴᖓ

ᐊᓯᖏᓐᓂᒃ ᑲᑐᔾᔨᖃᑎᒌᓂᒃ ᐱᓇᓱᐊᒐᖃᕐᒥᔪᓂᒃ ᐅᑯᑎᑐᓇᖅ ᔭᓗᓇᐃᒥᑦ ᑳᐱᓐ ᓈᓚᐅᑎᒃᑯᑦ ᓴᖅᑭᑎᑦᑎᓯᒪᔪᖃᓕᕋᓗᐊᕐᑎᓪᓗᒍ ᖃᕋᓴᐅᔭᒃᑯᑦ ᑐᓵᔭᐅᔪᒃᓴᓂᒃ ᐅᑭᐅᕐᑕᖅᑐᒥ, ᐅᓇᓕ ᓯᕗᓪᓕᖅᐹᖅ ᓰᐲᓰ ᐅᑭᐅᕐᑕᖅᑐᖅ ᓴᖅᑭᑎᑕᖓ.

ᐊᒻᒪᓗ ᓈᓚᐅᑎᒃᑰᖅᑐᑎᑑᙱᖢᓂ, ᖃᐅᔨᓴᐅᑎᒥ ᐅᑕᕿᔭᕆᐊᖃᕈᓐᓃᖅᖢᑎ ᑐᓵᓂᐊᖅᑕᕐᓂᒃ ᓲᖃᐃᒻᒪ ᑕᒪᒃᑯᐊ ᖃᕋᓴᐅᔭᒃᑯᑦ ᓈᓚᒐᒃᓴᑦ ᐊᑐᐃᓐᓇᐅᖕᒪᑕ ᖃᖓᑐᐃᓐᓇᑦᑎᐊᒃᑯᑦ.

“ᑐᓵᔪᓐᓇᖅᑐᑎᑦ ᐅᓂᒃᑳᓂᒃ ᖃᖓᑐᐃᓐᓇᑦᑎᐊᖅ ᐊᒻᒪ ᓇᓂᑐᐃᓐᓇᑦᑎᐊᖅ,” ᐸᐅᑕ ᐅᖃᖅᑐᖅ.

ᐸᐅᑕ ᑎᑎᕋᖃᑦᑕᖅᑐᖅ ᐊᒻᒪ ᓴᖅᑭᑎᑦᑎᔨᐅᓪᓗᓂ ᐃᓄᒃᑎᑐᑦ ᓂᐱᓕᐅᕐᓯᒪᔪᓂᒃ ᓴᖅᑭᑎᑦᑎᓂᒃᑯᑦ ᐃᑲᔪᖅᑕᐅᓪᓗᓂ ᐆᒧᖓ ᐲᑕ ᓯᐊᑕᓐ ᐅᕙᙵᑦ ᓰᐲᓰ ᔭᓗᓇᐃᒥ. ᐅᑯᐊᑦᑕᐅᖅ ᐃᖃᓗᖕᓂ ᓰᐲᓰᒃᑯᑦ ᐊᐅᓚᑦᑎᔨᖓ ᐹᑦ ᓇᐃᒍᓪ ᐊᒻᒪ ᐸᑎ ᕼᐋᓇᒻ, ᐅᖃᐅᓯᕐᒧᑦ ᑲᒥᓯᓇᐅᓚᐅᕐᓯᒪᔪᖅ ᓄᓇᑦᓯᐊᕐᒧᑦ ᑎᑎᕋᖅᐸᓪᓕᐊᓂᒃᑯᑦ ᐃᑲᔪᖃᑦᑕᕐᒥᔪᖅ.

ᐅᓄᕐᑐᓂᒃ ᑐᓵᔭᒃᓴᓂᒃ, ᐸᐅᑕ ᐅᓂᒃᑳᒥ ᑐᓵᔭᐅᑎᑦᑎᕙᒃᑐᖅ ᐃᓚᒋᔭᐅᔪᒥ ᐅᓂᒃᑳᖅᑎᐅᔫᑉ ᑖᓐᓇ ᐅᓂᒃᑳᖅᑑᑉ ᒥᒃᓵᓄᑦ ᐅᖃᖃᑎᒋᔪᓐᓇᕐᓂᐊᕐᒪᒋᑦ.

ᓯᕗᓪᓕᖅᐹᖅ ᑐᓵᔭᒃᓴᖅ ᑐᓴᖅᓴᐅᑎᑦᑎᔪᖅ ᓴᐃᒨᓂ ᐊᓚᐃᖓᒥᑦ

ᓯᕗᓪᓕᖅᐹᖅ ᑐᓵᔭᒃᓴᖅ ᐱᒻᒪᕆᐅᒋᔭᐅᓂᐊᕐᑐᖅ ᐊᒥᓱᓄᑦ ᐃᖃᓗᖕᓂᑦ ᓄᓇᖃᖅᑐᓄᑦ, ᐅᓂᒃᑳᖅ ᓂᐱᓕᐅᖅᑕᐅᓂᑯ ᔭᓄᐊᕆ 1993-ᒥᑦ, ᐅᓇ ᐅᓂᒃᑳᖅᖢᓂ ᐃᖃᓗᖕᓂ ᐃᓐᓇᑐᖃᐅᓚᐅᕐᓯᒪᔪᖅ ᓴᐃᒨᓂ ᐊᓚᐃᖓ.

ᑕᕝᕘᓇᓕ, ᐊᓚᐃᖓ ᐅᖃᐅᓯᖃᖅᑐᖅ ᐃᓄᕋᓛᖑᓂᕋᖅᑕᐅᓚᐅᕐᓯᒪᔪᓂᒃ, ᒥᑭᑦᑐᑯᓗᐃᑦ ᐃᓄᐃᑦ ᓱᓕ ᒫᓐᓇ ᓄᓇᒦᑦᑐᓂᒃ, ᐊᒻᒪᓗ ᒪᑯᓂᖓ ᑕᕐᕆᐊᒃᓱᖕᓂᒃ.

ᐸᐅᑕ ᐅᖃᓚᐅᕐᑐᖅ ᑖᔅᓱᒥᖓ ᐅᓂᒃᑳᒥ ᑐᓴᖅᓴᐅᑎᑦᑎᓂᖓᓂᒃ ᓴᐃᒨᓂᐅᑉ ᐃᕐᓂᖓᓄᑦ, ᐱᓯᐅᓛᒃ ᐊᓚᐃᖓᒧᑦ, ᑖᓐᓇᓗ ᐊᑖᑕᒥᓂ ᐅᓂᒃᑲᐅᓯᖃᖅᖢᓂ ᐊᔪᕈᓐᓃᕐᓴᖅᑎᑦᑎᓂᕐᓴᐅᖃᑦᑕᓚᐅᕐᓂᖓᓂᒃ ᐊᒻᒪ ᐅᓂᒃᑳᑲᑕᖅᖢᓂ ᓄᓇᐃᓐᓇᒦᓂᕌᖓᑕ.

“ᐅᓂᒃᑳᖓ ᓱᖅᑯᐃᓇᑦᑎᐊᖅᑐᖅ ᐊᒻᒪ ᑐᑭᓯᓇᑦᑎᐊᖅᖢᓂ. ᓂᐱᓕᐅᕐᓯᒪᓂᖓ ᐱᐅᔪᐊᓗᒃ ᐊᒻᒪᓗ ᐅᓂᒃᑳᖓ, ᐅᐊᑲᓪᓚᒃ, ᓲᖃᐃᒻᒪ ᐅᓄᕈᓘᔭᕐᒪᑕ ᐃᓄᐃᑦ ᑕᒪᑐᒥᖓ ᖃᐅᔨᒪᔪᓂᒃ, ᐃᓄᕋᓛᓂᒃ ᐊᒻᒪᓗ ᑕᕐᕆᐊᒃᓱᓂᒃ, ᐅᑭᐅᕐᑕᖅᑐᕐᒥᐅᑕᓕᒫᓂᒃ. ᑕᐃᒪᓕ ᑕᒪᓐᓇᑦᑕᐅᖅ ᑐᓴᐅᒪᔭᐅᖁᒋᕙᕋ,” ᐸᐅᑕ ᐅᖃᖅᑐᖅ.

“ᑲᓛᖡᑦ ᓄᓇᖓᓃᒃᑲᓗᐊᕈᑎᒃ ᐊᓯᐊᓂᓪᓘᓐᓃᑦ, ᑐᓵᓕᕈᑎ ᑖᔅᓱᒥᖓ, ᑕᐃᒪᓕ ᑖᒃᑯᐊ ᒥᒃᓵᓄᑦ ᖃᐅᔨᒪᓇᔭᕐᒥᔪᑦ.”

ᐊᐃᑉᐸᖓᓕ ᑐᓴᕐᓴᐅᓂᐊᕐᑐᖅ, ᐅᓇᐅᓚᐅᕐᓯᒪᔪᖅ ᓇᐅᔭ ᑕᓱᒐᑦ, ᐅᖃᓪᓚᒡᓗᓂ ᕿᒻᒥᖏᓐᓂᒃ ᐸᕐᓇᒃᐸᓪᓕᐊᒍᓯᒋᓚᐅᕐᓯᒪᔭᖓᓂᒃ ᐊᒻᒪᓗ ᐃᑲᔪᖃᑦᑕᕐᓂᖅ ᐊᓯᑦᑎᓐᓂᒃ ᐱᒻᒪᕆᐊᓘᓂᖓᓂᒃ, ᑖᔅᓱᒪᓗ ᐸᓂᖓ, ᐅᓖᐱᑲ ᐸᓂᒃᐸ, ᐅᖃᓪᓚᒃᑎᓪᓗᒍ ᐃᖅᑲᐅᒪᔭᖏᓐᓂᒃ ᑐᒃᑐᐃᑦ ᐊᒥᖏᓐᓂᒃ ᐊᒻᒪ ᕿᓯᖕᓂᒃ ᐊᓐᓄᕌᖃᖃᑦᑕᓚᐅᕐᓯᒪᓂᖓᓂᒃ ᓄᑕᕋᐅᑎᓪᓗᒍ ᐊᑖᑕᖓᑕ ᐊᖑᔭᕕᓂᖏᓐᓂᒃ.

ᐱᖓᔪᒋᔭᐅᔪᕐᓕ ᑐᓴᕐᓴᐅᓛᕐᑐᖅ ᖃᐅᔨᒪᔭᐅᙱᑦᑐᖅ ᑭᓇᐅᔭᕆᐊᒃᓴᖓᓂ ᐊᖑᑎ ᐅᖃᐅᓯᖃᖅᖢᓂ ᐊᓄᕆᒥ ᖃᓄᖅ ᖃᐅᔨᒪᔪᓐᓇᕐᓂᕐᒥᒃ. ᑕᕝᕘᓇᓕ ᐸᐅᑕ ᑐᓵᔪᓂᒃ ᐃᑲᔪᖅᑕᐅᔪᒪᔪ ᐃᓕᓴᕐᓯᔪᖃᕈᓐᓇᕆᐊᒃᓴᖓᓂᒃ ᐅᓂᒃᑳᖅᑐᒥᓐ.

ᑭᖏᓪᓖᓪᓕ ᑐᓴᕐᓴᐅᑎᑕᐅᓂᐊᕐᑐᑦ ᒪᑯᓇᙶᕐᓯᒪᓂᐊᕐᑐᑦ ᐆᑐᓇ ᐊᐃᓴᑭ ᐸᓪᓚᔮᖑᓚᐅᕐᓯᒪᔪᖅ ᓄᓇᕕᒥᐅᑕᖅ ᐊᒻᒪᓗ ᓯᑏᕙᓐ ᑰᑑᖑᓚᐅᕐᓯᒪᔪᖅ ᐃᖃᓗᖕᓂ ᓄᓇᖃᕐᓂᑯ.

“ᐱᒃᑲᓐᓂᕈᒪᑐᐃᓐᓇᖅᑐᖓ ᐅᓂᒃᑳᒃᑲᓐᓂᕐᓂᒃ ᐊᕕᒃᑐᕐᓯᒪᓂᒃᑰᖓᔪᓂᒃ ᐅᑯᓇᙵᑦ ᑭᕙᓪᓕᕐᒥ, ᕿᑎᕐᒥᐅᓂᒡᓗ ᖃᑯᒍᒃᑲᓐᓂᖅ,” ᐸᐅᑕ ᐅᖃᖅᑐᖅ.

“ᑕᐅᑐᙳᐊᖃᑦᑕᕋᒪ ᐱᒋᐊᒻᒪᕆᓚᐅᕐᑎᓐᓇᖓ. ᐃᓱᒪᓇᓱᓚᐅᕋᒪ ᐃᒪᓐᓇ ᓄᓇᕐᔪᐊᒥ ᐅᑭᐅᕐᑕᖅᑐᕐᒥᐅᓂᒃ ᑲᑎᒪᔭᕐᑐᕐᓗᓂ ᐊᓯᐊᓄᓪᓘᓂᑦ ᐅᓂᒃᑳᖏᓐᓂᒃ ᑐᓴᖃᑦᑕᕐᓯᒪᔪᓂᒃ. ᐃᓱᒪᓯᒪᒐᒪ ᐃᓄᐃᑦ ᐅᓂᒃᑳᖏᑦ ᑐᓵᔭᐅᓕᕈᑎᒃ ᐅᖃᐅᓯᐅᖃᑦᑕᓕᕋᔭᖏᓐᓂᒃ,” ᐸᐅᑕ ᐅᖃᖅᑐᖅ.

ᐸᐅᑕ ᐅᖅᓱᖅᑑᕐᒥᐅᑕᕕᓂᖅ ᒫᓐᓇ ᔭᓗᓇᐃᒥ ᓄᓇᖃᓕᕐᑐᖅ, ᑕᕝᕙᓂᓗ ᐃᖅᑲᓇᐃᔭᖅᖢᓂ ᓰᐲᓰᒃᑯᑦ ᑲᑎᕐᓱᒐᖏᓐᓂᒃ ᐱᓕᕆᐊᖃᕐᓂᕐᒥᒃ, ᐋᖅᑭᒃᓱᐃᕙᓪᓕᐊᓪᓗᓂ ᖃᕋᓴᐅᔭᓄᑦ ᓂᐱᓕᐅᕐᓯᒪᔪᓂᒃ ᐃᓄᒃᑎᑐᑦ.

ᑕᐃᒪᓕ ᓰᐲᓰᑯᓐᓂᒃ ᕆᔭᐃᓇᒧᑦ ᐊᐅᓪᓚᖅᑎᑕᐅᑎᓪᓗᒍ ᐅᖃᐅᓯᕆᔭᖓᒍᑦ “ᓱᑲᑦᑐᒥᓐ ᐃᓕᓐᓂᐊᒐᒃᓴᒧᑦ” ᐃᖅᑲᓇᐃᔮᖓᓄᑦ ᐃᓚᒋᔭᐅᔪᒧ, ᑖᔅᓱᒥᖓ ᐃᓱᒪᓕᓚᐅᕐᓯᒪᖕᒪᑦ.

“ᐃᓕᓐᓂᐊᕈᑎᐅᔪᑦ ᐃᓚᖓ ᐅᓇᐅᓚᐅᕐᓯᒪᖕᒪᑦ ᖃᕋᓴᐅᔭᒃᑯᑦ ᑐᓵᔭᒃᓴᓕᐅᕐᓂᕐᒥᒃ,” ᐅᖃᖅᑐᖅ.

ᐃᓄᐃᑦ ᐅᓂᒃᑳᖏᑦ ᓯᕗᓪᓕᕐᒥᑦ ᐱᒋᐊᕐᓂᐊᓚᐅᕐᓯᒪᔪᖅ ᒫᐃᖑᓚᐅᕐᑐᒥᓐ, ᑭᓯᐊᓂᓕ ᑭᖑᕙᕆᐊᖅᑕᐅᓕᓚᐅᕐᑐᖅ ᓄᕙᒡᔪᐊᕐᓇᖅ-19 ᐱᔾᔪᑎᐅᓪᓗᑎ ᑕᕝᕗᖓ ᑕᖅᑭᒧᑦ.

ᒫᓐᓇᓕ ᐱᒋᐊᕈᑎᖃᖅᑐᑦ 8-ᓂ ᑐᓵᔭᒃᓴᓂᒃ ᐋᖅᑭᒃᓯᓯᒪᓪᓗᑎᒃ, ᑭᓯᐊᓂᓕ ᐸᐅᑕ ᓂᕆᐅᒃᑐᖅ ᐅᓄᒃᑲᓐᓂᕐᑐᓂᒃ ᐱᓕᕆᐊᖃᕈᒪᓪᓗᓂ.

“ᐃᓱᒪᔪᖓᓕ ᓯᕗᓂᑦᑎᓐᓂᒃ ᑕᒪᓐᓇ ᑲᔪᓯᒍᑎᖃᕈᓐᓇᕐᓗᓂ, ᓲᖃᐃᒻᒪ ᖃᐅᔨᒪᒐᑦᑕ ᑕᒪᒃᑯᐊ ᐅᓂᒃᑳᑦ ᑐᓴᐅᒪᔭᐅᓯᒪᖕᒪᑕ ᐊᔾᔨᒌᙱᑑᑎᓄᑦ,” ᐅᖃᖅᑐᖅ.

ᑕᐃᒪᐃᓕᓚᐅᕐᖢᓂ, ᐱᓇᓱᒍᑎᒋᔪᒪᔭᖓᓕ ᑕᒪᒃᑯᐊ ᐅᓂᒃᑳᑦ ᐃᓅᓱᒃᑐᓄᑦ ᖃᐅᔨᔭᐅᓗᑎᒃ, ᑖᒃᑯᐊ ᑐᑭᓯᓯᒪᔪᓐᓇᕐᓂᐊᕐᒪᑕ ᐊᔾᔨᒌᙱᔾᔪᑎᒋᔭᐅᔪᓂᒃ ᒫᓐᓇ ᐃᓅᖃᑎᒌᖕᓂᐅᓕᕐᑐᒥ ᑕᐃᔅᓱᒪᓂᐅᓚᐅᕐᓯᒪᔪᓂᒡᓗ.

ᐊᔾᔨᒌᙱᑦᑑᑎᒃᑯᑦ ᑖᔅᓱᒥᖓ ᖃᕋᓴᐅᔭᒃᑯᑦ ᑐᓵᔭᒃᓴᓂᒃ ᐱᔪᓐᓇᕋᔅᓯ.

ᐊᑐᕈᕕᑦ ᐅᖄᓚᐅᑎᕋᓛᒥᑦ ᐅᕝᕙᓘᓐᓃᑦ ᑎᒍᒥᐊᒐᓂᒃ ᓵᑦᑐᓂᒃ ᖃᕋᓴᐅᔭᕋᓛᓂᒃ ᑕᐃᒪᓕ ᒥᓇᕐᓯᔪᓐᓇᖅᑐᓯ (download) ᓰᐲᓰᒃᑯᑦ ᐃᓕᔭᒃᓴᖁᑎᖓᓂᒃ ᒪᑯᓄᖓ ᖃᕋᓴᐅᔭᕋᓛᓄᑦ Android ᐅᕝᕙᓘᓐᓃ iOS-ᒧᑦ ᐊᐅᓚᑕᐅᔪᓂᒃ. ᑖᓐᓇ ᒪᑐᐃᕈᕕᐅᒃ ᐃᓚᒃᓴᖅ, ᐅᕗᙵᕐᓗᑎᑦ ᓰᐲᓰᑯᑦ ᖃᕋᓴᐅᔭᒃᑯᑦ ᑐᓵᔭᒃᓴᖏᓐᓄᑦ ᓂᕈᐊᕐᕕᖕᒥᑦ ᐊᒻᒪ ᐅᓇ ᑎᑎᕋᕐᓗᒍ ᐃᓄᐃᑦ ᐅᓂᒃᑳᖏᑦ ᕿᓂᕐᕕᖓᒍᑦ.

ᐊᑐᕈᓐᓇᕐᒥᔭᐃᑦ ᖃᕋᓴᐅᔭᒃᑯᑦ ᐊᑦᑕᑕᕐᓯᒪᒍᑎᒋᔭ ᓰᐲᓰ ᑐᓵᓗᒍ (CBC Listen) ᐊᒻᒪᓗ ᐅᕗᙵᕐᓗᑎ CBC Podcasts, ᑕᕝᕙᓂᓕ ᓇᓂᔪᓐᓇᕋᔭᕐᑕᐃᑦ ᐃᓄᐃᑦ ᐅᓂᒃᑳᖏᑦ.

ᐊᑐᕈᕕᑦ iTunes-ᒥᑦ, ᐅᕗᙵᕐᓗᑎᒃ ᑐᓵᒐᒃᓴᖃᕐᕕᐊᓄᑦ, ᕿᓂᕐᓗᒍ ᐃᓄᐃᑦ ᐅᓂᒃᑳᖏᑦ ᐊᒻᒪ ᐱᑖᖃᕐᑕᕈᒪᓗᑎᑦ ᑖᒃᑯᓂᖓ.

Share This Story

(0) Comments

Join the Conversation

Your email address will not be published. Required fields are marked *

*