ᐅᑭᐅᕐᑕᖅᑐᕐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᐅᓄᕐᓯᕚᓪᓕᖅᑎᑦᑎᓚᐅᕐᑐᑦ ᐅᒥᐊᖏᓐᓂᒃ ᓄᑖᒥ ᐅᒥᐊᖅᑖᖅᑎᓪᓗᒋᑦ ᐊᐃᔅᓚᓐᒥᓐ

ᐅᒥᐊᕐᔪᐊᖅ ᐃᖃᓗᒐᓱᒍᑎᐅᓂᐊᖅᑐᖅ ᓇᑖᕐᓇᓂᒃ ᓂᒃᓯᖃᐅᖅᑐᓂᒃ ᐱᓕᕆᔾᔪᑎᖃᕐᓗᑎᒃ

ᐅᓇ ‘ᐋᓇ’ ᐅᒥᐊᖅ ᐃᖃᓗᒐᓱᒍᑎ ᓂᐅᕕᖅᑕᐅᓵᓚᐅᕐᓯᒪᔪᖅ ᐅᑯᓇᙵᑦ ᐅᑭᐅᕐᑕᖅᑐᕐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᓄᑦ. ᑕᑭᓂᖃᕐᑐᖅ 52 ᒦᑕᓂᒃ ᐊᒻᒪᓗ 29-ᓂ ᐃᓄᖃᕈᓐᓇᖅᖢᓂ. (ᐊᔾᔨᙳᐊᖅ ᐅᑯᓇᙵᑦ ᐅᑭᐅᕐᑕᖅᑐᕐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᓂᒃ)

By ᒥᐅᕈᓪ ᔭᒫᓪ

For English version, see Arctic Fishery Alliance expands its fleet with new fishing boat from Iceland

ᐅᑭᐅᕐᑕᖅᑐᕐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᓄᑖᒥ ᐅᒥᐊᖅᑖᒃᑲᓐᓂᕐᒪᑕ ᐊᐃᔅᓚᓐᒥ.

ᑲᒻᐸᓂᐅᔪᑦ ᓂᐅᕕᓚᐅᕐᒪᑕ ᐅᒥᐊᕐᔪᐊᕐᒥ ᐊᐅᔭᐅᓕᓵᐸᓗᒃᑎᓪᓗᒍ.

ᐅᓇ ᐅᒥᐊᕐᔪᐊᖅ, ᐊᑎᖃᖅᑐᖅ ᐋᓇ, ᐊᑦᑎᖅᑕᐅᓂᐊᖅᑐᖅ ᐊᓯᐊᓂᒃ ᐆᒥᖓ ᑭᕕᐅᖅ 1 ᐊᒻᒪᓗ ᑲᑐᔾᔨᖃᑎᒌᑦ ᐅᒥᐊᖏᓐᓂᒃ ᐊᑐᖅᑕᐅᖃᑕᐅᓕᕐᓗᓂ ᐊᕐᕌᒍ. ᐅᑭᐅᕐᑕᖅᑐᕐᒥ ᐃᖃᓗᓕᕆᓂᕐᒧᑦ ᑲᑐᔾᔨᖃᑎᒌᑦ ᐊᐅᓚᑦᑎᔨᖓ ᕼᐃᐅᕆ ᐅᐊᓪ ᐅᖃᓚᐅᕐᑐᖅ ᑲᑐᔾᔨᖃᑎᒌᑦ “ᓂᕆᐅᑦᑎᐊᕐᒪᑕ” ᓄᑖᒥ ᐃᖃᓗᒐᓱᒍᑎᐅᓂᐊᖅᑐᒥᒃ.

ᐅᖃᓚᐅᕐᑐᖅ ᐅᓇ ᓯᕗᓪᓕᖅᐹᖅ ᑕᐃᒪᐃᑦᑐᖅ ᑲᓇᑕᒥ ᐃᖃᓗᒐᓱᒍᑎᐅᓂᐊᖅᖢᓂ ᓇᑖᕐᓇᓂ (Greenland halibut) ᐃᓛᓐᓂ ᖃᓕᕋᓕᐅᓂᕋᖅᑕᐅᕙᒃᑐᑦ (turbot), ᓂᒃᓯᖃᐅᖅᑐᓄᑦ ᐊᒃᖢᓈᑎᒍᑦ ᐃᖃᓗᒐᓱᖕᓂᒃᑯᑦ.

ᐅᓇ ᐅᒥᐊᖅ 40,000ᓂ ᓂᒃᓯᖕᓂ ᐊᑐᕈᓐᓇᖅᑐᖅ ᖃᐅᑕᒫᓐ ᐃᖃᓗᒐᓱᒃᑎᓪᓗᒋ ᖃᓄᐃᑦᑐᑐᐃᓐᓇᕐᓂᒃ ᐊᖏᓂᕐᓴᐅᓕᕐᓯᒪᔪᓂᒃ.

ᑲᑐᔾᔨᖃᑎᒌᑦ ᐃᒃᓯᕙᐅᑕᖓ, ᔭᐃᐱᑎ ᐊᕿᐊᕈᖅ, ᐅᖃᓚᐅᕐᑐᖅ ᐅᓇ ᓄᑖᖅ ᐱᓕᕆᔾᔪᑎ ᐃᖃᓗᒐᓱᖕᓂᕐᒥ ᓈᒻᒪᖕᓂᕐᓴᐅᓂᕋᖅᖢᓂᐅᒃ ᑖᒃᑯᐊ ᐊᕙᑎᖓᓃᑦᑐᓄᑦ.

ᐃᓱᒪᒋᔭᐅᖕᒪᑦ ᐃᖃᓗᒐᓱᖕᓂᕐᒧᑦ ᐱᐅᓂᕐᓴᐅᓂᖓᓂᒃ ᑕᐅᑐᒃᖢᒋᑦ ᒪᑦᑎᑦᑕᐅᑎᓂᒃ ᐊᑐᕐᓂᕐᒥᒃ ᒪᑯᓂᖓᓘᓐᓃᑦ ᐃᖅᑲᖓᒍᑦ ᐅᓂᐊᖅᑕᐅᕙᓪᓕᐊᕙᒃᑐᓂᒃ, ᑕᒪᒃᑯᐊᓗ ᐊᐅᔭᑦᑐᒥᒃ ᓴᓇᓯᒪᓪᓗᑎᒃ ᐊᒻᒪᓗ ᐊᑯᓂᐊᓗᒃ ᓄᖑᑐᐃᓐᓇᕋᔭᙱᖢᑎᒃ ᐅᖃᕐᑐᖅ ᐊᕿᐊᕈᖅ.

ᐊᒻᒪᓗ ᐃᖃᓗᒃᑕᐅᔪᑦ ᐱᐅᓂᕐᓴᐅᕙᒃᖢᑎᒃ.

“ᓂᒃᓰᑦ ᐱᐅᓂᕐᓴᓂᒃ ᐃᖃᓗᖕᓇᖅᑐᖅ ᓲᖃᐃᒻᒪ ᐊᑐᓂᒃ ᐃᖃᓗᒃᑕᐅᕙᓪᓕᐊᖕᒪᑕ,” ᐊᕿᐊᕈᖅ ᐅᖃᕐᑐᖅ.

ᐅᑯᓄᖓᓕ ᐅᐊᕐ ᐊᒻᒪ ᐊᕿᐊᕈᖅᒧ, ᐅᓇ ᓄᑖᖅ ᐅᒥᐊᖅ ᐱᕙᓪᓕᖅᑎᑦᑎᓂᐊᓕᕐᑐᖅ ᑲᑐᔾᔨᖃᑎᒌᑦ ᐃᖃᓗᒃᐸᓪᓕᐊᔭᖏᓐᓂᒃ.

ᒪᕐᕉᒃ ᐅᒥᐊᕐᔪᐊᒃ ᐊᑐᖅᑕᐅᖃᑦᑕᖅᑑᒃ ᑲᑐᔾᔨᖃᑎᒌᓄᑦ 30 ᒦᑕᓂ ᑕᑭᓂᖃᕐᒪᑎ ᐊᒻᒪᓗ 12-ᓂ ᐃᓄᖃᕈᓐᓇᖅᖢᑎᒃ ᓴᓇᔪᓂᒃ. ᐅᓇᓕ ‘ᐋᓇ’ 52 ᒦᑕᓂ ᑕᑭᓂᓕᒃ ᐊᒻᒪᓗ 29-ᓂ ᐃᓄᖃᕈᓐᓇᖅᖢᓂ ᓴᓇᔪᓂᒃ.

ᐱᑕᖃᕐᒥᔪᖅ 12-ᓂᒃ ᐃᒡᓗᕋᓛᓂᒃ ᒪᕐᕉᕐᓄᑦ ᓈᒻᒪᒃᑐᓂᒃ ᐊᒻᒪ ᑕᓪᓕᒪᓂᒃ ᐊᑕᐅᓯᕐᓯᐅᑎᓂᒃ ᐊᑐᓂ ᐊᓇᕐᕕᖃᖅᖢᑎᒃ ᐊᒻᒪ ᐅᕕᓂᖕᓂᐊᕐᕕᖃᖅᖢᑎᒃ.

ᐅᓇ ᑲᑐᔾᔨᖃᑎᒌᓂᒃ ᐃᖅᑲᓇᐃᔭᖅᑖᒃᑲᓐᓂᕈᑎᐅᓂᐊᕐᑐᖅ ᐃᓄᖕᓂ ᐃᖃᓗᒐᓱᒃᑎᓂᒃ ᐊᒻᒪᓗ ᐅᒥᐊᖏᓐᓂᒃ ᐊᐅᓚᑦᑎᔪᓐᓇᑦᑎᐊᕐᓗᑎ ᑕᐃᒪᙵᓕᒫᖅ ᐃᑲᕐᕋᓂᒃ 24-ᓂ ᐅᓪᓗᕐᒥ.

 

ᐅᐊᕐᒧᓪᓕ ᐅᓇ ᓄᑖᖅ ᐅᒥᐊᖅ ᓇᓗᓇᐃᒃᑯᑎᒻᒪᕆᖅ ᐃᖃᓇᐃᔭᕐᕕᖃᕐᓂᖅ “ᐃᓗᐊᕐᓂᕐᓴᐅᓂᐊᕐᓂᖓᓂᒃ ᐃᖅᑲᓇᐃᔭᖅᑎᓄᑦ ᐊᖏᕐᕋᖏᓐᓃᙱᑯᑖᒃᐸᒃᑎᓪᓗᒋᑦ.”

Share This Story

(0) Comments