ᖃᐅᔨᓴᓕᓚᐅᕐᑐᖅ ᐆᒥᖓ ᓴᓪᓗᐃᓂ ᑎᒍᓯᔾᔪᑎᐅᓚᐅᖅᑐᒥ

ᑯᐸᐃᒃ ᐸᓖᓯᒃᑯᑦ ᖃᐅᔨᓴᖅᑎᖓ ᐱᒋᐊᖅᑎᑦᑎᓚᐅᕐᒪᑦ ᖃᐅᔨᓴᕐᓂᕐᒥ ᓴᓪᓗᐃᑦᓂ ᑎᒍᓯᓚᐅᖅᑎᓪᓗᒋᑦ ᑐᓴᒐᓕᑎᒍᑦ ᓴᖅᑭᑎᑕᐅᑲᑕᒃᖢᓂ.

ᐅᑯᐊ ᖃᐅᔨᓴᖅᑎᐅᔪᑦ Bureau des enquêtes indépendantes ᑐᓴᖅᑎᑦᑎᓚᐅᕐᒪᑕ ᖃᐅᔨᓴᕐᓂᐊᕐᓂᖏᓐᓂ ᔪᓚᐃ 24-ᒥ ᑐᓴᒐᒃᓴᑎᒍᑦ.

ᑕᕐᕆᔭᒐᓕᐅᖅ ᓴᖅᑭᑎᑕᐅᓚᐅᕐᓯᒪᖕᒪᑦ ᖃᕋᓴᐅᔭᒃᑯᑦ ᔪᓚᐃ 18-ᒥ ᓴᖅᑭᑎᑦᑎᓯᒪᓪᓗᓂ ᓄᓇᕕᒃ ᐸᓖᓯᒃᑯᑦ ᓄᓇᓯᐊᑎᖓᓂ ᐊᖅᑯᑦᑐᑦ ᓄᓇᓯᐅᑎᐅᑉ ᓵᑦᑎᐊᖓᓂ ᐃᖏᕐᕋᔫᑉ, ᓄᓇᓯᐅᑎᒥᓂᒡᓗ ᓄᖅᑲᖅᑎᑦᑎᓕᖅᖢᑎᒃ. ᑭᓯᐊᓂᓕ ᐊᐃᐸᖓ ᓄᓇᓯᐅᑎ ᐃᒡᓗᒥ ᑐᓗᕐᓯᓕᓚᐅᕐᓯᒪᖕᒪᑦ.

ᐊᓯᒃᑲᓐᓂᖓ ᐊᔾᔨᓕᐅᒐᖅ ᓴᖅᑭᑎᑕᐅᒋᓪᓗᓂ ᐸᓖᓯᑦ ᐊᒧᓯᔪᑦ ᐊᕐᓇᒥ ᑕᕝᕙᙵᑦ ᓄᓇᓯᐅᑎᒥ ᐊᒻᒪ ᒪᓂᖅᑲᒧᑦ ᑲᑕᐃᔭᐅᓪᓗᓂ.

ᑖᒃᑯᐊᓕ ᐸᓖᓯ ᐅᖄᓚᕝᕕᐅᒐᒥ 24-ᓂ ᐊᕐᕌᒍᓕᒃ ᐋᖓᔮᖅᖢᓂ ᐊᖁᓐᓂᖓᓂᒃ, ᐅᖃᓚᐅᕐᑐᖅ ᓄᓇᕕᒃ ᐸᓖᓯᒃᑯᑦ ᐊᖓᔪᖅᑳᑉ ᑐᒡᓕᖓ ᓵᓐ ᓛᖕᓯᑐᕇᑦ. ᑖᓐᓇ ᐊᕐᓇ ᑕᑯᔭᐅᓚᐅᕐᑐᖅ ᐊᖅᑯᑲᒻᒪᑲᑕᒃᑐᖅ, ᐅᖃᒃᑲᓐᓂᖅᖢᓂ.

“ᐸᓖᓯᑦ ᑭᐅᑲᐅᑎᒋᓚᐅᕐᓯᒪᔪᑦ ᐅᖄᓚᐅᓯᐅᔪᒥ,” ᓛᖕᓯᑐᕇᑦ ᐅᖃᕐᑐᖅ ᖃᕋᓴᐅᔭᒃᑯᑦ ᑎᑎᖃᖅᖢᑎᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ. “ᑖᓐᓇ ᓄᓇᓯᐅᑎ ᓇᓂᔭᐅᒐᒥ ᑖᒃᑯᐊ ᑕᑯᓕᓚᐅᕐᑐᖅ ᐊᖁᑎ ᐊᖁ ᑲᒻᒪᑲᑕᓚᐅᕐᓂᖓᓂ ᐊᒻᒪ ᖁᐊᕐᓵᕐᓇᑲᑕᒃᖢᓂ ᐊᒻᒪᓗ ᐸᓖᓯᓄᑦ ᐊᐳᖅᑕᐅᑦᑕᐃᓕᒪᓪᓗᓂ.”

ᑕᐃᔅᓱᒪᓂᓕ, ᓛᖕᓯᑐᕇᑦ ᐅᖃᓚᐅᕐᑐᖅ ᐸᓖᓯ ᓄᖅᑲᖅᑎᑦᑎᒪᐅᕐᓂᖏᓐᓂᒃ ᐊᕐᓇᒥ ᐸᓯᔭᒃᓴᐅᓇᓱᒋᔭᖓᓂ ᖃᓄᐃᓕᐅᕈᓘᔭᙱᖢᑎᒃ ᐅᕝᕙᓘᓐᓃᑦ ᐋᓐᓂᖅᑐᖃᙱᖢᓂ.

ᑖᓐᓇᓕ ᐊᖁᑦᑐᕕᓂᖅ ᐸᓯᔭᒃᓴᙳᖅᑎᑕᐅᓚᐅᕐᑐᖅ ᖁᐊᓵᕐᓇᖅᖢᓂ ᐊᖁᓚᐅᕐᓂᖓᓂ ᓄᓇᓯᐅᑎᒥ, ᐋᖓᔮᖅᖢᓂ ᐊᖁᓐᓂᖓᓄᑦ, ᐸᓖᓯᓂ ᕿᒫᓂᖓᓄᑦ, ᓄᓇᓯᐅᑎᒥ ᑎᒡᓕᖕᓂᖓᓄᑦ, ᐸᓖᓯᒥ ᐋᓐᓂᕐᓯᓂᖓᓄᑦ ᓱᒋᐊᑎᖃᖅᖢᓂ ᐊᒻᒪᓗ ᑎᒍᔭᐅᑦᑕᐃᓕᒪᓂᕐᒧᑦ, ᐅᖃᕐᓯᒪᓚᐅᕐᑐᑦ ᐃᖅᑲᖅᑐᐃᕕᒃᒥ ᑐᓴᒐᒃᓴᕆᔭᐅᔪᑦ.

ᓛᖕᓯᑐᕇᑦ ᓇᓗᓇᐃᓕᓚᐅᕐᑐᖅ ᖃᐅᔨᓴᖅᑕᐅᓂᐊᕐᓂᖓ ᑖᓐᓇ ᐱᓕᕆᐊᖑᓯᒪᔪᖅ.

ᖃᐅᔨᓴᖅᑎᑦ ᖃᐅᔨᓇᓱᖃᑦᑕᕐᒪᑕ ᐱᕋᔭᒍᑎᓕᒫᓂᒃ ᐸᓖᓯᑦ ᐃᓚᐅᕝᕕᒋᔭᖏᓐᓂ ᑖᓐᓇ ᐸᓯᔭᒃᓴᖅ ᓄᓇᖃᖅᑳᖅᑑᒃᐸ ᐅᕝᕙᓘᓐᓃᑦ ᐃᓅᒃᐸᑦ, ᐸᓖᓯᑦ ᐅᐃᕖᑐᑦ ᐅᖃᓚᐅᕐᑐᖅ ᑐᓴᒐᒃᓴᓕᐅᖅᑎᓪᓗᒋ ᖃᐅᔨᓴᕐᓂᐊᕐᓂᕐᒥᒃ.

ᖃᐅᔨᓴᖅᑎᑦ ᑕᐅᑐᒃᑐᕕᓂᕐᓂ ᖃᐅᔨᔪᒪᔪᑦ ᐸᓖᓯ ᖃᓄᐃᓕᐅᕈᓯᕆᓚᐅᖅᑕᖏᓐᓂ ᐅᕝᕙᓘᓐᓃᑦ ᐊᔾᔨᓕᐅᖅᑕᐅᓚᐅᕐᑐᓂ ᑖᔅᓱᒥᖓ. ᐊᐱᕆᓚᐅᕐᑐᑦ ᑭᓇᑐᐃᓐᓇᖅ ᑕᐅᑐᒃᑐᕕᓂᕐᓂ ᑐᓴᕈᒪᓪᓗᑎᒃ.

ᐅᖃᕐᕕᐅᔪᓐᓇᖅᑐᑦ ᑯᐸᐃᒃᒥ ᖃᐅᔨᓴᖅᑎᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ.