ᑲᓇᑕ ᐊᒻᒪ ᓄᓇᕗᑦ ᐊᑎᓕᐅᕐᐳᑦ ᐊᖏᕈᑎᒥᒃ ᐱᓕᕆᐊᒃᓴᐃᑦ ᐱᓕᕆᐊᖑᓂᐊᓕᕐᓂᖏᓐᓂᒃ ᐊᓯᖏᓐᓄᑦ

For an English version of this story, see Canada and Nunavut sign deal in milestone step to devolution

ᐱᒋᐊᕈᑎᒻᒪᕆᒃᒧᑦ ᓄᓇᕗᑦ ᐊᐅᓚᑦᑎᔪᓐᓇᕐᓂᐊᕐᓂᖏᓐᓂᒃ ᒐᕙᒪᑐᖃᒃᑯᑦ ᓄᓇᖁᑎᖏᓐᓂᒃ ᐊᒻᒪ ᐊᑐᒃᑲᓐᓂᕈᓐᓇᖅᑐᓕᕆᓂᕐᒥᒃ, ᑭᒡᒐᖅᑐᐃᔨᐅᔪᑦ ᒐᕙᒪᑐᖃᒃᑯᓐᓂᒃ, ᓄᓇᕗᑦ ᑐᙵᕕᒃ ᑎᒥᖓᓂᒃ ᐊᒻᒪᓗ ᓄᓇᕗᒧᑦ ᐊᑎᓕᐅᓚᐅᕐᐳᑦ ᐊᖏᕈᑎᒥᒃ ᐱᓕᕆᐊᒃᓴᐃᑦ ᐱᓕᕆᐊᖑᓂᐊᓕᕐᓂᖏᓐᓂᒃ ᐊᓯᖏᓐᓄᑦ ᑎᓴᒻᒥᖅ, ᐊᒐᓯ 15-ᒥᑦ ᐃᖃᓗᖕᓂᑦ.

ᐊᖏᕈᑎ ᐊᑎᓕᐅᕐᑕᐅᓚᐅᕐᑐᖅ ᓄᓇᕗᒥᑦ ᓯᕗᓕᐅᕐᑎᒧᑦ ᔫ ᓴᕕᑲᑖᖅ, ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓᓄᑦ ᐊᓗᑭ ᑰᑦᑎᖅ, ᐊᒻᒪ ᑭᐅᕈᓕᓐ ᐸᓇᑦ, ᒐᕙᒪᑐᖃᒃᑯᑦ ᒥᓂᔅᑕᖓᑦ ᒐᕙᒪᒃᑯᑦ-ᓄᓇᖃᖅᑳᖅᑐᓪᓗ ᐱᓕᕆᖃᑎᒌᓂᖏᓐᓄᑦ.

“ᖃᐅᔨᒪᔪᒍᑦ ᓄᓇᕗᑦ ᖃᓄᐃᑉᐸᓪᓕᐊᓂᖓᒍᑦ, ᐅᓇ ᐅᓪᓗᖅ ᖁᕕᐊᓲᑎᐅᔭᕆᐊᖃᕐᒪᑦ, ᓄᓇᕗᒻᒥᐅᓄᑦ ᐊᒻᒪ ᑲᓇᑕᒥ ᐱᒋᐊᕈᑎᐅᓂᖓᓄᑦ… ᖃᖔᓗᖕᓂ ᑕᐃᒪᐃᑦᑕᕆᐊᖃᕐᓯᒪᓪᓗᓂ,” ᐸᓇᑦ ᐅᖃᖅᑐᖅ.

ᐊᖏᕈᑎ ᐱᒋᐊᕈᑎᐅᔪᖅ ᐊᕐᕌᒍᓂ ᑕᓪᓕᒪᓂ ᖃᓄᐃᓕᐅᕈᑎᐅᓂᐊᖅᑐᓄᑦ ᐊᒻᒪ ᐃᓱᓕᓐᓇᔭᖅᖢᓂ ᑭᖑᓕᖅᐹᒥᒃ ᐱᓕᕆᐊᒃᓴᓂᒃ ᓅᑎᑦᑎᓂᕐᒧᑦ ᐊᖏᕈᑎᓂᒃ, ᒪᑯᓂᖓ ᑲᒪᒋᔭᐅᔾᔪᑎᐅᔪᓂᒃ ᓄᓇᕗᑦ ᓄᓇᖏᓐᓂᒃ, ᐃᒪᕐᓂᒃ ᐊᒻᒪ ᐊᑐᒃᑲᓐᓂᕈᓐᓇᖅᑐᓂᒃ ᐅᑯᓇᙵᑦ ᑲᓇᑕᐅᑉ ᒐᕙᒪᖓᓂᒃ ᓄᓇᕗᑦ ᒐᕙᒪᖓᓄᑦ.

“ᕿᓄᐃᓵᒃᑳᓘᔪᓯ ᐊᒻᒪ ᐱᓇᓱᐃᓐᓇᕈᓐᓇᕐᖢᓯ … ᐅᓇ ᐱᒋᐊᕈᑎᐅᓂᐊᓕᕐᑐᖅ ᓇᖕᒥᓂᖅ ᐱᓕᕆᔪᓐᓇᕐᓂᕐᒥᒃ, ᑕᐅᑐᙳᐊᕈᑎᕕᓂᖅ ᓇᖕᒥᓂᖅ ᐃᓅᖃᑎᔅᓯᓐᓂ ᑲᒪᒋᔭᖃᕈᓐᓇᕐᓂᕐᒥᒃ ᐊᒻᒪ ᓄᓇᔅᓯᓐᓂ ᐊᒻᒪ ᐃᒪᕐᓂ ᖃᐅᔨᒪᓛᕆᔭᔅᓯᒍᑦ,” ᐸᓇᑦ ᐅᖃᖅᑐᖅ.

ᓴᐃᒪᓐ ᐊᕙ, ᓄᓇᕗᑦ ᐊᖓᔪᖅᑳᖓᑦ ᐊᕕᒃᑐᐃᓂᕐᒧ, ᐅᖃᓚᐅᕐᑐᖅ ᐊᖏᕈᑎ ᐱᒋᐊᕈᑎᐅᓂᖓᓂᒃ ᑭᖑᓪᓕᕐᒥᑦ ᒐᕙᒪᓕᕆᓂᕐᒥᒃ ᐊᕕᒃᑐᐃᓂᐊᕐᓂᕐᒧᑦ.

“ᓇᓗᓇᐃᒃᑯᑎᐅᕗᖅ ᑭᖑᓪᓕᕐᒥ ᖃᓄᐃᓕᐅᕐᓂᐊᕐᓂᕐᒥᒃ ᐱᒋᐊᕐᓂᑯᓂᒃ ᓄᓇᕗᑦ ᐱᒋᐊᓚᐅᕐᓯᒪᙱᑎᓪᓗᒍ. ᐅᓇ ᐱᒋᐊᕈᑎᒻᒪᕆᐅᓂᐊᕐᑐᖅ ᐱᓕᕆᐊᒃᓴᒻᒪᕆᐅᓂᐊᕐᑐᓂᒃ ᐱᒋᐊᓚᐅᕐᓯᒪᓪᓗᓂ ᐋᔩᖃᑎᒌᖕᓂᖏᑦᑎᒍᑦ ᐅᑯᐊ ᑲᓇᑕᐅᑉ ᒐᕙᒪᖓ, ᓄᓇᕗᑦ ᒐᕙᒪᖓ ᐊᒻᒪ ᓄᓇᕗᑦ ᑐᙵᕕᒃ ᑎᒥᖓ ᓄᕕᐱᕆ 2014-ᖑᑎᓪᓗᒍ,” ᐊᕙ ᐅᖃᖅᑐᖅ.

“ᐱᓕᕆᐊᒃᓴᓂᒃ ᑲᒪᒋᔭᖃᓕᕐᓂᖅ ᐊᖏᕈᑎᐅᓯᒪᖕᒪᑦ ᐃᓄᖕᓄᑦ ᓄᓇᕗᒥᑦ, ᐃᓱᒪᓕᐅᕆᓂᒃᑯᑦ ᓴᙱᓂᐅᔪᑦ ᓄᓇᑦᑎᓐᓃᓪᓗᓂ, ᐅᕙᑦᑎᓐᓂ ᐃᓱᒪᓕᐅᕆᓂᖅ ᐅᕙᑦᑎᓐᓄ.”

“ᐅᓪᓗᒥ ᐅᓪᓗᑦᑎᐊᕚᓗᒃ. ᐃᒪᐃᓕᔪᓐᓇᖅᑐᖓ ᖃᐅᔨᒪᓚᐅᙱᑦᑐᖓ ᑖᓐᓇ ᕿᓚᒥᕈᓗᒃ ᐊᑐᕐᓂᐊᕆᐊᒃᓴᖓᓂᒃ. ᐅᓇ ᓇᓗᓇᐃᒃᑯᑎᐅᔪᖅ ᐊᒃᓱᕈᒻᒪᕆᓚᐅᕐᓂᖏᓐᓂᒃ ᐱᓕᕆᐊᓂᒃ ᓅᑎᑦᑎᓂᕐᒥᒃ ᐱᓕᕆᔨᐅᓚᐅᕐᑐᑦ,” ᓴᕕᑲᑖᖅ ᐅᖃᖅᑐᖅ.

“ᒐᕙᒪᑐᖃᒃᑯᑦ ᐱᓕᕆᐊᒃᓴᖏᑦ ᓅᑕᐅᓂᐊᖅᑎᓪᓗᒋᑦ, ᓄᓇᕗᒻᒥᐅᑦ ᐱᔪᓐᓇᕐᓂᖃᕐᓂᐊᖅᑐᑦ ᐊᒻᒪ ᐊᐅᓚᑦᑎᔨᐅᔪᓐᓇᕐᓗᑎᒃ ᐃᓱᒪᓕᐊᕆᔭᖏᓐᓂᒃ ᖃᓄᖅ ᓄᓇᖁᑎᕗᑦ, ᐃᒪᐃᑦ ᐊᒻᒪ ᐊᑐᒃᑲᓐᓂᕈᓐᓇᙱᑦᑐ ᐊᑐᖅᑕᐅᔪᓐᓇᖅᑐᑦ ᐊᑐᖅᑕᐅᔪᓐᓇᕐᓂᖏᓐᓂᒃ ᐊᒻᒪ ᐱᕙᓪᓕᐊᓂᕐᒥᒃ ᓄᓇᕗᑦ ᐃᓗᐊᓂ,” ᐅᖃᒃᑲᓐᓂᖅᑐᖅ.

ᑰᑦᑎᖅ ᐅᖃᓚᐅᕐᑐᖅ ᖁᕕᐊᒋᔭᖃᓗᐊᓚᐅᕐᓂᖓᓂᒃ ᓵᑉᑕ 9-ᒥᑦ ᐊᖏᕈᑎᓃᑦᑐᓂᒃ, ᐋᖅᑭᒃᓱᐃᒍᑎᐅᓂᐊᖅᖢᑎᒃ ᐱᓕᕆᐊᒃᓴᑦ ᓅᑕᐅᕌᓂᓚᐅᕐᑎᓪᓗᒋᑦ ᐃᖅᑲᓇᐃᔮᒃᓴᓕᕆᓂᖅ ᐊᒻᒪ ᐱᕙᓪᓕᐊᓂᕐᒧᑦ ᖃᓄᐃᓕᐅᕈᑎᒃᓴᑦ ᒪᓕᒃᓯᒪᓗᑎᒃ ᐋᑎᑯᓪ 23-ᒥᑦ ᐅᕙᓂ ᓄᓇᕗᑦ ᐊᖏᕈᑎᒥᑦ.

ᐋᑎᑯᓪ 23 ᓄᓇᕗᑦ ᐊᖏᕈᑎᒥ ᑐᑭᖃᖅᑎᑕᐅᓚᐅᕐᑐᖅ ᐃᖅᑲᓇᐃᔭᖅᑎᐅᔪᑦ ᑕᒪᐃᓐᓂ ᐱᖓᓲᓕᖓᔪᓂᒃ ᒐᕙᒪᓂ ᓄᓇᕗᒥ ᒪᓕᒃᓯᒪᓂᖃᕐᓗᑎᒃ ᐃᓄᐃᑦ ᐅᓄᕐᓂᖏᓐᓅᖓᔪᓂᒃ.

“ᓂᕆᐅᒃᐳᖓ ᐅᓇ ᒐᕙᒪᒃᑯᓐᓂᒃ ᐊᔭᐅᒃᑲᓐᓂᕈᑎᐅᓗᓂ ᐱᔭᕆᐊᖃᖅᑲᑕᖏᓐᓂᒃ ᐱᓕᕆᐊᖃᓕᕐᓗᑎᒃ ᐊᒻᒪ ᐊᑐᓕᖅᑎᑦᑎᓗᑎᒃ ᐋᑎᑯᓪ 23-ᒥ, ᑖᓐᓇᓗ ᐃᓄᖕᓄᑦ ᓂᕆᐅᒋᔭᐅᓯᒪᓪᓗᓂ ᑕᐃᒪᙵᑦ ᓄᓇᕗᑦ ᐱᒋᐊᓚᐅᕐᓯᒪᓂᖓᓂᒃ,” ᐅᖃᖅᑐᖅ ᐊᓗᑭ.

ᑖᓐᓇ ᓄᑖᖅ ᐊᑎᓕᐅᖅᑕᐅᓵᖅᑐᖅ ᐊᖏᕈᑎ, ᐃᓗᓕᖃᖅᖢᓂ 14 ᓴᑉᑕᓂᒃ, ᒪᓕᒐᖅᑎᒍᑦ ᐊᑐᓕᖅᑎᑕᐅᓕᕈᓐᓇᙱᑦᑐᖅ, ᑐᓴᒐᒃᓴᓕᐊᑎᒍᑦ ᐅᖃᐅᓯᐅᓯᒪᔪᖅ.

ᐊᕐᕌᒍᑦ ᑕᓪᓕᒪᓂᒃ ᐃᓱᖃᕐᕕᐅᔪᖅ ᐱᕕᖃᕈᑎᐅᓂᐊᕐᑐᖅ ᐋᔩᖃᑎᒌᖃᑦᑕᕐᓂᕐᒥᒃ ᑭᖑᓕᖅᐹᒥᑦ ᐊᖏᕈᑎᒥ, ᐊᔪᕈᓐᓃᖅᓴᖅᑎᑦᑎᓂᖅ ᐃᖅᑲᓇᐃᔮᒃᓴᓄᑦ ᓄᓇᕗᑦ ᒐᕙᒪᒃᑯᓐᓂ, ᐋᔩᖃᑎᖃᕐᓗᑎᒃ ᐊᑐᓕᖅᑎᑦᑎᓂᕐᒧᑦ ᐋᕿᒃᑕᐅᓯᒪᔪᒃᓴᓂᒃ, ᐊᒻᒪᓗ ᑎᑎᕋᖅᑕᐅᕙᓪᓕᐊᓂᖓ ᒪᓕᒐᓕᕆᓂᒃᑯ ᐋᕿᒃᓯᒍᑎᐅᓂᐊᖅᑐᒥᑦ ᒪᓕᒐᓕᕆᓂᒃᑯᑦ ᓄᓇᕗᑦ ᒐᕙᒪᒃᑯᓐᓂᒃ ᑲᒪᒋᔭᖃᓕᖅᑎᑦᓂᕐᒥᒃ ᓄᓇᓂᒃ, ᐃᒪᕐᓂᒃ ᐊᒻᒪ ᐊᑐᒃᑲᓐᓂᕈᓐᓇᖅᑐᓂᒃ.

ᔫᑳᓐ ᓇᖕᒥᓂᖅ ᓄᓇᖏᓐᓂᒃ ᐊᒻᒪ ᐊᑐᒃᑲᓐᓂᕈᓐᓇᖅᑐᓂᒃ ᐊᐅᓚᑦᑎᓯᒪᓕᕐᐳᑦ ᐱᒋᐊᖅᖢᑎᒃ 2003-ᒥᑦ, ᐊᒻᒪ ᓄᓇᑦᓯᐊᖅ ᑲᒪᒋᔭᖃᖅᐸᓪᓕᐊᓂᒋ ᐱᒋᐊᓚᐅᕐᓯᒪᓪᓗᓂ 2014-ᒥᑦ.