ᐹᕙᓐᓛ ᐃᖅᑲᓇᐃᔮᖏᑦ ᒫᓐᓇ ᐅᓗᕆᐊᓇᙱᑦᑐᒦᑦᑐᑦ
ᐅᔭᕋᒃᓯᐅᖅᕕᒃ ᓄᖃᖓᑎᑦᑎᔪᑦ ᐃᖅᑲᓇᐃᔭᕈᓐᓃᖅᑎᑦᑎᓂᖏᓐᓂᒃ ᐋᖅᑭᒃᑕᐅᓯᒪᔪᓂᒃ ᓯᑎᐱᕆ 25-ᒧ ᐅᑯᐊ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐱᓇᓱᖕᓂᖏᓐᓂᒃ ᐊᖏᓂᕐᓴᒥᒃ ᐊᐅᓪᓚᖅᑎᑦᑎᔪᓐᓇᕐᓯᓂᕐᒥᒃ
ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩᑦ ᐃᒃᓯᕙᐅᑕᖓ ᒫᔪᕆ ᑲᕕᖅ ᑲᓗᕋᖅ ᐹᕙᓐᓛᓐ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᒃᑯᑦ ᑐᒃᓯᕋᐅᑎᒋᔭᖓᓄᑦ ᐱᓇᓲᑎᖓ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᐊᐅᓪᓚᖅᑎᑕᐅᔪᓐᓇᖅᑐᓄᑦ ᐃᓱᒋᔭᐅᓇᔭᖅᑐᓄᑦ ᐃᓱᒪᓕᐊᕆᔭᐅᔪᓂᒃ ᓯᑎᐱᕆ 22-ᖑᑎᓪᓗᒍ. (ᐊᔾᔨᙳᐊᖁᑎᖓ ᑕᐃᕕᑦ ᕕᐊᓐ)
For English version, see Baffinland jobs safe for now
ᐹᕙᓐᓛᓐ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᒃ ᑯᐊᐳᕇᓴᓐ ᐅᖓᕙᕆᐊᖅᑎᑦᑎᓚᐅᕐᒪᑕ ᖃᑯᒍ ᓄᓘᔭᖕᓂ ᐃᖅᑲᓇᐃᔭᖅᑐᑦ ᓄᖅᑲᖅᑎᑕᐅᑲᑕᓕᕐᓂᐊᕐᓂᖏᓐᓂᒃ. ᐅᓇ ᑕᐃᒪᐃᓕᔾᔪᑎᐅᓕᓚᐅᕐᑐᖅ ᓯᑎᐱᕆ 22-ᖑᑎᓪᓗᒍ ᐅᑯᐊ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓂ ᑐᓂᓯᑎᓪᓗᒋᑦ ᐃᓱᒪᓕᐅᕈᑎᓂᒃ ᑲᒻᐸᓂᐅᑉ ᐱᓇᓱᒍᑎᖏᓐᓂᒃ ᐅᓄᕐᓂᕐᓴᓂᒃ ᓴᕕᕋᔭᒃᓴᓂᒃ ᐊᐅᓪᓚᖅᑎᑦᑎᑲᑕᒍᒪᔾᔪᑎᖏᓐᓂᒃ.
ᐅᓇ ᐅᔭᕋᒃᓯᐅᕐᕕᒃ ᒪᑯᓂᖓ “ᓈᒻᒪᙱᓕᐅᕈᑎᐅᔪᓐᓇᖅᑐᓂᒃ ᐆᒪᔪᐃᑦ ᓇᔪᒐᖃᕐᕕᖏᓐᓂᒃ ᐊᒻᒪᓗ ᐃᓅᖃᑎᒌᖕᓂᒃᑯᑦ ᑮᓇᐅᔭᓕᐅᕈᑎᐅᔪᓐᓇᖅᑐᓄᑦ” ᐱᐅᓯᕚᓪᓕᕈᑎᐅᔪᓐᓇᖅᐸᑦ ᐊᑐᖅᑕᐅᔪᓐᓇᖅᑐᑦ ᐊᐅᓚᑦᑎᓂᕐᒧᑦ ᐊᒻᒪ ᖃᐅᔭᓴᖅᐸᓪᓕᐊᓂᕐᒧᑦ ᐱᓕᕆᐊᒃᓴᓂᒃ, ᑲᑎᒪᔨᓄᑦ ᐃᒃᓯᕙᐅᑕᖅ ᒫᔪᕆ ᑲᕕᖅ ᑲᓗᕋᖅ ᑎᑎᕋᓚᐅᕐᓯᒪᔪᖅ ᒐᕙᒪᑐᖃᒃᑯᑦ ᐅᑭᐅᕐᑕᑦᑐᕐᒥᒃ ᐱᓕᕆᐊᒃᓴᓄᑦ ᒥᓂᒡᑕᒧᑦ ᑖᓂᐅᓪ ᕚᓐᑐᓪ ᓯᑎᐱᕆ 22-ᒥ.
ᑕᒪᑐᒧᖓᓕ ᐃᓱᒪᓕᐅᕆᔨᓪᓚᕆᐅᓂᐊᕐᑐᖅ ᐊᖏᖅᑕᐅᓂᖓᓂᒃ ᐹᕙᓐᓛᓐᑯᑦ ᐱᓇᓱᒍᑎᖏᓐᓂᒃ ᐊᐅᓪᓚᖅᑎᑦᑎᖃᑦᑕᕈᒪᓪᓗᑎᒃ 6 ᒥᓕᐊᓐ ᑕᓐᔅ ᐅᖁᒪᐃᓐᓂᓕᖕᓂ ᓴᕕᕋᔭᒃᓴᓂ ᑕᒪᑐᒪᓂ ᐊᕐᕌᒍᒥᒃ 4.2 ᒥᓕᐊᓐ ᑕᓐᔅᓂᐅᙱᑦᑐᓂᒃ ᐅᓇ ᕙᓐᑐᓪ.
ᑖᒃᑯᐊ ᑲᒻᐸᓃ ᐅᖃᓚᐅᕐᓯᒪᖕᒪᑕ ᖃᖓᒃᑲᓐᓂᖅ ᐊᖏᓂᕐᓴᒥ ᐱᔪᓐᓇᙱᑉᐸᑕ ᐃᖅᑲᓇᔭᖅᑎᓂᒃ ᓄᖅᑲᖅᑎᑦᑎᑲᑕᒋᐊᖃᓕᕋᔭᕐᒪᑕ.
ᐹᕙᓐᓛᓐᑯ ᐋᖅᑭᒃᓯᓯᒪᔪᑦ ᓯᕗᓪᓕᖅᐹᓂ ᐃᖅᑲᓇᐃᔭᕈᓐᓃᖅᑎᑦᑎᕙᓪᓕᐊᓂᐊᕐᓂᖏᓐᓂᒃ ᓯᑎᐱᕆ 25-ᒥ.
ᐅᑯᐊ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑐᓴᖅᑎᑦᑎᓂᐊᕐᓂᖏᑦ ᐅᖓᕙᕆᐊᖅᑕᐅᓪᓗᓂ ᐅᒃᑑᐱᕆ 20-ᒧ, ᑖᓐᓇᓗ ᕚᓐᑐᓪ “ᓇᓗᓇᐃᓚᐅᕐᓯᒪᓪᓗᓂ” ᐃᓱᒪᓕᐅᕆᔪᓐᓇᓛᕐᓂᖓᓂᒃ, ᐹᕙᓐᓛᓐᑯᑦ ᐅᖃᕐᑎᖓ ᐲᑕ ᐋᒃᒪᓐ ᐅᖃᓚᐅᕐᑐᖅ ᓯᑎᐱᕆ 22-ᒥ.
“ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᑦ ᐃᓱᒪᓕᐊᕆᓯᒪᔭᖓ ᓇᓗᓇᐃᕐᓯᔾᔪᑎᐅᓚᐅᕐᑐᖅ ᐹᕙᓐᓛᓐ ᐱᒻᒪᕆᐊᓘᓂᖓᓂᒃ ᓄᓇᕗᒻᒥᑦ ᑮᓇᐅᔭᓕᐅᕋᓱᖕᓂᕐᒧᑦ ᐊᒻᒪᓗ ᑖᒃᑯᐊ ᑲᒻᐸᓂᐅᔪᑦ ᐱᓕᕆᐊᖃᕐᓂᐊᖅᐸᑕ ᓴᖅᑭᑎᑦᑎᕙᓪᓕᐊᓂᕐᒥᒃ ᑕᐃᒪᓕ ᐅᓄᕐᑐᒻᒪᕆᐊᓗᖕᓂ ᐃᖅᑲᓇᐃᔮᓂ ᐱᑕᖃᖅᑎᑦᑏᓐᓇᕐᓂᐊᕐᑐᑦ,” ᐋᒃᒪ ᖃᕋᓴᐅᔭᒃᑯᑦ ᑎᑎᕋᓚᐅᕐᑐᖅ.
“ᒐᕙᒪᑐᖃᒃᑯᑦ ᒪᓕᖁᓚᐅᕋᑦᑎᒍᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐃᓱᒪᓕᐊᖏᓐᓂᒃ ᐊᒻᒪᓗ ᐹᕙᓐᓛᓐᑯᓐᓂ ᐱᓕᕆᔪᓐᓇᖅᑎᑦᑎᓗᑎᒃ ᒫᓐᓇ ᐱᓕᕆᐊᕆᔭᖏᑦ ᐊᑐᑐᐃᓐᓇᕐᓗᓂᒋᑦ.”
ᐹᕙᓐᓛᓐᑯ ᐋᖅᑭᒃᓯᓚᐅᕐᓯᒪᖕᒪᑕ ᒪᕐᕈᐃᓕᖓᓗᑎᒃ ᐃᖅᑲᓇᐃᔭᕈᓐᓃᖅᑎᑦᑎᓂᐊᕐᓂᖏᓐᓂᒃ, ᓯᑎᐱᕆ 25-ᒥ ᐊᒻᒪ ᐅᒃᑑᐱᕆ 11-ᒥ, ᒫᓂ 1,100 ᐃᖅᑲᓇᐃᔭᖅᑐᓂᒃ ᓄᖅᑲᖅᑎᑦᑎᓂᐊᕐᓗᑎᒃ.
ᕚᓐᑐᓪ ᐅᖃᖅᑎᖓ ᑲᐃᐅᓪ ᐋᓚᓐ ᐅᖃᓚᐅᕐᑐᖅ ᖃᖓᓪᓚᕆ ᐅᖃᕈᓐᓇᙱᓐᓂᕋᖅᖢᓂ ᒥᓂᔅᑕ ᑐᓴᒐᒃᓴᒥᓂᒃ ᐅᖃᕐᓂᐊᕐᓂᖓᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᖃᕋᓴᐅᔭᒃᑯᑦ ᑎᑎᕋᖅᖢᓂ ᑲᑎᒪᔩᑦ ᐃᓱᒪᓕᐊᖏᑦ ᐅᖃᐅᓯᐅᓚᐅᙱᑎᓪᓗᒋᑦ.
“ᐃᓱᒪᓕᐅᕆᓂᐊᕐᑐᑦ ᓈᒻᒪᒃᓯᒃᐸᑦ ᐊᒻᒪᓗ ᖃᐅᔨᓴᑲᑖᓪᓚᓚᐅᕐᖢᑎᒃ ᐊᒻᒪᓗ ᖃᐅᔨᓇᓱᑲᑕᑦᑎᐊᕋᓗᐊᕐᒪᖔᑕ,” ᐋᓚᓐ ᑎᑎᕋᕐᓯᒪᓚᐅᕐᑐᖅ.
ᑕᐃᒪᙵᓂ 2018-ᒥ ᐹᕙᓐᓛᓐᑯᑦ ᐊᐅᓪᓚᖅᑎᑦᑎᖃᑦᑕᕐᒪᑕ 6 ᒥᓕᐊᓐ ᑕᓐᔅ ᓴᕕᕋᔭᒃᓴᓂᒃ ᐊᕐᕌᒍᑕᒪᓐ. ᑭᓯᐊᓂᓕ ᑖᔅᓱᒧᖓ ᐱᔪᓐᓇᐅᑎᖓ ᐃᓱᓕᓚᐅᕐᓯᒪᖕᒪᓐ ᑎᓯᐱᕆᒥ ᐊᒻᒪᓗ ᑕᐃᒪᓐᓇ 4.2 ᒥᓕᐊᓐ ᑕᓐᔅᓂ ᐊᐅᓪᓚᖅᑎᑦᑎᖃᑦᑕᕐᓯᒪᔪᑦ ᐊᕐᕌᒍᑕᒪᓐ.
ᒪᐃᖑᑎᓪᓗᒍ ᐹᕙᓐᓛᓐᑯᑦ ᐊᐱᕆᓚᐅᕐᓯᒪᖕᒪᑕ ᕚᓐᑐᓪᒧ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᖏᖅᑎᑕᐅᖁᔭᐅᓪᓗᑎ ᐊᖏᒡᓕᒋᐊᖅᑎᑦᑎᔪᒪᓂᕐᒥᒃ ᐊᐅᓪᓚᖅᑎᖃᑦᑕᖅᑕᖏᓐᓂᒃ ᒪᐅᖓ 6 ᒥᓕᐊᓐ ᑕᓐᔅᙳᕐᓗᓂ 2022 ᐅᒥᐊᕐᔪᐊᓕᕆᓐᓇᕐᓂᖓᓂᒃ.
ᕚᓐᑐᓪ ᐅᖃᕐᒪᓐ ᑕᐃᒪᓐᓇ ᐱᑎᑦᑎᔪᓐᓇᙱᓐᓂᖓᓂᒃ ᐹᕙᓐᓛᓐᑯᑦ ᐊᐱᕆᓕᓚᐅᕐᓯᒪᔪᑦ ᑐᐊᕕᕐᓇᖅᑐᒃᑯᑦ ᐱᓕᕆᐊᖃᖅᑎᑕᐅᖁᔨᓪᓗᑎᒃ ᑲᑎᒪᔨᓂᒃ ᖁᓚᐅᑦᑎᔪᓐᓇᖅᑐᓂᒃ ᐅᖃᕐᓗᑎᒃ ᑐᐊᕕᕐᓇᖅᑐᖃᕐᓂᖓᓂᒃ.
ᑐᐊᕕᕐᓇᖅᑐᕆᔭᐅᔪᕐᓕ ᑖᒃᑯᐊ ᑲᒻᐸᓂᐅᔪᑦ ᐊᐅᓪᓚᖅᑎᑦᑎᔪᓐᓇᙱᑉᐸᑕ 6 ᒥᓕᐊᓐ ᑕᓐᔅᓂ 2022-ᒥ ᑕᐃᒪᓐ 1,300 ᐅᖓᑖᓂ ᐃᖅᑲᓇᐃᔭᖅᑎᓂᒃ ᓄᖅᑲᖅᑎᑦᑎᔭᕆᐊᖃᕋᔭᕐᑐᑦ — ᑖᒃᑯᓇᙵ 209 ᐃᓅᓪᓗᑎᒃ — ᑖᓐᓇᓗ ᒫᓂ 400 ᐱᓕᕆᑎᑦᑎᑕᐅᕙᒃᑐᓂ ᐊᒃᑐᐃᓇᔭᕆᓪᓗᓂ.
ᕚᓐᑐᓪ ᑖᔅᓱᒥᖓ ᑐᒃᓯᕋᐅᑎᒥ ᓱᖁᑎᒃᓴᓚᐅᙱᑦᑐᖅ.
ᒫᓐᓇᓕ ᑲᒻᐸᓂᐅᔪᑦ ᐱᓕᕆᐊᖃᓕᓚᐅᕐᑐᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩᑦ ᐱᓕᕆᕙᓪᓕᐊᕆᕙᒃᑕᖏᓐᓂᒃ ᒪᐃ 20-ᐅᑎᓪᓗᒍ.
ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑭᐅᖃᑦᑕᓚᐅᕐᑐᑦ ᐱᓕᕆᔾᔪᑎᓕᕆᓂᒃᑯᑦ ᐃᓱᒫᓘᑎᒋᔭᐅᔪᓂᒃ ᒐᕙᒪᒃᑯᑦ ᑎᒥᖏᓐᓂ, ᐆᒪᔪᕐᓂᐊᖅᑎᓂᒡᓗ ᐱᓕᕆᐊᖃᖅᑐᓂᒃ ᐊᒻᒪ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᔪᓚᐃ 19-ᓗ ᐊᒻᒪ ᐋᒐᓯ 9 ᐊᑯᓐᓂᖓᓂᒃ ᐊᒻᒪᓗ ᓄᓇᓕᖕᓂ ᑲᑎᒪᑎᑦᑎᓚᐅᖅᖢᑎᒃ ᐋᒐᓯ 16-ᒥ ᒥᑦᑎᒪᑕᓕᒃᒥᑦ ᑖᓐᓇᓗ ᐅᐸᒐᒃᓴᐅᓚᐅᖅᖢᓂ.
ᒫᓐᓇᓕ ᐹᕙᓐᓛᓐ ᐊᒻᒪ ᐊᓯᖏᑦ ᑲᑐᔾᔨᖃᑎᒌᑦ ᐅᑕᕿᔪᑦ ᕚᓐᑐᓪ ᐃᓱᒪᒃᓴᖅᓯᐅᕐᓂᖓᓂᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩᑦ ᐃᓱᒪᓕᐊᖏᓐᓂᒃ ᐊᒻᒪᓗ ᑭᖑᓂᐊᒍᑦ ᐃᓱᒪᓕᐅᕆᓂᐊᖅᖢᓂ ᐅᓄᕐᓯᒋᐊᖅᑎᑦᑎᓇᔭᕆᐊᒃᓴᖓᓂᒃ ᐊᐅᓪᓚᖅᑎᑕᐅᕙᒃᑐᓂᒃ.
Why doesnt QIA look at the bigger picture; and buy this mine and equipment for cheap and profit off Baffinland’s failures n their filing for bankruptcy. the iron ore the mine is some of purest on the planet.
and then build training centers and have literally 100% Inuit operated ore mine, ultimately that’s our dream, to be self sufficient .