ᖃᓄᕐᓕ ᐊᔪᕐᓇᕐᓂᕐᓴᐃᑦ ᐱᕋᔭᒃᓯᒪᔪᓂᒃ ᐊᓂᓯᒪᔾᔪᑎᓕᕆᓂᖅ ᐊᒃᑐᐃᓂᖃᕐᓂᐊᕐᒪᑦ ᓄᓇᕗᒥᑦ ᐊᖑᓇᓱᒃᑎᓂ?

ᖃᓄᐃᓕᐅᖁᔭᐅᕙᓪᓕᐊᓂᕐᓴᐅᓕᖅᑎᓪᓗᒋᑦ ᑲᓇᑕᒥ ᐱᕋᔭᒃᓯᒪᔪᓂᒃ ᐊᓂᓯᒪᔾᔪᑎᓕᕆᓂᖅ ᐊᒃᓱᕈᕐᓇᕐᓂᕐᓴᐅᓕᖅᑎᖁᔭᐅᔪᖅ, ᑕᒪᑐᒧᖓ ᕿᒥᕐᕈᐊᕈᑏᑦ ᐊᔾᔨᒌᙱᑦᑑᑎᐅᔪᑦ ᖃᓄᖅ ᐊᓯᔾᔪᕈᑎᐅᔪᑦ ᐊᒃᑐᐊᓂᖃᕋᔭᕐᒪᖔᑕ ᓄᓇᕗᒻᒥᐅᓂ.

ᑲᓐᓲᕕᑎᕝᑯᑦ ᒪᓕᒐᓕᐅᖅᑎᖏᑦ ᐱᖁᔨᕗᖔᕈᑎᓕᐅᓚᐅᕐᒪᑕ ᒪᓕᒐᓕᕆᕕᒡᔪᐊᕐᒥ ᕕᕝᕗᐊᕆ 2-ᒥ ᐅᑯᓂᖓ ᓕᐳᕈᒃᑯᑦ ᒐᕙᒪᒃᑯᖏᓐᓂᒃ ᐱᓕᕆᓂᕐᓴᐅᖁᔨᓪᓗᑎᒃ ᐊᔪᕐᓇᕐᓂᓴᐅᓇᔭᖅᑐᒥ ᒪᑯᓄᖓ ᐸᓯᔭᒃᓴᐅᑎᑕᐅᔪᓂᒃ ᖁᑭᐅᑎᖃᕆᐊᖃᙱᓐᓂᕐᒧᑦ ᖁᑭᐅᑦᑎᔭᖅᑐᓂᒃ ᐊᓂᓯᒪᔾᔪᑎᓕᕆᔭᐅᓂᐊᕐᓗᑎᒃ.

ᐅᓇ ᐱᖁᔨᕗᖔᕈᑎ ᓵᓚᒋᔭᐅᔾᔪᑎᐅᓚᐅᕐᓯᒪᔪᖅ ᑕᒪᓐᓇ ᑕᖅᑭᒃ ᐱᒋᐊᓕᓵᖅᑎᓪᓗᒍ, ᑭᓯᐊᓂᓕ ᓄᓇᕗᒥᑦ ᓯᕗᓕᐅᖅᑎ ᐸᐅᓗᓯ ᐊᕿᐊᕈᖅ ᐅᖃᕐᓯᒪᓂᕋᖅᑕᐅᔪᖅ ᐃᑲᔪᖅᑐᐃᓇᔭᕐᓂᖓᓂᒃ ᐊᓯᙳᖅᑎᑕᐅᔪᒥᒃ.

ᐊᑎᓕᐅᓚᐅᕐᓯᒪᖕᒪᑦ ᑎᑎᖃᓂᒃ ᑕᖅᑭᐅᓚᐅᕐᑐᒥ ᐳᕋᐃᒻ ᒥᓂᔅᑕ ᔭᔅᑎᓐ ᑐᕉᑑᒨᖅᑐᒥ, ᐃᓚᖃᖅᖢᓂ ᑲᓇᑕᒥ ᓯᕗᓕᐅᖅᑎᐅᖃᑕᐅᔪᓂᒃ, ᑖᓐᓇ ᐱᕋᔭᒃᓯᒪᔪᓂᒃ ᐊᓂᓯᒪᔾᔪᑎᓕᕆᓂᖅ ᐋᖅᑭᒋᐊᖁᔭᐅᓪᓗᓂ, ᑎᑎᕋᓚᐅᕐᓯᒪᖕᒪᑕ ᑐᖁᑕᐅᔪᖃᓚᐅᕐᓯᒪᑎᓪᓗᒍ ᐋᓐᑎᐅᕆᐅᒥ ᐸᓖᓯᒥ ᐋᕐᕌᓂᐅᓚᐅᕐᑐᖅ.

ᐅᕌᓐᑐᓪ ᒪᑲᓐᔨ ᐸᓯᔭᒃᓴᙳᖅᑎᑕᐅᓚᐅᕐᓯᒪᔪᖅ ᑐᖁᑎᑦᑎᓂᕐᒥᒃ ᐸᓖᓯ ᒍᕆᒍ ᐱᐅᓴᓚᒥ ᐋᓐᑎᐅᕆᐅᑉ ᓂᒋᐊᓂ. ᐱᐅᓴᓚ ᖁᑭᖅᑕᐅᓚᐅᕐᓯᒪᖕᒪ ᑐᖁᑕᐅᓪᓗᓂ ᑎᓯᐱᕆ 27-ᒥ. ᒪᑲᓐᔨ ᑎᒍᔭᐅᓯᒪᓚᐅᕐᓯᒪᙱᒻᒪ ᐊᓂᓯᒪᔾᔪᑎᓕᕆᓂᕐᒧ ᐊᒻᒪᓗ ᖁᑭᐅᑎᓕᔭᕆᐊᖃᙱᑎᑕᐅᓪᓗᓂ.

ᑎᑎᖃᑦ ᐅᖃᕐᓯᒪᓚᐅᕐᑐᑦ “ᐃᒡᓗᐊᓄᑦ ᐋᕿᖁᔨᓪᓗᑎᒃ” ᑕᒪᒃᑯᓄᖓ ᐸᓯᔭᒃᓴᐅᔪᓄᑦ ᖁᑭᐅᑎᒧᑦ ᐊᑐᖁᔭᐅᓯᒪᙱᑦᑐᓄ ᐊᓂᓯᒪᔾᔪᑎᖃᖃᑦᑕᕐᓂᖏᓐᓂ. ᑕᐃᒪᓕ ᐸᓯᔭᒃᓴᐅᔪᖅ ᓴᖅᑭᑎᑦᑎᔪᓐᓇᓚᐅᕐᑐᖅ ᐃᖅᑲᖅᑐᐃᔨᒧᑦ ᖃᓄᐃᒻᒪ ᐊᓂᑎᑕᐅᔪᓐᓇᕐᓂᖓᓂᒃ.

ᑲᓵᓐᑐᕋ ᐅᕆᑦᓱᑦᔅ, ᐱᕋᔭᒃᓯᒪᔪᓄᑦ ᓗᐊᐃᔭ ᓄᓇᕗᒥᑦ ᐱᓕᕆᐊᖃᖅᑐᖅ, ᐅᖃᓚᐅᕐᑐᖅ ᐊᔪᕐᓇᖅᓯᔭᕇᕐᓂᖓᓂᒃ ᓄᓇᕗᒥᐅᑕᓄᑦ ᐊᓂᓯᒪᔾᔪᑎᑎᒍ ᐊᓂᑎᑕᐅᓂᖏᓐᓂᒃ ᐃᓄᑭᑦᑐᒦᓐᓂᖏᓐᓂᒃ ᐊᒻᒪᓗ ᑲᒪᒋᔭᒃᓴᒥ ᓇᓂᓯᔪᓐᓇᕋᔭᙱᖢᑎᒃ ᐊᓂᑎᑕᐅᒍᑎᒃ.

ᐊᓯᙳᕈᑎᐅᔪᖅ ᐊᒃᑐᐃᓂᖃᓪᓚᕆᒃᑲᔭᖅᑐᖅ ᐃᓄᖕᓂ ᐊᖑᓇᓱᒃᑎᓂ ᑖᒃᑯᐊ ᖁᑭᐅᑎᖏᑦ ᐱᓕᕆᐊᖑᓯᒪᑦᑎᐊᖏᓐᓂᖏᓐᓄ ᓚᐃᓴᓐᓯᓕᕆᓂᒃᑯᑦ.

“ᑎᒍᔭᐅᔪᓐᓇᕋᔭᕐᒪᑕ ᑕᐃᒪᐃᑦᑐᒧᑦ ᒪᓕᒐᕐᒧᑦ,” ᐅᕆᑦᓱᑦᔅ ᐅᖃᖅᑐᖅ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᐊᐱᕆᓚᐅᕐᑐᑦ ᐊᕿᐊᕈᕐᒥ ᑎᑎᖃᑦ ᒥᒃᓵᓄᑦ ᐊᒻᒪᓗ ᖃᓄᖅ ᐊᓂᓯᒪᔾᔪᑎᓕᕆᓂᕐᒥ ᐋᖅᑭᒋᐊᕐᓯᓂᖅ ᐊᒃᑐᐃᓂᖃᕋᔭᕆᐊᒃᓴᖓᓂᒃ ᓄᓇᕗᒥᑦ.

ᐊᕿᐊᕈᖅ ᑭᐅᔾᔪᑎᖓ ᐅᕗᖓ ᑐᓐᓂᖁᑎᒋᓚᐅᕐᑕᖓ ᒪᓕᒐᓕᕆᔨᒃᑯᑦ ᒥᓂᔅᑕᒧᑦ ᑯᕆᔅ ᓯᒪᐃᓚᒃᒧᑦ, ᑖᓐᓇ ᐅᖃᓚᐅᖅᖢᓂ ᓯᕗᓕᐅᖅᑎᐅᔪᑦ ᐃᒪᐃᖁᔨᓇᔭᕐᓂᖏᓐᓂᒃ ᑲᓇᑕᒥ ᐊᓂᓯᒪᔾᔪᑎᓕᕆᓂᖅ ᓇᓕᒧᒃᓯᐅᑎᓯᒪᓗᓂ ᐱᕋᔭᒃᓯᒪᔪᒧᑦ ᐊᒻᒪ ᐃᓄᐃᑦ ᖃᓄᐃᑦᑕᐃᓕᔭᕆᐊᖃᕐᓂᖏᓐᓄᑦ.

“ᐅᓇ ᐃᓚᖃᑐᐃᓐᓇᕆᐊᓕ ᐋᖅᑭᒋᐊᕈᑎᒃᓴᓂ ᑕᐃᒪᓐᓇᓗ ᐱᕋᔭᐃᓐᓇᔭᑦᑐᑦ ᐊᒻᒪ ᑲᑉᐱᐊᓇᖅᑐᐊᓗᐃᑦ ᒪᓕᒐᕐᓂ ᓱᕋᐃᕙᒃᑐᑦ ᐱᕕᖃᖅᑎᑕᐅᔪᓐᓃᖅᐸᒡᓗᑎᒃ ᐱᕋᔭᒃᑲᓐᓂᕈᑎᒃᓴᖏᓐᓂᒃ ᐃᖅᑲᖅᑐᖅᑕᐅᕝᕕᖏᓐᓂᒃ ᐅᑕᖅᑭᓂᖏᓐᓂᒃ,” ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᐅᖃᐅᓯᖏᓐᓂᒃ.

ᑕᒪᐅᓇᑦᑕᐃᓐᓇᖅ, ᓯᓚᐃᓚᒃ ᐅᑲᓚᐅᕐᑐᖅ ᓄᓇᕗᑦ ᑕᒪᑐᒧᖓ ᐊᔾᔨᒋᙱᐅᔭᕐᓂᖓᓂ ᐊᒻᒪ ᐃᓄᖃᑦᑎᐊᖏᓐᓂᖏᓐᓂᒃ ᐊᒻᒪ ᐊᒃᓱᕈᕈᑎᐅᓇᔭᖅᑐᓂᒃ.

“ᐱᕋᔭᒃᓯᒪᓂᕐᒧᑦ ᐊᓂᓯᒪᔾᔪᑎᓄᑦ ᒪᓕᒐᐃᑦ “ᐱᕋᔭᒃᓯᒪᔪᓂᒃ ᐊᓂᓯᒪᔾᔪᑎᓕᕆᓂᕐᒧᑦ ᒪᓕᒐᐃᑦ ᐊᑐᕈᑎᓖᑦ ᖃᓪᓗᓈᓂᒃ ᑲᓇᑕᐅᑉ ᓂᒋᐊᓂ ᓄᓇᕗᒥᑦ ᐊᑐᕈᓐᓇᙱᑐᐃᓐᓇᕆᐊᖃᕐᑐᑦ, ᑕᒫᓂ ᓄᓇᓖᑦ ᒥᑭᓐᓂᕐᓴᑯᓘᓪᓗᑎᒃ ᐊᒻᒪ ᐃᒡᓗᐃᑦ ᐅᓄᙱᓗᐊᖅᖢᑎᒃ ᑕᐃᒪᓐᓇᓗ ᑕᒪᒃᑯᐊ ᐱᕋᔭᒃᑕᐅᓯᒪᔪᑦ ᐃᒡᓗᖃᑎᖃᕆᐊᖃᕋᔭᕐᒪᑦ ᖃᓂᒋᔭᖓᓂᓪᓘᓐᓃᑦ ᐃᒡᓗᖃᕐᓗᓂ ᐊᓂᑎᑕᐅᓯᓚᔫ,” ᐅᖃᓚᐅᕐᑐᖅ.

“ᖁᑭᐅᑎᓂᒃ ᒪᓕᒐᖅᑎᒎᖓᔪᓂᒃ ᓂᐅᕕᖃᑦᑕᕐᓂᖅ ᐃᓅᓯᕐᒧᑦ ᐃᓚᒋᔭᐅᖕᒪᑦ ᓄᓇᕗᒥᑦ. ᐱᒻᒪᕆᐊᓘᖕᒪᑕ ᐊᖑᓇᓱᖕᓂᕐᒧᑦ, ᐊᒻᒪᓗ ᓯᕗᓕᐅᖅᑎᕗᑦ ᖃᐅᔨᒪᑦᑎᐊᖅᖢᓂ ᐱᒻᒪᕆᐊᓘᓂᖓᓂᒃ ᓴᐳᔾᔨᓯᒪᔭᕆᐊᖃᕐᓂᕐᒥᒃ ᐆᒥᖓ ᐃᓅᓯᐅᕙᒃᑐᒥᒃ.”

ᓄᓇᕗᒥ ᐋᓐᑏᐲᑯᑦ ᒪᓕᒐᓕᐅᖅᑎᖓ ᓘᕆ ᐃᓪᓚᐅᖅ ᐅᖃᓚᐅᕐᑐᖅ ᐊᖏᕐᓯᒪᓂᕋᖅᖢᓂ ᒪᓕᒐᕐᒥ ᕿᒥᕐᕈᐊᖁᔨᓂ “ᑕᐃᒪᓐᓇ ᐱᐅᓂᕐᓴᒃᑯᑦ ᐱᓕᕆᐊᖃᕈᓐᓇᖅᑐᒍᑦ ᑲᓇᑕᒥᐅᑕᓄᑦ.”

“ᑐᑭᓯᓯᒪᒐᑦᑕ ᐅᑯᐊ ᒐᕙᒪᑐᖃᒃᑯᑦ ᑎᑎᕋᓚᐅᕐᓂᖏᓐᓂᒃ ᐊᒃᓱᕈᒻᒪᕆᒃᖢᑎᒃ, ᑕᐃᒪᐃᑦᑕᕆᐊᖃᖅᖢᑎᒡᓗ,” ᐅᖃᓚᐅᕐᑐᖅ ᖃᕋᓴᐅᔭᒃᑯᑦ.

“ᐅᑕᕿᑎᓪᓗᑕ ᒐᕙᒪᑐᖃᒃᑯᑦ ᑭᐅᔾᔪᑎᒋᓂᐊᖅᑕᖓᓂᒃ, ᐃᓱᒪᒋᔭᖃᖅᑐᒍᑦ ᑲᓇᑕᒥᐅᑕ ᓈᒻᒪᒃᑐᒥ ᒐᕙᒪᒃᑯᓐᓂ ᐱᔨᑦᑎᕋᖅᑕᐅᖁᓪᓗᑎᒍᑦ.”