ᐃᓕᓐᓂᐊᖅᑏᑦ ᐅᖃᐅᓯᖃᖅᐳᑦ ᐃᓱᒫᓘᑕᐅᓂᐅᔪᓂ ᓯᕗᓂᒃᓴᖓᓂ ᐃᓄᒃᑎᑐᒻᒥ

For English version, see Future of Inuktitut cause for concern, high school speakers say

“ᑕᕝᕙᑐᖅ ᐃᓄᒃᑎᑐᑦ ᑕᑯᒃᓴᐅᑎᑦᑎᔪᓐᓇᕐᓚᖓ, ᑭᓯᐊᓂ ᑕᑯᒃᓴᐅᑎᑦᑎᑐᐃᓐᓇᕐᓂᐊᖅᐳᖓ ᖃᓪᓗᓈᑎᑐᑦ,” ᐅᖃᓚᐅᖅᐳᖅ ᐃᓚ ᐃᔅᑎ, 17-ᓂ-ᐅᑭᐅᓕᒃ ᐃᓕᓐᓂᐊᖅᑎ ᐃᓄᒃᓱᒃ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ ᐃᖃᓗᖕᓂ, ᐅᖃᓪᓚᖕᓂᐅᔪᒥ ᖃᓄᐃᓕᖓᓂᖓᓂ ᐃᓄᒃᑎᑐᒻᒥ ᐃᓕᓐᓂᐊᕐᕕᖕᒥ ᒪᐃ 15−ᒥ.

ᓄᓇᕗᒻᒥᐅᑕᐅᖏᓐᓇᖅᖢᓂ ᐃᓅᓯᓕᒫᖓᓐᓂ, ᐅᖃᓚᐅᖅᐳᖅ ᐃᓕᓐᓂᐊᖅᑎᑕᐅᓯᒪᙱᓚᖅ ᐅᖃᓪᓚᖕᓂᕐᒥ ᐃᓄᒃᑎᑐᒻᒥ. ᐅᖃᓚᐅᖅᐳᖅ ᑕᒪᓐᓇ ᐱᒻᒪᕆᐅᕗᖅ — ᒪᒃᑯᒃᑐᑦ ᐃᓐᓇᙳᓕᖅᑐᑦ ᐃᒻᒥᑎᒍᑦ ᐱᕕᒃᓴᖃᖅᑎᑕᐅᙱᒻᒪᑕ ᐃᓕᑦᑎᓂᕐᒥ ᓇᖕᒥᓂᖅ ᐅᖃᐅᓯᖓᓐᓂ ᐊᒻᒪ ᐃᓕᖅᑯᓯᖓᓐᓂ.

ᐃᔅᑎ ᐊᑕᐅᓯᐅᓚᐅᖅᐳᖅ 6−ᖑᔪᓂ ᑲᑎᒪᖃᑕᐅᔪᓂ ᐃᓚᐅᖃᑕᐅᓚᐅᖅᑐᓂ ᐅᖃᓪᓚᖕᓂᐅᔪᒥ, ᐋᖅᑭᒃᓱᖅᑕᐅᔪᒥ ᐃᓕᓐᓂᐊᕐᕕᐅᑉ ᐃᓅᖃᑎᒌᖑᔪᓂ ᖃᐅᔨᓴᐃᓂᐅᔪᒥ ᐱᓕᕆᕝᕕᖓᓂ ᐊᑐᓕᖅᑎᑦᑎᓇᓱᐊᕐᓂᕐᒥ ᐃᓄᒃᑎᑑᖃᒃᑲᓐᓂᕐᓂᕐᒥ ᐃᓕᓐᓂᐊᕈᑎᓕᐅᖅᑕᐅᓯᒪᔪᓂᑦ.

ᐅᐸᒃᑕᐅᓚᐅᖅᐳᖅ ᐃᓕᓐᓂᐊᖅᑎᓂᑦ ᖁᑦᑎᖕᓂᓕᖕᓂ 9−ᒥ 12−ᒧᑦ.

ᐃᔅᑎ — ᐋᒍᔅᑎ 2023−ᒥ ᐅᖃᐅᔾᔨᓚᐅᖅᐳᖅ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕕᒡᔪᐊᖓᓂ ᓄᓇᖃᖅᑳᖅᓯᒪᔪᓂ ᐊᒻᒪ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᑲᑎᒪᔨᕋᓛᖏᓐᓂ ᐃᓄᒃᑎᑐᒻᒥ ᐃᓕᓐᓂᐊᕐᕕᐊᕈᓰᑦ ᐱᔭᕆᐊᖃᓪᓗᐊᖅᐳᑦ ᓄᓇᕗᒻᒥ ᐃᓕᓐᓂᐊᕐᕕᐅᔪᓂ, ᓂᕈᐊᒐᒃᓴᐅᑐᐃᓐᓇᙱᓪᓗᑎᒃ — ᐃᓚᐅᖃᑕᐅᓚᐅᖅᐳᖅ ᑲᑎᒪᔨᐅᔪᓂ ᐊᓯᖏᓐᓂ ᓄᓇᓕᖕᓂ ᖃᐅᔨᒪᔭᐅᑦᑎᐊᖅᑐᓂ ᐃᓄᖕᓂ.

ᐅᖃᖅᑎᐅᔪᑦ ᐃᓚᖃᓚᐅᖅᐳᑦ ᔮᒃ ᐊᓄᒑᖅ, ᐃᓄᑐᖃᖅ ᐊᒻᒪ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᓚᐅᖅᓯᒪᔪᒥ; ᓯᓕᓇ ᑲᓪᓗᒃ, ᐃᓕᓴᐃᔨᐅᔪᖅ ᐊᒻᒪ ᐅᖃᓕᒫᒐᕐᓂ ᑎᑎᕋᖅᑎᐅᔪᖅ; ᒥᑐᓴᓕ ᑯᓄᒃ, ᐃᖃᓗᖕᓂ ᓄᓇᓕᐸᐅᔭᒥ ᑲᑎᒪᔨᐅᔪᖅ; ᐱᑦᔅ ᐊᓚᐃᙵ, ᐃᓕᖅᑯᓯᒧᑦ ᑲᒪᔨᐅᔪᖅ ᐃᓄᒃᓱᒃ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ; ᐊᒻᒪ ᐊᓗᑭ ᑰᑦᑎᖅ, ᐊᖓᔪᖅᑳᖅ ᓄᓇᕗᒻᒥ ᑐᙵᕕᒃᑯᓐᓂ.

ᐃᔅᑎ ᐅᖃᓪᓚᓚᐅᖅᐳᖅ ᖃᓪᓗᓈᑎᑐᑦ ᐅᖃᓪᓚᖕᓂᐅᔪᒥ, ᐊᓯᖏᑦ ᑲᑎᒪᔨᐅᔪᑦ ᑕᒪᒃᑭᒐᓚᒃ ᐅᖃᓪᓚᓚᐅᖅᐳᑦ ᐃᓄᒃᑎᑐᑦ. ᑕᒪᒃᑭᑦ ᑲᑎᒪᔨᐅᔪᑦ ᐊᖏᖃᑎᒌᒃᐳᑦ ᓯᕗᓂᒃᓴᖓ ᐃᓄᒃᑎᑐᒻᒥ ᐃᓱᒫᓗᖕᓇᖅᐳᖅ.

ᐃᔅᑎ, ᐃᓚᖏᑦ ᐃᒡᓗᓕᖕᒥᐅᑕᓪᓚᕆᐅᓪᓗᑎᒃ ᑭᓯᐊᓂ ᐃᖃᓗᖕᓂ ᓄᓇᖃᖅᓯᒪᕗᑦ ᑕᒪᒃᑭᒐᓚᖕᒥ ᐃᓅᓯᖓᓂ, ᐅᖃᓚᐅᖅᐳᖅ ᐃᓕᓐᓂᐊᖅᑎᑕᐅᓚᐅᖅᓯᒪᙱᓚᖅ ᐃᓄᒃᑎᑐᒻᒥ ᐃᓕᓐᓂᐊᕐᕕᖕᒥ. ᑕᒪᕐᒥᒃ ᐃᓕᓐᓂᐊᕐᓂᕐᒧᑦ ᐃᓕᓐᓂᐊᕐᕕᐊᕈᓯᖏᓐᓂ ᐃᓕᓐᓂᐊᖅᑎᑕᐅᓚᐅᖅᐳᑦ ᖃᓪᓗᓈᑎᑐᑦ.

ᐱᐅᓯᖃᑎᒌᖏᑦ ᐱᕈᖅᓴᑎᓪᓗᒋᑦ ᐸᕐᓇᒃᐸᓪᓕᐊᓪᓗᑎᒃ ᐃᓕᓴᐃᔨᙳᕐᓂᕐᒥ ᐊᒻᒪ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᐅᓂᕐᒧᑦ, ᐅᖃᓚᐅᖅᐳᖅ, ᐃᓄᒃᑎᑐᑦ ᐅᖃᐅᓯᕐᒥ ᐊᔪᙱᓐᓂᖃᔾᔮᙱᓚᑦ ᑐᓂᓯᓂᕐᒥ ᓯᕗᓂᒃᓴᒧᑦ ᐱᐅᓯᖃᑎᒌᖑᔪᓄᑦ.

“ᒪᒃᑯᒃᑐᑦ ᐃᓄᐃᑦ ᓄᓇᕗᒻᒥ ᐅᖃᓪᓚᓲᖑᔪᓂ ᐃᓄᒃᑎᑐᒻᒥ ᐱᓇᓱᐊᓪᓗᐊᖅᐳᑦ ᐊᖏᔫᑎᓂᑦ ᐱᓕᕆᓂᐅᔪᓂ ᓄᓇᕗᒻᒧᑦ ᐃᑲᔪᕐᓂᕐᒧᑦ ᐱᑕᖃᕐᓂᖓᓂ ᐃᓄᒃᑎᑐᒻᒥ,” ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᐅᖃᓪᓚᖕᓂᖃᓚᐅᖅᑎᓪᓗᒋᑦ.

ᐊᓄᒑᖅ, ᐊᐅᓪᓚᖅᑎᑕᐅᓪᓗᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐆᒪᐃᓐᓇᖅᓯᒪᔪᖅ, ᐅᖃᓚᐅᖅᐳᖅ ᐱᒻᒪᕆᐅᕗᖅ ᐸᐸᑦᑏᓐᓇᕐᓂᕐᒥ ᐅᖃᐅᓯᕐᒥ ᐃᑲᔪᕐᓂᕐᒧᑦ ᖄᖏᐅᔾᔨᓂᕐᒥ ᐱᓂᕐᓗᒡᔪᐊᕐᓂᐅᔪᓂ ᑕᐃᔅᓱᒪᓂᒃᑲᓐᓂᕐᒥ. ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ, ᐅᖃᓚᐅᖅᐳᖅ, ᐃᒻᒥᓂᒃ ᐊᒻᒪ ᐊᓯᖏᓐᓂ ᐃᓕᓐᓂᐊᖅᑏᑦ ᐅᖃᓪᓚᒋᐊᖃᓚᐅᙱᓚᑦ ᐃᓄᒃᑎᑐᒻᒥ.

“ᓵᓚᐅᓚᐅᖅᐳᒍᑦ ᖃᓪᓗᓈᓄᑦ. ᐊᖓᔪᖅᑳᕗᑦ ᓈᓚᐅᓚᐅᖅᐳᑦ ᖃᓪᓗᓈᓄᑦ. ᑭᓯᐊᓂ ᐅᖓᑖᓄᐊᕆᐊᖃᖅᐳᒍᑦ ᑖᔅᓱᒥᖓ,” ᐊᓄᒑᖅ ᐅᖃᓚᐅᖅᐳᖅ ᐃᓄᒃᑎᑐᑦ.

ᐱᓂᕐᓗᒡᔪᐊᕐᓂᖅ ᐃᓄᖕᓃᖏᓐᓇᐅᔭᕐᓂᐊᖅᐳᖅ ᖃᖓᓕᒫᑦᑎᐊᖅ, ᐅᖃᓚᐅᖅᐳᖅ ᐅᖃᓪᓚᖕᓂᖃᓚᐅᖅᑎᓪᓗᒋᑦ. ᐱᒻᒪᕆᐅᓂᐅᔪᖅ ᖃᓄᖅ ᑲᒪᒋᔭᐅᓂᖓᓂ.

“ᑭᒃᑯᓕᒫᑦ ᑐᑭᓯᐅᒪᔭᕆᐊᖃᖅᐳᑦ ᓄᓇᕗᒻᒦᓐᓂᑦᑎᓐᓂ, ᐊᒻᒪ ᐱᔾᔪᑕᐅᔪᖅ ᓄᓇᕗᓕᖃᓕᓚᐅᕐᓂᖓᓂ ᐱᔾᔪᑎᖃᖅᐳᖅ ᐃᓄᖕᓂ,” ᐅᖃᓚᐅᖅᐳᖅ.

“ᓄᓇᕗᑕᖃᕋᔭᙱᓚᖅ ᐃᓄᒃᑕᖃᓚᐅᙱᒃᑯᓂ.”

ᐅᓇ ᓯᕗᓪᓕᖅᐹᑦᑎᐊᖑᓪᓗᓂ ᐃᓕᓐᓂᐊᕐᕕᒃ ᐱᓕᕆᐊᖃᓚᐅᕐᓂᖓᓂ ᑲᑎᒪᓂᕐᒧᑦ ᐅᖃᓪᓚᖕᓂᐅᔪᒥ ᖃᓄᐃᓕᖓᓂᖓ ᐃᓄᒃᑎᑐᒻᒥ, ᐅᖃᓚᐅᖅᐳᖅ ᐃᓕᓴᐃᔨ ᐹᑐᕆᒃ ᒪᒃᑑᒪᑦ, ᐊᖓᔪᖅᑳᕆᔭᐅᔪᖅ ᐃᓕᓐᓂᐊᕐᕕᐅᑉ ᐃᓅᖃᑎᒌᖑᔪᓂ ᖃᐅᔨᓴᕐᓂᐅᔪᒥ ᐱᓕᕆᕝᕕᖓᓂ ᐊᐅᓚᑦᑎᓚᐅᖅᑐᒥ ᑲᑎᒪᓂᐅᔪᒥ.

“ᐊᔾᔨᒌᙱᕈᓘᔭᖅᑐᓂ ᐅᓄᕐᓂᐅᔪᓂ ᐃᓄᖕᓂ ᑐᓂᓯᓚᐅᖅᑐᒥ ᐃᓱᒪᒋᔭᖏᓐᓂ, ᐱᒻᒪᕆᕐᔪᐊᖑᔪᒥ,” ᐅᖃᓚᐅᖅᐳᖅ ᑭᖑᓂᐊᒍᑦ.

“ᐱᐅᒋᕐᔪᐊᖅᐸᕋ ᐃᓕᓐᓂᐊᕐᕕᖕᒥ ᖃᓄᐃᓐᓂᐅᓚᐅᕐᓂᖓᓂ ᐃᓄᒃᑎᑐᑦ ᓴᙱᓛᐅᖑᓚᐅᖅᑐᒥ.”

ᐅᖃᓚᐅᖅᐳᖅ ᑕᐃᒪᑐᖅ ᐃᓕᓐᓂᐊᕐᕕᒃ ᐋᖅᑭᒃᓱᐃᔭᕐᓂᐊᕐᓂᖏᓐᓂ ᐊᔾᔨᐸᓗᖏᓐᓂ ᖃᓄᐃᓐᓂᐅᔪᓂ ᓯᕗᓂᒃᓴᒥ ᐃᑲᔪᕐᓂᕐᒧᑦ ᐃᓕᓐᓂᐊᖅᑎᖏᓐᓂᑦ ᑐᑭᓯᐅᒪᓂᖏᓐᓂ ᐱᒻᒪᕆᐅᓂᖓᓂ ᐱᐅᓯᑐᖃᖏᓐᓂ.

“ᐅᖃᐅᔾᔨᓂᒐᓛᒐ ᐃᓕᖕᓄᑦ ᐃᓕᓴᐃᔨᐅᓪᓗᖓ ᓂᕈᐊᖅᓯᓗᑎᑦ ᐊᑕᐅᓯᐅᔪᒥ ᐱᐅᓯᒋᐊᖅᑎᑦᑎᓂᕐᒥ ᐃᓄᒃᑎᑐᒻᒥ,” ᒪᒃᑑᒪᑦ ᐅᖃᐅᔾᔨᓚᐅᖅᐳᖅ ᖁᙱᐊᖅᑐᓂ ᐃᓱᐊᓂ ᐅᖃᓪᓚᖕᓂᐅᔪᒥ.

“ᑎᑎᕋᖅᓯᓂᐅᒍᓂ ᒥᑭᑦᑐᒥ ᐅᖃᓗᕋᐅᔭᐅᑎᒥᒃ ᐅᕝᕙᓘᓐᓃᑦ ᐃᒃᓯᕚᖃᑎᖃᕐᓂᕐᒥ ᐃᓄᑐᖃᕐᒥ ᐊᒻᒪ ᐊᐱᖅᓱᕐᓂᕐᒥ ᐊᐱᖅᑯᑕᐅᔪᓂ ᑐᑭᓕᐊᖑᓂᐅᔪᓂᑦ, ᑭᒃᑯᓕᒫᑦ ᓂᕈᐊᖅᓯᒍᑎᒃ ᐊᑕᐅᓯᕐᒥ ᑭᓱᑐᐃᓐᓇᒥᒃ, ᐃᓄᒃᑎᑐᑦ ᐱᐅᓯᒋᐊᕐᓂᐊᖅᐳᖅ ᓄᓇᓕᑦᑎᓐᓂ.”