ᖃᓄᖅ ᐊᑕᐅᓯᖅ ᐊᕐᓇᖅ ᑐᑭᓕᐅᕆᓚᐅᕐᒪᖔᑦ 11,000 ᐅᖃᐅᓯᕐᓂᒃ ᐃᓄᒃᑎᑐᑦ ᕙᐃᔅᐳᒃᑯᓐᓄᑦ

ᖃᐅᔨᓴᑲᑕᖕᓂ ᐊᔾᔨᒌᙱᑦᑐᓂᒃ ᐅᖃᐅᓯᐅᔾᔪᓯᕐᓂᒃ. ᑐᑭᓯᓯᒪᔭᕆᐊᖃᕐᓂᖅ ᐊᔾᔨᒌᙱᓐᓂᖏᑦ “ᖁᕕᐊᓱᖕᓂᖅ” ᐊᒻᒪ “ᖁᕕᐊᓱᒻᒪᕆᐊᓗᖕᓂᖅ.” ᐃᓱᒪᖃᑎᖃᑲᑕᖕᓂᕐᓗ ᐅᐃᖓᓂ.

ᑕᐃᒪᐃᓕᐅᑲᑕᒋᐊᖓᖃᓚᐅᕐᑐᖅ ᐃᓚᖃᕈᓘᔭᖅᖢᑎᒡᓗ ᐆᒧᖓ ᔩᓚ ᐸᓪᓗᖅ-ᑯᓘᑦᓯᐄᒧ ᑐᑭᓕᐅᕆᑲᑕᒃᑎᓪᓗᒍ 11,000 ᐅᖓᑖᓃᑦᑐᓂᒃ ᖃᓪᓗᓈᑐᑦ ᐅᖃᐅᓯᕐᓂ ᐃᓄᒃᑎᑑᓕᕆᓪᓗᓂ ᑕᖅᑮᒃ ᒫᕐᕉᒃ ᐅᖓᑖᓂ ᕙᐃᔅᐳᒃᑯᓐᓂ ᓄᑖᖓᓛᒧᑦ ᐅᖃᐅᓯᕐᒧᑦ ᐃᓚᒋᐊᕈᑎᖓᓂᒃ.

ᕿᑭᖅᑖᓘ ᓂᒋᐊᑕ ᐅᖃᓪᓚᐅᓯᖓ ᐃᓚᒋᔭᐅᒻᒪᕆᓕᓚᐅᕐᓯᒪᔪᖅ ᑐᓴᐅᒪᔾᔪᑎᓕᕆᔨᒃᑯᓐᓄᑦ ᖃᐅᔨᒪᔭᐅᓛᒃᑯᑦ ᔪᓚᐃ 8ᖑᑎᓪᓗᒍ, ᑖᓐᓇᓗ ᐊᕐᕌᒍᓂ ᑎᓴᒪᓂ ᐱᓕᕆᖃᑎᒌᖕᓂᒃᑰᖓᔪᖅ ᐅᑯᓄᖓ ᒦᑕ (Meta), ᓇᖕᒥᓂᖃᖅᑐᑦ ᕙᐃᔅᐳᒃᒥ ᐊᒻᒪᓗ ᐅᑯᓄᖓ ᓄᓇᕗᑦ ᑐᙵᕕᒃᑯᓐᓄᑦ.

ᐸᓪᓗᖅ-ᑯᓘᑦᓯᐄ, ᓇᖕᒥᓂᖅ ᐱᓕᕆᐊᖃᖅᑐᖅ ᑯᐸᐃᒃᒥ ᐅᖃᓚᐅᕐᑐᖅ ᐱᒃᑯᓕᓯᒪᓂᖓᓂᒃ ᐃᑲᔪᕈᑎᖃᖅᑐᓂᒃ ᐃᓄᖕᓂ ᐊᑐᖅᑕᐅᔪᓐᓇᖅᑐᓂᒃ ᐊᔪᕈᓐᓃᕐᓴᕐᓂᕐᒥᒃ ᐃᓄᒃᑎᑐᑦ.

“ᓱᐃᒪᔪᖓ ᐃᓚᒋᔭᐅᑎᑕᐅᓚᐅᕐᓂᓄᑦ. ᐊᓕᐊᓇᐃᑦ ᐱᕈᕐᕕᒃ ᑲᑎᒪᔨᒃᑯᑦ ᐅᕙᓐᓄᑦ ᐊᐱᕆᓚᐅᕐᓯᒪᖕᒪᑕ ᐊᒻᒪᓗ ᐅᒃᐱᕈᓱᒃᖢᑎᒃ ᐱᓕᕆᐊᖃᕈᓐᓇᕐᓂᐊᕐᓂᓐᓂᒃ,” ᐅᖃᕐᑐᖅ.

ᓯᕗᓪᓕᖅ ᐸᕐᓇᐅᑎᕕᓂᖅ ᒫᓂ 2018-ᒥ ᐅᑯᐊ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᑦ, ᐅᖃᐅᓯᓕᕆᓂᕐᒥᒃ ᐱᓕᕆᐊᓖᑦ ᓄᓇᕗᒥᑦ ᒐᕙᒪᒃᑯᓐᓄᑦ ᐋᖅᑭᒃᑕᐅᓯᒪᔪᑦ ᐃᑲᔪᕐᓂᐊᕐᓗᑎᒃ ᓄᓇᕗᒥᑦ ᒐᕙᒪᒃᑯᓐᓂᒃ ᑐᑭᓕᐅᕆᓂᕐᒥᒃ.

ᐸᓪᓗᖅ-ᑯᓘᑦᓯᐄ ᐃᖅᑲᓇᐃᔭᓚᐅᕐᑐᖅ ᐅᑯᓄᖓ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᓄᑦ ᑕᐃᔅᓱᒪᓂ. ᐅᖃᓚᐅᕐᑐᖅ ᐱᓕᕆᐊᑎᒌᑦ ᓈᒻᒪᙱᓕᐅᕈᑎᖃᓕᓚᐅᕐᓂᖏᓐᓂᒃ ᓲᕐᓗ ᐃᓚᖏ ᓄᓇᕗᒥᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᕙᐅᔅᐳᒃᒧᐊᕈᓐᓇᙱᖢᑎᒃ ᒐᕙᒪᒃᑯᑦ ᖃᕋᓴᐅᔭᖏᑦᑎᒍᑦ.

ᕙᐃᔅᐳᒃ ᓄᓇᕗᒻᒥᐅᑕᓂᒃ ᐃᓱᒪᒋᔭᖏᓐᓂᒃ ᑐᓴᕈᒪᓚᐅᕐᒥᖕᒪᑕ ᖃᓄᖅ ᐅᖃᐅᓰᑦ ᑐᑭᓕᐅᕆᔭᐅᓇᔭᕆᐊᒃᓴᖏᓐᓂᒃ, ᑭᓯᐊᓂᓕ ᑕᐃᒪᓐᓇ ᐱᓕᕆᐊᒃᓴᖃᕐᓇᕐᓂᖅᓴᐅᓚᐅᕐᑐᖅ, ᐸᓪᓗᖅ-ᑯᓘᑦᓯᐄ ᐅᖃᓚᐅᕐᑐᖅ ᓲᖃᐃᒻᒪ ᑲᒪᒋᔭᕆᐊᖃᖅᖢᓂᒋ ᐊᒻᒪ ᑕᒻᒪᖅᓯᒪᔪᑦ ᑎᑎᕋᕐᓯᒪᓂᖏᑦᑎᒍᑦ ᐋᖅᑭᒋᐊᖃᖅᖢᑎᒃ ᐊᒻᒪ ᐅᖃᐅᓯᕐᓂ ᐊᓯᙳᖅᑎᑦᑎᔭᕆᐊᖃᖅᐸᒃᖢᓂ.

ᕕᕝᕗᐊᕆᐅᑎᓪᓗᒍ ᐸᓪᓗᖅ-ᑯᓘᑦᓯᐄ — ᐃᖅᑲᓇᐃᔭᕈᓐᓃᖅᑎᓪᓗᒍ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᓄᑦᓄ ᐊᒻᒪ ᓇᖕᒥᓂᖅ ᐱᓕᕆᐊᒥᓂ ᐱᓕᕆᐊᖃᓕᖅᑎᓪᓗᒍ, ᕿᓕᖅᑎ ᐃᓄᒃᑐᑦ ᐱᔨᑦᑎᕋᖅᑎᑦ — ᐱᕈᕐᕕᒃᑯᓐᓂᒃ ᐱᓕᕆᑎᑕᐅᓕᓚᐅᕐᓯᒪᔪᖅ ᑐᑭᓕᐅᕆᔨᐅᓂᐊᕐᓗᓂ.

ᑕᖅᑮᒃ ᒪᕐᕉ ᐃᓗᖓᒍᑦ ᑐᑭᓕᐅᕆᓚᐅᕐᓯᒪᔪᖅ 11,225 ᐅᖃᐅᓯᕐᓂ ᐊᒻᒪᓗ 3,775-ᓂ ᐊᑕᐅᓯᑐᐊᖑᙱᑦᑐᒥ ᑐᑭᖃᕈᓐᓇᖅᑐᓂᒃ.

ᐃᓛᓐᓇ ᐅᖃᐅᓰᑦ ᐅᖃᐅᓯᐅᒃᑲᓐᓂᖃᑦᑕᓚᐅᕐᒥᔪᑦ ᑭᓯᐊᓂᓕ ᑕᒪᒃᑯᐊ ᐅᖃᐅᓰᑦ ᐊᔾᔨᒌᙱᑦᑐᓂᒃ ᑐᑭᖃᖅᐸᒃᖢᑎᒃ ᐊᒻᒪ ᑐᑭᓕᐅᕆᔭᕆᐊᖃᖅᖢᑎᒃ ᐊᔾᔨᒌᙱᑦᑐᓂᒃ ᐃᓄᒃᑎᑐᑦ.

ᓲᕐᒃᓗ, “ᓄᓇᓕᒃ” ᓄᓇᕗᒻᒥᐅᓄᑦ ᑐᑭᖃᕈᓐᓇᕐᒪᑦ ᓄᓇᖃᖅᑎᒌᓂᒃ ᓲᕐᓗ ᐆᑐᓇᖅ ᐃᒡᓗᓕᒃ, ᑖᓐᓇᓗ ᐃᓄᒃᑎᑐᑦ “ᓄᓇᓕᒃ”ᐅᓪᓗᓂ, ᐅᖃᕐᑐᖅ. ᑭᓯᐊᓂᓕ ᐅᕘᓇ ᕙᐃᔅᐳᒃᑯᑦ ᑐᑭᖃᕋᔭᕐᒪᑦ ᐃᓄᐃᑦ ᐅᓄᕈᓘᔭᕐᑐᑦ, ᑖᓐᓇᓗ ᐃᒪᓐᓇ ᐅᖃᐅᓯᐅᕙᒃᖢᓂ “ᑲᑎᕐᖓᔪᑦ.”

ᐅᓇ ᐅᖃᐅᓯᖅ “ᑭᐅᔾᔪᑎ” ᑐᑭᖃᕈᓐᓇᕐᒥᖓ ᐊᐱᖅᑯᑎᒥ ‘ᑭᐅᓕ; ᐅᕝᕙᓘᓐᓃᑦ ᑭᐅᔾᔪᑎᒥ ᓇᓗᓇᐃᓯᓯᒪᓗᓂᓘᓐᓃᑦ ᐊᐱᖅᑯᑎᒥ (“ᑭᐅᔾᔪᑦ”).

ᐊᔪᕐᓇᓛᖑᓚᐅᕐᑐᕐᓕ ᑐᑭᓕᐅᕆᔭᕆᐊᒃᓴᖅ ᐃᒃᐱᒍᓲᑎᐅᕙᒃᑐᓂᒃ, ᐅᖃᕐᑐᖅ ᐸᓪᓗᖅ-ᑯᓘᑦᓯᐄ.

“ᕙᐃᔅᐳᒃ ᓴᖅᑭᔮᖅᑎᑦᑎᖃᑦᑕᕐᒪᑦ ᐃᒃᐱᒍᓲᑎᐅᔪᓂᒃ ᑭᓯᐊᓂᓕ ᐃᒃᐱᒍᓱᖕᓃᑦ ᐊᔾᔨᖃᐸᓗᖕᒪᑕ ᐃᓄᒃᑐᑦ,” ᐅᖃᕐᑐᖅ, ᐊᑐᖅᖢᓂ “frustrated” ᐅᕝᕙᓘᓐᓃᑦ “ᐊᑲᖅᓴᙱᑦᑐᖅ,” ᐅᓇᓗ “angry,” ᑐᑭᖃᖅᖢᓂ “ᓂᙵᒃᑐᖅ.”

ᑕᒪᓐᓇ ᐊᔪᕐᓇᙱᓐᓂᕐᓴᐅᓇᓱᒃᖢᓂᐅᒃ, ᐸᓪᓗᖅ-ᑯᓘᑦᓯᐄ ᐅᐃᖓ, ᓯᑕᕚᓐ ᐸᓪᓗᖅ-ᑯᓘᑦᓯᐃ, ᖃᐅᔨᑎᑦᑎᓚᐅᕐᑐᖅ ᖃᕋᓴᐅᔭᓄᑦ ᐃᑲᔪᕈᑎᓂᒃ ᐅᖃᐅᓯᕐᓂᒃ ᐋᖅᑭᒃᓱᐃᔾᔪᑎᓂᒃ ᑖᓐᓇᓗ ᐊᕕᒃᑐᐃᔪᓐᓇᖅᖢᓂ ᒫᓂ 1,000-ᖏᓐᓂ ᐅᖃᐅᓯᕐᓂ.

“ᐱᓕᕆᐊᖃᕐᓂᖅ 1,000-ᓂ ᐅᖃᐅᓯᕐᓂ ᐱᓗᐊᙱᓐᓂᕐᓴᖅ ᐱᓕᕆᐊᖃᕐᓂᕐᒥᒡᓕ 11,000-ᓂ ᐅᖃᐅᓯᕐᓂᒃ,” ᐅᖃᕐᓱᖅ ᑎᔅᓯᑦᑕᒃᖢᓂ..

“ᐱᐊᓂᒃᓯᖃᑦᑕᓕᓚᐅᕐᑐᖓ ᐊᑕᐅᓯᕐᓂ ᐱᓕᕆᐊᒃᓴᐅᓯᒪᑎᓪᓗᒋᑦ, ᖁᕕᐊᓲᑎᒋᓚᐅᖅᖢᒍ ᐊᓯᐊᓂ ᐱᔭᒃᓴᒥ ᐱᓕᕆᓕᖅᐸᒃᖢᖓ.”

ᐅᖃᐅᓰᑦ ᕿᑭᖅᑖᓘᑉ ᓂᒋᐊᓂᙶᕐᓂᖅᓴᐅᔪᑦ ᑭᓯᐊᓂᓕ ᑭᕙᓪᓕᕐᒥᐅᑦ ᐊᒻᒪ ᕿᑭᖅᑖᓘᑉ ᐅᐊᖕᓇᖓᓂ ᐅᖃᐅᓯᕐᓂ ᐃᓚᖃᕐᒥᔪᖅ.

ᐸᓪᓗᖅ-ᑯᓘᑦᓯᐄ ᐅᖃᓚᐅᕐᑐᖅ ᐊᔪᕐᓇᕋᔭᙱᓐᓂᖓᓂ ᑭᕙᓪᓕᕐᒥᐅᓄᑦ ᑐᑭᓯᔭᕆᐊᒃᓴᖅ ᐅᖃᐅᓯᐅᓇᓱᒃᑐᑦ.

“ᐅᖃᐅᓯᑦᑕ ᐊᑐᕈᓯᖏᑦ ᒪᐅᓈᖓᓗᐊᕐᒪᑕ ᐅᖃᕈᓯᖅᑎᒍᑦ,” ᐅᖃᕐᑐᖅ, ᐊᑐᖅᖢᓂ ᐅᖃᐅᓯᕐᒥ “ᐅᑉᓗᐃᑦ” ᑭᕙᓪᓕᕐᒥᐅᑎᑐᑦ ᐃᒪᓐᓇᐅᙱᑦᑐᖅ “ᐅᓪᓗᐃᑦ” ᕿᑭᖅᑖᓘᑉ ᓂᒋᐊᓂ ᐅᖃᐅᓯᖅᑎᑐᑦ. ᑕᒪᐃᓐᓂ ᐊᑕᐅᓯᕐᒥ ᑐᑭᖃᖅᖢᑎᒃ.

ᑖᓐᓇ ᐱᓕᕆᐊᒃᓴᖅ ᐱᒋᐊᕐᓯᒪᒐᓗᐊᖅᑎᓪᓗᒍ ᐱᓇᓱᐊᕈᓯᐅᓕᖅᑑᖕᓂ ᒪᕐᕉᖕᓂ ᓱᓕ ᐱᐊᓂᙱᑦᑐᖅ ᐆᒧᖓ ᐸᓪᓗᖅ-ᑯᓘᑦᓯᐄᒧ. ᐅᖃᓚᐅᕐᑐᖅ ᖃᐅᔨᓯᒪᓕᕐᓂᖓᓂᒃ ᑕᒻᒪᖅᓯᒪᔪᓂᒃ ᐋᖅᑭᒋᐊᓕᖕᓂᒃ ᑭᓯᐊᓂᓕ ᖃᓄᐃᓕᐅᕐᓂᕐᒥᓂ ᖁᕕᐊᓱᑐᐃᓐᓇᕐᑐᖅ.

ᐊᓈᓇᖓ ᐋᑐᕚᒦᑎᓪᓗᒍ ᐋᓐᓂᐊᕕᖕᒧᑦ, ᐸᓪᓗᖅ-ᑯᓘᑦᓯᐄ ᐃᓱᒪᔪᖅ ᖃᓄᖅ ᕙᐃᔅᐳᒃ ᐊᓈᓇᖓᓂᒃ ᕿᑐᕐᖓᖏᓐᓂᒃ ᐅᖃᖃᑎᖃᖃᑦᑕᕐᓂᐊᕐᓂᖓᓂ ᐊᐅᓪᓚᖅᓯᒪᓂᖓᓂᒃ.

“ᕙᐃᔅᐳᒃᒧᐊᕈᓐᓇᕈᓂ ᐊᒻᒪ ᑎᑎᕋᕐᐸᒡᓗᓂ ᖃᓄᐃᓐᓂᕐᒥᓂᒃ ᐊᒻᒪ ᖃᓄᑐᐃᓐᓇᖅ ᑕᐃᒪᓕ ᑕᒪᓐᓇ ᖁᕕᐊᓇᒻᒪᕆᒐᔭᖅᑐᖅ,” ᐸᓪᓗᖅ-ᑯᓘᑦᓯᐄ ᐅᖃᕐᑐᖅ.