ᐊᕐᕕᐅᑉ ᓂᐊᖁᐊᖓ ᓴᐅᓂᖅ ᓴᖅᑭᔮᒐᒃᓴᖅ ᐃᖃᓗᖕᓄᐊᕐᓂᐊᓕᕐᑐᖅ

ᐱᓕᕆᐊᒃᓴᖅ ᐱᓕᕆᖃᑎᖃᕐᓗᑎᒃ ᐊᖑᓇᓱᒃᑐᓕᕆᔨᓂᒃ ᐱᓕᕆᐊᖑᓂᐊᖅᑐᖅ ᐃᖅᑲᐅᒪᔾᔪᑎᒋᓗᒍ ᐊᕐᕙᒐᓱᖕᓂᐅᓚᐅᕐᑐᖅ

ᑲᑎᒪᔨᐅᖃᑕᐅᔪᑦ ᐊᒪᕈᖅ ᐊᖑᓇᓱᒃᑐᓕᕆᔨᒃᑯᓐᓄᑦ ᐊᔾᔨᓕᐅᖅᑕᐅᔪᑦ ᐊᕐᕙᒃᑎᓪᓗᒋᑦ ᐊᐅᔭᖅ. ᓄᓇᓕᐸᐅᔭᐃᑦ ᑐᓴᖅᑎᑦᑎᓚᐅᕐᑐᑦ ᐱᓕᕆᖃᑎᖃᕐᓂᐊᕐᓂᕋᖅᖢᑎᒃ ᐊᖑᓇᓱᒃᑎᒃᑯᓐᓂᑦ ᑖᔅᓱᒪ ᐊᕐᕕᐅᑉ ᓂᐊᖁᐊᖓ ᐋᖅᑭᒃᑕᐅᓯᒪᓂᐊᕐᓗᓂ ᐊᐅᓪᓚᕆᐊᕐᕕᒃᒥ ᐊᑐᕆᐊᑉ ᖃᓂᒋᔭᖓᓂᒃ ᓄᓇᓕᖕᓂ. (ᐊᔾᔨᓕᐅᕆᔨ ᐱᐊᓪ ᕗᐃᓕᐊᒻᔅ, ᑐᓂᔭᐅᔪᖅ ᓄᓇᑦᓯᐊᒥ ᐱᕙᓪᓕᐊᔪᓄᑦ)

By ᑕᐃᕕᑦ ᓛᕼᐄᑦ

For English version, see Bowhead whale skull display coming to Iqaluit

ᐸᕐᓇᒃᐸᓪᓕᐊᓇᓱᒃᑐᑦ ᐊᕐᕕᐅᑉ ᓂᐊᖁᐊᖓᓂ ᓴᐅᓂᕐᒥ ᓴᖅᑭᔮᖅᑎᑦᑎᔪᒪᓂᕐᒥ ᓂᕈᐊᓚᐅᕐᑎᓪᓗᒋᑦ ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔩᑦ ᓯᑎᐱᕆ 13ᒥ.

ᑲᑎᒪᔩᑦ ᓂᕈᐊᓚᐅᕐᒪᑕ ᑕᒪᕐᒥ ᐊᖏᖅᖢᑎᒃ ᐱᓕᕆᐊᒥᒃ ᐅᑯᓇᙶᖅᖢᓂ ᓄᓇᓕᐸᐅᔭᐃᑦ ᐱᙳᐊᖅᑐᓕᕆᔨᖏᓐᓂᒃ. ᑲᑎᒪᔩᑦ ᓵᓚᒪᓐ ᐊᕙ, ᓴᐃᒪᓐ ᓇᑖᖅ, ᕈᒥᓐ ᓯᑏᕙᓐᓴᓐ ᐊᒻᒪ ᐅᑲᓕᖅ ᑰᓕ ᐅᐸᒃᓯᒪᓚᐅᕐᑐᑦ ᓂᕈᐊᖅᑎᓪᓗᒋᑦ ᐊᒻᒪ ᒪᐃᔭ ᑲᓂ ᐱᐊᓪ ᑲᑎᒪᑎᑦᑎᓪᓗᓂ ᖃᕋᓴᐅᔭᒃᑯᑦ.

ᐊᕐᕕᐅᑉ ᓂᐊᖁᐊᖓ ᐊᕐᕕᑕᐅᓚᐅᕐᑐᖅ ᐊᒪᕈᖅ ᐊᖑᓇᓱᒃᑐᓕᕆᔨᒃᑯᓐᓄᑦ ᐋᒐᓯᐅᑎᓪᓗᒍ ᕼᐃᐅᓪ ᕿᑭᖅᑕᐅᑉ ᖃᓂᒋᔭᖓᓂᒃ ᒫᓂ 15 ᑭᓛᒥᑕᓂ ᐃᖃᓗᐃᑦ ᓂᒋᐊᑕ ᐱᖓᖕᓇᖓᓂᒃ.

“ᐃᒪᓐᓇᐅᙱᒻᒪ ᖃᐅᑕᒫᓐ ᐊᕐᕕᒃᑐᖃᖅᐸᒃᖢᓂ,” ᐅᖃᕐᑐᖅ ᓯᑕᕙᓂ ᑲᓛᒃ, ᓄᓇᓕᐸᐅᔭᐃᑦ ᐱᙳᐊᖅᑐᓕᕆᔨᖏᓐᓄᑦ ᑐᑭᒧᐊᖅᑎᑦᑎᔨ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

ᐊᕐᕕᐅᑉ ᓂᐊᖁᐊᖓ ᐋᖅᑭᒃᑕᐅᓯᒪᓂᐊᕐᑐᖅ ᐃᓕᔾᔨᕕᖃᕐᓗᓂ ᐊᒻᒪᓗ ᑎᑎᖃᖃᕐᓗᓂ ᑭᓱᒥ ᐱᔾᔪᑎᖃᕐᓂᖏᓐᓂᒃ ᐊᖑᓇᓱᓚᐅᕐᒪᖔᑕ ᐊᕐᕕᒃᒥ.

ᐅᓇ ᐋᖅᑭᒃᑕᐅᓇᔭᖅᑐᖅ ᓂᕈᐊᕆᔭᐅᔪᒥ ᐅᑯᓇᙵᑦ ᐱᖓᓱᓂᒃ: ᓂᐅᕕᖅᑎᒃᑯᑦ ᓂᐅᕕᕐᕕᐊᓂ ᓂᐊᖁᙴᒧᑦ ᐊᑐᕆᐊᑉ ᐃᓱᐊᓂ, ᐃᖃᓗᐃᑦ ᓯᒡᔭᖓᓂᒃ, ᐅᕝᕙᓘᓐᓃᑦ ᐃᓐᓇᑐᖃᐃᑦ ᖃᒻᒪᖓᑕ ᑎᒫᓂᒃ ᐃᒪᐅᑉ ᖃᓂᒋᔭᖓᓂᒃ.

ᓴᖅᑭᔮᖅᑎᑦᑎᔾᔪᑎᒋᔭᐅᔪᕐᓕ ᒪᑯᐊ ᐃᒪᕐᒥᐅᑕ ᓂᕐᔪᑏᑦ ᐊᒃᑐᐊᓂᖃᕐᓂᖏᓐᓂᒃ ᓄᓇᓕᖕᓂ ᐊᒻᒪ ᐃᓄᐃᑦ ᐃᓕᖅᑯᓯᖓᓂᒃ, ᓄᓇᓕᐸᐅᔭᐃᑦ ᑎᑎᕋᕐᓯᒪᓚᐅᕐᑐᑦ.

ᑲᓛᒃ ᐅᖃᓚᐅᕐᒥᔪᖅ ᐅᓂᒃᑳᓕᐊᒥᙶᖅᓯᒪᔪᒥᙶᕐᓂᖓᓂᒃ, ᓄᓇᓕᖕᓂ ᐊᖑᓇᓱᒃᑏᑦ ᑲᑎᖢᑎᒃ ᓂᕿᖃᖅᑎᑦᑎᓂᖏᓐᓂᒃ ᓄᓇᓕᖕᓂ.

“ᓴᖅᑭᑎᑦᑎᓯᒪᔾᔪᑎᐅᔪᒥᓇᕐᒪ ᓴᙱᔪᒥᒃ ᑕᐃᒪᓐᓇ,” ᐅᖃᕐᑐᖅ.

ᐅᓇ ᐊᖑᓇᓱᒃᑐᓕᕆᔨᓄᑦ ᑕᐃᒪᓐᓇ ᐃᓱᒪᒋᔭᐅᓕᓚᐅᕐᓯᒪᔪᑦ ᐊᒻᒪᓗ ᑖᒃᑯᐊ ᓄᓇᓕᐸᐅᔭᓂᒃ ᐅᖃᖃᑎᖃᖅᖢᑎᒃ ᑖᔅᓱᒥᖓ ᓂᐊᖁᐊᕐᒥ ᓴᖅᑭᔮᖅᑎᑦᑎᔪᒪᓂᖏᓐᓂᒃ.

ᑲᓛᒃ ᐅᖃᓚᐅᕐᑐᖅ ᑕᒪᓐᓇ ᓈᒻᒪᓈᕐᓯᒪᓂᖓᓂᒃ ᓲᖃᐃᒻᒪ ᓄᓇᓕᐸᐅᔭᐃᑦ ᐊᑐᕆᐊᒥ ᐋᖅᑭᒃᓱᐃᓚᐅᕐᓯᒪᖕᒪᑕ ᐊᒻᒪᓗ ᖃᓄᖅ ᐋᖅᑭᒃᓱᖅᑕᖏᑦ ᖃᓄᐃᓕᖓᓂᐊᕐᒪᖔᑦ ᐃᓱᒪᒃᓴᖅᓯᐅᑲᑕᒃᖢᑎᒃ ᓄᓇᓕᖕᓂ ᐊᒃᑐᐃᒍᑎᐅᓇᔭᖅᑐᓂᒃ ᐊᒻᒪ ᐃᓕᖅᑯᓯᕐᒧᑦ ᓈᒻᒪᒐᔭᖅᑐᓂᒃ.

“ᑕᐃᒪᓕ ᐱᖁᑎᖃᕋᑦᑕ ᓄᓇᒥ ᖃᐅᔨᒪᔾᔪᑎᒥᒃ ᐅᐸᒍᓐᓇᕋᔭᖅᑕᑦᑎᓐᓂᒃ,” ᑲᓛᒃ ᐅᖃᕐᑐᖅ.

ᐅᖃᓚᐅᕐᒥᔪᖅ ᑖᓐᓇ ᐃᓂᒋᓂᐊᕐᑕᖓ ᓇᓗᓇᐃᒃᑯᑎᐅᓇᔭᕐᓂᖓᓂᒃ ᐱᒋᐊᕐᕕᐅᓕᕈᓐᓇᖅᑐᓂᒃ ᐋᖅᑭᒃᓱᐃᕙᓪᓕᐊᓂᕐᒥ ᐊᑐᕆᐊᖑᔪᓐᓇᖅᑐᓂᒃ ᖃᓂᑦᑐᓂᒃ.

ᒫᓐᓇᒧᓪᓕ ᓄᓇᓕᐸᐅᔭᐃᑦ ᐃᓱᒪᔪᑦ ᐊᑭᖃᕋᔭᕐᓂᖓᓂᒃ ᒫᓂ $40,000, ᐅᖃᕐᑐᖅ ᑲᓛᒃ. ᑭᓯᐊᓂᓕ ᐅᓇ ᐃᓱᒪᒋᔭᐅᔪᖅ ᑕᐃᒪᓐᓇᐅᓇᔭᕆᐊᒃᓴᖓᓂᒃ ᓲᖃᐃᒻᒪ ᐅᖃᓪᓚᖃᑎᖃᑲᑕᒃᑲᓐᓂᕆᐊᖃᕐᑐᖅ ᐊᖑᓇᓱᒃᑐᓕᕆᔨᓂᒃ ᑭᓱᓂ ᐱᔭᕆᐊᖃᕐᒪᖔᑦ ᓴᓇᔭᐅᓂᐊᕐᓂᖓᓄᑦ.

ᑮᓇᐅᔭᐃᑦ ᒐᕙᒪᑐᖃᒃᑯᓐᓂᙶᕋᔭᕐᑐᖅ ᐃᑲᔫᑎᒃᓴᖏᓐᓂᒃ ᓯᓚᒥ ᖃᓄᐃᓕᐅᕐᕕᒃᓴᓄᑦ ᐋᖅᑭᒃᑕᐅᓯᒪᔪᓂᒃ ᑲᓛᒃ ᐅᖃᕐᑐᖅ.

ᓄᓇᓕᐸᐅᔭᐃᑦ ᐅᖃᖃᑎᖃᓚᐅᕐᒥᔪᖅ ᓄᓇᕗᑦ ᑐᙵᕕᒃᑯᓐᓂᒃ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓂᒃ ᐊᒻᒪ ᕿᑭᖅᑖᓗᒃ ᑯᐊᐳᕇᓴᓐᑯᓐᓂᒃ, ᐃᓚᐅᔪᒪᔭᕆᐊᒃᓴᖏᓐᓂᒃ ᓂᐊᖁᐊᕐᒥ ᓴᖅᑭᔮᖅᑎᑦᑎᓂᕐᒥᒃ.

“ᑭᒃᑯᓕᒫᑦ ᑖᔅᓱᒥᖓ ᐱᓕᕆᐊᖃᕈᒪᖅᑰᔨᔪᑦ ᐊᒻᒪᓗ ᐃᓱᒪᒋᔭᐅᓂᖓ ᐱᐅᕈᓘᔭᕐᖢᓂ,” ᑲᓛᒃ ᐅᖃᕐᑐᖅ.

ᒫᓐᓇᐅᔪᕐᓕ, ᐅᖃᓚᐅᕐᑐᖅ ᐅᖃᕈᓐᓇᙱᓐᓂᕋᖅᖢᓂ ᖃᑯᒍᒻᒪᕆᒃ ᑖᓐᓇ ᓴᖅᑭᔮᖅᑐᒃᓴᖅ ᐱᐊᓂᒃᑕᐅᓂᐊᕐᒪᖔᑦ, ᑭᓯᐊᓂᓕ ᐃᓱᒪᔪᖅ ᐃᓂᒃᓴᖓ ᐊᕐᕌᒍ ᐱᐊᓂᒃᑕᐅᓇᔭᕐᓂᖓᓂᒃ.

ᐅᑯᑎᒎᓇᕐᓕ ᓄᓇᕐᔪᐊᕐᒥ ᐆᒪᔪᓕᕆᔨᕐᔪᐊᒃᑯᓐᓄᑦ ᒪᑯᐊ ᐊᕐᕖᑦ ᐅᖁᒪᐃᓐᓂᖃᖃᑦᑕᖅᑐᑦ ᑎᑭᖢᒍ 100 ᑕᓐᔅ. ᑖᓐᓇ ᓂᐊᖁᐊᖓ ᐊᖏᑎᒋᓂᓕ ᓲᕐᓗ ᐱᖓᓱᐃᕐᓗᒍ ᐊᕕᒃᑐᕈᓂ ᐱᖓᔪᒋᔭᐅᓇᔭᖅᖢᓂ ᐊᒻᒪᓗ ᓯᑯᒥ ᓱᕋᒃᑎᕆᔪᓐᓇᖅᖢᑎ 20 ᓴᓐᑎᒦᑕᔅ ᐃᔾᔪᓂᖃᖅᑐᓂᒃ ᑕᕆᐅᕐᒥᐅᑕᑦ ᐊᓂᕐᓵᕐᕕᖃᕈᓐᓇᕐᓂᐊᕐᒪᑕ.

Share This Story

(0) Comments