ᖃᓄᖅ ᓇᑦᑎᕋᓱᒃᖢᓂ ᓇᑦᑎᖏᔾᔪᑎᐅᔪᖅ ᐱᑖᕈᑎᐅᓐᓂᕐᒪᖔᑦ $80,000-ᓂᒃ

For an English version of this article, please see: How a failed seal hunt netted one aspiring author $80K.

ᓗᐃ ᐋᕆᐊᒃ ᐊᖑᓇᓱᒋᐊᖃᑕᐅᓚᐅᕐᓯᒪᖕᒪᑦ ᒥᑦᑎᒪᑕᓕᒃᒥ ᐊᕐᕌᓂ ᐅᖓᓪᓕᒃᑲᓐᓂᐅᓚᐅᕐᑐᒥ. ᓇᑦᑎᓚᐅᕐᓯᒪᔪᖅ, ᐊᒧᓪᓗᓂᐅᒡᓗ ᐊᒡᓗᒃᑯᑦ ᐊᒻᒪ ᐅᓂᐊᓕᕐᖢᓂᐅᒃ ᖃᓄᒻᒪᕆᒃ ᑐᖁᓐᓂᐊᕆᐊᒃᓴᖓᓂᒃ ᖃᐅᔨᒪᓪᓚᕆᙱᖢᓂ.

ᐅᓂᐊᒃᑲᓐᓂᓕᖅᖢᓂᐅᒃ ᐊᒡᓗᖓᑕ ᐅᖓᓯᒋᔭᖓᓄᑦ, ᐃᓱᒪᓪᓗᓂ ᓇᓃᑦᑕᕆᐊᒃᓴᖓᓂᒃ ᓇᓗᓕᕈᓂ ᑕᐃᒪᓕ ᓯᑯᑐᐃᓐᓇᕐᒥ ᑐᖁᓇᔭᕆᐊᒃᓴᖓᓂᒃ. ᑭᓯᐊᓂᓕ ᖁᐊᐃᕌᓪᓚᒃᖢᓂ ᐅᕐᕈᓪᓗᓂ ᐊᒻᒪᓗ ᑖᓐᓇ ᓇᑦᑎᖅ ᕿᒫᓕᖅᖢᓂ.

“ᖃᐅᔨᒪᑦᑎᐊᓚᐅᕐᑐᖅ ᓇᒧᙵᐅᒋᐊᖃᕐᓂᖓᓂᒃ,” ᐋᕆᐊᒃ ᐅᖃᕐᑐᖅ. “ᐅᓚᒃᖢᖓ ᒪᓕᒃᖢᒍ ᐊᒻᒪᓗ ᓂᔅᓯᒐᓱᑲᑕᒃᖢᒍ ᑭᓯᐊᓂᓕ ᓂᔅᓯᒍᓐᓇᓚᐅᙱᑕᕋ.”

ᐋᕆᐊᒃ ᓇᑦᑎᖅᑕᒥᓂᒃ ᐊᓯᐅᔨᓚᐅᕐᓯᒪᔪᖅ ᑭᓯᐊᓂᓕ ᐊᑐᖅᑕᒥᓂ ᑎᑎᕋᐅᓯᖃᓚᐅᕐᓯᒪᖕᒪᑦ ᐊᒻᒪᓗ ᓵᓚᒃᓴᐅᓯᐊᖅᖢᓂ $80,000 ᐊᒻᒪᓗ ᑎᑎᕋᖅᑎᐅᓪᓗᓂ 2021 ᐃᓗᒃᑑᖅᑕ! ᐃᓄᒃᑐᑦ ᑎᑎᕋᕐᓂᕐᒧᑦ ᓵᓚᒃᓴᐅᓯᐊᕐᒥ, ᐃᑲᔫᑎᖃᕐᓂᒃᑯᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓂᒃ, ᐃᑲᔫᑎᒃᓴᓕᕆᔩᑦ ᐊᐅᓚᑕᐅᔪᑦ ᓄᓇᕗᑦ ᑐᙵᕕᒃᑯᓐᓂᒃ, ᑲᑐᔾᔨᖃᑎᒌᑦ ᑲᒪᒋᔭᖃᕐᑐᑦ ᐃᓄᐃᑦ ᐃᑲᔪᖅᑕᐅᓯᒪᒐᓗᐊᕆᐊᒃᓴᖏᓐᓂᒃ ᐅᕘᓇ ᓄᓇᕗᒧᑦ ᐊᖏᕈᑎᑎᒍᑦ.

ᐃᓄᒃᑑᖅᑕ! ᒫᓐᓇ ᐱᓇᓱᒍᑎᓂᒃ ᐱᑲᑕᓕᕐᒥᖕᒪᑕ ᐊᐃᑉᐸᕆᓕᕐᑕᖓᓂᒃ ᐊᕐᕌᒍᒥᒃ. ᓄᓇᕗᒥᑦ ᐃᓄᐃᑦ ᐊᕐᕌᒍᖃᖅᑐᑦ 18 ᐅᖓᑖᓂᒃ ᐅᓂᒃᑳᓕᐊᖏᓐᓂᒃ ᓇᐃᑦᑐᓂᓪᓘᓐᓃᑦ ᐅᓂᒃᑳᓂᒃ ᑎᑎᕋᕐᓯᒪᔪᓂᒡᓗ ᐃᒪᐃᑦᑐᓂᒃ poems ᐃᓄᒃᑐᑦ ᐅᖃᐅᓯᖓᒍᑦ.

ᓯᕗᓪᓕᖅᐹᒧᑦ ᓵᓚᒃᓴᐅᓯᐊᖅ $80,000 ᐊᒻᒪᓗ ᑎᑎᕋᑲᑕᖕᓂᒃᑯᑦ ᐱᓕᕆᐊᖃᖅᑎᑕᐅᓗᓂ, ᑐᒡᓕᖓ ᓵᓚᒃᓴᐅᓯᐊᖅ $10,000 ᐊᒻᒪᓗ ᐱᖓᔪᒋᔭᐅᔪᖅ ᓵᓚᒃᓴᐅᓯᐊᖅ $5,000. ᑎᓴᒪᒋᔭᐅᔪᖅ $3,000-ᓂᒃ ᐱᓇᔭᖅᖢᓂ ᐊᒻᒪ ᑕᓪᓕᒪᒋᔭᐅᔪᖅ $2,000-ᓂ ᐱᓇᔭᖅᖢᓂ, ᐅᖃᕐᓯᒪᓚᐅᕐᑐᑦ ᓄᓇᕗᑦ ᑐᙵᕕᒃᑯᑦ ᑐᓴᒐᒃᓴᓕᐊᕆᔭᖓ.

ᓄᓇᕗᑦ ᑐᙵᕕᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐊᐱᖅᓱᖅᑕᐅᔪᒪᓚᐅᕐᑐᑦ ᑭᓯᐊᓂᓕ ᓱᓕ ᑭᐅᔭᐅᓚᐅᙱᑦᑐᑦ.

ᐋᕆᐊᒃ ᐅᖃᓚᐅᕐᒥᔪᖅ ᐱᓕᕆᐊᖃᖅᑎᑕᐅᓂᐅᔪᖅ ᐃᓱᒪᕐᓱᕐᓇᓚᐅᕐᓂᕋᖅᖢᓂᐅᒃ, ᐅᖃᖅᖢᓂ ᑎᑎᕋᖅᑎᓂᒃ ᑲᒪᒋᔭᖃᐃᓐᓈᓗᓚᐅᙱᒻᒪᑕ ᑖᒃᑯᐊ ᑎᑎᕋᕆᐊᖃᕐᑕᖏ ᓄᓇᕗᑦ ᑐᙵᕕᒃᑯᓐᓄᐊᕆᐊᖃᓚᐅᙱᓐᓂᖏᓐᓂᒃ ᑕᐃᒪᓐᓇᓗ ᐅᓂᒃᑳᓕᐊᖑᔪᑦ ᓴᖅᑭᑎᑕᐅᔪᓐᓇᕋᔭᖅᖢᑎᒃ.

ᐋᕆᐊᒃ ᐋᑐᕚᒥ ᑎᑎᕋᕈᓐᓇᓚᐅᕐᑐᖅ. ᐃᒡᓗᕋᓛᕆᔭᐅᔪᒦᑦᑐᒪᓚᐅᕐᓯᒪᔪᖅ ᐸᖕᓂᕐᑑᒥ ᐅᕝᕙᓘᓐᓃᑦ ᕿᑭᖅᑕᖅᔪᐊᕐᒥᒃ ᑭᓯᐊᓂᓕ ᓄᕙᒡᔪᐊᕐᓇᖅ-19-ᒧᑦ ᐊᔪᕐᓇᕈᑎᐅᑲᑕᓚᐅᕐᒪᑕ ᐸᕐᓇᒐᓱᒃᑎᓪᓗᒍ.

ᒫ*ᓇᓕ ᑎᑎᕋᑲᑕᓕᕐᑐᖅ ᐊᖏᕐᕋᖓᓂ ᐃᖃᓗᖕᓂᒃ, ᐱᓕᕆᖃᑎᖃᖅᐸᒃᖢᓂ ᐋᖅᑭᒃᓱᐃᔨᓂᒃ ᑎᑎᕋᖅᑕᐅᓯᒪᔪᓂᒃ ᐊᒻᒪᓗ ᐃᑲᔪᖅᑐᐃᔨᓂᒃ. ᐊᑕᐅᓯᕐᓕ ᐱᐅᓂᖅᐹᖑᖃᑕᐅᓚᐅᕐᑐᖅ ᓵᓚᒃᓴᖅᖢᓂ, ᐅᖃᕐᑐᖅ, ᐃᓕᓴᕆᔭᐅᓯᒪᔪᖅ ᐃᓄᒃᑎᑐᑦ ᐊᔪᕈᓐᓃᕐᓯᒪᓪᓚᕆᒃᑐᓂᒃ ᑎᑎᕋᖅᑎᐅᓂᖓᓂᒃ ᐊᒻᒪᓗ ᓴᖅᑭᑎᑦᑎᕈᓘᔭᕈᓐᓇᕐᓂᖓᓂᒃ ᑕᐃᒪᓐᓇᓗ ᓵᓚᒃᓴᕈᓐᓇᓚᐅᖅᖢᓂ.

“ᐅᖃᐅᓯᕗᑦ ᐱᐅᒋᒐᒃᑯ, ᐃᓄᒃᑎᑐᑦ, ᐊᒻᒪᓗ ᐊᓯᐅᑎᑦᑐᒪᙱᖢᒍ. ᑖᓐᓇ ᐱᔾᔪᑎᒋᓗᐊᓚᐅᕐᑕᕋ ᐅᓂᒃᑳᒥ ᑐᓂᓯᓂᓐᓄᑦ,” ᐅᖃᕐᑐᖅ.

ᐋᕆᐊᒃᒧᓪᓕ, ᐃᙱᐅᓯᐅᕐᑎ ᐃᙱᕐᑎᐅᓪᓗᓂᓗ, ᐃᓚᐅᓪᓗᓂ ᐊᒻᒪ ᓵᓚᒃᓴᖅᖢᓂ ᐱᒡᒍᓴᐅᑎᔪᓂᒃ ᐃᓱᒪᒋᔭᖓᓂᒃ ᐊᓯᙳᕈᑎᒋᓚᐅᕐᑕᖓ ᖃᓄᖅ ᐃᙱᐅᓯᐅᕐᐸᖕᓂᖓ ᐊᓯᙳᕈᓐᓇᕐᓂᖓᓂᒃ, ᐊᒻᒪᓗ ᖃᓄᐃᑦᑐᓂᒃ ᐅᓂᒃᑳᓂ ᐅᖃᐅᓯᖃᕈᓐᓇᓕᕐᒪᖔᑦ.

“ᐃᓱᒪᔪᖓ ᐊᓯᐊᒍᑦ ᑕᐅᑐᒍᓐᓇᓕᕋᒪ ᒪᑯᓂᖓ ᐅᓂᒃᑳᓕᐅᖃᑦᑕᕐᓂᕐᒥᒃ ᐊᒻᒪ ᑎᑎᕋᖃᑦᑕᕐᓂᕐᒥᒃ,” ᐋᕆᐊᒃ ᐅᖃᓚᐅᕐᑐᖅ. “ᑕᒪᓐᓇᓘᓐᓃᑦ ᐃᙱᖃᑦᑕᕈᓯᖕᓂᒃ ᐊᓯᙳᖅᑎᑦᑎᔪᖅ ᐅᖃᓪᓚᖕᓂᒃᑰᕐᓂᕐᓴᐅᓕᖅᖢᖓ.

“ᐅᓂᒃᑳᖅᑐᐊᕆᔭᐅᕙᖕᓂᑯᓂᒃ ᐃᓱᒪᒋᔭᖃᕐᓂᕐᓴᐅᓕᕐᑐᖓ. ᑐᓴᕈᒥᓇᑦᑎᐊᕐᒪᑕ ᐊᒻᒪᓗ ᑐᑭᖃᕈᑎᖃᖅᐸᒃᖢᑎᒃ.”

ᐋᓂ ᐊᓂᖕᒥᐅᖅ ᑐᒡᓕᕆᔭᐅᓚᐅᕐᑐᖅ ᐅᓂᒃᑳᖓᓄᑦ ᐃᓄᒃ ᐊᖑᑎ ᓇᒡᓕᒍᓱᕐᓂᕐᒧᑦ ᑭᖓᓂᒃ ᐊᐅᓪᓚᖅᑐᖅ ᐸᖕᓂᕐᑑᒧᑦ ᓄᓕᐊᒃᓴᖓᓃᑦᑐᒪᒐᒥ.

“ᖃᐅᔨᒪᓚᐅᕐᑐᖓ ᐱᐅᓂᐊᓚᐅᕐᑐᖅ ᓲᖃᐃᒻᒪ ᒪᓕᒃᓯᒪᕈᔪᖕᒪᑦ ᐊᑖᑕᒋᓚᐅᕐᓯᒪᔭᒪ ᐅᓂᒃᑳᖏᓐᓂᒃ ᐅᖃᐅᓯᖃᖅᖢᓂ ᐊᓈᓇᒋᓚᐅᕐᑕᓐᓂᒃ,” ᐊᓐᓂᖕᒥᐅᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖃᕋᓴᐅᔭᒃᑯᑦ ᑎᑎᕋᖅᖢᓂ.

“ᐊᒃᓱᐊᓗᒃ ᓇᒡᓗᒍᓱᒃᖢᓂ ᑖᔅᓱᒥᖓ ᑕᐃᒪᓕ ᖃᐅᔨᒪᔪᖓ ᐃᓄᐃᑦ ᑖᔅᓱᒥᖓ ᐱᐅᒃᓴᕋᔭᕐᓂᖏᓐᓂᒃ ᓲᖃᐃᒻᒪ ᑕᒪᑦᑕ ᐃᒃᐱᒋᓂᖃᖅᑐᒍᑦ ᓇᒡᓕᖕᓂᕐᒥᒃ.”

ᐅᖃᓚᐅᕐᑐᖅ ᐱᒡᒍᓴᐅᑎᓂᖅ ᐃᑲᔪᓗᐊᓚᐅᙱᓐᓂᕋᖅᑕᖓ ᑎᑎᕋᖃᑦᑕᕈᓯᐊᓂᒃ — ᑖᓐᓇᓕ $10,000 ᓵᓚᒃᓴᐅᓯᐊᖅ ᐱᐅᓪᓚᕆᓚᐅᕐᑐᖅ — ᑭᓯᐊᓂᓕ ᐱᓇᓱᖁᔨᓯᒪᔪᑦ ᑕᒪᑐᒧᖓ ᑕᒪᑐᒪᓂ ᐊᕐᕌᒍᒥᓐ.

ᐊᓐᓂᖕᒥᐅᖅ ᐅᓂᒃᑳᓕᐊᖏ ᓱᓕ ᐱᐊᓂᒃᓯᒪᙱᑦᑐᖅ ᑭᓯᐊᓂᓕ ᐊᐅᔭᐅᔪᖅ ᑎᑎᕋᖃᑦᑕᕐᓂᐊᕐᑕᖓ ᑭᓱᓕᕆᙱᓐᓂᕐᓴᐅᓕᕈᓂ.

“ᖃᐅᔨᒪᙱᑦᑐᖓ ᓴᖅᑭᑎᑕᐅᓛᕆᐊᒃᓴᖓᓂᒃ. ᑭᓯᐊᓂᓕ ᑕᐃᒪᐃᓐᓂᐊᖁᒻᒪᕆᒃᑕᕋ. ᐃᓄᖕᓂ ᐃᓄᒃᑎᑖᖓᔪᒥᒃ ᓇᒡᓕᒍᓱᖕᓂᕐᒥᒃ ᐅᖃᓕᒫᖁᔨᒐᒪ, ᐅᖃᕐᑐᖅ. “ᐱᐅᓇᔭᖅᑐᐊᓗᖃᐃ.”