ᐹᕙᓐᓛᓐ $1 ᐱᓕᐊᓐᓂ ᐊᑭᓕᒃᓴᖃᓕᖅᐅᐳᑦ, ᐱᖃᙱᓚᖅ ᑮᓇᐅᔭᕈᖅᑎᑕᐅᔪᓐᓇᕐᓂᖏᓐᓂᑦ ᓂᐅᕕᕐᓂᕐᒧᑦ ᐅᖅᓱᐊᓗᒃᓴᒥ

For an English version of this story, please see Baffinland is $1B in debt, lacks liquidity to buy fuel for this season’s sealift.

ᐹᕙᓐᓛᓐ ᓴᕕᕋᔭᒃᓴᒧᑦ ᐅᔭᕋᖕᓂᐊᕐᕕᒃ ᑎᒥᖁᑎᖓᑦ ᐊᑐᓚᐅᖅᐳᑦ ᐅᓄᕐᓂᖅᓴᐅᔪᒥ $1.46 ᐱᓕᐊᓐᓂ ᑐᒃᓯᕋᖅᑕᐅᔪᒥ ᐊᖏᒡᓕᒋᐊᖅᑕᐅᓂᖓᓂ ᐋᒃᑳᖅᑕᐅᓚᐅᖅᑐᒥ ᒐᕙᒪᑐᖃᒃᑯᓐᓂ, ᐊᒻᒪ ᐅᑯᐊ ᐊᐅᓚᓂᕐᒧᑦ ᐊᑭᓕᐅᑎᑦ ᑐᕌᖅᑎᑦᑎᓚᐅᖅᐳᖅ ᑲᒻᐸᓂᐅᔪᒥ ᕿᓂᕐᓂᕐᒥ ᐊᑭᓕᒃᓴᖃᕐᕕᐅᔪᒧᑦ ᓴᐳᔾᔨᓯᒪᓂᕐᒥ.

ᒫᓐᓇ, ᑲᒻᐸᓂ ᐊᑭᓕᒃᓴᖃᓕᖅᐳᖅ $1.07 ᐱᓕᐊᓐᓂ ᐊᑭᓕᕈᓐᓇᙱᑕᖏᓐᓂ, ᐅᖃᐅᓯᐅᓪᓗᓂ ᐃᖅᑲᖅᑐᐃᕕᖕᒥ ᑎᑎᖅᑲᖁᑕᐅᔪᓂ ᑎᑎᕋᖅᑕᐅᔪᓂ ᒪᐃ 14−ᒥ ᐋᓐᑎᐊᕆᐅᒥ ᖁᑦᑎᖕᓂᖅᓴᒥ ᐃᖅᑲᖅᑐᐃᕕᖕᒥ. ᐃᖅᑲᖅᑐᐃᕕᖕᒥ ᑎᑎᖅᑲᖁᑕᐅᔪᑦ ᑎᑎᕋᖅᓯᒪᕗᑦ ᑮᓇᐅᔭᓂ ᐊᖏᓂᐅᔪᓂ ᔫᓇᐃᑎᑦ ᔅᑕᐃᑦᔅᓂ ᑮᓇᐅᔭᖏᓐᓄᑦ, ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᓴᖑᑎᑦᑎᓯᒪᓪᓗᑎᒃ ᖃᓇᑕᒥ ᑮᓇᐅᔭᖏᓐᓄᑦ.

ᕿᑎᐊᓂ 2017−ᒥ ᐊᒻᒪ 2022−ᒧᑦ, ᑲᒻᐸᓂ “ᐃᓯᓚᐅᖅᐳᑦ ᐊᖏᐸᓗᒃᑐᓄᑦ ᑳᓐᑐᓛᓄᑦ” ᓂᕆᐅᖕᓂᕐᒧᑦ ᐊᖏᖅᑕᐅᓂᐊᕐᓂᖓᓂ ᑐᒃᓯᕋᐅᑕᐅᔪᒥ 110-ᑭᓛᒥᑐᒥ ᓄᓇᓯᐅᑎᑯᑖᑦ ᐊᖅᑯᑎᖓᓂ ᓄᓘᔭᕐᓂ ᓴᕕᕋᔭᒃᓴᒧᑦ ᐅᔭᕋᖕᓂᐊᕐᕕᖓᓂ, ᒥᑦᑎᒪᑕᓕᐅᑉ ᖃᓂᒋᔭᖓᓂ, ᑐᓚᒃᑕᕐᕕᖕᒧᑦ ᕿᙵᐊᓄᑦ, ᐅᖃᐅᓯᐅᓪᓗᓂ ᐃᖅᑲᖅᑐᐃᕕᖕᒥ ᑎᑎᖅᑲᖁᑕᐅᔪᓂ.

ᑭᓯᐊᓂ ᒐᕙᒪᑐᖃᒃᑯᑦ ᐊᖏᓚᐅᙱᓚᑦ ᐱᓕᕆᐊᒃᓴᐅᔪᒥ, ᐊᑦᑎᖅᑕᐅᓯᒪᔪᒥ ᐱᓕᕆᓂᖅ 2−ᒥ, ᕿᙵᐊᓂᑦ ᑭᐅᓗᒍᑕᐅᕐᔪᐊᖅᑐᒥ, ᐊᕐᕌᒍᒐᓴᓂ ᐃᓄᓕᒫᓄᑦ ᑐᓵᑎᑕᐅᓂᐅᔪᒥ.

“ᕿᙵᐊᓄᑦ ᓄᓇᓯᐅᑎᑯᑖᑦ ᐊᖅᑯᑎᖓ ᐃᓱᐊᓂ ᐊᖏᖅᑕᐅᙱᓐᓇᒥ ᐱᖁᔭᓕᕆᔨᐅᔪᓂ ᐱᔪᓐᓇᖅᑎᑦᑎᔨᐅᔪᓂ, ᐅᑯᐊ ᐊᐅᓚᓂᕐᒧᑦ ᐊᑭᓕᐅᑎᑦ ᕿᒪᐃᓚᐅᖅᐳᑦ ᐊᑮᑦᑐᖃᖅᑐᓂᑦ ᐊᒡᔭᖅᓯᓂᕐᒥ ᐊᖏᐸᓗᒃᑐᒥ ᐊᑭᓕᒃᓴᖃᕐᓂᖏᓐᓂ ᐱᑎᑕᐅᔪᒥ ᐱᓕᕆᐊᒃᓴᐅᔪᒥ ᑲᔪᓯᔪᓐᓇᓚᐅᙱᑦᑐᒥ,” ᐃᖅᑲᖅᑐᐃᕕᖕᒥ ᑎᑎᖅᑲᖁᑕᐅᔪᑦ ᐅᖃᓕᒫᕐᓂᖃᖅᐳᑦ.

ᑕᐃᒪᐃᓐᓂᖓᓄᑦ, ᐹᕙᓐᓛᓐᑯᑦ ᐱᖃᙱᓚᑦ “ᑮᓇᐅᔭᕈᖅᑎᑕᐅᔪᓐᓇᕐᓂᖏᓐᓂᑦ” ᓂᐅᕕᕐᓂᕐᒥ ᐅᖅᓱᐊᓗᒃᓴᒥ ᓯᕗᓂᐊᓂ ᑕᒪᑐᒪᓂ ᐊᕐᕌᒎᔪᒥ ᐅᒥᐊᕐᔪᐊᒃᑰᖅᑎᑦᑎᓂᕐᒥ ᐅᓯᑲᑦᑕᖅᑕᐅᓂᖓᓂ ᐱᓕᕆᓂᖓᓄᑦ ᒪᑐᓚᐅᙱᓐᓂᖓᓂ, ᐱᑎᑦᑎᑐᐃᓐᓇᕆᐊᓕᖕᒥ ᐅᔭᕋᖕᓂᐊᕐᕕᖕᒥ “ᓄᖅᑲᖅᑎᑦᑎᓂᕐᒥ ᐊᐅᓚᑕᐅᓂᐅᔪᒥ ᑕᒪᒃᑭᖅᑐᒥ.”

ᐅᓇ ᐃᓱᒪᒋᓇᒍ, ᐹᕙᓐᓛᓐᑯᑦ ᓂᕆᐅᒃᐳᑦ ᐊᐅᓚᑕᐅᓂᐅᔪᒥ ᐸᒡᕕᓵᕆᓂᖃᙱᓐᓂᖏᓐᓂ ᐊᒻᒪ ᖃᐅᑕᒫᒥ ᐃᓱᒪᓕᐊᖑᓂᐅᔪᓂ ᓱᓕ ᓴᓇᔭᐅᕙᒃᐳᑦ ᐃᓱᒻᒥᖅᑐᐃᔨᐅᔪᓂ, “ᒪᓕᒃᑐᒥ ᐃᖅᑲᖅᑐᐃᕕᖕᒥ ᑲᒪᑦᑎᐊᙱᓐᓂᖓᓂ,” ᐅᖃᓚᐅᖅᐳᖅ ᐹᕙᓐᓛᓐ ᐅᑲᖅᑎᐅᔪᒥ ᐲᑕ ᐋᒃᒥᓐ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᖏᓐᓄᑦ.

ᐋᒃᒥᓐ ᑭᐅᓚᐅᙱᓚᖅ ᐊᐱᖅᑯᑕᐅᔪᓂ ᑲᒻᐸᓂᐅᑉ ᐊᑭᓕᒃᓴᖏᓐᓂ ᐅᕝᕙᓘᓐᓃᑦ ᐱᓕᐊᓐ-ᑖᓚᒥ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐊᖏᖅᑕᐅᓯᒪᙱᑦᑐᒥ ᐱᓕᕆᐊᖑᔪᒥ 2−ᒥ ᐱᓕᕆᐊᒃᓴᖓᓂ.

ᐹᕙᓐᓛᓐᑯᑦ ᓱᓕ ᓴᓇᔪᒪᕗᑦ ᐊᓯᐊᒎᖅᑐᒥ ᐸᕐᓇᒃᑕᐅᓯᒪᔪᒥ $5.7-ᐱᓕᐊᓐᓂ ᓄᓇᓯᐅᑎᑯᑖᑦ ᐊᖅᑯᑎᖓᓂ ᐊᒻᒪ ᑕᕆᐅᕐᒥ ᐃᑎᔪᒥ ᑐᓚᒃᑕᕐᕕᖕᓯ ᑲᖏᖅᖢᕐᔪᐊᕐᒥ, ᐋᒃᒥᓐ ᐅᖃᓚᐅᖅᐳᖅ, ᐱᔪᓐᓇᖅᑎᑦᑎᓇᔭᖅᑐᒥ ᑲᒻᐸᓂᒥ ᐅᒥᐊᕐᔪᐊᒃᑰᖅᑎᑦᑎᓂᕐᒥ 22 ᒥᓕᐊᓐ ᑕᓐᓂ ᓴᕕᕋᔭᒃᓴᒥ ᐊᕐᕌᒍᑕᒫᒥ.

ᑕᒪᓐᓇ ᐅᖃᖅᑕᐅᓪᓗᓂ, ᑲᒻᐸᓂ “ᒫᓐᓇᐅᔪᒥ ᓈᒻᒪᒃᑐᒥ ᐊᑭᑐᔫᑎᖃᙱᓚᑦ ᐊᖏᖅᓯᒪᔪᓂ ᐅᖓᕙᕆᐊᖅᓯᓂᕐᒥ [ᑲᖏᖅᖢᕐᔪᐊᕐᒥ] ᐱᓕᕆᐊᒃᓴᐅᔪᒥ,” ᐅᖃᐅᓯᐅᓪᓗᓂ ᐃᖅᑲᖅᑐᐃᕕᖕᒥ ᑎᑎᖅᑲᖁᑕᐅᔪᓂ.

ᐹᕙᓐᓛᓐ ᐅᖃᐅᔾᔨᓚᐅᖅᐳᑦ ᐃᖅᑲᖅᑐᐃᕕᖕᒥ ᑭᐅᓇᓱᐊᖅᓯᒪᕗᑦ “ᑮᓇᐅᔭᕈᖅᑎᑕᐅᔪᓐᓇᕐᓂᖏᓐᓂᑦ ᓄᖅᑲᖅᑎᑦᑎᓯᒪᓂᐅᔪᓂ” ᐋᔩᖃᑎᒌᒃᑲᓐᓂᕐᓗᑎᒃ.

ᑲᒻᐸᓂ, ᓄᓇᕘᑉ ᐊᖏᓛᖑᔪᒥ ᓇᖕᒥᓂᖃᖅᑎᐅᔪᓂ ᐱᓕᕆᔨᐅᔪᓂ ᐃᖅᑲᓇᐃᔭᖅᑎᖁᑎᓕᖕᓂ, ᓄᖅᑲᖓᓚᐅᑲᒃᑎᑦᑎᕗᑦ 10 ᐳᓴᓐᑎᖓᓂ ᐃᖅᑲᓇᐃᔭᖅᑎᖏᓐᓂ 2024−ᒥ.

ᑭᓯᐊᓂ ᐅᑯᓂᖓ ᐊᑭᓄᑦ-ᒥᒃᖠᒋᐊᖅᑎᑦᑎᓂᕐᒧᑦ ᐱᓕᕆᓂᐅᔪᓂ, ᐹᕙᓐᓛᓐᑯᑦ ᑮᓇᐅᔭᓕᕆᓂᕐᒧᑦ ᐊᑲᐅᙱᓕᐅᕈᑕᐅᔪᓂ ᓱᓕ ᐱᑕᖃᖅᐳᑦ.

ᑎᒻ ᕼᐋᑦᓴᓐ, ᒐᕙᒪᑐᖃᒃᑯᑦ ᒥᓂᔅᑕᖓ ᐆᒻᒪᖅᑯᑎᓄᑦ ᐊᒻᒪ ᓄᓇᒥᙶᖅᑐᓂ ᐃᑲᔪᕈᑎᒃᓴᓂ, ᐊᐱᕆᔭᐅᓚᐅᖅᐳᖅ ᒪᐃ 19−ᒥ ᐊᓯᐊᒎᖅᑐᒥ ᑐᓴᒐᒃᓴᓕᐊᖑᔪᒥ ᓄᓇᕗᒻᒥ ᐋᑐᕚᒥ ᓇᖏᕐᓂᖓᓂ ᐹᕙᓐᓛᓐᑯᑦ ᖃᓄᐃᓕᖓᓂᖓᓂ.

“[ᐹᕙᓐᓛᓐᑯᑦ] ᐊᑭᑐᔫᑎᖃᙱᓚᑦ ᐊᐅᓚᑦᑎᓂᕐᒥ ᐅᔭᕋᖕᓂᐊᕐᕕᖕᒥ,” ᕼᐋᑦᓴᓐ ᐅᖃᓚᐅᖅᐳᖅ.

“ᐊᒻᒪ ᑲᖏᖅᖢᕐᔪᐊᕐᒥ ᐊᖏᒡᓕᒋᐊᖅᑕᐅᓂᖓ ᐱᕐᔪᐊᖑᕗᖅ ᐊᑯᓂᐅᔪᒃᑯᑦ ᐆᒻᒪᕆᖕᓂᖓᓂ ᑕᐃᔅᓱᒧᖓ ᐅᔭᕋᖕᓂᐊᕐᕕᖕᒧᑦ ᐊᒻᒪ ᐃᒻᒪᖄ ᑕᒪᒃᑭᖅᑐᒥ ᑮᓇᐅᔾᔭᒃᓴᓂᐅᔪᒥ ᓄᓇᕗᒻᒥ.”

ᐊᐱᕆᔭᐅᒐᒥ, ᕼᐋᑦᓴᓐ ᐅᖃᓚᐅᙱᓚᖅ ᐋᑐᕚ ᐃᓱᒪᒃᓴᖅᓯᐅᕆᓂᖓᓂ ᐊᑭᓖᑎᑕᐅᓂᕐᒥ ᐹᕙᓐᓛᓐᑯᓐᓄᑦ, ᑭᓯᐊᓂ ᐅᖃᓚᐅᖅᐳᖅ ᒐᕙᒪᒃᑯᑦ “ᖄᖓᓃᑉᐳᑦ” ᖃᓄᐃᓕᖓᓂᖓᓂ.