ᐊᒡᕕᒃ (YWCA Agvvik) ᐊᕐᓇᓄᑦ ᐃᒡᓗᒋᔭᐅᔪᓐᓇᕐᓂᐊᖅᑐᓂᒃ ᖃᒡᓕᒋᐊᖅᑎᑦᑎᒃᑲᓐᓂᖅᐳᑦ

ᑲᑐᔾᔨᖃᑎᒌᖑᔪᑦ ᐊᐅᓚᑦᑎᔪᒪᖕᒪᑕ ᑕᓪᓕᒪᓂᒃ ᐃᒡᓗᓂ ᐅᕙᓂ ᓯᓂᒃᑕᖅᕕᒃ ᐊᒻᒪ ᐅᓪᓛᕈᒻᒥᑕᖅᕕᐅᓚᐅᖅᑐᒥ ᓂᐊᖁᙴᒥ

ᐃᖃᓗᖕᓂ ᓄᓇᓕᐸᐅᔭᐃᑦ ᐱᕙᓪᓕᐊᔪᓕᕆᓂᕐᒧᑦ ᑲᑎᒪᔨᕋᓛᖏᑦ ᑐᓴᖅᑎᑦᑎᕗᑦ ᐃᑲᔪᖅᑐᐃᓂᖏᓐᓂᒃ ᐊᒡᕕᒃᒥᒃ (YWCA Agvvik) ᑐᒃᓯᕋᐅᓯᐊᖏᓐᓂᒃ ᒪᑐᐃᖅᓯᔪᒪᓂᖅᒧᑦ ᐃᒡᓗᒃᓴᓂᒃ ᐊᕐᓇᓄᑦ ᐊᒻᒪ ᕿᑐᕐᖓᖏᓐᓄᓪᓗ ᐊᖏᖅᖢᑎᒃ ᓄᓇᐅᑉ ᐋᖅᑭᒃᑕᐅᓯᒪᓂᖓᓂᒃ ᐋᖅᑭᒋᐊᒃᑲᓐᓂᖅᓯᔪᒪᔪᓂᒃ ᔪᓚᐃ 20-ᐅᑎᓪᓗᒍ. (ᐊᔾᔨᙳᐊᖁᑎᒋᔭᐅᔪᖅ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For an English version of this story, see YWCA Agvvik gets closer to opening women’s transitional home

ᐊᒡᕕᒃ (YWCA Agvvik) ᖃᒡᓕᕚᓪᓕᖅᐳᖅ ᒪᑐᐃᕐᓯᓂᐊᕐᓂᖏᓐᓂᒃ ᑕᓪᓕᒪᓂᒃ ᐃᒡᓗᒋᔭᐅᓚᐅᑲᖕᓂᐊᖅᑐᓂᒃ ᐊᕐᓇᓄᑦ ᐅᕙᓂ ᓂᐊᖁᙴᒥᑦ ᓯᓂᒃᑕᖅᕕᒃ ᐊᒻᒪ ᐅᓪᓛᕈᒻᒥᑕᖅᕕᕕᓂᖅᒥᒃ ᐅᑯᐊ ᐃᖃᓗᖕᓂ ᓄᓇᓕᐸᐅᔭᓄᑦ ᐱᕙᓪᓕᐊᔪᓕᕆᓂᖅᒧᑦ ᑲᑎᒪᔨᕋᓛᖏᑦ ᐃᑲᔪᖅᑐᐃᓚᐅᖅᑎᓪᓗᒋᑦ ᐱᓇᓱᐊᕈᓯᐅᓚᐅᖅᑐᒥᓐ.

ᐊᒡᕕᒃ, ᑮᓇᐅᔭᓕᐅᕋᓱᙱᖢᑎᒃ ᑲᑐᔾᔨᖃᑎᒌᑦ ᐊᐅᓚᑦᑎᕙᒃᑐᑦ ᑐᐊᕕᕐᓇᖅᑐᓄᑦ ᐊᒻᒪ ᐊᖏᕐᕋᖃᙱᑦᑐᒃᑯᕕᖕᒥᒃ ᐊᕐᓇᓄᑦ ᐅᐸᒡᕕᒃᒥᑦ, ᐊᑐᖅᑐᐊᕈᓐᓇᖅᓯᓚᐅᕐᒪᑕ ᐃᒡᓗ 3037-ᒥ ᐄᐳᕉᓚᐅᕐᓯᒪᔪᒥᑦ ᐊᒻᒪᓗ ᑖᔅᓱᒪ ᐃᓂᒋᔭᖓ ᐋᖅᑭᒋᐊᖅᑕᐅᒃᑲᓐᓂᕐᓗᓂ ᓇᖕᒥᓂᖅ ᐱᓕᕆᐊᖃᕐᓂᖅᒧᑦ ᑐᕌᖓᔪᓐᓃᕐᓗᓂ ᑭᓯᐊᓂᓕ ᑭᒃᑯᓕᒫᓄᑦ ᐅᐸᒐᒃᓴᐅᕝᕕᐅᑎᓯᒪᓕᕐᓗᓂ, ᐅᖃᓚᐅᖅᑐᖅ ᓄᓇᓕᐸᐅᔭᓄᑦ ᐸᕐᓇᐃᔨ ᒥᓯᐊᓪ ᐋᒻᓯᑐᕌᖕ ᑲᑎᒪᔨᕋᓛᑦ ᑲᑎᒪᑎᓪᓗᒋᑦ ᔪᓚᐃᑦ 20-ᒥ.

ᑲᑎᒪᔩᑦ ᑲᑎᒪᑎᓪᓗᒋᑦ ᓂᕈᐊᓚᐅᖅᓯᒪᖕᒪᑕ ᐊᑕᖏᖅᖢᑎᒃ ᐋᖅᑭᒋᐊᖅᑕᐅᖁᔭᐅᓯᒪᔪᒥᒃ. ᑭᖑᓪᓕᕐᒥᓪᓗ ᑲᑎᒪᔨᓄᑦ ᐊᖏᖅᑕᐅᔭᕆᐊᖃᕐᓂᐊᖅᖢᓂ ᑖᓐᓇ ᓄᓇ ᑭᓱᒨᖓᓕᕐᓂᖓᓄᑦ ᒪᓕᒐᕋᓛᑎᒍᑦ ᐊᒻᒪᓗ ᐃᖅᑲᓇᐃᔭᖅᑎᐅᔪᑦ ᐋᖅᑭᒃᓱᐃᔭᕆᐊᖃᖅᖢᑎᒃ ᑭᒃᑯᓕᒫᓂᒃ ᑐᓴᖅᑎᑦᑎᓂᖅᒧᑦ ᑲᑎᒪᓂᒃᓴᒥᑦ ᑕᒪᑐᒥᖓ.

ᑲᑐᔾᔨᖃᑎᒌᑦ ᐊᑭᓕᒐᕐᓂᖅᑐᓂᒃ ᐃᒡᓗᖃᖅᑎᑦᑎᔪᒪᖕᒪᑕ ᐊᕐᓇᓄᑦ ᕿᑐᕐᖓᖏᓐᓄᓪᓗ ᐅᑯᓇᓃᙱᙶᓕᕐᓗᑎᒃ ᐃᒡᓗᖃᙱᑦᑐᒃᑯᕕᖕᓂᒃ, ᐋᒻᓯᑐᕌᖕ ᐅᖃᖅᑐᖅ.

“ᐅᓇ ᐊᒃᓱᐊᓗᒃ ᐱᐅᔪᐊᓗᒃ,” ᑲᑎᒪᔨ ᔮᓐ ᕚᓴᑦ ᐅᖃᖅᑐᖅ.

“ᐊᒃᓱᐊᓗᒃ ᐅᐱᒍᓱᒃᐳᖓ ᑖᒃᑯᐊ ᑲᑐᔾᔨᖃᑎᒌᖑᔪᑦ ᐱᓇᓱᓪᓚᕆᖕᓂᖏᓐᓂᒃ ᒪᐅᓇ ᐱᔨᑦᑎᕋᐅᑎᖏᓐᓂᒃ ᐱᕙᓪᓕᐊᑎᑦᑎᓇᓱᖕᓂᒃᑯᑦ ᓄᓇᓕᖕᓂ ᐊᒻᒪᓗ ᑖᓐᓇ ᐃᑲᔪᖅᑐᑦᑎᐊᖅᐸᕋ ᑐᒃᓯᕋᐅᑎᒋᔭᐅᔪᖅ.”

ᐅᓇ ᓂᐊᖁᙴᒥᑦ ᓯᓂᒃᑕᖅᕕᒃ ᐊᒻᒪ ᐅᓪᓛᕈᒻᒥᑕᖅᕕᒃ ᐊᑐᐃᓐᓇᐅᓕᓚᐅᕐᑐᖅ ᑖᓐᓇ ᐱᓕᕆᐊᖑᔪᖅ ᒪᑐᔭᐅᑎᓪᓗᒍ ᒫᔅᓯᒥᑦ ᓄᕙᒡᔪᐊᕐᓇᖅ-19-ᒧᑦ, ᐅᖃᓚᐅᖅᑐᖅ ᓇᖕᒥᓂᖃᖅᑎᐅᓚᐅᖅᑐᖅ, ᔪᐃᓕ ᓚᕙᓖ, ᐊᐱᖅᓱᖅᑕᐅᑎᓪᓗᒍ.

“ᐱᕙᓪᓕᐊᑦᑎᐊᓕᓚᐅᖅᓯᒪᔪᑦ, ᐊᒻᒪᓗ 2020 ᐱᒋᐊᓕᓵᖅᑎᓪᓗᒍ — ᑕᑕᓯᒪᐃᓐᓇᐅᔭᓚᐅᖅᓯᒪᔪᒍᑦ,” ᐅᖃᖅᑐᖅ. “ᐊᒻᒪᓗ ᐃᑲᕐᕋᑦ 24 ᐃᓗᐊᓂ ᑭᓱᓕᒫᑦ ᓄᖅᑲᖅᑎᑕᐅᓪᓗᑎᒃ ᑕᖅᑭᓂᒃ 6-ᓂᒃ.”

ᓚᕙᓖ ᐅᖃᓚᐅᖅᑐᖅ ᐊᕐᕌᒍᒥ ᐊᐅᓚᑦᑎᓇᓱᐃᓐᓇᓚᐅᖅᑑᒐᓗᐊᖅ ᖃᓄᐃᓐᓂᐊᕆᐊᒃᓴᖓᓂᒃ, ᑭᓯᐊᓂᓕ ᑕᒪᓐᓇ ᐱᐅᓯᕚᓪᓕᓚᐅᙱᒻᒪᑦ ᑕᐃᒪᓕ ᐃᖅᑲᓇᐃᔭᖅᑎᖓ ᐊᑕᐅᓯᖅ ᓄᖅᑲᖅᑎᑦᑕᕆᐊᖃᓕᓚᐅᖅᑕᖓ ᐊᒻᒪᓗ ᐃᒡᓗ ᓂᐅᕐᕈᑎᒋᔭᕆᐊᖃᓕᖅᖢᓂᐅᒃ.

“ᐊᒃᓱᓪᓘᓐᓃᑦ ᓄᓇᓕᖕᓄᑦ ᐃᑲᔪᕈᑎᐅᔪᓐᓇᕐᓂᐊᓕᖅᖢᓂ,” ᐅᖃᖅᑐᖅ.

ᐊᒡᕕᒃ (YWCA Agvvik) ᑭᐅᓚᐅᙱᑦᑐᑦ ᐊᐱᖅᓱᖅᑕᐅᔪᒪᒐᓗᐊᕐᒪᑕ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

Share This Story

(0) Comments