ᐸᓖᓯᒃᑯᑦ ᐱᖓᓱᓂᒃ ᐊᖑᑎᓂᒃ ᑎᒍᓯᓚᐅᖅᑐᑦ ᑰᔾᔪᐊᕐᒥ ᐋᖓᔮᕐᓇᖅᑐᓂᒃ ᓂᐅᕝᕈᑎᒃᓴᕆᔭᐅᔪᓂᒃ ᐱᓕᕆᓂᖃᖅᓱᑎᒃ

ᐸᓖᓯᒃᑯᑦ ᐱᓇᓱᐊᕈᓯᐅᓚᐅᖅᑐᒥ ᑎᒍᓯᓯᒪᓚᐅᖅᐳᑦ ᐱᖓᓱᓂᒃ ᐊᖑᑎᓂᒃ ᐊᒻᒪᓗ ᐋᓯᒪᓕᖅᖢᒋᑦ ᐋᖓᔮᕐᓇᖅᑐᓂᒃ ᓂᐅᕝᕈᑎᒃᓴᕆᔭᖏᓂᒃ ᐊᒻᒪᓗ ᖁᑭᐅᑎᖏᓂᒃ ᑰᔾᔪᐊᕐᒥ.

ᐃᓚᒋᔭᐅᑎᓪᓗᒍ ᑲᑐᔾᔨᓂᖃᖅᓱᑎᒃ ᖃᐅᔨᓴᐃᓂᖏᑕ ᑯᐃᐸᒃ ᐳᕌᕕᓐᓯᖓᓂ ᐸᓖᓯᒃᑯᓐᓂᑦ ᐊᒻᒪᓗ ᓄᓇᕕᒃ ᐸᓖᓯᒃᑯᖏᓂᑦ, ᐃᑎᕈᖕᓇᖅᓱᑎᒃ ᕿᓂᕈᓐᓇᕐᓂᒥᓐᓂᒃ ᐊᑐᓕᓚᐅᖅᐳᑦ ᐱᖓᓱᓂ ᐊᖏᕐᕋᕆᔭᐅᔪᓂ ᕕᑉᕈᐊᕆ 10-ᒥ, ᒪᓕᒃᖢᒋᑦ ᑐᓴᒐᒃᓴᐃᑦ ᓴᖅᑭᑕᐅᓯᒪᓕᓚᐅᖅᑐᑦ ᑯᐃᐸᒃᒥ ᐸᓖᓯᒃᑯᓐᓂᑦ.

ᐸᓖᓯᒃᑯᑦ ᐋᑦᓯᓯᒪᓕᓚᐅᖅᐳᑦ 40 ᒍᕌᒻᓂᒃ ᐅᖁᒪᐃᓐᓂᖃᖅᑐᓂᒃ ᑰᑲᐃᓐ ᐋᖓᔮᕐᓇᖅᑐᓂᒃ, 10-ᓗᐊᓂᒃ ᖁᑭᐅᑎᓂᒃ, 30 ᒍᕌᒻᓂᒃ ᑳᓇᐱᔅ ᐋᖓᔮᕐᓇᖅᑐᓕᐊᖑᓯᒪᔪᓂᒃ ᐊᒻᒪᓗ $7,000-ᑖᓚᓂᒃ ᑮᓇᐅᔭᓪᓚᑦᑖᓂᒃ. ᐋᑦᓯᓯᒪᓕᓚᐅᕆᓪᓗᑎᒃ ᑳᓇᐱᔅᓂᑦ ᓄᖑᓴᒐᓕᐊᖑᓯᒪᔪᓂᒃ, ᑳᓇᐱᔅ ᐃᕕᖕᓂᒃ, ᑳᓇᐱᔅ ᐸᑕᓕᐊᖑᓯᒪᔪᓂᒃ, ᐅᐊᔭᒨᖅᑐᒃᑰᕈᑎᓂᒃ, ᐊᒻᒪᓗ ᐋᖓᔮᕐᓇᖅᑐᓂᒃ ᓂᐅᕝᕈᑎᖃᖃᑦᑕᕈᑎᐅᔪᓂᒃ.

ᐱᖓᓱᑦ ᐊᖑᑏᑦ, ᑕᒪᕐᒥᒃ ᐅᑭᐅᓖᑦ 30-ᖏᓐᓂ, ᐊᓂᔪᖕᓇᓕᖅᑎᑕᐅᓚᐅᖅᑐᑦ ᑎᒍᔭᐅᓯᒪᕝᕕᖕᒥᑦ ᐃᖅᑲᖅᑐᐃᕝᕕᖕᓄᑦ ᐅᐸᒍᑎᔪᒫᕐᓂᐊᖅᓯᒪᑎᑕᐅᓪᓗᑎᒃ.