ᐅᑭᐅᕐᑕᖅᑐᕐᒥᑦ ᖃᖓᑕᓲᖃᖅᑏᑦ ᑲᑎᒐᓱᖕᓂᖏᑦ ᐱᓕᕆᐊᖑᓇᔭᖅᑐᑦ ᑕᖅᑭᓂᒃ 18-ᓂᑦ 24-ᓄᑦ ᐱᐊᓂᒃᑕᐅᓇᓱᖕᓂᖓᓂᒃ, ᐊᐅᓚᑦᑎᔨ ᐅᖃᖅᑐᖅ

ᐱᓕᕆᐊᖃᕐᓂᖅ ᑲᑎᑎᑦᑎᓂᕐᒥᑦ ᕘᔅᑦ ᐃᐅᑯᓐᓂᒃ ᐊᒻᒪ ᑲᓃᑎᐊᓐ ᓄᐊᑦᒥ ᐊᑕᐅᓯᙳᕐᓂᐊᕐᓗᑎᒃ ᐅᑭᐅᕐᑕᖅᑐᓕᒫᒥᑦ ᑕᖅᑭᓂᒃ 18-ᓂᑦ 24-ᓄᑦ ᐊᑯᓂᐅᑎᒋᓂᐊᕐᑐᖅ, ᐅᓇ ᓄᑖᒧᑦ ᖃᖓᑕᓲᓕᕆᔨᐅᓕᕐᓂᐊᖅᑐᑦ ᐊᐅᓚᑦᑎᔨᒋᓂᐊᕐᑕᖓᑦ ᐊᒻᒪ ᐊᖓᔪᖅᑳᕆᕆᔭᐅᓗᓂ, ᑯᕆᔅ ᐊᐃᕗᕆ, ᐅᖃᓚᐅᕐᑐᖅ ᑎᒍᒥᐊᖅᑎᓄᑦ ᐱᖓᔅᓯᕐᒥ, ᔪᓚᐃ 10.

ᐃᖏᕐᕋᔾᔪᑎᓕᕆᔨᑦ ᑲᓇᑕᒥ, ᒪᓕᒃᖢᑎᒃ ᐃᓱᒪᓕᐊᕆᔭᐅᔪᓂᒃ ᒐᕙᒪᑐᖃᒃᑯᑦ ᒥᓂᔅᑕᖏᓐᓄᑦ, ᐊᖏᓚᐅᕐᐳᑦ ᑲᑎᑦᑐᒪᓂᕐᒥᒃ ᑕᖅᑭᐅᓚᐅᕐᑐᒥᓐ, ᒪᓕᒋᐊᖃᖅᖢᑎ ᐅᓄᕈᓘᔭᕐᑐᓂᒃ ᐱᖁᔭᐅᔪᓂᒃ ᐊᒻᒪ ᒪᓕᒋᐊᓕᖕᓂᒃ ᑐᕌᖓᔪᓂᒃ ᓴᐳᔾᔨᓯᒪᓂᕐᒥᒃ ᐅᑭᐅᕐᑕᖅᑐᕐᒥᑦ ᐊᑐᖅᑎᐅᕙᒃᑐᓂᒃ ᑲᑎᓐᓂᕐᒧᑦ ᖃᓄᐃᓕᐅᕈᑎᓂᒃ ᓴᖅᑭᑐᐃᓐᓇᕆᐊᓕᖕᓂᒃ.

ᐊᐃᕗᕆᐅᑉ ᑐᓴᒐᒃᓴᖓ ᐃᒪᐃᓕᖓᓚᐅᕐᑐᖅ ᓇᖕᒥᓂᖃᖅᑐᑦ ᕘᔅᑦ ᐃᐅᒥ, ᒪᑭᕕᒃᑯᑦ, ᐊᒻᒪᓗ ᓇᖕᒥᓂᖃᖅᑎᐅᔪᑦ ᑲᓃᑎᐊᓐ ᓄᐊᑦᒥᑦ, ᐃᓄᕕᐊᓗᐃᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᓐᑯᑦ ᐱᐊᓂᒃᓯᓚᐅᕐᓂᕋᖅᖢᓂᒋᑦ ᐋᕿᓱᕆᐊᓕᖕᓂᒃ ᑲᑎᑎᑦᑎᓂᕐᒧᑦ ᒪᕐᕉᖕᓂᒃ ᓇᖕᒥᓂᕆᔭᐅᔪᓂᒃ ᐱᓕᕆᐊᓂᒃ.

ᖃᓄᐃᓕᐅᖅᐸᓪᓕᐊᓂᒃᑯᑦ ᐱᓕᕆᐊᖃᕐᓂᖅ

ᑕᐃᒪᓕ ᑐᑭᖃᖅᐳᖅ ᐱᒋᐊᕈᓐᓇᕐᓯᓂᖏᓐᓂᒃ ᐱᔭᕆᑐᓕᒑᔪᓂᒃ ᐱᓕᕆᐊᒃᓴᓂᒃ ᑲᑎᑎᑦᑎᓂᕐᒥᒃ ᐱᓕᕆᔨᖏᓐᓂᒃ, ᓴᓇᕝᕕᒋᕙᒃᑕᖏᓐᓂᒃ, ᖃᖓᑕᓲᖁᑎᖏᓐᓂᒃ, ᖃᖓᑕᓲᒃᑯᑦ ᐊᐅᓪᓚᕐᕕᒃᓴᓕᐅᕐᓂᕐᒥᒃ, ᖃᖓᑕᓲᑦ ᖃᖓᑕᕝᕕᒋᖃᑦᑕᕐᓂᐊᖅᑕᖏᓐᓂᒃ ᐊᒻᒪᓗ ᐊᓯᖏᓐᓂᒃ ᐃᓚᒋᔭᐅᔪᓂᒃ ᐱᓕᕆᐊᖏᓐᓄᑦ.

ᑕᒪᓐᓇ ᐱᑐᐃᓐᓇᐅᙱᓐᓂᖓ ᖃᖓᑕᓲᓕᕆᓂᖅ ᐊᒻᒪᓗ ᐊᒥᓱᓄᑦ ᐱᔨᑦᑎᕋᐅᑎᒋᕙᒃᑕᑦᑎᓐᓄᑦ, ᑲᑎᑦᑎᓂᖅ ᑖᒃᑯᓂᖓ ᒫᕐᕉᖕᓂᒃ ᐱᓕᕆᐊᑦᑎᓐᓂᒃ ᐸᕐᓇᐅᓯᐅᑲᑕᒋᐊᖃᓪᓚᕆᖕᓂᐊᕐᒪᓐ, ᑐᑭᒧᐊᖅᑎᑦᑎᓂᕐᒥᒡᓗ ᐊᒻᒪ ᐊᒃᓱᕈᕐᓗᓂ ᐱᓕᕆᐊᖃᕐᓂᕐᒥᒃ, ᑕᒪᓐᓇ ᐱᐊᓂᒃᐸᓪᓕᐊᓂᐊᖁᓪᓗᒍ ᐱᓕᕆᕙᓪᓕᐊᒍᑎᖏᑦᑎᒍᑦ,” ᑐᓴᒐᒃᓴᓕᐊᑦ ᐅᖃᖅᓯᒪᔪᑦ.

ᐊᒻᒪᓗ ᐊᕐᕌᒎᖕᓂ ᒪᕐᕉᖕᓂ ᑖᒃᑯᐊᒃ ᑲᑎᖃᑎᒌᒃᑐᑦ ᐱᓕᕆᖃᑎᒌᑦ ᓱᕋᒃᓯᒪᑎᑦᑎᑦᑕᐃᓕᓂᕐᒥᒃ ᑲᒪᒋᔭᖃᕐᓂᕐᒧᑦ ᐱᓕᕆᐊᕆᕙᒃᑕᖏᓐᓂᒃ ᐊᒻᒪᓗ ᖃᖓᑕᓲᖏᑦ ᑲᑎᑕᐅᓂᖏᓐᓂᒃ ᐱᓕᕆᐊᖑᓇᔭᖅᓗᑎᒃ ᐊᑕᐅᓯᕐᒥᒃ ᖃᖓᑕᓲᓕᕆᓂᕐᒧᑦ ᐊᐅᓚᑦᑎᔨᐅᓂᕐᒥᑦ ᓇᓗᓇᐃᒃᑯᑎᑖᕋᓱᖕᓂᖏᓐᓂᒃ ᒐᕙᒪᑐᖃᒃᑯᓐᓂᑦ, ᑐᓴᒐᒃᓴᐃᑦ ᐅᖃᕐᒥᔪᑦ.

ᑕᐃᒪᓐᓇ ᐱᓕᕆᐊᖃᖅᐸᓪᓕᐊᑎᓪᓗᒋᑦ, ᑲᑎᖃᑎᒌᒃᑐᑦ ᐱᓕᕆᖃᑎᒌ ᐃᒪᐃᓐᓂᐊᖅᑐᑦ “ᓄᓇᓖᑦ ᓯᕗᓪᓕᐅᑎᓪᓗᒋᑦ” ᐃᓱᒪᖃᕐᓂᕐᒥᒃ ᐅᓇ ᐱᒻᒪᕆᖕᒥᑦ ᐱᓕᕆᐊᖃᕐᓂᖏᓐᓂᒃ ᑲᓇᑕᐅᑉ ᐅᑭᐅᕐᑕᖅᑐᖓᓂᒃ.

“ᑐᑭᓯᓯᒪᑦᑎᐊᖅᐳᒍᑦ ᐱᔨᑦᑎᕋᖅᑕᕗᑦ ᐅᕙᑦᑎᓐᓂ ᐊᑐᒻᒪᕆᖕᓂᖏᓐᓂᒃ ᐃᓅᓯᖏᑦᑎᒍᑦ ᓇᐅᒃᑯᑐᐃᓐᓇᖅ ᐊᒻᒪᓗ ᑕᐃᒪᓐᓇ ᐱᓕᕆᐊᖃᕐᓂᑦᑎᓐᓂᒃ, ᖁᐊᕐᓵᕐᓇᙱᑦᑐᒥ ᐊᒻᒪ ᐊᑐᖅᑕᐅᔪᓐᓇᐃᓐᓇᖅᑐᒥᑦ ᐱᓕᕆᐊᖃᕆᐊᖃᖅᐳᒍᑦ ᑕᐃᒪᙵᓕᒫᖅ.”

ᑯᕆᔅ ᐊᐃᕗᕆ, ᒫᓐᓇ ᐊᐅᓚᑦᑎᔨᐅᔪᖅ ᐊᒻᒪ ᐊᖓᔪᖅᑳᖑᓪᓗᓂ ᕘᔅᑦ ᐃᐅᑯᓐᓄᑦ, ᐊᐅᓚᑦᑎᔨᐅᓕᒑᔪᖅ ᐊᒻᒪ ᐊᖓᔪᖅᑳᙳᕐᓂᐊᖅᖢᓂ ᓄᑖᒥ ᑲᑎᓕᒑᔪᓂᒃ ᖃᖓᑕᓲᖃᖅᑎᓂᒃ ᐅᑯᐊ ᒪᑭᕕᒃᒧᑦ ᐊᒻᒪ ᐃᓄᕕᐊᓗᐃᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᓐᑯᑦ ᐋᖅᑭᒃᓱᖅᑕᖓᓂᒃ. (ᐊᔾᔨᙳᐊᖁᑎᒋᔭᐅᔪᖅ)

ᐊᐃᕗᕆ, ᐃᓇᖏᕐᓯᓂᑯ ᕗᕌᒃ ᕗᕇᓴᓐ ᐊᖓᔪᖅᑳᖑᓂᕐᒥ ᕘᔅᑦ ᐃᐅᑯᓐᓂ ᐅᒃᑑᐱᕆᐅᓚᐅᕐᓯᒪᔪᒥ, ᑕᐃᔭᐅᓯᒪᓕᕐᐳᖅ ᐊᖓᔪᖅᑳᖑᓂᐊᕐᓗᓂ ᐊᑕᐅᓯᙳᖅᑎᑕᐅᓂᐊᕐᑐᓂᒃ ᖃᖓᑕᓲᓂᒃ.

“ᐊᖓᔪᖅᑳᖑᓂᐊᕐᓗᖓ ᐊᒻᒪ ᐊᐅᓚᑦᑎᔨᐅᓂᐊᕐᓗᖓ ᑲᑎᖃᑎᒋᔭᑦᑎᓐᓂ ᑲᓃᑎᐊᓐ ᓄᐊᑦᒥ, ᓂᕆᐅᒃᐳᖓ ᐱᓕᕆᖃᕐᓂᐊᕐᓂᕐᒥᒃ ᐱᓕᕆᔨᑦᑎᓐᓂᒃ ᐊᓯᙳᖅᐸᓪᓕᐊᔪᒃᑰᕐᑎᓪᓗᑕ, ᐃᓚᓕᐅᔾᔨᑎᑦᑎᓂᕐᒥᒃ ᐊᔪᙱᓐᓂᕆᔭᐅᔪᓂᒃ ᐱᔪᓐᓇᕐᓂᕆᔭᐅᔪᓂᒡᓗᑦ ᐱᓕᕆᖃᑎᒋᔭᑦᑕ,” ᐊᐃᕗᕆ ᐅᖃᖅᑐᖅ.

ᔮᓂ ᐋᑕᒻᔅ ᓄᓇᕕᒥᐅᑕᖅ, ᒫᓐᓇ ᐃᒃᓯᕙᐅᑕᕆᔭᐅᔪᖅ ᕘᔅᑦ ᐃᐅᑯᓐᓄᑦ, ᐃᒃᓯᕙᐅᑕᕆᔭᐅᓂᐊᕐᒥᔪᖅ ᑲᑎᑦᑐᓂᒃ ᖃᖓᑕᓲᓂᒃ, ᐊᒻᒪ ᐹᑐᕆᒃ ᒍᕉᒐᓐ, ᒫᓐᓇ ᐃᒃᓯᕙᐅᑕᕆᔭᐅᔪᖅ ᐃᓄᕕᐊᓗᐃᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᓐᑯᓐᓄᑦ ᐊᒻᒪ ᐃᒃᓯᕙᐅᑕᐅᓪᓗᓂ ᑲᓃᑎᐊᓐ ᓄᐊᑦᒧᑦ, ᐃᒃᓯᕙᐅᑕᐅᑉ ᑐᒡᓕᕆᓂᐊᖅᖢᓂᒃ.

ᐅᖃᐅᓯᐅᔪᑦ ᓇᓗᓇᐃᕈᑎᐅᕗᑦ ᓄᑖᒥ ᖃᖓᑕᓲᖅᑕᖃᕐᓂᐊᓕᕐᓂᖓᓂᒃ ᑕᐃᔭᐅᓗᓂ ᑲᓃᑎᐊᓐ ᓄᐊᑦ, ᑭᓯᐊᓂᓕ ᕘᔅᑦ ᐃᐅᑯᑦ ᐃᓄᒃᓱᙳᐊᖅ ᑕᕐᓴᖓᓂ ᑕᕐᓴᖃᕐᓂᐊᖅᖢᓂ.

ᐅᖃᖅᑐᖃᙱᑦᑐᖅ ᐃᖅᑲᓇᐃᔮᓂ ᐊᓯᐅᔪᖃᕐᓂᐊᕆᐊᒃᓴᖓᓂᒃ

ᐅᓇ ᐅᖃᐅᓯᖅ ᕘᔅᑦ ᐃᐅᑯᓐᓂ ᐅᖃᕐᓯᒪᙱᑦᑐᖅ ᐊᑕᐅᓯᙳᕐᓂᖅ ᐃᖅᑲᓇᐃᔮᓂ ᐊᓯᐅᔨᔾᔪᑎᐅᓂᐊᕆᐊᒃᓴᖓᓂᒃ, ᐊᒻᒪᓗ ᑖᒃᑯᐊ ᖃᖓᑕᓲᖃᖅᑏᑦ ᐅᖃᕐᓯᒪᙱᖢᑎᒃ ᖃᓄᖅ ᐱᖁᑎᖏᑦ ᒪᑯᐊ ᖃᖓᑕᓲᒃᑯᕖᑦ ᐊᒻᒪ ᐱᖁᑎᖃᕐᕖᑦ ᑲᑎᑕᐅᓂᐊᕆᐊᒃᓴᖏᓐᓂᒃ.

ᑭᓯᐊᓂᓕ, ᒥᓂᔅᑕᓄᑦ ᐊᑐᖅᑕᐅᖁᔭᐅᔪᑦ ᒪᓕᒐᓃᑦᑐᑦ ᐊᒻᒪ ᐊᑐᕆᐊᓕᖕᓂ ᑲᑎᓐᓂᕐᒧᑦ ᐅᖃᕐᓯᒪᔪᖅ ᐃᖅᑲᓇᐃᔭᖅᑎᐅᔪᑦ ᐅᓄᕐᓂᖏᑦ ᒥᒃᖠᒋᐊᖅᐸᑦ ᑖᒃᑯᓇᙵᑦ ᑲᑎᓯᒪᓂᕐᒧᑦ ᐊᐅᓚᑕᐅᓂᕐᒧᑦ ᓄᓇᕗᒥᑦ ᐊᒻᒪ ᓄᓇᑦᓯᐊᕐᒥ ᐱᓕᕆᐅᖑᔪᓐᓇᖅᑐᑦ ᒪᐅᓇ ᐃᖅᑲᓇᐃᔭᖅᑎᑦ ᓄᖃᕌᖓᑕ ᐃᓇᙱᖅᑕᐅᕙᙱᓪᓗᑎᒃ.

ᑖᒃᑯᐊᒡᓗ ᑲᑎᕐᖓᓕᖅᑑᒃ ᐱᓕᕆᐊᖃᖅᑏᑦ ᐋᕿᒃᓱᐃᔭᕆᐊᖃᖅᖢᑎᒃ ᐃᓄᖕᓂᑦ ᐊᔪᕈᓐᓃᕐᓴᖅᑎᑦᑎᓂᕐᒧᑦ ᐊᒻᒪ ᐱᕙᓪᓕᐊᓂᕐᒧᑦ ᖃᓄᐃᓕᐅᕈᑎᒃᓴᓂᒃ “ᐅᓄᕐᓯᕚᓪᓕᖁᓪᓗᒋᑦ ᐃᓄᐃᑦ ᑕᒪᐃᑎᒍᑦ ᑲᑎᕐᖓᔪᐃᑦ ᐱᓕᕆᐊᖏᑦᑎᒍᑦ ᐊᒻᒪ ᐊᐅᓚᑦᑎᓂᖏᑦᑎᑦ,” ᒐᕙᒪᑐᖃᒃᑯᑦ ᐅᖃᓚᐅᕐᑐᑦ.

ᐅᑯᐊᓕ ᖃᓄᐃᓕᐅᕐᓂᖏᑦᑎᒍᑦ, ᑲᒻᐸᓂᐅᔪᑦ ᐅᖃᕐᓯᒪᔪᑦ ᑲᔪᓯᓯᒪᓂᐊᕐᓂᕋᖅᖢᑎᒃ ᓄᓇᖃᖅᑳᖅᑐᓂᒃ ᐃᖅᑲᓇᐃᔭᓕᖅᑎᑦᑎᕙᓪᓕᐊᓂᕐᒥᒃ.

“ᑐᕌᒐᕗᓪᓕ ᐱᓕᕆᐊᑦᑎᒍᑦ ᐃᖅᑲᓇᐃᔭᖅᑎᑦᑎᑦᑎᐊᕙᐅᓛᖑᓂᕐᒥᒃ, ᑲᔪᓯᓯᒪᓗᑕ ᐃᓄᖕᓂᑦ ᐃᖅᑲᓇᐃᔭᖅᑎᑦᑎᓂᕐᒥᒃ ᐊᒻᒪ ᐊᓯᖏᓐᓂᒃ ᓄᓇᖃᖅᑳᖅᑐᓂᒃ ᐃᖅᑲᓇᐃᔮᒃᓴᑦᑎᐊᕙᖕᓂᒃ ᖃᖓᑕᓲᓕᕆᓂᒃᑯᑦ,” ᑐᓴᒐᒃᓴᖓᑦ ᐅᖃᕐᓯᒪᔪᖅ.

ᑖᒃᑯᐊᓗ ᒪᕐᕉᒃ ᑲᒻᐸᓂᐅᔫ ᐅᖃᕐᓯᒪᓪᓗᑎᒃ ᖃᓄᐃᑉᐸᓪᓕᐊᓂᒃᑯᑦ ᐱᓕᕆᓂᐊᕐᓂᖏᓐᓂᒃ ᑲᑎᑉᐸᓪᓕᐊᑎᓪᓗᒋᑦ ᑖᒃᑯᐊ ᒪᕐᕉᒃ ᖃᖓᑕᓲᒃ.

ᑕᒪᓐᓇᓕ ᑐᑭᖃᖅᑐᖅ ᓇᐃᑦᑐᒃᑯᑦ ᐃᒪᐃᓕᐅᕐᓂᐊᕐᓗᑎᒃ:

• ᑲᔪᓯᓯᒪᓗᑎᒃ ᐊᐅᓚᑦᑎᓂᕐᒥᒃ ᒪᕐᕉᖕᓂ ᐃᒻᒥᒃᑰᖓᔪᑎᑐᑦ ᑲᒻᐸᓂᐅᔪᓂᒃ, ᐱᔨᑦᑎᕋᐃᓗᑎᒃ ᐊᔾᔨᒌᙱᑦᑐᑎᑐ.
• ᑲᔪᓯᓗᑎᒃ ᐃᓂᒃᓴᓕᐅᕈᑎᓕᕆᓂᕐᒧᑦ ᐱᔨᑦᑎᕋᖅᑕᖏᓐᓂᒃ ᖃᖓᑦᑕᐅᑎᓕᕆᓂᒃᑯᑦ, ᖃᖓᑕᓂᒃᑯᑦ ᐊᒻᒪ ᐱᖁᑎᓂᒃ ᐊᐅᓪᓚᖅᑎᑦᑎᕙᖕᓂᒃᑯᑦ ᓇᐅᒃᑯᑦ ᐊᓯᙳᖅᑐᖃᙱᓪᓗᓂ.
• ᐱᔪᓐᓇᖅᑎᑦᑎᓗᑎᒃ ᓵᑕᕐᓯᕙᒃᑐᓂᒃ, ᐱᓕᕆᖃᑎᒋᔭᐅᔪᓂᒃ ᐅᕝᕙᓘᓐᓃᑦ ᓂᐅᕕᕐᕕᖃᖅᑐᓂᒃ ᓴᓇᖃᑎᖃᕐᓗᑎᒃ ᐃᖅᑲᓇᐃᔭᖅᑎᓂᒃ ᐱᓕᕆᖃᑎᒋᓕᒪᔭᖏᓐᓂᒃ.

ᐃᒪᐃᓕᖓᓂᐊᕐᑐᖅ ᖃᖓᑕᓲᓕᕆᔩᑦ ᖃᖓᑕᓲᖓᑦ. ᐊᑐᕋᔭᖅᑐᖅ ᑲᓃᑎᐊᓐ ᓄᐊᑦ ᐊᑎᖓᓂᒃ ᐊᒻᒪ ᕘᔅᑎ ᐃᐅᑯᑦ ᑕᕐᓴᖓᓂ ᐃᓄᒃᓱᒐᕐᒥᒃ ᐊᑐᕐᓗᑎᒃ. (ᐊᔾᔨᙳᐊᖁᑎᒋᔭᐅᔪᖅ)

ᐊᑯᓂᐅᓂᕐᓴᕐᓕ ᐱᓕᕆᓂᒃᑯᑦ, ᓄᑖᖅ ᖃᖓᑕᓲᙳᖅᑐᖅ ᐃᒪᐃᓐᓂᐊᕐᑐᖅ:

• ᐋᕿᒃᓱᐃᓗᑎᒃ ᑲᑎᕐᖓᔪᒥᑦ ᖃᖓᑕᓲᓄᑦ ᖃᖓᑕᕝᕕᐅᖃᑦᑕᕐᓂᐊᖅᑐᓂᒃ ᑕᒪᐃᓐᓂ ᖃᖓᑕᓲᓂᒃ ᐊᐅᓚᑕᐅᔪᓂᒃ ᑲᓃᑎᐊᓐ ᓄᐊᑦᑯᓐᓂᑦ ᕘᔅᑎ ᐃᐅᑯᓐᓂᓪᓘᓐᓃᑦ.
• ᐱᓕᕆᐊᖃᕐᓗᑎᒃ ᐊᖏᒡᓕᕙᓪᓕᐊᑎᑦᑎᓂᕐᒥᒃ ᑲᓃᑎᐊᓐ ᓄᐊᑦᑯᑦ ᐊᕉᕋ ᑐᓐᓂᖁᓯᐊᖃᕈᑎᓯᖏᓐᓂᒃ ᑕᒪᐃᓐᓄᑦ ᐃᓂᒃᓴᖃᕐᕕᐅᔪᓄᑦ ᖃᖓᑕᕙᒃᑐᓄᑦ ᕘᔅᑦ ᐃᐅᑯᓐᓂᒃ, ᑕᒪᒃᑯᐊ ᐱᔨᑦᑎᕋᖅᑕᐅᔪᑦ ᑕᒪᐃᓐᓂ ᐊᕉᕋ ᑐᓐᓂᖁᓯᐊᖃᕈᓐᓇᕈᑎᖏᓐᓂᒃ ᐊᒻᒪ ᐃᐅᕈᐸᓛᓐ ᒪᐃᐅᔅ ᐅᑎᖅᑎᑕᐅᔪᓐᓇᖅᖢᑎᒃ ᐊᑭᖃᙱᑦᑐᒥ ᖃᖓᑦᑕᓂᒃᑯᑦ.

ᐊᒻᒪᓗ ᑕᒪᑐᒪᓂ ᐊᕐᕌᒍᒥ ᐅᖓᑖᓄᓪᓗ, ᐃᒪᐃᓐᓂᐊᕐᑐᑦ:

• ᐋᕿᒃᓯᓗᑎᒃ ᑲᑎᖃᑎᒌᒃᓯᒪᔪᓂᒃ “ᑲᓃᑎᐊᓐ ᓄᐊᑦ” ᑕᕐᓴᒃᓴᒥᒃ, ᓴᕿᑎᑦᑎᓯᒪᔪᒥᒃ ᕘᔅᑦ ᐃᐅᑯᑦ ᐃᓄᒃᓱᒐᙳᐊᖅ ᑕᕐᓴᖓᓂᒃ ᐱᖁᑎᖏᓐᓂᒃ, ᓇᓗᓇᐃᒃᑯᑎᖏᓐᓂᒃ ᐊᒻᒪ ᐊᓯᖏᓐᓂᒃ ᐱᖁᑎᓂᒃ.
• ᑲᑎᓪᓗᒋᑦ ᒪᕐᕉᐃᖑᔪᑦ ᐃᖅᑲᓇᐃᔭᖅᑐᑦ ᓱᒃᑲᐃᓪᓗᑎ ᐃᒪᓐᓇ ᐱᓕᕆᕙᓪᓕᐊᓂᒃᑯᑦ ᒪᐅᓇ ᖃᖓᑦᑕᐅᑎᓕᕆᓂᒃᑯᑦ, ᐊᑭᓕᒐᒃᓴᓕᕆᓂᒃᑯᑦ, ᐊᐅᓚᑕᐅᔭᕆᐊᖃᑐᓕᕆᓂᒃᑯᑦ, ᖃᖓᑕᓲᑎᒍᑦ ᐊᒻᒪ ᓴᓇᕝᕕᖏᓐᓂᒃ.
• ᐊᔾᔨᒌᙱᑦᑐᓂᒃ ᐱᓕᕆᐊᖃᕐᓗᑎ ᐅᓄᕐᓯᒋᐊᖅᑎᑦᑎᓗᑎᒃ ᐱᓕᕆᓂᖏᓐᓂᒃ ᒪᑯᑎᑐᓇᖅ ᓵᑕᓂᒃ ᐱᓕᕆᐊᓂᒃ.

ᐊᒻᒪᓗ ᑐᓴᒐᒃᓴᖓ ᐅᖃᒃᑲᓐᓂᕐᓯᒪᓪᓗᑎ ᐱᔾᔪᑎᒋᔭᖏᓐᓂᒃ ᑲᑎᓐᓂᕐᒧᑦ.

“ᓈᒻᒪᙱᓗᐊᕐᐸᒃᑐ ᐅᑯᐊ ᒪᕐᕉᒃ ᖃᖓᑕᓲ ᐊᐅᓚᑕᐅᕙᒃᖢᑎᒃ ᖃᖓᑕᓂᖏᑦ ᐊᔾᔨᒌᐸᓗᒃᐸᒃᖢᑎᒃ ᐊᒻᒪᓗ ᑕᒪᓐᓇ ᐊᑐᖅᑕᐅᔪᒪᓂᕐᒧ ᐱᓗᐊᖅᐸᒃᖢᓂ ᖄᖏᐅᑎᓯᒪᓗᐊᖃᑦᑕᖅᑐᓂᒃ ᖃᖓᑕᔾᔪᑎᓂᒃ ᐊᒻᒪ ᐱᖁᑎᑦ ᐊᑭᒋᕙᒃᑕᖏᑦ ᐱᔪᓐᓇᕐᓂᕗ ᐊᑐᙱᓐᓂᕐᓴᐅᕙᒃᖢᓂ ᐱᐅᓯᕚᓪᓕᕈᑎᐅᓇᔭᖅᑐᑦ ᐊᐅᓚᑦᑎᓂᑦᑎᒍᑦ.”

ᑭᓯᐊᓂᓕ ᑲᑎᑎᑕᐅᔪᑦ ᖃᖓᑕᓲᑦ ᐊᐅᓚᑕᐅᓇᔭᖅᑐ ᓈᒻᒪᓈᕐᓯᒪᓂᕐᓴᒃᑯᑦ ᐊᒻᒪ ᐱᔨᑦᑎᕋᐃᓂᕐᓴᐅᓗᑎᒃ ᑭᒃᑯᓕᒫᓂᒃ ᐱᐅᓂᕐᓴᒃᑯᑦ, ᑐᓴᒐᒃᓴᓕᐊᖅ ᐅᖃᕐᓯᒪᔪᖅ.