ᐅᑎᕐᐳᖅ ᓄᓇᕗᒥᑦ ᓇᓄᙳᐊᖅ ᓚᐃᓴᓐᓯ ᓄᓇᓯᐅᑎᓄᑦ

For English version, see Behold the return of Nunavut’s polar bear licence plate

ᓄᓇᕗᒥᑦ ᓄᑖᖅ ᓇᓄᙳᐊᖅ ᓚᐃᓴᓐᓯ ᓄᓇᓯᐅᑎᓄᑦ ᓴᖅᑭᑕᐅᓚᐅᕐᐳᖅ

ᓄᓇᓕᖕᓂ ᐱᔨᑦᑎᕋᐅᑎᓕᕆᓂᕐᒧᑦ ᒥᓂᔅᑕ ᑕᐃᕕᑦ ᐊᕿᐊᕈᒃ ᑕᑯᑎᑦᑎᔪᖅ ᖃᓄᐃᓕᖓᓂᖓᓂᒃ ᒪᐃ 20ᐅᑎᓪᓗᒍ ᑲᑎᒪᖃᑎᖃᖅᑎᓪᓗᒋᑦ ᓄᓇᕗᑦ ᑐᙵᕕᒃᑯᓐᓂ ᐊᖅᓇᕐᓃᑦ ᑐᔪᕐᒥᕕᒃᒥ ᐃᖃᓗᖕᓂ, ᐊᔾᔨᓕᐅᖅᑕᐅᓪᓗᐊᖅᖢᓂ ᓴᖅᑭᑎᑕᐅᓯᒪᓪᓗᓂ ᓯᕗᓕᐅᕐᑎ ᐸᐅᓗᓯ ᐊᕿᐊᕈᒃᒧᑦ ᑐᓴᐅᒪᔾᔪᑎᓕᕆᓂᒃᑯᑦ.

ᓚᐃᓴᓐᓯ ᓄᓇᓯᐅᑎᓄᑦ ᓇᓄᙳᐊᖑᔪᖅ ᑐᖑᔪᖅᑐᓂ ᐊᒻᒪ ᖁᖅᓱᖅᑐᓂ ᓯᓚᑖᒍᑦ ᑕᕐᓴᖃᖅᖢᓂ ᐊᒻᒪ ᐊᐅᐸᖅᑐᒥᓐ ᐃᓄᒃᓱᖃᖅᖢᓂ ᕿᑎᐊᒍᑦ.

“ᐅᓇ ᓄᑖᖅ ᑕᕐᓴᖅ ᓴᖅᑭᑎᑦᑎᓯᒪᔪᖅ ᐃᓄᖕᓄᑦ ᐅᖃᐅᓯᐅᓯᒪᔪᒃᑯᑦ ᑖᓐᓇ ᓇᓄᙳᐊᖅ ᓚᐃᓴᓐᓂ ᐅᑎᕐᑎᑕᐅᖁᔭᐅᓯᒪᓪᓗᓂ,” ᐅᖃᕐᑐᖅ ᑳᑐᕆᓐ ᑕᕗᕉ, ᐅᖃᕐᑎᒋᔭᐅᔪᖅ ᓄᓇᓕᖕᓂ ᐱᔨᑦᑎᕋᐅᑎᓕᕆᔨᒃᑯᓐᓄᑦ.

ᐅᓇ ᐊᑐᖅᑕᐅᓕᓛᕐᑐᖅ “ᐊᐅᔭᖅ ᐱᒋᐊᓕᓵᖅᑎᓪᓗᒍ,” ᐅᖃᕐᑐᖅ.

ᐊᑐᓂ ᓄᓇᓯᐅᑎ ᓄᑖᒥ ᓚᐃᓴᓐᓯᑖᕐᓂᐊᖅᑐᖅ, ᐊᐱᕆᔭᐅᕙᖕᓂᖓᓄᑦ ᑕᕗᕉ.

ᐃᓄᐃᑦ ᐱᓯᒪᔪᓐᓇᕐᓂᐊᖅᑐᑦ ᓄᑕᐅᙱᑦᑐᓂ ᓚᐃᓴᓐᓯᓂ ᓄᓇᓯᐅᑎᓄᑦ, ᑭᓯᐊᓂᓕ ᑖᒃᑯᐊ ᓄᑖᑦ ᓚᐃᓴᓐᓰ ᐋᖅᑭᒃᑕᐅᓯᒪᔭᕆᐊᖃᕐᓂᐊᖅᑐᑦ ᑐᓄᐊᒍᑦ ᓄᓇᓯᐅᑎᐅᑉ. ᐅᑯᐊ ᐃᓚᖃᖅᑐᐃᑦ ᐃᓄᒋᐊᒍᓐᓇᖅᑐᓂᒃ ᓄᓇᓯᐅᑎᓂᒃ, ᑎᓴᒪᓕᖕᓂᖅ, ᐅᓂᐊᒐᕐᓂᒃ ᐊᒻᒪ ᐅᖁᒪᐃᑦᑐᓂᒃ ᓄᓇᓯᐅᑎᕐᔪᐊᓂᒃ.

ᓇᓄᙳᐊᖅ ᓚᐃᓴᓐᓯ ᐅᑎᕐᑎᑕᐅᓂᖓ ᑐᓴᖅᑕᐅᔾᔪᑎᐅᓚᕐᓯᒪᔪᖅ ᐊᕐᕌᓂ ᒥᓂᔅᑕ ᐊᕿᐊᕈᒃᒧᑦ, ᐅᖃᖅᖢᓂ ᖁᕕᐊᓲᑎᖃᕐᓂᐊᕐᓂᖏᓐᓄᑦ ᓄᓇᕗᑦ 25-ᓂ ᐊᕐᕌᒍᖃᕐᓂᐊᓕᕐᓂᖓᓄᑦ.

ᓄᓇᕗᒥᑦ ᒐᕙᒪᒃᑯᑦ ᐊᒻᒪ ᓄᓇᑦᓯᐊᕐᒥ ᒐᕙᒪᒃᑯᑦ ᑖᓐᓇᓗ ᑎᒍᒥᐊᖅᑎᐅᓪᓗᓂ ᓇᓄᙳᐊᒥ ᓚᐃᓴᓐᓯᒥ ᓄᓇᓯᐅᑎᓄᑦ, ᐊᖏᖃᑎᒌᓚᐅᕐᒪᑕ ᓄᓇᕗᑦ ᓇᖕᒥᓂᖅ ᓇᓄᙳᐊᕐᒥ ᓴᓇᔪᓐᓇᕐᓂᐊᕐᓂᖓᓂᒃ.

ᓯᕗᓪᓕᖅ ᓇᓄᙳᐊᖑᓚᐅᕐᑐᖅ ᓚᐃᓴᓐᓯ ᓄᓇᓯᐅᑎᓄᑦ, ᑖᓐᓇᓗ ᑐᖑᔪᖅᑐᒥ ᐊᒻᒪ ᖃᐅᓪᓗᖅᑕᕐᒥ ᑕᕐᓴᖃᖅᖢᓂ, ᐊᑐᖅᑕᐅᓕᓚᐅᕐᓯᒪᔪᖅ 1999-ᒥ ᓄᓇᑦᓯᐊᕐᒥᙶᖅᖢᓂ.

ᒫᓐᓇᓕ ᓄᓇᕗᑦ ᓴᓂᒧᑦ ᑕᑭᓂᕐᓵᕐᔪᖅ ᓚᐃᓴᓐᓯ ᓄᓇᓯᐅᑎᓄᑦ, ᓇᓄᙳᐊᕐᒥ ᑕᕐᓴᖃᕆᓪᓗᓂ ᐊᖅᓴᕐᓂᖃᖅᑐᒥ, ᐊᑐᖅᑕᐅᓕᓚᐅᕐᓯᒪᔪᖅ 2012-ᒥ.