ᓄᓇᕗᒥ ᐃᓕᓐᓂᐊᖅᑎᓄᑦ ᐃᑲᔫᑎᒃᓴᖅ ᓈᒻᒪᙱᓗᐊᖅᑐᖅ ᐆᒪᔾᔪᑎᒋᓇᓱᒃᖢᒍ, ᓄᓇᕗᑦ ᓯᓚᑖᓂ ᐃᓕᓐᓂᐊᖅᑎ ᐅᖃᖅᑐᖅ
ᓄᓇᕗᒥ ᐃᓕᓐᓂᐊᖅᑎᓄᑦ ᐃᑲᔫᑎᒃᓴᓕᕆᔨᒃᑯᑦ ᕿᒥᕐᕈᐊᓕᕐᑐᑦ ᐃᑲᔫᑎᒃᓴᓂᒃ, ᑖᓐᓇ ᐊᓯᙳᕐᓯᓚᙱᑦᑐᖅ ᐊᕐᕌᒍᑦ ᖁᓕᑦ ᐅᖓᑖᓂ
ᓄᓇᕗᑦ ᓯᕗᓂᒃᓴᕗᑦᒥ ᐃᓕᓐᓂᐊᖅᑎ ᓕᐋᓇ ᕗᐃᐊᓴᓐ ᐊᒻᒪ ᑏᓇ ᐳᕉᔅ ᐊᒻᒪ ᓄᓇᑦᓯᐊᕐᒥ ᐱᕙᓪᓕᐊᔪᑦ ᑐᓴᒐᒃᓴᓕᐅᕐᑎᖓ ᓴᐃᕋ ᕌᔾᔪᔅ ᐊᐱᕐᓱᖅᑐᑦ ᐅᕌᑉ ᑭᓕᕝᑦ, ᑐᑭᒧᐊᖅᑎᑦᑎᔨ ᐃᖅᑲᓇᐃᔮᒃᓴᓄᑦ ᐱᕙᓪᓕᐊᔪᓕᕆᓂᕐᒥᒃ ᓄᓇᕗᑦ ᐃᓄᓕᕆᔨᒃᑯᖏᓐᓂᒃ, ᑖᒃᑯᐊᓗ ᑲᒪᒋᔭᖃᖅᖢᑎᒃ ᓄᓇᕗᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᓂᒃ (FANS). (ᐊᔾᔨᓕᐅᕆᔨ ᑳᓚᓐ ᒥᐅᕋᓐ)
For an English version of this story, see Nunavut’s student funding isn’t enough to live on, out-of-territory students say
ᓄᓇᕗᒥᐅᑕᐅᓪᓗᓂ ᐃᓕᓐᓂᐊᕆᐊᒃᑲᓐᓂᕐᓯᒪᓪᓗᓂ ᑲᓇᑕᐅᑉ ᓂᒋᐊᓄᑦ ᐊᔪᕐᓇᕈᔪᓕᖃᑦᑕᕐᒪ ᐊᖑᒻᒪᑎᒐᓱᒃᖢᓂ ᐊᑐᕆᐊᖃᖅᑐᓄᑦ.
ᑎᓚᐃᓚ ᐊᒪᕈᐊᓕᒃ ᖃᐅᔨᒪᔪᖅ ᐊᒃᓱᕈᖃᑦᑕᕐᓂᕐᒥᒃ. ᒥᑦᑎᒪᑕᓕᖕᒥᐅᑕᕕᓂᐅᓪᓗᓂ, ᐊᒪᕈᐊᓕᒃ ᓯᕗᓪᓕᖅᐹᒥ ᐊᕐᕌᒍᒥ ᐃᓕᓐᓂᐊᕐᑎᐅᔪᖅ ᓄᓇᕗᑦ ᓯᕗᓂᒃᓴᕗᑦᒥ ᐋᑐᕚᒥ. ᐃᓄᑑᓪᓗᓂ ᐸᓂᖃᖅᖢᓂ ᒪᕐᕉᖕᓂ ᐊᕐᕌᒍᓕᖕᒥ.
ᐊᓯᖏᑦᑎᑐᑦ ᐃᓕᓐᓂᐊᕆᐊᖅᑐᓂᒃ, ᐊᒪᕈᐊᓕᒃ ᐃᑲᔫᓯᐊᓂᒃ ᑭᓯᐊᓂ ᑮᓇᐅᔭᖅᑖᖃᑦᑕᕐᒪ ᐅᕘᓇ ᓄᓇᕗᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᓄᑦ ᐱᓕᕆᐊᒃᑯ, ᐊᐅᓚᑕᐅᓪᓗᓂ ᓄᓇᕗᑦ ᒐᕙᒪᒃᑯ ᐃᓄᓕᕆᔨᒃᑯᖏᓐᓂᒃ.
ᑎᓚᐃᓚ ᐊᒪᕈᐊᓕᒃ, ᐃᓕᓐᓂᐊᓕᓵᖅᑐᖅ ᓯᕗᓪᓕᖅᐹᒥᑦ ᐊᕐᕌᒍᒥ ᓄᓇᕗᑦ ᓯᕗᓂᒃᓴᕗᑦᒥ ᐸᓂᖓᓗ ᐊᕐᕌᒍᓕ ᒪᕐᕉᖕᓂ ᐊᑏᓇ. (ᐊᔾᔨᙳᐊᖅ ᑎᓇ ᐳᕉᔅᒥ)
ᐊᒪᕈᐊᓕᒃ ᐱᑖᖃᑦᑕᖅᑐᖅ $1,600-ᓂ ᑕᕿᑕᒫᑦ ᐃᑲᔫᓯᐊᑎᒍᑦ. ᑭᓯᐊᓂᓕ ᐊᑭᓕᖅᓯᐊᓂᒃᑳᖓᑦ $750-ᓂ ᐃᒡᓗᒥ ᐊᑐᕐᓂᕐᒧᑦ, ᓂᕿᓄᑦ ᐊᒻᒪ ᐅᖄᓚᐅᑎᒧ, ᐅᖃᖅᑐᖅ ᓈᒻᒪᙱᓗᐊᖃᑦᑕᕐᓂᕋᖅᖢᓂᐅᒃ ᑕᕿᐅᑉ ᐃᓱᐊᓄᑦ.
“ᐊᑭᓕᖅᑕᐅᓚᐅᖅᑎᓪᓗᒍ ᓄᓇᕗᒥ ᐃᓕᓐᓂᐊᖅᑐᓄᑦ ᐃᑲᔫᓯᐊᓂ, ᐃᓚᓐᓂ ᑮᓇᐅᔭᖅᑖᕈᒪᕙᒃᖢᓂ,” ᐊᒪᕈᐊᓕᒃ ᐅᖃᖅᑐᖅ.
“ᐊᒃᓱᕈᕐᓇᖅᑐᖅᓯᐅᕈᓘᔭᓚᐅᕐᑐᖓ ᐃᓕᓐᓂᐊᕐᓇᖅ ᐱᒋᐊᕐᕕᖓᓂᒃ,” ᐅᖃᖅᑐᖅ. “ᐅᖄᓚᓪᓗᖓ ᓄᓇᕗᒥᑦ ᐃᓕᓐᓂᐊᖅᑎᓄᑦ ᐃᑲᔫᓯᐊᖅᑖᕐᕕᒃᒧᑦ ᑭᓯᐊᓂᓕ ᖁᕝᕙᕆᐊᕐᓯᔪᓐᓇᙱᓐᓂᕋᓚᐅᕐᑐᑦ ᑕᕿᒥ ᑮᓇᐅᔭᖅᑖᕆᕙᒃᑕᓐᓂ.”
ᖁᕕᐅᓱᒡᕕᒃ ᐊᓂᒍᕐᓯᒪᓕᕐᑎᓪᓗᒍ, ᐊᒪᕈᐊᓕᒃ ᑮᓇᐅᔭᖃᙱᓗᐊᒧᑦ ᓂᕿᑖᕈᓐᓇᐃᓪᓕᓚᐅᕐᑐᖅ.
ᔭᓄᐊᕆ ᐱᒋᐊᓕᕐᑎᓪᓗᒍ, ᐊᒪᕈᐊᓕᒃ ᕙᐃᔅᐳᒃᑯ ᑎᑎᕋᓚᐅᕐᓯᒪᔪᖅ ᐃᓚᖏᓐᓄᑦ ᐱᖃᓐᓇᖏᓐᓄᓪᓗ ᐃᑲᔪᕐᑕᐅᔪᒪᓪᓗᓂ ᖁᐃᖏᓕᓴᕐᑖᕐᓂᐊᕐᒪ ᐸᓂᖕᒥᓄ.
ᐊᕐᕌᒍᒧᑦ 2018/2019-ᒧ ᐃᓕᓐᓂᐊᕐᓇᒧ, ᓄᓇᕗᒥ ᐃᓕᓐᓂᐊᖅᑎᓄᑦ ᐃᑲᔫᑎᒃᓴᑦ ᓄᓇᕗᒥᑦ ᓄᓇᓕᖕᓂ ᐃᓕᓐᓂᐊᕈᑎᒃᓴᓄᑦ ᐃᑲᔫᑎᒃᓴᓂᒃ ᑐᒃᓯᕋᕐᕕᐅᓯᒪᓚᐅᕐᑐᑦ ᑭᓯᐊᓂ ᐊᐅᓱᐃᑦᑐᕐᒥ.
ᒫᓃᒻᒪᑕ 480-ᖏᓐᓂ ᓄᓇᕗᒻᒥᐅᑦ ᐃᓕᓐᓂᐊᖅᑎᑦ ᐊᑐᕐᓂᐊᖅᑐᑦ ᓄᓇᕗᒥ ᐃᓕᓐᓂᐊᖅᑎᓄᑦ ᐃᑲᔫᑎᓂᒃ $7-ᒥᓕᐊᓐ ᑖᓚᓂᒃ ᐊᕐᕌᒍᒥ ᐊᐅᓚᔾᔪᑎᒃᓴᖏᓐᓂᒃ.
ᓄᓇᕗᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᑦ FANS ᖃᓄᐃᓕᐅᕈᑎᖏᓐᓄᑦ 2018/19 ᓇᓗᓇᐃᔭᕐᑕᐅᓯᒪᓂᖏᑦ. (ᑲᑎᕐᓱᒐᐃᑦ ᐅᑯᓇᙵᑦ FANS)
ᐱᒋᐊᕐᑎᓪᓗᒍ ᐄᐳᕈᓪ 2019-ᒥ, 47-ᓂ ᓄᓇᕗᑦ ᓯᕗᓂᒃᓴᕗᑦᒧ ᐃᓕᓐᓂᐊᕐᑐᓂᒃ, ᓄᓇᕗᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᑦ ᑮᓇᐅᔭᓂᒃ $850,000 ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᖅᑎᖏᓐᓄᑦ ᐃᑲᔫᓯᐊᖅᑖᖅᑎᑦᑎᓂᐊᕐᑐᑦ ᑕᒪᑐᒪᓂ ᐊᕐᕌᒍᒥ.
ᓄᓇᕗᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᑦ ᐃᓕᓐᓂᐊᕈᑎᓄᒃ ᐃᑲᔪᕈᑎᐅᕙᒃᑐᖅ $6,855 ᑎᑭᖢᒍ ᐊᕐᕌᒍᒥ, ᒪᓕᒃᖢᑎᒃ ᖃᐅᑕᒫᑦ ᐊᑐᕆᐊᓕᖕᓄᑦ $1,092-ᓂ ᑎᑭᑦᑐᓂᒃ. ᒪᓂᒻᒪᐃᓯᒪᒋᓪᓗᑎᒃ $2,600 ᑕᕿᒧᑦ ᐃᓕᓐᓂᐊᖅᑐᓄᑦ ᐸᖅᑭᔭᖃᖅᑐᓄᑦ ᐊᓯᖏᓐᓂᒡᓘᓐᓃᑦ ᑲᒪᒋᔭᐅᔭᕆᐊᖃᕐᓂᒃᑯᑦ.
ᐃᓕᓐᓂᐊᖅᑏᑦ ᐃᓄᑑᔪ ᐅᖃᕐᒥᔪᑦ ᓈᒻᒪᙱᓗᐊᖃᑦᑕᕐᓂᖓᓂᒃ ᖃᐅᑕᒫᓐ ᐊᑐᕆᐊᓕᖕᓄ ᑕᕿᒧᑦ, ᒪᑯᓄᖓᓗᐊᖅ ᑮᓇᐅᔭᖃᕐᓇᙱᖢᓂ ᐅᓐᓄᒃᓯᐅᕈᒪᓗᓂ ᓂᕆᓂᐊᕈᒪᓘᓐᓃᑦ ᓂᕆᕝᕕᒃᒥ.
ᐊᒥᓱᑦ ᐃᓕᓐᓂᐊᒃᑲᓐᓂᕆᐊᕐᓯᒪᔪᑦ ᓄᓇᕗᒥ ᓅᓯᒪᔪᑦ ᓄᓇᓕᐸᐅᔭᓄᑦ ᖃᓪᓗᓈᓂ ᐃᓕᓐᓂᐊᒃᑲᓐᓂᕈᒪᓂᕐᒧᑦ, ᑭᓯᐊᓂᓕ ᑮᓇᐅᔭᖃᙱᓗᐊᖃᑦᑕᕐᓂᕋᖅᑐᑦ ᐅᐸᓕᒪᙱᑕᒥᓂ ᖁᕕᐊᓲᑎᖃᒻᒪᕆᒋᐊᒃᓴᖅ.
ᐃᓚᖓᒍᓪᓕ, ᐃᓕᓐᓂᐊᕐᑎᐅᔪᑦ ᐃᖅᑲᓇᐃᔮᖃᑲᐃᓐᓇᕈᓐᓇᖅᑎᑕᐅᔪᑦ ᑮᓇᐅᔭᖃᕐᓂᕐᓴᐅᔪᓐᓇᕐᓂᐊᕐᒪᑕ, ᑭᓯᐊᓂᓕ $900 ᐅᖓᑖᓅᙵᙱᓪᓗᓂ ᑕᖅᑭᒧᑦ ᐃᑲᔫᓯᐊᖅᑖᕈᓐᓇᐃᓐᓇᕐᓂᐊᕐᒪᑕ.
ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᖅᑎᑕᖏᓐᓂᒃ ᐃᖅᑲᓇᐃᔭᖃᑦᑕᖁᔨᙱᑦᑐᑦ, ᓲᖃᐃᒻᒪ ᐃᓕᓐᓂᐊᖅᑕᒥᖕᓂ ᑲᒪᒋᔭᖃᕐᓂᕐᓴᐅᔪᓐᓇᕐᓂᐊᕐᒪᑕ ᐊᒻᒪᓗ ᐃᓕᖁᓯᓕᕆᓂᕐᒧᑦ ᐃᓕᓐᓂᐊᒐᒃᓴᑎᒍᑦ.
ᓄᓇᕗᒥ ᐃᓕᓐᓂᐊᖅᑎᓄᑦ ᐃᑲᔫᓯᐊᑦ ᐊᐅᓚᑦᑎᔨᖏᑦ ᖃᐅᔨᒪᓂᕋᖅᑐᑦ ᖃᐅᑕᒫᓐ ᐊᑐᕆᐊᓕᖕᓄᑦ ᐃᑲᔫᑎᑦ ᐊᖏᒡᓕᒋᐊᕐᓯᒪᙱᓐᓂᖏᓐᓂᒃ ᐊᕐᕌᒍᓪᓗᐊᓂ ᖁᓕᓂᒃ, ᐊᒻᒪᓗ ᐊᖑᒻᒪᑎᔪᓐᓇᙱᖢᑎᒃ ᖃᐅᑕᒫᓐ ᐊᑐᕆᐊᓕᖕᓄᑦ ᑕᒪᐃᓐᓂᐸᓗᒃ ᑲᓇᑕᐅᑉ ᓄᓇᓕᐸᐅᔭᖏᓐᓂᒃ ᓄᓇᕗᒥᐅᑕᑦ ᐃᓕᓐᓂᐊᖅᑎᐅᔪᑦ ᐅᐸᒃᑕᖏᓐᓂ ᐃᓕᓐᓂᐊᕆᐊᖅᖢᑎᒃ.
ᑎᓇ ᐳᕉᔅ ᐃᓕᓐᓂᐊᓕᓵᕐᑐᖅ ᓄᓇᕗᑦ ᓯᕗᓂᒃᓴᕗᑦᒥ. (ᑐᓂᓯᔪᖅ ᐊᔾᔨᙳᐊᒥ)
ᑭᓯᐊᓂᓕ ᑕᒪᓐᓇ ᐊᓯᙳᖅᑎᑕᐅᓵᓕᑐᐃᓐᓇᕆᐊᓕᒃ.
ᐅᕌᑉ ᑭᓕᕝᑦ, ᑐᑭᒧᐊᖅᑎᑦᑎᔨ ᐃᖅᑲᓇᐃᔮᒃᓴᓄᑦ ᐱᕙᓪᓕᐊᔪᓕᕆᓂᕐᒥᒃ ᓄᓇᕗᑦ ᐃᓄᓕᕆᔨᒃᑯᖏᓐᓂᒃ, ᑖᒃᑯᐊ ᑲᒪᔨᐅᓪᓗᑎᒃ ᐃᑲᔫᓯᐊᓕᕆᓂᕐᒥᒃ, ᐅᖃᓚᐅᕐᑐᖅ ᐱᓕᕆᐊᖑᔪᖅ ᒫᓐᓇ ᕿᒥᕐᕈᐊᖅᑕᐅᓂᖓᓂᒃ.
“ᖃᐅᔨᒪᔪᐃᓐᓇᐅᔪᒍᑦ ᑖᓐᓇ ᐱᐅᓯᕚᓪᓕᕆᐊᖃᕐᓂᖓᓂ,” ᐅᖃᖅᑐᖅ ᑭᓕᕝᑦ.
“ᐃᓕᓐᓂᐊᖅᑐᓂᒃ ᐃᓕᓐᓂᐊᖅᑕᖏᓐᓂᒃ ᑲᒪᒋᔭᖃᑦᑎᐊᖁᒍᔅᓯᐅᒃ, ᓈᒻᒪᒃᑐᓂ ᑮᓇᐅᔭᓂ ᑐᓂᔭᐅᔭᕆᐊᖃᕐᒪᑕ, ᐃᓱᒫᓘᑎᖃᔾᔮᙱᒻᒪᑕ ᐃᒡᓗᒧ ᐊᑭᓕᐅᑎᒃᓴᓂᒃ ᐊᒻᒪ ᓂᕆᔭᒃᓴᓂᒃ ᐊᒻᒪ ᐊᓯᖏᓐᓂᒃ,” ᐅᖃᖅᑐᖅ.
ᐃᓄᓕᕆᔨᒃᑯᑦ ᐋᕿᒃᓱᐃᕙᓪᓕᐊᔪᑦ ᐱᓕᕆᐊᒧᑦ ᖃᓄᐃᓕᐅᕈᑎᒃᓴᓂᒃ ᐊᒻᒪᓗ ᐃᓱᒪᓕᐅᕆᓂᐊᖅᖢᑎᒃ ᒪᓕᒐᓕᕆᕝᕕᒃᒥᑦ ᐊᐅᔭᖅ—ᐃᓚᖓᓪᓗ ᐱᔾᔪᑎᖃᕐᓂᐊᖅᑐᖅ ᐃᓕᓐᓂᐊᖅᑏᑦ ᑕᖅᑭᒧᑦ ᐃᑲᔫᓯᐊᖅᑖᕆᕙᒃᑕᖏ.
“ᐊᒃᓱᕈᕐᓇᕐᓂᖅᐹᖑᖃᑦᑕᕐᑐᕐᓕ ᐃᑲᔪᕈᑎᒋᕙᒃᑕᕗᑦ ᐃᓕᓐᓂᐊᖅᑎᓄᑦ,” ᑭᓕᕝᑦ ᐅᖃᖅᑐᖅ. “ᓈᒻᒪᙱᒻᒪᓐ ᐃᓱᒪᓗᓂ ᐃᓕᓐᓂᐊᖅᑎᐅᔪᑦ ᓄᓇᕗᒥᙶᖅᑐᑦ ᐊᓯᒃᑲᓐᓂᖏᓐᓂᒃ ᐃᑲᔫᑎᖃᕋᔭᕆᐊᒃᓴᖏᓐᓂᒃ ᐅᑯᑎᑐᓇᖅ ᖃᓪᓗᓈᓂ ᐃᓕᓐᓂᐊᖅᑎᓂᒃ. ᑕᐃᒪᓐᓇᐃᙱᒻᒪᕆᖕᒪᓐ.”
ᑖᓐᓇ ᐊᖏᖅᑕᐅᒍᓂ, ᑭᓕᕝᑦ ᓂᕆᐅᒃᑐᖅ ᐊᖏᒡᓕᒋᐊᕐᓂᐅᔪᖅ ᐃᑲᔫᑎᒃᓴᓂ ᐋᕿᒃᑕᐅᓯᒪᓕᕐᓂᐊᕐᓗᑎᒃ ᓯᑎᐱᕆ 2020-ᒧ.
“ᐅᓇᓕ ᐱᓕᕆᓂᐅᖕᒪᑦ ᐊᔪᕈᓐᓃᕐᓯᒪᓪᓚᕆᒃᑐᓂᒃ ᐃᖅᓇᐃᔭᖅᑎᖃᓕᕈᓐᓇᕐᓂᕐᒧᑦ,” ᐅᖃᖅᑐᖅ. “ᑭᓯᐊᓂᓕ ᑖᓐᓇ ᐃᓱᒪᒋᔭᐅᕙᓗᐊᙱᒻᒪ ᐃᒪᓐᓇ, ‘ᐅᓇᓕ ᓄᓇᕗᒥ ᐱᓕᕆᐊᒧᑦ ᐃᓚᒋᔭᐅᒻᒪᕆᒃᑐᖅ.’”
ᐅᓇ ᐅᓂᒃᑳᖅ ᓄᓇᕗᑦ ᓯᕗᓂᒃᓴᕗᑦ ᐃᓱᒪᒋᔭᖏᓐᓂᙶᙱᑦᑐᖅ.
(0) Comments