ᕌᒡᓚᓐ ᐅᔭᕋᖕᓂᐊᕐᕕᖓ ᓴᖅᑭᑎᑦᑎᒃᑲᓐᓂᓕᖅᐳᑦ ᓴᕕᕋᔭᒃᓴᓂ ᐃᖅᑲᓇᐃᔭᕈᒪᙱᓐᓂᐅᔪᒥ ᑲᒧᓰᓐᓇᖅᑎᓪᓗᒍ

For English version, see Raglan Mine starts producing ore again as strike enters 4th week

ᐃᓚᖏᑦ ᐅᔭᕋᖕᓂᐊᓂᕐᒧᑦ ᐊᐅᓚᑕᐅᓂᐅᔪᑦ ᐅᑎᓚᐅᖅᐳᑦ ᕌᒡᓚᓐ ᐅᔭᕋᖕᓂᐊᕐᕕᖓᓂ ᓄᓇᕕᖕᒥ ᔫᓂ 17−ᒥ ᐃᖅᑲᓇᐃᔭᕐᓂᕐᒧᑦ ᓈᒻᒪᒋᔭᐅᙱᓐᓂᐅᔪᒥ ᔫᓂᐊᓐᓃᑦᑐᓂ ᐃᖅᑲᓇᐃᔭᖅᑎᐅᔪᓂ ᐊᒻᒪ Glencore Group−ᒥ, ᓇᖕᒥᓂᖃᖅᑐᒥ ᐅᔭᕋᖕᓂᐊᕐᕕᖕᒥ, ᑲᔪᓰᓐᓇᖅᐳᖅ, ᑲᒻᐸᓂ ᐅᖃᖅᐳᖅ.

ᐱᓕᕆᓂᖅ ᕌᒡᓚᓐ ᐅᔭᕋᖕᓂᐊᕐᕕᖓᓂ ᓄᖅᑲᓚᐅᖅᐳᖅ ᒪᐃ 27−ᒥ 630−ᓂ ᑲᑎᙵᓂᐅᔪᓂ ᓴᕕᕋᔭᓕᕆᔨᐅᔪᓂ ᐃᓚᒋᔭᐅᔪᓂ ᐃᖅᑲᓇᐃᔭᕈᒪᙱᓐᓂᐅᔪᒧᐊᖅᑎᓪᓗᒋᑦ. ᔫᓂᐊᓐᑯᑦ ᐊᒻᒪ ᑲᒻᐸᓂᐅᔪᖅ ᐋᔩᖃᑎᒌᒃᓯᒪᓇᓱᐊᖅᐳᑦ ᓄᑖᒥ ᐃᖅᑲᓇᐃᔭᖅᑎᓄᑦ ᐊᖏᕈᑕᐅᓯᒪᔪᒥᑦ ᑕᐃᒪᙵᓂ ᒫᔾᔨᐅᑉ ᓄᙳᐊᓂ.

ᐅᓪᓗᓂ ᒪᓕᒃᑐᓂ ᐃᖅᑲᓇᐃᔭᕈᒪᙱᓐᓂᐅᔪᒥ, ᔫᓂᐊᓐᒦᖃᑕᐅᔪᓂ ᐃᖅᑲᓇᐃᔭᖅᑎᓂ ᖃᖓᑕᓲᒃᑰᖅᑎᑕᐅᓚᐅᖅᐳᑦ ᐅᔭᕋᖕᓂᐊᕐᕕᖕᒥ ᐊᒻᒪ ᓴᖅᑭᑎᑦᑎᓂᐅᔪᒥ ᓄᖅᑲᓚᐅᖅᐳᖅ. ᐅᓄᕐᓂᖅᓴᐅᔪᓂ 200 ᔫᓂᐊᓐᒦᙱᑦᑐᓂ ᐃᖅᑲᓇᐃᔭᖅᑎᓂ ᐊᒻᒪ ᑳᓐᑐᕌᒃᑎᐅᔪᓂ ᐃᓂᒋᔭᒥᓃᖏᓐᓇᓚᐅᖅᐳᑦ.

ᕌᒡᓚᓐ ᐅᔭᕋᖕᓂᐊᕐᕕᖓ, ᐃᓂᖃᖅᑐᒥ ᐅᐊᖕᓇᒥ ᑲᓇᖕᓇᕐᒥ ᐅᖓᕙ ᑲᖏᖅᑐᖓᓂ, ᑯᐸᐃᒃ ᐊᖏᓛᖑᔪᒥ ᓴᕕᕋᔭᒃᓴᒥ ᓂᑯᓪᒥ ᓴᖅᑭᑎᑦᑎᔨᐅᕗᑦ, ᐲᖅᓯᕙᒃᖢᑎᒃ 1.5 ᒥᓕᐊᓐ ᑕᓐᓂ ᓴᕕᕋᔭᒃᓴᒥ ᐊᕐᕌᒍᒥ. ᓴᖅᑭᑎᑦᑎᓲᖑᕗᑦ 40,000 ᑲᓐᐸᓗᖕᓂ ᓴᕕᕋᔭᒃᓴᒥ ᓂᑯᓪᒥ-ᑲᑎᙵᓂᐅᔪᒥ ᐊᕐᕌᒍᑕᒫᒥ. ᓴᖅᑭᑎᑦᑎᓲᖑᒋᕗᖅ ᒥᑭᓐᓂᖅᓴᐅᔪᓂ ᑲᓐᓄᔭᕐᒥ ᐊᒻᒪ ᑰᐴᓪᑦᒥ. ᐅᔭᕋᖕᓂᐊᕐᕕᒃ ᓄᓇᕕᐅᑉ ᐊᖏᓛᖓᓂ ᐃᖅᑲᓇᐃᔭᖅᑎᖁᑎᒋᕙᖓ, 1,200−ᓂ ᐅᑎᖅᑕᖅᑐᓂ ᐃᖅᑲᓇᐃᔭᖅᑎᖁᑎᐅᔪᓂ.

ᓴᓇᔨᐅᔪᑦ ᐅᔭᕋᖕᓂᐊᕐᕕᖕᒥ ᓴᖅᑭᑎᑦᑎᓂᐊᖅᐳᑦ ᓴᕕᕋᔭᒃᓴᒥ, ᑭᓯᐊᓂ ᐊᑦᑎᖕᓂᖅᓴᐅᔪᒥ ᓴᖅᑭᑎᑦᑎᓂᐅᔪᒥ, ᐅᖃᓚᐅᖅᐳᖅ ᐊᒦᓕ ᕉᓘ, ᑐᑭᒧᐊᒃᑎᑦᑎᔨ ᐃᓄᓕᒫᓄᑦ ᐱᓕᕆᓂᐅᔪᓂ. ᑐᕌᒐᒃᓴᖓ ᑲᑎᖅᓱᖅᑕᐅᕙᓪᓕᐊᔪᒥ ᓴᕕᕋᔭᒃᓴᓂ ᐸᕐᓇᒃᓯᒪᓂᖓᓂ ᐱᓕᕆᐊᖑᔭᐅᓂᐊᕐᓂᖓᓂ ᐅᔭᕋᖕᓂᐊᕐᕕᒃ ᐅᑎᕈᓂ ᐊᐅᓚᑕᐅᓂᐅᒐᔪᒃᑐᓄᑦ ᐊᒻᒪᓗ ᑳᓐᑐᕌᒃᑎᐅᔪᓂ ᐃᖅᑲᓇᐃᔭᐃᓐᓇᕐᓗᑎᒃ ᐃᖅᑲᓇᐃᔭᕈᒪᙱᓐᓂᐅᔪᒥ, ᐅᖃᓚᐅᖅᐳᖅ.

Glencore ᐃᓇᖏᖅᓯᔾᔮᙱᓚᑦ ᐃᖅᑲᓇᐃᔭᕈᒪᙱᓐᓂᐅᔪᓂ ᔫᓂᐊᓐᒦᑦᑐᓂ ᐃᖅᑲᓇᐃᔭᖅᑎᐅᔪᓂ, ᕉᓘ ᐅᖃᓚᐅᖅᐳᖅ.

“ᐱᒋᐊᒃᑲᓐᓂᓕᖅᐳᒍᑦ ᐃᓚᖓᓐᓂ ᖃᓄᐃᓕᐅᕐᓂᐅᔪᓂ ᐱᓕᕆᐊᖑᓚᐅᖅᑐᓂ ᔫᓂᐊᓐᑯᓐᓂ ᑭᓯᐊᓂ ᒪᓕᒐᑎᒍᑦ ᑭᒡᓕᐅᔪᓂ ᐱᔪᓐᓇᕐᓂᑦᑎᓐᓂ,” ᐅᖃᓚᐅᖅᐳᖅ.

ᐅᓂᒃᑳᕆᓂᖓ ᐅᑎᕐᓂᐊᕐᓂᕐᒥ ᐅᖃᐅᓯᐅᓚᐅᖅᐳᑦ ᕌᒡᓚᓐ ᐃᖅᑲᓇᐃᔭᖅᑎᓄᑦ ᔫᓂ 16−ᒥ. ᑕᐃᒃᑯᐊ ᑲᑎᒪᓂᖃᖅᑎᓪᓗᒍ, 80−ᐸᓗᖕᓂ ᔫᓂᐊᓐᒦᖃᑕᐅᔪᓂ ᐃᖅᑲᓇᐃᔭᖅᑎᓂ ᓈᒻᒪᒃᓴᙱᓐᓂᖓᓂ ᑕᑯᒃᓴᐅᑎᑦᑎᕗᑦ Rouyn-Noranda, ᑯᐸᐃᖕᒥ, ᐊᑕᐅᓯᕐᒥ ᒥᑦᑕᕐᕕᐅᔪᓂ ᐊᑐᖅᑕᐅᕙᒃᑐᓂ ᐹᒡᓚᓐ ᓴᓇᔨᐅᔪᓄᑦ.

ᓴᐃᒪᓐ ᒐᐃ, ᐅᔭᕋᖕᓂᐊᕐᕕᖕᒥ ᓴᓇᔨᐅᔪᖅ ᐊᒻᒪ ᐃᓚᒋᔭᐅᓪᓗᓂ ᔫᓂᐊᓐᑯᑦ ᐋᔩᖃᑎᒌᖕᓂᕐᒥ ᑲᑎᒪᔨᕋᓛᖑᔪᓂ, ᐅᖃᓚᐅᖅᐳᖅ ᔫᓂᐊᓐ ᐊᒻᒪ Glencore ᐊᖏᖃᑎᒌᒃᓯᒪᕗᑦ ᐱᔪᓐᓴᖅᑎᑦᑎᓂᕐᒥ ᔫᓂᐊᓐᒥ ᑭᒡᒐᖅᑐᐃᔨᐅᔪᒥ ᖃᐅᔨᓴᕐᓂᕐᒧᑦ ᐊᒻᒪ ᓇᓗᓇᐃᖅᓯᓂᕐᒥ ᐅᑎᖅᑐᒥ ᐱᓕᕆᓂᐅᔪᒥ ᐱᓕᕆᐊᖑᓂᖏᓐᓂ ᐊᑦᑕᓇᙱᑦᑐᒥ ᐊᒻᒪ ᓈᒻᒪᒃᑐᒥ.

“ᐃᓱᒫᓗᕐᔪᐊᖅᐳᒍᑦ, ᒥᑭᓛᖑᔪᒥ ᐅᖃᕐᓂᕐᒧᑦ, ᖃᓄᐃᑦᑐᓂ ᐱᓕᕆᓂᐅᔪᓂ ᐱᓕᕆᐊᖑᓂᖏᓐᓂ ᐅᔭᕋᖕᓂᐊᕐᕕᖕᒥ ᐃᓂᒋᔭᖓᓂ ᐊᒻᒪ ᑭᒃᑯᓐᓄᑦ,” ᐅᖃᓚᐅᖅᐳᖅ.

ᖄᖏᖅᓯᒪᓕᖅᑐᓂ ᖃᔅᓯᐊᕐᔪᖕᓂ ᐱᓇᓱᐊᕈᓯᐅᔪᓂ, ᑕᒪᒃᑭᑦ ᑲᑎᒪᖃᑎᖃᖅᐳᑦ ᐃᒻᒥᒃᑰᖅᖢᑎᒃ ᐋᔩᖃᑎᒌᒃᑎᐅᔪᒥ ᑯᐸᐃᑦ ᒥᓂᔅᑕᖃᕐᕕᖓᓂ ᐃᖅᑲᓇᐃᔭᕐᓂᐅᔪᒥ, ᑭᓯᐊᓂ ᐋᔩᖃᑎᒌᖕᓂᑦ ᓱᓕ ᐃᖏᕐᕋᓂᖃᙱᓚᖅ.

ᕉᓘ ᐅᖃᓚᐅᖅᐳᖅ ᐃᓚᒋᔭᐅᓂᖓᓂ Glencore−ᑯᑦ ᐊᑐᐃᓐᓇᖃᕐᕕᒋᔭᖓᓂ, ᕌᒡᓚᓐᒥ ᔫᓂᐊᓐᒦᓐᓂᐅᔪᓂ ᐃᖅᑲᓇᐃᔭᖅᑎᖏᑦ ᑮᓴᐅᔾᔭᒃᓴᓂᖅᓴᐅᓇᔭᖅᐳᑦ ᐃᓚᖏᓐᓂ ᐊᓯᖏᓐᓂ ᐅᔭᕋᖕᓂᐊᕐᕕᐅᒧᓂ ᑲᓇᑕᒥ.

ᒐᐃᒧᑦ, ᑮᓴᐅᔾᔭᒃᓴᓂᑐᐊᖑᙱᓚᖅ. ᐅᖃᓚᐅᖅᐳᖅ ᔫᓂᐊᓐ ᐱᔪᒪᕗᑦ ᑐᑭᓯᓇᕐᓂᖅᓴᐅᔪᓂ ᑐᑭᓕᐊᖑᔪᒥ ᐅᓪᓗᕈᒻᒥᑕᒥ ᕿᑲᕐᓂᐅᔪᓂ, ᐱᐅᓯᒋᐊᖅᑐᒥ ᐱᓕᕆᓂᕐᓄᑦ ᐊᒻᒪ ᑐᔪᕐᒥᕕᐅᔪᓂ ᖃᓄᐃᓐᓂᐅᔪᓂ, ᐊᒻᒪ ᐱᐅᓂᖅᓴᒥ ᓄᖅᑲᕐᓂᕐᒧᑦ ᐊᒻᒪ ᕿᑲᕐᓂᕐᒧᑦ ᐱᕚᓪᓕᕈᑕᐅᔪᓂ.

“ᐃᒃᐱᒍᓱᒃᐳᒍᑦ ᐃᖅᑲᓇᐃᔭᖅᑎᖁᑎᓕᒃ ᐃᒃᐱᒍᓱᑦᑎᐊᕐᓂᖃᙱᓐᓂᖓᓂ ᐃᖅᑲᓇᐃᔭᖅᑎᓄᑦ ᓴᒃᑯᐃᑦᑎᓂᖏᓐᓂ ᑭᓱᑐᐃᓐᓴᓂ ᐆᒥᖓ ᐊᖏᕐᔪᐊᖅᑐᒥ ᑲᒻᐸᓂᐅᔪᒥ ᖃᑭᓂᖃᕐᓂᖓᓂ,” ᐅᖃᓚᐅᖅᐳᖅ.

ᑕᒪᒃᑭᑦ ᔫᓂᐊᓐ ᐊᒻᒪ ᑲᒻᐸᓂᐅᔪᖅ ᐅᖃᐅᓯᖃᖅᓯᒪᕗᑦ ᐱᔪᒪᓂᖏᓐᓂ ᐅᑎᕐᓂᕐᒧᑦ ᐋᔩᖃᑎᒌᖕᓂᐅᔪᒧᑦ ᑭᐳᒧᑦ, ᐃᓱᒪᒋᓇᒍ ᐸᓯᒃᖠᕐᓂᐅᔪᓂ ᓄᖅᑲᖓᑎᑦᑎᓂᐅᔪᒥ ᐅᕙᙶᖅᑐᓂ ᑕᒪᒃᑭᓂ ᐱᓕᕆᔪᓄᑦ.

ᕉᓘ ᐅᖃᓚᐅᖅᐳᖅ ᓂᕆᐅᖕᓂᖃᖅᐳᖅ ᑕᑯᓂᐊᕐᓂᕐᒥ ᓯᕗᓪᓕᐅᔪᓂ ᓴᓇᔨᐅᔪᓂ ᐃᖅᑲᓇᐃᔭᕈᒪᙱᓐᓂᐅᔪᒥ ᐊᕐᕌᒍᓄᑦ− 27-ᓄᑦ ᐊᑐᖅᑕᐅᓯᒪᔪᓂ ᕌᒡᓚᓐ ᐅᔭᕋᖕᓂᐊᕐᕕᖓᓂ ᐃᓱᓕᓐᓂᖓᓂ ᕿᓚᒻᒥᐅᔪᒥ.

ᐊᔪᕐᓇᖅᐳᖅ ᑕᑯᓂᕐᒥ … ᐅᐱᒋᔭᖃᕐᓂᕐᒥᐅᙱᑦᑐᖅ ᕌᒡᓚᓐ ᑭᓲᓂᖓᓂ, ᑐᑭᖃᙱᑐᐃᓐᓇᖅᐳᖅ,” ᐅᖃᓚᐅᖅᐳᖅ.