ᒐᕙᓇ ᔭᓄᕈᒥᑦ ᑐᓐᓂᖅᑯᓯᐊᖅ ᐃᓕᓴᕆᔭᐅᔾᔪᑎᐅᕗᖅ ᔨᕐᒪᐃᓐ ᐊᕐᓇᑦᑕᐅᔪᕐᒥ

“ᑎᑎᕋᐅᔭᖅᖢᓂ ᐃᓱᒪᓐᓇᙱᒻᒪᑦ ᑮᓇᐅᔭᒥ ᐅᕝᕙᓘᓐᓃᑦ ᐃᓕᓴᕆᔭᐅᔾᔪᑎᒥ, ᖁᕕᐊᒋᑐᐃᓐᓇᖅᖢᒍ ᐱᓕᕆᐊᕆᔭᐃᑦ,” ᐃᓅᓯᓕᒫᖓᓂ ᑎᑎᕋᐅᔭᒐᖅᑎ ᐅᖃᖅᑐᖅ

ᔨᕐᒪᐃᓐ ᐊᕐᓇᑦᑕᐅᔪᖅ ᐃᓚᒋᔭᐅᔪᖅ ᑕᒪᑐᒪᓂ ᐊᕐᕌᒍᒥ ᐃᓕᓴᕆᔭᐅᔾᔪᑎᑖᖅᑐᓂᒃ ᒐᕙᓇ ᔭᓄᕈᓪ ᐃᓕᓴᕆᔭᐅᔾᔪᑎᖓᓂᒃ ᐅᑯᓄᖓ ᑕᑯᓐᓇᒐᕐᓄᑦ ᐊᒻᒪ ᑎᑎᕋᐅᔭᒐᕐᓄᑦ. (ᐊᔾᔨᙳᐊᖅ ᐅᑯᓇᙵᑦ ᑲᓇᑕᒥ ᑲᑎᒪᔨᕐᔪᐊᒃᑯᓐᓂ ᓴᓇᐅᒐᓕᕆᓂᕐᒧᑦ (Canada Council for the Arts)

By ᑕᔅᑎᓐ ᐸᑖᕐ

For an English version of this story, see Governor General’s Award honours storied career of Germaine Arnaktauyok

ᐱᕈᖅᐸᓪᓕᐊᓕᖅᖢᓂ ᐃᒡᓗᓕᐅᑉ ᓯᓚᑖᓂ. ᔨᕐᒪᐃᓐ ᐊᕐᓇᑦᑕᐅᔪᖅ ᑎᑎᕋᕐᕕᒃᓴᖃᕈᓐᓇᓚᐅᙱᑦᑐᖅ, ᑭᓯᐊᓂᓕ ᑕᒪᓐᓇ ᓄᖅᑲᕈᑎᒋᓚᐅᕐᓯᒪᙱᑕᖓ ᐃᓱᒪᒋᔭᒥᓂ ᓴᖅᑭᑎᑦᑎᔪᓐᓇᕐᓂᖓᓂᒃ.

ᑭᓯᐊᓂᓕ ᒪᑯᓂᖓ ᑕᒧᐊᑦᑐᐊᑉ ᐴᖏᓐᓂ ᐱᖃᖃᑦᑕᓚᐅᕐᓯᒪᔪᖅ ᐊᑖᑕᖓᑕ ᐊᖏᕐᕋᐅᑎᔭᖏᓐᓂ.

“ᑲᑎᖃᑦᑕᓚᐅᕐᓯᒪᒐᒃᑭ ᐊᒻᒪ ᒥᑭᑦᑐᓂ ᑎᑎᕋᐅᔭᕐᕕᒋᕙᒃᖢᒋᑦ,” ᐅᖃᕐᑐᖅ ᐊᕐᓇᑦᑕᐅᔪᖅ.

“ᐱᒋᐊᕈᑎᒋᓚᐅᕐᓯᒪᔭᕋ ᑎᑎᕋᐅᔭᖃᑦᑕᕐᓂᕐᒥᒃ.”

ᐅᓇ ᐱᓕᕆᐊᖓ ᐃᓅᓯᓕᒫᖓᓂ ᐱᓕᕆᐊᕆᓕᕐᑕᖓ ᐊᒻᒪᓗ ᒫᓐᓇ ᐃᓕᓴᕆᔭᐅᔾᔪᑎᒋᓕᖅᖢᓂᐅᒃ.

ᑕᖅᑭᐅᓚᐅᕐᑐᒥ, ᑲᓇᑕᒥ ᑲᑎᒪᔨᕐᔪᐊᑦ ᓴᓇᐅᒐᓕᕆᓂᕐᒧᑦ ᑐᓴᖅᑎᑦᑎᓚᐅᕐᓯᒪᖕᒪᑕ ᐅᓇ ᐊᕐᓇᑦᑕᐅᔪᖅ, 75, ᓵᓚᒃᓴᕐᓂᖓᓂᒃ ᒐᕙᓇ ᔭᓄᕈᒧᑦ ᐃᓕᓴᕆᔭᐅᔾᔪᑎᒥᒃ ᐅᑯᓄᖓ ᑕᑯᓐᓇᒐᕐᓄᑦ ᐊᒻᒪ ᑎᑎᕋᐅᔭᒐᕐᓄᑦ, ᐱᖃᑎᒋᔭᐅᓕᖅᖢᓂ ᐃᓅᔪᓐᓃᕐᓯᒪᓕᕐᑐᒧᑦ ᐃᓕᓴᕆᔭᐅᔾᔪᑎᑖᓚᐅᕐᓯᒪᔪᒧᑦ ᑭᓐᓄᐊᔪᐊᒃ ᐊᓯᕙᒃ 2008-ᖑᑎᓪᓗᒍ.

“ᐊᒃᓱᐊᓗᒃ ᓂᕆᐅᓚᐅᙱᑦᑐᖓ,” ᐅᖅᑐᖅ.

ᑕᐃᒪᙵ 1999-ᒥ, ᐅᓇ ᒐᕙᓇ ᔭᓄᕈᓪ ᐃᓕᓴᕆᔭᐅᔾᔪᑎᖓ ᐅᑯᓄᖓ ᑕᑯᓐᓇᒐᕐᓄᑦ ᐊᒻᒪ ᑎᑎᕋᐅᔭᒐᕐᓄᑦ ᐃᓕᓴᕐᓯᒍᑎᐅᓯᒪᓕᕐᑐᖅ ᐱᓕᕆᐊᖃᓪᓚᕆᒃᓯᒪᔪᓂᒃ ᑲᓇᑕᒥ ᑎᑎᕋᐅᔭᒐᓕᕆᓂᕐᒥᒃ.

ᐊᕐᕌᒍᒐᓴᐅᓕᕐᑐᓂᒃ 60 ᐅᖓᑖᓂ, ᐊᕐᓇᑦᑕᐅᔪᖅ, ᑎᑎᕋᐅᔭᒐᖏᓐᓂᒃ ᒥᖑᐊᕐᑎ, ᑎᑎᕋᐅᔭᒐᕐᓂ ᓴᕿᑎᑦᑎᕙᓪᓕᐊᔨ ᐊᒻᒪᓗ ᐅᖃᓕᒫᒐᕐᓄᑦ ᑎᑎᕋᐅᔭᒐᕐᑎ, ᖃᐅᔨᒪᔭᐅᑦᑎᐊᓕᕐᑐᖅ ᓴᖅᑭᑎᑦᑎᒍᑎᒋᕙᒃᑕᖏᓐᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪ ᖁᕕᐊᓲᑎᐅᕙᒃᑐᓂᒃ ᒪᐅᖓ ᑐᓂᙳᐊᓕᐅᖃᑦᑕᕐᓂᕐᒧᑦ ᐊᒻᒪᓗ ᐊᕐᓇᓄ ᑐᕌᖓᔪᓂ ᑎᑎᕋᐅᓯᖃᖃᑦᑕᕐᓂᕐᒥ.

ᑎᑎᕋᐅᔭᖃᑦᑕᖅᑕᖏ ᓴᖅᑭᔮᖅᑎᑕᐅᖃᑦᑕᕐᓯᒪᓕᕐᑐᑦ ᓄᓇᕐᔪᐊᓕᒫᒥᑦ, ᐊᒻᒪᓗ ᐅᕙᓂ ᐃᓄᑐᐊᖑᓪᓗᓂ ᓴᖅᑭᔮᒐᖃᖅᑎᓪᓗᒍ ᐅᐃᓂᐱᒃ ᑎᑎᕋᐅᔭᒐᕐᓂ ᓴᖅᑭᔮᒐᖃᕐᕕᒃᒥᑦ 1998-ᖑᑎᓪᓗᒍ.

ᐊᕐᕌᒍ ᐊᓂᒍᕐᑎᓪᓗᒍ, ᐊᕐᓇᑦᑕᐅᔫᑉ ᖃᓪᓗᓈᖅᑕᒧᑦ ᑎᑎᕋᐅᔭᒐᖓ, ᕿᓚᐅᔾᔭᕐᑎ (The Drummer), ᓴᖅᑭᔮᖅᑎᑕᐅᓚᐅᕐᓯᒪᔪᖅ ᑑᓂᐅᑉ ($2.00 ᓴᕕᕋᔭᒃ) ᐃᒡᓗᐊᒍᑦ ᐅᑯᓇᙵᑦ ᓴᖅᑭᑎᑕᐅᓪᓗᓂ ᕈᐃᐅᓪ ᑲᓃᑎᐊᓐ ᒥᓐᑦ ᐃᖅᑲᐅᒪᒋᓪᓗᒍ ᓄᓇᕗᑦ ᐱᒋᐊᓕᓚᐅᕐᓂᖓᓂᒃ.

ᐊᕐᓇᑦᑕᐅᔪᖅ ᓂᕈᐊᒐᒃᓴᙳᖅᑎᑕᐅᓚᐅᕐᓯᒪᔪᖅ ᒐᕙᓇ ᔭᓄᕈᓪ ᐃᓕᓴᕆᔭᐅᔾᔪᑎᖓᓄᑦ ᐆᒧᖓ ᑖᓖᓐ ᑲᐅᕙᑦ ᕗᐊᐃᑦᒧᑦ, ᑲᒪᔨᒋᔭᐅᔪᖅ ᐃᓄᐃᑦ ᑎᑎᕋᐅᔭᒐᖏᓐᓂᒃ ᐅᐃᓂᐱᒡ ᑎᑎᕋᐅᔭᒐᕐᓂᒃ ᓴᖅᑭᔮᒐᖃᕐᕕᒃᒥᑦ.

“ᐊᕐᓇᑦᑕᐅᔪᖅ ᐱᓕᕆᐊᖓᒍᑦ ᓴᖅᑭᔮᕐᓂᖃᒻᒪᕆᖕᒪᑦ ᑲᓇᑕᒥ ᑎᑎᕋᐅᔭᒐᓕᕆᓂᒃᑯ,” ᕗᐊᐃᑦ ᐅᖃᓚᐅᕐᑐᖅ ᐃᓕᓴᕆᔭᐅᔾᔪᑎᒃᓴᖅ ᑐᓴᖅᑎᑦᑎᒍᑎᐅᑎᓪᓗᒍ.

“ᐃᒻᒥᓂ ᐋᖅᑭᒃᓯᓯᒪᖕᒪᑦ ᓇᐅᒃᑰᕐᓂᐊᕐᓂᕐᒥᓂᒃ ᐊᒻᒪᓗ ᐋᖅᑭᒃᓯᓯᒪᓪᓗᓂ ᐃᒻᒥᒃᑰᖓᔪᒃᑯᑦ ᓴᖅᑭᑎᑦᑎᔪᓐᓇᕐᓂᕐᒥᒃ ᐅᖃᐅᓯᐅᕙᒃᑐᓂᒃ.”

ᐊᒻᒪᓗ ᐃᓕᖅᑯᓯᖓᒍᑦ ᑎᑎᕋᐅᔭᖃᑦᑕᕐᓯᒪᓂᖓ ᐃᓚᖃᕆᓪᓗᓂ, ᑖᓐᓇ ᐊᕐᓇᑦᑕᐅᔪᖅ ᑎᑎᕋᐅᔭᒐᕐᓯᒪᖕᒪᑦ ᐅᓄᕈᓘᔭᕐᑐᓂᒃ ᓱᕈᓯᕐᓄᑦ ᐅᖃᓕᒫᒐᓕᐊᖑᔪᓂᒃ ᐊᒻᒪᓗ ᓇᖕᒥᓂᖅ ᐅᖃᓕᒫᒐᒃᓴᓕᐅᕐᓯᒪᓪᓗᓂ, ᐆᒥᖓ ᐃᓚᖃᖅᖢᑎᒃ

My Name Is Arnaktauyok: The Life and Art of Germaine Arnaktauyok (ᐅᕙᖓ ᐊᕐᓇᑦᑕᐅᔪᖅ: ᐃᓅᓯᖓ ᐊᒻᒪ ᑎᑎᕋᐅᔭᖓᒋᑦ ᔨᕐᒪᐃᓐ ᐊᕐᓇᑦᑕᐅᔫᑉ) ᑖᒃᑯᐊᓗ ᐅᓂᒃᑲᐅᓯᖃᖅᖢᑎᒃ ᐃᓅᓯᖓᓂᒃ ᐊᒻᒪ ᐱᓕᕆᐊᕆᓯᒪᔭᖓᓂᒃ — ᒫᙵᑦ ᐃᓕᓐᓂᐊᕆᐊᕐᕕᖕᒧᑦ ᐃᓕᓐᓂᐊᕆᐊᖃᑦᑕᓚᐅᕐᓯᒪᓂᖓᓂᒃ ᒪᐅᖓ ᑎᑎᕋᐅᔭᒐᒃᑎᒻᒪᕆᐅᓕᕐᓂᖓᓄᑦ.

ᐊᕐᕌᓂ ᐊᕐᓇᑦᑕᐅᔪᖅ ᖃᐅᔨᓴᕐᑎᒋᔭᐅᒪᐅᕐᓯᒪᔪᖅ, ᑎᑎᕋᐅᔭᒐᖅᑎᐅᓪᓗᓂ ᐊᒻᒪᓗ ᑕᐅᑐᒃᑕᐅᔪᒃᓴᓂᒃ ᐃᑲᔪᖅᑐᐃᕙᒃᖢᓂ ᐅᑯᓄᖓ ᐅᓂᒃᑳᖅᑐᐊᑦ, ᑐᓴᒐᒃᓴᓕᕆᔨᐅᔪᑦ ᐊᒻᒪ ᖁᙱᐊᖅᑕᐅᑎᑦᑎᕙᒃᑐᓂ ᑖᒃᑯᐊᓗ ᑎᑎᕋᐅᔭᒐᖏᓐᓄᑦ ᐱᓕᕆᐊᖃᓕᕐᓯᒪᓪᓗᑎᒃ.

ᕗᐊᐃᑦᒧᓪᓕ, ᐊᕐᓇᑦᑕᐅᔪᖅ ᖃᓄᐃᓕᐅᕐᓂᕆᔭᖓ ᐱᓕᕆᐊᕆᔭᖓᑎᑐᑦ ᐊᒃᑐᐃᒍᑎᑕᐃᓐᓇᕐᓂᐊᖅᑐᖅ ᓄᓇᕐᔪᐊᒥ ᑎᑎᕋᐅᔭᒐᓕᕆᓂᕐᒥᒃ ᐅᖓᑖᓄᓪᓘᓐᓃᑦ.

“ᐃᓅᓯᓕᒫᖓᓂ ᐱᒻᒪᕆᐅᑎᓯᒪᓂᖓᓂᒃ ᐃᓄᐃᑦ ᐃᓕᖅᑯᓯᖓᓂ ᐃᑲᔪᕈᑎᐅᓯᒪᒻᒪᕆᒃᑐᖅ ᐅᓄᕐᑐᓄᑦ ᐃᓅᓱᖕᓂᕐᓴᓄᑦ ᑎᑎᕋᐅᔭᒐᖅᑎᓄ,” ᐅᖃᖅᑐᖅ ᕗᐊᐃᑦ.

ᐃᓕᓴᕆᔭᐅᓯᒪᓕᕋᓗᐊᖅᖢᓂ ᐊᒻᒪ ᐊᓂᒍᐃᑦᑎᐊᓯᒪᒐᓗᐊᖅᖢᓂ ᐱᓕᕆᐊᖓᒍᑦ, ᐊᕐᓇᑦᑕᐅᔪᖅ ᐅᖃᓚᐅᕐᑐᖅ ᐱᓕᕆᐊᒥᓂᒃ ᖁᕕᐊᒋᔭᖃᕐᓂᖓᓄᑦ ᑲᔪᓯᒍᑎᒌᓐᓇᕐᓂᕋᖅᖢᓂᐅᒃ.

ᐊᒻᒪᓗ ᐅᓇ ᐃᓅᓯᓕᒫᖅ ᐃᓕᑦᑎᕙᓪᓕᐊᖃᑦᑕᕐᓂᕐᒥᒃ ᖃᐅᔨᑎᑦᑎᒃᑲᓐᓂᕋᓱᒃᖢᓂ, ᐊᕐᓇᑦᑕᐅᔪᖅ ᐅᖃᐅᔾᔨᓚᐅᕐᑐᖅ ᒪᑯᓄᖓ ᐃᓄᖕᓄᑦ ᑎᑎᕋᐅᔭᒐᖅᐸᓪᓕᐊᔪᓂᒃ ᐊᑐᖅᓯᒪᔭᒥᓂᒃ: ᐱᓕᕆᐊᕆᔪᒪᔭᐃᑦ ᐱᓇᓱᐃᓐᓇᕐᓗᒍ.

“ᑎᑎᕋᐅᔭᖅᖢᓂ ᐃᓱᒪᓐᓇᙱᒻᒪᑦ ᑮᓇᐅᔭᒥ ᐅᕝᕙᓘᓐᓃᑦ ᐃᓕᓴᕆᔭᐅᔾᔪᑎᒥ, ᖁᕕᐊᒋᑐᐃᓐᓇᖅᖢᒍ ᐱᓕᕆᐊᕆᔭᐃᑦ,” ᐃᓅᓯᓕᒫᖓᓂ ᑎᑎᕋᐅᔭᒐᖅᑎ ᐅᖃᖅᑐᖅ.

“ᐃᓱᒪᒍᕕᑦ ᐱᔪᓐᓇᕐᓂᕐᓂᒃ, ᐊᑏ ᐱᓇᓱᐃᓐᓇᕆᐊᖃᖅᐳᑎᑦ.”

Share This Story

(0) Comments

Join the Conversation

Your email address will not be published. Required fields are marked *

*