ᐃᓄᑐᖃᓄᑦ ᓄᓇᓯᐅᑎᖓ ᐊᖅᑯᑎᒧᐊᕈᓐᓇᖅᐳᖅ 2027−ᒥ, ᓯᕗᓕᖅᑎ ᐅᖃᖅᐳᖅ
ᓄᓇᕗᒻᒥ ᒐᕙᒪᒃᑯᑦ ᑐᓂᓯᓂᐊᖅᐳᖅ ᖃᐃᖁᔨᓂᐅᔪᒥ ᑐᒃᓯᕋᐅᑎᓂ $1.25 ᒥᓕᐊᓐᓂ ᐊᖏᖅᑕᐅᓯᒪᔪᓂ ᐊᐅᓚᑕᐅᓂᖓᓂ ᑮᓇᐅᔭᖃᕐᓗᓂ
ᓴᐅᒥᖕᒥ, ᑕᐃᔅᓱᒪᓂ−ᒪᓕᒐᓕᐅᖅᑎᒃᓴᒧᑦ−ᓂᕈᐊᒐᒃᓴᐃᑦ ᒍᐃᓐ ᕼᐄᓕ ᐊᒻᒪ ᔪᐊᔾ ᕼᐃᒃᔅ. ᐃᓚᖃᖅᑐᒥ ᐅᑭᐅᖅᑕᖅᑐᒥ ᐱᓕᒻᒪᒃᓴᓂᕐᒥ ᓕᒥᑎᑦ ᐊᖓᔪᖅᑳᖓ ᐹᓪ ᑕᐃᓐᑎᓐ, ᐳᓚᕋᖅᐳᑦ ᐃᖃᓗᖕᓂ ᐃᓄᑐᖃᒃᑯᑦ ᓄᓇᓯᐅᑎᖓᓐᓂ ᐅᒃᑐᐱᕆ 2025−ᒥ ᓯᕗᓂᐊᓂ ᐊᕿᑦᑐᒥ ᐱᒋᐊᖅᑕᐅᓂᖓᓂ ᐱᔨᑦᑎᕋᕐᓂᐅᔪᒥ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ ᔨᐊᕝ ᐱᓚᑦᑎᐊᐃᒧᑦ)
For the English version of this story, please see Elder van project could hit the streets in 2027, premier says.
ᑕᓪᓕᒪᓂ ᐊᑐᐃᓐᓇᐅᔪᓂ ᓄᓇᓯᐅᑎᓂ ᐃᓄᑐᖃᑦ ᓄᓇᓯᐅᑎᓂ ᓂᐅᕕᖅᑕᐅᓚᐅᖅᑐᓂ $1 ᒥᓕᐊᓐᓂ ᐃᓄᓕᒫᓄᑦ ᑮᓇᐅᔭᖏᓐᓂ ᓱᓕ ᐅᖅᑯᑎᒦᙱᓚᑦ ᐊᕐᕌᒍ ᐊᑕᐅᓯᕐᒥ ᐊᖅᑯᑎᒦᓐᓇᑎᒃ ᓯᕗᓪᓕᖅᐹᒥ ᐱᓕᕆᐊᕆᔭᐅᔪᒥ ᓇᓗᓇᐃᖅᓯᓚᐅᖅᑎᓪᓗᒍ ᑕᐃᒪᐃᑦᑐᒥ ᐱᔨᖅᑎᕋᕐᓂᐅᔪᒥ.
ᑐᓂᓯᔪᓐᓇᙱᑎᓪᓗᒍ ᓇᓗᓇᐃᖅᑕᐅᓯᒪᓂᖓᓂ ᖃᖓ ᐱᔭᕇᖅᓯᒪᔭᕆᐊᖃᕐᓂᖓᓂ ᓄᓇᓯᐅᑎᓄᑦ ᐱᒋᐊᖅᑎᑕᐅᓪᓚᕆᖕᓂᖓᓂ, ᓯᕗᓕᖅᑎ ᔮᓐ ᒪᐃᓐ ᐅᖃᓚᐅᖅᐳᖅ “ᐱᔪᒪᓂᕆᕙᖓ” ᑕᑯᓂᕐᒥ ᓄᓇᓯᐅᑎᓂ ᐊᐅᓚᑕᐅᒃᑲᓐᓂᕐᓂᖏᓐᓂ 2027−ᒥ — ᐊᕐᕌᒍᑦ ᐱᖓᓱᓂ ᖄᖏᖅᓯᒪᔪᓂ ᓂᐅᕕᖅᑕᐅᓚᐅᖅᑎᓪᓗᒋᑦ.
“ᓄᑖᙳᕆᐊᖅᑎᑕᐅᓂᖓ, ᒫᓐᓇᐅᔪᒥ, ᓱᓕ ᐊᐅᓚᑕᐅᙱᑦᑐᖅ,” ᐅᖃᓚᐅᖅᐳᖅ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ ᐅᒃᑐᐱᕆ 9−ᒥ. “ᑭᓯᐊᓂ, ᒐᕙᒪᕗᑦ ᒪᓕᒍᒪᐅᑎᖃᙱᓚᑦ ᐆᒧᖓ.”
ᐱᓕᕆᐊᒃᓴᖅ ᓄᖅᑲᓚᐅᖅᐳᖅ 2025−ᒥ, ᐃᓱᐊᓂ ᓯᕗᓂᐊᓂ ᒐᕙᒪᒃᑯᑦ ᑲᑎᒪᔨᐅᓂᖏᓐᓂ, ᐱᔾᔪᑎᖃᖅᑐᒥ ᐱᑕᖃᙱᓗᐊᕐᓂᖓᓂ ᐊᐅᓚᑕᐅᓂᖓᓄᑦ ᑮᓇᐅᔭᓂ ᐊᑐᖅᑕᐅᔪᒃᓴᐅᑕᐅᔪᓂ.
ᑕᒪᓐᓇ ᐊᓯᔾᔨᓚᐅᖅᐳᖅ ᐅᐱᕐᙶᖅ 2026−ᒥ ᒪᓕᒐᓕᐅᖅᑏᑦ ᒫᓐᓇᐅᔪᒥ ᒪᓕᒐᓕᐅᕐᕕᖕᒥ ᐊᖏᓚᐅᖅᑎᓪᓗᒋ $1.25 ᒥᓕᐊᓐᓂ ᖄᒃᑲᓐᓂᐊᒍᑦ ᑮᓇᐅᔭᖃᖅᑎᑦᑎᓂᕐᒥ, ᒪᐃᓐ ᐅᖃᓚᐅᖅᐳᖅ.
ᐸᓯᒥ ᐱᔨᑦᑎᕋᕐᓂᖅ ᓯᕗᓪᓕᖅᐹᒥ ᐅᖃᐅᓯᐅᓚᐅᖅᑎᓪᓗᒍ, ᐱᓕᕆᖃᑎᖃᕐᓂᐅᓚᐅᖅᐳᖅ ᐅᑭᐅᖅᑕᖅᑐᒥ ᓯᕗᓂᒃᓴᒧᑦ ᐊᔪᙱᓐᓂᐅᔪᓂ ᐱᕙᓪᓕᐊᑎᑕᐅᓂᖓᓂ, ᐅᑭᐅᖅᑕᖅᑐᒥ ᐱᓕᒻᒪᒃᓴᓂᕐᒥ ᓕᒥᑎᒃᑯᓐᓂᑦ, ᐊᒻᒪ ᑐᒃᑐ ᑖᒃᓯᓂᑦ.
ᐊᑕᐅᓯᕐᒥ ᓄᓇᓯᐅᑎᖃᖅᐳᑦ ᐊᑐᓂ ᑕᓪᓕᒪᓂ ᓄᓇᓕᐅᔪᓂ: ᐃᖃᓗᐃᑦ, ᐃᖃᓗᒃᑑᑦᑎᐊᖅ, ᑲᖏᖅᖠᓂᖅ, ᓴᓪᓕᑦ ᐊᒻᒪ ᐸᖕᓂᖅᑑᒥ. ᐅᑭᐅᖅᑕᖅᑐᒥ ᓯᕗᓂᒃᓴᒧᑦ ᐊᔪᙱᓐᓂᐅᔪᓂ ᐱᕙᓪᓕᐊᑎᑕᐅᓂᖓᓂ, ᓇᖕᒥᓂᕆᔭᐅᔪᒥ ᑲᒻᐸᓂᐅᔪᒥ, ᓂᐅᕕᓚᐅᖅᐳᑦ ᑮᓇᐅᔭᖃᖅᑎᑕᐅᓪᓗᑎᒃ ᓄᓇᕗᒻᒥ ᒐᕙᒪᒃᑯᓐᓂ.
ᖁᑉᐸ ᒪᐃᒃ ᓇᖏᖅᐳᖅ ᓴᓂᓕᐊᓂ ᐃᓄᑐᖃᑦ ᐸᓯᖓᓂ ᐊᐅᓚᑕᐅᔪᒥ ᐸᐃᕆᓃᑦ ᑲᑐᔾᔨᖃᑎᒌᖏᑦ ᐃᖃᓗᖕᓂ ᐃᓄᑐᖃᑦ’ ᖃᒻᒪᖓᓂ ᐅᒃᑐᐱᕆ 9−ᒥ. (ᑎᐊᕆᓐ ᓕᐊᑦᔅ ᐊᔾᔨᖁᑎᖓ)
ᑭᒡᒐᖅᑐᐃᔨᐅᔪᓂ ᐅᑭᐅᖅᑕᖅᑐᒥ ᐱᓕᒻᒪᒃᓴᓂᕐᒥ ᓕᒥᑎᑯᓐᓂᑦ ᐊᒻᒪ ᑐᒃᑐ ᑖᒃᓯᓕᕆᔨᒃᑯᓐᓂ ᐊᑐᐃᓪᓐᓇᐅᓚᐅᙱᓚᑦ ᐅᖃᐅᓯᒃᓴᓕᐅᕐᓂᕐᒥ ᐆᒧᖓ ᐅᓂᒃᑳᓕᐊᖑᔪᒧᑦ.
ᐊᑐᐊᒐᒥ ᐱᕙᓪᓕᐊᑎᑕᐅᕙᓪᓕᐊᕗᖅ ᐱᓕᕆᓂᐅᑉ ᑐᓄᐊᓂ ᐊᒻᒪ, ᐱᔭᕇᖅᑕᐅᒍᓂ, ᒐᕙᒪᒃᑯᑦ ᐸᕐᓇᒃᐳᑦ ᑐᓂᓯᓂᕐᒥ ᖃᐃᖁᔨᓂᐅᔪᒥ ᑐᒃᓯᕋᐅᑎᓂ ᓯᕗᓂᐊᓂ ᐃᓱᐊᓂ 2026−ᒥ, ᒪᐃᓐ ᐅᖃᓚᐅᖅᐳᖅ.
ᓱᓕ ᐃᓱᒪᒃᓴᖅᓯᐅᕈᑕᐅᓂᐊᖅᐳᖅ ᖃᐃᖁᔨᓂᐅᔪᖅ ᐃᓄᓕᒫᓅᖓᓂᐊᕈᓂ ᐅᕝᕙᓘᓐᓃᑦ “ᖃᐃᖁᔨᓂᐅᔪᑎᒍᑦ,” ᐃᓚᒋᐊᖅᓯᓚᐅᖅᐳᖅ.
ᐅᑭᐅᖅᑕᖅᑐᒥ ᐱᓕᒻᒪᒃᓴᓂᕐᒥ ᓕᒥᑎᑦ ᐊᐅᓚᑦᑎᓚᐅᖅᐳᑦ ᓇᖕᒥᓂᖅ-ᑮᓇᐅᔭᖃᖅᑎᑦᑎᓂᐅᔪᒥ, ᕿᓚᒻᒥᐅᔪᒥ ᐊᕿᑦᑐᒥ ᐱᒋᐊᖅᑕᐅᓂᖓᓂ ᐱᔨᑦᑎᕋᕐᓂᐅᔪᒥ ᐃᖃᓗᖕᓂ ᐊᕐᕌᓂᐅᓚᐅᖅᑐᒥ ᐅᒃᑐᐱᕆ 2025−ᒥ. ᑲᒻᐸᓂᐅᔪᖅ ᑭᐅᓚᐅᖅᐳᑦ 200−ᐸᓗᖕᓄᑦ ᐱᔨᑦᑎᕋᕐᓂᕐᒧᑦ ᖃᐃᖁᔨᓂᐅᔪᓂ ᐱᓇᓱᐊᕈᓯᐅᑉ ᓄᙳᐊᓂᑕᒫᒥ.
ᖁᑉᐸ ᒪᐃᒃ, ᑲᑎᒪᔨᐅᖃᑕᐅᔪᖅ ᐸᐃᕆᔩᑦ ᑎᒍᒥᐊᖅᑎᒃᑯᑦ ᐃᖃᓗᖕᓂ ᐃᓄᑐᖃᓄᑦ ᑲᑐᔾᔨᖃᑎᒌᖏᓐᓂ, ᐊᑐᓚᐅᖅᐳᖅ ᓄᓇᓯᐅᒻᒥ ᐱᖓᓱᐃᖅᓱᖅᖢᓂ ᐃᖏᕐᕋᓂᕐᒧᑦ ᐃᓄᑐᖃᒃᑯᑦ ᖃᒻᒪᖓᓄᑦ, ᓂᕿᑖᕐᕕᖕᒥ ᐊᔪᖅᓴᖅᑐᓄᑦ, ᐊᒻᒪ ᓂᕿᓄᑦ ᓂᐅᕕᕐᕕᓄᑦ, ᐅᖃᓚᐅᖅᐳᖅ.
ᓄᑖᖅ ᓄᓇᓯᐅᑎᒧᑦ ᐊᔭᐅᕐᕕᖓ ᐊᒃᓱᕈᕐᓇᒐᓚᓚᐅᖅᐳᖅ ᓂᐅᕐᓗᖁᑎᖓᓄᑦ, ᐅᖃᓚᐅᖅᐳᖅ, ᑭᓯᐊᓂ ᐃᑲᔪᖅᑎᐅᔪᒥ ᐸᓯᒥ ᐊᔪᕐᓇᙱᑎᑦᑎᓚᐅᖅᐳᖅ ᒪᔪᕋᕐᓂᕐᒥ ᑭᓯᐊᓂ ᑎᑭᐅᑎᔪᓐᓇᓕᕋᒥ ᐊᒡᒐᒧᑦ ᑎᒍᒥᐊᕐᕕᓄᑦ ᐃᓄᐊᓂ ᐸᓯᒥ ᐃᑭᓇᓱᐊᖅᑎᓪᓗᒍ, ᐅᖃᓚᐅᖅᐳᖅ.
“ᐱᐅᕐᔪᐊᓚᐅᖅᐳᖅ ᐃᑲᔪᖅᑕᐅᓂᖃᖅᖢᓂ,” ᐅᖃᓚᐅᖅᐳᖅ.
ᐃᓄᑐᖃᑦ ᑲᑐᔾᔨᖃᑎᒌᖑᔪᖅ ᐃᒻᒥᓂᒃ ᐊᐅᓚᑦᑎᕗᑦ ᐱᖓᓱᓂ ᓄᓇᓯᐅᑎᓂ, ᐃᓚᖃᖅᑐᒥ ᐃᓄᑐᖃᓄᑦ ᐸᓯᖓᓂ. ᑭᓯᐊᓂ ᐸᓯᐅᑉ ᐊᑐᐃᓐᓇᖃᖅᑎᑦᑎᓂᕐᒥ ᐊᔭᐅᕐᕕᖓ ᓱᕋᒃᓯᒪᖕᒪᑦ ᐊᑯᓂᐊᓗᒃ, ᐅᖃᓚᐅᖅᐳᖅ ᑲᑎᒪᔨᐅᖃᑕᐅᔪᒥ ᐊᐃᓂᐊᖅ ᖁᐊᒐᖅ.
”ᐅᑕᖅᑭᙳᓚᐅᖅᐳᒍᑦ ᓄᑖᒥ ᐸᓯᒥ ᑕᐃᒫᒃ ᐃᓱᒪᒋᔪᓐᓃᓚᐅᖅᐸᕗᑦ” ᒪᐃᒃ ᐃᓚᒋᐊᖅᓯᓚᐅᖅᐳᖅ.
“ᐅᔾᔨᕈᓱᒃᐳᖓ ᐊᑯᓂᐸᓘᓂᖓᓂ ᐅᑯᐊ ᓄᓇᓯᐅᑎᑦ ᓯᕗᓪᓕᕐᒥ ᓂᐅᕕᖅᑕᐅᓚᐅᖅᑎᓪᓗᒋᑦ, ᐊᒻᒪᓂᕆᐅᖕᓂᖃᒐᓚᒃᐳᖅ ᐊᒻᒪ ᐊᑲᖅᓴᙱᓐᓂᐅᔪᒥ ᓱᓕᓂᐅᔪᒥ ᓱᓕ ᐊᐅᓚᑕᐅᙱᓐᓂᖏᓐᓂ,” ᒪᐃᓐ ᐅᖃᓚᐅᖅᐳᖅ. “ᒪᓕᒃᑐᒥ ᐱᓕᕆᓂᐅᔪᒥ ᑕᑯᓂᕐᒥ ᐊᑐᐊᒐᕐᒥ ᓴᖅᑭᑎᑕᐅᓂᖓᓂ, ᐊᐅᓚᑦᑎᓇᔭᖅᑐᒥ ᑕᐃᔅᓱᒥᖓ ᑮᓇᐅᔭᖃᖅᑎᑕᐅᓂᐅᔪᒥ ᐊᒻᒪ ᑕᑯᓂᕐᒥ ᐃᖏᕐᕋᓂᖓᓂ ᓄᓇᕗᓕᒫᒥ ᐃᓄᖕᓄᑦ ᐊᐅᓚᑦᑎᓂᐊᖅᑐᓄᑦ ᑕᐃᒪᐃᑦᑐᒥ ᖃᓄᐃᑦᑑᓂᖓᓂ ᐱᔨᑦᑎᕋᕐᓂᐅᔪᒥ.”
(0) Comments