ᐊᑭᕋᖅᑐᐃᔪᑦ ᐅᖃᖅᐳᑦ ᐃᓄᐃᑦ ᑳᒃᐳᑦ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥ ᕿᒥᕐᕈᔭᐅᓂᖃᖅᑎᓪᓗᒍ
ᖃᓄᐃᓕᖓᓂᐅᔪᑦ ᓯᓚᑖᓂ ᕿᒥᕐᕈᔭᐅᓂᖓᓂ ᓂᕆᐅᒋᔭᐅᕗᖅ 2026−ᒥ, ᒐᕙᒪᒃᑯᓐᓂ ᐅᖃᖅᑎᐅᔪᖅ ᐅᖃᖅᐳᖅ
ᐱᐊᑲ ᒋᔅ, ᕿᑎᐊᓂ, ᑎᒍᒥᐊᖅᐳᖅ ᓇᓗᓇᐃᒃᑯᑕᒥᒃ ᐅᖃᓕᒫᖅᓯᒪᔪᒥ “ᓂᕿᒃᓴᖃᑦᑎᐊᕐᓂᕐᒧᑦ ᐃᓄᖕᓄᑦ ᐱᔪᓐᓇᕐᓂᕆᔭᐅᕗᖅ” ᓈᒻᒪᒃᓴᙱᓐᓂᕐᒥᓂᒃ ᑕᑯᒃᓴᐅᑎᑦᑎᔪᓂᒃ ᐊᑭᕋᖅᑐᖅᑐᓂ ᖁᑦᑎᒃᑐᒥ ᓂᕿᓄᑦ ᐊᑭᖏᓐᓂ ᐃᖃᓗᖕᓂ ᑕᖅᑭᐅᓚᐅᖅᑐᒥ. ᑕᑯᒃᓴᐅᑎᑦᑎᓂᖅ, ᑐᕌᖅᑎᑕᐅᔪᒥ ᑳᑎ ᐅᒃᐱᖕᒧᑦ, ᑲᑎᑎᕆᓚᐅᖅᐳᖅ 30−ᐸᓗᖕᓂ ᓄᓇᖃᖅᑎᐅᔪᓂ ᐊᒻᒪ ᓇᓗᓇᐃᖅᓯᓯᒪᔪᓂ ᐃᓱᒫᓘᑕᐅᔪᓂ ᓴᖅᑭᑕᐅᔪᓂ ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ ᐱᑕᖃᙱᓗᐊᕐᓂᖓᓂ ᓄᑖᙳᕆᐊᖅᑎᑕᐅᓂᐅᔪᓂ ᐊᓗᑭ ᑰᑦᑎᐅᑉ ᑲᔪᓯᔪᒥ ᓯᓚᑖᓂ ᕿᒥᕐᕈᔭᐅᓂᖓᓂ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥ ᑲᓇᑕᒥ. (ᑎᐊᕆᓐ ᓕᐊᑦᔅ ᐊᔾᔨᓕᐅᖅᑕᖓ)
For English version, see Critics say people going hungry while Nutrition North review continues
ᐊᕐᕌᒍ ᐊᑕᐅᓯᕐᒥ ᒐᕙᒪᑐᖃᒃᑯᑦ ᐅᖃᐅᓯᖃᓚᐅᖅᑎᓪᓗᒍ ᓯᓚᑖᒍᑦ ᕿᒥᕐᕈᔭᐅᓂᖓᓂ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥ ᑲᓇᑕᒥ ᓂᕿᓄᑦ ᐃᑲᔫᓯᖅᑕᐅᕙᒃᑐᓂ ᐱᓕᕆᐊᖑᔪᒥ, ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ ᐅᖃᖅᐳᖅ ᓱᓕ ᐅᑕᖅᑭᓂᖓᓂ ᓄᑖᙳᕆᐊᖅᑎᑕᐅᓂᐅᔪᓂ.
ᒫᓐᓇᐅᔪᒥ, ᐅᖃᖅᐳᖅ, ᓂᕿᒃᓴᖃᑦᑎᐊᙱᓐᓂᐅᔪᒥ ᐊᑲᐅᙱᓕᐅᕈᑎᖃᐃᓐᓇᖅᐳᖅ ᓄᓇᕗᒻᒥ.
ᕿᒥᕐᕈᔭᐅᓂᖓ, ᐅᖃᐅᓯᐅᔪᖅ ᐅᒃᑐᐱᕆ 11, 2024−ᒥ, ᐱᓪᓚᕆᙳᖅᑎᑕᐅᓚᐅᖅᐳᖅ ᕕᕗᐊᕆᒥ.
ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᕆᓚᐅᖅᓯᒪᔭᖓ ᐊᓗᑭ ᑰᑦᑎᖅ, ᒐᕙᒪᑐᖃᒃᑯᑦ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᒥᓂᔅᑕᐅᑉ ᐊᓯᐊᒎᖅᑐᒥ ᑭᒡᒐᖅᑐᐃᔨᒋᔭᖓ ᑐᕌᖅᑎᑦᑎᕗᖅ ᕿᒥᕐᕈᔭᐅᓂᖓᓂ.
“ᐅᒃᐱᕈᓱᖕᓂᖃᑦᑎᐊᖅᐳᖓ ᐊᓗᑭ ᑰᑦᑎᕐᒥ,” ᐃᓪᓚᐅᑦ ᐅᖃᓚᐅᖅᐳᖅ. “ᐅᒃᐱᕈᓱᖕᓂᖃᙱᓚᖓ ᓕᐳᕈᒃᑯᑦ ᒐᕙᒪᖓᑦ ᐊᑐᓕᖅᑎᑦᑎᓂᐊᕐᓂᖓᓂ ᐊᑐᖁᓇᔭᖅᑕᖏᓐᓂ.”
30−ᐸᓗᖕᓂ ᐃᓄᖕᓂ ᐃᖃᓗᖕᓂ ᓈᒻᒪᒃᓴᙱᓐᓂᕐᒥᓂᒃ ᑕᑯᒃᓴᐅᑎᑦᑎᓂᖃᓚᐅᖅᐳᑦ ᐅᒃᑐᐱᕆ 25−ᒥ ᓯᓚᑖᓂ ᓂᐅᕕᕐᕕᐅᑉ ᓂᕿᑖᕐᕕᖓᓂ. ᐅᖃᐅᓯᖃᓚᐅᖅᐳᑦ ᐊᑲᖅᓴᙱᓐᓂᐅᔪᒥ ᖁᑦᑏᓐᓇᐅᔭᖅᑐᓂ ᐊᑭᖏᓐᓂ ᓂᕿᓂᑦ.
“ᖃᐅᔨᒪᔭᕆᐊᖃᓪᓚᕆᒃᐳᒍᑦ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥ ᖃᐅᔨᓴᕐᓂᐅᔪᒥ ᐱᓕᕆᐊᖑᔪᒥ,” ᐋᖅᑭᒃᓱᐃᔨ ᑳᑎ ᐅᒃᐱᒃ ᐅᖃᓚᐅᖅᐳᖅ ᓈᒻᒪᒃᓴᙱᓐᓂᕐᒥᓂᒃ ᑕᑯᒃᓴᐅᑎᑦᑎᓂᐅᔪᒥ.
ᒫᓐᓇᐅᔪᒥ, ᐃᓪᓚᐅᑦ ᐊᐱᖅᓱᖅᐳᖅ ᖃᓄᐃᒻᒪᑦ ᐱᓕᕆᓂᐅᔪᖅ ᐊᑯᓂᐊᓘᓂᖓᓂ ᐃᓱᒪᒋᓇᒍ ᐅᖃᖅᑕᖓᓂ ᐱᕈᖅᐸᓪᓕᐊᓪᓗᓂ ᑐᐊᕕᕐᓇᖅᓯᕙᓪᓕᐊᓂᐅᔪᒥ.
“ᐃᓱᒪᒋᔭᓐᓂ, ᓇᓗᓇᙱᓚᖅ ᓕᐳᕈᒃᑯᑦ ᒐᕙᒪᖓ ᐃᓱᒪᒋᔭᖃᙱᓚᑦ ᓄᓇᕗᒻᒥᐅᓂ ᐊᑐᖅᐸᒃᑐᓂ ᒐᕙᒪᑐᖃᒃᑯᓐᓂ ᐱᓕᕆᐊᖑᔪᓂ ᐊᓯᐊᓄᑦ ᓴᙳᕝᕕᒃᓴᖃᙱᒻᒪᑕ,” ᐃᓪᓚᐅᑦ ᐅᖃᓚᐅᖅᐳᖅ.
ᕿᒥᕐᕈᔭᐅᓂᖓ ᐱᓕᕆᐊᖑᕙᓪᓕᐊᕗᖅ ᐊᒻᒪ ᓈᒻᒪᑦᑎᐊᖅᖢᓂ ᐱᔭᕇᖅᑐᒃᓴᐅᑕᐅᓪᓗᓂ 2026−ᒥ, ᐅᖃᓚᐅᖅᐳᖅ ᐃᐊᕆᑲ ᓛᔅᐳᕈᒃ ᓅᑦᓴᓐ, ᑐᓴᒐᒃᓴᓕᕆᓂᕐᒧᑦ ᑎᑎᕋᖅᑎ ᐅᐊᖕᓇᒥ ᐊᒻᒪ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᒥᓂᔅᑕᒧᑦ ᕇᐱᑲ ᓵᑐᕋᓐᑦᒧᑦ.
“ᒥᓂᔅᓴᒧᑦ ᐊᓯᐊᒎᖅᑐᒥ ᑭᒡᒐᖅᑐᐃᔨᐅᔪᖅ, ᐊᓗᑭ ᑰᑦᑎᖅ, ᖃᐅᔨᓴᖅᐳᖅ ᐊᑑᑎᖃᑦᑎᐊᕐᓂᖓᓂ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᖑᔪᓂ ᑭᐅᓂᕐᒥ ᓂᕿᒃᓴᖃᑦᑎᐊᕐᓂᕐᒧᑦ ᑕᒪᒃᑭᓄᑦ ᐱᔪᓐᓇᖅᑐᓂ ᐱᕙᒃᑐᓂ ᐅᖓᓯᒃᑐᒥ ᐅᑭᐅᖅᑕᖅᑐᒥ ᓄᓇᓕᐅᔪᓂ,” ᓛᔅᐳᕈᒃ ᓅᑦᓴᓐ ᐅᖃᓚᐅᖅᐳᖅ.
ᐱᓕᕆᓂᕐᒥ ᕿᒥᕐᕈᔭᐅᓂᖓᓂ, ᑰᑦᑎᖅ ᑲᑎᒪᖃᑎᖃᖅᐳᖅ ᒐᕙᒪᑐᖃᒃᑯᓐᓂ ᐊᒻᒪ ᑲᑐᔾᔨᖃᑎᒌᖑᔪᓂ, ᐃᓚᖃᖅᑐᒥ ᑭᖕᒧᑦ-ᓄᓇᖃᖅᑳᖅᓯᒪᔪᓄᑦ ᐱᓕᕆᖃᑎᒌᖕᓂᐅᔪᓂ ᐊᒻᒪ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᑲᓇᑕᒥ, ᐊᒻᒪᓗᑦᑕᐅᖅ ᑲᓇᑕᒥ ᐊᒻᒪ ᐊᕕᒃᑐᖅᓯᒪᓂᐅᔪᓂ ᐊᓪᓚᓄᑦ ᐊᒻᒪ ᐃᓄᖕᓄᑦ ᑲᑐᔾᔨᖃᑎᒌᖑᔪᓂ, ᓂᐅᕕᕐᕕᓂᑦ, ᑐᓂᓯᔨᐅᔪᓂ ᐊᒻᒪ ᐅᓯᑲᑦᑕᖅᐸᒃᑐᓂ ᑐᓂᓯᔨᐅᔪᓂ.
ᑰᑦᑎᖅ ᐅᖃᖃᑎᖃᕆᕗᖅ ᖃᐅᔨᓴᖅᑎᓂ ᑐᕌᖅᑎᑦᑎᔪᓂ ᓂᕿᑦᑎᐊᕙᓕᕆᓂᕐᒥ ᐅᑭᐅᖅᑕᖅᑐᒥ-ᑮᓇᐅᔭᖃᖅᑎᑕᐅᔪᓂ ᐱᓕᕆᐊᒃᓴᐅᔪᓂ ᐃᓱᒪᒃᓴᖅᓯᐅᕆᓂᕐᒥ ᓇᓂᔭᐅᓂᐅᔪᓂ ᐊᒻᒪ ᐱᓕᕆᐊᖑᔪᒧᑦ ᐊᑐᖁᔭᐅᓇᔭᖅᑐᓂ.
ᐱᓕᕆᕝᕕᒃ ᐅᔾᔨᕆᓚᐅᕆᕗᑦ ᑰᑦᑎᐅᑉ ᐱᓕᕆᓂᖓ “ᐃᒻᒥᒃᑰᖓᓂᖓᓂ” ᐊᒻᒪ ᓇᓚᐅᑦᑖᕆᔭᐅᔪᓂ ᐅᕝᕙᓘᓐᓃᑦ ᑮᓇᐅᔭᓂᒃ ᐊᑐᖅᑕᐅᔪᓂ ᓯᓚᑖᓂ ᕿᒥᕐᕈᔭᐅᓂᖓᓂ ᓇᓗᓇᐃᖅᑕᐅᔾᔮᙱᓐᓂᖓᓂ “ᑭᓯᐊᓂ ᐱᔭᕇᖅᑕᐅᒍᓂ ᕿᒥᕐᕈᔭᐅᓂᖓᓂ ᑐᓂᔭᐅᒍᓂ.”
ᑰᑦᑎᖅ ᑭᐅᓚᐅᙱᓚᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᑐᒃᓯᕋᕐᓂᖓᓂ ᐊᐱᖅᓱᖅᑕᐅᓂᖓᓄᑦ.
“ᖃᐅᔨᒋᐊᒃᑲᓐᓂᕐᓗᓂ, ᓄᑖᙳᕆᐊᖅᑎᑦᑎᓂᕐᒥ ᐱᓕᕆᖑᓂᐅᔪᒥ ᓯᓚᑖᓂ ᕿᒥᕐᕈᔭᐅᓂᖓᓂ, ᐊᒻᒪ ᓱᒃᑲᒃᑎᒋᐊᖅᓯᓗᓂ ᐊᑐᐊᒐᓂᑦ ᐃᑲᔪᕈᓐᓇᖅᑐᒥ ᖃᓱᒋᐊᖅᓯᓂᕐᒥ ᐊᔪᖅᓴᕐᓂᐅᔪᒥ. ᑐᐊᕕᕐᓇᖅᑐᒦᓯᒪᕗᒍᑦ ᐊᑯᓂᐅᓂᖅᓴᐅᔪᒥ ᐊᒥᐊᒃᑯᖓᓂ ᑲᓇᑕᒥ,” ᐅᖃᓚᐅᖅᐳᖅ ᐃᓪᓚᐅᑦ, ᐅᖃᐅᓯᖃᖅᖢᓂ ᒐᕙᒪᑐᖃᒃᑯᓐᓄᑦ.
(0) Comments