‘ᖄᓕᕿᑦᑑ’: ᐊᐅᐸᕐᑐᑦ ᐊᑕᔪᐃᑦ ᐅᓪᓗᖓᓂ ᐊᖅᑯᑎᒃᑰᕐᑐᑦ ᐃᓱᒪᒋᔭᖃᕐᓂᕐᒧᑦ ᐃᓄᐊᖅᑕᐅᓂᑯᓂ, ᐊᓯᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ

For English version, please see ‘I have goosebumps:’ Red Dress Day march honours murdered, Indigenous women, girls

ᐃᖃᓗᖕᓂ ᐊᐅᐸᕐᑐᑦ ᐊᑕᔪᐃᑦ ᐅᓪᓗᖓᓄᑦ ᐊᖅᑯᑎᒃᑰᕐᓂ ᒪᐃ 5-ᒥ ᖃᓄᐃᓕᐅᕈᑎᐅᓚᐅᕐᑐᖅ “ᖁᕕᐊᓱᖕᓂᕐᒧᑦ ᑭᓯᐊᓂᑦᑕᐅᖅ ᓄᒫᓱᖕᓂᕐᒧᑦ,” ᐅᖃᓚᐅᕐᑐᖅ ᔮᔅᒥᓐ ᐃᕕᒃ, ᐃᓚᒋᔭᐅᔪᖅ 100 ᐅᖓᑖᓃᑦᑐᓂᒃ ᐃᓚᐅᓚᐅᕐᑐᓂᒃ.

“ᖁᕕᐊᓱᒃᑐᖓ ᑐᓴᖅᑕᐅᔪᓐᓇᕐᓂᐊᕋᑦᑕ ᐊᒻᒪ ᐅᔾᔨᕆᔭᐅᓗᑕ ᑭᓯᐊᓂᓕ ᑕᒪᓐᓇᑦᑕᐅᖅ ᓄᒫᓱᖕᓇᕐᑐᖅ ᐊᖅᑯᑎᒃᑰᕆᐊᖃᕐᓂᑦᑎᓐᓂᒃ ᐅᔾᔨᕈᓱᓕᖅᑎᑦᑎᓇᓱᒡᓗᑕ ᖃᓄᐃᑉᐸᓪᓕᐊᓂᕐᒥᒃ,” ᐅᖃᕐᑐᖅ.

ᐊᖅᑯᑎᒃᑰᓚᐅᕐᑐᑦ, ᐅᓄᕐᑐᑦ ᐊᐅᐸᕐᑐᓂᒃ ᐊᑐᖅᖢᑎᒃ, ᑲᑎᓚᐅᕐᑐᑦ ᐃᓐᓇᑐᖃᐃᑦ ᖃᒻᒪᖓᓂ ᐃᖃᓗᖕᓂ ᓯᕿᓐᓂᑦᑎᐊᖅᑎᓪᓗᒍ ᐱᓱᖕᓂᐊᕐᓗᑎ ᓄᓇᕗᑦ ᐃᖅᑲᖅᑐᐃᕕᖓᓄᑦ ᐃᓱᒪᒋᓪᓗᒋ ᐊᓯᐅᓯᒪᔪᑦ ᐊᒻᒪ ᐃᓄᐊᕐᑕᐅᓯᒪᔪᖅ ᓄᓇᖃᖅᑳᖅᑐᑦ ᐊᕐᓇᐃᑦ ᐊᒻᒪ ᓂᕕᐊᕐᓵᑦ ᑲᓇᑕᒥ.

ᐊᖅᑯᑎᒃᑯᑦ ᐱᓱᖕᓂᖅ ᐃᓚᒋᔭᐅᓚᐅᕐᑐᖅ ᑲᓇᑕᒥ ᐅᔾᔨᕈᓱᓕᖅᑎᑦᑎᓂᕐᒥᒃ ᐊᓯᐅᓯᒪᔪᓂᒃ ᐊᒻᒪ ᐃᓄᐊᕐᑕᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᑖᓐᓇᓗ ᖃᐅᔨᒪᔭᐅᖕᒥᔪᖅ ᐊᐅᐸᕐᑐᑦ ᐊᑕᔪᐃᑦ ᐅᓪᓗᖓᓂ.

ᐅᑯᓄᖓ YWCA ᐊᒡᕕᒃ ᓄᓇᕗᒥᑦ ᐃᓚᒋᔭᐅᔪᖅ ᓇᐸᔅᓯ ᓚᐃᑕ, ᑖᔅᓱᒥᖓ ᐋᖅᑭᒃᓱᐃᔨᐅᓚᐅᕐᑐᖅ, ᐅᖃᓚᐅᕐᑐᖅ ᐃᖅᑲᐅᒪᔾᔪᑎᐅᓂᖓᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᐊᒻᒪᓗ “ᐃᓚᒋᔭᐅᔪᑦ ᖃᐅᔨᒪᖁᓪᓗᒋᑦ ᐳᐃᒍᖅᑕᐅᓯᒪᙱᓐᓂᖏᓐᓂᒃ.”

1980-ᒥ 2014-ᒧ, 16 ᐳᓴᓐᑎᖏᑦ ᐊᕐᓇᐃᑦ ᑐᖁᑕᐅᔪᑦ ᑲᓇᑕᒥ ᓄᓇᖃᖅᑳᖅᑐᓂᙶᓚᐅᕐᑐᑦ ᐅᓇ 2017-ᒥ ᐅᓂᒃᑳᓕᐊᖑᓂᑯᑦ ᐅᖃᕐᓯᒪᓚᐅᕐᑐᑦ ᒐᕙᒪᑐᖃᒃᑯᑦ ᒪᓕᒐᓕᕆᔨᒃᑯᓐᓂ.

ᑕᒪᓐᓇ ᑕᐅᑐᒃᖢᒍ ᓄᓇᖃᖅᑳᖅᑐᑦ ᐊᕐᓇᐃᑦ 4 ᐳᓴᓐᑎᑐᐃᓐᓇᖏᑦ ᑲᓇᑕᒥ ᐊᕐᓇᓕᒫᓂᒃ ᐅᕙᓂ 2016-ᒥ ᓇᐃᓴᐃᔨᒃᑯᑦ ᑲᓇᑕᒥ ᐅᓂᒃᑳᖏᓐᓂ.

ᐊᔾᔨᙳᐊᑦ ᐊᕐᓇᓂ ᐊᒻᒪ ᓂᕕᐊᕐᓵᓂ ᐊᐅᐸᕐᑐᓂᒃ ᐊᑕᔪᕐᓯᒪᔪᑦ ᓂᐱᑎᓯᒪᓚᐅᕆᕗᑦ ᑎᒍᒥᐊᖅᑕᐅᔪᓂᒃ ᐊᖅᑯᑎᒃᑰᖅᑎᓪᓗᒋᑦ. (ᐊᔾᔨᓕᐅᕆᔨ ᑕᐃᕕᑦ ᓛᕼᐄᑦ)

ᓄᓇᕗᒥ ᐃᓄᐊᖅᑕᐅᔪᑦ ᓄᓇᖃᖅᑳᖅᑐᑦ ᐊᕐᓇᐃᑦ ᐃᒪᓐᓇᐅᓂᕋᖅᑕᐅᓚᐅᕐᑐᑦ 12.26-ᖑᓪᓗᑎᒃ 100,000-ᖏᓐᓂᒃ 2000-ᓗ 2014-ᓗ ᐊᑯᓐᓂᖓᓂ ᐅᑯᑎᒎᓇᖅ ᒐᕙᒪᑐᖃᒃᑯᑦ ᒪᓕᒐᓕᕆᔨᒃᑯᑦ ᐅᓂᒃᑳᖏᓐᓂᒃ. ᓄᓇᖃᖅᑳᙱᑦᑐᑦ ᐊᕐᓇᐃᑦ ᑲᓇᑕᒥ ᑐᖁᑕᐅᔪᑦ ᒫᓃᓚᐅᕐᑐᖅ 0.71 100,000-ᓂ ᐃᓄᖕᓂ 2016-ᒥ ᐅᑯᑎᒎᓇᖅ ᓇᐃᓴᐃᔨᒃᑯᑦ ᑲᓇᑕᒥ.

ᓚᐃᑕ ᐅᖃᓚᐅᕐᑐᖅ ᐃᓱᒪᖃᑦᑕᕐᓂᕋᖅᖢᓂ ᖃᓄᐃᓕᐅᙱᓗᐊᕐᓂᖏᓐᓂᒃ ᒪᑯᓄᖓ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᑐᖁᑕᐅᓯᒪᔪᓄᑦ ᐅᕝᕙᓘᓐᓃᑦ ᐊᓯᐅᓯᒪᔪᓄᑦ.

ᑕᐃᒪᓕ ᐊᖅᑯᑎᒃᑯᑦ ᐱᓱᖕᓂᕐᒥ ᐱᓕᕆᐊᖃᓕᓚᐅᕐᑐᖅ ᓄᓇᓖᑦ ᐃᓚᐅᓂᕐᓴᐅᔪᓐᓇᖁᓪᓗᒋᑦ.

“ᖁᕕᐊᒋᑦᑎᐊᖅᑕᕋ ᖃᐃᔪᐃᑦ,” ᐅᖃᕐᑐᖅ.

“ᖄᓕᕿᑦᑑ ᑕᐃᒪᓐᓇᑎᒋ ᐅᓄᕐᑐᓂᒃ ᐃᓄᖕᓂ ᖃᐃᔪᖃᕐᓂᖓᓂᒃ.”

ᒫᒍᕆᑦ ᓇᑲᓱᒃ, ᓄᓇᕗᒥᑦ ᒐᕙᒪᒃᑯᑦ ᒥᓂᔅᑕ ᑲᒪᒋᔭᖃᕐᑐᖅ ᐊᕐᓇᓂ ᑭᒡᒐᖅᑐᐃᓪᓗᓂ ᐃᓚᒋᔭᐅᓚᐅᕐᑐᖅ ᐱᓱᒃᑐᓂ.

“ᐱᒻᒪᕆᐊᓘᖕᒪ ᐃᓄᐃᑦ ᐊᒻᒪ ᓄᓇᖃᖅᑳᖅᑐᑦ ᑲᓇᑕᒦᑦᑐᑦ ᐃᑲᔫᑎᖃᖅᑎᑕᐅᔪᓐᓇᕐᓗᑎᒃ ᑕᒪᐅᓈᖅᑐᒃᑯᑦ,” ᐅᖃᕐᑐᖅ.

“ᑕᒪᐃᓐᓂ ᐊᕐᓇᐃᑦ ᐊᒻᒪ ᓂᕕᐊᕐᓵᖅ ᐃᑲᔪᖅᑕᐅᔾᔪᑎᖃᕆᐊᖃᕐᒪᑕ ᐋᓐᓂᕐᓱᐃᕆᓂᖃᙱᑦᑐᒃᑯᑦ.”

ᒪᐅᓇᓕ ᖃᓄᐃᓕᐅᕈᑎᒃᓴᑎᒍᑦ ᐊᑐᐃᓐᓇᐅᔪᓂᒃ, ᓇᑲᓱᒃ ᐅᖃᐅᓯᖃᓚᐅᕐᑐᖅ ᒪᓕᒐᓕᕆᔨᒃᑯᓐᓂᒃ, ᐃᓕᓐᓂᐊᖅᑐᓕᕆᓂᒃᑯᑦ ᖃᓄᐃᓕᐅᕈᑎᒃᓴᓂᒃ, ᐱᓕᕆᖃᑎᒌᒃᑐᓂᒃ ᐊᒻᒪᓗ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔫᑎᐅᔪᓐᓇᖅᑐᓂᒃ.

ᐅᖃᓪᓚᑲᑕᓚᐅᖅᖢᑎᒃ ᐱᓱᒃᑎᑦᑎᔪᓂᒃ ᐊᒻᒪᓗ ᐅᓇ ᓇᑲᓱᒃ, ᐃᓄᒋᐊᒃᑐᑦ ᐊᓯᐊᓅᑲᑕᓕᓚᐅᕐᑐᑦ.

ᑎᒍᒥᐊᖅᑕᐅᑲᑕᒃᑐᓂᒃ ᑎᑎᖃᖃᐅᕐᑐᓂᒃ ᒪᕐᕉᒃ ᓴᖅᑭᔮᖅᑎᑦᑎᓚᐅᕐᑑᒃ ᐊᐅᐸᕐᑐᓂᒃ ᐊᑕᔪᓂᒃ ᓂᐱᑎᓯᒪᔪᓂ ᑖᒃᑯᓄᖓ. ᐊᐅᐸᕐᑐᑦ ᐊᑕᔪᐃᑦ ᓴᓇᔭᐅᑲᑕᓚᐅᕐᑐᑦ ᐃᓕᓐᓂᐊᕆᐊᕐᓯᒪᔪᓂᒃ ᓱᕈᓯᕐᒥ ᐊᒻᒪ ᑲᑐᔾᔨᖃᑎᒌᓂᒃ ᐃᑲᔪᖅᑐᐃᓪᓗᑎᒃ ᑖᔅᓱᒥᖓ ᖃᓄᐃᓕᐅᕈᑎᒥᒃ ᐅᑯᐊ ᐱᓱᒃᑎᑦᑎᔪᑦ ᐅᖃᓚᐅᕐᑐᑦ.

ᑖᒃᑯᐊ ᐃᓄᒋᐊᑦ ᐃᖅᑲᖅᑐᐃᕕᐅᑉ ᓵᑦᑎᐊᖓᓂ ᑲᑎᑎᓪᓗᒋᑦ ᓚᐃᑕ ᐅᖃᓪᓚᒍᑎᒥ ᐱᓯᒪᑲᐃᓐᓇᓚᐅᕐᑐᖅ.

“ᐱᔭᐅᑐᐃᓐᓇᙱᓚᐅᕐᓕᑦ ᓇᔭᕗᑦ!” ᑐᕐᓗᓛᖅᖢᓂ.