ᓄᓇᕗᒥᑦ ᒐᕙᒪᒃᑯᑦ ᐃᓱᒪᔪᑦ ᓄᑖᓂ ᐊᑭᑦᑐᕋᐅᑎᓂᐅᔪᓂᒃ ᐱᓕᕆᐊᖃᕈᒪᓪᓗᑎ ᐊᐅᓚᑦᑎᓂᕐᒥᑦ ᓛᒐ ᑐᔪᕐᒥᕕᒃᒥᑦ

ᐱᔨᑦᑎᕋᐅᑎᓕᕆᓂᕐᒧᑦ ᐊᖏᕈᑎᒋᔭᐅᔪᑦ ᐊᐅᓚᑦᑎᓂᕐᒥ ᐋᓐᓂᐊᕐᕕᓕᐊᖅᑐᓄᑦ ᑐᔪᕐᒥᕕᒃᒥ ᐊᑐᕐᑐᖅ ᑎᑭᓐᓇᓱᖕᓂᖓᓂ ᒫᔅᓯ 2028; ᐊᑯᓂᕈᓗᒃ ᐊᑐᕋᔭᖅᑐᒥ ᐊᖏᕈᑎᓂ ᐱᔭᕆᐊᖃᕐᒪᑕ ᐊᖏᒡᓕᒋᐊᖅᑎᑦᑎᓂᕐᒥᒃ ᐱᓕᕆᐊᖑᔪᒪᔪᖅ ᑲᔪᓯᔪᓐᓇᕐᓂᐊᕐᒪᑦ

ᓛᒐ ᑐᔪᕐᒥᕕᒃ ᓄᖅᑲᖅᑎᑦᑎᓚᐅᕐᒪᑕ ᐃᒡᓗᓕᐅᕐᓂᕐᒧᑦ ᐱᔪᓐᓇᐅᑎᒧᑦ ᐱᓇᓱᒍᑎᓂ ᕕᕝᕗᐊᕆ 2026-ᒥ ᐃᓱᒪᒃᓴᕐᓯᐅᓚᐅᖅᖢᑎᒃ ᑮᓇᐅᔭᓂ ᐱᔪᓐᓇᕋᔭᙱᓐᓂᖏᓐᓂ ᐊᑐᕋᔭᖅᑐᓂ 6-ᓂ ᓇᑎᓕᒃᒥᑦ ᐃᒡᓗᐊᓗᒃᒥ, 220-ᓂ ᐃᒡᓗᕈᓯᖃᕐᓗᓂ ᐋᓐᓂᐊᕕᓕᐊᕐᓯᒪᔪᓄᑦ ᐱᑖᓚᐅᖅᑎᓐᓇᒋᑦ ᐊᑯᓂᕈᓗᒃ ᑳᓐᑐᕌᕆᓇᔭᖅᑕᖓᓂ ᐅᑯᓇᙵᑦ ᓄᓇᕗᒥᑦ ᒐᕙᒪᒃᑯᓐᓂ. (ᐊᔾᔨᙳᐊᖅ ᐅᑯᓇᙵ DTAH ᐃᒡᓗᒃᓴᓂ ᑎᑎᕋᐅᔭᖅᑎᓂ)

By ᓃᕼᐊ ᐱᒧᓪ

To read the English version of this story, please see GN plans new bidding process to run Ottawa medical boarding home.

ᓄᓇᕗᒥᑦ ᒐᕙᒪᒃᑯᑦ ᐃᓱᒪᔪᑦ ᓄᑖᒥ ᑐᒃᓯᕋᐅᑎᒃᓴᒥᑦ ᐱᓕᕆᐊᖃᕈᒪᓂᕐᒧᑦ ᐊᐅᓚᑕᐅᓂᖓᓂ ᓛᒐ ᑐᔪᕐᒥᕕᒃ, ᐃᓄᖕᓄᑦ ᐋᓐᓂᐊᕐᕕᓕᐊᖅᑐᓄᑦ ᐋᑐᕚᒧᑦ ᑐᔪᕐᒥᕕᐅᕙᒃᑐᖅ.

ᖃᓄᐃᓕᐅᕐᓂᐅᔪᖅ ᑭᖑᓕᖅᐹᖑᔪᖅ ᐱᓕᕆᐊᖑᙱᑯᑖᒃᑐᒧᑦ ᐋᔩᖃᑎᒌᖕᓂᕐᒥᒃ ᐅᑯᐊᓗ ᓛᒐ ᑐᔪᕐᒥᕕᐅᑉ   ᐊᐅᓚᑦᑎᔨᐅᔪᓪᓗ ᐊᒻᒪᓗ ᓄᓇᕗᒧᑦ ᒐᕙᒪᒃᑯᓐᓄᓪᓗ ᐊᒃᑐᐃᓂᖃᕈᓐᓇᖅᑐᖅ ᐊᖏᒡᓕᒋᐊᖅᑎᑦᑎᓂᕐᒧᑦ ᐸᕐᓇᐅᑎᐅᔪᓂᒃ ᑐᔪᕐᒥᕕᒃᓴᒧᑦ.

ᓛᒐ ᑐᔪᕐᒥᕕᒃᑯᑦ ᑐᓂᓯᓚᐅᕐᒪᑕ ᑭᐅᔾᔪᑎᒋᔭᐅᔪᓂᒃ ᓄᓇᕗᒥᑦ ᒐᕙᒪᒃᑯᓐᓄᑦ ᑐᒃᓯᕋᐅᑎᒋᖅᑳᕐᓂᑯᐊᓂ  ᐱᓕᕆᐊᖃᕈᒪᔪᓂᒃ, ᑖᓐᓇᓗ ᒪᑐᔭᐅᓚᐅᕐᓯᒪᓪᓗᓂ ᒪᐃ 2024-ᒥ, ᐊᐅᓚᑦᑎᔪᒪᓂᕐᒧᑦ ᑐᔪᕐᒥᕕᒃᒥ, ᑭᓯᐊᓂᓕ ᑐᓂᓯᓚᐅᕐᓯᒪᙱᑦᑐᑦ ᑐᒃᓯᕋᐅᓯᐅᖅᑐᓄᑦ, ᐅᖃᓚᐅᕐᑐᖅ ᐊᖓᔪᖅᑳᕆᔭᐅᔪᖅ ᒪᓚᐃᔭ ᔨᐅᕐ ᐅᖃᓚᐅᕐᑐᖅ ᐅᒃᑑᐱᕆ 29-ᖑᑎᓪᓗᒍ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑐᒃᓯᕋᐅᑎᓕᕆᓂᖅ ᑳᓐᑐᕌᓂ ᐊᕐᕌᒍᓂ ᐊᕙᑎᓂ (20) ᐊᐅᓚᑦᑎᔾᔪᑎᐅᓂᐊᓚᐅᕐᓯᒪᔪᖅ, ᒪᕐᕈᐃᓂ ᐊᕐᕌᒍᓄᑦ ᑕᓪᓕᒪᓄᑦ ᓄᑖᙳᕆᐊᕈᑎᖃᕋᔭᖅᖢᑎᒃ ᑖᓐᓇᓗ ᐊᕐᕌᒍᓂ 30-ᓂ ᐊᐅᓚᑦᑎᔾᔪᑎᐅᓇᔭᓚᐅᖅᖢᓂ.

ᐊᑯᓂᕈᓗᒃ ᐊᖏᕈᑎᐅᓇᔭᓚᐅᕐᑐᖅ ᐋᖅᑭᒃᑕᐅᓯᒪᓇᓱᓚᐅᕐᑐᖅ ᐃᑲᔪᕈᑎᐅᓗᓂ ᐊᑭᑦᑐᕋᐅᑎᔪᓂ ᓵᓚᒃᓴᖅᑐᖅ ᑮᓇᐅᔭᓂ ᐃᑲᔫᑎᖃᖅᑎᓪᓗᒍ ᓂᐅᕕᐅᑎᐅᓇᔭᖅᑐᒥ ᐅᕝᕙᓘᓐᓃᑦ ᐃᒡᓗᓕᐅᕈᑎᒃᓴᒥ ᐃᓄᒋᖃᑦᑕᕐᓂᐊᖅᑕᖓᓄᑦ ᓈᒻᒪᒃᑐᒥ, ᐅᖃᓚᐅᕐᑐᖅ ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕᐅᓂᑯ ᔮᓐ ᒪᐃᓐ ᐊᕐᕌᖑᓂ ᐅᖓᓪᓕᐅᓚᐅᕐᑐᒥ ᒪᓕᒐᓕᕆᔨᒃᑯᑦ ᑲᑎᒪᑲᑕᒃᑎᓪᓗᒋᑦ.

ᐊᕐᕌᒍᒐᓴᐅᓕᖅᑐᓂ ᓛᒐ ᑐᔪᕐᒥᕕᒃ ᐃᖏᕐᕋᔪᓐᓇᐃᓐᓇᕐᒪᑦ ᐅᑯᑎᒎᓇᖅ ᐋᑐᕚᒥ ᓄᓇᓕᖕᓄᑦ ᐸᕐᓇᐅᑎᒋᔭᐅᔪᑎᒍ ᓴᓇᓂᐊᕐᓗᑎᒃ ᓇᑎᓕᒃᒥ 6-ᓕ ᐃᒡᓗᐊᓗᒃᒥ, 220-ᓂ ᐃᒡᓗᕈᓯᖃᕐᓗᓂ ᒫᓂ ᕼᐊᓐᑦ ᑲᓚᑉ ᐊᖅᑯᑎᐊᓂ ᐊᒻᒪ ᓰᕗᕋᐃᑦ ᐋᕕᓂᐅᒥ — ᐅᖓᓯᖕᓂᖃᓪᓗᐊᖅᑐᖅ 5 ᑭᓛᒥᑕᓂ ᐅᐊᓇᐅᑉ ᑲᓇᖕᓇᖅᐸᓯᐊᓂ ᐋᑐᕚᒥ ᒥᑦᑕᕐᕕᐊᓗᒃᒧᑦ — ᐃᓄᖃᕈᓐᓇᕋᔭᖅᖢᓂᓗ 350-ᓂ ᑐᔪᕐᒥᔪᓂ.

ᒫᓐᓇᓕ ᑐᔪᕐᒥᕕᐅᔪᖅ ᕆᑦᔅᒪᓐ ᐊᖅᑯᑎᐊᓂ ᐃᓄᖃᕈᓐᓇᕐᒪᑦ 195-ᓂ.

ᓛᒐ ᑐᔪᕐᒥᕕᒃ ᓂᐅᕕᓚᐅᕐᓯᒪᔪᑦ ᓄᓇᒥ ᕼᓐᑦ ᑲᓚᑉ ᐊᖅᑯᑎᐊᓃᑦᑐᒥ 2020-ᖑᑎᓪᓗᒍ. ᐱᓕᕆᐊᖑᔪᖅ ᐊᕐᕌᒍᒐᓴᖕᓂ ᓄᓇᒥ ᐊᑐᕈᓐᓇᖅᑐᒥ ᐸᕐᓇᐅᓯᐅᓚᐅᕐᓯᒪᖕᒪᑕ ᐊᒻᒪᓗ 2023-ᒥ ᐋᓐᑎᐅᕆᐅᒥ ᓄᓇᓕᕆᔨᒃᑯᓐᓄᑦ ᓈᒻᒪᙱᓕᐅᕈᑎᐅᔪᖅ ᐋᖅᑭᒋᐊᖅᑕᐅᓂᑰᓪᓗᓂ, ᐅᑯᐊ ᓄᓇᓕᖕᓂ ᑲᑐᔾᔨᖃᑎᒌᖑᔪᑦ ᓈᒻᒪᒃᓴᓚᐅᕐᓯᒪᙱᒻᒪᑕ ᓄᓇᓕᕐᔪᐊᑉ ᐸᕐᓇᐅᓯᐊᕆᓂᑯᖓᓂ ᐊᒻᒪ ᐃᓂᓕᐊᕆᔭᐅᓇᓱᒃᑐᒥ ᐋᖅᑭᒋᐊᕈᑎᓂᒃ.

ᔪᓚᐃ 2025-ᒥ ᑖᒃᑯᐊ ᑲᒻᐸᓂᐅᔪᑦ ᐅᖃᓚᐅᕐᓯᒪᔪᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐱᑐᐃᓐᓇᕆᐊᖃᓕᕐᓂᕋᖅᖢᑎᒃ ᐊᑭᓕᐅᑎᐅᓂᐊᖅᑐᓂ ᐱᓕᕆᐊᒧᑦ ᑭᓯᐊᓂᓕ ᐊᑯᓂᕈᓗᒃ ᐊᑐᕐᑕᐅᓇᔭᖅᑐᒥ ᐊᖏᕈᑎᒥ ᐱᔭᕆᐊᖃᓚᐅᕐᓯᒪᓪᓗᑎᒃ ᐅᑯᐊᓗ ᓄᓇᕗᒥᑦ ᒐᕙᒪᒃᑯᑦ ᖃᓄᐃᓕᐅᓕᓚᐅᖅᑎᓐᓇᒋᑦ.

ᕕᕝᕗᐊᕆᒥ, ᓛᒐ ᑐᔪᕐᒥᕕᒃᒧᑦ ᑲᑎᒪᔩᑦ ᐃᓱᒪᓕᓚᐅᕐᓯᒪᖕᒪᑕ ᐲᕈᒪᓪᓗᓂᔾᔪᒃ ᐃᒡᓗᓕᐅᕐᓂᕐᒧᑦ ᐊᖏᕈᑎᒧᑦ ᐱᓇᓱᒍᑎᖏᓐᓂ ᐅᑯᓄᖓ ᓄᓇᓕᐸᐅᔭᓄᑦ.

“ᐱᑕᖃᖅᑎᓐᓇᒍ ᐊᑯᓂᕈᓗᒃ ᐊᑐᕐᑕᐅᓇᔭᖅᑐᒥ ᑳᓐᑐᕌᒥ ᐃᓱᒪᒋᔭᐅᔪᖅ ᐅᕙᓂ ᑐᒃᓯᕋᐅᓯᐊᕐᒥ, ᐊᒻᒪ ᐱᑕᖃᖅᑎᓐᓇᒍ ᐊᑐᓪᓚᕆᖕᓂᐊᕆᐊᒃᓴᖓᓂ ᖃᓄᑎᒋ ᐊᖏᑎᒋᓂᐊᕐᓂᖓ ᐱᔭᐅᔭᕆᐊᓕᐅᑦ ᑕᐃᒪᓕ ᐊᔪᓐᓇᕋᔭᕐᒪ ᐅᕙᑦᑎᓐᓄ ᐊᑐᐃᓐᓇᖃᕆᐊᒃᓴᖅ ᑮᓇᐅᔭᖅᑐᔪᓄᑦ ᐱᔭᐅᔭᕆᐊᓕᖕᓄᑦ ᐱᐊᓂᒃᑕᐅᓂᐊᕈᓂ ᐱᓕᕆᐊᒃᓴᖅ,” ᔨᐅᕐ ᐅᖃᓚᐅᕐᓯᒪᔪᖅ.

“ᓱᓕ ᑲᔪᓯᓯᒪᔪᒍᑦ ᐅᑕᕿᓪᓗᑕ ᓄᓇᕗᒥᑦ ᒐᕙᒪᒃᑯᓐᓂ ᑭᖑᓪᓕᕐᒥ ᖃᓄᐃᓕᐅᕈᑎᐅᓂᐊᖅᑐᓂᒃ.”

ᑐᒃᓯᕋᐅᑎᒋᔭᐅᔪᖅ ᐊᖏᒡᓕᒋᐊᖅᑎᑦᑎᓂᖅ ᓛᒐ ᑐᔪᕐᒥᕕᐅᑉ ᐃᒻᒥᒃᑰᖅᖢᑎᒃ ᐱᓕᕆᐊᖓ ᐊᒻᒪᓗ ᓄᓇᕗᒥᑦ ᒐᕙᒪᒃᑯᓐᓂ ᐃᑲᔫᑎᒃᓴᓂ ᐱᑲᑕᙱᖢᑎᒃ ᐅᕝᕙᓘᓐᓃᑦ ᑮᓇᐅᔭᑎᒍᑦ ᐃᑲᔪᖅᑕᐅᙱᖢᑎᒃ, ᐅᓇ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖃᓪᓚᒃᑎᐅᔪᖅ ᓵᒪᐃᓐ ᑎᐅᕈᕌᓯᐊᔅ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ.

ᓄᓇᕗᒥᑦ ᒐᕙᒪᒃᑯᑦ ᐃᓱᒪᔪᑦ ᓄᑖᒥ ᑐᒃᓯᕋᐅᑎᓂ ᐱᓕᕆᔪᒪᔪᓄᑦ ᐱᔨᑦᑎᕋᐅᑎᓂ ᐱᓕᕆᓕᕐᓂᐊᕈᒪᓪᓗᑎᒃ ᑭᓯᐊᓂᓕ ᐅᖃᕐᓯᒪᙱᑦᑐᑦ ᖃᖓᐅᓇᔭᕐᒪᖔᑕ.

ᓄᓇᕗᒥᑦ ᒐᕙᒪᒃᑯᑦ ᒫᓐᓇ ᑳᓐᑐᕌᕆᔭᖓ ᐋᓐᓂᐊᕐᕕᓕᐊᖅᑐᓄᑦ ᑐᔪᕐᒥᕕᒃᒧᑦ ᐅᑯᓄᖓ ᓛᒐ ᑐᔪᕐᒥᕕᒃᒧᑦ, ᑖᓐᓇᓗ ᐱᖁᑎᒋᔭᐅᓪᓗᓂ ᓄᓇᓯ ᑯᐊᐳᕇᓴᓐᑯᓐᓄᑦ ᐊᒻᒪ ᕿᑭᖅᑖᓗᒃ ᑯᐊᐳᕇᓴᓐᑯᓐᓄᑦ ᐊᑐᕐᑐᖅ ᓱᓕ ᑎᑭᓇᓱᖕᓂᖓᓂ ᒫᔅᓯ 31, 2028, ᑎᐅᕋᓯᐊᔅ ᐅᖃᓚᐅᕐᑐᖅ.

ᐱᓕᕆᕝᕕᐅᔪᖅ ᐃᓱᒪᔪᑦ ᐱᔨᑦᑎᕋᐅᑎᑦ ᑲᔪᓯᓇᔭᕐᓂᖏᓐᓂ ᑖᔅᓱᒨᓇ ᐊᖏᕈᑎᑎᒍ ᐊᒻᒪᓗ ᓄᖅᑲᖅᑎᑕᐅᔾᔮᕋᓱᒋᙱᖢᑎᒃ, ᐅᖃᕐᑐᖅ.

Share This Story

(0) Comments

Join the Conversation

Your email address will not be published. Required fields are marked *

*