ᐃᒡᓗᕋᓛᓄᑦ ‘ᐋᖅᑭᒃᓱᑦᑎᐊᖅᓯᒪᙱᑦᑐᓂ’ ᑕᓯᕐᔪᐊᕐᒥ ‘ᑲᙳᓇᖅᑐᖅ’, ᐅᖃᖅᐳᖅ ᑲᑎᒪᔨ

For English version, see Cabin ‘free-for-all’ at Sylvia Grinnell River ’embarrassing,’ says councillor

“ᐋᖅᑭᒃᓱᑦᑎᐊᖅᓯᒪᙱᑦᑐᓂ” ᐃᒡᓗᕋᓛᓕᐅᕐᓂᕐᒥ ᑕᓯᕐᔪᐊᕐᒥ ᑕᑯᒥᓇᕈᓐᓃᖅᓯᒪᕗᖅ, ᐅᖃᖅᐳᖅ ᐃᖃᓗᖕᓂ ᑲᑎᒪᔨᐅᔪᖅ ᓴᐃᒪᓐ ᓇᑖᖅ.

ᐅᖃᓪᓚᓚᐅᖅᐳᖅ ᐸᕐᓇᐃᓂᕐᒥ ᐊᒻᒪ ᐱᕙᓪᓕᐊᑎᑦᑎᓂᕐᒥ ᑲᑎᒪᔨᕋᓛᖑᔪᓂ ᑲᑎᒪᓂᐅᔪᒥ ᓯᑎᐱᕆ 20−ᒥ, ᖃᔅᓯᐊᕐᔪᖕᓂ ᐃᒡᓗᕋᓛᓂ ᓇᖕᒥᓂᖃᖅᑎᐅᔪᓂ ᖁᙱᐊᕆᐊᖅᑐᓚᐅᖅᑐᓂ ᑲᑎᒪᔨᐅᔪᓂ ᐅᖃᐅᓯᖃᕐᓂᖏᓐᓂ ᖃᓄᖅᑑᕐᓂᐊᕐᓂᖏᓐᓂ ᑎᑭᑉᐸᓪᓕᐊᔪᒥ ᐊᑐᐊᒐᕐᒥ ᐃᒡᓗᕋᓛᓕᐅᕐᓂᕐᒥ ᓄᓇᓕᐸᐅᔭᐅᑉ ᓄᓇᖁᑎᖏᓐᓂ.

ᑲᑎᒪᔨ ᓴᐃᒪᓐ ᓇᑖᖅ ᐅᖃᓪᓚᒃᐳᖅ ᐃᖃᓗᖕᓂ ᓄᓇᓕᐸᐅᔭᒥ ᑲᑎᒪᔨᓄᑦ ᑲᑎᒪᓂᐅᔪᒥ ᔪᓚᐃ 2021−ᒥ. (ᐊᔾᔨᓕᐅᖅᑕᐅᔪᖅ ᑕᐃᕕᑦ ᕕᐊᓐᒧᑦ)

“ᐃᖃᓗᐃᑦ ᑲᑎᑉᐸᖕᓂᖏᓐᓂ ᐃᓄᖃᓪᓗᐊᙱᓚᖅ,” ᓇᑖᖅ ᐅᖃᓚᐅᖅᐳᖅ ᐃᓄᒃᑎᑐᑦ ᐅᖃᖅᖢᓂ ᑐᓵᔨᑎᑎᒍᑦ, ᐃᓚᒋᐊᖅᓯᓪᓗᓂ 35−ᐸᓗᖕᓂ ᐃᓘᕋᓛᖅᑕᖃᕐᓂᖓᓂ ᑕᑉᐸᐅᖓᒃᑲᓐᓂᖅ ᑕᓯᕐᔪᐊᕐᒥ.

“ᑲᙳᓇᒐᓚᒻᒪᕆᒃᐳᖅ ᑕᑯᓂᕐᒥ ᓱᓇᒃᑯᑖᓕᒫᓂ ᐊᒻᒪ ᐃᒡᓗᕋᓛᓂ ᓴᓇᔭᐅᓯᒪᔪᓂ.”

ᐸᕐᓇᐃᔨ ᓴᒫᓐᑕ ᑐᕗᓗ, ᑐᓂᓯᓚᐅᖅᑐᒥ ᑎᑎᖅᑲᒥ ᑲᑎᒪᔨᓄᑦ ᐱᓕᕆᓂᐅᔪᒥ, ᐅᖃᓚᐅᖅᐳᖅ ᑰᒃ ᐃᓚᒋᔭᐅᓇᔭᙱᓚᖅ ᓄᓇᓕᐸᐅᔭᐅᑉ ᐊᑐᐊᒐᖓᓐᓂ, ᑭᓯᐊᓂ ᐸᕐᓇᐃᔩᑦ ᐅᖃᖃᑎᖃᕆᐊᖃᖅᐳᑦ ᓄᓇᖃᖅᑎᐅᔪᓂ ᐊᒻᒪ ᑲᑎᒪᔨᐅᔪᓂ ᐱᔭᕆᐊᖃᑐᐃᓐᓇᕆᐊᓕᖕᒥ ᐅᐸᒃᑕᐅᑦᑕᐃᓕᓂᐅᔪᒥ ᒪᕐᕉᖕᓄᑦ ᐃᒪᖃᕐᕕᓪᓚᕆᐅᔪᓄᑦ ᐊᒻᒪ ᓇᒥ ᐃᒡᓗᕋᓛᓂᑦ ᓴᓇᔭᐅᔪᓐᓇᕐᓂᖏᓐᓂ.

ᓯᑎᐱᕆ 20−ᓯ ᑎᑎᖅᑲᒥ, ᑐᕗᓗ ᓇᓗᓇᐃᖅᓯᕗᖅ ᒪᓕᒋᐊᓕᖕᓂ ᓄᑖᖑᔪᒥ ᐊᑐᐊᒐᕐᒥ ᐱᖃᑐᐃᓐᓇᕆᐊᖃᕐᓂᖓᓂ. ᐃᓚᖃᖅᐳᖅ ᓄᓇᓕᐸᐅᔭᒥ ᐃᒪᐃᑦᑕᕆᐊᖃᑐᐃᓐᓇᕋᔭᕐᓂᖓᓂ:

• ᖃᐅᔨᓴᖅᑕᐅᓂᖏᓐᓂ ᐃᓂᐅᔪᓂ ᐃᒡᓗᕋᓛᑦ ᓴᓇᔭᐅᔪᓐᓇᕋᔭᕐᓂᖏᓐᓂ ᐊᕐᕌᒍᑕᒫᒥ;
• ᓯᕗᓪᓕᐅᔾᔭᐅᑎᑕᐅᖁᔭᐅᔪᓂ “ᐃᓚᖏᓐᓄᑦ ᑐᒃᓯᕋᖅᑐᓄᑦ” ᓴᓇᔪᓐᓇᕐᓂᕐᒧᑦ ᐃᒡᓗᕋᓛᓂᑦ;
• ᐱᔪᓐᓇᕋᔭᕐᓂᖏᓐᓄᑦ ᓈᒻᒪᒋᔭᐅᔪᓂ ᐊᓯᖏᓐᓄᑦ ᑐᒃᓯᕋᖅᑐᓄᑦ, ᐃᓚᖃᖅᑐᒥ ᖃᓄᖅ ᐊᑯᓂᐅᑎᒋᔪᒥ ᓄᓇᕗᒻᒥᐅᑕᐅᓂᖏᓐᓂ ᐅᕝᕙᓘᓐᓃᑦ ᐃᖃᓗᖕᓂ ᐊᒻᒪᓗ ᐃᓅᖕᒪᖔᑕ ᐋᒃᑲᓘᓐᓃᑦ;
• ᐃᒡᓗᕋᓛᒥ ᑲᑎᒪᔨᕋᓛᖑᔪᓂ ᕿᒥᕐᕈᓂᕐᒧᑦ ᑐᒃᓯᕋᖅᑐᓂ;
• ᐊᑐᐊᒐᖃᕐᓂᖅᓴᐅᓗᑎᒃ ᓄᓇᓕᐸᐅᔭᖅ ᒪᓕᒐᐅᔪᓂ ᐊᑐᖅᑎᑦᑎᑦᑎᐊᕐᓂᖅᓴᐅᓂᐊᕐᒪᑕ.

ᐊᑲᐅᙱᓕᐅᕈᑕᐅᔪᓂ ᓄᓇᓕᐸᐅᔭᖅ ᓵᙵᓂᖓᓂ ᐃᒡᓗᕋᓛᓄᑦ ᓇᑉᐸᖅᑎᕆᓂᐅᔪᒥ ᐃᓚᖃᖅᐳᖅ ᓂᐱᐅᔪᓂ, ᓴᓂᓕᐅᕐᓂᖏᓐᓂ, ᐊᒃᑐᐃᓂᐅᔪᓂ ᐃᓂᐅᔪᓄᑦ ᑐᕌᖓᔪᓄᑦ ᐃᓄᓕᒫᓄᑦ ᐊᑐᖅᑕᐅᓂᖓᓂ ᐊᒻᒪ ᓄᓇᓕᖕᓂ ᐊᑐᓕᖅᑎᑕᐅᓂᖓᓂ ᐅᐸᒍᓐᓇᙱᓐᓂᖏᓐᓂ ᓴᓇᔭᐅᓂᐅᔪᓄᑦ ᐃᓂᐅᔪᓄᑦ.

ᐊᒻᒪᓗ, ᐊᑐᖅᑐᐊᕐᓂᖃᙱᒻᒪᑕ ᐃᒡᓗᕋᓛᓄᑦ, ᑐᑭᖃᖅᑐᒥ ᓄᓇᓕᐸᐅᔭᖅ ᖃᐅᔨᒪᙱᓚᑦ ᑭᓇ ᓇᖕᒥᓂᖃᕐᓂᖓᓂ ᓇᓕᐊᑐᐃᓐᓇᒥ ᐃᒡᓗᕋᓛᒥ ᐊᒻᒪᓗ ᖃᐅᔨᒋᐊᕐᕕᒃᓴᖃᙱᑦᑎᐊᖅᐳᑦ ᓇᖕᒥᓂᖃᖅᑎᐅᔪᓂ ᑭᐅᓂᕐᒧᑦ ᐊᑲᐅᙱᓕᐅᕈᑕᐅᔪᓂ ᐃᒡᓗᕋᓛᓄᑦ, ᐅᖃᓚᐅᖅᐳᖅ.

ᐊᑕᐅᓯᐅᔪᒥ ᐊᒃᓱᕈᕐᓇᕐᓂᐅᔪᓂ ᐊᑐᓕᖅᑎᑦᑎᓂᕐᒥ ᓄᑖᒥ ᐊᑐᐊᒐᐅᔪᒥ ᐃᓚᖃᖅᐳᖅ ᖃᓄᖅ ᐱᓕᕆᓂᐊᕐᓂᖏᓐᓂ ᐱᑕᖃᖅᐸᒌᖅᑐᓂ ᐃᒡᓗᕋᓛᓂᑦ, 50−ᒐᓚᖕᓂ 60−ᓅᓪᓗᑎᒃ, ᑐᕗᓗ ᐅᖃᓚᐅᖅᐳᖅ.

“ᐃᓚᖏᑦ ᐃᒡᓗᕋᓛᑦ ᐃᓂᖃᖅᑐᓂ ᓈᒻᒪᙱᑦᑐᓂ ᐃᓂᐅᔪᓂ ᓄᑖᐅᔭᕆᐊᖃᑐᐃᓐᓇᕆᐊᖃᖅᐳᑦ ᐲᖅᑕᐅᓗᑎᒡᓘᓐᓃᑦ ᐃᓱᒪᒋᓇᒍ ᖃᖓᓂ ᓇᑉᐸᖅᑎᕆᔭᐅᓚᐅᕐᓂᖏᓐᓂ,” ᑎᑎᕋᓚᐅᖅᐳᖅ ᑎᑎᖅᑲᒥ.

ᐃᓚᒋᐊᖅᓯᓚᐅᖅᐳᖅ ᑭᓯᐊᓂ ᐊᑐᐊᒐᕐᒥ ᓴᖅᑭᑎᑕᐅᒍᓂ, ᓄᓇᓕᐸᐅᔭᖅ ᑐᒃᓯᕋᕈᓐᓇᖅᐳᑦ “ᐃᕐᙲᓐᓇᑲᐅᑎᒋᒥ ᐲᖅᑕᐅᓂᖏᓐᓂ” ᓇᑉᐊᖅᑎᕆᓯᒪᓂᐅᔪᓂ ᓴᓇᔭᐅᓚᐅᖅᑐᓂ ᑲᑎᒪᔨᒃᑯᑦ ᑭᖑᓂᐊᓂ ᐊᓂᒍᐃᓚᐅᖅᑎᓪᓗᒋᑦ ᓄᖅᑲᖅᑎᑦᑎᓂᐅᓚᐅᑲᒃᑐᒥ ᓴᓇᓂᕐᒥ ᐃᒡᓗᕋᓛᓂ ᔪᓚᐃ 2020−ᒥ.

ᐅᖃᓚᐅᖅᐳᖅ ᐊᕕᓯᒪᓂᖃᕐᓂᖓᓂ ᓄᓇᖃᖅᑎᐅᔪᓂ ᐃᓚᐅᖃᑕᐅᓚᐅᖅᑐᓂ ᓄᓇᓕᐸᐅᔭᐅᑉ ᐅᖃᖃᑎᖃᕐᓂᐅᔪᓂ ᐃᒡᓗᕋᓛᑦ ᐱᔪᓐᓇᖅᑎᑕᐅᓪᓗᐊᕐᒪᖔᑕ ᐋᒃᑲᓘᓐᓃᑦ ᐃᖃᓗᖕᓂ.

ᐃᑲᔪᖅᓱᐃᓂᖃᖅᐳᖅ ᐱᖁᔭᖃᕐᓂᕐᒥ ᓄᓇᖃᖅᑎᐅᔪᑦ ᐃᒡᓗᕋᓛᓂ ᐊᒃᑐᐃᓂᖃᖁᔨᙱᒻᒪᑕ ᓄᓇᒥ ᐊᑐᕐᓂᖏᓐᓂ.

ᑲᑎᒪᓂᐅᔪᒥ, ᑐᕗᓗ ᐅᖃᓚᐅᖅᐳᖅ ᖃᓄᖅᑑᕈᑕᐅᓂᐊᖅᑐᒥ ᒪᓕᒃᑐᒥ ᐅᖃᖃᑎᖃᕐᓂᐅᔪᒥ ᓄᓇᕗᒻᒥ ᐱᓕᕆᐊᖑᔪᓄᑦ ᑕᑯᒃᓴᐅᑎᑦᑎᓂᐅᔪᒥ ᓯᑎᐱᕆ 22−ᒥ, ᐃᓚᖃᖅᑐᒥ ᐊᓯᖏᓐᓂ ᐅᖃᖃᑎᖃᕐᓂᐅᔪᓂ ᐅᓪᓗᓂᑦ.

ᐅᖃᓚᐅᖅᐳᖅ ᓂᕆᐅᖕᓂᖓᓂ ᐊᑐᐊᒐᕐᒥ ᐸᕐᓇᒃᓯᒪᓂᐊᕐᓂᖓᓂ ᐱᕗᐊᕆᒥ.