ᐃᓕᓐᓂᐊᖅᑎᑦᑎᔨ ᓘᑯ ᓘᓯ ᒫᑰᓯ ᖁᙱᐊᖅᑎᑦᑎᔪᖅ ᐸᓚᐅᒐᓕᐅᕐᓂᕐᒥᒃ, ᐅᕙᓂ ᐃᖃᓗᐃᑦ ᑰᖓᓂᒃ ᓯᐊᕕᐊ ᒍᕆᓄᓪ ᓄᓇᕗᑦ ᒥᕐᖑᐃᕐᓯᕕᒃᒥ ᐃᖃᓗᖕᓂ ᐋᒐᓯ 4ᖑᑎᓪᓗᒍ. (ᐊᔾᔨᓕᐅᕆᔨ ᒫᑕᓕᓐ ᕼᐊᐅᕕᑦ)

ᐸᓚᐅᒑᒃᓴᖅ, ᐃᒪᖅ ᐊᒻᒪ ᑕᕆᐅᖅ ᒥᑭᑦᑐᖅ: ᐃᓄᐃᑦ ᖁᙱᐊᖅᑐᑦ ᐸᓚᐅᒑᓕᐅᕐᓂᕐᒥᒃ ᖃᐅᔨᑎᑕᐅᕗᑦ

ᑖᓐᓇ ᖃᓄᐃᓕᐅᕐᓂᖅ ᐃᓚᒋᔭᐅᔪᑦ ᐅᓄᕈᓘᔭᖅᑐᓂᒃ ᐊᐅᔭᒃᑯᑦ ᖃᓄᐃᓕᐅᒐᒃᓴᓂᒃ ᐃᖃᓗᐃᑦ ᑰᖓᓂ ᓄᓇᕗᒥᑦ ᒥᕐᖑᐃᕐᓯᕕᒃᒥ ᐃᖃᓗᖕᓂ

By ᒫᑕᓕᓐ ᕼᐊᐅᕕᑦ

For an English version of this story, please see Flour, water and a pinch of salt: Crowd gets tips on making bannock.

ᐅᓇ ᐋᔅᓕ ᑰᐳ ᐃᓱᒪᓕᕌᖓ ᐱᕈᕐᓴᓂᕐᒥᒃ ᐅᑭᐅᕐᑕᖅᑐᕐᒥ, ᐃᖅᑲᐅᒪᖃᑦᑕᕐᑐᖅ ᐸᓚᐅᒑᖅᑐᖅᖢᓂ.

“ᐳᓛᕌᖓᒪ ᐃᓐᓇᕐᓄᑦ ᐅᕙᑦᑎᖏᓐᓄᑦ ᐸᓚᐅᒑᓕᐅᖃᑦᑕᓚᐅᕐᓯᒪᔪᑦ,” ᐅᖃᕐᑐᖅ ᑰᐳ, ᓄᓇᕗᑦ ᒥᕐᖑᐃᖅᓯᕕᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᑦ ᐊᐅᓚᑦᑎᔨᐅᑲᐃᓐᓇᖅᖢᓂ ᐃᑦᑕᕐᓂᓴᕐᓂᒃ ᐅᐱᒋᔭᖃᕐᓂᕐᒧᑦ.

ᐅᖃᓚᐅᕐᑐᖅ ᒪᒪᕆᓛᕆᓂᕋᖅᖢᓂᐅᒃ ᐸᓚᐅᒐᓕᐊᕆᓯᒪᔪᑦ ᐅᕐᓱᕐᒥ ᖃᓛᕐᑐᒥ ᐊᒻᒪᓗ ᓱᑲᓕᖅᖢᒋᑦ ᖄᖏᑦᑎᒍᑦ

ᐸᓚᐅᒑᖅ ᓂᕆᔭᒃᓴᓃᖃᑕᐅᓚᐅᕐᑐᖅ ᐋᒐᓯ 4ᖑᑎᓪᓗᒍ ᓯᐊᕕᐊ ᒍᕆᓄᓪ ᓄᓇᕗᒥᑦ ᒥᕐᖑᐃᖅᓯᕕᒃᒥᑦ ᐃᖃᓗᖕᓂ, ᐃᓚᒋᔭᐅᓪᓗᓂ ᓄᓇᕗᒥᑦ ᒥᕐᒍᐃᖅᓯᕖᑦ’ ᐱᓇᓱᐊᕈᓯᖓᓂᒃ “ᐊᔪᕈᓐᓃᕐᓴᕆᑦ ᐃᒪᓐᓇ…” ᐃᓕᓐᓂᐊᖅᑎᑕᐅᔾᔪᑏᑦ ᓄᓇᕗᒥᑦ ᐱᓕᕆᐊᖑᔪᑦ ᐊᐅᔭᐅᔪᖅ.

ᐃᓕᓐᓂᐊᖅᑎᑦᑎᔨ ᓘᑯ ᓘᓯ ᒫᑰᓯ ᖁᙱᐊᖅᑎᑦᑎᓚᐅᕐᑐᖅ ᐸᓚᐅᒑᓕᐅᕐᓂᕐᒥᒃ ᐅᐸᒍᑎᓯᒪᔪᓂᒃ.

ᐸᓚᐅᒑᓕᐅᖅᐸᒃᑐᑦ ᐅᑯᓂᖓ ᐊᑐᖅᖢᑎᒃ: ᐸᓚᐅᒑᒃᓴᖅ, ᐅᓇᔪᒃᑐᖅ ᐃᒪᖅ, ᓂᐱᔾᔭᐃᒃᑯᑎ, ᐃᓚᒃᓴᐅᑎ, ᒥᑭᑦᑐᒥᒃ ᐃᒻᒧᒃᒥᒃ, ᑕᕆᐅᖅ ᒥᑭᖢᓂ ᐊᒻᒪᓗ ᐅᕐᓱᖅ ᖃᓛᖅᑎᑦᑎᔾᔪᑎᒃᓴᖅ.

ᐃᓚᖏ ᐃᓚᓯᕙᒃᑐᑦ ᐸᐅᕐᖓᓂ ᐸᓂᕐᑐᓂᒃ ᓱᑲᕐᒥᓪᓘᓐᓃᑦ ᐃᖑᓚᖅᑕᖓᓄᑦ, ᐊᓯᖏᓪᓗ ᓱᑲᓕᕐᓯᕙᒃᑐᖢᑎ ᐃᖑᓛᓂᒃᓯᒪᔪᒧᑦ ᖃᓛᖅᑎᓐᓂᐊᓵᖅᖢᒍ ᑖᓐᓇ ᐸᓂᕐᓯᒪᓂᕐᓴᐅᓂᐊᕐᒪᓐ, ᒫᑰᓯ ᐅᖃᕐᑐᖅ.

ᑕᐅᑐᒃᑎᑦᑎᓚᐅᕐᑐᖅ ᖃᓄᖅ ᐊᒡᒐᒧᑦ ᐸᓚᐅᒑᒥ ᐃᖑᓚᕐᓯᓂᕐᒥᖅ, ᐸᓚᐅᒑᕐᒥ ᓂᐱᔾᔭᐃᑯᑎᒥ ᐊᕿᓕᑎᑦᑎᓂᕐᒥᒃ ᐃᖑᓚᕐᕕᒃᒥ ᐃᓗᐃᒃᑲᓛᖃᕈᓐᓃᕐᔫᒥᓇᓱᒡᓗᒍ ᐊᖏᔫᑎᓂᒃ. ᑕᐃᒪᐃᓕᐅᓚᐅᖅᖢᓂ ᐸᓚᐅᒑᒃᓴᐅᑉ ᕿᑎᐊᒍᑦ ᐃᓗᒃᑐᖅᑎᑦᑎᓪᓗᓂᐊᒻᒪᓗ ᐆᓇᔪᒃᑐᒥ ᐃᒪᕐᒥ ᑯᕝᕕᕆᓪᓗᓂᐅᒃ ᑕᐃᒪᓐᓇᓗ ᐃᖑᓚᖅᖢᓂᐅᒃ ᐃᓗᐃᑦᑐᙳᖅᖢᓂ.

ᐸᓚᐅᒑᓕᐅᕐᐸᒃᑐᑦ ᐅᕐᓱᕐᒥ ᖃᓛᖅᑐᒥᒃ, ᓴᖅᑭᔮᖅᑐᖅ ᐅᕙᓂ, ᐅᕝᕙᓘᓐᓃᑦ ᐆᑦᑎᓯᒥ ᐆᓇᖅᑐᒥ ᐃᖓᐅᑉ ᖄᖓᓂᒃ, ᐅᖃᕐᑐᖅ ᐃᓕᓐᓂᐊᖅᑎᑦᑎᔨ ᓘᑯ ᓘᓯ ᒫᑰᓯ. (ᐊᔾᔨᓕᐅᕆᔨ ᒫᑕᓕᓐ ᕼᐊᐅᕕᑦ)

ᒫᑰᓯ ᑕᐅᑐᒃᑎᑦᑎᓕᓚᐅᕐᒥᔪᖅ ᐅᕐᓱᕐᒥ ᖃᓛᖅᑎᑦᑎᑎᓪᓗᒍ ᐸᓚᐅᒑᒃᓴᒥ ᐊᕕᒃᑐᖅᓯᒪᓪᓗᓂᖏ ᑕᒧᐊᒐᒃᓴᓂ ᐊᒻᒪ ᖃᓛᖅᑐᒧᑦ ᐅᕐᓱᕐᒧᐊᖅᖢᓂᒋᑦ, ᐃᒡᓗᐊᓄᓪᓗ ᓵᑎᖢᓂᒋ ᐊᒻᒪ ᐲᔭᓕᖅᖢᓂᒋᑦ ᐆᑦᑎᐊᓂᓚᐅᕐᑎᓪᓗᒋᑦ ᑲᔪᕈᔫᓕᖅᑎᓪᓗᒋᑦ.

ᐸᓚᐅᒑᖅ ᓂᕆᔭᐅᒐᔪᓛᖑᖃᑕᐅᖕᒪᑦ ᐊᖏᕐᕋᕆᔭᐅᔪᓂᒃ, ᒫᑰᓯ ᐅᖃᕐᑐᖅ.

“ᑭᒃᑯᓕᒫᑦ ᐸᓚᐅᒑᖅᑐᖃᑦᑕᕐᒪᑕ ᐅᓪᓛᒃᑯᑦ ᑏᑐᖅᖢᑎᒃ, ᑳᐱᑐᖅᖢᑎᒡᓘᓐᓃᑦ,” ᐅᖃᕐᑐᖅ.

ᒫᑰᓯ ᐊᕐᕌᒎᓕᕐᑐᓂᒃ 15ᓂ ᐸᓚᐅᒑᓕᐅᖃᑦᑕᕐᓯᒪᔪᖅ ᐊᖏᕐᕋᖓᓂ ᐊᒻᒪᓗ ᐃᓕᓐᓂᐊᖅᑎᑦᑎᕙᒃᖢᓂ ᐃᓕᓐᓂᐊᕕᖕᒥ ᐃᓕᓐᓂᐊᖅᑎᓄᑦ ᐃᖃᓗᖕᓂ ᐊᕐᕋᒎᓕᖅᑑᖕᓂᒃ ᒪᕐᕉᖕᓂ.

ᐊᓯᒃᑲᓐᓂᖓᑦᑕᐅᖅ ᐆᑕᐅᔾᔪᑎᖓ ᐆᓇᖅᑐᒥ ᐆᑦᑎᓯᒥᒃ ᐊᒻᒪ ᐃᒡᓗᐊᓄ ᓵᑎᖢᒍ ᐆᑦᑎᑦᑎᐊᕐᓂᐊᕐᒪ ᐊᒻᒪᓗ “ᐊᕕᒃᑐᖅᑕᐅᓪᓗᓂ ᐲᑦᓴᑐᑦ” ᓂᕆᕈᓘᔭᕐᓂᐊᕐᒪᑕ, ᐅᖃᕐᑐᖅ.

ᐅᐸᒍᑎᓯᒪᓚᐅᕐᒥᔪᖅ ᑕᐱ ᑎᕉᓯᐅ ᐅᖃᓚᐅᕐᑐᖅ ᐱᐊᓂᒃᑎᓪᓗᒍ “ᐊᒃᓱᐊᓗᒃ ᒪᒪᕐᑐᖅ.”

“ᐅᕙᒍᑦᑕᐅᖅ ᓴᓇᖃᑦᑕᖅᑕᕗᑦ ᑭᓯᐊᓂ ᓘᓯᐅᑉ ᐸᓚᐅᒑᓕᐊᖏᓐᓂᒃ ᒪᒪᙱᓐᓂᕐᓵᕐᔪᐃᑦ,” ᐅᖃᕐᑐᖅ ᐃᒡᓚᖅᖢᓂ.

ᖃᓄᐃᓕᐅᕈᑎᐅᓛᕐᑐᖅ “ᐊᔪᕈᓐᓃᕐᓴᕆᑦ ᐃᒪᓐᓇ” ᐱᓕᕆᐊᒃᓴᐃᑦ ᐃᓚᖃᕐᑐᑦ ᐃᓄᐃᑦ ᓴᓇᕈᑎᓕᐅᕈᓯᖏᓐᓂᒃ ᐊᒻᒪᓗ ᐅᑭᐅᕐᑕᖅᑐᕐᒥ ᐱᕈᖅᑐᓂᒃ ᕿᒥᕐᕈᐊᖅᐸᓪᓕᐊᓂᖅ. ᖃᓄᐃᓕᐅᕈᑎᒃᓴᐅᓂᐊᖅᑐᑦ ᑎᑎᕋᐅᓯᐅᓯᒪᔪᑦ ᓄᓇᕗᒥᑦ ᒐᕙᒪᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᓂᒃ.

Share This Story

(0) Comments