ᑎᓴᒪᓂ ᐱᔪᒪᓂᖃᖅᑐᓂ ᐱᓇᓱᐊᖅᐳᑦ ᒪᐃᔭᐅᓂᕐᒥ ᓴᓪᓕᓂᑦ ᓂᕈᐊᕐᕕᒻᒪᕆᒃ ᐊᓂᒍᖅᓯᒪᑎᓪᓗᒍ ᓂᕈᐊᖅᑎᑦᑎᒃᑲᓐᓂᕐᓂᖅ

For the English version of this story, please see Death in family spurred mayoral vacancy in Coral Harbour.

ᑎᓴᒪᓂ ᓂᕈᐊᒐᒃᓴᓂ ᐱᓇᓱᐊᖅᐳᑦ ᒪᐃᔭᙳᕋᓱᐊᕐᓂᕐᒥ ᓴᓪᓕᓂᑦ.

ᓂᕈᐊᕐᕕᒻᒪᕆᒃ ᐊᓂᒍᖅᓯᒪᑎᓪᓗᒍ ᓂᕈᐊᖅᑎᑦᑎᒃᑲᓐᓂᕐᓂᕐᒥ ᐅᖃᐅᓯᐅᓚᐅᖅᐳᖅ ᕕᕗᐊᕆᒥ ᒪᐃᔭᐅᓚᐅᖅᑐᖅ ᑯᐸᐱᒃ ᓂᖏᐅᑦᓯᐊᖅ, ᐊᓯᐊᓂ ᓂᕈᐊᒐᒃᓴᖃᒃᑲᓐᓂᙱᓐᓂᖓᓂ ᐃᓕᔭᐅᔪᒥ ᐃᓂᐅᔪᒧᑦ ᖃᒡᓯᐊᕐᔪᖕᓂ ᑕᖅᑭᐅᓚᐅᖅᑐᓂ ᐊᓂᒍᖅᑐᓂ, ᓄᖅᑲᓚᐅᖅᑎᓪᓗᒍ ᒪᐃᔭᐅᓂᕐᒥ.

ᐃᓱᓕᕝᕕᒃᓴᖓᓂ ᓂᕈᐊᒐᒃᓴᐅᔪᓄᑦ ᐃᓚᔭᐅᓂᕐᒧᑦ ᓂᕈᐊᕐᓂᐅᔪᒧᑦ ᒪᑐᓚᐅᖅᐳᖅ ᒫᔾᔨ 18−ᒥ. ᓄᓇᕗᒻᒥ ᓂᕈᐊᕐᓂᕐᒥ ᓴᖅᑭᑎᑦᑎᓚᐅᖅᐳᑦ ᑎᑎᕋᖅᓯᒪᓂᐅᔪᒥ ᓂᕈᐊᒐᒃᓴᐅᔪᓂ ᒫᔾᔨ 19−ᒥ ᓴᓪᓕᓄᑦ ᖃᕋᓴᐅᔭᒃᑯᑦ ᐳᓚᕋᐅᑎᒧᑦ (ᕙᐃᔅᐳᒃᒧᑦ) ᒪᒃᐱᒐᖓᓐᓂ.

ᑕᐃᒃᑯᐊ ᐃᓇᖏᖅᓯᓇᓱᐊᖅᑐᑦ ᐅᑯᐊᖑᕗᑦ ᐊᐃᑕᓐ ᓴᕕᐊᕐᔪᒃ, ᓚᓂ ᐃᒥᒃᑕᐅᑦ, ᐸᑎᖅ ᓇᑦᓱᕐ, ᐊᒻᒪ ᐅᐃᓕ ᓇᑯᓛᖅ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐊᑐᐃᓐᓇᖃᖅᑎᑦᑎᓚᐅᖅᐳᑦ ᐊᐱᖅᓱᖅᑕᐅᓂᐅᔪᓂ ᑕᒪᒃᑭᓄᑦ ᑎᓴᒪᓄᑦ ᓂᕈᐊᒐᒃᓴᐅᔪᓄᑦ ᑭᓯᐊᓂ ᓇᓕᐊᑐᐃᓐᓇᐃᑦ ᐊᑐᐃᓐᓇᕈᖅᑎᑦᑎᓚᐅᙱᓚᑦ ᐃᒻᒥᓂᒃ ᑐᓴᒐᒃᓴᓕᐊᑉ ᑎᑎᕋᖅᑕᐅᓯᒪᔭᕆᐊᖃᕐᓂᖓᓂ ᐃᓱᐊᓂ.

ᓂᕈᐊᕐᓂᖅ ᐋᖅᑭᒃᑕᐅᓯᒪᕗᖅ ᐊᐃᑉᕆᓕ 15−ᒥ ᓯᕗᕐᙵᒍᑦ ᓂᕈᐊᕐᓂᐅᔪᒥ ᐱᓕᕆᐊᖑᓗᓂ ᐊᐃᑉᕆᓕ 8−ᒥ 12 ᐅᓐᓄᓴᒃᑯᑦ 7 ᐅᓐᓄᒐᓱᐊᕐᓂᖓᓄᑦ ᓴᓪᓕᓂᑦ ᕼᐋᒻᓚᒃᑯᑦ ᑎᑎᕋᕐᕕᖓᓂ.

ᓇᑯᓛᖅ ᐱᔨᑦᑎᕋᓚᐅᖅᐳᖅ ᑲᑎᒪᔨᐅᓪᓗᓂ ᕼᐋᒻᓚᒃᑯᓐᓄᑦ ᑭᓯᐊᓂ ᓄᖅᑲᓚᐅᖅᐳᖅ ᒪᐃᔭᐅᓚᐅᑲᖕᓂᕐᒧᑦ. ᒪᐃᔭᐅᓚᐅᖅᓯᒪᒋᕗᖅ ᓴᓪᓕᓂᑦ 2014−ᒥ ᓂᕈᐊᕐᕕᒻᒪᕆᒃ ᐊᓂᒍᖅᓯᒪᑎᓪᓗᒍ ᓂᕈᐊᖅᑎᑦᑎᒃᑲᓐᓂᕐᓂᐅᔪᖃᓚᐅᖅᑎᓪᓗᒋᑦ ᑕᐃᔅᓱᒪᓂ ᐊᕐᕌᒎᔪᒥ.

ᓇᑦᓱᕐ ᒪᓕᒐᓕᐅᖅᑎᐅᓚᐅᖅᓯᒪᕗᖅ. ᐱᔨᑦᑎᕋᓚᐅᖅᐳᖅ 2017−ᒥ 2021−ᒧᑦ, ᓵᓚᓚᐅᖅᑎᓪᓗᒍ ᒫᓐᓇᐅᔪᒥ ᒪᓕᒐᓕᐅᖅᑎᒥ ᓵᓚᒪᓐ ᒪᓕᑭᒧᑦ. ᓇᑦᓱᕐ ᐲᖅᑕᐅᓚᐅᖅᐳᖅ ᒥᓂᔅᑕᐃᑦ ᑲᑎᒪᔨᖏᓐᓂ 2020−ᒥ ᐊᑲᕆᔭᐅᙱᓐᓂᐅᔪᒥ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᕐᒥ ᑎᑎᕋᓚᐅᖅᑎᓪᓗᒍ ᕿᕐᓂᖅᑕᐃᑦ ᐃᓅᓰᑦ ᐊᑑᑎᖃᖅᐳᑦ ᐱᓕᕆᓂᐅᔪᒥ ᐃᖏᕐᕋᓂᖓᓂ ᐊᒻᒪ ᓇᔾᔨᐊᖏᖅᑕᐅᓂᕐᒧᑦ.